رواية عروس الجبايش الفصل الثامن والثلاثون 38 بقلم ياسة – تحميل الرواية pdf

إن هذا ليس حباً، بل استحواذ أناني مُغلّف بأبهى الكلمات الرومانسية. إنه يغار من ظلي، ويشك في صمتي، ولا يدرك أن الحب الحقيقي هو أن تمنحني حرية ألا أحتاج إلى غيرك، لا أن تسجنني كي لا أرى سواه.”

عندما يُفرِط المرء في الحب، يتحول قلبه إلى وحش يخشى الخسارة أكثر مما يشتهي البقاء. انتَ تحبني، نعم، ولكنه لا تثق بي. انتَ لا تراني حبيبتك، بل تراني ‘الكنز’ الذي يجب أن يُحرس ويُخبأ بعيداً عن أعين اللصوص المتوهمين. وفي النهاية، تحت وطأة الحراسة المشددة، يذبل الكنز ويفقد بريقه تماماً، ولا يتبقى سوى رماد علاقة ماتت خنقاً تحت مسمى ‘الغيرة المجنونة’.”

يُـمن :- انا سمعته تصوب وانا إحس الصواب بگلبي صار جسمي يرجف وعيوني ما گمت اسيطر عليهن ركضت للغرفة طبيت وسديت الباب عليه والدموع عشرة عشرة

انوب احس اختنكت ما اگدر اسيطر على روحي رجعت طلعت للحمام توضيت وفرشت سجادتي صليت صلاة الليل وعلى طول الصلاة دموعي تصب

انوب لزمت السبحة وادعي واستغفر لحد اذن الفجر وانا على فد گعده و فد بچيه

وراها غفيت وانا على السجادة ساعة يمكن وفزيت مثل المخبلة طلعت من الغرفة اركض ، ماكو صوت بالبيت عمي وامي نايمين هسه انا شلون بيه شلون اسأل شلون اطمأن ياربي دخيلك راح اموت

طلعت للحوش و رجعت للصالة اخر شي طبيت الغرفتي تمددت بفراشي وايدي على عيـوني والدموع تصب انوب مدري شلون غفيت من جديد

والصبح من گعدت عمي ما موجود طالع الدوامه وامي ما اگدر اسألها لا اكلت ولا شربت بس حاطه ايدي على خدي وصافنه امي انتبهت عليه و گالت

— هذا الاكل كملته گومي اكلي يلا

حچت وهيَ ضايجة وعصبية يعني حست عليه وانا خفت لا تروح تحچي عليه وتصير هوسه بسرعة گمت اكلت بس شني الاكل احسه مر بـ حلگي و راسي يريد ينفجر رجعت گمت طبيت الغرفتي وانا اگول اخابر من ياهو اسأله ويبرد گلبي إحس راح افجر يا ربي دخيلك ساعدني اخر شي دزيت رساله المـراد كتبت بيها

— شلونك مراد شلون الوضع عفيه طمني

بس شافها فهمني وفهم قصدي بسرعة ردلي

— هلا يُـمن الحمدلله لا يضل بالج ماكو شي وحالته زينه بس بعده بالمستشفى

بس قريتها رديت بيني وبين روحي الحمدلله رجعت كتبتله

— يعني زين

— اي زين لا يضل بالج قبل شوية رجعت منهم وضعه كلش زين

حطيت النقال على الميز ونزلت سجدت الربي سجدة شكر وهيج الدموع وحدها تطيح ما اسيطر عليهن ، وراها گمت للجرباية ونمت وهالنومه نومه لحد المغرب گوه گعدتني امي

گمت مكسرة وعيوني مورمه من گد ما نايمة وباچيه گعدت بالصاله وامي جابت اكل اكلنا انا وياها وگمت غسلت المواعين

ورجعت تمددت بالصالة والنقال بـ ايدي كل شوية واكتب اسمه بالبحث مال الفيس بلكي الگه صفحته ماكو طبيت على حساب مراد ودورت بـ اصدقائة ونفس الشي ماكو ماعنده حساب يمكن

انوب أيست و بقيت اگلب بالفيس وكل شوية طالع واحد گبالي صديق مشترك بيني وبين ورود ما عايفة واحد ما متابعته ومصادقته ومن بين الاصدقاء أستاذ بُـرهـان صار عندي فضول اشوف صفحته طبيت عليها

و نسيت روحي شلون صفحه حلوة ما بيها غير كم منشور بس بيهن معلومات كلش حلوة عن العلم والقراءة والكتابة و صورة اله بالجامعة وهذا هو

