رواية الوعد والرحيل الفصل الحادي عشر 11 بقلم حمدي محمد
الحاج اسماعيل لم كبار العيله
وضغطو علي صابر علشان يتصالح
في مقابل ان اسد يخرج ويقسم الميراث معاهم.
اسد وافق وكان عايز يخرج بأي طريقه وخصوصاً بعد ما سمع ان عمه واولاده طردو فاطمه من البيت وراحت بيت والدها الشيخ نور الدين
وبوساطه من العمده تم الصلح
وخرج اسد.
واخده الحاج اسماعيل وراحو علي طول علي دوار العمده
وحضر صابر واولاده.
العمده قال :- اذا كان الورث هيعمل مشاكل بينكم.
يبقي نخلص منه. وكل واحد ياخد حقه
بشرع الله
وانتو اهل بعض. وكل شي بينكم لازم يتم في هدوء وبدون مشاكل.
والقسمه بينكم مش صعبه.
اللي هيتم ان اسد ياخد البيت
وصابر واولاده ياخدو الارض. وبكده يبقي كل واحد راح لحاله.
اسد:- انت يا عمده في كلامك بتقول شرع الله
وفي قسمتك بتحكم بشرع هواك.
العمده:- اتكلم بادب يا اسد.
الحاج اسماعيل:- واسد ما قلش ادبه عليك يا فضل
دا بيوعيك ويعرفك اللي انت مش عارفه ولا فاهمه
كلام اسد صوح.
قسمة ايه اللي بتحكم بيها دي
شرع ربنا بيقول ورث الاب يتقسم علي الابناء بالتساوي
هل انت حسبت قيمة الارض. وحسبت قيمة البيت
ولقيت القيم متساويه. فقولت ان اسد ياخد البيت وصابر ياخد الارض
العمده:- يا حاج اسماعيل انا هدفي نبعدهم عن بعض علشان المشاكل
طول ماهم في بيت واحد مش هيبطلو شكل مع بعض
صابر:- انا عيالي عايزين يتجوزو
والبيت مش هيكفينا كلنا.
ناخد الارض انا وعيالي
ونسيب له البيت.
اسد:- ولو خدت الارض انت وعيالك هتحافظو عليها؟
وبعدين انت تعرف اصلا. الارض اللي ورث من جدي. والارض اللي اشتراها ابوي وضمهم علي بعض
حسين:- اهو هيطلع ابوه شاري الارض علشان يقول مالكمش فيها. الضلالي ده.
اسد وقف وقال بصوت عالي:- اسمع اقولك ياد انت. موضوع الورث اللي بتحكو فيه ده ولسه ما عداش علي موت عمك سبوع مش جديد عليكم. لأن ده انا كنت متوقعه منكم وعارف انكم ما تعرفوش العيبه.
وحقكم هتاخدوه. لا زايد. ولا ناقص.
اما موضوع طرد امي من البيت في غيابي ده
ورحمة ابويا. ما هعديه ولا هسامح فيه يا قليل الربايه
العمده:- بس يا اسد وحد الله اومال
وانت يا حسين كلام ايه ده ياخي
عيب كده مايصحش
دي مهما كانت مرات عمك وما ينفعش تعملو معاها كده.
الحاج اسماعيل:- اسمعو اقولكم. كلمتين ابرك من جرنال. كتر الحديت مالهوش عازه واصل.
جابر اشتري فدانين وضمهم علي ارض ابوه
وعقودهم موجوده وانا شاهد عليها
يعني الاربع فدادين نصهم ورث. ونصهم ملك اسد عن ابوه.
وانا قيمت فلوس الفدانين.
وقيمت فلوس البيت.
اللي هياخد الارض. يدفع للي هياخد البيت نص مليون جنيه.
قولت ايه يا صابر ؟
صابر:- انا مش معايا فلوس. دانا عليا وصل امانه هتسجن بسببه مش قادر اسدده.
الحاج اسماعيل:- قولت ايه يا اسد؟
اسد:- انا موافق يا حاج اسماعيل
بس المبلغ مش هقدر ادبره كله مره وحده.
