رواية عيناها سر سعادتي الفصل الثاني والعشرين 22 بقلم فاطمة البربري – تحميل الرواية pdf
رواية عيناها سر سعادتى (بين العشق وحب الذات )
بقلم : فـــاطـــمـــة الـــبـــربـــرى
** سارة ومحمد سافرو تانى الكويت
**خالد واية قضو مع بعض احلى اسبوع عسل فى حياتهم وبعدين
خالد رجع لشغله تانى
** ملك بدات تحب محمود وحست ان محمود عوض ربنا ليها عن كل
حاجة وحشة شافتها فى حياتها
** عدت الايام وهند ولدت وجابت ولد وسموه ماجد
فى المستشفى اللى ولدت فيها هند
طارق شايل ماجد : حمد الله على سلامتك ياهند
هند : الله يسلمك
طارق : ماقلتليش يعنى ايه رايك فى الاسم
هند : مادام انت اللى اختارته يبقى جميل
طارق اكتفى بابتسامة : طيب انا مضطر اروح الشركة دلوقتى علشان فى
عملاء مهمين جدا منتظرنى هناك مش عايزة اى حاجة اجبهالك وانا جاى
هند : سلامتك ، كلم بس الدكتور يكتبلى على خروج
طارق : ليه ياهند خليكى هنا احسن انتى نزفتى كتير فى الولادة
والدكتور بيقول لازم تبقى تحت ملاحظته ٤٨ ساعة ، ده غير ان
كمان ضغطك عالى جدا فلازم تفضلى هنا لحد ماضغطك يوصل
لمعدله الطبيعى
هند : انا تعبت من المكان ده عايزة اروح بيتى
طارق : معلشى ياهند استحملى شوية
هند : حاضر ، معلش يعنى كنت عايزاك بس تروح لماما تطمنها على
وتخليها ماتجيش علشان هى تعبانة اوى
طارق : انا رحتلها من شوية من غير ماتقولى وقلتلها انك راحة تولدى
واديتها مبلغ تصرف منه وكلمتها لما ولدتى وطمنتها عليكى
هند بخجل : متشكرة اوى ياطارق انت افضالك علينا كتير
طارق : عيب الكلام ده ياهند انا جوزك ووالدتك تبقى والدتى انا
كمان وواجب على اوفرلها كل احتياجاتها
———
طارق راح الشركة وفوجئ بوجود امل هناك ، طارق راح ناحيتها
طارق : امل … انتى ايه اللى جابك هنا
امل : لقيتك مابتسألش قلت اسأل انا
طارق : طب تعالى ادخلى جوة وطلب من السكرتيرة تعملهم
كوبايتين قهوة مظبوطة
دخلو جوة المكتب
امل : انت لسة فاكر ان قهوتى مظبوطة
طارق : اكيد طبعا فاكر
امل : سمعت ان مراتك ولدت النهاردة
طارق بفرحة : ايوة الحمد لله جابت ماجد
امل بابتسامة مصطنعة : الف مبروك ، طارق هو انت ليه ماردتش على
فى موضوع رجوعنا لبعض؟؟
طارق : بصراحة ياامل انتى حاطة شرط صعب جدا وانا مااقدرش اسيب
هند حتى لو مابحبهاش حتى علشان خاطر ماجد ابننا
امل : يعنى انت متوقع ياطارق ان هند هتقبل ابقى شريكتها فيك ، مفيش
ست على وجه الارض تقبل يكون ليها ضرة
طارق : طب لوهند وافقت تقبلى ترجعيلى وتبقو انتو الاتنين على ذمتى
امل : ايوة ياطارق اقبل انا خلاص ماعدتش مستحملة اعيش بعيد عنك ، بس
لورفضت هتعمل ايه؟
طارق : لورفضت هاطلقها طبعا هى حرة بقى
امل : خلاص ماشى هامشى انا بقى
طارق : طب والقهوة
امل : اشربها انت بقى ، سلام
————
هشام واحد من ضمن الفريق اللى بيشتغل تحت ايد خالد : خالد باشا اللواء
زياد عايز حضرتك
خالد راح للواء زياد
خالد : ايوة يافندم
زياد : بص بقى ياخالد رجالتنا برة قدرو يوصلو للرجل اللى بيورد الاسلحة
هنا مصر دى صورته اسمه فهمى محمد فهمى ، ودى صورة مراته اسمها يسرا
