رواية عروس الجبايش الفصل الخامس والثلاثون 35 بقلم ياسة – تحميل الرواية pdf

…………………….

يُـمن :- انا سمعته شگال وانا إحس متت بدمي من الفشلة شلون موقف حطني بيه المخبل ياربي دخيلك هذا ما يتوب ولا يتغير للموت رجعت گتله

— العفو منك أستاذ بس والله ما ادري بيه هيج حاچي وياك اعتذر منك

— يُـمن إني أحترمج واقدرج والج مكانه عندي صح بس ما عندي شي وياج ولا عندي اي تفكير اتجاهج وصعب حتى افكر بهذا الموضوع وكلش عيب هذهِ التصرفات الطفولية

حچيتها وانا ميته من الفشلة رجع گال

— ياريت هذا الموضوع ما يتكرر مره ثانية لان إني مجبور كل يوم اشوفج وتشوفيني ومجبور احچي وياج وتحچين وياي لان احنه بمكان واحد مرتبطين بمصلحة وحده ومالها داعي سوالف التهديدات والزعططه إني حچيت ويا ورديته بس اريدج تعرفين بتصرفاته وتحچين وتتصرفين ويا ومتمتعين مثل هيج تصرفات إذا جانت وياي أو ويا غيري

— بصراحة أستاذ هوَ مو خطيبي يعني جان خطيبي وانا تركته بسبب هذهِ التصرفات

والبارحة اجى وعلى اساس يگول تغيرت بس هسه تفاجأت لان رايحلك وحاچي وياك هيج حچي

هز راسه ولوه شفته ما مقابل على الموضوع من الأساس وراها گـال

— لا هواي متغير يُـمن انتِ إنسانه تعبتي بما في الكفاية واعتقد اخذتي نصيبج من الأذية لا تخطين خطوة تندمين عليها مثل ما ندمتي على سابقها إني احچي وياج هذا الكلام لان كلش أحترمج واقدرج واتمنى

تتوفقين وتنسعدين وتعيشين باقي ايامج بسعادة و راحه و مثل هذا مستحيل تحصيل الراحه وياه

بقيت ساكته ما جاوبته رجع هوَ طلع صحت وراه أستاذ التفت يباوع عليه گتله

— اعتذر منك احسبها عليه

— وليش احسبها عليج شعليج انتِ بتصرفاته الطفولية لا تشيلين هم انسي

طلع من القاعة وانا گعدت ميته اريد الگاع تبلعني وتضمني وبعد ما اشوفه ولا اتفشل بسوالفه ، انوب انا الثوله صدگت بيه تغير وحنيت عليه خرب حظي إذا بعد باوعت بوجهك لان ما راح تتغير ولا تتشافة من هذا المرض ومو بس هيج وراح تمرضني وياك اصلاً

بقيت بالقاعة ما طلعت لحد ما بدأت المحاضرة الجديدة والطلاب فاتوا بيومها خلصتها بس صافنه وبالي مو يمي وشابعه قهر على روحي لحد ما خلصت الدوام ورجعت للبيت

لا اللي نفس اكل ولا اقرأ وحتى ما نمت

بس إيدي على خدي و صافنـه ويا روحي اخر شي دگيت على تميم جاوبني

— شلونك ابو علي

— زين انتِ شلونج خو ماكو شي

— اريد احچيلك على مناف إذا ما احچي اموت وإذا حچيت الامي تموت وماكو غيرك استشيره

— خير ان شاءالله شكو شبيه

— اليوم اجاني بُِـرهان وعاتبني من وراه

— البارحه رايح عليه مناف ومهدده يبتعد عني وإذا ما يبتعد يفجره بـباب الجامعة

— ههههه ها شنو

— اي والله انوب شگد فشلت من الموقف

— طيح الله حظه لعد وين الوعد والتوبة والتغير السطرني بيهن سطر

— مستحيل يتغير هذا الإنسان مريض وهذا المرض ما اله علاج

— المريض ينام مستشفى خو ما يجي يشمر خباله علينا

— هسه أنا شأسوي

— من يجي مره ثانية تغسلينه غسل وما تنطينه مجال يُـمن تسمعيني لو لا

— من يرجع يجي اريدج تگعديله ركبه ونص وتخلينا يشوف يُـمن ثانية والقرآن الكريم

يا يُـمن إذا ما طيحتي حظه اجي إني اطيح حظج

— اخاف يسويلي مشكلة بالجامعة انوب العميد يعرفه والدكاترة يعرفونا

— انعل ابو العميد لا ابو الدكاترة لا تنطينه مجال يفتح حلگه رديه وشحتي فهمت لو لا

— وخابريني إذا ما جاز وبقى لاطش

— لا تگول الامي والله تموتني

— إذا ما رديته وبقيتي ساكته ومفهيه بوجهه والله عاد تعذريني مجبور اگلها حتى توگفه عند حده

