بين نيران الثأر نورا بعيد
البارت الــــ5
ما عِشنه بِدونك بَس عِشت أنتَ
عمت عَينه الغريب البَينه بَدلته .
عبـــدالله:: انه قررت اروح ادافع عن ارضي ومقدساتي داعش ناوي يدخل لمقدساتنه وانه ما اكدر اشوف الي يصير بالعراق وأبقه كاعد بالبيت عذريني عذراي وعدتج اخليج انسانه سعيدة ولحد هاي لحظه گد وعدي بس السيد انطه جهاد كفائي وكلنه قاردين على حمل السلاح ماعدنه اي عذر اسف حبيبتي ونضر عيني رويحة السيد انتي ماردت اكلج بليله عرسنه ماردت ضوجين باسعد ليله عندج بس عگب باجر رايحين للعراق وانه ما اگدر سجلت اسمي والتحق ثاني يوم العزيمه الي مسويها ابوي
عــذراء:: كلمات حجاهن عبدالله لو احس الدنيا كلها وكفت بعيني بقيت اباوعله والصدمه والخوف والدموع كلهن تجمعن بلحظتها
_عبدالله صدك تحجي يهون عليك باول ايام زواجنه تخليني وتروح تحارب صار عليك شي عبدالله اني شسوي بدونك
_كلشي مايصير عليه بس الله عليج لاتعارضيني ولا توكفين بطريقي خليني اروح وانه مرتاح عذاري حبيبتي لا تبجين اروح فدوه لدموعج مايهون عليه اشوفهن بداعتي لاتبجين
_ما اكدر عبـــدالله عبالك ما اعرف شنو يصير بالعراق عبالك الي يرحون بسهوله يردون لاهلهم داعش مسيطرة وجاي تتقدم شلون اخليك تروح واني مالحگت افرح وياك واعيش حياتي ليش هيج تكسرني عبـــدالله ليش
_ياروح عبدالله ونضر عينه بس لاتبجين شوفي والله ارجعلج ونكمل باقي حياتنه كلها سوه بس ما اكدر مـَـا اروح عذراء
_بس گلي هاي الناس كلها رايحه واكفه عليك لو مارحت وجعت ڪَلبي سيد والله وجعت گلبي
_يارويحة السيد انتي آروح فدوه لگلبج لاتبجين شوفي اريدج قويه ما اريد يكولون مرت سيد عبـــدالله ضعيفه ما اريد امي وابوي وخواتي يعرفن لو وصلنه للعراق انه ابلغهم وره العزيمة
_سيد يعني مابيها اي مجال حتى لخاطري ماتغير قرارك
_كافي عذراء الله يخليج كافي لاتزيدنها عليه بس ياحبيبتي امر الجهاد واجب ولو مولانا الحسين هسه موجود وصاح الا من ناصراً ينصرني تمنعيني من نصرته
_هممم
_حاجيني گليلي تمنعيني
_لا ما امعنك واحارب وياك
_جا هسه شلون جاي تمعني عذراء داعش لاعنده ذمه ولاضمير جاي يسبون النسوان ويغتصبونهن وناوين يدخلون كربلاء تعرفين اذا دخلو كربلاء شيسون بالشيعة ضريح امامنه الحسين يهدمونه اذا ماننصر گاعنه ومقدساتنه جا شلون نريد ننصر صاحب الزمان لو ضهر حاجيني
عــذراء:: حظنت وجهي باديه وبقيت اشهك بالبجي حظني عبـــدالله ويسمح على راسي كلامه صحيح بس شسوي لگلبي لا اگدر امنعة ولا اگدر اخلي يروح خايفه عليه يروح ومايرجعلي مسح دموعي وباسني براسي
_مرت سيد عبـــدالله ما اريد احد يشوف دمعتها وان شاءالله ارجع بس ما اريد احد من اهلي يعرف هسه ماشي رويحتي
_ماشي
_لا مسحي دموعج وتعالي اطلبلج اكل
