رواية عيناها سر سعادتى(بين العشق وحب الذات)
بقلم:فاطمة البربرى
***خالد نزل مع عبدالله وراح لعمه مكتبه وسلم عليه وقعد فترة فى الشركة على امل
انه يشوف اية ولكن بلا جدوى ماعرفش يشوفها،مشى وعقله كله مشغول بيها
***محمود قاعد مع ابوه واية فى الريسبشن
محمود:بابا انا عايز اتجوز
مجدى:ده يوم المنى ياحبيبى ومين بقى العروسة اللى عايز تتجوزها عشان اروح
اطلبلك ايديها من اهلها
محمود:هاجر بنت عمى اسماعيل صاحبة اية
مجدى اتعصب جدا اول ماسمع الاسم: لا طبعا استحالة ده يحصل
اية: ليه يابابا هاجر بنت كويسة واخلاقها عالية جدا انا عارفاها كويس
مجدى قام وقف : انا قلت لأ و الموضوع ده مايتفتحش تانى شوفلك عروسة
تانية ومشى دخل اوضته
سالى جت على صوت مجدى: فى ايه ياولاد ابوكو ماله بيزعق كدة ليه انتو
عملتو ايه وصلتوه انه يتعصب اوى كدة
محمود بضيق:مفيش حاجة انا رايح الجامع سلام
سالى لاية: فى ايه يابت انتى ايه اللى حصل
اية: محمود عايز يتجوز هاجر صاحبتى وبابا رافض واتعصب جدا لما طلب منه
انه يتقدملها
سالى: يعنى هى الدنيا كلها مفيش فيها غير هاجر دى ،حتى انتى مش مصاحبة
غيرها
اية: وهى مالها هاجر ياماما
سالى: كان زمان فى مشاكل كتيرة بين ابوكى وابوها فى شغلهم وتجارتهم وياما
ابوها وقع بين ابوكى وتجار كتير
اية: بس الكلام ده من زمان ياماما ، دلوقتى عم اسماعيل بقى راجل يعرف ربنا
واكيد ندم على كل حاجة عملها مع بابا اومع غيره ، يعنى ربنا بيسامح وعبده
مايسامحش بابا ماربناش على كدة ياماما انا متاكدة ان فى سبب تانى
لرفض بابا هاجر
سالى: ولاتانى ولاتالت انا رايى محمود يشوفله عروسة تانية وخلاص
**عدت الايام واوضاع ابطالنا زى ماهى بدون تغيير
**اية فى شغلها ، عبدالله دخل مكتبها
عبدالله: بشمهندسة اية خلصتى المكت اللى د/اسلام طالبه منك
اية: تقريبا بفنشه اهو ،اه صحيح هى زوجة حضرتك هتولد امتى
عبدالله : ادعيلها ربنا يسهلها هى فى التاسع دلوقتى
اية : ربنا يكملها على خير يارب
اية : عبدالله هو انا ممكن اسالك سؤال شخصى يعنى
عبدالله ابتسم : اكيد طبعا يااية انتى عارفة انك بالذات ليكى معزة خاصة
عندى
اية ابتسمت : هو اخوك الظابط اللى جه هنا معاك قبل كدة مرتين يبقى
توامك فعلا
عبدالله ابتسم : ايوة فعلا احنا توام بس هو مختلف عنى تماما
اية مستغربة من نفسها جدا هى ليه حابة تتكلم عنه وحست انها عايزة تعرف
عنه حاجات كتير: مختلف عنك ازاى يعنى
عبدالله: يعنى صفاته واسلوبه مختلفين عنى تماما حتى شكله هو وسيم وعسل
كدة فى نفسه ده البنات اللى معانا هنا فى الشركة كانو هيتهبلو علية المرتين
اللى جه فيهم هنا ، مايبانش علينا ان احنا توأم اصلا
اية : ههه ايوة مانا سمعت البنات مبطلوش كلام عنه وقتها طب وهو ليه
ماتجوزش لحد دلوقتى
عبدالله : خالد كاره فكرة الارتباط من اساسه ومابيحبش هو البنات ولا دلعهم
وبيقول دايما ان الجواز هيعطله عن شغله
اية حست انها اتضايقت من كلام عبدالله عن كره خالد للارتباط :
اممم هو فعلا باين عليه عملى خالص
**محمد مع سارة فى كافيه
محمد : سارة انا عاوز اقولك على حاجة ، انا بصراحة اترددت كتير قبل ماتكلم
معاكى فى الموضوع ده بس انتى لازم تعرفى
سارة : خير ياحبيبى قلقتنى
محمد : خير ياحبيبتى ، انا باذن الله مسافر الكويت كمان شهرين
سارة بذهول : انت بتقول ايه طب وفرحنا
محمد : ماحنا هنتجوز ياحبيبتى قبل ميعاد السفر وهنسافر مع بعض
سارة : طب وعيادتى وشغلى هنا واهلى ، لا طبعا ده لايمكن يحصل ابدا
محمد بذهول : يعنى الحاجات دى كلها اهم منى ياسارة!!
