رواية عيناها سر سعادتى
(بين العشق وحب الذات)
عبدالله : ليه هى آية عملت ايه؟؟!! آية دى بنت كويسة جدا واخلاقها عالية
فوق ماتتصور
خالد كان مبسوط جدا من كلام عبدالله عن اية ومبسوط اكتر لان قلبه اختار صح :
هى ماعملتش حاجة فى قضية كدة تبع حد هى تعرفه من بعيد فكنت عايز اعرف منها
معلومات عن الشخص ده بس بشكل ودى
عبدالله : طيب هات موبايلك ده اسجلك رقمها فيه
***طارق خلص كل اجراءات الطلاق وبعت ورقة الطلاق لامل البيت
امل اول ماشافت الورقة انهارت من البكاء ولسة محمود رايح يتكلم عشان
يسالها هى بتبكى ليه مادام ده طلبها بس والده شاورله بايده انه مايتكلمش خالص
معاها ولا يلومها على اى حاجة وهى دخلت اوضة اختها اية وقعدت على سريرها
وكانت اية قاعدة على مكتبها بتخلص مشروع تبع الشركة واول ماشافت دموع امل
والورقة اللى فى ايديها فهمت اللى حصل راحت جنبها واخدتها فى حضنها
ومااتكلمتش نهائى معاها
***هاجر جالها عريس كويس وباباها وافق عليه لكن هى رافضة تماما عشان بتحب
محمود بس والدها صمم عليه وحدد ميعاد خطبتها منه يوم الخميس الجاى
هاجر بكت بكاء شديد فى اوضتها وقررت تكلم اية
اية : الو ازيك ياهاجر عاملة ايه
هاجر ببكاء شديد : انا جالى عريس يااية وبابا وافق عليه وحددوا خطوبتى يوم
الخميس انا محتاجاكى اوى يااية
اية : طب ياحبيبتى اهدى وانا هاجيلك دلوقتى
واستاذنت اية من والدها تروح لهاجر ووافق
**اية راحت لهاجر واول ماشافتها رمت نفسها فى حضنها ودخلو اوضة هاجر
هاجر : انا مش مصدقة يااية انى ممكن ارتبط بحد تانى غير محمود انتى مش
كنتى قلتيلى قبل كدة انك لمحتيله انى معجبة بيه وهو ابتسم وقتها طب ماتقدمليش
ليه لحد دلوقتى
اية : مش عارفة اقولك ايه ياهاجر
هاجر بحزن : ماتقوليش حاجة اخوكى ده اصلا انسان زبالة وماينفعش اساسا انه
يبقى شيخ جامع لانه كداب ، شافنى قبل كدة وادانى امل ان احنا هنرتبط ودلوقتى جاى يخلى
بى انا بكرهه قد الحب اللى حبيته ليه مليون مرة
اية : ماتظلميهوش ياهاجر ، محمود بيحبك وكلم بابا علشان يتقدملك فعلا
هاجر بتريقة : والله طب ومجاش ليه ؟
اية : بابا اللى مش موافق انه يتجوزك
هاجر بدموع : باباكى طب ليه؟ كان حد قاله على انى بمشى مشى بطال ولاحاجة؟
اية : لا بيقول ان كان فيه مشاكل زمان بينه وبين ابوكى وانه استحالة يسامحه على اللى حصل
ويناسبه
هاجر : ياااه مش قادرة اصدق ان الحاج مجدى قلبه قاسى اوى كدة ده انا بحبه اوى لله فى لله
انا بجد اتصدمت في والدك اوى
اية زعلت ووقفت : مااسمحلكيش تتكلمى بالطريقة دى عن والدى ياهاجر كفاية غلطك اللى عديتهولك فى محمود وظلمك
ليه
هاجر :معلشى يااية حطى نفسك مكانى وانتى هتحسى بى
اية قعدت جنبها واخدتها فى حضنها : حاسة بيكى والله ياهاجر بس مفيش فى ايدى اى
حاجة اعملها
***خالد قرر يكلم اية رن على رقمها
اية : الو ايوة مين معايا
خالد : انا المقدم خالد انور عبدالله ، حضرتك المهندسة اية مجدى
اية : ايوة انا
خالد : ازيك يابشمهندسة اخبارك ايه
اية : الحمد لله بخير ، خير فى حاجة ولا ايه
خالد : ايوة كنت عايز اعرف منك معلومات عن شخص ليه قضية عندى
اية بذهول : شخص …قضية …مين الشخص ده؟؟!
