رواية قانون القلب اقوي الفصل الحادي عشر 11 بقلم رسل احمد
يگول
اخذها غصبا عنهم
وصلوا الكلام الگلته
يحرمني من غاليتي
خلي يحضر فاتحته
—-نورهان—-
كاعدة اشوف المرافعه بأنتباه شديد وبيدي سجل اسجل بي ملاحظات اباوع لأستاذ محمد شلون يحجي بطلاقه وصوته مرتفع وواضح بمواجهه القاضي استدار ياخذ اوراق يريد يسلمها للقاضي وعينه صارت اتجاهي ابتسم ابتسامه طفيفه واني ابتسمت مثله . طلع انسان لطيف ومحترم مو مثل ما جنت مفكرة وكلش يحب شغله وشغوف بي هاي ثاني مرافعه اله ادخلها وبالمرتين الحكم جان لصالح موكله. خلصت المرافعه وطلعت اتمشى بأتجاه مكتب ست سناء دخلت لكيتها منغمسه بالشغل باوعتلي من تحت نظاراتهه:- ها الحكم لصالحه مو؟
اشرتلها بالايجاب ضحكت وهزت راسهه:- ملعون محمد ما يقبل بالخسارة قضيه يعرفها خسرانه ما ياخذهه اصلا.
– كلش شاطر مجنت متوقعته بالمهارة…
كعدت بصفها وصارت تشرحلي بعض القضايا القديمه وتشوفني ملف وخلتني اشتغل بي اندمجت . اندك باب المكتب ودخل منه محمد
– السلام عليكم .
– اهلا استاذ محمد مبروك ست نورهان كالت الحكم لصالحك..
– الله يبارك بيح طبعا عندج شك ست سناء
اندار على نورهان الي مركز بالملف الي بيدها وتدون ملاحظات بسجل الثاني العدها :-ماكو مبروك ست.
انحرجت وحمرة طفيفه اكتسحت خدها:-العفو منك استاذ الف مبروك.
ابتسم وهز راسه بشكر وهي رجعت للملف ركز بيها شلون مندمجه وعاكدة حواجبهه بخفه عيونها كبار ورموشها متشابكه من كثافتهن تحرك شفايفها تقرة الملف بصمت هز راسه ينهر روحه ووكف بسرعه :- يلا اني رايح محتاجين شي
سناء:- سلامتك ولا تنسى سالفه محمود.
– كلتله تعال للمكتب قبل اسبوع وما اجه قابل اركض وراه هو محتاجني مو انه .
سناء:- مستحي منك.
– عليمن قابل جاي يخطب مني مرة ؟بس اعرف سوالفه ينتظرني اعرض خدماتي عليه وتعرفيتي ماسويها
جانت ترفع عينها بين حين واخر تستمع لحديثهم .
– يلا اودعناكم. تمشى لباب المكتب ووكف استدار موجه انظاره لنورهان. ست نورهان سلام هم حجه وياج؟
– بلي مرة لو مرتين هيج بشغل عضت شفتها مستحيه وابتسمت منزله راسهه واردفت بس كتله استاذ محمد هوواي يسلم عليك
ابتسم بمرح:- شطورة .. ضحكت بخفوت مغطيه شفايفها . وابتسم على ضحكتها
– اودعناكم صدك هلمرة. كالها وطلع….
صح بطلت من مكتب استاذ بهاء بس صرت أشوف استاذ محمد بالتطبيق ودايما ادخل مرافعاته ومرات ينطيني نسخ حتى اقراهه واتعلم واخذ خبرة ساعدني هوايه ودايما يوصي عليه تغيرت نظرتي اله واكتشفت شكد هو محترم وخلف ملامحه الجديه انسان مرح وسلس ويساعد الي يحتاجه
——ياقوت——
نزلت الدرج بهمه وكلبي كل شويه يهبط بصدري اليوم اشوفه لگيت الكل بالمطبخ يتريك بصمت وعلامات النعاس مغطيه وجوهم الا اني رغم ما نمت غير ساعتين بس كل النشاط داب بجسمي
محمد يشرب چاي وعينه بتليفونه الي مستحيل يوكع من ايده
زهراء تاكل وهي مغمضه
هاجر توكل بجهال حتى ينطلقون لمدارسهم
وحيدر يحاول يجبر ليالي تاكل شي بس مجاي تكدر وتعبانه من اعراض الحمل الي بانت عليها ووحامها جدا صعب
– لج بس شويه اكلي صارلج كم يوم محاطه لكمه بحلكج
جاوبته بملامح كاشه من منظر الاكل على ميز الطعام:- حيدر عوفني ماكدر ماكدر . غطت حلكها وخشمها بيدها وكامت بسرعه تركض لصحيات صاح بيها وهو يكوم وراهه:- لا تركضين هيج على كيفج
زهراء:- والله لو ياخذلها اجازه ليالي حيل تعبانه لا اكل ولا شرب وساكنه الصحيات ترد من راسهه . دارت نظراتهه مضيقه عيونها على هاجر . اشو انتي ماكو اي اعراض حمل شكد الج اربع اشهر؟
توترت هاجر ووجهها صار شاحب:- اي عادي حمل عن حمل يختلف مو شرط كل نسوان وحامهن صعب مثل ست ليالي. اندرات ونظراتهه بين محمد وسيد حسن. اريد اروح لامي اذا ممكن.
باوع سيد حسن لمحمد وهو يحجي:- اي بويه حقج روحي خلي رجلج يوصلج
محمد حجه بدون ما يباوعلها:- الجهال يبقون هنا تردين تروحين لامج ما امنعج بس جهالي ما يوصلون هذاك البيت
عارضت:- بس امي تريد تشوفهم.
نهض من مكانه يشيل جنطه الشغل:- هذا العندي معاجبج كعدي وسكتي وطلع من باب المطبخ
باوعت لسيد حسن تستنجد بي وجاوبها:- بنتي مالي حق ادخل اكثر من هيج قنعي انتي .
هزت راسهه وعيونها الشرر يتطاير منها اتجاه ياقوت الي بنظرها كل الديصير بيها بسببها كامت طلعت ورا محمد وظلت تحجي ويا بالحوش بصوت غير مسموع
كمنه اني وزهراء نطلع سيارتي برا مرينه من هاجر ومحمد الي قطع حديثه موجه كلامه الي:- بارحه بدلت دهن سيارتج وفولتها لا تخليها هلكد بدون تبديل دهن كولي لواحد من عدنه كل فتره حتى نسويها.ابتسمت واقتربت منه بست خدة علاقتي بي شكد تغيرت خاصة بعد ما صرت اداوم ويا بالمكتب هوايه اتقربنا من بعض.
كرص خدي مبتسم وطلع قبلنه همست هاجر من تحت انفاسهه:- صايرين دهن ودبس ماشالله .
زهراء:- من يومنا حبي بس مرات اكو حيايا تحاول تغير النفوس بس محد يكدر يغير الدم والخوة ومحمد اخونا الجبير وعزوتنا
رادت هاجر تردها واني قطعت مناگرهن:- كافي من الصبح يلا امشي لا نتاخر عندي محاضره من وكت .
