رواية سوء اختيار الفصل السادس 6 بقلم اسماء عبدالعظيم
الفصل السادس
فى منزل ناهد :
( ناهد ) قومى يااميرة هاتى لى كوباية مايه …
( اميرة ) حاااااااضر وماشيه بتكلم نفسها سمعها هشام وهو خارج من الحمام وهى بتبرطم بالكلام ………..
( هشام ) فى ايه ياميرة … بتكلمى نفسك
( اميرة ) امك قرفانى كل شويه طلبات… انا زهقت انا مش خدامه عندها ….
( هشام) انتى بتقولى ايه ماتحترمى نفسك ايه قرفاكى دى ليه ياعنى بتطلب منك ايه اصلا …
( اميرة ) كل شويه عاوزة كوباية مايه – وشويه عاوز الدواء – وشويه هاتى التليفون يوووه انا زهقت من دى عيشه ….. محسسانى انى خدامه عندها …
( هشام ) والله مش عجباكى العيشه دى روحى عند امك… يمكن هناك العيشه احلى وخصوصا بعد ما ابوكى مات…… وامك راحت تتجوز راجل ثانى زى ماتكون ماصدقت …
( اميرة ) احترم نفسك ياهشام … امى كانت بتحب ابويا .. بس هى مقدرتش تقعد فى البيت لوحدها وكانت محتاجة حد معاها يونس وحدتها..بعد ما انت رفضت اننا ننتقل نعيش معاها ..
( هشام ) وانا اسيب امى واختى علشان اروح اعيش عند امك ..
( اميرة ) خلاص بس متجبش سيرة امى ..
( هشام ) وانتى تحترمى امى وتنفذى اللى تطلبه منك من سكات …
اميرة وهى ماشيه بتدوخ وبتقع على الارض بيحاول هشام يفوقها … ايه ياميرة مالك ..
( اميرة ) معرفش ..
( هشام ) تعالى نروح لدكتور الموضوع ده اتكرر مرتين قبل كده …
( اميرة ) ماشى هلبس وآجى معاك للدكتور
عند الدكتور هشام واميرة قاعدين
( هشام ) خير يادكتور … فى حاجة .
(الدكتور ) خير ان شاء الله مبروك مدام اميرة حامل ….
( هشام ) فرحان وبص لأميرة اللى ابتسمت هى كمان الحمد لله
خرجوا من عند الدكتور وهما فرحانين وروحوا البيت واتصلوا على سعاد يقولوا لها الخبر وفرحت لهم وباركت لهم وكمان ناهد فرحت اوى ان هيكون عندها حفيد ومنار فرحت جدا انها هتبقى عمه …
( منار ) ها هتسمى المولود ايه ياهشام ؟
( هشام ) مش لما نعرف ولد ولا بنت الاول
( اميرة ) سواء كده او كده انا اللى هسمى ابنى او بنتى ومحدش له انه يتدخل فى اسم ابنى او بنتى … انا اللى هتعب مش انتم ………
هشام ومنار وناهد بيبصوا لبعض وكلهم سكتم …. مستغربين من اسلوبها وكأن المولود ده بتاعها هى بس .
—
فى منزل هناء :
( فوزية ) هناء عاملة ايه ياعليه شكلها دبلان كده …..
( عليه ) من يوم اللى حصل وهى متغيرة وكأنها مصدومه .. ومش فاهمه ليه ده كله حصل معاها …
( فوزية ) كل شىء مكتوب ومقدر عند ربنا وكل واحد بياخد نصيبه وان شاء الله نصيبها يبقى احسن من اللى فات .. راح بشره بعيد عننا …
(عليه ) ربنا يكتبلها الخير بس بردوا هى قافله على نفسها ومش بتخرج خالص
( فوزية ) طب ماتخليها تشتغل …
( عليه ) هتشتغل ايه .. ما انتى عارفه مفيش شغل للرجاله هيكون فى للبنات ….
( فوزيه ) طب انا عندى فكرة عمرو ابنى محتاج حد يقف معاه فى محل الملابس بتاعه ايه رأيك لما هناء تروح تشتغل معاه اهى منها تساعده ومنها تخرج وتفك شويه على نفسها ….
( عليه ) والله فكرة بس انا معرفش هناء هتوافق ولا لأ …
( فوزية ) طب قومى اندهيلها لما اقولها …
( عليه ) ياهناااااااااااء
)هناء ) ايو ياماما … ازيك ياخالتو
( فوزية ) ازيك ياهناء بقولك ايه رايك عمرو عاوز حد يشتغل معاه فى محل الملابس ايه رأيك تشتغلى معاه …
( هناء ) ايوه بس هشتغل ايه … انا مشتغلتش قبل كده …
( فوزية ) هو هيعلمك وهيعرفك هو عاوز ايه بالظبط المهم دلوقتى انتى موافقة على مبدأ الشغل … ياهناء انا عاوزة مصلحتك انا رايى تجربى مش هتخسرى حاجة ..
( هناء ) بتهز راسها انها موافقة
( فوزية ) اما اروح هخلى عمرو يتصل عليكى ويحدد ميعاد علشان تبدى فيه الشغل
( هناء ) ماشى ياخالتو ….