فتت للتعليقات لگيت العشيرة كلها معلقتله ضحكت واگول

— ايباااه شلون لمه حلوة مجتمعين بالجنه ان شاءالله

حچيت هيج وضحكت ورجعت فتت على نؤفل وخميت صفحته كلها رجعت من نؤفل طبيت الغادة لان معلقه عليه حبيبي اكيد هاي هيَ وهم خميت حسابها ومن حسابها فتت الهاله والرجالها ورها الواثـق

أبتسمت وانا اشوف صورة واثق بـ قاط العرس دعيتله الله يسعده ويهنينه

وراها صار تعليق رائـف گبالي وهم فتت الحسابة

ما حسيت بشي ولا عبالك اعرفه من قبل

چا شگد انا قوية وهيج متخطيته ومتخطيه كل أذيته ذبيت حسرة واگول هم اگدر اتخطاك يا منـاف وتصير مجرد ذكرة لو ابقى ادورك بين السطور

رجعت طلعت من حساباتهم وضليت اقرأ بالتعليقات الموجودة بحساب بُـرهـان شفت ريـام اسمها بالأنكليزي معلقتله ابتسمت واگول

والله حلو هيَ واخوها كاتبين اسماءهم بالانكليزي ناس مثقفه انوب تذكرت تميم هم كاتب ابو علي بالانكليزي بس ابد مو مثقف ضحكت ودزيت الريام طلب وكتب الها انا يُـمن ساعة و وافقت على الطلب

و رجعلتي

— هلاو حبيبتي شلونج اخبارج

— الحمدلله انتِ شلونج

— يم الله

— شخبار الدراسة

— الحمدلله زينه خلصت هاي السنه بكل خير وبعد عندي السنه الجاية الحاسمه

ان شاءالله

— الف مبروك

— الله يبارك بيج

— يلا حبيبتي اخذي راحتج بس حبيت اسلم عليج

— فدوة الگلبج حبيبتي زين سويتي عاد على الخط ما نگدر نتراسل هنا نت مفتوح خلينا على تواصل دائماً

— ان شاءالله

ودعتها و رجعت اطب منا ومنا لحد ما انسطرت ونمت والصبح گعدت ماخذه قرار بس يصير زين ويگوم على حيلة ويحاول وياي مره ثانية راح اوافق عليه وانطيه فرصة لان ما اتحمل بعد كلش تعبت من التفكير بيه

بقيت كل يوم انتظر بلكي يرجع يخابر يراسل يدز احد بس ماكو انقطعت محاولاته وبعد ما حاول وياي نهائياً لحد ما مشت الايام عادية وما بيها احداث ولا بيها اي شي و كل اللي عرفته عنه طالع من المستشفى وحالته الصحية زينه

وهيج خلصت باقي ايامي الى ان خلصت العطلة وجهزت روحي من جديد للدوام وهاي السنه ماخذه عهد على روحي اطلع من الاوائل وسالفه القراية البسيطة اعوفها

بأشرنا اول يوم دوام و الوضع مثل قبل

كل طلاب شعبتي شفتهم و صار بيناتنا سلام عادي بس ويا ورود لا غير لان هيَ الوحيدة صاحبتي بهاي الجامعة

و هاي السنه اغلب الاساتذة والدكاترة تغيروا واجونا غيرهم ومن بين الدكاترة الجدد دكتور سمير وسبحان الله شگد اضوج منه والطلاب يضوجون منه بحيث المحاضرة مالته اخلصها على اعصابي

بلشت دوامي و معليه بـ احد ومثل قبل متحفظه وما احچي ويا احد وبس ويا ورود ومن اول اسبوع اشغلت علينا الامتحانات الواجبات وهاي المرحلة مبينه من اولها صعبة والباقي على الله

و من داومنا لليوم انا ما شايفة بُـرهان ولا ماخذنا شهر كامل على الدوام وهوَ ماكو حتى للجامعة ما يجي وره الشهر يلا داوم وبيوم الداوم

شفته بالممر والطلاب كلها ملتمه عليه ويتحمدوله بسلامة شصاير وياه ما ادري بس يمكن جان مريض لان كلها تتحمدله بالسلامة

تانيت الزحمه تخف ورحت عليه بس شافني ابتسم رجعت انا أبتسمت و گتله

— شلونك أستاذ

— اهلاً يُـمن شلونج

— الحمدلله على الله ، سلامات خو ماكو شي شو يتحمدولك بالسلامة

— لا ماكو شغلة بسيطة

— خير ان شاءالله منين تشكي

— كتفي شوية جان متأذي وعدت على خير

ان شاءالله

— ها الحمدلله على سلامتك ما تشوف شر

— الله يسلمج شكراً

— شنو هاي السنه ما تاخذنا

— لا ما اخذكم بس احتمال على الكورس الثاني ابإشر وياكم

— لا حرامات والله عاد شرحك حلو ونفهم عليك طريقتك سهلة علينه

— اللي يركز ويا الاستاذ او الدكتور يفهم كل الطرق بس شدي حيلج و انتبهي على دراستج وانتِ تفتهمين

