رواية عيناها سر سعادتي الفصل السابع والعشرين 27 بقلم فاطمة البربري – تحميل الرواية pdf
رواية عيناها سر سعادتى (بين العشق وحب الذات )
بقلم : فــاطــمــة الــبــربــرى
خالد فى ذهول شديد من اللى سمعه وعقله مش مستوعب ان اية
حبيبته ممكن تفكر تخونه أبدا وخصوصا انه متأكد من حبها ليه،
رن عليها كتير لكن تليفونها للاسف بيدى مغلق ، رن على مامته
علشان يسأل ان كانت اية وصلت البيت ولا لا ومامته قالتله انها
لسة ماجتش ، خالد بدأ يقلق وقرر يروح العنوان اللى المجهول
بعتهوله فى رسالة
راح على العنوان ، ضرب جرس الباب ، اسامة فتحله وماكانش لابس
القميص اللى فوق ، خالد اول ماشافه الشك جه فى قلبه بسبب
الموقف اللى حصل معاه قبل كدة فى الشركة ، خالد زقه ودخل
جوة البيت يدور على اية
اسامة وشايف الشر فى عين خالد: استنى بس ياخالد بيه انا
كنت عايز افهمك حاجة ، اسمعنى بس ارجوك
خالد تجاهله تماما وبدا يدور على اية فى كل ركن من اركان البيت
لحد مادخل اوضة النوم ولقاها نايمة على السرير وكانت تقريبا لسة
يدوب بدأت تفوق
اية بتعب شديد : خالد
خالد الدموع جت فى عنيه واحمرت من شدة الغضب :شد اية من على
السرير بكل قوة وغضب : انتى ايه اللى جابك هنا
اسامة : اهدى بس ياخالد بيه وافهم اللى حصل
خالد ماقدرش يسيطر على نفسه لما اسامة اتكلم وضربه ضرب شديد
اية : سيبه ياخالد انت ايه اللى بتعمله ده انت فاهم غلط
خالد : فاهم غلط ايه يابشمهندسة مراتى وزميلها مع بعض وفى شقته
والهانم نايمة على سريره والاستاذ مش لابس هدومه يبقى فاهم غلط
ازاى بقى ان شاء الله
خالد كان حاسس انه مش قادر يستوعب اللى هو فيه وكأنه فى كابوس
وعقله اتشل مش قادر يفكر فى حاجة ولقى نفسه بيزق اسامة بشدة
ومشى
بعد ماخالد مشى
اسامة : انا اسف اوى يااية بس ماكانش فى قدامى اى حل غير انى اجيبك
هنا ، الناس اللى ضربوكى لما اخدتك فى عربيتى فضلو ورايا وحاولت اهرب
منهم كتير ماعرفتش وكنت خايف عليكى جدا فاضطريت اجيبك هنا
اية : اسامة هو انا ممكن اسألك سؤال ؟؟
اسامة : اكيد طبعا اتفضلى
اية : هو انت ليه كنت قالع قميصك
اسامة : وجوزك كان جاى انا كنت رايح اكلم الاسعاف علشان كان
مغمى عليكى وكنت رايح اغير هدومى على مالاسعاف تيجى
اية حطت ايديها على دماغها : اه
اسامة بقلق : انتى لازم تكشفى يااية وتعملى اشعة على دماغك الضربة
كانت صعبة تعالى معايا يالا نروح على المستشفى
اية بدموع : متشكرة اوى يااسامة انا هامشى انا دلوقتى
اسامة : انا عارف انك زعلانة علشان خالد ماتخافيش انا هاروحله
وهافهمه كل اللى حصل
اية : لا يااسامة اوعى تعمل كدة ، لوعملت كدة هازعل منك جدا ،
وبعدين خالد مش هيتقبل منك اى كلام
اية قررت انها تروح على بيت اهلها بعد اللى عمله خالد معاها ده
وظنه السئ بها
——-
خالد راح على البيت
ندا شافته على السلم عند شقتها وهو طالع وكان باين عليه الغضب جدا