مراته دى بقى تبقى راس الافعى ، الراجل ده هينزل هو ومراته مصر بعد ٣ايام
انا عايزك بقى تجمعلى معلومات كتيرة عنه ، ولما يوصل عايز مراقبة شديدة
عليه علشان نقدر نوصل للناس اللى بيتعاملو معاه هنا فى مصر
خالد : طبعا يافندم الراجل ده اكيد فى حد من الداخلية هنا بيساعده
فى دخول الاسلحة دى هنا مصر
زياد : ده شئ اكيد بس هو مين بقى دى مهمتك انت يابطل
خالد : معقول يافندم فى حد يبقى حالف اليمين انه يصون بلده
ويخونها
زباد : هى الحياة كدة ياسيادة المقدم فيها الكويس اللى مستعد
يضحى بحياته علشان بلده وفيها الخسيس اللى اهم حاجة عنده الفلوس
وبس حتى لو الثمن وطنه
خالد : خلاص ماشى يافندم انا هابذل قصارى جهدى فى اننا نوصل لكل
الناس اللى بيتعاملو مع فهمى ده هنا فى مصر سواء من الداخلية او من برة
بعد اذنك يافندم
زياد : فى رعاية الله
*** خالد جمع فريقه وطلب منهم يجمعو فى اقرب وقت ممكن كل معلومة
تخص فهمى
———-
محمد وسارة قاعدين على السفرة بيتعشو وفجأة سارة قامت تستفرغ فى
الحوض
محمد جرى عليها : مالك ياحبيبتى فى ايه
سارة ماسكة بطنها : مش عارفة الظاهر انى اخدت برد فى معدتى
كل شوية يجيلى مغص ويروح ده غير الاستفراغ ده ، بجد انا قرفت حتى
الاكل ماليش نفس ليه
محمد : طب ياحبيبتى تعالى نروح للدكتور يكشف عليكى ويديكى الدوا
المناسب
سارة : بكرة ان شاء الله هابقى اروح اكشف
محمد : ماشى ياحبيبتى على راحتك
سارة : انا هدخل اريح شوية ياحبيبى ، ابقى شيل الاكل بقى
بعد ماتخلص
محمد : حاضر ، روحى ارتاحى انتى ودفى نفسك كويس
—————
خالد جاى من شغله ولقى مجدى وسالى فى شقته
خالد سلم عليهم : اهلا وسهلا ، منورين اخباركم ايه
مجدى : الحمد لله احنا بخير ياابنى
خالد : امال اية فين ؟؟
سالى : هى فى المطبخ ومعاها محمود
اية جات هى ومحمود ومعاها عصير : حبيبى انت جيت ، اجهز العشا بقى
محمود سلم على خالد
مجدى : لا ولا عشا ولاغيره
سالى : احنا يدوب نشرب العصير ونمشى
خالد : ازاى الكلام ده ياحاجة انتو لازم تتعشو معانا ماتقولك كلمة
ياشيخ محمود
محمود : انا رايى كدة بردو انتو تقعدو تتعشو معاهم ،
خالد : هما بس طب وحضرتك ان شاء الله
محمود : لا انا هاروح اتعشى مع موكة وابقى اجيلكم بقى فى السهرة
خالد غمزله : ايوة ياعم بقى هنيالك
الكل ضحك
خالد : انا هستأذنكو ادخل اغير هدومى على مااية تجهز العشا ، والله
لومشبتو ياعمى هازعل جدا ، ولو زعلت منكم هازعل بنتكم انتو احرار بقى ههههه
اية بدلع : بقى كدة طب انا مخصماك بقى
خالد قرب منها : لا لا انا مااقدرش على خصامك ياقمر، هو انا اقدر ازعلك
بردو وقرب منها اكتر وكان رايح يبوسها
محمود : احم احم نحن هنا
خالد : على فكرة ياعمى لو مستعجلين ممكن تمشو عادى مش ضرورى
تتعشو معانا
الكل ضحك
سالى : شوف ياحاج مجدى جوز بنتك بعنا فى ثانية
مجدى : ههه يالا بقى مش مشكلة ياحاجة ربنا يسعدهم ، يالا يابت
يااية خدى امك وروحو جهزو العشا ، وانت ياخالد ادخل يالا غير هدومك
———
محمود راح لملك
سلامة : ازيك يامحمود ياابنى
محمود : الحمد لله بخير
سلامة : والوالد والوالدة تمام