انطلقنه لدوام واني گلبي يرفرف بتوتر عبالك عندي امتحان وزهراء كل شويه تذبلي بسمار
دخلنه الدوام وكلمن راحت محاضرتها واني بالي مو ويايه بالي بلي راح اشوفه اول مرة بعد ما رجعنا سوة
دزلي رساله واني بنص المحاضرة ( راح اتأخر شوي انه بالدوام وطلعتلي شغله صفح احبك يا ضوة)
ابتسمت واني اقرأ اخر جمله دزيتله قلب احمر وسديت التليفون رجع دزلي ( ماكو احبك مشتاقتلك منا منا) ظليت صافنه برساله ياربي ماعرف احجي هيج .ماعندي جرائته رجع دزلي( يا بويه على الجوريات الحمرن بخدودك)
رجعت جاوبته بسمايل القرد مغطي وجهه دز ضحكه طويله .سديت التليفون ورجعت للمحاضرة
اختفى وحتى اتصاله بالنت انقطع وبقت محاضره وحدة واطلع للمكتب فقدت الامل وكلت خلص مراح يجي انزعجت وحسيت بخيبه طلعت من الكافتيريا بيدي بطل مي متوجهه لاخر محاضره دك تليفوني وكلبي گلي هو طلعت تليفوني مستعجله وجاوبته
– الو.
– وينج؟
– اني لو انت الي اختفيت.
– مو كلتلج طلعلتي شغله صفح بالدوام يادوب خلصت واجيت .
رفعت راسي ادور بعيوني عليه وهتفت بلهفه بانت على صوتي:- انت هنا وينك
قهقه بنبره رجوليه اخترقت كل وريد وشريان بگلبي:- يا بويه المشتاق بس ما يحجي كدامج انه .
باوعت كدام ديتمشى على كيفه من بعيد وتليفونه على اذانه ومبتسم بعذوبه خلّت قشعريرة تسري بجسمي واسأل نفسي يارب ليش هلكد احبه ابتسمت وهو سوالي حركه بخشمه دوختني وصل كدامي واثنينه تليفوناتنه على اذانه
حجه بصوت راخي وهامس:- شلونك يا گمر ضاوي.
نزلت تليفوني اسده وايدي ترجف رصيتها بقوة عالتليفون وارتبكت منصيه عيوني حاولت اسيطر على بسمتي صوتي طلع همس غصب عني:- زينه انت شلونك؟
ابتسامته مافاركت وجهه وعيونه تنتقل بين عيوني بشغف:- انه فوك الكلش زين بهواي بعد شوفه هالوجه ..
نهرته بخجل احتلني واربكني:- فاارس . لا تحجي هيج عفيه.
– شحچينه بويه تعاي خل نكعد بمكان شمس وعيونك سوة مسويات عليه شدة يا ورد وضاعت علومي
ضحكت بخفوت اندرايت بدون ما اجاوبه وشراح اكدر اجاوبه
اسمعه يهمس بنبرة ذايبه:- انه غلام ابوي مو ضحكه طلقه وبنص گلبي
دخلنه الكافتيريا كعدنه ودك تليفونه . شفت ملامحه تتوتر وانطه رفض وگلب التليفون على وجهه. ماعرف ليش كلبي مارتاح من هالحركه وبين هالشي على وجهي وسألني:- شبيج حبيبي اشو غيمت يمج؟
هزيت راسي نافيه:- ولا شي بس تعبانه هواي محاضرات اليوم
سكتت وهو سكت وصرت العب بسير جنطتي الي بحضني الهي روحي مرتبكه لان اعرفه ديباوعلي اول مرة نكعد سوة واحنه حبيبين بعد ٣ سنوات من المد والجزر
رفعت عيني اله صافن بيه ومبتسم رديتله الابتسامه همس:- شكد حلوة انتي؟
فريت عيني بغرور مصطنع:- ادري بروحي اخبل؟
رفع حواجبه وضحك:- بويه مادريت بيج مغرورة؟
سالته:- شكو بيها شويه انغر.
-يحقلج بويه يحقلج اذا مو انتي التنغرين عليه چا منو؟
باوعت لساعه ايدي :- لازم اروح عندي محاضرة
اعترض:- شفتهمت منج؟ اكعدي لا تدخلين محاضرة هلمرة
هزيت راسي:- ماكدر فارس محاضرة مهمه .
تنهد بخيبه وكال:- شوكت اخطبج بلا زحمه واكعد وياج مثل العالم ترا هالوضع ما يعجبني ابد اريد افوت بنص اهلج حتى اشوفج.
– خلي تفوت فترة شوي هسه صعب .
نبرته توحي بنفاذ صبره:- هسه غير افتهم ليش صعب ياقوت ترا ما صارت يعني انه اركض وراج علمود خطوبه عمي النسوان هي التدور تعال اخطب اشو انتي بالعكس لو هذا حظي النايم .
– مصار كم شهر من …. سكتت ماريد اجيب طاري
وحثني اكمل:- من شنو علويه ياقوت احجيها ؟
زفرت حسرة مخنوكه بصدري:- مصار كم شهر من انفصلت انطيني فرصه
لم شفته السفليه وشفت ملامحه تحتدد تقدم بكعدته ليكدام وهمس بغضب مكتوم:- وين وصليتنه بسكوتج احجيلي شصار وريحي كلبي.
-مصار شي ولا تضغط عليه ترا اعصابي بعد ما تتحمل ماريد احجي بهالموضوع الله يخليك . حسيت روحي بلشت ارجف كلشي يخص سيف يخليني احس بالمرض وكل ذكرى منه تصيبني بهلع خاصه اخر ذكرى علمت بروحي للابد فتحت جنطتي وفتحت قطعه كاكاو بيد ترعش حطيتها بحلكي وغمضت حيل امنع روحي ابچي . وفارس رافع حواجبه صافن عليه مو مفتهم شبيه
همس باهتمام:- ياقوت شبيج تعبانه؟
هزيت راسي:- عادي مبيه؟
عكد حواجبه :- انتي شنو قصه الحلو وياج هاي ثاني لو ثالث مرة اشوفج تسوين هيج
بلعت ريكي وشربت مي وشرحتله بصوت واهن:- اني لازم اكلك اصلا حتى تعرف. فارس اني مريضه
فتح عينه واحتل القلق ملامحه :- اسم الله عليج چنج العافيه
– اني عندي هبوط شبه مزمن بالسكر
بهتت ملامحه وباوعلي باهتمام:- شني؟
عضيت شفتي بقهر واني اتذكر اول مرة صارت بيه بيوم الي دخل عليه سيف غرفه بنين بيت عمي :- صار سنتين تقريبا وهيج فجاة جنت كاعدة وتخربطت وخلي ببالك هالشي تقريبا يبقى وياي يعني حتى تكون بصورة اذا شويه اتاخرت بالاكل اذا انقهر اذا اخاف اني ما اتحمل واتخربط ومرات لا تكون خفيفه والحك اكل شي حلو واسيطر عالوضع ابتسمت بحزن واردفت خاف تكول غشيتيني وطلعتي مريضه
حط ايده على خدة وذب حسرة طويله:- چنج العافيه ما بيج شي طبيعي هواي تصير بيهم ابتسم بعذوبه واوردف حتى من تتمرض نازك يا ضوة
وشلون ما تكونين اريدج اصيرلج علاج وملاذ ودوة
حسيت غصه بچي جثمت على صدري يحجي بصوت متروس حنيه وعيونه تلمع بحب صافي رجف حلكي وابتسمت بعيون غاطه بدمعها:- فارس اني. اني شسويت حتى تحبني هيج؟ استاهل كل هذا؟
تراجع ليورا ساند نفسه على ظهر الكرسي عيونه تحجي قبل لسانه:- سألت روحي هالسوال من زمان ومالكيت جواب حبج تسلل لگلبي بلايه اسباب وبلايه شروط كتلج من زمان حلات الحب هيج بدون اسباب
وهسه يا اميرة الشمس والگمر شوكت نتوكل ونجيب كل الناس مشيه تليق بعلويتي الحلوة
اصراره يزيد حبي :- خليها عالعطله الچبيرة بس يفوت وكت زين
باوعلي بعيون قلقه اردفت اطمنه:- لا تباوعلي هيج
شاركني هواجيسه :- خايف منج ياقوت خايف مثل ذيج العطله تروحين مني وهلمرة مابيها سماح ولا مغفرة
هتفت بگلب ملچوم:- ليش بعدك مصر اني غدرتك والله انجبرت وتأذيت فارس انت متعرف شصار بيه چان بيني وبين الجنون شعره
توسلني بنبرة متعذبه:- لج احجيلي بس احجيلي عقلي راح يطير من الافكار.
