بين نيران الثأر نوراً بعيد
بارت4
سمـانــة:: سمعت بابا يگول لماما السيد احتمال راح ينطي جهاد كفائي خلال هذا السبوع اكو هيج خبر الموصل سقطت بيد داعش وناوين يدخلون بغداد انه اذا السيد اعلن اول واحد اطوع واروح
العلوية:: احنه مانگدر على فراگ سيد شيصير بحالنه لو رحت ومارجعت
_گولي يالله علويه اعرفج مره صبورة ومؤمنه وهنياله اليروح يدافع لاجل ارضه ويروح شهيد
سمـانــة:: ماتحملت دفعت الباب ركضت حضنت ابوي وابجي بحرگه بابا عفيه لا تعوفنه اني مـَـا اگدر اعيش بدونك والله
_گولي يالله بابا الخبر هذا مو هسه اذا السيد اعلن جهاد نروح خلن الموضوع بينه هسه ما اريد عبدالله يضوج ما باقي شي لعرسه وتخرب فرحته والله كريم منا لذاك اليوم
انطيت الموبايل لامي ورحت اكمل العشه بس بالي كله مشغول لو راح ابوي شيصير بينه اسوي بالعشه ودموعي تصب اجت امي وشافتني بقت تحجي وياي وتهديني ولخاطر عبدالله اسكت جهزنه العشه وگعدنه كلنه بس عبدالله خابر لامي كلها ما اجي للعشه ماخذ عذراء يعشيها بره تعشينه وعون هالمره ساكت ماحجه اي شي ؏ السفره اكل وگام خلصنه عشه ورحت لغرفتي ريحانه بقت تغسل المواعين طبيت لغرفتي والخنگه ماراحت مني حاسه بشعور غريب وياذي رحت توضيت ورجعت لغرفتي فرشت سجادتي وصليت ركعتين هديتها لمولاي صاحب الزمان عجل الله فرجه بعدها كعدت اقرا زيارة عاشوراء وراها بلشت بسورة الكهف الي كلما اضيق بيه الدنيا اقراها كمت اقراها بصوت هادئ وحزين ودموعي تصب طبت ريحانه تباوعلي مستغربه اول مره اقرا بطور الحزين انتظرتني اخلص قراءه وسئلتني
_سمانه شبيج اول مره تقرين هيج ودموعج تصب صاير شـَيء
_لا حبيبتي ماكو شي راجعي دروسج راح اناملي ساعه واكعد ادرس
عذراء:: عزمني سيد عبدالله ؏ العشه لبست عباتي وخليت اشعة بالحجاب ورتب كلش حلو عليه هيج
ورة الصلاة اجه عليه دخل سلم على ماما وبابا واخواني وطلعنه خذانه على مطعم كلش حلو وراقي دخلنه لمكان مال عوائل
سيد عبدالله:: شنو مشتهيه للعشه
_بكيفك سيد شنو تريد اطلبلي وياك
_لا هالمره انه اكل من الي تحبي اريد اعرف ذوقج بالاكل
_تمام اني احب الجوجة كباب
_وانه احبج انتي صار تدللين
حجاها وصاح ؏ الگرسون علمود الاكل اجه اخذ طلبنه وراح بقيت مستحية منه وما اعرف شحجي
_راح تبقين ساكته انه كلت نطلع حتى ينكسر حاجز الخجل ما اريد تخجلين مني عذراء
_لا مـا اخجل بس انه طبعي هيج استحي بساع
_خوش اذا هيج انه احبج هواي رويحة السيد
_جا هو هيج سيد
_گوليها مره عمي شنو مانستاهل كلمة حـَلوه منج
_هممم
_راح تخلصها همم وهممم يابه كلشي ما اريد بطلت
_سيد
_ياروح السيد
_مو چنه الاكل تأخر
_عبالي راح تكولين احبك
_هههههه واللّٰه استحي
_ميخالف راح اغمض وگوليها
_تفضلوا الاكل وصل وصحة وعافية
_لا هاهيه حصلنه حجايه حلوة بس من الگرسون
_هههههه تحصل ان شاءالله بالجايات
تعشينه والگعدة ويا ابد ماتنمل خلصنه عشه ودفع الحساب وطلعنه من المطعم لزم ايدي حسيت بدفو ايده وايد شكد جانت باردة بلمسه منه احس حتى صخنت مشه وانه وياا
_وين تحبين ترحين
_ما اعرف بكيفك مـَـا بالي مكان
_حاب اخذج الجمكران يم امام زمانه المكان الوحيد الي ارتاح بي وانسه كل همومي