يوم الثاني من كعدت الصبح عمتي رايحه للحرم هيه وعمي والبنات بالدوام سويت ريوك لعبدالله وطلع وصاني اسوي الغده عن امه خاف تتأخر جاي اطبخ بالغده وطب عون وهذا من عرسي يمكن مـَرتيـن او تلاثه شفته صبح عليه بدون مايباوع بوجهي
_اكلج ماسويلي ريوك
_اي تدلل شنو تريد اسويلك
_بيض ويمج جبن بثلاجة وجاي
_تمامہ دقايق
عفت الغده وسويتله ريوك وخذته اله كاعد بصاله حطيته كدامه وكعد ياكل حتى رحم الله والديج ماكو هذا شبي عفته ورحت اكمل الغده واني اسولف وي روحي معقوله هذا منهم اشو لا يشبهم ولا حتى تعامله ونفسيته مثل باقي العائله كلت يالله شعلي بي طبخت المركة ونگعت التمن ورحت ارتب الصالة هذا عائف الصينيه بالگاع اقلها جيبها للمطبخ اغسلها شلت الصينيه وغسلت المواعين شغلت المكناسه الكهربائيه وگمت انضف الصالة بعد ماخلصت حولت ع الصاله الثانيه الزغيرة طفيت المكناسه ورحت شغلت قران بالتليفزيون ورجعت للمطبخ كعدت اسوي زلاطه ودخلت عمتي وعمي سلموا عليه وعمي يرحب بيه والابتسامه شاكه حلگه وجها النوراني زايده هيبه
_هلا بجتنته شنو علوية مخليه جنتج تطبخ باول ايامها
_ياا سيد اختلف عليه مو كتلك اليوم نريد سمج ومن رحنه اني ويـَاك للحرم مو كتلك خابر عبدالله يجيب وياه
_ياا ما اعرف اني كلت اطبخ الغده عنج ما اعرف تردون سمج ؏ الغدة
_لا بنيتي عادي وخلينه اليوم ناكل من ايدج ملينه من طبخ العلوية
يحجها ويضحك وهيه هم تضحك وياا
_شنو بابا حضرتوا اغراضكم ان شاء 4 ايام ونروح بلغتي اهلج ترحين تشوفينهم قبل لانروح
_لا والله عمو كلت اشوفكم بالاول بعدين اروح وابلغهم
كملت الغدة واذن الكل راح يصلي رجع عبدالله لگاني اصلي توضه واجه يصلي كدامي من خلصت صلنه صلاة نزلنه كمت احضر وي عمتي اجن البنات وكعدنه سفره وحده اله عون مجان موجود بعد ما كملنه غده گعدو يباوعون ع الاخبار جبت الهم جاي انطيت بس عمي وعبدالله لان بس همه يشربون جاي وره الاكل كعدت يم عبـــدالله وهو يسولف وي ابوه
عبدالله:: شنو بويه عون يروح ويانه
_والله يا بويه ما ادري يروح لو لا انه لو حاجيته عباله عدوه مو ابو
_خلي اني احجي ويا لو رجع
_بابا شكد نبقه هناك عدنه امتحانات خو ما نتأخر
_لا بابا سبوع هاي اذا مو اقل عبدالله يرجعكم وانه اريد اطوع وي الحشود الي طلعت تلبي نداء المرجعية
_شنو بويه جا ليش ما گتلنه
_ردت من تخلص العزيمه الي يم عمامك ابلغلكم ماردت اضوجكم
_اها خوش الله يسهل بس بويه انه ما ارجعهم خلي عون يروح ويانه حتى يرجعون وياه انه عندي شغله اريد امشي بيها
_جا خوش اذا هيج حاجي اخوك وقنعه يروح ويانه
سمـانــة:: من ينجاب طاري العراق ينغزني گلبي واخاف لان اعرف بابا مراح يرجع ويانه ومابقه 4 ايام ونروح بدينه نجهز كلشي وكالت ماما نسوي حفله بسيطه لعماتج وبنات عمامج المغرب من رجع عون گله عبـــدالله بالبدايه ماقبل وگله شسوي رايح بقه عبدالله يحجي وياه ويالله قنعة بعد العشه كالت ماما امشن نزور السيدة معصومة خاف ننشغل بهاي الكم يوم وماتلحكن تزورنها واذا محتاجات اشياء من السوك نمر رحنه انس وريحانه وخابرنه على زهراء اجت ويانه وعذراء كالت لعبدالله يدزها لاهلها وباجر تزور لان كايله لامها راح اجيكم وهم تخبرهم بروحتها وصلنه عبـــدالله للحرم وأخذ عذراء لاهلها