الحاج اسماعيل :- اعتبرو المبلغ عندي
بكده اسد هياخد الارض و…..
قاطعه العمده اللي كان باين عليه الغيظ
وقال:- يا حاج اسماعيل اللي يحكم ما يجيش مع حد ضد حد. وانت بالطريقه دي متحيز ل اسد
اسد؛- وهو حكم الحاج اسماعيل مش جاي علي هواك ليه يا عمده.
ماهو حكم لهم بالبيت ونص مليون جنيه.
بالعدل مش بالبركه كده.
وهم موافقين. انت ايه اللي مزعلك
العمده:- مزعلني انكم جايين عليهم وانا ما يرضنيش الظلم.
ولازم تسيبوهم يتشاورو ويفكرو. وبعدها نبقي نعقد جلسه تانيه
اسد:- شوف يا عمده. مهما تعمل. ومهما تحاول
اللي في دماغك مش هيحصل
واللي بتخطط له عمره ما هيتنفذ
وطول مانا عايش مافيش رجل غريبه هتعفص ارضي
ثم نظر اسد الي عمه وقال:- هسيبك مع العمده
علشان بعد ما امشي هيصرخ فيكم ويقولكم انتو اتجنيتو. هو احنا بنخطط من زمان علشان الارض
وانتو في لحظه عايزين تضيعوها
وهتقولوله ياعمي انكم مش معاكم فلوس
هيرد عليكم ويقولكم انا ادفع من مليون لمية مليون
وهيخليكم المره الجايه تصممو علي موضوع الارض
والغلبه للي نفسه طويل
وبينا حسابات كتير هتتصفي
بس الصبر.
وخرج اسد. ومعاه الحاج اسماعيل
وفضل صابر واولاده والعمده.
حيث ان العمده بعد خروج اسد والحاج اسماعيل
بالفعل فضل يصرخ في صابر واولاده ويلوم فيهم
راح اسد والحاج اسماعيل دار الشيخ نور الدين
وشافو فاطمه قاعده حاطه ايدها علي خدها
ودمعتها نازله
شافها اسد بالشكل ده. واعصابه تعبت. وزعل من نفسه جدا.
وقرّب منها ومسك ايدها وباسها
وقال:- صحيح ابويا مات ياما.
لكن اقسم بالله ماخليكي تفكري انك من بعده اتهنتي
لأني طول مانا عايش ما هيتكرر اللي حصل ده تاني.
قومي بينا ياما علي بيتنا.
الحاج اسماعيل:- يا اسد خلي امك تقعد كم يوم هنا. اعصابها ترتاح وبعدها تبقي تروح
اسد:- وديني وما اعبد. امي ما تبات غير في بيتها.
واخد اسد فاطمه ورجع البيت.
ودخل وفتح الباب.
كانت قاعده بدور مرات صابر. واختها هناء
شافو اسد عنيه بتطق شرار. خافو
ودخلو اوضة بدور.
دخل اسد ووصل امه لأوضتها ترتاح.
وقفل الباب وطلع قعد في ساحة الدار.
وماسك عصاية ابوه في ايده.
خبط الباب قام اسد فتح.
كان علي اب عمهم.
رحب اسد بيه. وقعد معاه يتكلمو
راحت هناء اخت بدور عملت شاي وخرجت بيه
اسد بص عليها لقاها بتبص علي عنيه
قام خد منها الشاي
ودخلت الاوضه
وفضل اسد وعلي قاعدين
علي بيقول ل اسد. انه افتكر حاجه كان ناسيها
اسد سأله افتكرت ايه يا علي
علي قال:- ساعة الحادثه. لمحت في المرايه وانا ببص وراي في العربيه الجيب.
واحد كده تخين وابيضاني
وشعره خفيف ومتسرح وفيه شعر ابيض خفيف في راسه
ولابس نضارة نظر
اسد:- واذاي شفته من المرايه يا علي
علي:- اصله كان مطلع دماغه من باب السياره
وبيبص وراه.
وبعدها جه باقصي سرعه
ورمي عليا بالسياره خلي السياره اتقلبت بينا.