ندا : خير ياخالد فى حاجة ولا ايه مالك كدة
خالد :……
ندا : خالد انت كويس … خالد
خالد ماردش عليها نهائى ، ندا نزلت لبيت والدته ، وكان باين على
وشها القلق جدا
عزة : ادخلى يابنتى اتفضلى
ندا : مش وقته ياماما خالد جاى من برة وشكله كدة فيه حاجة اطلعى
اطمنى عليه انا قلقانة عليه اوى
عزة : حاجة ايه ، اللهم اجعله خير ، يارب
ندا : يارب ياماما ، اجى معاكى
عزة : تعالى يابنتى ربنا يستر لتكون مراته جرالها حاجة دى
لسة ماجتش لحد دلوقتى
طلعو عند خالد وخبطو على الباب خالد ماردش ، والدته نزلت جابت نسخة
المفتاح التانية اللى معاها للشقة وفتحت الباب ودخلت هى وندا لقو خالد
قاعد فى اوضة نومه على الارض وساند دهره على الحيط ودموعه مغرقة
وشه وكانت عزة لاول مرة تشوف دموع ابنها على وشه طول عمرها بتشوفه
بيكتم حزنه فى قلبه من وهو لسة طفل حتى يوم موت عبدالله ماشافتش
دموعه ابدا ، وقتها حست ان اكيد فيه مصيبة كبيرة حصلت وصلته انه
يضعف اوى كدة …عزة اخدته فى حضنها وانهارت فى البكاء : مالك
ياحبيبى فيك ايه طمنى عليك
خالد :….
ندا بكت : خلاص ياماما سيبيه يرتاح شوية دلوقتى ، قومى تعالى ننزل
وساعدتها تقوم ونزلو
انور لما شافها بالحالة دى : فى ايه ياعزة مالك
عزة :….
انور بص لندا : طمنينى انتى يابنتى فى ايه
ندا : مفيش ياعمى بس خالد …. وحكتله على الحالة اللى فيها خالد
انور : استرها يارب ، طب انا هاطلع اشوفه وانتى ياندا خليكى مع امك
ندا : حاضر ياعمى
———
انور طلع لخالد ولقاه نايم على السرير وماسك صورته
هو واية وبيعيط
انور : مالك ياابنى ، اية حصلها حاجة
خالد :…..
انور : رد على ياحبيبى ماتقطعش قلبى
خالد كان حاسس انه محتاج يفضفض لحد باللى جواه ،
وحكى لوالده على اللى حصل وهو منهار من البكاء
انور : وهى آية فين دلوقتى ؟؟
خالد : ماعرفش انا سبتها هناك وجيت
انور بذهول : نعم ؟؟ سبتها هناك ازاى يعنى ، انت مجنون ياد انت
خالد : مش عارف يابابا انا اتصرفت كدة ازاى اصلا
انا كنت حاسس وقتها ان تفكيرى اتشل كنت عامل زى
اللى شارب حاجة ومش قادر يفكر
انور : بس انت غلطان ياخالد انت كان لازم تسمع منها الاول
خالد : اسمع منها ايه يابابا ، هى ايه اللى يوديها مع الحيوان ده
شقته اصلا ، وايه اللى يخليها تنام فى سريرة وهو كمان كان قالع
قميصه ، للاسف يابابا الموضوع مالوش اى تفسير تانى غير الخيانة
انور ضرب كف على كف : لا حول ولا قوة الا بالله العلى العظيم
———
…..: الو … اهلا يافهمى باشا ، صاحبك خلاص
وقع فى الفخ
فهمى : هاهاهاها ، الرجالة حكولى على كل اللى حصل بس
المجنون ده مشى وساب مراته فى شقة زميلها هاهاها
…..: هاهاها من الصدمة ياباشا
فهمى : يارب بس الموضوع ده يأثر عليه خليه يتهد وينسانا شوية
……: ايوة بقى خلينا نشوف شغلنا
————
امل عند طارق فى الشركة ::
امل : ازيك ياطارق اتاخرت ليه كدة مستتياك من بدرى ، رنيت
عليك كتير مابتردش
