رواية الوعد والرحيل الفصل السابع 7 بقلم حمدي محمد
رجعت نانا من السفر
كان في استقبالها امجد في المطار
وركبت معاه السياره
ورجعت عالبيت.
كانت نبيله مجهزه الغدا.
وكان سليم عند اروي. مراته التانيه.
نبيله حطت الاكل عالسفره
وقالت ل امجد يلا الغدا جاهز
اما نانا دخلت اوضتها
نبيله دخلت اوضتها علشان تناديها للغدا
نانا رفضت
فضلت نبيله تقولها عيب كده. امجد قاعد بره
ماينفعش يتغدا من غير ماتقعدي معاه
نانا:- اقعدي معاه انتي. انا تعبانه وعايزه انام
خرجت نبيله. وقعدت مع امجد علي الغدا
وقالت له:- عاملين ايه في الشغل انت ونانا يا امجد
امجد:- كل شي تمام. بس نانا مش عارف مالها كده ما عادتش زي زمان
نبيله:- اعذرها يا احمد. الظروف اللي مرت بيها.
خلتها تكون جد وعمليه
ماعادتش تضحك وتهزر زي زمان
امجد:-المفروض انها ارتاحت وكبرت المشروع
وانا جيت اشيل عنها لازم ترتاح وتبص لنفسها
نبيله:- حاول بس انت. تعزمها اما تكونو فاضيين
وتتقرب منها اكتر
امجد:- مانا بعمل كده والله يا طنط. بس هي اللي مش مديه اهتمام
نبيله:- خليك وراها لعند ما ربنا يهديها.
،….
نانا بعتت رساله ل اسد
بتعرفه فيها انها وصلت
اسد رد:- حمدا لله علي سلامتك
نانا :- الله يسلمك. عامل ايه
اسد :- الحمد لله بخير
نانا:- اسد هو انت اما قولتلي ماتشتغليش وانك ممكن تساعدني كان بجد ؟
اسد:- ايوه اقسم بالله بجد.
نانا:- من غير ماتعرفني عايز تساعدني كده
اسد:- لسه الدنيا بخير. والناس للناس
نانا:- عارف انك عمله نادره
اسد:- ربنا يخليكي دا من ذوقك.
نانا:- لا بجد. انت راجل بمعني الكلمه
بتصلي. ومش بتسمع اغاني
في البيت مش عندكم تلفزيون
مش بتسهر علي كافيهات
مش بتلبس بناطيل مقطعه
قصة شعرك عاديه مش بتقص قصات شبابيه
مثقف. واخلاقك جميله
وابن ناس طيبين.
وشهم. وعندك حاجه كده مش عارفه اوصفها
بس انا ساعات بخاف منك. وانا مش قدامك اصلا
يمكن دي اللي اسمها الهيبه.
اسد:- كل ده يا نانا بقي عمله نادره؟.
الحاجات الطبيعيه في الزمن ده بقت اختلاف
نانا:- تصدق اه. لان اليومين دول الشباب بقو حاجه فظيعه
كل همهم الشكل والمنظر والفلوس.
انما انت. انت غيرهم يا. انت غيرهم
اسد:- يا ايه؟
نانا:- لا مافيش اصل حضرتك قولت لي قبل كده ان الصداقه عمرها ماتخلي الواحد يقول للي قدامه الكلام ده.
اسد:- اااااه. هو ده سبب انك قفلتي وزعلتي المره اللي فاتت
نانا:- اسالك سوال؟
اسد:- اسالي
نانا:- هو انا بجد ممكن اتحب
اسد:- الحب مافهوش ممكن لأنه مش بادينا. يعني مش اختيار
الحب اكيد. لان القلب لما يحسه. مش بيكدب
لما الانسان مثلا يشوف حد. وقلبه يخفق. ويدق
ده هو الحب
الانسان لما بيلاقي روح بتشبهه وتسكن جواه من اول نظره هو ده الحب
مش بيكون اختيار. ولا له مسببات.
حاجه كده زي القدر.