وهم بيتكلمو دخل صابر واولاده.
شافو اسد وعلي قاعدين. خافو من اسد
ودخلو اوضتهم.
علي فضل قاعد مع اسد. وبعدين قام يمشي.
طلع اسد وراه لعند الباب.
وهو راجع اتصدم ب هناء اخت بدور.
قالت له:- شد حيلك يا اسد
اسد قال لها :- الدوام لله تعيشي
هناء:- باين عليك هفتان ومش بتاكل كويس
ما تيجي اعشيك. عامله حمام النهارده
اسد ابتسم وقال :- كتر خيرك بس ماينفعش اللي بتقوليه ده
هناء:- وليه يعني خايف علي نفسك مني
ولا خايف عليا منك.
اسد:- خايف من ربنا عليا وعليكي
هناء :- مسيرك هتدوق اكلي يا اسد. وخليك فاكر
اسد:- طيب شرفتي يا خاله هناء
هناء:- علي فكره انا اكبر منك بخمس سنين بس.
ومش مقبوله منك يا خالتي دي.
وهم واقفين كانت عيشه وامها جايين يزورو فاطمه
وشافوهم واقفين علي الباب بيتكلمو.
هناء شافتهم مشيت علي طول
وام عيشه سلمت علي اسد ودخلت اوضة فاطمه
اما عيشه وقفت تلومه بنظراتها اللي كلها غيره
بس اسد ماقبلش منها انها تبص له بالطريقه دي
وقال لها:- خشي عند خالتك ماتوقفيش كده. وخرج اسد راح الغيط
قعد اسد وطلع تليفونه. واتصل بنانا
فضل اسد يحكي لها كل حاجه
ويفضفض لها بكل اللي جواه.
كانت نانا بتحب تسمعه. وتشاركه احزانه قبل افراحه
وكان اسد يطلب نصيحتها
لكنها كانت مش علي درايه بأمور الصعيد والورث وكل الحاجات اللي بتحصل مع اسد.
بس لطبيعتها المسالمه قالت له طيب ما تسيب الحاجات اللي عليها مشاكل دي يا اسد وتبعد عن الوش ده.
بمعني انك تشوف هم عايزين ايه. وتعالي علي نفسك. وريحهم. ان كانو طماعين. اديهم هم النصيب الكبير. واخلص من المشاكل دي.
فضل اسد يفهمها موضوع الارض.
وسبب تمسكه بيها
ووصية ابوه ليه.
نانا قالت له:- المهم بقي عايزه اشوفك هتجي القاهره امتي؟
اسد:- والله يا نانا في الوقت الحالي صعب
اديكي شايفه المشاكل مع اولاد عمي وعمي مش بتخلص
ولما انسجنت يوم. رجعت لقيتهم طاردين امي من البيت. تفتكري بعد كل ده. ينفع اسيب امي لوحده في وسطهم. واسافر.
نانا:- مافكرتش تتجوز وتبقي مع اللي بتحبها ومع والدتك.
اسد:- والله الصراحه اكيد محتاج انسانه تساعد امي وتبقي معاها تعينها في شغل البيت والمطبخ والحاجات دي
نانا:- يا سلام هو انت هتتجوز علشان تجيب حد يشتغل في البيت ويساعد مامتك. مانجيب شغاله.
اسد:- ايه. بتقولي ايه
نانا:- اقصد يعني انت ممكن تاخد وحده مش تعرف تتطبخ وتغسل والحاجات دي
وبعدين لازم تكون فيه شغاله تراعي ماما الحجه دايما. اصل المتجوزين اكيد هيكونو مشغولين بنفسهم اكتر.
اسد:-وتفتكري لو انا وافقت ان شغاله تدخل بيتنا. امي هتوافق
نانا:- اكيد العروسه هي اللي هتجيب الشغاله. يعني مش ماما هتجيبها. واظن انها هتوافق لما تلاقيها بتعملها كل حاجتها.
وهو لسه فيه بنات خايبه ما بتعرفش تعمل كل ده.