— ان شاءالله

— يلا فوتي المحاضرتج لا تتأخرين

رجعت مشيت القاعتي ويومين مرن كلش عاديات وباليوم الثالث فات علينا أستاذ بُـرهان سلم و گعد وراها گال

— راح اخذكم من جديد مع الأسف

هوَ گال هيج و كل شباب الشعبة گاموا يصفگون وانخبص الوضع خبص لان الكل يحبه وكلش حباب ويانا وشرحه يخبل ويساعد الكل رجع هوَ ضحكت و گال

— صوتكم يمعودين عيب

يوسف :- والله احلى خبر

— عاد ما دام هيج تحبوني وفرحتوا بـرجعتي بمناسبة هاي الفرحـه راح اسويلكم عزيمة

انخبصنا خبص كلها تسأل عزيمه ايش

و وين و شلون ضحك ورد

— هههههه يابة شگد عظامة ولكم اشاقة وياكم

ياسين :- أستاذ احنه حتى ما سوينه حفله تعارف تدري

— هههه واني شعلية

— خلينا نسوي عزيمة و تعال ويانا الله عليك

— شلون فارغ وما عندي شغل وعمل واجي وياكم بابا انتوا ناس فارغين جايين هنا تلعبون واني رجال ما عندي مجال وفوگاها مريض

— ههههه لا أستاذ والله العظيم احچي صدگ خلينا نسوي سفرة حلوة وتعال ويانا انتَ وأستاذ عزيز

— هسه عوفونا من هذا الموضوع وانتبهوا عليه

سكتنا و الكل انتبه عليه لان بلش يشرح بالمحاضرة لحد ما خلصها و طلع طلعوا الولد وراه يردونه يروح وياهم للسفرة

وصدگ صار الهم واهس وحددوا سفرة للزوراء يوم الجمعة الجاية واتفقوا كل واحد يجيب وياه فد اكله وحتى البنات قررن يجن وياهم

ورود گالت خلينا نروح نتونس نلعب ونغير جو گلت اشوف امي ومن رجعت حچيت الامي ما قبلت عاد ما لحيت وياها بسرعة گعدت وسكتت

وثاني يوم من داومت الكل صايرة سالفته السفرة وشـيجيبون و شياخذون

و شيلبسون سالتني ورود إذا اروح لو لا رديت

— لا ما اروح

— لاا ليش

— امي ما قبلت

— ياا ليش والله نتنونس وكل البنات رايحات قابل بس انتِ

— ما تقبل

— تردين اخابرها

— لا عوفيها ما تقبل وإذا الح عليها تضوج

— حاولي وياها الله عليج لان إذا ما رحتي اني هم ما اروح تدرين بيه راح اروح وياج على الواهس

— الله كريم

رجعنا سكتنا من فات دكتور سمير سلم

و بدأ يشرح و للعلم من بدأت السنه لليوم هوَ ما طالع منه شي غلط بس انا ما احبه اموت منه وما انسى تهديدة وموقفه مال العام وياي

خلص شرح وطلع و الكل طلع وراه ويا ما نزلت من الدرج شفت ريـام و بُـرهـان جايين من برى يردون يصعدون صرت وجه بوجه وياهم ريام ضحكت وباستني وانا نفس الشي بستها وراها گـالت

— هاي شنو عيني كل ما اشوفج لازم اتفاجئ بجمالج اي عيوني على گولت كاظم كل ما تكبر تحلى لو شنو الموضوع

— هههه هاي عيونج حلوة وتشوفيني بيهن هيج حلوة

— يابة انوب السوالف والردود تفهي

ضحكت خجلانه وبُـرهـان گال

— اي شصار على سفرتكم

حچى هيج وضحك رديت

— ما ادري والله بس الكل متحمس وصايرة حديث الساعة

— بعدكم على الجمعة مو

— اي بس انا ما اروح

— ليش

— امي ما تقبل

ابتسم ونزل راسه للگاع ورجع گال

— مو خوش ما دام شهيناز ما تقبل معناها اكو غلط بالموضوع

— لا مو قصة غلط بس تخاف عليه

ريـام :- ليش وين تردون ترحون

بُـرهـان :- مسوين سفرة للزواء وعازميني ههههه الفارغين

— الله عليك

— ههههه اي

— لعد اروح وياكم

— ما اروح إني

— لا ليش خلينا نروح نغير جو بشرفك

— ما عندي مجال

— الجمعة عطله فرغ يوم النفس ارحم حالك يا أخي

— يُـمن متروح شأسوي رايح بعد

حچى هيج وضحك و ريام نفس الشي ضحكت وانا الفطير ضحكت حالي من حالهم رجعت ريام گالت

— لا لا تروح

يُـمن :- لا والله امي ما تقبل

— قنعيها الله عليج خلينا نروح نتونس شو تحمست فد مره

هوَ ضحك على اخته و گالها

— إني صاعد قبل لا اطلعين انطيني خبر

— ماشي

رجع باوع عليه وترخص و مشى بقينا انا وريام وراها طلعنا للكافتريا گعدنا راحت جابت ببسي ونساتل واجت انا شفتها جابت ببسي وخربت من الضحك وهيَ مگابلتني وتضحك ما تدري شنو السالفه انوب گالت