نانا:- يعني الشكل واللبس مش بيأثرو
اسد:- الروح هي الاهم
اللي بيحب. بيحب الروح.
الشكل واللبس دول قابلين للتغير
اما الروح دايما ثابته
نانا:- طيب انت عمرك حبيت؟
اسد:- كتير
نانا:- اه كويس كويس جدا يا استاذ
قلبك كبير و…..
قاطعها اسد
وكتب:- حبيت ابويا جدا
وامي كتير
والزرع. والخيل. والنيل.
وحبيت القمر في اكتماله
وحبيت الجبل والوديان
حبيت اليل.
حبيت السهر
حبيت كتير لان القلب اللي مش بيحب
قلب قاسي
نانا:- امممممم. طيب انت حبيت حد قبل كده. وحده يعني؟
اسد:-لا والله عمري
نانا :- خالص خالص لعند اللحظه دي
اسد:- السؤال ده ليكي
نانا:- جاوب انت الاول
اسد:- السوال ليكي انتي مالصبح تسالي
نانا:- هو حصل قبل كده اني حبيت واحد اصغر مني في السن
وبابا كان رافضه جدا
بس انا اللي كنت متمسكه بيه
وكنت هقف قدام بابا علشانه
لولا انه ظهر علي حقيقته قبل مانا اعمل كده
واظهر طمعه وبين اللي جواه
اسد:- واتعلمتي حاجه من اللي حصل لك ده؟
نانا:- كتير طبعا.
ومن ساعتها وانا حريصه في اني ادخل حد حياتي
الا قولي. انت جاي القاهره امتي
اسد:- بإذن الله يوم الجمعه الجايه
اتصلو عليا بتوع معمل التحاليل.
وهستلم شغل من السبت باذن الله
نانا:- تمام اول ماتوصل عرفني.
اسد:- ان شاء الله،. مش عايزه حاجه من الصعيد اجبهالك
نانا:- اه هات لي اسد.
اسد:- هههههه مش هتخافي يعني
نانا:- انت تطمن ماتخوفش يا اسد
اسد:- متشكر جدا.
نانا. :- ابعت لي صورتك بالجلابيه
اسد:- بكره ان شاء الله
نانا :- لاء ناو
اسد ؛- حاااضر
……
في دوار العمده عوض
اكرم ابن العمده قابل ناس لابسه بدل.
وجايين في عربيه جيب سودا
وعايزين يقابلو ابوه العمده
راح اكرم نادي علي ابوه
اول عوض ما شافهم فضل يرحب بيهم
ويقول نورتنا يا نسر بيه. نورت يا مهاب بيه
ودخلو غرفه وقعدو يتكلمو
النسر:-عملت ايه ياعمده في موضوع ارض الحكايمه
العمده:- امبارح كان الاتفاق انهم هيسرقو العقود
ولعند دلوك ما ردوش عليا.
مهاب:- وبعدين معاك ياعمده
انت بتتعامل مع النسر بيه. يعني لازم دقه في كل حاجه
العمده:-هبعت اكرم ابني يناديهم واكيد العقود هتكون معاهم.
وبالفعل. ، راح اكرم نادي صابر وابنه حسين.
ودخلو الدوار. وقعدو معاهم.
العمده:- عملت ايه يا صابر في موضوع العقود
صابر:- والله قلبنا البيت كله ودورنا في كل شبر فيه ملقيناش العقود
مهاب:- يعني ايه
صابر:- يعني للاسف مش هنقدر نوفر عقود الارض
النسر:- طيب انا بقي بطريقتي هعرف اذاي اجيب عقود الارض
والفلوس اللي خدتوها ترجعوها.