نانا:- تصدق انت رخم. مش انت قولت بتعرف تطبخ وتعمل اكل. وهتساعدها.
اسد:- اساعدها مش اشتغل شغلها.
نانا:-ماهو انت بس تعرفني وانا اعمل. يعني تساعدني وتقولي بس الطريقه المهم انك تكون معايا وقتها.
اسد:- اكون معاكي فين وقتها؟
نانا؛- اقصد مع اللي هتكون معاك.
اسد:-وهو انا هتجوز علشان اطبخ
نانا:- ياعم علمها وبعدين بص بقي هي تريح نفسها وتجيب شغالتها معاها.
ده احسن حل
اسد:-كان نفسي ابويا يشوفني عريس قبل مايموت
نانا:- ربنا يرحمه يا اسد ادعيله اكيد هو كان دايما فرحان بيك.
اسد:- والله انا اللي كنت مسنود ومتداري بيه. من يوم ما مات. وانا حاسس اني انكشفت. وكل الحمول اللي كان حاجبها عني
نزلت عليا مره واحده.
نانا:- ياعم مافيش هموم ولا حاجه. بس موضوع الورث ده وتخلصه وبعدها هترتاح. وتبقي بعيد عنهم وعن اذاهم.
اسد:- ربنا يقدم مافيه الخير
نانا:- بص انا خارجه ناو مع امجد. هننزل نشتري شوية حاجات للشغل.
اسد:- ما يروح هو يجيب الحاجات انتي تروحي معاه ليه
نانا:- مانا لازم اختار الديفوهات بتاعة التصاميم بنفسي
اسد:- خلاص روحي انتي لوحدك.
نانا:- انا رجلي واجعاني وهو اللي هيسوق
اسد:- مش اتكلمنا في موضوع انك تركبي العربيه مع حد وقولنا بلاش
نانا:- اسد انا قولت لك الف مره امجد ده شريكي ومافيش بينا غير الشغل
وانا معرفاه حدوده معايا.
وبعدين فيها ايه اما يروح معايا لشغل
هو انا خارجه اتفسح
وبعدين يا بيبي حكم شغلي بيخليني اتعامل مع ناس كتير.
دا ساعات بيكون فيه عملا جداد. بجتمع معاهم وبيكون فيه غداء عمل.
بس ده بيكون لصالح الشغل.
اسد:- وايه كمان يا هانم
نانا:- هو ايه اللي وايه كمان. وبعدين انا مش هانم
اسد:- يعني بتقولي كده علشان اتعود علي الامور دي صح.
نانا:- يا بيبي ده شغل وده حكم الشغل وانا مش بعمل حاجه غلط
اسد:- لاء غلط يانانا. كل ده غلط. وماينفعش
ماينفعش الاستهتار بتاعك ده
نانا:- انا مش مستهتره. ومش انسانه بالشكل اللي بتفكر بيه ده.
اسد:- يا سلام. انتي واخده الامور ببساطه كده ومش مغلطه نفسك
غداء عمل ايه وزفت ايه. يغور الشغل اللي بالشكل ده
نانا:-انا عمري ما شوفت حد بيفكر بطريقتك دي
اسد:- اومال عايزاني اشجعك في اللي بتعمليه ده
نانا:- اسد قولتهالك الف مره انا مش بعمل حاجه غلط.
اسد:- وطبعا هتخرجي معاه ببنطلون مقطع وتيشرت وبشعرك صح
نانا:- وهو انا مش من الاول مصارحاك بطريقة لبسي
اسد:- وطبعا بتقابلي العملا في غداء العمل بلبس قصير وماكياج وكده
نانا:- اسد لاخر مره هقولك بلاش الطريقه دي معايا
اسد:- وانا لاخر مره هقولك حاجه. براحتك. اعملي اللي انتي عايزاه
نانا:/ طيب اما ارجع نتكلم تكون هديت.
اسد:- ولا نتكلم ولا زفت. يلا سلام.
قفل اسد السكه
وراح علي دار الحاج اسماعيل.