_تمام نروح صعدنه بسيارة وخذاني الجمكران وشوفه هالمكان امان بحد ذاته زرنه وصلينه وگعدنه مقابل القبه لزمة ايده وهدوء المكان خلت روحي ترتاح والفرحة الي بداخلي اول مره احس بيها حجت بصوت ناصي وعيوني ؏ القبه سيد
_ياروح السيد
_احبك
_وانه اموت عليج وحق صاحب الزمان ادعي ربي يخلينه لبعض
قوت لزمته ايده باوعلي مبتسم الهدوء الي بوجهه والبراءة البي تخلي فراشات ڪَلبيي ترفرف بتسمت بوجهه بقينه ساعه نسولف يكول اتمنى يصير عندي ولد اسمي علي رضا كتله اذا بنيه گال نرجس على اسم مولاتي ام الامام الحجة عجل الله فرجة بتسمت وگتله ان شاءالله طلعنه من المسجد وشترالي وردة ودخل للسوبر ماركت ترس علاگتين حلويات وحده انطاني ياها والثانيه گال لسمانة وريحانة حبيت علاقته بخواته كلما نطلع يذكرهم ويشتريلهم رجعنه الساعه ب11 دخلت للبيت سلمت ؏ ماما وصعدت لغرفتي والفرحة مشايلتني دزيتله رساله اذا وصلت طمني عليك
حمدت الله وشكرته ؏ هاي النعمة ودعيت الله يديم علينه لان سيد عبدالله من خلال الفترا القصيرة الـي تعرفت بيها عليه وره الخطوبه شفته انسانه نادر حنون وعاطفي خلوق ودين مسالم مايحب المشاكل يحب الخير للكل مايحجي ع احد يحترم المراة ويقدسها حبه لامه وخواته خلاني احبه اكثر
سارة:: رجعت من بيت عمي بعد ما اجه اعليه سلوان وعيونه تسئلني خفت اگله ويضوج بس عرفني ضايجة ماحجة شي علما وصلنه للبيت امي تخبز بس شافتني گالت سوي العشه طبيت للبيت وهو طب گدامي طب الغرفته وصاحلي شلون اگله واعرفن راح ينكسر گلب اخوي طبيت لغرفته وسديت الباب گاعد اعله جربايته ويدخن سئلني
_شنو خويه شبيج احجي حاجيتها شگالتلج سولفيلي من البدايه من اول ماشفتيتها
_سلوان خويه ليش اتعبك اكثر الابنيه ماتصيرلك
_ليش ماتصيرلي احجي شگالتلج
_خويه الابنيه بگلبها واحد وموش انته سلوان عفيه لا تقهر روحك
_ماگلتلج منو هو العاشگته
_لاخويه ماگالت بس گالت يجي يوم وتعرفينه وسلوان مثل اخوي
_خوش طلعي وسدي بالباب وراج
_عفيه سلوان لاضوج
_ساااااارة سدي الباب گتلج وطلعي مـَـا اضوج بس طلعي
طلعت منه وانه خايفه اعله اخوي ضليت واكفه باب غرفته عبرت جدة باوعتلي وگالت شعدج واكفه هنانه گتلها ماكو شي جدة بس متانيه سلوان يبدل واطبله راحت جدة وانه خايفه من هدوئه جنت شاكة يحبها من زمان بس استحي اسئلنه جانت من تجينه البتسامه ماتفارك وجها ايست منه ورديت للمطبخ اسوي عشه طبت امي بيدها الطبگ مال الخبز سويت عشه وكملته اذن المؤذن رحت اصلي وره الصلاة جمعنه كلنه اعله العشه بس سلوان ماطلع من غرفته ابد دگيت اعليه الباب ماكو فتحت الباب شفته نايم تحسرت وطلعت گعدنه ناكل بسكته جدي مايحب السوالف اعله الاكل الكل ياكل وهو ساكت عزلت عشه سلوان لو گعد احطله كملنه العشه ورجت غسلت الماعين صبيت الجاي وخذته الهم امي تسولف وي ابوي تريد تزوج الولد گلها شوفيلج نسوان وانه ازوجهم تحسرت وانه اذكر حجايه سلوان گال بس ادري بيها ماهاويه احد اخطبها
تالي اخوي نكسر كسرة