باوعت للفراغ واتذكرت اللحظه الي خله بيها سيف شفايفه على رقبتي وكزبر جسمي بقرف وملامحي كشت بنفور لا ارادي
همس بتوسل:- لج بس احجيلي شمسوي وياج . ومثل الي اجته لحظه ادراك فتح عينه بغضب وكز على سنونه. لج ياقوت. هذا العار شمسوي باعي روحج تكهربتي وترعشين شنهو الشي الي سواه لدرجه اهلج طلكوج منه ؟
مسحت كصتي بتعب احاول ازيح ذكرياته المقرفه:- فارس عليك الله سد الموضوع مو مستاهل اذا تظل تحجي بهاي السالفه احنه مراح نتوالم كدامك تعرف اني انخطبت وفسخت اذا تظل تحجي بيها عوفني لا تظل كل شويه تذكرني
عاتبني:- ليش ماعندج ثقه بيه شسوي وتأمنين بيه وتحجيلي ؟
– اني لوما عندي ثقه بيك مو كاعده كدامك هسه بس هذا الموضوع ماريده ينفتح اريد ابدي وياك صفحه جديده بدايتها اني وانت بس
انفرجت أساريره بفرح:- يا نعمتك ياربي صارت بيها اني وانت يلا اول الغيث گطرة.
ضحكت وباوعت لساعتي وفتحت عيني :- عزا راحت عليه المحاضره صار نص ساعه من بلشت ارتاحيت افندي؟
هز راسه بخبث:- اي كلش مرتاح .كل عقلج اخليج تروحين
——-زهراء——
طلعت من المحاضرة ادك على ياقوت متجاوب مفروض اليوم نرجع سوة للبيت مواعدين حيدر نطلع ليالي طلعه بنات بلكي تاكل وتغير جو تعبانه كلش رحت الكافتيريا حتى انتظرها هناك دخلت اخذت عصير فريش الجو حار . واتمشى اريد اشوفلي مكان والمح ياقوت كاعده وكدامها فارس مندمجين يسولفون
بقيت بعيده اركز بي وهاي اول مرة اتمعن بي ابتسامته تشع ويباوع لياقوت بطريقه كل انثى تتمنى الرجال يباوعلها بيها شكله وسيم بس ملعب مبين
مدري شنو كال وياقوت ضحكت بخجل حبيبتي شكد تبين فرحانه من زمان ما شفتها هيج وهو صافن بيها مبتسم على ضحكتها وعيونه تاكل بيها
عفتهم وكعدت بعيد ماحبيت اقطع عليهم كعدتهم وشكلهم شكد حلو خلوني احب الحب واعرفه شكد حلو
عيوني تنتقل بينهم اعرف هم عانو بصمت دعيت ربي يجمعهم ويعوض ياقوت عن الشافته من سيف لان اعرفها شكد متأذيه وليهسه تبچي من الصار وشلون تهجم عليها .
دك تليفوني حر قلبت عيني بملل وجاوبته من ورا خشمي:- نعم؟
– انتي وين ترا جاي انتظرج.
– ارجع ويه توته اليوم ماتروح المكتب .
سكت ثواني وكال خوش وسده. شكد ماعنده اسلوب لخاطر الله الله يساعد التاخذة يكتلها القهر من اسلوبه .
ظليت اگلب بتليفوني لحد ما انتهى وكت الدوام باوعتلهم بغير عالم اذا يقفلون عليهم الكافتيريا مراح يحسون . كمت وكفت متوجهه الهم .
فارس اول من لمحني واندرات ياقوت على اثرها وجهها صار احمر واستحت مني
– السلام عليكم.
فارس:- وعليكم السلام شلونج علويه زهراء..
ابتسمت :- الحمدلله بخير سياده النقيب انت شلونك..
ضحك وباوع لياقوت وعيونه لمعن بحب:- زين زين بنص الخير.
– اسمحلي اخذ توته منك لان الدوام انتهى تقريبا …
حط ايده على كلبه بطريقه دراميه:- لا على بختج توني حصلتها شلون تاخذيها.
ضحكت بخفوت :- لازم والله اخاف عليها
رفع حواجبه وارتفعت ضحكته:- افا هيج انه اخوف يابه ما اكل بشر.
– لا اختي كيك واخاف تاكلها ..ضحك بصوت عالي مرجع راسع ليورا
ياقوت:- كافي شنو هاي واحد يكبس واحد يرفع شلون اثنين عزا..
وكامت وكفت تشيل جنطتها. فارس صدك تأخرت صار شكد كاعدين..
باوعلي يستأذني دقيقه سلمت عليه وابتعدت عنهم اتمشى عالبطيء
ورا شوي اجتني وحطت ايدها بيدي مثل العرسان خدودها حمر ومتباوع بوجهي خجلانه طبطبت على ايدها:- الله يجمعكم اقرب وقت مبين يموت عليح توته حتى ما يرمش من يباوعلج..
باوعتلي وعيونها تلمع ومبتسمه:- ادعيلنه زهراء خايفه .
– المن خايفه ترا مبين جدي ويحبج ولا تنسين ترا خطبج قبل.من شنو تخافين
– ماعرف بس متوترة اخاف ورا كل هالحب اوكع على راسي بسالفه صرت اخاف افرح…
– كولي يالله وعيشي حياتج..
فارس ورانه يمشي بمسافه صعدنه السياره اشرلنه يسلم وانطلقنه للبيت
ياقوت ساكته ومن ملامحها اعرفها تفكر ومتوترة وخايفه هذا طبعها تفكر هواي وتخاف هواي
رجعنه للبيت مالكينه هاجر رايحه لاهلها بدون الجهال مصطفي موديها وبعده مراجع .. تغدينه وصاحني بابا لصاله الخطار . باوعت لياقوت اثنينه نعرف ليش صاحني
دخلت ورا وسديت الباب طبطب بصفه حتى اكعد اقتربت منه بسته من كتفه وكعدت بصفه مبتسمه اخفي توتري
مسد شعري وجر راسي باسني من شعري وبدا يحجي:- بابا زهورة انتي تعرفين معزتج انتي وياقوت هي عين وانتي عين اميراتي ومدلالتي الاشوف روحي بيهن
– الله يخليك النه بابا ولا يحرمنه دلالك.
فرك سبحته بين ايديه :- بنتي تواصل وياي دكتور حمزة يريد يخطبج
حسيت روحي صخنت من الخجل كدام بابا وعرفت ليش ياقوت جانت تنلجم من بابا يحاجيها علمود خطوبه
اردف:- الزلمه حجالي هواي عن نفسه ووضعه ومبين مرتب وخوش انسان.