وانصرف مهاب والنسر
وفضل العمده يقول لصابر:- فيه حد يضيع من ايده فرصه زي دي
دي الفرصه ما بتجيش الا مره وحده
صابر:- يعني انت ماخابرش جابر اخوي يا عوض
دا روحه في الارض وعمره ما هيفرط فيها
العمده:- والله انا كنت عاوز مصلحتك
وكده كده النسر هياخد الارض
لان الراجل ده مافيش حاجه صعبه عليه
وعموما مالكمش في الطيب نصيب
فين بقي الفلوس اللي اخدتوها
صابر؛- هو في الحقيقه احنا مش معانا دلوك غير نص الفلوس
واتصرفنا في النص
وان شاء الله ادينا فرصه ن……
قاطعه العمده:- يا وقعتك سوده يا صابر
انت خابر الراجل ده ممكن يعمل فيك ايه
صابر:- يا عم عوض خليك محضر خير
وعلشان تتطمن
انا ممكن امضيلك وصل امانه بالمبلغ
العمده:- شوف يا صابر انا علشان بعزك ومش رايد لك المشاكل. همضيك علي وصل الامانه
وقدامك سبوع
لو مارجعتش الفلوس
هتنسجن. وانت راجل كبير مش حمل البهدله
الا اذا …..
حسين:- الا اذا ايه ياعمده؟
العمده:- الا اذا لقيتو طريقه تجيبو بيها العقود
يبقي طاقة القدر انفتحت لكم.
ووصل الامانه تاخدوه. وتاخدو كمان ملايين تمن الارض،،،
نادي العمده علي اكرم. وطلب منه يجيب وصل امانه
ومضي صابر عليه. وخد حسين ابنه ورجعو علي الدار …
…صحي اسد يوم الجمعه الصبح.
وطالع من غرفته
شاف هناء اخت بدور
وكانت داخله من الباب.
شافته خلعت عنها العبايه.
وكانت لابسه تحت العبايه فستان ضيق
وبنص كم.
وكانت هناء بيضه جدا. وجسمها مليان
وعنيها واسعه. وسحبت الطرحه شويه بان شعرها اللي زي الحرير.
وبصت ل اسد من فوق لتحت.
وقربت منه. ومدت ايدها تسلم عليه.
اسد مد ايده وسلم.
قالت هناء:- ايدك ناشفه قوي يا اسد.
اسد:- اه من شغل الارض
هناء:- عارف لو ما كنتش متجوزه. ماكنتش سبتك
سحب اسد ايده وقال:- الحمد لله انك متجوزه
هناء:- ياد انت مالك كده مالكش في صنف النسوان
اسد:- هيكون ليا بعد ما اتجوز طبعا. في الحلال.
هناء:- طيب عاوزه منك خدمه
اسد:- خير
هناء:- عندي الريسيفر عايز يتزبط
تجيلي البيت تظبطه
اسد؛- انا مسافر القاهره النهارده.
وماعنديش وقت
هناء:- اما ترجع. انا مش مستعجله. المهم يتزبط
خرجت بدور. شافتهم.
قالت:- جيتي امتي يا هناء
هناء عدلت الطرحه. ولبست العبايه
وقالت؛- لسه داخله بسلم علي اسد.
انصرف اسد.
ودخلت هناء مع بدور
قالت بدور:- كان يقولك ايه الواد ده
هناء:- ياريته يعرف يقول. دا خايب خالص
بدور؛- ماهو رباية العقرب امه
هناء:- هي كده ماتكملش
بدور:- هي ايه؟
هناء:- هااااه. لا مافيش قومي هاتيلي افطر علشان رايحه المركز اشتري رسيفر القديم باظ
باليل. اسد اخد شنطة هدومه.
وعرّف ابوه وامه ان فيه شغل.
وابوه اخده وراح معاه للمحطه.
وودعه ورجع البيت.
نزل اسد القاهره.
ونزل علي الفندق اللي بينزل عليه.
نام اسد
وفي الصبح لبس القميص والبنطلون.
وراح علي معمل التحاليل.
اول مادخل. سال عن الدكتور
ودخل عنده المكتب
واتعرف عليه.
الدكتور نادي علي موظفه اسمها. فاتن.
وقال لها. ان اسد هيشتغل معاها وطلب منها تعرفه الشغل
فاتن اخدت اسد ودخلو المعمل.
وفي المعمل كان فيه بنت تانيه زميله ليهم
اسمها علياء.