وقعد معاه
الحاج اسماعيل قال:- والله ماصدقتك اما قولت لي موضوع العمده ده والراجل بتاع مصر والارض
اسد:- ابوي الله يرحمه ماحكاش معاك في الموضوع ده
الحاج اسماعيل :- كان بيلمح لي بس انا مافهمتش ساعتها
اسد:- طيب وهنعمل ايه.
الحاج اسماعيل. :- لو وافقو بالفلوس انا هدفع لك المبلغ تديه لعمك وتاخد الارض وبعدها تسدده
اسد:- ماهو العمده هيخلي عمي يصمم انه ياخد الارض
وهيدفع له هو الفلوس
وبعدها ياخد منه الارض
الحاج اسماعيل:- لما ياجي وقتها يحلها الف حلال
المهم ، امك تعبانه ومحتاجه حد يساعدها.
اسد:- برضو كلام ده يا حاج اسماعيل
ابوي لسه ميت وانا اعمل كده
الحاج اسماعيل:- ماهو ابوك وهو عايش كان دايما سايبلك الاختيار في الموضوع ده. علشان تريح امك
وانت اللي كان مخك تخين ورافض
وهو ماحبش يضغط عليك ولا يغصبك علي حاجه. بالرغم ان امك ماعدتش حمل شغل الدار
طب تصدق بالله. ابوك اللي كان المركز كله يهابه ويعمل له الف حساب
كان يساعد امك في الطبيخ والغسيل
وعمره ولا هو ولا امك حتي لمحولك بكده
بس كانو يقولولك عايزين نفرح بيك.
اسد سمع الكلام وعنيه دمعت
بعد ماعرف هو كان اد ايه اناني
ومش حاسس بيهم.
ولا بيرد لهم جميلهم عليه.
طبطب عليه الحاج اسماعيل وقال له:- الاب والام دول يا اسد اكبر نعمه في الدنيا.
بيضحو بكل حاجه علشان سعادة اولادهم.
ورد جميلك ليهم يكون في الدعاء لابوك دايما وتنفيذ وصيته
ورعاية امك وراحتها.
اسد:/ ربنا يرحمك يابا.
الحاج اسماعيل. :- قوم روح نام. علشان بكره الجلسه مع عمك واولاده في دوار العمده.
رجع اسد البيت شاف امه نايمه
قعد تحت رجليها وباسهم.
صحيت امه وقعدت وخدته في حضنها
فضل اسد يبوس راسها وايدها
ويقولها انه كان اناني مش حاسس بتعبها هي وابوه
فضلت فاطمه واخداه في حضنها وتقول له، سعادتنا في الدنيا شوفتك مرتاح واحسن واحد
اسد:- ربنا ما يحرمني منك ياما.
انا هتجوز واريحك ونبني بيت في ارضنا نعيش فيه
فاطمه:- قبل البيت. لازم يتبني الجامع والكتاب اللي قال عليهم ابوك
اسد:- والله ياما لاعمل كل اللي كان بيقول عليه.
في اليوم التاني.
راح اسد والحاج اسماعيل دوار العمده
وكان العمده قال للنسر عن كل اللي حصل
والنسر قال للعمده. يتمسك بالارض ولو هيدفع مليون جنيه او اكتر
لما قعدو في الجلسه
اتفاجئ العمده بحضور مأمور المركز
واللي كان الحاج اسماعيل كلمه.
وفهمه الموضوع
وطلب منه الحضور.
قال العمده:- بص يا اسد. عمك واولاده علشان كتار. ياخدو الارض. وانت تاخد الفدانين بتوع ابوك لو معاك بيهم اوراق وتاخد البيت.
اسد:- بس الجلسه اللي فاتت اتفقنا ان عمي هياخد البيت. وهياخد مبلغ نص مليون جنيه.
المأمور قال:- رايك ايه يا اسد!
اسد قال :- الفدانين انا معايا اوراق ملكيتهم اهي.
واعطي اسد الاوراق للمأمور
المامور قال:- تمام الورق سليم والفدانين باسم جابر.
كمل اسد كلامه وقال:- وان كانو هياخدو الفدانين ويسيبو البيت. انا موافق. بس بشرط….
،،،،،،،