ظليت ساكته ومنصيه راسي
ابو محمد:- راح يدز نسوانهم حتى تصير اتفاق اولي شتكولين؟
بلعت ريكي واحس حرارة تطلع من اذاني:- بكيفك بابا .
-والله يا بابا بعدج صغيرة ودي انتي واختج تبقن عندي طول العمر بس ماريد اوكف ببختجن والزلمه واضح محترم .
هزيت راسي اوافقه كلامه بدون ما انطق
طبطب على رجلي:- اليوم شنو اربعاء
– اي بابا.
– الجمعه والدته ونسوان بيتهم يجون والله كريم..
حسيت روحي راح اتخربط من خجلي كدام بابا وكمت وكفت استأذنت منه وطلعت عالسريع . ماما وياقوت يباوعن عليه ومبتسمات نزلت ليالي مبدله بس بلكوة تمشي وجهها اصفر ليمونه وحيدر وراهه
ياقوت:- ها ليلو چنج كلش تعبانه ..
ليالي بوهن:- دايخه ونفسي تلعب احس.. توقفت عن الكلام ورفعت ايديها لكصتها تعصرها وهمست لحيدر الي بصفها.حيدر الزمني عفيه دخت… لزمها محاوطها وهي تهاوت ووكعت بين ايديه
شهكت ياقوت بخوف واني اقتربت منهم
علويه نهله:- يا يا بسم الله ماعت روحها مددها هنا يمه هبط ضغطها
اباوع لحيدر ارتبك وخاف عليها حيل شالها وحطها عالتخم يضرب وجهها بخفه:- حبيبي ليالي تسمعيني .. يمه شسوي ؟
ياقوت:- خلي نوديها للمستشفى ترا لا اكل ولا شرب وبس تتقيأ مابقي بيها حيل عالاقل مغذي يحطولها ..
هز حيدر راسه وعيونه عليها يمسد بخدها:- يلا يمه خل نروح نوديها
كامت امي لبست عباتها وتحجي:- اي كوم نوديها خطيه
وياقوت كامت وياهم امي مقبلت اروح اباوع لحيدر شايلها على گلبه وخايف عليها صعدها السياره وتوجهوا للمستشفى
صعدت لغرفتي افكر بالخطوبه وحاسه بحيرة مانكر عاجبني بس اخاف اتندم خاصه بعد الصار بياقوت ماريد اتسرع قريت الفاتحه لام البنين وتوكلت على ربي اذا بيها صالح الي تكمل على خير واذا لا تنتهي ..
مر ساعتين ومحد بين منهم صابني قلق دكيت على ياقوت أطمن على ليالي
– ها توته بشري؟
– تعبانه ليالي زهراء عدها جفاف ومي الطفل قليل شوي راح يبقوها اليوم حطولها مغذيات على ايديها اثنينهن .
– خطيه يربي هاي عود بعدها مصارت شهرين شصار بيها كلش ذبلت .
– اي كلش لو تشوفيها هسه فدمرة وماتقبل مي تشرب ترده وحيدر يلوب عليها وخايف عالطفل
– لا ان شاءالله ماكو شي ترتاح اليوم عالعلاجات والمغذيات
– ان شالله يارب
– شنو هسه تبقين تجين منو يظل وياهه؟
– لا حيدر يكول انه ابقى يمها حولها غرفه خاصه واني وماما نرجع بابا جاي بالطريق.
– يلا خوش خليها بلكي تنتعش شويه عالمغذيات والعلاج همزين وديتوها.
– ان شاءالله يلا خل اروح اجه بابا. سدته مني ونزلت احضر عشه علما يجون دخل محمد كعد بالمطبخ يمي ومصطفى وصل من كربلاء من زمان وصعد نام سألني وين الباقين وحجيتله عن ليالي .
ورا شويه دخلو بابا وماما وياقوت ذبت حجابهه وكامت تسوي العشه وياي .
تونه جاي نتعشه ودك تليفون بابا .باوع للمتصل واعتلت ملامحه المفاجئه وهمس:- هاي عمتكم . من سيف طلك ياقوت ابد ما تواصلت ويه بابا وقطعت بي
فتح الخط:- ها خويه شلونج؟ شني شبيها .. لاا
جذب اهتمامنه كلنه نباوعله وهو علامات الاسف على وجهه واردف:- شلونها هسه . يلا مسافه الطريق مع السلامه
باوع لمحمد بأسف وكال:- بويه مرتك واكعه من الدرج والطفل واكع.
علويه نهله:- لاا حول الله شني الصار اليوم چنايني اثنينهن متواعدات يتخربطن
اباوع لياقوت انقهرت ومحمد وجهه انطعن ومبين انقهر بس ما احجه
الكل عاف العشه وكامت ماما تحثه:- كوم يمه نروح لمرتك انوب عليها بالاربع اشهر طفل جبير طروحته صعبه .
ابو محمد:- مطلعيها من المستشفى هسه بالبيت .
كامو محمد وبابا وماما وانطلقوا لكربلاء.لمينه العشه حتى واهس للاكل ماظل بس عشينه جهال محمد اخذتهم يمي بغرفتي وياقوت تحاجي كرار اذا ما يتخابرون يوميه تحس روحها مضيعه شي . انقهرت على جهال محمد عايشين ويه ام واب كل وفاق ماكو بينهم ومحمد حتى بالغرفه مينام كلش مو طايق هاجر ورغم كرهي الها بس كاسرين خاطري جهاله .
نمنا قبل لا يرجعون وكعدنه الصبح شفنا هاجر موجودة وجهها اصفر مبينه تعبانه وبيدها كانيولا اتحمدنه الهه عالسلامه وكلمن راح لدوامه
ياقوت اتصلت بحيدر كاللهه راح نطلع هسه نرجع للبيت وماخذ اجازه لليالي كم يوم حتى ترتاح .
وهيج مرن اليومين حسيتهن ثگال مسدت على نفنوفي البسيط الي لابسته بتوتر حتى ايدي عركت اجت ياقوت تستعجلني:- يلا زهراء ترا هواي انتظرن النسوان ام لسان شبيج صرتي هلكدودتج واني اكول زهراء كدها وكدود
فركت ايدي حيل ومعدتي خبطت :- مادري شو خايفه . ضحكت وهي تبوسني وتشجعني حتى انزل القيت نظره اخيرة على نفسي نفنوفي وردي بسيط ردن كامل وعالجسم مبي اي تفاصيل وفردت شعري ومكياج خفيف كلش
ياقوت:- گمر . گمر يلا خل ننزل . نزلنه واني مچلبه بياقوت من توتري امه واخواته اربعه وخالاته اثنين وعماته ثلاثه ونسوان اخوته اثنين كلهن استلمني بوس واحضان ومجاملات
كعدت شويه وكمت بدون ما احجي حسب توصيات ماما واني اصلا ماكو شي احجي بي
لليل ماما كلتلي قرري حتى ابوج يخابر عمامج ويتفقون على موعد الخطوبه بعد ما ينتهي الموسم الدراسي وتخلص الامتحانات النهائيه.
مانكر التفكير اكلني اكل قرار جبير ومهم بس شفته حابني وكبل دخل من الباب وخطب وبي كل المواصفات وحتى بيته وحده ليش دارفض وقررت بعد كم يوم اكول لماما اني موافقه. مجنت اعرف موافقتي مالها كل فايده .