اول ما علياء شافته
قالت لفاتن:- من المز ده
فاتن:- ده اسد
علياء:- جدا
ضحك اسد وقال ممكن تعرفوني الشغل بيمشي اذاي
فاتن:- ومستعجل علي ايه بس. مش اما نتعرف علي بعض الاول.
علياء:- اول حاجه الحقني وقول ، انت متجوز ، خاطب، مرتبط،
اسد:- لا لسه
فاتن:- يابركة دعاكي ياما
اسد:- يابوي خلصوني ووروني الشغل
علياء:- وكمان صعيدي.
فاتن:- بس يابت انتي. تعالي يا اسد هنا عند الميكروسكوب كده.
اقترب اسد من الميكرسكوب
وحاوطوه هم الاتنين وحده علي اليمين
والتانيه علي الشمال
وفضلو يبصو عليه من فوق لتحت وهو بيبص في الميكروسكوب
وعلياء مررت صوابعها بين خصلات شعره الناشف.
اسد رجع بسرعه واتخض
وبص لهم وقال بصوت عالي:- وبعدين معاكم.
احنا هنشتغل هنا مع بعض
يعني نتفق من الاول.
انا ماحبش حد يلمسني نهائي.
واللي بينا يا ريت يكون في حدود الشغل وبس.
اعتبروني اخوكم الكبير.
وياريت نقدر بعض
خافو هم الاتنين. من اسد.
وفضلو يعرفوه طريقة الشغل
ويدوه عينات. ويشتغل عليها
وفي اخر النهار. كان اسد عارف كل حاجه
لأنه كان زكي جدا.
وذاكرته قويه.
بعد ما خلص اول يوم شغل.
سالوه ساكن فين
اسد قال لهم انه ساكن في فندق مؤقتاً علي ما يلاقي سكن.
فاتن قالت له. :- وليه فندق. ، ماتسكن في الدور الرابع مع الموظفين المغتربين.
اسد وافق
وراح جاب هدومه.
وسكن في نفس العماره اللي فيها المعمل.
وكان في الشقه معاه. اتنين
واحد اسمه احمد. ممرض.
والتاني. حازم. تمرجي.
اتعرف عليهم.
وساعدوه في ترتيب غرفه ليه
وارتاح معاهم
وباليل مسك اسد تليفونه.
شاف رسايل كتير من نانا.
رد اسد. وحكالها كل اللي حصل.
نانا:- يااااه دانت تعبت اوي النهارده
اسد:- ولا تعب ولا حاجه. الحمد لله الشغل كويس
نانا:- وشغلك من امتي ل امتي؟
اسد:- من تسعه الصبح. ل تسعه باليل.
نانا :- يااااه كتير اوي
اسد:- ولا كتير ولا حاجه. كده كده السكن فوق الشغل يعني مش هركب مواصلات ولا حاجه.
نانا:- وعندك يوم اجازه؟
اسد:- اه الجمعه.
نانا :- يعني مش هتكون فاضي الا الجمعه الجايه،؟
اسد:- باذن الله
نانا؛- خلاص بقي الجمعه نتعشي سوا. انا عازماك
اسد:- لا طبعا. لو هنتعشي يبقي انا اللي اعزمك
نانا:- ليه بقي ماحنا واحد
اسد:- عيب اما يكون راجل وست والست هي اللي تحاسب
نانا:- هو ايه ده. لا طبعا. انت بتجيب القوانين دي منين
اسد:- هو كده بقي يا اما مش هنتعشي
نانا:- يادي المخ الصعيدي
اسد:- ومالو المخ الصعيدي
نانا :- عسل وسكر طبعا. الا قولي
هم هيدوك كم مرتب
اسد:- مش عارف والله لسه ماتكلمتش معاهم في التفاصيل دي.
نانا:- اذاي ده. مش لازم يكون فيه اتفاق
اسد:- انا لسه جديد وبيعتبروني اول شهر ده تحت التدريب
ماينفعش اتكلم معاهم في حاجه زي دي
وبعدين بيني وبينك. انا مش فارق معايا.