سلوان:: احبها موش بيدي حب الطفوله هاي تالي تحب غيري ضليت الوب واكل بروحي ساعه الشيطان يوسوسلي انهي اعليها ساعه استغفر واگولن انه موش هيج الله يسعدها بس ما ﭑگدر اخذ مره غيرها واضلمها وياي تمنيتها اليه ويا نار گلبي انه العودت گلبي اعله حبها اشلون راح انسه اشلون اتعود ما افكر بيها وانه يوميه اتخيلها يمي بالغرفه نمت وانه افكر بيها فزيت ساعه ب2 بليل ميت جوع طلعت اهلي كلهم نايمين طلعت بره البيت فتريت يم جاخور الحلال اعاينله ورديت اتمشه وادخن خابرت اعله أســـر شفته متصل اعله الواتساب ضليت اسولف ويا ضلينه نسولف ما اخذت عيني النوم اذن الفجر طبيت للبيت امي توها گاعدة دولج بالعجين وجدة تتوضى يمها
_شني يمه توك گعدت
_لايمه كاعد من زمان بس طلعت اشوف الحلال
_يمه الهويشه ماشفتها وياك ما جابت
_لاجدة ماجابت بس هاي ايامها شني سويتن الجبن ابو علاء وصاني اعله جبن وگيمر
_اي يمه كله جهزناه من البارحه ضلن صينتين هسه وره الصلاة اسويلهن الك وديهن اله
_خوش يمه لو كملتي خبز اريدن خبيزه حارة رايح اصلي انه
رحت اصلي وعدت نفسي انساها خلص وما افكر بيها مامقسومة الي وتحب غيري شني گوة اجلب بيها توضيت وصليت ورحت امي مسويلتي ريوك جدي گعد لصلاة صله بالهول واجه يتريك ويانه كملنه ريوك وامي تسوي الجبن الگصايب خلصتهن وغلفتهن الي وخذتهن لمحل ابو علاء ومناك طلعت لصفا وي الولد ب12 ونص رديت للبيت تلگتني سارة بالمطبخ
_گواك الله خويه
_گوه حيلج عزيزتي
_اشلونك زين بالي ضل يمك البارحه حتى عشاك لعزلته الك ماماكله
_مابيه شي لا يضل بالج ونمت من التعب ما گعدت اله وكت الصلاة وطلعت اعله شغلي صبلي غده علما اصلي
صبيت الغده وخذته اله كاعد يم جدة بالهول وهيه منطلقه تسولف ويا وتفرج برجلين جدي
_شني يجدة مالكم نيه تعرسون كبرتو نريد نشوف فروخكم گبل لا الله ياخذ امانته
_عمرج طويل جدة انه ما اعرس هسه زوجو الولد گبلي اذا يردون
_مايصير انته الجبير ولازم انته تعرس اول
_لا جدي بعدني موش هسه اعرس عرس للولد گبلي ولو ردت مره انه اگلكم
_شوف فليح جيل هالوكت موش نفس جيلنه جنه لو صار الولد صبي وصار عمره 15 صاح اريد اعرس وهذا حفيدك جبير اخوته وراح يصير عمره بثلاثين ومامعرس وماريد يعرس هسه
_خافنك عاشگ سلوان وناطرها
_لاجدي شعاشگ هوا فارغ للعشگ انه بس بعد ما اريدن هسه
كاعدة باب المطبخ واباوعله يسولف وهو مدنگ اعله الاكل حتى لا يشوفونه وهو عيونه فاضحته كمل اكله وگام باوعلي ولگاني صافنه اعليه ابتسم واجه صوبي حط ايده اعله جتفي
_گومي عزيزتي اعرفن شني بالج لاتفكرين تكضي وتهون راح اناملي ساعه وگعديني اروحن للگاع
هزيت راسي وعافني ومشه واضح كلشي اعليه مدري لان انه اعرفن سالفته حاسه بنكسارة والله يامودة لو تموتين ماتلگين واحد يحبج بگد اخوي شحجي شكول جدة خذت جدي لغرفته ينام ضليت وحدي امي راحت لبيت عمي مزهر مارضت اروح وياها والبيت خنگه الضهر يحيى ماهو طالع حملة بالكوستر و4 ايام يالله يرد وحميد بالمدرسة ب2 يحل وعزام ما ينشاف من ندج عباس وهو مافارگه حتى يبات عدهم يجي بس يسبح ويبدل ويروح يم عباس
أســـر:: من ردينه للبيت وانه عيوني ماشلتها من ابوي حسره جيبه وحسره تودي ومن سئلته گلي ماكو شي بس ماصدكته لان ملامحه كلها تغيرت من حاجاه جدي ولو اعرفن شگاله جا رتاحيت سئلت امي گالت ماگلي شي ولاجاب طاري طلعت بعد ماخابرلي عمار رحت يمهم هو وموسى
