رواية الوعد والرحيل الفصل الرابع 4 بقلم حمدي محمد
اسد فضل يومين في الفندق
لا بياكل. ولا بينام.
وحالته النفسيه سائت جدا
وتليفون جابر كان دايما مقفول بعد اخر مكالمه كانت بينهم.
اسد قرر يتصل علي عيشه بنت خالته.
علشان تعرفه الامور هناك ماشيه اذاي
وتستفسر له علي اللي حصل
اتصل اسد بعيشه
اللي ماكانتش مصدقه نفسها اما شافت رقمه بيرن
فتحت وقالت اسد ازيك.
اسد:- الحمد لله يا عيشه انتي ازيك وازي امك
عيشه:- بخير والحمد لله
اسد:- عيشه انا قاصدك في خدمه
عيشه:- اؤمرني
اسد:- الامر لله، عاوزك تروحي بيتنا وتخلي امي تكلمني
عيشه:- بس كده. حاااضر. دلوقت هروح واتصل عليك من هناك.
وبالفعل خرجت عيشه وراحت بيت جابر.
كان جابر بره البيت. وكانت فاطمه قاعده في اوضتها.
قالت لها عيشه ان اسد عايز يكلمها
واتصلت بيه. وادتها التلفون.
اسد:- ازيك ياما. عامله ايه
فاطمه:- يا حبيبي يا اسد. عامل ايه طمني عنك.
لما سمع اسد طريقة كلام فاطمه. ارتاح. وقلبه اتطمن
وسألها وقال:- خبر ايه ياما. من يومين كلمت ابوي
و…..
قاطعته فاطمه وقالت:- حسين ولد عمك
خلي يس ولد خالته يعمل فيك المقلب ده
وجه قدام ابوك هنا في الدار.
ووراه الفديو. وفضل عمك صابر يقول اهو ابنك اللي عامله شيخ.
بس ابوك ماسكتلوش
مسك حسين واداه بالقلم علي وشه قدامنا كلنا.
وقال له حتي لو وصلك شي علي ابن عمك. تستره ماتفضحهوش.
وابوك بعد مادخل اوضته اتصل بيك.
وكنت قاعده جمبه وهو بيكلمك.
وكان يقولك كده علشان عاوزك من الاساس ماتروحش ناحية الشبهات دي.
بس ابوك مازعلش منك. لانه واثق فيك
وعارفك كويس
بس ماكانش عاوزك تروح من الاساس عند يس ده.
اسد:- وهو مش بيرد عليا بقاله يومين تلفونه مش شغال.
فاطمه:- بعد ماكلمك راح الارض يروي
وتلفونه وقع في الميه
اسد:- يعني بالله عليكي ابويا ما زعلان مني ياما.
فاطمه:- قلبي وقلب ابوك راضيين عنك ليوم الدين. يا اسد.
وطول مانت راضي ربنا. ماتخافش من كيد الناس.
اسد :- انا مشيت من عند ياسين ده وقاعد في فندق بقالي يومين.
فاطمه:- ومارجعتش ليه؟
اسد:- بعد ماكلمني ابوي خفت قوي
فاطمه:- طيب هات بعضك وتعال.
اسد:- باذن الله بكره باليل هاركب القطر وراجع.
فاطمه:- ربنا يكتب لك في كل خطوه سلامه
ويردك ليا سالم يا اسد.
…..
في اخر الاسبوع يوم الخميس كانت نانا متعوده تسهر مع صديقاتها. في كافيه في الشيخ زايد.
اتصلو بيها.
وراحت قابلتهم هناك.
وقعدو يتكلمو.
نانا شافت منشور. اسد كان ناشره
كاتب -شعور مؤلم عندما يتعرض الإنسان للغدر والخيانة من أشخاص كان يظنهم مخلصين له كما إخلاصه لهم، ولكن للأسف خاب ظنه فيهم،
لما قرت نانا المنشور
بعتت له رساله عالخاص
وكتبت له:- خير ياصعيدي الكلام ده لمين
رد اسد:- وجع القرايب
نانا:- ومن سمعك. كلنا بنعاني.