— لا والله ارده بس يجي

— وهذا بُـرهان شعنده وياج حتى يروح مناف يهدده

— شمدريني الولد أستاذي ولا عندي شي ويا ولا هوَ عنده شي وياي انوب متت من الفشلة

— انتِ خلصي حياتج متت من الفشلة ومتت من البچي و كل خير ما بيج

— ههههه ترى مالي خلك اضحك

— دضحكي من خرب شكلج هوَ منو يستاهل تضوجين عليه

— محد يستاهل والله

— عفيه بالبطله وهسه طگطگي نعالاتج وروحي عندي شغل احتمال بالليل نجيكم إني وعبير

— اي عفيه تعالوا صار هواي ما شايفتها العبير

— هوَ راح نجي الدكتورة تگلها امشي راح احيبها من بيتنا البيتكم مشي عقاب الها

— يا ظالم على هاي الدگه

— يلا اخذ راحتك

قفلته من تميم وإحس شوية هديت واخذت دفعه معنوية ارد بيها إذا اجى مره ثانية وحچى وياي

وصدگ لليل واجوا تميم وعبير شگد تونسنا وياهم من صدگ گعده من العمر بس تميم طلعها من خشم عمي خطية شلون ما جاب عشة من برى الهم كل شوية وگاله هذا لو مراد و زهراء چان رگضت جبت تكه وكباب بس تميم وعبير توكلهم بتيته وطماطه

وهوَ اكبر چذاب اصلاً امي سوت الهم دجاج شوي بالفرن يجنن بس بعد بيه سوله لازم يتناكر ويا عمي

انوب يرجع يگول

— اي عمي قابل عبير اخوها…. وتخاف منه وتجيب عشة دسم

هاشم :- طايح الحظ شو تمسلت

— يعني ما تخاف

— انجبي اخاف شنو

— إذا ما تخاف اثبتلي

شهيناز :- هههههه شلون يعني ما نخلص من هاي السالفه

— خاله رجلج يفرق

— لا والله ما يفرق ويحبكم كلكم نفس المحبه بس هذاك اليوم من اجوا بيت مراد جان يعرف بيه ما راح اسوي اكل الزهراء لذلك جاب وياه الخاطر مراد لا يضل باله اما عبير يدري بيه كلش أحبها واني بـ ادية اسويلها اطيب الاكل

عبير :- حبيبتي خاله عاشت ايدج والله تعبناج

خلصنا العشة و تميم گام يريد يروح للأسواق يجيب كرزات باوع عليه وضحك وگال

انا بسرعة رديت اي اروح وگمت من مكاني وابد مالي قصد بيها بس جنت اريد الگى فرصة حتى احچي وياه بموضوع منـاف واخذ منه نصائح بعد بس الظاهر هوَ بالفترة الاخيرة گام يلح بشقاة وياي وعبير بدأت تضوج واليوم من گال ترحين وانا قبلت ما گدرت تتحمل بسرعة ردت

— الدكتورة گالتلي إني امشي ما گالت اليُـمن حتى تاخذها وياك

من حچتها حچتها بضوجه وبنبره عالية

بحيث كلنا تفاجأنه وباوعنا عليها هوَ باوع الها خزرها و رجع دار وجهه عليه وگال يلا لبسي بسرعة

يُـمن :- خلي عبير تروح ويانا

تميم :- لا ما تروح

حچى بضوجة وكلش جدي ، وانا سكتت وباوعت الامي رجع عمي گال

— اخذوا علي وياكم و عبير عوفوها اريدها بموضوع

ضليت واگفه واباوع بالوجه وميت ياربي شـهل المواقف التعبانه الجاي تطيح على راسي رجع تميم گال

باوعتله متفشلة من الموقف ورحت للغرفه اسب بروحي هسه شجاني وگلت اي اروح مو كل مره ارده حقها مرته تصوج غير تافه وشقى ماله معنى

لبست وطلعت باوعت عليه من طلعت وكلش ضاجت باقيلها شوية وتبچي

انا شفتها وانا متت شلون يربي هاي گايمة تغار عليه شوف الحظ چا هوَ غير اخوي

رجع صاح

— يلااااا وينج

طلعت وراه لگيت بالحوش هو وعلي اجيت عليه واگول

— ترى عبير ضاجت خطيه خليها تروح ويانا

— ليش متزاعلين شنو

— چا شبيك وياها

— هسه شعليج شبيه وياها حيري بروحج اول مره وراها حلي مشاكلي

حچي هيج وطلع طلعت وراه مشينا للأسواق وعلي ويانا گتله

— ترى والله زحمه شيسمونها هاي عايف مرتك وجايبني وياك

— ههههههههه حلو من واحد يغير كل شوية يطلع ويا وحده

— والله جاي احچي صدگ ما مشاقية وياك

— شبيج بابا شنو عايف مرتك شو صايرة مثل عبير هم شاخطه

— اي حقها تشخط غير متزوجتك قابل تريد يبقى عدها عقل

— والله يا يُـمن يا حلوة خليني اعترفلج اعتراف واگلج مرتي صارلها مده تضوج منج وحتى ما تقبل اجيكم يمكن تغار منج هههه