— شكوو هههههه

— بُـرهان يگول بعز القهر مالتج إذا تشربين ببسي تضحكين

— ههههه اي والنبي

— ههههههه

— صدگ كل ما اريد اسألج انسى

— گولي حبيبتي

— بيت جدج شخبارهم

— والله ما ادري بيهم ولا سامعه منهم خبر

— احسن و الله يكفيج شرهم ان شاءالله

— امين يارب

بقينا گاعدين سوى لحد ما كل وحده بينا راحت المكانها وراها خلصت الدوام وطلعت للبيت لگيت امي مسوية حمله على المطبخ و مطشره الغراض بكل مكان والدنيا مگلوب بس شافتني اجيت گالت

— الله جابج بدلي وتعاي وياي

— والله ولا بيه حيل

— يااا ولج بدلي وخلينا نخلص شغلنا عمج على جيه

–ما معليه تعبانه وعندي قراية وانعس

عفتها وطبيت للغرفة بدلت و گعدت انوب صفنت ويا روحي وگلت خليني اروح اساعدها بس اساومها اول شي حچيت هيج وضحكت و طلعت لگيتها مدنگه تغسل بالكاونتر والدنيا مگلوبه يمها گلت الها

— راح اساعدج بس بشرط

رفعت راسها باوعت عليه ما عاجبها وردت

— اي بله وشنو هذا الشرط

— اروح وياهم للسفرة

— يُـمن لا تلحين ماكو سفرة

— شبيج يما عليج الله والله كلها راح تروح وانا ضايجة ما طالعة

— نطلعج اني وعمج عود

— مااا اريد وياهم هسه بس انا الشعبة كلها راح تروح معليه والله شني هاي انتِ وعمي ناس كبار انا اريد اطلع ويا ورود

— كبار بعينج

— چا شني بعدكم شباب وانا ما ادري

— اي شباب وبعز شبابنا

— يلا هسه شباب شباب بس خل اروح

— ماكو گلت كافييي لا تلحيين

— چا ما اساعد بشي ولا تصيحين عليه ويلا جوعانه اريد غده صبيلي غده

— ياا ياا ولج طالع اللسانج

— اي طالع اللسان ويلا جوعانه اريد اكل

— هذا الاكل حمي واكلي

— معليه انتِ صبي

حچت هيج و رحت وعفتها صافنه وراي متفاجأة بيه شوية وسمعتها تصيح عليه طلعت لگيتها صابتلي غده وجايبته للصاله ضحكت وگعدت اكل ومن كملت ما انطاني گلبي ما اساعدها

گمت وياها خلصنا المطبخ وراها سبحت ولزمت الكتاب و گعدت اقرأ لليل و اجى عمي اجيت يمه گعدت واباوع عليه اريد افتح ويا الموضوع بس استحي هوَ بسرعة گال

— بيج شي

— لا

— تردين شي

هزيت راسي ضحك و گال

— شتردين گولي

اجيت گعدت بصفه و احچي على كيف خاف امي تسمعني گتله

— طلاب شعبتنا كلهم راح يرحون للزوراء الجمعة و امي ما تقبل اروح وياهم

— ههههه والله عاد امج اعرف اني معليه

— لا عمي الله عليك والله ضايجة اريد اروح وياهم احچي وياها حباب

— رايحات بنات مو

— اي اكيد

— وإذا ما تقبل

— لا تقبل تقبل بس انتَ احچي وياها تقبل

— هههههه الله كريم

ضحكت وگمت سريع فرحنا ويا ما گمت طبت امي شافتني باوعت عليه و رجعت باوعت العمي و گالت

— شكو

هاشـم :- موضوع خاص بيناتنا

— هاا

— اي ههههه

— زين الله يثخن اللبن

— ههههههه

رجعت طبيت الغرفتي وراسلت ورود گلت الها راح اروح وياكم و رجعت راسلت ريام

طبعاً راسلتهن قبل لا اخذ الاكيد من امي بس ادري كلش زين راح اروح لان الشغلة صارت يم عمي

وصدگ ثاني يوم من گعدت انطتني فلوس گالت هاج هاي الكروه مال السفرة ركضت عليها حظنتها وابوس بيها واگول