—— ياقوت——
الاسبوع الراح جان حافل لقائنه اني وفارس مرضه ليالي واجهاض هاجر والاهم خطوبه زهراء فرحتلها كلش دكتور حمزة اي بنيه تحلم ترتبط بي وكل مواصفاته مثلما زهراء تريد
قطع تفكيري تيلفوني الي يهتز بجيبي بنص المحاضرة انطيته رفض ودزيتله رساله( اني بالمحاضرة فارس )
دزلي علامه اوكي
كل وقتي صاير ويا انام والخط مفتوح اكعد الكاه بعد عالخط كلامه يسحرني وحبه يخليني اغرك اكثر واكثر بي شاغل بالي طول الوكت ويزور احلامي يوميه احس روحي اميرة ويا متفهم خجلي ورغم لهفته لكلمه احبك وحبيبي بس ما ضغط عليه رغم اني احس كل حرف بيهن حبه محتل كل ذرة بيه وهو الوحيد الي ترهم عليه كلمه حبيبي . احبه لدرجه احس كلبي يوجعني لطاري. وكلشي بي يعجبني وسامته صوته كلامه اسلوبه نظراته صرت أسيره لكل حركه وكلمه تبدر منه
خلصت دوامي وتوجهت لسيارتي حتى اروح للمكتب . لكيت ورد على جامه السياره الاماميه وبوكس هدايا.. عكدت حواجبي مبتسمه وشلتهن
كارت صغير مدسوس بين الورد الاحمر فتحته اقرا المكتوب وكلبي يدك سريع ( احبك يا ضوة ) حضنت الورد على كلبي احس روحي اسعد انسانه صعدت السياره وفتحت البوكس شفت بي حلقات اثنين فتحت عيني بصدمه مجنون ومستعجل مبي صبر ويوميه لازم يفتح موضوع الخطوبه ويايه
دكيت عليه واجاني صوته الاحبه:- اميرة الشمس والگمر شافت ورداتهه ؟
هتفت باستحياء:- شنو هالحركات فارس يجنن الورد متت عليه.
ضحك وكال بتلاعب:- دموتي عليه اني انحب اكثر من الورد والله .
ضحكت بخفوت وهو تنهد:- ياقوت ما ظل صبر والحسين فكيها عاد
– انت ليش ماعندك صبر انتظر الوقت المناسب واعتب عليه اذا گلتلك لا تخطب
– يا بويه يا ياقوت متحلف بيج حلفه بس خل يكول السيد زوجتك موكلتي
شلعان كلبي هذا كله اطلعه من عيونج بس خل اخذج .
– هيج صارت فارس تريد تطلع عيوني روح زعلت.
ضحك وهمس بذوبان:- شدوخني غير عيونك اضمهن بگلبي . لك احبك يا ضوة
ابتسمت بدون ما اجاوبه كالعاده
فارس:- هاي الحلقات ضميهن راح نلبسهن عن قريب . عجبوج؟
هتفت باعجاب :- كلش كلش عجبوني
– شفتي الحفر الداخلهن . عكدت حواجبي واني ارجع افتح العلبه وهمست :- لا مشفت لحظه.
حافر اسمائنه على الحلقات من الداخل ابتسمت :- فارس كلش حلو شوكت سويتهن.
– من زمان هواي وهسه اجه وكتهن .
ترددت احجي وخفت يعصب:- فارس اريد احجي شي بس لا تعصب
– خير ان شاءالله علويه بالعباس كمت اخاف منج تطلعين بسالفه صفح؟
حكيت حنچي بتوتر :- فارس ترا مو بس تجي العطله تجي تخطب اجلها شويه.
تعصب ونبره صوته علت بنفاذ صبر:- استغفرالله العظيم واتوب اليه شطلعت هاي ياقوت ترا ما صارت عمي شبيج بس تأجلين
هتفت ابررله:- بس خلي اشرحلك وافتهم زهراء اختي مشيتها ورا ما تخلص الامتحانات مباشرة يعني خوما اني وياهه بنفس الوكت ؟
صاح بنتره:- واني شعليه بيها يعني شلون نوكف حياتنه علمود اختج ترا بزعتيني والحسين
– هاي شبيك ترا ما كلت اجلها سنه بس تخلص سالفه زهراء لويش دتصيح هيج.
– لان مليت مليت جم دوب انتظر وبس تتحججين عمي اذا ما رايده كولي وفضيها
فكيت عيوني على اسلوبه وانهضمت حسيت روحي اريد ابچي قهرني:- خل اروح فارس ؟
– تعاي ما ترحين مو تذبين قنبله هلكبرها وتروحين ؟
– خليني اسده اريد اروح للمكتب.
– وعلي اذا سديتي يا ياقوت اجيج مثل ذيج الجيه تذكريها زين وتذكرين شسويت بيج من يمي تماطلين وتعززين والمرة الراحت عفتيني اسبوع لكيتج كاطعه مهر المرة الجايه ان شاءالله ابنج بحضنج
بلعت ريكي مبهوته :- لا عاشت ايدك خاف ناويه انسى زين سويت من ذكرتني الف مرة بررت الك وكلتلك انجبرت والله انجبرت.
ردد بندم سريع- تعاي لا تزعلين مو قصدي بس دمي فاير ولج اريدج تصيرين الي وارتاح
– روح فارس ماريد احجي وعوفني بحالي. سديته بدون ما اسمع رده ودمعت بصمت واني اتذكر هذاك اليوم رجع يدك سويته صامت وحركت السياره متوجهه للمكتب ظل يدك ويدز رسايل مافتحت واخر شي قفلت تليفوني قهرني كلش ميعرف شكد اثرت بيه وقهرتني حركته شكد كرهني بنفسي
مجاوبته من يومها رغم اصراره يوميه يدك ويدز رسايل امسح المحادثه قبل لا افتحها حتى ما اضعف واجاوب
تعبت من التحكم واكره التهديد . التهديدات الي شفتها ويه سيف كافيه تعيشني بعقد نفسيه منا لسنوات ليكدام ما مستعده اتقبل تهديد اخر ومن فارس بذات تعبت واني ابررله
— زهراء—-
اخر يوم امتحانات ودوام هالسنه طلعت من الامتحان لكيت حر داك هواي عليه استغربت ميدك هلكد
دكيت عليه داشوف شبي قلقني هواي متصل بس دكيت جاوب وصوته يرعد:- انتي وينج مليون مرة دكيت؟
– هاي شبيك بالامتحان يعني وين ؟
-يلا طلعلي برا انه.
– دنطيني مجال اكعد ويه صديقاتي اسلم عليهن اخر يوم دوام.
صاح منفعل:- طلعي لا اجيج ترا روحي بخشمي .
– اجيت عوذة منك لو تموت السنه الجايه ما ارجع وياك بعد طلعتها لروحي .
– تعاي بلا حجي زايد. وسده بوجهي ياربي اتمنى اخنكه واطلع روحه
سلمت بسرعه عالبنات وطلعت لكيته وحده استغربت وين بنين
صعدت ورا وسلمت:- هلو شنو وبن بنين.
– رجعت من زمان امتحانهه ب٨ ونص مو مثلج .
– لعد ليش اجيت جان رجعت اني ؟
– عادي بدربي توني راجع من المكتب ماعندي شغل اليوم .
حسيته مو على بعضه مدري شبي:- بيك شي صاير شي اشو موعلى بعضك؟
شمر جكارته من الجامه واندار عليه معبس:- جايين عليج خطابه؟
ابتسمت مستحيه:- اي صح؟
– وانتي شنو رأيج؟
– اني موافقه.
احتدت ملامحه وبرز دمار بكصته:- زهراء تعرفي ؟
– اعرفه اي غير دكتور ويدرسني؟
– شعندج ويا ولج!!!!