— لااا تميم شوف من وره شقاك وين وصلنا

— مشكلتها هاي خليها تضوج قابل ما تعرفني

— حتى لو تعرفك بس اي وحده بمكانها وتشوف رجلها هيج يتشاقة وياه غيرها وكل كلمة والثانية وگالها تزوجين حقها تضوج وتنقهر هسه تضل تكرهني

— لا ما تكرهج اطمني

سكتت بس كلش ضجت رجع گال

— ما حچيتي الامج عليه مو

— لا ما حچيت شلون احچي

— وناوية تضلين ضامه عليها للأبد لو شلون شنو الموضوع

— ما ادري اخاف احچيلها

— لازم يصير عدها علم حتى إذا لا سامح الله وصار شي سيء هيَ عدها علم مو تتفاجئ وتطيح حظج فوگ ما هوَ طايح

قبل لا اجاوب فتنا للأسواق اخذ هوَ كرزات وببسي وجبس وعصير الابنه ورجع دار عليه وگال

— وانتِ شتردين اخذي

— ما اريد شي شكراً

عافني وراح جاب سنيكرز وجبس وبعد هواي شغلات وتحاسب ويا الولد وطلعنا انطاني العلاگه بالباب وگال هاي الج

— والله ولا اخذها هاك اياها

— گتلك ما اريد عندي امي يومية تجيب علاگه بالليل وهذنيج باقيات مشمورات على الميز

— هذني اصليات امج تجيب اكس باير

— هههه لا والله خطيه تجيب اشكال واللوان

— ميخالف بعد اشتريتهن اخذيهن

— اخذهن بس بشرط

— فوگاها تتشرط

— وشتردين عيني ست

— تاخذ العبير مثلهن بالضبط حتى لا تضوج

— عدها كراتين حاطتهن جوه الجرباية تاكل بيهن هيَ وابنها عايزة العلاگتج وتضوج منها

— ميخالف عسى ما عدها اسواق ما اخذهن إذا ما تشتريلها

— جيبي العلاگة مو صوجج هوَ انتِ ططوه مو وجه نعمة

اخذ العلاگة و مشى ضحكت ومشيت وراه

لحد ما وصلنا شبعني رزايل الططوه البومة الثوله الفاهية طلع الروحة من خشمي

فات گدامي وانا استحي من عبير شلون افوت اخر شي گلت عليمن استحي قابل عندي شي وياه لو هوَ عنده شي وياي اشو هيَ تدري كلش زين هذا شقى رجلها من زمان انا بعد شكو محمله روحي الذنب

طبيت للصاله و گعدت هيَ ساكته وتباوع

وهـوَ جاب علاگه الحلويات وطشها بالگاع ويگول الامي

— اكلي خاله سودة عليه ابوي موتج من الجوع باقيه بحسره الجكليته

شهيناز :- هههههه يا هوَ اكو مثل ابوك ونفسه الطيبة

عبير :- تدرين خاله تميم طالع عليه هم نفسه كلش الطيبة

كلنا باوعنا عليها لان جانت مبينه تبسمر بيه عود تشبه ابوك وراح تزوج ثانية امي باوعت عليها و رجعت دنگت لمت الحلويات وعمي هز راسه وباوع التميم

جاوبها تميم

— اي كلش اشبها حتى افكر اتزوج مثله اثنين نسوان ها يابة شتگول

هوَ گالها هيج وهيَ انفجرت من البچي

امي وعمي يردون يسكتونها ماكو انتهت

هوَ ضحك وهز ايده وانا لا اردياً بچيت وياها هوَ شافني ابچي ضحك بصوت عالي وگال

— هيَ راح يتزوجون عليها وگامت تبچي انتِ عليمن تبچين

ما جاوبته رجع گال

— لا تبچين عود اخذج انتِ الثانية

عمي شمر عليه الكوشة يريده يسكت وهذا ماكو لا إحساس ولا مشاعر موت الابنية قهر ما ادري ليش هيج تصرف وياها

مبين جاي يحرك بگلبها بس ليش ما ادري

لزم الكوشة حطها وراه ظهره وگال

— يابة بالعباس تتعاير هسه اني تزوجت

شهيناز :- شجاك صدگ چذب كافي

عبير :- والله خاله هاي مو اول مره يحچيها من صدگ حاط الزواج باله كل ما سويت شي وگال راح اتزوج لا عبالكم يشاقة والله جاي يفكر بالموضوع واصلاً مخلي يُـمن باله بس ما يگدر يفتح وياج الموضوع وجاي يسوها بحچه الشقى منا لمن يصيح عدكم الموضوع عادي ويخطبها صدگ