محمود : تمام الحمد لله ، امال ملك فين ياعمى
سلامة : ملك زمانها جاية كانت بتذاكر مابطلتش مذاكرة من الصبح
محمود : ليه كدة ده حتى لسة بدرى على الامتحانات
سلامة : انا عارف بتقول عندها امتحان اسمه حاجة كدة تيرم لما تيجى
ابقى اسالها بقى ، اهى جات اهى بقولك ايه انا هاقوم اجيب العشا
واقنعها انت بقى تتعشى معانا علشان مش راضية تتعشى
محمود : من عنية ياعمى
ملك سلمت على محمود : ازيك يامحمود
(للعلم ملك ومحمود كتبو الكتاب علشان لما يسلم عليها اويخرجو مع بعض
لوحدهم ماياخدش ذنب )
محمود : الحمد لله ، امتحان ايه ده اللى عندك دلوقتى ده
ملك : ده امتحان الميد ترم
محمود : امممم ، وعاملة ايه فى المذاكرة ، لسالك كتير
ملك : الحمد لله انا خلصت وكنت براجع قبل ماتيجى ماعدش غير
حاجة بسيطة ، اية عاملة ايه
محمود : كويسة ياستى لسة جاى من عندها دلوقتى ، وبعدين تعالى هنا
اشمعنا اية اللى بتسالى عليها دايما عمرك ماسالتينى عن امل يعنى
ملك : مااقصدش والله حاجة بس امل دايما كدة بتحسسنى انها مابتحبنيش
، على عكس اية بحسها مرحة كدة وحبوبة خالص
محمود : هى فعلا اية حبوبة ، انتى عارفة هى الوحيدة اللى بحب اتكلم معاها
فى البيت كله ، والوحيدة اللى بحكيلها كل اسرارى ، بس والله امل طيبة ، لكن
الظروف اللى مرت بيها هى اللى خلتها بقت كدة
ملك : ربنا يصلح حالها يارب
محمود : يارب
سلامة : يالا ياولاد العشا جهز
ملك : لا يابابا كلو انتو بالهنا والشفا انا مش جعانة
محمود :والله !! وانا كمان مش جعان
ملك : مالكش دعوة بى يامحمود قوم انت اتعشى مع بابا
محمود : والله لوماقعدتى اتعشيتى معانا مانا واكل
ملك : ايه ده يامحمود انت صغير للكلام ده!!
محمود : ايوة انا صغير ايه رايك بقى
ملك : ههه ، خلاص ياسيدى امرى لله هاتعشى معاكم
سلامة : هههه بقى كدة ماشى يابنت سلامة يعنى زعل محمود مش
قادرة عليه لكن زعل ابوكى عادى، ماشى ماشى
ملك : لا طبعا يابابا بس انت متعود منى على كدة عادى يعنى
سلامة : بهزر ياحبيبتى ربنا يسعدكم يارب وتفضلى دايما كدة
بتراعى مشاعره وتخافى على زعله
محمود : بقولكم ايه احنا هنقضيها كلام يالا ناكل بقى انا جعت الاكل
بصراحة مشجع جدا
سلامة : اتفضل ياحبيبى احلى كفتة مشوية على الفحم من ايد عمك
سلامة ، كل وادعيلى
————
محمد جاى من شغله لقى سارة بتعيط
محمد : ايه ياسارة مالك فيه حاجة حصلت
سارة بدموع : انا رحت كشفت النهاردة والدكتور قالى انى حامل
محمد بفرحة : بجد وهو ده اللى مزعلك انتى عبيطة يابنتى ده احلى خبر
سمعته فى حياتى
سارة بعصبية : احلى خبر ايه ،لأة طبعا انت عارف انى مش عايزة
اخلف دلوقتى انا خلاص اتفقت مع الدكتور انى هاروحله بكرة وهانزل
الجنين
محمد بصدمة : نعم بتقولى ايه ؟؟؟!!!!
وخلصت حلقتنا النهاردة،
توقعاتكم 
ياترى محمد هيسمح لسارة تنفذ اللى فى دماغها وتنزل
الجنين ولا لا ، ولو رفض هى هتستسلم وتسيب الجنين ولا هتعمل ايه
هند ممكن توافق انها تفضل على ذمة طارق لورجع امل ولا هترفض
وتفضل الطلاق
خالد هيقدر يوصل للناس اللى بتتعامل مع فهمى فى مصر ولا لا
وهل فهمى له علاقة بقتل عبدالله ؟؟!!!