— يابة هاشم ماكو منه اثنين وعلي

— ههههههه ترى اني الهويت مو هاشـم

— اي اي صح ههههه

اخذت الفلوس ضميتهن وراها حظرت روحي وطلعت للدوام بوقتها جانوا متفقين جيبون كوستر و كلنا نروح بيها ويصير اللقاء بـ باب الجامعة ومناك ونطلع بسيارة وحده للزوراء

اجينا انا ورود نريد ننطي الفلوس للممثل گال لا ما ناخذ من البنات الكروة شالناها احنه الولد انتِ عليجن بس سون اكل طيب وهذا هو

رجعت گلت الامي على الاكل وخطية سوتلي برياني و فوگاه دجاجة شوي خو هيَ بالبرياني والدجاج رهيبة محد يوصل يمها تسوية يخبل ورجعت سوت وياه كيكة من الليل وضمتها و ورود سوت دولمه

و ثاني يوم الساعة بالعشرة كلنا تجمعنا باب الجامعة ومناك و نطلقنا

الولد جايبين مسجل و مشغلينا بكل صوته وخلصوها من الجامعة للزوراء يركصون

و يُـمن سلطان واگـفة وياهم تهز رگبه هيَ وشلتها والحلو بـ ولد قاعتنا مالهم غرض بيهن واصلاً الموضوع عدهم طبيعي ومالهم دخل ولا يباوعون ولا يحچون ويعاملون بنات شعبتنا عبالك اخواتهم

لحد ما وصلنا فرشنا و گعدنا بعدنا هسه بدينا نرتب بالسفرة و شفت أستاذ بُـرهان

و ريـام اثنينهم اجوا والطلاب اول ما شافوا

گاموا كلهم يصحيون

هلا بيك هلا وبجيتك هلا

يهوسون ويصفگون ويصوفرن وهوَ يضحك من بعيد لحد ما وصل يمنا گال

— سوالفكم هاي مشهوا على دكتور عزيز

كل واحد بيكم ياخذ درجته غيرها ما ازيد

والكل يرد لا أستاذ والله احنه نحبك مو على مود الدرجات هيج من الله وهوَ يهز براسه عود مصدگهم

دقايق و اجى دكتور عزيز ودكتور عزيز

وردة اموت عليه بوقتها جايب ويا اثنين بناته يصيرن بالمتوسطة

ونفس الشي كل الطلاب بقوا يهوسون ويصفحگون هلا بيك هلا وبچيتك هلا

وهو يرفع ايده يرحب بيهم يخرب ضحك

بيومها شنو الاكل شنو الاطباق من كل الانواع والترتيب يجنن واللمه تجنن و ماكو هيج ونسه من صدگ طلعه من العمر

خلصنا غدانا و لمينا الاكل وسووا الولد جاي وكرزات و حلويات جايبين اشكال اللوان

وراها گاموا يلعبون طوبة جايبين وياهم

واحنه البنات كل اثنين ثلاثة گاعدات يسولفن سوى

انا و رود و ريام گعدنا سوى ونباوع عليهم

شلون يلعبون طوبه و بُـرهـان گام وياهم

نزع الجاكيت وسرفن قميصه وبالنطرون

ونسى روحه استاذ عبالك صديقهم

ودكتور عزيز حاير بناته يجيبهن منا ويرجعهن منا گالت ريـام

— خلونا نروح نلعب بالالعاب شوية

گمنا انا وياها ورود هيَ صاحت على بُـرهان راح تروح أشر الها روحي وراها مشينا وبنات دكتور عزيز اجن يركضن ورانا گالن بابا گال نجي وياجن

بيومها ما خلينا لعبه ما صعدنا بيها ما خلينا مكان ما فتنا من يمه نسينا روحنا ورجعنا جهال لا اكو هم على گلوبنا ولا اكو قهر حتى تأخرنا عليهم ونسيناهم

اخر شي سمعت نقالي يدگ طلعته رقم غريب توقعت امي لو عمي قابل منو يدگ عليه بسرعة رديت بس تفاجأت من طلع أستاذ بُـرهان گلت الو رد

— وين انتن يُـمن

— منو

— بُـرهان

— ها أستاذ هسه راح نجي كملنا

— يلا استعجلن ريـام وين صار ساعة ادگ الها ما ترد

— هاي بس ما تسمع النقال

— ماشي يلا تعالن

ريـام بس سمعت بيه خابر بسرعة طلعت نقالها تشوفه لگته داگ عليها اربع مرات

ومن ما مجاوبة مخابرني بس منين جاب رقمي ما ادري واصلاً ما انتبهت للموضوع وما فكرت بيه و راحت من يمي السالفه