هزيت راسي بعنف خفت يروح يخربها عليه:- لا . لا لا والله حر مو مثل الي بالك اصلا بس اخذ رقم بابا ابد محجه ويايه ماعندي شي ويا والله.
– چا شعرفتي عنه ووافقتي؟
– كل مواصفاته زينه ليش ما اوافق. ماعرفت افسر نظراته
هز راسه بدون ميحجي واندار حرّك السياره ماحجه حرف عكس كل يوم يظل يتناگر ويايه وجربت احجي ويا مشفت منه تجاوب سكتت وعفته الظاهر مزاجه متعكر
هيج مر اول اسبوع بالعطله ترتيبات سوينه تنظيف عميق للبيت والصاله وماما كالت بيبي اسينات راح تجي هي وبيت خالو علي من ايران هم هناك مستقرين لان بيبي اسينات امها لماما اصلها مناك .جنه كل سنه نروح بالعطله هناك ومرات نبقى اني وياقوت طول العطله يمهم بس من صرنه بالكليه مارحنه بسبب الاوضاع الصارت بابا خاف علينه
طبيت على ياقوت لگيتها مكابله الشباك ودمعتها بخدها صارلها فتره مو على بعضها ومتحجي شبيها بس مبين هي وفارس متعاركين
– توته شبيج ليش تبچين؟
مسحت وجهها وهزت راسهه نافيه:- مبيه هيج ضايجه
صغرت عيوني بشك :- تجذبين عليه توته ترا مبين انتي وفارس متعاركين
قوست شفتها بزعل وشفايفهه رجفن ورجعت دموعها تنساب بغزاره :- جرحني وكال كلام مو حلو كلام يعرفه يقهرني بعدنه بالبدايه وهيج يحجي اذا تزوجنه شيسوي ؟
– غير افتهم شكال .. صارت تحجيلي الصار وضجت من تصرفه شوكت يفتهم ياقوت اعصابهه هشه وبسرعه تنهار وابسط شي يأثر على نفسيتها
حضنتها اهديها ماريد ازيد عليها :- ميخالف حبيبتي مبين متعصب وكالها ترا يحبج والله
مسحت دموعها بعنف:- ماريد احد يحبني بس خلي يعوفوني بحالي ليش محد يفتهمني عبالج اني ناسيه هذاك اليوم من خطفني ما انسه ما انسه وكلت حبه ينسيني الرعب الشفته واني اتخيل اهلي يعرفون وانفضح لو يسويلي شي ويكسر ظهري لو انسى وغصت بدموعها وصارت ترجف وهي تكول بصوت متقطع. خطوبتي من سيف الصارت غصبا عني لو انسى عملته من حاصرني بهاي الغرفه يريد ينهش بيه مستحيل انسى لمساته القذرة صارت تشهك بصوت عالي عبالك نفسها مكطوع وموتت نفسها من البجي خفت عليها تتخربط واحاول اهديها بالكلام جريت بطل المي من فوك الكومدي بللت ايدي ومسحت وجهها وشربتها شوي ظلت بحضني تشهك كل شويه واني اقرا عليها ايات لحدما نامت مثل عادتها من تنقهر طريقتها بالهروب تنام
غطيتها وطلعت من الغرفه دكيت على نورهان كافي القهر الي شافته ياقوت ليش ديزيد عليها جاوبتني بسرعه سلمت عليها وكبل طبيت بالموضوع
– نورهان اخوج ليش هيج يتصرف ويه اختي ليش يحجي ويذكرها بسوالف هي تريد تنساهه حرام عليه ترا اعصابهه تعبت وبس تبجي
– حجالي ومرضيت عليه والله واتندم كال انفعلت وحجيت وهي متقبل تجاوبه يدزلها ويعتذر متفتح رسايله حتى هو اعصابه تعبت يريدها تجاوب ويعتذر منها .
– خلي يعوفها هالفترة نفسيتها زفت لا يضغط عليها بس ارجوج وصليله هذا الكلام ترا ياقوت مو مثل قبل تعرضت لهواي امور اذتها ما تتحمل اذيه زياده
– شنو هاي الامور.
– مالي حق احجي بشي هي متريده اذا هي حابه تحجي من ذاتها هذا شي يخصها
– ماعرف شنو اكول الله يهدي النفوس زهراء والله يعشقها انتي متعرفين شنو سوة علمودها حارب هوايه علمودها
استغربت كلامها:- على شنو حارب قابل شكو.
توترت نبره صوتها :- قصدي هواي اهلي وعمامي يضغطون عليه حتى يتزوج بس هو رافض علمودها زهراء والله الي بكده ولدهم بطولهم وهو ينتظر بيها هم حقه اخوج مو بكدة وابنه شكبره .
– الله كريم اذا مكتوبه قسمتهم سوة تصير غصبا عن كل الظروف بس على كيفه وياهه اذا من بدايه هيج ما ننطي بتنه نخاف عليها
– هي بس خل تصير والله يدللها دلال وكولي نورهان مكالت .تعاي انتي شصار على خطوبتج؟
-ذبيت حسرة حتى خطوبتي نسيتها الجمعه ان شاءالله مشيه وعقد اذا الله راد وراهه اسوي حفله خطوبه واعزمكم كلكم هاي بس مشيه اريد اسوي فد عشرين حفله كل خطوة بحفله
ضحكت نورهان :- يمه منج تموتين على هاي السوالف والحركات والترتيبات حبيبتي تستاهلين كل الخير والف مبروك مقدما
– يبارك بيج عمري يوم الالج انشاءالله
ضحكت بتوتر:- يمكن عن قريب بعد مصار شي رسمي؟
– هاي شنو محضرة العريس ويه شهاده التخرج؟ طبقتيها للمقوله
ضحكت :- ام لسان شلون بيج لا مو هيج بس هو زميلي بالكليه صار اربع سنوات وبيوم مناقشه البحث حجه ويايه وطلب رقم فارس وبعده فارس ليهسه ما حجه شي ماعرف اذا اتصل لو لا
– بيها الخير يارب تستاهلين احسن واحد نورهان انتي تخبلين خلقه واخلاق
– يعمري فدوا رحتلج. سديته منها ورجعت ونزلت جوا لكيت حيدر جاي وجايب ليالي من اهلها الفتره الراحت جانت يمهم كعدنه شويه وهي صعدت لغرفتها..
— ياقوت—-
ظلام وماعرف اني وين افتر حوالين نفسي حافيه واحس الكاع جوايه تصل من البرد مشيت وخايفه حاضنه روحي ظلام دامس ماشوف اي شي وكفت بمكاني واني احس بخطوات تقترب مني بردانه وملابسي خفيفه تلمست روحي لابسه نفنوف قصير جوا ركبتي بشويه وردانه قصير ايديه مثلجه
صحت بصوت راجف . بابا . محمد. مصطفى .مجتبى . حيدر . ماما . زهراء وينكم اخاف اني اخاف صحت بصوت اعلى ومرعوبه كل لشتي ترعش بخوف كرررااارررر . صار ضوة خفيف متسلط عليه باوعت لروحي ثوبي اسود واقترب مني فارس مبتسم . استغربت وجودة وحطيت ايدي على راسي اتلمس شعري طالع ولبسي خفيف شهكت شلون ما لابسه حجاب
سالته:- شدتسوي هنا وين اني ؟
صار قريب والضوة يعكس على وجهه منطي منظر يخوف مد ايده حطها بنص صدري ودفعني بقوة ووكعت ليورا كأني اوكع من حافه جبل عالي صار حجمه يتضأل واني اوكع والهوا ثلج اريد اصرخ بس ماكو صوت ميطلع صوتي غمضت منتظرة الأرض تلتقطني ..حسيت على ايد تهز بيه بقوة
ليالي:- ياقوت اصحي .. كابوس حبيبتي اصحي . فتحت عيني بشهكه واحس زردومي يوجعني من غصه البجي الواكفه بي ليالي فوك راسي
رفعت ايدي امسح وجهي وارجع شعري ليورا وكمت كعدت همست بتعب:- شصار.