_شني هالايام مختفي وينك
_والله مالي خلگ فد نوب
_تروح للمدرسة نصيد غزال
_اگله مالي خلگ يگلي غزال اكلك موسى مو گلت اشوفلك شغله يم صاحبي شني نسيت
_لا والله مانسيتك بس صاحبي من گتله يگول أنتم الثلاثه ياهو اليشغلكم تلاثه عفطيه وزايعتكم الدنيا
_هسه صاحبك يحتاجله جرت اذن موش هيجي عمار
_اي والله صحيح نروح نبسطه
_خير خير گول يالله صاحبي ترا مثل ما انتم صحباني
_وشني صاحبك متعجب عده محل وبيرغ العباس اعله گولت جدة احرگ المحل واخلي يخسر بدنيه گبل الاخرة
_هو انته تعرف اخرة صلاة ماصلي
_اعرف امك انه ما اعرف اخرة
_اسر جاوزت حدك لاتغلط اعله امي
_والله امك لو عدي حرام الها اذبها بدار العجزة
_اسر كافي
_اسر حجايه وحده منك على امي والله افلش خلقتك
_اسرررر كافي كتلك شنو انتم صحبان خ…..
_والله روحي طافره لاتخليني افلش خلقتك ابن الزفرة
تعاركنه انه وموسى وصار مضارب بينه طگيتها بحلگه كسرت اسنونه ولاجنه صاحبي ما ادري شبيه روحي مالي خلگها ضل يغلط اعليه واعله اهلي ركضت سحلته بالگاع وعمار يريد يفكنه ماكو لتمت الودام اعلينه تريد تفاككنه گوه يالله فضت هو متحلف بيه وانه متحلف بي
_والله يا أســـر ما اعديها الك
_انجب وسد حلگك
_شبيكم ماتگلولي عليمن كبرتوها صدك تحجون
_انه رايح عمار واذا بعد صحتلي وهذا الخايس وياك حتى انته ما ﭑمشي وياك
عفتهم ورديت قميصي مگطعة الدگم وشفتي صب دم واثر البوكسي بنص وجهي وانه اتحلف بي ابن الخايسه كل شوي اطب اعله المكالمات هذا النطيته رقمي ولا خابرني بعد الضاهر علسني الواحد مال يبوگ جدي نايم اعله الفلوس نيوم رديت للبيت ابوي توه راد من شغله والتعب مبين اعليه واضح ضايح وطالعة روحه بعدنه بالباب انه ويا
_ها اسر ويامن متعارك
_هيجي انه وصاحبي تضاربنه وفلت السالفه
_اسر مالي حيل طلايب لاتجيبلي بلوة
_ماكو شي يابه فضت السالفه وراحت كتلك انه وصاحبي يومين ونرد وانه حالف ازوعه دم اعله طگته هاي الجلب تونه طابين للبيت وسمعنه گبت العيطه صوت مرت رافد يلعلع وامي تسكت بيها هسه انه لو عدي هاي المره ماضلت اموتها اعله ايدي طبينه ونلگاها هيه وزينه متكامشات
كوثر:: هديني ولج ام الزلم المصاحبه الماشهرت شهيرة الله
زينه:: خايبه الخايسه المعفنه انعم الله اعله اخوي ملفيج ام الوصخ ام السحورة
مردان:: الله واكبر عمي شني مالجن رداد فضحتنه بين الودام شني ولج چدامنه وهيج تحجن زينه هديها ولي لغرفتج موتوني وانتي طبي الغرفتج لو رد رجلج يتجازة وياج
كريمة:: يطلگها ساعه ماضل وياي الخايسه فوگ مامتحملين خيستها وطلايبها ذب بلاويها اعلينه
_شني يطلگها كريمه گولي يالله طبي عمي طبي بغرفتج وسدي بابج وانتي كريمه كافيج الله ولحد الواحد يرد من شغل تعبان انه كلما اردن الگاجن متكامشات ولج مامليتن الله واكبر اعله روسجن موش نسوان مارتاحن اله تموتني
انفال:: گواك الله بويه اشربلك ميه بارده واكعد اصبلك غده
أســـر:: العركة كلها بصفحة وحجايه كوثر بصفحة تگل لاختي ام الزلم المصاحبه طبيت وراها للغرفه وقفلت الباب عيونها اعليه گتلها منو ام الزلم وليش كوثر تعايرج هيج لازمه اعليج لزمه احجي