اسد:- السهم لما بيصيب من قريب بيكون اصعب
نانا:- ايه بس حصل لكل ده
اسد:- ماتعودتش احكي همومي لحد
نانا:- يا استاذ بطل التعقيد بتاعك ده
وفضفض يمكن ترتاح.
اسد:- ما تشغليش بالك. ان شاء الله كل مر سيمر.
نانا ؛- الا صحيح انت منين؟
اسد :- انا من سوهاج
نانا :- وعندك كم سنه. ؟
اسد:- 24 وانتي؟
نانا :- 23 اصغر منك بسنه.
اسد :- وحضرتك منين. ؟
نانا:- انا من القاهره. بس قولي. انت بتشتغل ايه؟
اسد:- لسه مخلص كليه. وهخلص ورق الجيش وهادور علي شغل.
نانا :- انت مش متجوز؟
اسد :- لاء
نانا:- وانت ايه مجال شغلك. يعني ممكن تشتغل ايه؟
اسد:- دلوقت مافيش وظايف. ومش حابب شغل الارض هدور علي اي شغل
نانا:- طيب لو فيه فرصة شغل قدامي.
هكلمك ايه رايك.
اسد :- متشكر جدا.
نانا :- لا شكر علي واجب.
.
فضلت نانا قاعده مع صديقاتها.
وطلبت شيشه تفاح.
وفضلو يتكلمو.
وبعد شويه. شافت امجد جاي ناحيتهم.
صديقاتها لوجين ومها كانو يعرفوه.
نادو عليه.
قعد امجد معاهم.
وفضلو يتكلمو
نانا. خلصت ورجعت البيت.
كان الوقت متأخر
وكان باباها في البيت مستنيها.
دخلت وقالت مساء الخير
قام سليم وقال بصوت عالي:- كنتي فين لعند دلوقت يابت انتي
نانا:- كنت مع لوجين ومها في كافيه الشيخ زايد
متعودين كل خميس نروح نسهر سوا.
سليم؛- ماينفعش تتاخري كده. الساعه داخله علي واحده
نانا وهي ماشيه علي اوضتها. :- هو ايه اصلو ده
سليم بغضب:-تعالي هنا انا ماخلصتش كلامي. اذاي تسيبيني وتمشي.
نانا:-فيه ايه يا بابا.
سليم:- انتي مش صغيره علشان نعرفك الصح من الغلط
نانا:- وايه الغلط اللي انا عملته
سليم:- رجوعك متأخر ده مش غلط
نانا:- حاضر يا بابا مش هتأخر تاني
فيه حاجه كمان.
سليم:- اتفضلي روحي اوضتك.
………
حسن ابن صابر شاف عيشه طالعه من عند فاطمه
ومروحه. طلع وراها قدام الباب.
وقال :- عيشه استني رايحه فين.
عيشه:- مروحه كنت عند خالتي فاطمه
حسن:- وايه اخبار امك وابوكي
عيشه:- بخير والحمد لله
قرّب حسن منها وبص لها من فوق لتحت
وقال:- كبرتي واحلويتي يا عيشه
بعدت عيشه عنه وقالت :- انا هروح علشان امي ماتعاركنيش
حسن قرب تاني منها وحاول يمسكها من ايدها.
عيشه سحبت ايدها وبصت له وقالت:- ايه اللي بتعمله ده. عيب كده
حسن:- عيب ايه. انتي عاجباني يابت.
عيشه:- ابعد عني ياحسن وحياة ابوك
حسن:- طيب تعالي اقعدي عندينا شويه.
عيشه:- بالله عليك وسع من طريقي عاوزه اروح
حسن:- يابت مالك خايفه من ايه.
عيشه :- مش خايفه بس عاوزه اروح
طلعت من اوضتها بدور. ام حسن
شافتهم.
قالت:- فيه ايه يا حسن
حسن:- مافيش ياما دي عيشه ماشيه قولت اوصلها.
بدور:- وعيشه مش عارفه طريق بيتهم ولا ايه
عيشه:- انا مش عايزه حد يوصلني ابنك هو اللي……
قاطعتها بدور بغضب وقالت:- هو ايه ياعيشه
بلاش الحركات دي. بعدي عن الواد. وبلاش اللي بتعمليه ده
عيشه نزلت دمعه من عينها من القهر
وقالت:- انا كنت عند خالتي ومروحه خليه يوسع لي الطريق
بدور:- طيب امشي واياك تاني اشوفك يا حسن بتكلمها.