رجعنا لگيناهم متانينا يردون يرحون للحيوانات بس وصلنا يمهم طلعوا للحيوانات بس ايععع الريحة تكتل والزفة تلعب النفس روحه السودة انوب مو حيوانات كاتلها الضيم طاگها الجوع والجفاف

حتى ما طولنا بسرعة طلعنا منهن وراها الولد خابروا السايق يجي حتى نرجع ودكتور عزيز اخذ بناته وراح وبُـرهان وريام هم گاموا يردون يرحون گالت ريـام

— تعاي نوصلج ويانا

— لا رحم الله والديج اروح وياهم هسه يجي السايق

— تتعالي يمعودة هسه يجي ينزلكم يم الجامعة وانوب شيرجعج للبيت

— عباس يجي عليه متفقه وياه

— ماشي على راحتج

اجت باستني و راحت و الاستاذ ودع الطلاب و طلعوا اثنينهم نص ساعة واجت الكوستر طلعنا بس شنو ميتين من التعب

والونسه طالعه من خشومنه

ومن رجعنا نفس ما رحنا صوت الاغاني والركص على طول الطريق وراها نزلنا باب الجامعة وكل واحد راح البيته

انا لگيت عباس طابگ خطية متانيني صعدت ورود ويانا وصلناها البيتهم و منك رحنا البيتنا وهاي السفرة جانت انتقاله كامله بحياتي

رجعت گبل بدلت ونمت من گد ما تعبانه

وثانـي يوم صادف سبت وگاعدين بالبيت خلصتها بس گاعدة ما عندي غير كم واجب خلصتهن وهذا هوَ

بيوم الاحد من داومت جنت مفكرته يوم عادي مثل ايام الاسبوع التجي وتروح بس تفاجأت من شفت ريـام و اگفـه و واگف وياها واحد ما شفت شكله لان جان منطيني ضهره

بس ضهره و طوله و راسـه يصيح الامه وابو هوَ وگفت من بعيد واباوع معقوله هوَ لو گمت اتخايلة اباوع من بعيد ريـام وجهها عليه و مندمجه تسولف وياه و هوَ واگـف يسمع الها

اريد امشي واشوفهم بس ما اگدر خفت لا الجاي اشوفه صحيح وانصدم، اخر شي ما تحملت مشيت ورجليه احسهن ماتن واردد بگلبي دخيلك يا ربي دخيلك ما اتحمل مثل هيج صدمه

ما طلعت خطوتين صارن شطولها عليه لحد ما وصلت قريب منهم وتوضح شكله اكثر، هذا هوَ ضهره وطوله وگفته مستحيل اغلط بيه عيوني تعرفه من بين الف واحد

لحد ما صرت كلش قريبة عليهم و تعديت منهم ريـام ما انتبهت عليه لان فد مره مندمجة تحچي ويا بحيث فتت منها وجه بوجه بس ما انتبهت عليه ولا شافتني

بس هوَ شكله انتبه عليه لان ويا ما فتت من يمهم سمعته گـال الها

— سهله عيوني

انا سمعت صوته وانا احس متت يا علي گلبي راح يوگف مستحيل ما تحملت اصبر بسرعة درت وجهي عليه شفته يباوع عليها ومركز وياها بس متأكدة جاي يشوفني

ضليت بمكاني واباوع عليه وهيَ فد مره مندمجة ويا و هوَ مركز وياها وراها افتريت ومشيت بكل سرعتـي صرت بعيدة عليهم مسافة وبعدهم واگفين سوى ويحچي بهدوء ومركز وياها فد مره

إحس متت وين يعرفها شيريد منها بقيت قرابة الخمس دقايق واگفه گبالهم وضهر ريـام صاير عليه يعني گامت ما تشوفني بس هوَ گبالي ومتأكدة جاي يشوفني بس يغلس وراها ريـام راحت و هوَ دار يباوع عليها لحد ما مشت مسافة رجع باوعلي وغمزلي

لا تحركت ولا مشيت احس جمدت رجع هوَ اجى عليه وگف مقابيلي وكلش قريب مني و مال براسه شي قليل و گـال

— يا هلا

اريد ارد عليه ما اگدر غصيت بالحچي رجع گال

— سفرات و طلعات ممتاز

— شعندك ويا ريام

— الست ريـام قصدج

— منـاف

— عيونه الاثنين

— لا تخليني اكرهك

–ههههه لا دخيلج على اساس شلون حابتني

ما جاوبته بس اختنگت وعيوني گامت تحرگني رجع گال

— لج ماكو هيج معقوله الهاي الدرجة اهون عليه واوصل للموت و ما تكلفين نفسج و تگولين شلونك اخبارك