_والله ما مصاحبه وماعدي شي بس هيه شلون امي تگلها گومي شتغلي وماترضه دعت اعله امي وانه عاركتها والله كلشي ماعدي
_زينه لو دريت بيج جذبين وبيرغ العباس اربطج وي الهايشه واخليج يمها لا اكل ولاشرب منا تموتين واشوفن ياهو اليطلعج
انفال:: طلايب زينه وكوثر وامي ماتخلص طلع أســـر من الغرفه وكلنه خايفين خاف كاتلها ركضت امي اعله زينه بس من شافتها مابيها شي ردت خابرت اعله رافد وتحجي وتدعي اعله مرته وتبجي وتگله مرتك دعت اعليه وغلطت اعله ابوك سدته منه وراحت لزينه
نجلاء وبيداء بكل عركة يطبن للغرفه ويسدن الباب خاف يلوحن طفارحطيت غده لابوي وخذته اله ورديت اعزل المطبخ طب أســـر ونتبهت اعله وجها شلون مطگوگ رحت جبت ديتول وگطن گتلها خل اعاين جرحك خزرني ورديت لمچاني طب مروان توه راد من المدرسة ذب الجنطة باب المطبخ عاين لاسر وضحك
_ها طگوگ وانت النچر
_مروان سد نعالك لا اجي افلش خلقتك وانتي صبيلي سم اروح اتسمم بغرفتي
_هذا شبي اخوج
_ما ادري بي الضاهر متعارك ومن رد لگه عركة زينه ومرت رافد وگبت عده اصبلك غده
_اي والله ميت من الجوع وب3 عدي لعبه
_ مروان لاتروح تره طيح برأسك البيت كله مشحون ويردولهم واحد يچلبون براسه عافني وراح يغسل صبيت صينيه وديتها لغرفه أســـر ورديت حطيت صينيه لمروان موش بيت تگول بجيش كلمن صينيته ب5 رد رافد من شغله وگب هو ومرته ونسمع عركتهم وصياحهم بس محد دخل نسمع مرته تگله والله مـَـا اضل وي اهلك وهو يگلها ذوليج بيت اهلج ورحيلهم تدعين اعله امي وابوي وهيه تحلف ما داعيه شلون هيج تحلف چذب هو غير انه واگفه وسمعتها من دعت ردات تروح لاهلها ورافد حلف لو طلعت من باب البيت خط طلاگج يجي وراج جرت فروخها وطب لغرفتها وقفلتها راح رافد لامي
امي وشافت رافد بصفحتها شالت شيلتها وضلت تنعي وهو يهدي بيها ويبوس راسها حتى انه تأثرت بنعاويها
سمـانــة:: بيوم 14 شعبان يوم الجمعة چنه كاعدين بعد ماخلصنه الصلاة وجاي نحضر بالغدة گام بابا شغل التلفزيون وخلاه على قناة كربلاء وگعد هو وعبدالله يسمعون خطبه يوم الجمعة وبوقتها اعلن السيد فتوى الجهاد الكفائي باوعت لبابا وعيون دمعت جهزنه الغده اني وريحانه وي امي عون نايم
_شنو عون مايتغدة
_والله ياريت تگعده اخوك هالايام وضعه ما عاجبني مخلصها بره ولو رجع يخلصها نوم زين من ياكل لگمه
راح عبدالله يشوف عون ورجع يگول مايريد خلي يشبع نوم وانه احاجي تغدينه وخلصنه واسمع امي تسولف وي عبدالله وبابا على العرس والمعازيم
_بابا عبدالله تزوج هذا السبوع السبوع اليجي نروح للعراق نسوي عزيمه لعمامك
_ان شاءالله بويه هاهيه
سمـانــة:: من حجه بابا هيج گلبي وجعني اني اعرف يريد يروح للحرب يگولون الوضع مو تمام بالعراق لذاك اعلن السيد جهاد واني خايفه على بابا بعد الغده بدينه نجهز للعرس يوم ثاني خذنه عذراء لصالون وطلعت تجنن وهيه معايزة عزمنه ناس قليله للعرس سوينه عرس بسيط لبست فستان نيلي مال محجبات وخليت مكياج خفيف ورتبنه كوشه زغيره لعذراء بعد ماجبناها من صالون بت النسوان تجي وهنه قليلات