دخلت وعيوني متلت دموع عفت امي وريحانه وزهراء ورحت زرت وبزاويه كعدت ابجي بحركه واني اتخيل بابا يروح ومايرجع ويانه قريت الزيارة وصليت اجت ريحانه يمي
_تعالي سمان ماما تصيلج اذا كملتي
_جايه بس هاي الصفحة
كملت الزيارة ورحت بست الشباك واني ادعي لبابا وادعي الله يريح گلبي ويشيل الخوف منه رحت كعدت يم امي كملت صلاتها
_شنو باجيه شبيج ماما
_مابيه شي حبيبتي
_ماما خلي نطلع لسوك محتاجه شكم شغله لايخابرني محمود ويكلي يلا رجعي تاخرتي
طلعنه خذنه شكم شغله ورجعنه للبيت حضرت كتبي لباجر دوامي صارت ساعه ب11 خليت راسي ؏ المخدة واني اردد اية الكرسي وسورة الشرح الى ان نمت فزيت ساعه ب2 عطشانه ونسيت اصعد مي يمي نزلت ورحت للمطبخ شربت مي واسمع صوت عون يخابر بره جان صوته ناصي بس مفهوم شجاي يحجي
اسمعه يكله لشخص المتصل عليه شوف اني الجمعة انه رايح وي اهلي للعراق كتلك مو هسه من ارجع سكت ورجع حجه وين اخليهن صدك تحجي هاي حدود مو لعبه بلا نلزمن ابوي شراح يصير بي
سكت فترا ورجع حجه بس بعصبيه كتلك لا يعني لا قسم بالله ما اسويها اورط اهلي انه ما اخذهن وياي لان رايح وياهم سكت يسمع الحجي الـي يخابره ورد گله
كتلك مالك علاقه يوصلن للعراق يوصلن بس مو وي اهلي فهمت سد الخط ومبين عصبي رجع موبايله يدك وهالمره غير نبره صوته وصارت هادئه سلم على المتصل ويحجي بهدوء
والله العظيم ما اكدر انه كتله اوصلهن والله بس مو هسه وياي اهلي وابوي سيد معمم بالله نلزموا بالحدود اسف والله سكت شوويه ورجع حجه بعصبيه لاتهدد فهمت لو ﻼ سد الخط منه واني احس عقلي نضرب شنو الي يريدون يوصله عون وهو خايفه ننلزم بالحدود بقت الأفكار السودة تجيني زين هسه اني شسوي مو مال احجي واخلي ابوي وعون يتعاركون رجعت لغرفتي والتفكير اكليني رفعت راسي واني ادعي يارب ياحي ياقيوم يالله ابعد عون عن ناس السوء لا تلوع گلب ابوي بي طلعت كتبي وكعدت اراجع حتى النوم طار من عيني اذن الفجر گمت توضيت ورجعت فرشت سجادتي وگعدت ريحانه لصلاة صليت الفجر وقريت قران بعدها قريت زيارة عاشوراء بعد ماكملت رفعت ايدي ادعي ريحانه اجت تصلي يمي خلصت صلاة رحت لفراشي واني افكر بحجي عون وما اعرف شسوي
صبح كعدت للمدرسة يارب تخلص هاي السنه ع خير واخلص من السادس لگيت عذراء تسوي ريوگ وعبدالله يمها وامي همات كاعدة بس بابا مجان موجود صبحت عليهم وكعدت اتريك اني وريحانه اجه ابو الخط علينه بعد ماخلص الدوام ورجعنه للبيت دخلت اسمع صوت عبـــدالله يحجي بعصبية
_عون وحق الله ورسوله هذا صاحبك لو ماعفته موتك عله ايدي