امي باوعت عليه ورجعت باوعت عليه هوَ سكت من الشقى وشكله صار جدي و ما قبل عليها اجيت انا گعدت يمها واگول

— لا والله بالعكس هوَ اخوي والقرآن انا حاسبته اخوي الچبير وما عندي شي وياه شلون هيج تفكرين وحتى هوَ ما عنده شي وياي ومن اول يوم شفته هوَ يشاقه هذا الشقى وانتِ تعرفين بيه ليش هسه صدگتيه وفكرتي هذا التفكير

ما جاوبتني بس تبچي رجع هوَ گالها

عمي باوع عليه ما راضي وهوَ غلس ودار وجهه من ابو رجعت امي گالتله

شهيناز :- من كل عقلك اعوف ام علي تفكر عندك شي ويا بنتي وتطلع من بيتي وهيَ تبچي

تميم :- يابة هاي ضاربات عدها هرمونات الحمل يا بنتج صدگ چذب انوب مصدگينها ترى عيب عليكم مو شفتوني ضحكت وياكم

— عيب عليك انتِ تتشاقة وياها هيج شقى وتضوجها وهاااا من هسه خاف اخاااف عندك نية لو الشيطان يوزك بيوم من الأيام ويزرع هيج فكرة بالك هاي من هسه وگدام ابوك اگلك تحلم و اله إني جوه الگاع فهمت لو لا

— عيب عليج خاله شنو هذا الحچي يعني صدگتوا واخذتوا بحچيها هاي نظرتج عليه

وهاي ثقتج بيه مع الأسف

امي سكتت ما ردت وانا حطيت ايدي على عيوني من الفشلة ما اريد اشوف احد ولا اريد اسمع احد رجع صاح بيها بصوت عالي تگوم وكلش ضاج من الموقف الصار

بسرعة گامت طلعت وهوَ طلع گدامها حتى بدون ما يسلم علينا اول ما راحوا امي گالت العمي

— شلون جناين عندك دخيل الله عليهن وعلى عقولهن

— هوَ طايح حظ ماخذها كله شقى وضحك يعني بشر ما يعرف ينجب ويسد حلگه الا يدوس بطن مرته ويخرب حياته يلا يرتاح

— شنو جديدة عليه اول مره تسمع هذا الحچي منه اشو هوَ الليل ونهار يشاقة ويا الناس هيج شقى هذاك اليوم بالعرس مال مراد ما خله وحده ما خطبها وهيَ واگف تضحك فرحانه بيه اشو من وصلت اليُـمن تبكبكت

— تگولي يا الله شجاج حسبتيها سالفة شخصية

— ما سمعتها شلون تحچي

— سمعت بس مو صوجها صوج رجلها طايح الحظ

عفتهم وگمت طبيت للغرفه وسديت الباب كلش ضايجة ومقهورة خرب حظي هوَ انا

يا يوم گعد حظي ويا العالم حتى هسه اريده يگعد ويا عبير

وثاني يوم رحت للدوام كل خلك ما عندي وبس واحد يگلي بز اطگ بوجهه عبالي الگى هديل وافرغ القهر بيها بس هم ما اجت اليوم

خلصت ثلاث محاضرات وطلعت ارتاح شوية راسي موتني احسه يريد ينفجر بعدني هسه گعدت واجى مناف گعد گبالي رفعت راسي باوعت عليه گال

استغفرت ربي و باوعتله ورديت

— شوف منـاف من الاخير وبدون اخذ وعطا انا وياك ما نصير ولا راح نصير بيوم من الايام لا انتَ تغيرت ولا انا اگدر اتقبلك بهذا حالك منـاف أمشي عليك الله ومحمد وعلي تعوفني بحالي و لا تطلع بوجهي ولا تشوفني وجهك مره ثانية خليني اعيش لا دمرني فوگ دماري ، عيوني عمت من البچي وگلبي تعب من القهر كافي بعد ما عندي طاقة اتحمل اريد اعيش حالي حال البنات كافي رحموني وخافوا الله بيه

— مابيه شي عمي ما بيه شي بس عوفني

سكت وشكله انصدم من ردت فعلي شلت جنطتي وگمت گام وراي و لزمني من ايدي قوي وسحبني ومشي بيه إحس گلبي طفر من مكاني حچيت ويا وين ماخذني مارد عليه رجعت گتله عوفنييي ماجاوبني

حاولت اسحب ايدي لازمها قوي ويمشي بطريقة ما تخلي المقابل يحس بشي عبالك نمشي طبيعي بس كلش ضاغط عليه

خفت اسحبها منه اكثر والناس منا وانفضح فضيحه وحرام هاي المره لو اتوضى واحلف محد يصدگني

طلعنا من الجامعة وصلنا للسيارة صعدني وسد الباب گعدت بهدوء واخذت نفس قوي وزفرته ورددت سبحان الله ولا حول ولا قوة الا بالله