شغلنه مواليد وگمنه نصفك بعد دخل عبدالله وگعد يم عذراء يخبلون بقيت اصور بيهم والضحكة ممفارگه وجه اخوي واضح عليه السعادة والفرحة دعيت ربي يتممها عليه وريتاح بحياته ونشوف جهاله بعدها وزعنه العشه بسفريات للناس وبدو العالم تروح ام عذراء رادت تمشي ماخلتها امي بس گلتلها الصبح آنـي يمكم الشيخ وحده ومحد يمهم راحت وعبدالله اخذ عروسته وراحو لغرفتهم وامي من اجه بابا راحت ويا للغرفه بقينه بس اني وريحانه دخلنه لغرفتنه
ريحانه:: صدك سمـانــة اذا رحنه للعراق ودوامنه
_ما اعرف واللّٰه نطلب اجازة هو كم يوم ونرجع
_وين نگعد بيت عمو علي لو عمو كاظم
_والله اني ارتاح بيت عمو علي نشوف منا نروح الله كريم نامي ورانه دوام كلش تعبنه اليوم
راحت لجربايتها تنام واني عيوني مفارگه النوم بالي بابا شلون اذا راح گمت توضيت وفرشت سجادتي وگعدت اصلي طلاة ليل وادعي الله يفرجها علينه عيوني مابطلت بجي والخنگه البصدري موتتني بقيت ابجي وادعي لحد ماتعبت غفيت واني على السجادة وبعالم الرؤياا شفت رايحين للعراق كلنا وبطريق صاعدين بسيارة عائلتي كلها ونضحك ونسولف وبابا يسوق بسيارة فجئة صارت عاصفه كلش قوويه ومن وگفت العاصفه وگفت سيارتنه وهدت العاصفه اباوع لصدر بابا ماكو عبدالله موجود بس وجها ماينشاف خفت كلش گلبي احسه راح يطلع من مكانه نزلت من السيارة ادور على بابا بس ماكو احاجي عبدالله مايحجي وياي بس ملامح وجه مامبينه امي واختي وعون موجودين بس ساكتين بقيت اصرخ واصيح باباااااا بابااااااا فزيت شفت ريحانه واگفه على راسي وتگعد بيه
_اسم الزهره ام الحسن شبيج سمان
_لا مابيه شي شفت حلم مو زين
_گومي راح ياذن توضي وصلي
گمت توضيت وگعدت اقرا قران وبالي بالحلم ستغفر ربي وعفت القران بالي ڪَـله بالحلم سمعته ياذن صليت وقريت زيارة عاشوراء وسورة الكهف صدقت ونزلت جوة شفت بابا بصاله يقراه قران گعدت يمه على القنفه وعيون عليه باوعلي ورجع يكمل قران انتظرته منا كمل ورحت حضنته واني ابجي
_شبيج بابا سماني ليش تبجين
_بابا الله عليك لاتروح شفت حلم مو زين
_ كولي يالله بنتي انتي مؤمنه وعندج ايمان برب العالمين وكلشي بحياتنه بيد الله الموت والحياة الصحة والعافيه كلها بيد ربج ليش هيج صايره تعوذي من الشيطآن ولاتخلين الشيطان يقود افكارج
_بابا اني خايفه اخسرك الله عليك لو رحنه للعراق راح تروح للحرب
_ باباتي حبيبتي الموت موجود سواء هنا لو بالحرب وهنياله الـي يروح شهيد والله سبحانه وتعالى يگول بسم الله الرحمن الرحيم
أَيْنَما تَكُونُوا يُدْرِكْكُمُ الْمَوْتُ وَلَوْ كُنْتُمْ فِي بُرُوجٍ مُشَيَّدَةٍ صدق الله العلي العظيم
ويا بنتي الموت حق وانه ما معلوم لو رحت گبل اموت كلشي بيد ربج بنيتي لاتفكرين وخليج مؤمنه وابعدي الافكار السئيه عنج ودائماً رددي اية الكرسي ولو ضاق صدرج خلي ايدج على صدرج واقري سورة الشرح انتي بنيتي الافتخر بيها مؤمنه وصابره وهذا وجهج النوراني ما اريد اشوف بي حزن خليني اشوف ضحكتج
_بتسمت لكلامه باسني براسي وبين عيوني بست راسه ورجعت لغرفتي واني افكر بكلامه الطاقه الروحانيه الي احس بيها من اگعد وي بابا عجيبه كلامه وابتسامته خلتني احمد ربي واشكره الف مره عندي هيج اب نمت مرتاحة لكلامة واني اردد اية الكرسي والم نشرح