طارق : اهلا ياامل معلشى كنت عامل التليفون صامت ماسمعتش
الرنات ، اتفضلى جوة
امل : هاه ياحبيبى قلت لهند على اللى طلبته منك
طارق : لا ياامل … انا مش هاقدر اطلب منها حاجة زى دى
امل بعصبية : يعنى ايه مش هتقدر ، ماجد لازم يعيش معايا
انا انت ابوه وانت هتعيش معايا يبقى هو كمان يبقى معايا
طارق : اهدى ياامل شوية …فى ايه انتى ناسية ان هند امه
وحقها ابنها يعيش معاها
امل بدموع : هى تقدر تجيب غيره لكن انا لأ مش هاقدر
اخلف ، ارجوك ياطارق كلمها ابوس ايديك … طب خلاص
انا ممكن اكلمها انا
طارق : طب ياحبيبتى خلاص هاكلمها … انا حاسس بيكى
والله بس الموضوع صعب اوى مش سهل زى ماانتى متخيلة
امل : طب ياحبيبى انا هستناك لما تخلص شغل وهاجى معاك
نكلمها اوكى
طارق : لا ياحبيبتى بلاش النهاردة انا عندى شغل كتير اوى
وهاخلص متاخر ، خليها ليوم تانى هابقى اكلمك ونتفق
امل : اوكى ياحبيبى بس ارجوك ماتتأخرش على
———-
فى بيت محمد
محمد قاعد بيتفرج على التليفزيون
سارة : بعد اذنك يامحمد كنت عاوزة انزل اشترى شوية حاجات
محمد من غير مايبصلها: اوكى ، انزلى
سارة : طب عاوزة فلوس
محمد بتجاهل: الفيزا عندك فى درج المكتب خديها وهاتى اللى انت عاوزاه
سارة قربت منه وباسته من خده : متشكرة اوى ياروحى ودخلت اوضتها
محمد مع نفسه : يخرب عقلك يابت ياسارة والله انا حاسس انى بعذب نفسى
اكتر مابعذبها وحشتنى اوى بنت الايه ، بس بردو لازم اتقل كمان شوية
عليها علشان تتعلم الادب
———
اية لما راحت بيت اهلها ، والدها اقنعها انها لازم ترجع بيت
جوزها وتوضح له سوء التفاهم اللى حصل ، فقررت تسمع
كلام والدها وراحت على بيتها
خالد كان قاعد على السرير وساند دهره على المخدة وقدامه
كل الصور اللى تجمع بينه وبين اية واول ماشاف اية جت
قام وقف وبعصبية شديدة : انتى ايه اللى جابك هنا امشى
اطلعى برة
اية : اسمعنى ياخالد انا جاية اوضحلك اللى حصل فيه
سوء تفاهم فى الموضوع
حالد : سوء تفاهم ايه يابشمهندسة الحكاية واضحة زى
الشمس امشى غورى اطلعى برة…برة ….برة ، وزقها جامد
وقعها على الارض ، اية حاولت دموعها ماتنزلش وقامت
وقفت ومشت
لما اية مشت خالد فقد اعصابه تماما وبدا يكسر فى كل
حاجة فى البيت
عزة وانور وندى طلعو على صوت التكسير لقو خالد هايج زى الثور
حاولو يوقفوه ولكن بلا جدوى
خالد جاله حالة انهيار عصبى شديد وفقد الوعى ونقلوه على المستشفى
——-
فهمى استغل الفرصة وقدر ينفذ العملية الاولى اللى نزل مصر
علشانها ولسة باقى كمان عملية ويرجع يسافر اوروبا تانى
————
فى بيت سامح
هاجر : انا حزينة اوى على اية ياسامح ياحبيبتى مصدومة اوى من اللى
عمله خالد فيها
سامح : خالد بردو معذور ياهاجر ، مفيش رجل فى الدنيا يقدر يسيطر
على اعصابه لما يلاقى مراته فى شقة مع راجل غريب ده كويس انه
مقتلهمش هما الاتنين
هاجر : ايوة بس هى قالتله ان فيه سوء تفاهم ، المفروض كان سمع منها حتى