ليالي:- اجيت اكعدج دنيا مغرب وسمعتج تونين وتلوبين بفراشج الظاهر مكوبسه نومه المغرب مو زينه زفرت نفس عميق متذكرة حلمي وهزيت راسي :- اي مدري شحلمت
كعدت بصفي وعيونها تباوعلي بفضول لزمت ايدي وكالت:- ياقوت ترا اني اعرف كلشي.
عكدت حواجبي بأستغراب:- تعرفين شنو؟
تحمحمت بتردد:- انتي وفارس والي بينكم.
فتحت عيوني بصدمه وتراجعت للخلف هزت راسهه تطمني:- والله ماكول لحيدر والله لتخافين .
بلعت ريگي:- من شوكت تعرفين؟
ابتسمت بعطف:- من زمان من جنت ماعرفج فارس حجالي كم مرة ونورهان هم بس تعمقت بتفاصيل بيوم الي تشاوفتو بباب بيتنا من اجيتي بعد خطوبتنا اني وحيدر. اثنينكم تكهربتو وانتبهت لوضعكم تخربط وفارس انهار من عرف انتي فسختي وحجالي كلشي . اكثر من مرة ردت احجي وياج وترددت اعرف عندج قلق مني لان مرت اخوج بس ياقوت لا تظنين اذيج اني حبيت واتأذيت من اخواني بسبب حبي وصلت الموت مرتين مستحيل اقبل غيري تمر بهالشي مو انوب انتي وتعرفين شكد احبج ومعزتج خاصه بگلبي وفارس اخويه الي ما جابته امي.
كلامها ريحني وحضنتها بدون ما احجي شي بادلتني الحضن وكفختني خفيف بالشقه:- وهسه جاوبي ترا سطرني يوميه يخابر واني يم اهلي ينتظر ارجع حتى احاجيج عمي عود نكول عليج الفاهيه طلع بيج كل البله فارة الزلمه فر ساطرته بالعباس .
رفعت راسي من حضنها معترضه:- شوفو منو يحجي مني الي جانت مسهره حيدر ليله وخلاني اطب المستشفى بنص الليل حتى يتطمن عليها انتي لو غيرج.
ضحكت بفخر:- اني قلبي اني رجعت حجت بجديه. عليج الله جاوبي وكافي زعل خل نفرح بيكم ورا ما تخلص خطوبه زهراء.
– ان شاءالله
كامت وهي تكول:- يلا صحصحي ونزلي نتعشه سوة ..
رجعت تهاويت بسريري واحس روحي دايخه من الحلم الشفته دك تليفوني عرفته فارس جاوبته بدون ما احجي
– لج شكد شفت ناس گلوبهم حجر مثلج ما شفت صارلي اسبوعين اريدج تجاوبين ماكو.
– تعبانه فارس تعبانه.
نبرته تغيرت لاهتمام:- شبيج حبيبي مريضه؟
– فارس خلي نحجي بهذا الموضوع لاخر مرة وراهه بعد منفتحه ممكن ؟
– حقج عليه ادري ضغطت عليج وحجيت كلام ماصخ واعتذر منج .
– خليني احجي الي اريده وراهه انت قرر
– كلي يسمعج يا كلي
– هوايه ظروف تكالبت عليه ولا تكلي احجيلي ماكدر احجيلك لهواي اسباب ممكن مستقبلا بس هسه مستحيل .هذيج السنه المشؤومه دمرتني دمار والله اعصابي وصحتي انهارت رب العالمين هو الي ساعدني والحمدلله انكشف كلشي وانكشفت النوايا كدام اهلي وساندوني ووكفو بظهري اذا اكلك مستعده لزواج اكذب عليك محتاجه وقت يمكن تشوفني هادئه واضحك والبس واطلع واداوم بس اكو معركه نفسيه بداخلي احاول اشغل نفسي عنها والي مصبرني حبك الي توني بلشت اعيشه مثل باقي البنات لا تظن اني احجي وياك ودخلت هالعلاقه وياك بدون مشاعر الله يعرف بس شنو الي بگلبي مشكلتي ماعرف اعبر ويمكن هالشي ديوصلك فكرة غلط عني اخجل احجي ماعندي جرائه ولا خبرة احجي مثلك
– بس اني اعرف والله وراضي اعرفج تحبيني مثلما احبج وادري تخجلين تحجين وما معترض اعرفج متربيه وما متعلمه تكونين جريئه وخجلج وحيائج يحببني بيج اكثر
– صدكني اني مو عاجبني نظل هيج واخون اهلي هالشي قاهرني بس والله مو مستعده اريد ارتاح مصارلي كم شهر من طلعت وشفت الدنيا وحسيت نفسي رجعت للحياة اريد اتحرر من كل عقده نفسيه انغرست بيه
همس بقهر:- والله بس اعرف شمسويلج ارجعه ببطن امه .
– شفت . شفت اني ليش ما احجيلك لان اعرفك وعرفتك من رحت هجمت عليه وكسرت ايده تسوي مصايب وهالشي يرجع علينا اني وياك ويخلي عوائق وحواجز بينا اكثر يعني اتظن اذا رحت سويتله شي اهلي راح يوافقون من تخطبني؟ وصدكني ماكو شي بس صارت مشاكل هوايه واني اتخبل من هالشي ونفسيتي تعبت
– مو مرتاح وكلبي لازمني .
– اعرف شنو يدور ببالك وكلما اشوفك اشوف هالشي بعيونك وبصوتك واطمنك ما طلعت ولا اختليت ولا خليته يطخ مني شعره ولا كعدت ويا ولا نزعت حجابي كدامه كل هذا مصار .. غمضت حيل واني اخفي عنه المرة الوحيدة الي حاول بيها سيف يستبيح ارادتي ماريد نفسه تلعب مني ولا يتصرف بتهور تجاه سيف وتصير كارثه
زفر براحه واجاني صوته متعب:- انت ما تعرفين شنو الصار بيه حاولت اقنع روحي هي راحت وصارت حلال غيرك يفارس بس ماكدرت اجرعها واحسج مالتي الي وحلالي مو لغيري
– خلينا ننسى الراح اترجاك وانطيني وقت بس كم شهر
– ياقوت راح انطيج منا لنهايه العطله انسي تداومين الرابع وانتي مو على ذمتي هذا حد صبري
تنهدت وابتسمت غصب عني احب اصراره رغم كلشي ثابت :- صار
– مشتاقلج يام گلب الاسود.
– رحم الله والديك اذا كلبي اسود
سولفت ويا شويه وهو غير الموضوع وظل يتغزل ويذب حجاياته الما امل منهن وسديته منه ونزلت جوا
—- زهراء——
كعدت من وكت على غير عادتي اليوم المشيه والعقد نزلت لكيت بيبي اسينات كاعده بالمطبخ تتريك ويه ماما وبابا البارحه اجت
بوستها حيل من خدودها:- صبح بخير عزيزم
– صباح الخير ولا تحجين الفارسي مالتج متفلش ؟
كعدت بصفها:- بيبي شسويلج ما علمتيني زين مثل ياقوت .