صعدت هوَ وشغل ومشى درت عليه وسألته بهدوء لان عرفت طبعه إذا اعاند

ويا وارادده راح يطيح حظي مثل هذيج المره گلت خليني احاول اصير هادئه واحل الموضوع وياه بهدوء سألته

يُـمن :- وين ماخذني

— منـاف رغم كل اللي سويته وياي انا ما كرهتك لا تخليني اكرهك

طبگ و دار عليه و گال

— اول البارحة جنتي حبابة و ميه بالمية راجعتلي شنو اللي تغير اليوم وانگلبي عليه هيج

— ما تغير شي وما رجعتلج لا ميه ولا واحد حاولت افكر بس ما گدرت اتقبلك بـي شكل من الاشكال منـاف افهمني انا وياك طريقنا من الاول مسدود ولا اگدر اعيش وياك ولا اگدر اتحمل عقدك النفسية

— هه واضح تأثير الأستاذ بُـرهان قوي عليج بحيث تغير حتى أسلوبج

— بُـرهان شكووو بالموضوع الرجال ما عندي شي وياه ولا يحچي وياي ولا معترف وين الله خالقني شبيك انتَ

— وهسه انتِ ضايجة لان ما معترف بيج مو

باوعت عليه وصفنت بله هذا شحچي وياه رجع گـال

— ليش هيج تغيرتي شنو السبب

— ماكو سبب وما تغيرت هذا قراري من البداية بس صوجي انا الحيوانه اخذت وانطيت وياك بالحچي وزعت بيك امل

— ماشي تمام من الاول هذا قرارج بس خلي بالج لو اعرف اكتلج حلال ما اخليج تنام بغير حظني سمعتي

— نمت بالگبور ان شاءالله وخلصت منك ومن عقدك

— انجبي ولا كل شوية وگلتي عقدك وعقدك لا ادوس راسج بالسيارة

— ليش انتَ مو معقد مو مريض مو شكاك مو صلف مو جسر مو خاين للزاد والملح

لك إذا عبالك السويته بيه سهل وشفتني اول البارحه اخذت وانطيت وياك بالكلام وعبالك خلص رجعنا وتزوجنا وخلفنا ترى غلطااان انا وياااك للموت ما نرجع ولا نصير

— بكيف منووووو منـاف افتح الباب خليني انزل

— يُـمن ادب سزززز لا تصيرين مو شفتيني ساكت عنج گمتي تطولين باللسانج

— والله محد أدب سزز غيرك

حچيت هذا الكلام وهاي اول مره اتجاوز بيها على احد اول مره يطلع مني هيج رد انا اصلاً متفاجأة من روحي شلون هيج حچيت و رديت بس هاي مو انا هاي افعالهم بيه هاي ضغطهم وأذيتهم وصلتني الهذا المستوى وهذا الحال

دار عليه سريع وضربني على حلگي وجرني من راسي قوي وهزني حيل و يگول

— منوووو الادب سززز هااا منووو الادب سززز طايحة الحظ بنت الكلب صايرلج للسان و گايمة تتجاوزين اي ليش ماا تتجاوزين لا والله تتجاوزين وتسوين الاكبر منها منو امج شهيناز لووو غيرهااا كلجن نفس الخـ… ما بيجن وحده ادميه لا والله نزلي خرب ابو العرفني بيج نزززلي

فتحت الباب اريد انزل مقفول بقيت افتح بيه حيل ما ينفتح ولا هوَ فتح القفل گتله بدون ما ادور عليه

— افتح البااااب

ما جاوبني شغل ومشى حطيت اديه على وجهي وعلست من البچي وهوَ ساكت

لحد ما وصلني الباب البيت وقبل لا يفتح القفل گال

— بُـرهان اجى وگالج مناف اجاني وحچى وياي وانتِ فكرتي ما دام اجى و حچى ويا الأستاذ بُـرهان معناها بعده ما متغير مو هيج

— شـچلبت بصخمان انا ما اريدك يا اخي فك ياخه عني خلي عندك إحساس ما اريدك گوه خو ما گوه

— افتحلييي الباب شلوووون انزل وانتَ قافل السيارررة

ضرب الاستيرن قوي وصاح بصوت عالي

— طلعي من عقلي طلعي من گلبي طلعي من روحي من نفسي طلعي مني اختفي من ذاكرتي ما اريدج بعد كافي انذليت وانهت وتعبت وتمرضت كافي ما اريدج روحي مني

اريد انساج اريد انسى صوتج شكلج هدوئج ضحكتج سوالفج الحلوة اريد انسى هذاك اليوم الاسود التقرب بيه منج اريد انسى عطرج شعرج نعومتج ترافتج جسمج

كافي تعبتتتت فوگ مرضي مرضتيني بالزايددد كافي طلعييي من بالي ما اريدج تعبتينيييي تعبتينيييي