— ليش اگول شلونك شنو البيني وبينك حتي اسأل مناف ليش ما تعرفني بحالي

سكت بس عيونه صارت بگصته وراها گال

— هسه اني جاي يمج حتى اعوفج بحالج

— شرايد من ريـام

— سلامتها

— وين تعرفها

— على معرفتج

— شناوي منـاف

— خير يصيبج ويصيب أخوها

— شـقصدك

— ما قصدي شي

درت وجهي اباوع عليها راحت اختفت رجع گـال

— سفرات و كذا لاااا وفوگاها رقمج عند الأستاذ و يخابرج وتردين ومسوية فيس وضايفة امة محمد بيه اشو طالعة عينج ولج

— وانتَ شعليك

— شعلية

— اي شعليك و لا تتدخل ولا تجي هنا وكافي استحي على روحك وصلت بيك حاط مراقبين عليه يجيبون اخباري وفوگاها جاي للأبنية الله اعلم مدري شتريد تسوي بيها كل ضنك عندي شي ويا اخوها ترى والله ما عندي شي ويا عيب عليك استحي

— منين جاب رقمج

— ما ادري

— اي وهسه اني اصدگج

— صدگت ما صدگت مشكلتك

طلع باكيت الجكاير و اخذ جكارة شغلها ويباوع عليه گتله

— شگد اغالط روحي واگول انا هم ما ساعدته انا هم ما انطيته فرصه انا هم ظلمته بس تجي وتسوي الاكبر والاكبر منـاف إذا بيوم من الايام فكرت فكرة وحده ارجعلك فـ امداني

— بشنو أذيتج كل اللي جاي اسوية من دافع حبي الج تدرين كلش زين تلعب نفسي من النسوان كلها وشوفي وين وصل بيه الحال الخاطرج

— يا خاطر هذا اللي مخليك جاي للأبنية والله اعلم شلاعب بعقلها وتگول الخاطرج

— بعدني كلشي ما لعبت خلينا نرجع وننهي اللعبة گبل لا تبدي

— جاي تساومني ؟

سولي حركة بشفايفة بمعنى لا رجعت گتله

— تريدنا نرجع

— اي

— ماشي نرجع بس تگدر تخليني اداوم واخابر أستاذي ودكتوري واراسل زميلي

واعلق على الفيس واطلع واطب واروح واجي واللبس و احچي تگدر تتحمل لو تموتني كتل

سكت ما جاوبني رجعت گتله

— انا حبيتك من كل گلبي واتمنيتك من كل گلبي بس الحب وحده ما يكمل انتَ تحبني وانا احبك اي صح بس شنو الفايدة حب مبني على الشك حب ما بيه ثقه ولا احترام سني فايدته، منـاف انتَ ما اعرف شلون تفكر ولا علقك شلون يصورلك المواضيع يعني بدل ما تحاول تصلح الوضع وياي جاي تخرب حياة ابنية ثانية بدل ما تساعدني اتخطئ اللي عشته بسببك تجي تفلش الدنيا بسالفه جديدة صاحي على سوالفك لو شنو قصتك

ساكت ما يرد رجعت گتله

— الدنيا عبارة عن اختبار و كل شي بيها قسمة ونصيب وانا وانتَ خسرنا بالاختبار

و مالنا قسمة سوى كافي تخترع اختراعات و تفكر تفكيرات مو منطقيه ولا قانونية انتَ رجال محترم والك اسمك ومكانتك كافي يومية فضحية يعني ما صارتلك عبرة من جيت امي للمركز انوب ويا ريـام

نفس الشي ما يرد رجعت گتله

— منـاف انا احبك واموت عليك بس مستحيل ارجعلك لو اعرف تموتني ما ارجعلك لو اعرف ترفعني فلقه ما ارجعلك لان انتَ مريض وإذا رجعتلك اطلع مخبلة ومستغنيه عن روحي كافي بعد لا تجي هنااا ولا تشوفني وجهك كافي خلي عندك إحساس خلي عندك كرامة اخجل على رتبتك المعلگه بجتفك كافييي

حچيت هذا الكلام ويا ومشيت وانا جسمي كله يرجف و الله اطلع كلبة بنت كلب إذا رجعتلك بيوم من الايام مخبل مو صاحي شلون عقل شلون تفكير منين الله بلاني بيك ما ادري

مشيت ادور علي ريام هاي الغبية شبسرعة وگفت ويا طول بطول وهيج اندمجت فد فد مره ماكو ما لگيتها