كويس اني اتقبلت اصلا
ماحدش اليومين دول لاقي شغل.
انتي اخبار شغلك ايه
نانا:- انا مارحتش النهارده ولا امس
اسد:- ليه بس كده. ما ينفعش.
كنتي رحتي شغلك علشان مايحصلكيش مشاكل.
نانا:- مافيش مشاكل ولا حاجه.
اسد:- طيب كنتي عرفتيهم في الشغل.
نانا :-ما تشغلش بالك انت
المهم خلاص اتفقنا عالجمعه
اسد:- باذن الله…
تاني يوم اسد نزل الشغل
وفضل يعمل كل العينات بنفسه
وفاتن وعلياء يحاولو يشتغلو
اسد يقولهم سيبوني اخد عالشغل وارتاحو انتو
في خلال يومين كان الدكتور مايكل
متابع لشغل اسد وتفانيه في العمل
وقبل نهاية الاسبوع
كان اسد هو اللي بيدير المعمل بالكامل.
الدكتور مايكل قعد مع اسد
وقال له :- اسد انت عبقري. وعملي.
وفيه عقد عمل في الكويت. ببلاش
وهتشتغل في وزارة الصحه هناك.
وبراتب عالي جدا. اضعاف اضعاف اللي هتاخده هنا
فكر في الموضوع
ويوم الاحد الجاي تديني خبر.
اسد اتشكر له. وقاله ان هيعرض الامر علي اهله
ويرد عليه يوم الاحد.
في يوم الجمعه الصبح.
صحيت نانا علي صوت تليفونها بيرن
ردت نانا.
كان المتصل. داليا. سكرتيرة مكتبها.
وقالت لها. ان طلبية اسكندريه رجعت.
نانا قالت بصوت عالي:- اذاي ده.
دي عمرها ماحصلت.
مين اللي شحن الطلبيه دي
داليا بتوتر؛- نانا. انا ماعرفش هو المفروض الطرد طلع بدال طرد تاني
نانا بصوت عالي:- ايه الهبل ده.
انا جايه حالاً
لبست نانا فستان لعند الركبه وبكم. ولونه اخضر مشجر
وسرحت شعرها.
وحطت الميك اب.
ولبست كعب عالي.
ونزلت خدت سيارتها. وراحت بسرعه عالمصنع.
اول ما وصلت ونزلت المخزن. كان كل الموظفين هناك.
سألت مين اللي شحن الطلبيه دي
داليا قالت لها امجد.
نانا قالت هو فين. ؟
داليا قالت لسه ماجاش
صرخت نانا وقالت:- هو ايه اصلو ده
الشغل بيبدء سبعه
ودلوقت الساعه عشره
اتصلي عليه بسرعه وخليه يجي حالا
جريت داليا عالمكتب واتصلت عليه
ورجعت قالت لنانا. انه جاي في السكه
نانا انتظرت لعند ما امجد جه.
قالت:- انت متأخر ليه؟
امجد. ماينفعش نتكلم قدام الموظفين وانتي متعصبه كده.
يلا يا جماعه كل واحد يرجع شغله.
نانا بغضب؛- ماحدش يتحرك من هنا.
وماتاخدوش اوامر غير مني انا.
امجد:- فيه ايه يا نانا. ماتهدي.
نانا:- موضوع التأخير ده هنتكلم فيه بعدين
مين بقي اللي شحن البضاعه دي
امجد بص للبضاعه وقال انا.
نانا فتحت الطرد وقالت:- وهي دي مش طلبية المعادي
امجد:- ااااااه. معلش. يبقي كده اتبدلت بالغلط
نانا:- انا مافيش مجال للغلط عندي
من ساعة ما فتحت المصنع. والحاجه دي عمرها ما حصلت.
ومش مستعده اسمح لشغلي ان يحصل فيه غلط بأي شكل من الاشكال.
امجد:- يا نانا بسيطه هنرجع طلبية المعادي ونشحنها علي اسكندريه.
ونودي الطلبيه دي المعادي.