حچى هيج وحط راسه على الاستيرن وسكت بعد ما حچي شي وبس صوت نفسه الصار عالي وانا شبعت بچي ثواني ورفع راسه باوع على الشارع يمين ويسار ومن الامرايات وراها جرني عليه قوي وباسني

دفعته مني قوي وضربته راشدي واگول

— الله لا ينطيك يا حيووووان الفرع متروس كامرات يا حقير لكككك انا محرمه عليكككك يا نذل افتح الباببببب حيوووان

شال إيده وصگها قوي وضرب بيها الأسيرن ويصيح

— اييي إني حيوووان لان ثقيت بالنسوان من جديد حيووووان لان حبيتج حيووووان لان انذليت وانهت والهسه اركض وراج حيوووان ابن حيووووان لان وحده مثلج كسرتني وطيحت حظي وحظ الجابوووني

نزززلي

— افتتتتح الباب شلووون انزل

— راح افتح وراح تنزلين بس ثقي بكلام الله إذا فكرتي بيوم من الأيام تصيرين الواحد الغيري ادفنج انتِ ويا بگبر واحد

و…… سمعتتتتي لو لااااا

فشر على اخت اللي اصيرله بالمسقبل ما جاوبته رجع گـال

— يومية راح اجي للجامعة يومية راح اطب بعينج و اتمنى من الله الگفج لاعبة بذيلج وداعت هذيج الساعة السودة الشفتج بيها اعلگج بــباب الجامعة واريد گـ… يطلع وراج

— لا اللعب ولا احب ولا انحب ولا اتزوج ولا اخلف ولا حتى أدرس ولا اعيششش راح اموت روحي واخلص منك افتححح الباب

خليني انزززل كافيييي روح تعالج

فتح قفل السيارة بسرعة فتحت انا الباب

و نزلت سريع وحتى باب السيارة ما سديته وراي دگيت باب بيتنا وسندت روحي عليه كل جسمي يرجف و رجلية ماتت بعد ما اگدر احطن بالگاع

وهوَ مد روحه وسد الباب وشغل ومشى

فتحت امي الباب بسرعة شمرت روحي عليها وبقيت اصرخ بحظنها تخبلت حارت بيه بس لازمتني وتگول شبيج وشبيج

طببتني للبيت گعدت بالحوش وميته گعدت گبالي و لازمتني بـ اثنين اديها وتسأل شبيج منو وياج ما ارد ولا اجاوب

اخر شي گومتني من الگاع وطببتني جوه

اول ما طبيت الغرفتي گعدت يمي و حايرة بيه رجعت گالت

— شبيج شكو منو وياج

— ما اريد ادوم بعد ولا اريد اشوف احد ولا اريد اعيش يما اريد اموت واخلص كافي تعبت

— شبيج يا ستار شكو

صفنت بوجهي مستغربه و رد

— اجاني للجامعة

حچيت الها كل السالفه من اول مره اجى بيها لحد هسه ضلت گاعدة گبالي وتباوع عليه انوب هزت راسها و گالت

— كافي لا تبچين إني اتصرف ويا الظاهر هذا ما يجوز اله ينهان من مره

— تعبت يما تعبت

— يصير خير ويا بسيطة اني اله

حچت هيج و گامت الغرفتها ما ادري شتسوي شوية و سمعت باب الشارع انفتح

إحس متت يا الله راح تتعارك وياه وتصير هوسه من جديد وعمي يرجع عليها دخيلك ياربي خلصني من هذا الظيم

ساعة ساعتين وهيَ ما راجعه وانا بدلت هدومي وگاعدة بالصاله وايدي على خدي

بقيت گاعدة متانيتها لحد ما رجعت اول ما سمعت باب الشارع انفتح گمت وگفت على حيلي طبت باوعت عليه وگعدت سألتها

— وين اشتكي بالمركز

— اي بالدوام ماله اريد اشوف شلون يهدد ويتمرجل مره ثانية

ما جاوبت بس شكلها راح تعلگ للعصر

و اجى عمي اول ما طب من الباب صاح شهيناززززز

انا جنت بالغرفة واول ما سمعت صوته وگفت وگفه انوب فتحت الباب وطلعت

هيَ و گفت وهوَ اجى عليها جرها من راسها حيل ويصيح

— كل هذا مسويته وإني ما ادري كل هذا اللعب لاعبته وإني ما ادري طايحة الحظ سوايتج بنات الشوارع ما يسونها

شهيناز :- هذا واحد ساقط وما يجوز إذا ما اشتكي عليه

— لجججج تشتكين شلوووون وإني ما ادري شلووون طبيتي المركز شلووون گعدتي وياااا الضباط هوَ الساقط لو انتِ التمشين بشور راسج