_شنو هيه بكيفك صاحبي والله يالله انه هسه هم اكلك عوف صحبانك
_ولك عون ابوي لو يعرف بيك ينجلط تعرف هذا منو الي تمشي ووياا عون تريد تموت ابوك ولك حتى سمعتنه بين الناس بسبب راح تدمر
_يمه هدي الله عليك عون يمه لخاطر الله كفينه شر المشاكل ابوك ماله حيل بعد وراح يروح للحرب لاتخلي الرايح والجاي يحجي علينه يمه
_دكافي رحمه لدينك هسه سويتها عضمه اني بكيفي ﭑمشي وي اي شخص يعجبني مالكم علاقة بيه فهمتوا
ركع باب الصاله وطلع وعبدالله لحكه وبابا هسه موعد جيته من الحوزة وامي خايفه يسمع وهو عنده ضغط خفت من كلام عبدالله وهو يكله انته تعرف تمشي وي منو وذكرت حجي لبارحه مال عون اذا هسه اكول لعبدالله تكبر بينهم بقيت محتاره وما اعرف شتصرف
سـلــوان:: وادم هوايه مطوعة شباب زغار تهوس باسم المرجعية صعدونه بسيارات حمل كبار شفت الجبيو والزغير الفقير والغني كلها رايحه انه ولد عمامي وابوي محتزمين واسحلانه بيدنه وصلنه لبغداد وهناك وزعونه وقسومنه اقسام ابوي گلهم انه اريدن ولد اخوتي وابني سوه وصدك الامر مالتنه خوش زلمه وقبل
داعش جان كلش متقدم وصلنه للمقر الي دزونه اعليه وبده الامر يسئلنه اذا نعرف للسلاح گناله كلنه نعرف احنه ولد عشاير وگلنه لازمين السلاح بليل صار هجوم من قبل التنظيم قريب اعله المقر مالتنه وشتدت العركة ستشهدوا ثنين شباب من مجموعتنه و3 صوبوا بس كدرنه نسيطر اعله الوضع وشود الجريديه
يومين مرن والوضع كلش صعب المكان الي احنه بي جان كلش خطر ومليان دواعش بس الامر مالتنه جان انسان ذكي وكل خططه تمشي بالمسار الصح
خابرتني امي الضهر تبجي طمنتها ماكو شي والوضع كلش زين بس حتى اطمنها الوضع يمنه دمار اصلن وهواي شهداء جاي يرحون منه ابوي يحاول يخلينه وره وهو يتقدم عنه
سعيد:: شني عمي بس انته تريد شهادة جان احنه المن جايين
مناف:: والله ياعمي كلام سعيد صحيح شني جا احنه المن جايين
سـلــوان:: اكلكم صح احنه رايدين الشهادة بس همنه الوحيد هسه نحارب ذولي الكفرة حتى مايوصلون لمراقدنه والي يجي نصيبه من الشهادة هنياله
_اي والله يابويه وياعمي اخافن اعليكم ابهاتكم وصتني اعليكم وما اذب ولد اخوي لحلگ الموت
شتد الوضع يمنه وداعش تقدم اعلينه وهالمره هجومه قوووي تحاصرو نص من جماعتنه بواحد من البيوت ضليت الوب اريد اروحلهم ابوي مايخليني بيومها خسرنه هواي من جماعتنه وكلش تاذينه نسحبنه بعد ما خلصنه الباقين من الحصار الامر مالتنه جان بوقتها كلش عصبي لان تاخرو اعلينه يالله اجو يساعدونه وعد اليوم واحنه بين الرمي والعطش وجماعتنه ستشهدوا منهم سبعة بليل نلزم واجب كل 3 ساعات اعله واحد خاف يصير هجوم فجئه وجماعتنه نايمين