سارة بحدة : ايوة الحاجات دى اهم حاجة فى حياتى شغلى اثبات لنفسى
وذاتى من غيره ماقدرش اعيش ، عايزنى اسافر معاك وانت تروح شغلك وتيجى
تلاقينى مستنياك ومظبطالك اكلك يعنى خدامة ليك
محمد بعصبية : ايه الكلام اللى بتقوليه ده بتسمى اهتمامك بى وببيتك خدمة ، الظاهر
ان اهلك ماعلموكيش يعنى ايه زوجة ، يالا قومى عشان اوصلك
سارة قلعت دبلتها : دبلتك اهى مش عايزاها انت انسان مش محترم اساسا وماتستاهلش
ان اكمل حياتى معاك ، اتفضل امشى انت انا هاروح البيت لوحدى
محمد حط الحساب على الترابيزة واخد الدبلة : على راحتك ومن غير سلام (ومشى)
**** سارة راحت على بيتها واول مادخلت رمت نفسها فى حضن مامتها وعيطت
عزة : فى ايه ياحبيبتى مالك ايه اللى حصل
سارة ومازالت تبكى : انا ومحمد سبنا بعض
عزة بصدمة : ايه ليه كدة ؟؟!! اقعدى بس كدة واهدى واحكيلى
سارة حكتلها كل اللى حصل
عزة : بس انتى غلطانة ياسارة
سارة : انا كمان اللى غلطانة
عزة : ايوة ياحبيبتى الراجل دايما عايز يحس انه هو اولى اهتمامات الست بتاعته
سارة : لا طبعا الكلام ده كان زمان ايام ستى وستك انا خلاص مش عايزاه يتفلق
المسالة مسالة وقت وانساه
***محمود من يوم ماوالده رفض هاجر وهو حزين ودايما قاعد مع نفسه وقافل باب اوضته
عليه
سالى خبطت على باب اوضته
محمود : ادخل
سالى : ايه ياحبيبى هتفضل على الحال ده كتير
محمود : حال ايه ياماما ما انا كويس اهو
سالى : على انا الكلام ده ياحودة
محمود : انا مش فاهم ياماما هى هاجر مالها ومال المشاكل اللى كانت مابينكم زمان
الدنيا خلاص اتغيرت ماعدش حد بيفكر بالشكل ده وبعدين عم اسماعيل دايما بيدعى
لبابا كل مايشوفنى يعنى مفيش اى عداوة اوكراهية عنده من ناحيتنا يبقى ليه الرفض
بقى ، انا بحب هاجر وهى انسانة محترمة تحرمونى منها ليه
سالى : معلش ياابنى ، على العموم انا هحاول اتكلم مع ابوك تانى واقنعه بس انت خلى
عندك شوية صبر
محمود : حاضر ياماما هاصبر
*** ندا تعبت جدا وعبدالله وداها المستشفى عشان شكلها هتولد
عبدالله موجها سؤاله للدكتور بعد كشفه عليها : خير يادكتور طمنى
الدكتور : باذن الله هتولد على اخر النهار ربنا يسهل ادعيلها
عبدالله : يارب يارب
عزة وانور وسارة جم المستشفى : هاه ياعبدالله طمنا
عبدالله : الدكتور بيقول هنستنى لاخر النهار
انور : ماتقلقش ياحبيبى هتولد وهتبقى زى العسل
عبدالله : يارب يابابا انا خايف عليها اوى
*** اخر النهار ندا ولدت وجابت ولد
عبدالله دخل عند ندا وشال طفله وقعد جنب ندا وحط ايده على كتفها: حمدالله
على السلامة ياروحى
ندا : الله يسلمك باحبيبى ، هتسميه ايه
انور دخل : انا اللى هسمى اول حفيد لى حبيب جده
سارة : وهتسميه ايه بقى ياسى بابا
انور : هسميه ادم ….آدم عبدالله انور عبدالله (اسم مالوش حل )ههههه
الكل ضحك
عبدالله : جميل اوى يابابا اسم ادم
عزة : طبعا جميل مش الغالى اللى مسميه
سارة غمزت لمامتها :ايوة بقى ايه الرومانسية دى كلها ياعزتى
عزة اتكسفت
انور : بس يابت انتى عيب كدة ماتكسفيش حبيبتى
الكل ضحك
عبدالله : ربنا يخليكو لبعض ولينا يارب
***خالد لما عرف ان ندا ولدت طلع لعبدالله شقته بعد ماندا جات من المستشفى وبارك
لندا وشاف ادم وخرج قعد مع عبدالله برة فى الانتريه
خالد : مبروك ياعبدالله
عبدالله : الله يبارك فيك ياحبيبى
بعد دقايق من الصمت وعبدالله كان مشغول باعداد الزينة لسبوع ادم
خالد : اه صحيح ياعبدالله انت مش هتعمل عقيقة
عبدالله : طبعا هاعمل ياابنى يوم السبوع يوم الاحد الجاى
خالد : وهتعزم صحابك كلهم اللى معاك فى الشركة
عبدالله : اكيد طبعا
خالد بيحاول يجس نبض عبدالله عشان يعرف ان كانت ايه هتيجى ويقدر يشوفها ولا لأ:
هتعزم صحابك الشباب بس طبعا
عبدالله : لا طبعا والبنات كمان
خالد : والبنات كمان؟؟كلهم؟؟
عبدالله : ايوة طبعا كلهم امال ايه دى عقيقة ادم حبيبى اول فرحتى
خالد قلبه اطمن شوية : طيب انا هامشى انا بقى وكمل اللى انت بتعمله ،سلام
عبدالله : مع السلامة
وخلصت حلقتنا النهاردة ونكمل باذن الله بكرة
توقعاتكم بقى 
ياترى اية هتحضر العقيقة ولا لا وهل خالد لما يشوفها هيعترفلها بحبه
ليها ولا ايه
ايه السبب ورا رفض ابو محمود لهاجر
سارة هترجع تانى لمحمد ولاخلاص علاقتهم انتهت على كدة
عايزة اعرف رايكم ايه سارة عندها حق فعلا فى قرارها اللى اخدته ولا
محمد هو اللى على حق