حچى هيج واشتغلها راشديات اجيت وگفت بنصهم و گتله

— لا عمي فدوة الخاطري

— ما خليتلي خاطررر انتِ وأمج ما فكرتن بيه ما اجيت بعيونجن الهاي الدرجة إني طرن عدجن

محد بينا ردت وهوَ يصيح بكل صوته

— طايحة الحظ ادب سزز بعد مالج گعده يمي من هاي اللحظه وانتِ محرمة حرمت اختي عليه امشي من وجهي لا تشوفيني وجهججج امشييي

راحت امي الغرفتها وانا وراها محد بينا تحچي بس اثنينه نبچي شوية وسمعنا يخابر ما ادري منو بس جان يگول

— لهنا وبس بعد ماله عذر يمي اليوم افين حظه الكلب الساقط

وراها سده ورجع خابر على تميم سمعنا يگله جيب مراد وتعال وصدگ نص ساعة واثنيهم اجوا

بس لا انا ولا امي طلعنا يمهم بقوا يحچون بيناتهم وصوت عمي عالي وكلش مقهور وضايج ويسب وينعل بالكل حتى انا سبني

شوية ومدري منو اجى وصوت الزلم ترس البيت ترس انوب اجانا صوت تميم يصيح على امي طلعت أمي تشوفه وانا نفس الشي طلعت اريد افتهم شكو

جان كلش ضايج وما قابل على تصرف امي بس ما حچى شي كل الگاله ، حضري جاي

شهيناز :- منو عدنا

— اخوال منـاف وسادة وشيوخ والجيش والدنيا كلها

— يعتذرون قابل شيسون جايين

— ههه يومية معتذرين

ما جاوبها عافها وراح وهيَ راحت تحظر بالجاي وانا طبيت الغرفتي ما طلعت بعد

لحد ما راحوا الناس

سمعت على أساس مكلفين سادة وشيوخ وحتى الأمر مال عمي وتمـيم جاين وياهم ومعتذرين ومنطين وعد بعد لا يتقرب ولا يوصل يمي لان أمي من راحت اشتكت ما گالت باسها بس گايله وين ما تروح يلحگها

يهددها لو اله لو ما تصير الغيره وحتى العمي ما گالت كل التفاصيل اكتفت بهذا الحد

ومثل كل مره بوس عمك بوس خالك وفضت وراحت بحجه يحبها وحاول يحچي وياها بلكي يرجعون ويخلص الزعل بيهم اما موضوع الشكوة اصلاً من اول للحظة محد مشى بيها ولا اعترفوا بيها هيج بس الفضايح لا اكثر ولا اقل

بيومها وره ما راحوا الناس رجع عمي تعارك ويا امي هذيج العركة القوية وبقى يغلط عليها وهيَ ساكته ما تجاوب والولد اثنيهم عدنا

لحد ما عافها وطلع و مـراد طلع وراه بقى بس تميـم اول ما طلعوا سمعته يحچي على امي يلوم بيها شلون راحت وشلون هيج تتصرف ما فكرت بعمي بيهم والضباط كلها جماعتهم

وراها راح و اول ما راح گمت انا طفيت الضوه ونمت من القهر وهل النومه نومه لحد أذان الفجر گعدت صليت وقريت قرآن

وبقيت على سجادتي اشكي الربي وابچي لحد ما ارتاحيت يلا گمت

رجعت الفراش نمت وثاني يوم ما داومت

امي عافتني براحتي ما گالت ليش ما ادومين ولا ضغطت عليه اخذتلي أسبوع كامل انا غايبة ما رايحة للدوم ومن الصبح الليل گاعدة بغرفتي وشابعة قهر على روحي

خابرتني ورود تسأل سولفت الها كل السالفه رجعت گالت اجت هديل ولزمتها لعبت بيها لعب وطيحت حظها انوب گالت الدكاترة يسألون عليج

يُـمن :- تگدرين تاخذيلي اجازة

— حاچيت دكتور بهـاء وأستاذ بُـرهان من اول البارحه وگالوا المهم تحضر بالبيت ولا تخلي المواد تتراكم عليها

خلصت الآسبوع كله ما طالعه من غرفتي

وبس اندب حظي وره الأسبوع أمي گامت تحچي عليه تريدني ارجع ادوم بس انا مالي نفس لا بدوام ولا بدراسة ولا حتى بحياة

كارها روحي وكل العالم وبيوم السبت العصر رجعت خابرتني ورود تسأل عليه مره ثانية وراها گالت

–أستاذ بُـرهان أمتحنه الخميس ومن طلع گالي لازم ادومين لان جان ماخذلج اجازة أسبوع واحد وخلص الأسبوع و اصلاً صارن اثنين امتحانات ما تمتحنينهن لازم باچر اداومين حتى يحددلج موعد الأمتحان