عذراء:: السعادة الي اني بيها ماتنوصف عرس بسيط بس السعادة طاغيه على البساطة من دخلنه للغرفه مسويها تجنن ومثل ما اتمنى دخل وقفل الباب خايفه ومستحيه بس بنفس الوقت مرتاحة ومطمئنه وعيونه عليه والابتسامه مافارگت وجها
_الحمدلله الف مره صرت الي رويحة السيد
_الحمدلله
_شنو هالجمال سبحانه الخالق طالعة حوريه من الجنه
_عيونك الحلوة
_لاتستحين مني ولاتخجلين واذا مضايقه من شي گليلي
_لا مرتاحة الحمدلله
_تمام غيري بدلتج حتى نصلي
هزيت راسي هو طلع منا غيرت بدلتي ورجع متوضي وگفت على المرايه امسح المكياج وهو يباوعلي ومبتسم گعد على طرف الجرباية ويباوعلي خجلت
_اروح فدوه للخجلان طلعي توضي بره الحمام يمج بصف الغرفه مالتنه ولا تتقيدين محد يصعد هنا بس انه والبنات غرفنه فوگ راح انتظرج نصلي سوه
خليت شال على راسي وطلعت غسلت وجهي وتوضيت ورجعت لكيته فارش سجادتين ومخليلي جادر الصلاة بصف السجادة مالتي صلينه سوه وره شويه اجت عمتي ام عبدالله جايبه العشه خلته يمنه وراحت
گعدنه نتعشه وعبدالله يسويلي لفات زغار اكلهن گتله اني اكل وحدي ماقبل يگول اول ليله خليها حلوة بكل تفاصيلها بسمت بوجهه وره ما كملنه عشه اخذ الصينيه عبدالله ونزل بيها جوه رحت غسلت وفرجت اسناني وخليت مكياج خفيف وغيرت ملابسي وخليت عطر طفيت الضوه خليت بس ضوه التيبلام وگعدت على الجربايه شويه ودخل عبدالله راح غير ملابسه واجه گعد يمي باس راسي وحضني طول بگعدته بدون مايحجي حركت روحي من يمه اباوعله صافن بعدت روحي من حضنه وگعدت گباله
_سيد بيك شي
_لاحبيبتي ماكو شي لايضل بالج
_احسك مو طبيعي ضايج من شي سويت شي يضوجك
_لا يروحي ماسويتي شي بس سالفه اجت بالي وصفنت الها
_يصير اعرف السالفه
_ما اريد اضوجج
_مبين السالفه تضوج لعد اضوج وياك بس انته ضايج خلي اسمعها حتى نضوج سوه ليش بس انته ضايج
_لا حبيبتي مو وكتها تعالي يمي بحضني هسه والسالفه بعدين احجيها الج
بقت السالفه بالي مرت ليلتنه حلوة وبتفاصيلها الزغيره الماتنسي گدر السيد يحتوي گلبي وخلاني احبه بفترا كلش قصيره صرت من اشوف ابتسامته ابتسم وجهه البريئ وعيونه وملامح وجها شعره المجعد الشامه البنص خده حفظت كل تفاصيله بقينه گاعدين لصلاة صلينه صلاة الفجر سوه ورجعنه نمنه ب10 الصبح يالله گعدنه سبحت وبدلت ونزلنه سوه عمي مجان موجود بالحوزة والبنات بالدوام وعون نايم بس عمتي كاعده صبحنه عليها جابت صينيه الريوگ واجت گعدت يمنه
_الف مبارك زواج الدهر يمه يوم الاشوف جهالكم وافرح بيهم
_امين يارب العالمين
سارة:: بيوم الجمعة وبعد ما أعلن السيد جهاد طب سلوان يركض لغرفته اخذ سلاحه وتلگتنه امي وجدة يسئلنه شكووو
_جدة السيد اعلن جهاد وانه والولد راح نروح
_يمه فدوه اروحلك استر اعليه مابيه حيل فراگك يمه
_شني نعيمة خلي الولد يروح
_حتى انته عدنان
_چا شني غير السيد علن جهاد واحنه قادرين نحمل السلاح جا شني وحدن عن هالدوام
_روحو بعد ابوكم وربي ينصركم انطروني جاي ورياكم لساحه حميد جيب عوچيتي وتعال