ب3 الفجر صعدت فوگ اعله الساتر وسلاحي بيدي اباوع خاف اكو حركه غريبه وياي واحد من جماعتنه هم لازم واجب كعدت طلعت المحفظه فتحتها طلعت صورة زغيرة جانت بنيه طفله وعيني اعليها اذكر اول مرة طحت بحبها جنت مراهق وهيه توها داخله بتدائيه اجت لابسه دهداشة حمره والعيون كبار والغمازات جنت گاعد بره يم سدرة النبگ اجت تمشي وتلعب بگصيبتها بيومها تعاركت وياي چي ماخليتها طب
_شني كاض سيطرة خليني اطب اريدن عمه نعيمه
_شني تردين منها ماطبين بيتنه
_انته شلك غرض
_موش عيون تگول غزاله
_خاب اسكت شني تشبهني بالحيوان اله اگل لبوي اعليك
_عمي سكتي لاتگلين لبوج ولا اگل لبوي وطبي غاد عمتج نعيمه وحاجيتها
جانت طفله بس خذت گلبي وعقلي وياها ومن يومها حرمت اعله عيوني كل بنيه كبرت وكبر حبها بگلبي وكلما اشوفنها كلما تكبر تحلى يزيد حبي الها وساعة السمعت هاويه غيري تخبلت حب سنين هذا موش يوم ويوم صح هو من طرف واحد بس ياريت لو اگدر انسه اجيت هنانه حتى انساها تالي ساعة الضليت وحدي اجت تتمشه اعله بالي بدلتها الحمرة وگصيبتها صفنت صفنه وبالي يمها مواقفي وياها موش هواي گعدت اذكرهن وحده وحده وبس ذني حافظهن منها واعيدن بيهن مسويهن ذكره حلوة بخيالي
طره اعله بالي بيوم العيد اجت لينه هيه وامها يشوفن جدي وجانت كاعده وي ســارة بالمطبخ طبيت جانت تضحك وبس شافتني گلبت خلقتها وسكتت وردت الطف الجوو گتلها شني سامع العيد واحد باليوم بس عيدين بيوم واحد ما سامع اشوو هاي هزت ايدها وطبت يم امها
_خالي ابو شباب اعله هاي صفنتك داعش صار فوگ روسنه وانت صافن شنو عمي رايد تموتنه انته
_ها وياي تحجي
_لا والله وي داعشي شفته وراك وجاي احجي ويا
_ههههه خاب شني تضحك اعليه ولك
_عمي شضحك اعليك صار ساعه احجي وياك وانته صافن وتوزع ابتسامات جنك عاشگ يالاخو
_العزيز الموش الي صعب علي طراوه
_يااابه انته مو بس عاشگ سالفتك مستويه
_وياريتها مسويته يخوي خلها سكته نشرد لساتر حتى ننسه تالي بصفنه وحده ننسنه حتى الساتر
أســـر:: بعد ما اعلن السيد فتوى الجهاد راد رافد يروح بس ابوي ماخلاه وگله انه اروح انته فروخك ازغار وبيومها سمعنه عمي عدنان وسلوان وسعيد ومناف رايحين وناس من العشيرة هم خابرني صاحبي عمار وگلي راح وي الحشود الي لبت المرجعية بوكتها گلي
_شنو أســـر ماتطوع الودام كلها راحت
_وشني ما رايد روحي واروح خاب اروح واموتن شحصل
_صدك تحجي تحصل الشهادة تره ماتتحصل أســـر داعش لو طب كاعنه وسبه نسوانه يافشلتنه خلي نطم ارواحتنا
_صاير خوش تحجي ولك ماعرفتك وهو أنه بدنيه مامحصل شي تريد احصل بالاخرة وهاي ولدنه نصهم راحوا همه يسدون مچاني
_والله ما ادري شكلك اكلك صدك ماناوي تتصالحون انته موسى
_خاب شوف هذا لو يموت غير اصالحه فد قندره واصالحه
_مهما يكون هذا صاحبنه وصار سنين سوه
_سوايته غمه مثل جهرته ما اصالحة وشني انته ليمته رحت وليمته ترد
_صار يومين من رحت والجيه بعد يم الله
_انه ابوي يريد يروح بس امي ماتخلي مجلبه بي