سامح : اية اول حب فى حياة خالد ياهاجر ، اية بالنسبة لخالد كانت كل
حياته وعلشان كدة الصدمة كانت صعبة اوى عليه ومش قادر يتقبل اى
كلام منها ولا حتى من غيرها ، على فكرة خالد جاله انهيار عصبى بعد
مااية مشت من عنده علطول وراح على المستشفى
هاجر : ياربى ،دى اية لوعرفت هتموت فيها ، دى روحها فيه
سامح : ماهو محدش يقولها اى حاجة لحد ماحالته تستقر وباذن الله
كلنا هنروحله ونتكلم معاه ونوضحله اللى حصل
—————
فى بيت سلامة
محمود : رحتى شفتى خالد النهاردة ياملك
ملك :ايوة ياحبيبى رحت ، الحمد لله حالته بقت احسن بكتيير من الاول
انا مش عارفة انت ليه مش عايزنى احكى لحد ولاحتى لعمى انور عن سوء
التفاهم اللى حصل علشان خالد يعرف الحقيقة
محمود : خالد كسر اية ياملك وجرحها اوى واتهمها فى شرفها وده شئ
صعب اوى على الست وخصوصا لما يبقى الاتهام ده من اقرب الناس
لقلبها ، خالد لازم يعرف الحقيقة لوحده من غير مانقله حاجة علشان
يندم على كل لحظة هان فيها اختى ، اقسم بالله لولا ان اية بتحبه
لكنت عرفته مقامه كويس بس انا عامل حساب بس لآية
ملك ابتسمت : فعلا الاخ اكبر نعمة ربنا يخليك ليها ياحبيبى ويخليك لى
يارب ، انا بحبك اوى يامحمود ، انت عارف ياحودة انت اجمل حاجة فى
حياتى بجد
محمود : وانتى كمان ياحبيبتى اجمل حاجة حصلتلى فى حياتى ،
ربنا مايحرمنى منك ابدا
———
كل زمايل خالد والفريق بتاعه راحوله المستشفى زاروه وكل معارفه
من بعيد ومن قريب راحوله يطمنو عليه ،
———-
فى المستشفى
د/اسلام مدير الشركة وعم خالد : فى ايه ياانور ايه اللى وصل خالد
للمرحلة دى ، وليه اية مش معاه دى حتى ماعدتش بتيجى الشركة
وحاولت ارن عليها كتير تليفونها بيدى مغلق
انور : الله اعلم ماحدش يعرف ايه اللى حصل بينهم ، انا قلقان اوى على خالد
د/اسلام : ماتقلقش ياخويا باذن الله ربنا هيسترها ، ادعيله بس انت
انور بدموع : يارب
——
الرجل العجوز اللى كان جه لخالد قبل كدة وقاله انه يعرف الست
اللى كانت السبب فى قتل عبدالله عرف ان خالد فى المستشفى
فقرر يروح يزوره ويطمن عليه وبالفعل راح وسلم على خالد واطمن
عليه
لكن المفاجأة وهو خارج من عند خالد شاف ناس كتير برة جايين
تقريبا لزيارة خالد وشاف فيهم الست اللى اتفقت مع برعى على
قتل عبدالله فانتظر لحد ماشافها داخلة لخالد وكان معاها ناس
تانية ودخل وراها
———-
اية اخدت اجازة من الشغل لان اعصابها تعبانة جدا ودايما
حابسة نفسها فى اوضتها ورافضة الكلام مع اى حد نهائى
كانت حاسة بسكاكين بتقطع فى قلبها مش قادرة تصدق ان
حبيب عمرها يتهمها بالخيانة ، ومفيش حد من اهلها بلغها
بان خالد فى المستشفى علشان مايزودوش عليها تعبها
——
وخلصت حلقتنا النهاردة توقعاتكم 
ياترى مين هى الست دى وليه جاية اساسا تزور خالد
خالد لما يعرف الحقيقة هيندم على اللى عمله مع اية ولا لا
هل اية ممكن تسامح خالد ولا هتطلب منه الانفصال