نانا:- اللي حصل ده علشان اول مره
هييبقي عقابه خصم خمس ايام لكل موظف في المصنع…
واحد من الصنايعيه قال:- يا استاذه احنا علي امكاين بتاعتنا مالناش صالح بالتوزيع والشحن
نانا:- السيئه تعم.
وما فيش تراجع. واللي مش عاجبه يتفضل يمشي
انا مش هسمح بأي شكل ان شغلي يبوظ
داليا:- طيب اهدي وتعالي مكتبك. وكل اللي تقولي عليه هيتنفذ.
بصت لها نانا.
كملت داليا وقالت:- خلي كل واحد يروح علي شغله ويلا تعالي
نانا:- يلا كل واحد علي شغله
ولو اي حد شاف غلط تاني
يعرفني. علشان ما يتجازاش بذنب غيره.
وراحت نانا مكتبها.
ورفضت ترجع البيت لعند ما الطلبيات تتبدل
وتروح مكانها الصح.
اسد لبس البدله في يوم اجازته.
ونزل
وهو نازل كانت علياء وفاتن في المعمل
شافوه وندهو عليه.
وفضلو يسالوه. عن وجهته. ورايح فين وهيقابل مين
اسد فضل يضحك ويقول موعد غرامي
اتدايقو جدا.
بس علياء قالت له .- فيه شغل كتير ومحتاجينك النهارده
اسد رفض وقال النهارده اجازتي
وانتم اجازتكم بكره.
فاتن:- طيب خدني معاك اشوف اللي هتقابلها
اسد:- انا رايح لحد صاحبي مش رايح موعد غرامي.
اهدو بقي وشوفو شغلكم يلا ماتعطلونيش.
اسد بعت رساله ل نانا.
نانا كتبت له:- اسد انا حصلت معايا مشكله في الشغل النهارده
واضطريت اروح
هكتب لك العنوان. تجيني الشغل ونخرج سوا
اسد:- تمام اكتبي العنوان
خرج اسد ووقف تاكسي
وقاله العنوان.
ووصله.
نانا قالت له ادخل العماره واطلع الدور التاني هتلاقيني
العماره كانت عباره عن مخزن في السرداب
والدور التاني مكتب
وباقي الادوار فوق. للتصنيع
صعد الدور التاني
ودخل قابل داليا.
داليا شافته اعجبت بيه. وقالت له اؤمر يافندم
كان اسد ماسك التلفون وبيكتب لنانا. انا في المكتب
خرجت نانا من المكتب
ودي كانت اول مره يشوفو فيها بعض
اسد اول ما شافها. فضل سرحان فيها اكتر من عشر ثواني
كانت نانا قلبها بيدق بسرعه
وعنيها في عنين اسد
وطايره من الفرحه
اسد فضل يبص في عنيها. وبفراسته
شاف فيها الطيبه. والبرائه.
ولما ركز في فستانها
صرخ فيها
وقال:- ايه ده يا نانا. ايه اللي انتي لابساه ده
اذي تيجي شغلك بالشكل ده.
معقول فيه كده.
والله دا عيب ده.
انا ماشي يا استاذه. انتي لا شبهي ولا لوني.
ايه ده.
داليا بصوت عالي:- انت ايه اللي بتقوله ده.
اطلع بره يامتخلف
بص لها اسد وقال :- لولا انك بنت. كنت عرفت رديت عليكي
نانا واقفه مصدومه.
وعنيها رغرغت.
داليا جريت عليها وقالت مين المتخلف ده
نانا بصوت خافت قالت بصعوبه:- ماتقوليش عليه كده.
وحست نانا بدوخه وفقدت توازنها.
وكانت هتقع لولا ان داليا سندتها.
وقعدتها علي الكرسي
كان الكل سمع الصوت العالي
وجريو ناحية المكتب
كان اسد مشي
ونانا عالكرسي تعبانه
والكل واقف يبص لبعضه ومش فاهمين حاجه
وامجد جه. بسرعه وسال فيه ايه
داليا قالتله
خرج بسرعه امجد علشان يلحق اللي عمل فيها كده
…….