مابقاش غير عيشه كمان.
خرجت عيشه زعلانه وبتعيط. وروحت بيتهم
اما بدور فضلت تقول لحسن :- مالك بيها البت دي
حسن:- ماقولتلك قالت لي تعال وصلني
بدور:- ياد استنضف ماتبقاش تافه كده
حسن:- وهو انا هبص لعيشه ياما
خلاص انا قولتلها روحي لوحدك
وانتي طلعتي واهي مشيت.
بدور دخلت علي فاطمه
وقالت:- اسمعي اقولك. خلي بت اختك تبعد عن حسن
فاطمه:- عيشه! مالها عيشه بولدك
بدور:- طلعت لقيتها واقفه معاه قدام الباب
وعايزاه يوصلها
فاطمه:- عيشه عمرها ماتعمل كده
تلاقي ولدك هو اللي رخم عليها.
بدور :- وولدي هيبص علي دي
فاطمه:- بلاش كلامك ده يابدور.
وقولي لولدك مالهوش صالح بيها.
،…..
حسين ابن صابر كان مدمن مخدرات
وبيمشي مع ناس مشبوهه
وكان جابر دايما يحذره
ويحذر ابوه من الموضوع ده
الا ان صابر ما كانش له سيطره علي اولاده
كانت بدور مقوياهم علي ابوهم.
باليل . الحكومه جات في وقت متأخر
تفتش دار اولاد حكيم
صحي جابر واستقبلهم
وقالو ان فيه امر بالتفتيش
وبالفعل قامو بتفتيش البيت.
ووجدو في غرفة حسين مخدرات وحبوب
وخدوه القسم.
فضلت بدور تصوت
وصابر حط ايده علي فمها
وقال لها تسكت ودخلها اوضتها.
وراح صابر وجابر وحسن وراه القسم.
المأمور كان داخل. شاف جابر قاعد
سأله خير يا حاج جابر
جابر قال له علي اللي حصل
المأمور قال:- انت عارف ان البلد في حالة طوارئ
والداخليه مشدده اليومين دول علي السلاح والمخدرات.
وانت راجل قدوه في بلدك.
وماينفعش يكون في بيتك الكلام ده.
جابر:- ما فيش شجره مافهاش فرع مايل يا سيادة المأمور. واللي حصل ده طيش من عيل حمار
مايعرفش ان الاذي بيصيب اللي وراه
بس طالما ابوه ماعرفش يربيه
انا متكفل بربايته
انا لو عندي علم باللي هو فيه
كنت جبتهولك جثه هامده.
لكن الغلط دلوقت مافهوش. ندم.
ادخل مكتبك وخد اجرائاتك.
انا مش هستسمح حضرتك تتوسط له
دا مش من مبادئي.
اللي غلط يتعاقب بالحق والانصاف
المأمور:- بس تعال ماتتعصبش كده
قوم معاي هنشرب القهوه في مكتبي
جابر:-لا اتفضل انت انا هروح اشوف محامي
المأمور:- ياراجل ان شاء الله مش هتحتاج محامي
تعال بس والموضوع هيخلص
صابر باندفاع:- قوم يا جابر
قوم روح مع جناب المأمور
راح جابر معاه وقعدو في المكتب.
المأمور:- اسمك وسمعتك في البلد لو اتعملت قضيه لحسين هتتأثر
جابر:- الناس عارفه من هو جابر حكيم.
وموضوع ولد صابر طيش شباب والناس كلها عارفه اني مارضاش بده
المأمور:- وليه بس تحط نفسك واخوك في الشبهات
جابر:- وايه المقابل يا جناب المأمور
المأمور:- بيعجبني فيك ذكائك
جابر:- انا احب اختصر الحديت واوفر وقت حضرتك السمين.
المأمور:- المقبره اللي في الجبل انت عارف مكانها……..
……
صحيت نانا الصبح.
وراحت الشغل.