طلعت نقالي دگيت عليها ماكو ما ترد

مشيت بالسجل شفت رقم آستاذ بُـرهـان باقي محفوظ بالسجل طلعته واگول

— اكيد هديل راحت سولفتله على السفرة وعلى مخابرة بُـرهان و على كل سالفه

الله ياخذكم منين اجيتوني

دگيت على بُـرهـان بسرعة رد ويگول

— هلا يُـمن

— شلونك آستاذ

— زين

— وين انتَ

— بالجامعة ليش وين انتِ محتاجة شي

— انا بالجامعة واريد احچي وياك تجيني للكافتريا لو اصعد الغرفتك

— بكيفج بس شكو خو ماكو شي

— من اجي احچيلك

— تمام تعالي للغرفه

سديت النقال وضميته بالجنطه ومشيت صعدت للغرفه واگول بيني وبين روحي

منـاف من هاي اللحظـه وانسد كتابك من حياتي وهذا الثاني خليني افهم منه ليش هيج منـاف فجأة كرها وما راده ومنين جاب رقمي اليوم لازم احط القناط على الحروف كافييي بعد

وصلت للممر ودگيت الباب صاح تفضل فتحت الباب و طبيت جان گاعد على الحاسبة ولابس نظارات اول ما شافني

نزع نظاراته وسد الحاسبة و ابتسم و گال

— هلا تفضلي

طبيت وعفت الباب مفتوح وراي طبعاً هاي الغرفة مشتركة بينه وبين استاذ ثاني بس بوكتها جان گاعد بيها وحده

اجيت گعدت مقابيله باوع عليه مستغرب جيتي وراها گـال

— سلامات بيج شي

— منـاف

— يا منـاف

— خطيبي السابق

عدلت گعدته و رد

— شبيه

— اجاني اليوم هنا

— اي

— يريدني ارجع وبنفس الوكت حچالي علي كل تحركاتي و تصرفاتي يعني اكو احد جاي يوصل اخباري اله وطبعاً انا اعرفها اللي جاي توصل اخباري اله بس مو هذا المهم

— لعد شنو المهم

— منـاف حاطك بـعقله عباله عندك شي وياي و انا ما ارضا ارجعله بسببك وهذا واحد ما عنده قدرة على اعصابة وإذا فقد اعصابة يأذيك ويأذيني

ما حچى شي بس رجع شوية ليورة بالكسرري وراها سوى احم احم مثل اللي يگح وانوب گال

— بيوم اللي رجعنا من السفرة اتصل عليه و هددني

— الله عليك

— اي

— شگالك

— گال اللي گاله

— والحل شنو أستاذ انا والله تعبت و امي بس احچيلها تسويها هوسه و تروح تهد عليهم وترجع تخرب هيَ وعمي من جديد والله تعبت وگمت اخاف لا يروح يسوي شي مو زين مدري شبيه هيج فجأة نام وگعد حاطك باله والله حيرني

— خلي يحطني باله ليش تفكرين وتشيل همه

— شلون ما افكر اخاف يسويلك شي

— يُـمن من اجاني قبل حچى نفس الحچي وبقى يهدد ويتجاوز بصراحة ما اهتميله لان اني بوكتها صدگ ما عندي شي وياج

و اصلاً هذا الموضوع ما مفكر بيه ولا خاطر على بالي وهسه رجع يحچي نفس الحچي وما اخفي عليج صح ضوجني الموضوع بس ثاني يوم نسيته وراح من بالي لذلك انتَ هم انسيه ولا تفكرين بيه

— زين ليش بس انتَ حاط عقله وياك

سكت ما جاوبني اونوب لوه شفته ليفوك ورفع اكتافه بمعنى ما ادري وراها گال

— جوز إني لان جنت قريب طليقج السابق

— لا هوَ ما يذكر رائـف ابد هوَ يگول انتَ عندك شي وياي

— واني عندي شي وياج

— لا

— خلص تركي مسيء الظن ياكل نفسه

— وإذا سوى شي

— بهذاك الوقت عود الله كريم كافي تركي الموضوع لا تفكرين بيه

— زين أستاذ انتَ منين جبت رقمي

باوع عليه ومثل التفاجئ بسؤالي ما جان محسب حسابه وطلعت بيه صفح وراها گال

— من ريـام

— ليش اخذته من ريـام اقصد شتسوي بيه لان هوَ عنده علم انتَ ماخذ رقمي وانا وياك نتخابر

— بيوم السفرة دگت عليج من يمي وبقى بالسجل

— شوكت دگت شو ما طلع عندي

— ما ادري ما اتذكر يمكن جان مغلق

— تمام أستاذ انا اعتذر ضوجتك وياي وبس المشاكل جاي تجيك من وراي

حچيت هيج وگمت فشلانه من الموقف وبنفس الوكت ما گدرت احچيله على منـاف و تفكيرة بريام مهما كان فاهم

و متعلم صعبة يسمع هيج على اخته طلت احچي ويا ريام وافهما واعوف بُـرهان برى الموضوع

مشيت كم خطوة اريد اطلع صاح وراي

بُـرهـان :- ريـام ما دگت عليج اني اخذته منها

يتبع……