– محد عاتب عليج العراقي مالتي احسن منج بت نهله . وياقوت هي ذكيه وتعلمت بسرعه الا وينها ما كعدت
– بعدها نايمه هسه تكعد وصار الكل يكعد ويجي للمطبخ حتى خالو علي وبرير ابنه الجبير اجو كمت اساعد ماما بريوك وياقوت اجت دفعتني عود عروس لا تشتغلين واني عشت اللحظه وكعدت
ورا الغده صعدت سبحت وياقوت سرحت شعري لبست اكسسوار يشبه الطوق كرستال وبرمت شعري حطيت مكياج خفيف ولبست فستان ابيض بسيط طويل نزلت لكيت ليالي محضره ميز المهر بسيط مردت اسوي شي اوفر ردت التحضيرات الحلوة لحفله الخطوبه دخلت بغرفه ماما الجماعه على وصول والتوتر بلش يزيد عندي قريت الفاتحه لام البنين بنيه التوفيق وظليت كاعده اجتي ياقوت وجهها اليوم يشع من تصالحت هي وفارس لابسه فستان اصفر فاتح على الجسم نص ردن وطوله جوة الركبه بشوي عليه حزام ليلو وشعرها مرفوع بذيل حصان عالي طالعه تخبل
كعدت بصفي مبتسمه:- طالعه تخبلين زهورة نيال الخطيب يابه شلون كيكه حصل.
ضحكت بتوتر وكلبي يدك سريع مدت ماما راسهه من الباب:- وصلو الجماعه من نصيحج طلعي تعاي ياقوت سلمي عالنسوان..
طلعت توته واني اباوع من الباب سلمت عليهم وكعدت بصف ماما هاجر حالها حال الخطار كاشخه وكاعده وليالي وبنين هن ابتلشن بالضيافه
اجتي ماما طلعتني سلمت وكعدت بمكاني نتنظر يكملون شكليات المشيه حتى يبلش العقد
***** في صاله الرجال*****
كاعد بينهم على اعصابه عيونه تنتقل بينهم واحد واحد حتى الحوش بي كراسي وكاعدين عليه زلم ايده ترجف وجكارته ما فاركت شفايفه ديشوف حبيبته الي ينتظرها من سنين تروح من ايده داس على روحه هواي حتى يمشيها يقنع روحه حاجيتها انت وهي تريده وموافقه لا توگف بطريقها خليها تمشي بفالها حر زهراء ما تريدك ولا تفكر بيك وهاي النتيجه نار شابه بين ضلوعه عينه مثبتها على حمزة يريد يكوم يفلش وجهه ما يسمع شيحجون وشيكولون يسمع بس صوت كلبه الجاي يصرخ حبيبتك راح تصير حلال زلمه ثاني غيرك وتروح منك للابد .. قطع صفنته اقتراب عمه من باب الصاله الداخلي يريد يبلش يعقد صار يلهث بلكوة يجر النفس طفه جكارته وكام وكف ناوي وحاسم امره حجه بصوت عالي خله الكل ينتبه ويديرون راسهم عليه
– من رخصتكم جميعا جيتكم هاي على العين وعلى الراس والنعم منكم ونتشرف من نسبكم بس بنت عمي العلويه انه ناهي عليها ماعدنه الكم مرة للزواج
صمت . ذهول والكل صافن عليه يحاولون يستوعبون الي انكال صدك لو شنو
رجع عادها بصوت اعلى :- مثلما سمعتو يا جماعه الخير ونعتذر من سوء الفهم والصار بس بت عمي منهيه وانه الناهي عليها
تقرب ابو منه كاز على سنونه :- شجاي تخربط ولك كدام العالم
– ما مخربط وحجيت العندي ماكو خطبه تتم اليوم على كص رگبتي .
استقام ابو حمزة بغضب :- اذا السالفه هيج ليش تورطونه وخليتونه نجيب كل هاي العالم كوم ابني كوم الظاهر اجينه للناس الغلط صيحو الاهل من جوة …
طلعو كلهم مورثين واعصابهم نار وابو محمد والولد كلهم يريدون ياكلون حر بس مو كدام العالم انسحبو الزلم والخطابه كلهم وطلعت نسوانهم بسرعه بدون سلام وكلام وبلشت الاصوات تعلى
محمد ؛- شنو هذا العرض التافه الي سويته خزيتنه كدام الوادم ولك حر عود انت العاقل متخلف انت متخلف راسك محشى تبن
ابو محمد:- الكل يسكت واشر لحر تعال ولك تعال .. تعال يمي اريد افهم شنو هذا الحجي
صارت صياح والولد كلها تتصايح ومصطفى انفعل وتلازم هو وحر وحيدر يفاكك بينهم
دفع مصطفى عنه واندار حيدر عليه ضربه بوكس بوجهه تراجع ليورا :- عار هاي سوايه تسويها ولك شيوخ وعالم والبنيه موافقه تجي تفشلنه وتكسر فرحتها ؟
مسح خشمه ورفع راسه عينه بعينهم كلهم:- انه اريدها من زمان بنت عمي ورايدها.
صفك ابو محمد ايد بيد وعيونه تحولت دم وضغطه صعد:- ولك من سنين ابوك سألك قبل لا تولي تسافر وكلتله بويه ماريدها شتغير وطين راسك وخربتها اليوم.
صاح بانفعال:- صغيرة جانت كل عقلكم اكولن اي اريدها وهي عمرها كله ١٥ سنه شبيه مخبل اخليها بعقلها وهي جاهل
اقترب منه محمد وندسه بكتفه باطرف اصابيعه حيل:- على هاي دكتك لو تموت ما تريدك نهوة وما نهوة سوالف الهمج والرعيع ما تمشي يمنه ولك علويه زهراء ينهي عليها انهيك حر تدري شنو انهيك خواتي محد ينهي عليهن عدها زلم بظهرن يطكون ظهرك وحك هو علي
مجتبى كاعد ما متحرك من مكانه رفع راسه وكال:- تنهي على اختي انه هم انهي على اختك واكعدها يمك طول العمر معلكه ولا اخليك تاخذ زهراء بنهوة
ابو حر بأعتراض:- شني هذا هالكلام حسن احجي شي شوف ولدك ؟
صاح بأنفعال:- ولدي شالتهم غيرتهم على اختهم من سوايه ابنك المصخمه سكت سكت وتالي بيوم مشيتها وعقدها خربها وكعد على تلها وكسر فرحتها وفشلنه كدام العالم خلاني بكد النمله
اقترب حر من عمه :- حقك علي والغلط راكبني من ساسي لراسي وتصرفت برعونيه بس ما جرعت السالفه كلت خلي تمشي وماكدرت استصعبتها عمي والحسين حاولت لاخر لحظه بس ماكدرت .
كعد سيد حسن على التخم يفرك راسه:- فاركني حر اطلع ما اريد اشوف وجهك .
اندار يمشي يطلع ويفكر :-عادي خلي يطردني بس المهم محد ياخذها انه اقنعه بعدين
انفتح باب الصاله الداخلي وطلعت منه علويه نهله وجهها اصفر خزرت حر وحجت:- زهراء تخربطت واحد منكم يشيل اخته نوديها للمستشفى
اندار بخوف عليها وراد يرجع يدخل الولد كلهم دخلو عليها وسدو الباب
اقترب كم خطوة وصاح بي سيد حسن:- گلتلك فاركني وامشي اطلع امشييي ….