_ولك ماضلت زلم بالبيوت أســـر حتى الزغار طلعت بسلاحها تتراكض وانته كاعد هنانه خاب شمالك
_اكلك هسه العراق عاتب اعليه انتم بيكم الخير والبركة
_انته الحجي ويـَاك ضايع خلي اروح اجانه نداء بَـعـديـن احجي ويـَاك
سد مني وانه اهز بيدي شكد بطران هذا اروح للموت بيدي خاب شمالني رديت للبيت وامي تحجي وتبجي ابوي يريد يروح وهيه ماتخلي
_هسه انته زلمه مريض وين تكدر تعارك
_شني يكريمه ولون جنت مريض اليشيل سلاحه ويحامي اعله كاعه وعرضه حتى لونه مريض لاجلهم يهون مرضه
_بويه هسه عمي عدنان ولد عمامي راحوا والودام كلها راحت مريود من عدنه شني يابويه
_انجب وسد حلگك اليحجي عوج لونك عدك غيره ماتحجي هيجي حجي گاعك هاي وارضك لون باجر يطبون بيتك ويسبون نسوانك هم تحجي هيجي الاغم حسافه الربه بيك ماعرفت اربي
_اهووو عاد بده رحمته الله عمي روح عارك ياهو كاضك شني تريدلك حجه تحجي اعليه بيها
_ولك أســـر اليسمع حجيك هذا يكول اعليك اغم وماعده غيره اعله گاعه وعرضه
_ياطلابه الگاع ادري هسه اله اروح حتى اصير خوش زلمه
_ولك محد عاتب اعليك وكلك روح عارك هسه لو طلابه بالعشيرة جان كضيت سلاحك ونفشت ريشاتك اعلينه امده هالبزريه كوم من يمي وهذا حجيك لاتحجي يم ناس غربه فشله اعله شاربك
تحاجينه انه وابوي وطلعت من البيت بالله هسه انه وين اولي عمار ماهو وموسى ما احجي ويا كلت اخابر عــبـاس خابرته وحجيت ويا وهم جاب طاري داعش وشلون جدي وابو ماخلوه يروح ستغفر وهنيت الاتصال وياا يعني هسه اله اروح يلا اصير زلمه والودام تمدح بيه رديت للبيت ساعه ب12 بليل اهلي نومه
بس رافد كاعد بصاله وصاير اعصاب طبيت كعدت يمه سئلته شبيك اشو خزرني اهوو الضاهر وصلته السالفه
_شني عدك رزايل غرد تره متعود
_ولك ماتستحي اشلون تحجي وي ابوي هيجي وهو يريد يروح
_تره ماكتله شي كتله الودام كلها رايحه انته زلمه مريض اكعد موش اله تروح وهو گب يحجي اعليه وانته ماعندك غيره ادري هيه كوه الي مايروح موش زلمه
_حتى لو أســـر مايصير تحجي هيجي
_عمي خوش فتهمته والله اروحن انامن احسلي
سمـانــة:: اجه يوم الجمعة وجهزنه كلشي وبابا حجز النه بقطار طلعنه ساعه ب2 ضهر موعدنه ب3 وصلنه للمحطه جنه حاجزين غرفتين كل غرفه بيها اربع سراير ابوي والولد وحدهم واحنه وحدنه بغرفه تحرك القطار ساعه ب4 لبست سماعات خليت راسي ؏ شباك القطار شغلت قصيدتي الاحبهاا كلش احب القصائد القديمه والتراثيه وخصوصاً مله حمزه الزغير وباسم الكربلائي مدمنه على قصائدهم ندمجت واني ادندن وي القصيدة
زينب لفت يم حسين…
لاچن گابعة بالهم…
تگله يا ضوء عيوني …
عليمن هالفزع ملتم …
تعنت ليه للخيمه وتفسر الصخر ونتها،،،
طبت گعدت گباله وع الخد تهل دمعتها،،،
تگله عليك ضلع امك المضلومه ومصيبتها،،،
سولفلي يماي العين ،،،
لاتخفي عليه حسين ،،،
لاتخفي عليه حسين،،،
عليمن هالفزع صوبين،،
واشوف بكثر عج الخيل وداي كربله غيم،،،