— ما اريد اطلع ولا اريد اشوف احد

— بس هذا مو حل شنو قابل تنهين عمرج ما يصير

— اخاف ارجع اداوم ويرجع يجي

— اكيد ما يجي قابل ما يفتهم ويروح يغلط من جديد

— تعبت يا ورود تعبت

— الله يساعدج بس انتِ قوية لازم ما تتأثرين ولا تنكسرين رجعي اوگفي على رجليج وكمل دراستج ولا تخلين الظروف تكسرج

ثاني يوم گعدت من وگت وحضرت روحي

وگفت على المراية وحفيت شواربي وشلت حواجبي بالملقط و گصيتهن بالمقص انوب رجعت شقرت وجهي وسويت تنظيف بشره

وسبحت و بدلت و حتى كحل و مورد خليت إحس بروحي تعبانة واريد بس اغير شوية ما ادري شلون اطلع من الحاله الانا بيها

وگفت گبال المراية اباوع على روحي صح شكلي ذبلان و ضعفانه بس اكو تغير صار بيه لبست حجابي وحطيت عطر وطلعت

امي فرحت من شافتني اليوم جاهزة ومعدله ومرتبة وصلتني للباب تدعيلي

للعلم لحد الآن عمي ما يحچي وياها وحتى ما جاي علينا صار أسبوع كامل

طلعت صعدت بالخط وعباس يتحمدلي بالسلامة لان گتله جنت مريضه وما اگدر ادوم

وصلت للجامعة لگيت ورود متانيتني تسالمنا و طبينا سوى للقاعة اول محاضرة جان عدنا دكتور بهـاء

اعتبرت الموضوع ما صاير ولا هوَ صاحب مناف ولا مساعدة ولا اي شي صاير غلست

وبقيت اشوفه دكتور حاله حال باقي الدكاترة

هوَ تحمدلي بالسلامة و سكت ما فتح اي موضوع وياي لحد ما خلصت محاضرته اجت هديل تريد تعتذر

درت وجهي منها بدون ما اباوع الها ورديت

— الموضوع خلصان وماكو داعي للأخذ والعطا بيه ياريت بعد ما ينفتح ولا ينذكر لان تدرين الطلاب إذا سمعوا حچاية بعد ما يعوفونها ابد ما اريد اسمع شي روحي الحال سبيلج وعوفيني بحالي رجاءً

سكتت وراحت گعدت بغير مكان شوية

و اجانا بُـرهـان اول ما طب عيونه صارت على المكان الگاعدة بيه بس شافني جاية أبتسم وسلم على الجميع وراها بدأ يشرح ومن كمل اجى عليه و گف مقابيلي وگال

— الحمدلله على السلام

— الله يسلمك أستاذ شكراً

— شلون صرتي ورود گالت مريضة

— الحمدلله زينه

— الله يعافيك شكراً

— باچر عندج أمتحان اقري زين وشدي حيلج لان راح احسبه مال اثنين

خلص كلامه وياي و طلع وهيج خلص اليوم ماكو اي شي جديد وثاني يوم امتحنت انا وبعد وياي اربعة واحد من قاعتنا والباقين من غير قاعات بوكتها امتحنا بغرفة الأساتذة

وزع علينا الاسئلة و گعد منتظرنا ربع ساعة وكملت كل الاجوبة و گمت انطيته الورقـة

اخذها من ايدي و قرأ الاجوبة رجع انطانياها و أشرلي على النقطة الثانية بمعنى غلط

صفنت بوجهه شلون غلط بقيت لازمه الورقه واباوع للجواب وارجع اباوعله واگفه بمكاني لا ارجع اگعد ولا اطلع أبتسم واشرلي بحاجبه ارجع اگعد لان جوابي غلط

رجعت گعدت وصفنت صفنه اخت الچذب شلون غلط انا متأكدة هذا الجواب 1.0 شوية وگام من مكانه واجى عليه وگف قريب مني و فتح كف ايده شفته كاتب بيه 0.0

بسرعة رجعت عدت خطوات الحل طلع صح جوابي غلط المفروض صفارة ماكو واحد

واحد من الولد الگاعدين من شافه جاي يساعد بيه بسرعة گاله

— أستاذ اني احبك

باوع عليه وضحك ورجع جاوبة

— واني ما احبك

— لا أستاذ الله عليك ساعدنا بنقطه وحده مو ساعدت يُـمن

سكت ما جاوبه رجع گعد بمكانه والباقين كلهم بقوا يحچون ويا يردون يساعدهم شلون بس يُـمن تساعدها ساعدنا مثلها بس بنقطه بس بفرع اخر شي گام من مكانه وگـال

— جواب النقطة الثانية من السؤال الثاني 0.0 باقي الخطوات عليكم و يلا كافي هدوء

— لا أستاذ حباب غير تكمل الحل

— ماكو تكمله يلا عيونكم بـ اوراقكم وانتِ ام المشاكل جيبي الورقة وطلعي مو ياخذج الواهس وتمسحين حتى الاجوبة الصحيحة

يتبع……

السادس والثلاثون من هنا