دخلت مكتبها. وبعد شويه. امجد جايب بوكيه ورد
ودخل بيه.
نانا:- لمين الورد ده يا امجد
امجد:- الورد للورد. صباح الفل بقي
نانا:- عموما ميرسي بس انا مش شايفه مناسبه يعني
امجد:- اعتبريه ابداء اعجاب
او بمناسبة اننا بنشتغل مع بعض
نانا:- عملت ايه في طلبية اسوان
امجد:- شوف انا بكلمك في ايه. وانتي بتكلميني في ايه
نانا:- امجد انا هنا في شغلي
وشغلي مافهوش مجال للاحاديث الجانبيه
ثم انك ماجاوبتنيش عملت ايه في طلبية اسوان
امجد:- هجهزها واشحنها بعد الضهر
نانا:- وما اتشحنتش الصبح ليه
معاد التسليم بكره
ولازم تتشحن الضهر علشان توصل في معادها
امجد:- ماجاتش من نص يوم تأخير
نانا:- انت مش فاضي رحت تجيب ورد وكلام فاضي. وسايب الشغل
وبعدين انا عمري ماديت كلمه لعميل. واتاخرت عليه
في شغلي مش بأخر حاجه عن وقتها
ارجوك يا امجد اهتم بالشغل.
امجد اخد الورد. وسكت خالص
وخرج علي الشغل
………..
عيشه راسلت اسد وحكت له علي اللي حصل
وقالت له كمان موضوع حسين
اسد:- انا عارف ولاد عمي مش هيجيبوها لبر
اسمعي يا عيشه ماتروحيش عندنا علشان ماحدش يدايقك وخصوصا ان ابويا مش في الدار
واوعاكي تعرفي ابويا باللي عمله حسن وامه
علشان المشاكل
عيشه:- دا احتي خالتي ما قولتلهاش ولا امي والا اي حد. قولتلك انت بس
اسد:- وتعرفيش موضوع حسين ايه تم فيه
عيشه :- ابدا والله هم في القسم. وابوك هناك
اسد:- انا جاي باذن الله باليل.
عيشه:- اسالك سؤال يا اسد!
اسد:- اسألي يا عيشه
عيشه:- انت صوح مش عايز تتجوز من الصعيد
اسد:- الجواز قسمه ونصيب يابت خالتي
واللي مكتوب له شي هيشوفه
عيشه:- بس انت عادي يعني تتجوز من حدانا
اسد:- مش وقته. عاوزه صبر
واللي كاتبه ربنا هو اللي هيحصل.
بعد شويه بعتت نانا رساله ل اسد
اسد رد عليها
نانا:- هي اسوان قريبه منكم يا اسد
اسد:- ايوه قريبه بينها وبينا قنا والاقصر
بتسالي ليه. انتي ليكي قرايب هناك.
نانا:- لا اصل المصنع اللي انا شغاله فيه بيودي شغل هناك
اسد:- انتي شغاله فين
نانا :- مصنع ملابس
اسد ربنا يوفقك يارب
نانا :-ميرسي
اسد:- هقوم انا اصلي العصر علشان مسافر الصعيد. باليل
نانا :- ايه ده ماقولتش يعني انك مسافر
اسد:- حصلت ظروف ولازم انزل
نانا:- دانا كنت هعزمك علي فنجان قهوه
اسد:- قهوتك مشروبه يابنت الاصول
نانا:- تسلم يارب كلك ذوق
اسد:- صليتي العصر؟
نانا :- والله اليومين دول مقصره
اسد:- ماينفعش يا ….. هو اسمك الحقيقي ايه،،،
ضحكت نانا وقالت. نانا. اسمي نانا.
اسد:- يعني في بطاقتك مالكيش اسم تاني؟
استمرت في الضحك وقالت:-لا والله هو نانا
اسد:- عاشت الاسامي
نانا :- طيب لو مش اسمي نانا. تفتكر ايه الاسم اللي تشوفه يليق عليا.
اسد:- جميله
نانا :- بس انا مش جميله دانا حتي سمرا
اسد:- الوصف للطبع مش للشكل
اللون ده مالوش اي علاقه بالجمال
نانا :- ميرسي لذوقك اوي يا اسد
واول ماتوصل طمني عليك.