مر وقت طويل واني اسمع نعست باوعت امي نايمه وريحانه مخليه سماعات ومندمجه بموبايل امي وعذراء نايمه غيرت القصيدة وتمدد واني افكر عون شنو راد ياخذ ويانه وخاف ﻼ ينلزم بالحدود غفيت وماكعدت اله على صوت امي وهيه تگعدني القطار واگف بالاستراحة وقت صلاة المغرب وتريدنه ننزل نصلي ونغسل
طفيت الموبايل ونزلنه كلنه توضينه وغسلنه ورحنه لمكان المصلى صلينه وامي كالت نستعجل خاف القطار يمشي مـَـا لحگت حتى اقرا الزيارة گلت اقراها بالقطار صعدنه طلعت مفاتيح الجنان الزغير من جنطتي كعدت قرا الزيارة وامي طلعت سفيرات العشه المسويته النه حضرت عشه بابا والولد وخذته الهم ورجعت حضرت النه العشه كملت الزيارة وكعدنه ناكل
_ماما عفيه مانگعد بيت عمو كاظم خلي نروح لبيت عمو علي محد عدهم ونرتاح هناك بيت عمو كاظم هوسه وماناخذ راحتنه
_بس ماما العزيمه بيت عمج جعك وهو الجبير وابوج لازم ينزل عنده
_اوك اذا هيج نخلص العزيمه ونروح لبيت عمو علي وخلي بابا والولد بيت عمو كاظم
_الله كريم هسه خلي نوصل بسلامه
يوم ثاني الصبح وصلنه منطقه بيت عمو كلش حـَلوه وبيوتهم واحد بصف الثاني وحتى بابا باني بيت بصفهم بس بعده ممخلص گال خاف ننوي نرجع للعراق بيتنه موجود دخلنه لبيت عمو كاظم تلگتنه مرت عمو كاظم وبناتها تبوس بينه دخلتنه لغرفه بيبي الله يرحمها كعدنه بيها وگالت أخذن راحتجن هاي الغرفه الكم محد يكعد بيها
دخل عمو كاظم وكفت ماما تسلم عليه واحنه باوسنا باوع على عذراء وسلم عليها وبارك الها وانطاها فلوس بس ماقبلت تاخذ گلها ازعل عليج لو ماخذتي طلع عمو واجن بنات عمو نسرين ومرام گعدن يمه يسولف
نسرين:: عمه جا ليش زهراء ما اجت وياكم مشتاقيلها حتى بعرسها مـَـا شفناها
_عمه زوجها ماقبل وماردنه تصير مشاكل بينهم وهيه مصار الها فترا من مزوجة
_اي صح عمه
دخلت منار مرت عمو علي تسلم وترحب بينه باوستها امي واحنه باوسنها سلمت على عذراء
_شنو عروسة السادة شلونها
_بخير خيه جنها العافيه
_والله خوش يختار سيد عبدالله
_طالع على ابو من اختار العلويه
_بيج الخير والبركة ام محمد شنو الولد ماشفتهم
_يستحون من مرت عبدالله
_لا يختي مثل اختهم هاي صيحلهم اسلم عليهم لبسن عبيجن ماما
راحت مرت عمو كاظم صاحت لولد عمي كاظم محمد وجعفر وصادق سلمو على امي وسلمو علينه اني جنت مدنگه حتى مارفعت راسي وشفتهم سلمو وطلعو
نفتح موضوع الحفلة وگالت امي نسوي حفله زغيره نعزم بيها بس المقربين كلش وره عزيمه الزلم بيوم جابولنه ريوك تركينه هالحجي ب9 صبح
_عمه منار عمو علي يريدج
_يالله خيه ارتاحن بعدين نشوفجن
طلعت مرت عمو والبنات همات گامن وي امهن بالمطبخ حجت عذراء
_عمه منار عدها جهال
_تكسر ڪَلبي مرت عمكم علي 11سنه ماعدهم جهال
_جا شنو عمه الصوج عدها
_لا بنيتي الصوج بحماي بس هيه تحبه تزوجو عن حب وماصار عدهم وهيه رادو اهلها يطلگونها بس ماقبلت