ركض حميد اخذ جدي وطلعو لساحة الديرة صعدت اعله السطح اعاين الهم زلم الديرة كلها مسلحة ولد عمي وعمام جدي وناس من العشيرة وكلمن كاض تفكته جنهن رايحين بطلابه شوفتي الهم خلتني ابچي صعدو سيارات كوستر وراحو نزلت جوه امي تبجي وجدة تهدي بيها عزام راد يروح بس ابوي مامخلي يحيى بعد ماراجع من الزيارة طب عزام يحجي وعصبي اشلون ابوي ماخلاه يروح
_جا شني همه زلم كلفه وانه لا
_كلكم زلم وخوش ازلام بس ابوك راح واخوك المن رايح ولد عمك راحو مو كلكم اطيكم للموت عزام
_جدي شني هيه الشهادة وين تتحصل وهاي الديرة كلها راحت جا شني انه وحد والله امشي
_استر اعليه عزام يمه مالي حيل المصايب اخيك وراح اكعد واسكت ولو رحت يعزام اذب نفظ اعله روحي واحرگها
_گولي يالله نعيمه شمالج
_عمه حاجي شني اطي ولدي للموت ثنينهم ماتروح گلت ماتروح
عاف امي تبجي وطلع ابجي اعله بچي امي وجدي يحجي وياها ويصبر اعليها الي عرفناه من جدي مناف ابن عمي رايح وسعيد وسلوان وعباس راد يروح وهم ما مخلي جدي ولا عمي بليل اجت مرت عمي مزهر هيه ومرت عمي عيدان وگلبنها مناحة بالبجي تمنيت تجي وياها مودة عدي حجايه تحفر بيه حفر ردت اگوله الها هو گال لو ماتحبني اروح للحرب والله يعين گلوبنه تلوعت عليهم
سلوى:: مارديته يروح بس موش بيدي ماگدرتله
جدة::ولجن شمالجن خلن الزلم تروح جا ضل يمجن جاعده شني موخوش ازلام خلهم يدافعون اعله گاعهم لو ترده داعش يطب لبيوتنه مثل ماسوو بالموصل
نعيمة:: عمه الفرگة موش هينه
_محد يحمل فراگ بزره لاضلن تنوعن وراهم ادعلهم الله ينصرهم ويردون سالمين ولجن شني شكد راحت النه زلم بحرب ايران جا شني نخلي الموخوش يدوس گاعنه كافيجن بچي وشربن چايجن
_عمه چا شني مامحترگ گلبج اعليهم
_شني سميرة غير بزر بزري اشلون مايحترگ گلبي اعليهم بس لون هذا مايروح وهذا امه ماترضه وذاك عائلته شني ياهو اليدافع لگاعنه ومقدساتنه
سارة:: ضلت جدة تسولف اعليهن وتهدي بيهن والله وگدرت تقنعهن ساعه وراحن لبيوتهن طبيت لغرفه سلوان وانه اذكر من سئلني اعله مودة خاب ماحبيت غيرها اهلها ينجرعون تالي كسرت بگلبك وطلعت عاشگه احح يانار گلبي اعليك خويه سوده بوجهي چي يحترگ گلبك اعله الما هاويك رتبت غرفته وطلعت الوكت مايمشي جدي كلش تعبان لا ابوي ولا سلوان ويحيى اعله الاساس باجر يرد من الحمله وحميد لف راسه ونام بغرفه امي رحت لغرفتي وانه افكر شراح يصير بينه لو جابو ابوي لو اخوي شهيد مجرد ماطرت السالفه بالي صبن دموعي وگمت ابجي
عذراء::مر يومين على زواجي والحمدلله مرتاحه وياهم بس عبدالله مخلصها صفنات ساعه ب11 بليل بدلت ورتبت الغرفه دخل بيده علاگه حلويات خذتها منه وتشكرته رحت ارتبلنه صينيه لسهره لمن رجعت شفته لازم موبايله ومندمج قربت عليه واركز بملامحه الي احسها مليانه غضب قربت راسي على الموبايل شفت يباوع على مقطع
_شبيك حبيبي احس ضايج من شي ليش مجاي تگلي
_عذاري ما اريد اضوجج وخايف من ردت فعلج
_شكو سيد قلقتني
_توعديني ماضوجين وتوكفين وياي بكل قراراتي
_اكيد حبيبي اوكف ويـَاك بكلشي مو بس بقراراتك
_عذراء بعد 4 ايام رايحين للعراق
_اي اعرف گالت عمه وشنو المضوجك بالموضوع
_حبيبتي صار 3 ايام ما مرتاح وليل ما انامه من التفكير انه قررت قرار ومامنه رجعه اريدج توكفين وياي وتسنديني هالشي محد يعرفه غيرج انه قررت …………….