وبأذن الله اما ترجع لازم نتقابل
اسد:- ان كان في العمر بقيه ان شاء الله
…….
رجع اسد البيت.
فاطمه حضنته وكانت فرحانه جدا برجوعه
ولما سألها عن جابر
قالت له الفجريه. جاب حسين ابن عمك وطلعه مالقسم
ومن ساعة مارجع. وهو متدايق وزعلان
والصبح طلع عالغيط.
اسد:- ما قالش ايه مزعله
فاطمه:- مانت عارف ابوك. مابيحكيش اوجاعه
اسد:- بس عمرك ما سالتيه عن حاجه وخبي عليكي
فاطمه:- وعمري ما سألته لما بيكون باين في عنيه انه مش عايز يقول.
اسد :- طيب هروح انا الغيط اشوفه
خرج اسد. وهو طالع كانت هناء. اخت بدور داخله الدار
سلمت عليه وقالت. :- ازيك يا اسد. وه يا اسد.
بقي تعمل كل ده في مصر يا شقي وهنا باين عليك انك بتتكسف قوي
اسد:- منه لله اللي عمل فيا المقلب ده.
هناء وقد اقتربت منه:- وفيها ايه يا اسد انت شباب ومافيش منك اتنين ومن حقك تعيش شبابك.
اسد ابتعد وخرج وقال:- ربنا يهدي.
خرجت بدور كان اسد ماشي
وهناء اختها بتبص عليه
قالت بدور:- مالك ياملكومه بتبصي علي مين
هناء:- كيف الواد ده لعند دلوك ماتجوزش
بدور :- واد مين
هناء :- اسد ولد جابر.
بدور :- دا في مصر مش هنا.
هناء:- لا وصل واهو لسه طالع. يابختها اللي هتاخد الواد ده.
بدور :- دا عيل خجلان وخايب
هناء:- بس اسد اسد.
بدور :- والله انتي ماحد قدك. تعالي ادخلي افطري معانا. …
وصل اسد الغيط
شاف ابوه قاعد حاطط ايده علي خده.
وطي عليه اسد باس دماغه
ومسك ايده باسها
انتبه جابر ليه. فضمه وفرح برجوعه.
اسد:-سامحني يابوي. اقسم بالله ماعرف ان يس هيعمل كده.
جابر بابتسامه:- الانسان يا اسد لعند مايموت وهو يتعلم. والمواقف بتبين كل غامض
والمثل اللي بيقول اللي يعيش ياما يشوف.
له تكمله
واللي يلف يشوف اكتر.
اسد:- فعلا والله يابوي.
جابر:- بس هقولك حاجه. لو انت سايق عربيه
والطريق قدامك مستقيم وممتد.
ولفيت الدريكسون لفه بسيطه خالص. بعد مسافه هتلاقي نفسك خرجت عن الطريق.
كذلك الذنوب. ان استصغرتها. واتهاونت فيها.
بعد فتره. هتوقع في المعاصي
اسد ربنا يبعدنا عنها يابوي
الا قولي يابوي عملت ايه في موضوع حسين
وطلعوه اذاي؟
جابر:- المأمور ساومني يا اسد.
وطلع حسين علشان متتعملش ليه قضيه وتبقي نقطه سوده في تاريخنا. مع اني متاكد ان هو والعمده ورا الموضوع ده
في مقابل اني ادله علي مكان مقبرة بير الجوادي
اسد:- مش دي اللي تاه فيها الراجل اللي حضرنا صلحه من قريب.
جابر:- ووعدت ابنه اني هوديه يشوف جثة ابوه.
اسد:- وهتعمل ايه؟
جابر:- هودي المأمور. وطمعه هيغرقه
اما ابن الراجل قلبه هيرتاح
اسد:- مش فاهم يابوي
جابر :- بكره عاوزك تروح لابن الراجل.
وتجيبه وتاجي بير الجوادي. الضهريه
ومن غير ماحد يعرف
اسد:- حاضر يابوي
جابر:- وانا هقوم اروح للمحافظ عايزه في موضوع……..
…….