_زين ماما شعجب ما ما عمي كاظم ابوي انطو طفل
_والله ماما ماقبل يكول اذا الله قاسم الي طفل يرزقني واني منتظر رحمته وماقبل ننطي طفل والله گتلهم اني اسويلكم طفل بس ماقبلوا
_خطيه واللّٰه يرزقهم ويفرح گلبهم ضوجتيني عليهم
_الله كريم بنتي كلشي امر ربج واله بيها حكمه
غيرنه ملابسنه ورحنه نتوضى اذن الضهر بعد ماصلينه صبو غده الزلم بالديوانيه واحنه بغرفه بيبي الله يرحمها تغدينه وكملنه وگعدنه الضهر نسولف
ام محمد:: شنو نطبخ للعزيمه ام عبدالله
_والله سيد گال اجيب ذبايح ثنيهم وخيه لاتعبين روحج انه اطبخهم
_يا خيه صدك جذب نطبخهن سوه
_باجر العزيمه ماما مو
_اي ماما
للعصر راحت امي ومرت عمو كاظم لسوگ بقينه بس البنات نطلقنه بسوالف وياهن جابو الذبايح ثنين ذبوحهم بطارمه بعد ماكملوا وخلو اللحم بگدورة كبار نسرين غسلت الطارمه من الدم ومرام وكفت تسوي العشه دخلن امي وعمه ام محمد
_يمه مرام سوي عشه بس لخوتج احنه معزومين عشه بيت عمج علي
_جا خطيه ماحجيتو نروح نساعدها وحدها هسه
_گومن بناتي لبسن عبيجن ونروح الهم
رحنه البنات نساعد عمه منار وخطيه لگيناها مخبوصه خبص بس طابخة ومخلصه ساعدناها بالخفايف اذن اذان المغرب رحنه نصلي
خلصنه صلاة وبدينه نصب العشه وي مرت عمو علي خلينه سفره جبيرة بنص الصاله لنسوان والزلم بالديوانيه وحلات لمت الاهل راحت مرت عمو كاظم تجيب مرام تتعشه ويانه
وره العشه گعدنه نخطط للحفله وره العزيمه ب9 جابت النه كيك مسويه وحلويات صارت ب11 وگالت عمه للبنات يلا گومن ورانه گعده من صبح للعزيمه سلمنه على مرت عمو وگنالها تخلص العزيمه ونجي يمكم حتى ناخذ راحتنه ونجهز للحفله براحه
ســارة:: من راحو ابوي وسلوان لداعش واحنه گلوبته متوجرة اعليهم البيت فرغ يحيى رد من الحمله واحتار بالگاع والحلال جان ماله شغل لان كله اعله سـلــوان الضهر البيت فارغ جدة وجدي ينامون الضهريه وامي هم نامت ضليت الوب وحدي يحيى وده الجبن والحليب وبس حميد بعده بالمدرسه يحل العصر لبست عباتي ورحت لجاخور الحلال هنا حدنه نوصل لو وصلت وحده بينه لصوب البساتين الورنه بيوتنه تنكلب الدنيا اعله راسها رحت اطيت الحلال ماي توزرت بالعباية وكمت اسبح الهايشه وامسح اعله راسها مدري اشلون خذتني رجليه ورحت صوب البساتين ضليت ﭑمشي وريحه الخضار والزرع مله ريتي جنت كلش متونسه
ومتاكد محد هنانه خذت راحتي اتمشه كعدت يم نخله واكعات منها رطبات غسلتهن بالماي الي يم البستان وكعدت اكل حسيت بحركة يم سدرة النبك هيه بعيد اعليه بساتينه جبيرة حيل وفارينها چينكو بس موش عالي ناصي عبالي بزونه مشيت شوي يم السدرة واني اتلفت يمين ويسار شوو خفت ونغزني گلبي گلت اردن للبيت لايگعدون وما يلگوني درت وجهي اريد اردن حسيت بروحي نجريت بقووووة من ايدي شهگت ردت اصرخ ونخلت ايد اعله حلگي……
للكاتبة فاطمة…
السادس من هنا