خالد : لما اشوفك هاحكيلك كل حاجة ياريت نتقابل فى اقرب وقت انا حبيت اخلى
الموضوع بشكل ودى ولوحضرتك مضايقة ممكن ابعتلك وتيجى الاثم
اية : اوكى ممكن نتقابل باذن الله بكرة بعد مااخلص شغلى فى الشركة على
الساعة ٣ العصر كدة
خالد : اوكى يبقى نتقابل فى كافيه الزهور عارفاه
اية : ايوة عارفاه خلاص ماشى اتفقنا مع السلامة
***طارق قرر انه يتجوز علطول علشان يهرب من التفكير فى امل اللى سابته واختارت
تضحى بحبهم وطلب ايد سكرتيرته هند
نتعرف على هند
(هند سكرتيرة طارق من عيلة فقيرة جدا والدها ميت ووالدتها قعيدة ومالهاش اخوات ،
كافحت واشتغلت علشان تقدر تصرف على نفسها وعلاج والدتها)
هند لما طارق طلب منها ايدها ماترددتش لحظة ووافقت علطول وحدد ميعاد الفرح معاها يوم
الاربعاء
**^طارق كلم ايه وقالها انه هيتجوز وهى باركتله وقالتله انه يستاهل كل خير وطلب منها تحضر فرحه
***خالد منتظر اية فى الكافيه من الساعة ٢.٥
اية جت تقريبا الساعة ٣وخمسة ،خالد اول ماشافها قام وقف وسلم عليها
خالد بابتسامة : ازيك يابشمهندسة
اية :الحمد لله تمام ، خير ياخالد بيه مين الشخص اللى كنت بتتكلم عنه ده
خالد بنظرة كلها حب : انا
اية : ايه انا مش فاهمة حاجة
خالد : اية بصراحة انا من اول ماشفتك وانا مشغول بيكى من اول مرة جيت فيها
الشركة عندكم من قبل حتى مااعرف اسمك ايه، انا بحبك اوى يااية
اية التزمت الصمت ومش مصدقة خالص كل الكلام اللى قاله خالد وكانها فى حلم جميل
مش عايزة تصحى منه
خالد : اية…اية انتى معايا
اية ارتبكت : هاه..ايوة معاك وابتسمت بكل حب : ممكن تطلب لى حاجة اشربها طيب
خالد ابتسم : حاضر من عنية، ونادى على الجرسرن وبص لاية : تحبى تشربى ايه؟؟
اية : عصير مانجو،
الجرسون ابتسم : اوكى يعنى اجيب ٢مانجو
ايه بذهول : ايه ده هو ضحك ليه وازاى قال ٢مانجو من غير مايسالك تشرب ايه مايمكن
انت عايز تشرب حاجة تانية
خالد ضحك : لا ماهو عارف اصل انا كل اما اجى هنا مابطلبش غير المانجو
(الاتنين كانو سعداء جدا ان مشروبهم المفضل واحد )
خالد : اية ممكن اعرف انتى بتبادلينى نفس مشاعرى تجاهك ولا لا
اية وشها احمر جدا واكتفت بابتسامة رقيقة وبصت فى الارض
خالد كان مبسوط بيها جدا ومش مصدق ان فيه بنت بالحياء ده فى الزمن ده
خالد روح البيت وهو فى قمة سعادته وكان ماشى يدندن وهو داخل البيت ،سارة
شافته
سارة : ايه ده انا مش مصدقة عينى ولا ودانى خالد باشا بيغنى
خالد باسها من خدها ودخل على اوضته وهو بيكمل غناه
عزة شافت منظره وفرحت بيه : ربنا يسعدك ياابنى دايما
***فى كلية الاداب
ملك واقفة مع صحبتها ضحى فى حرم الجامعة وجه زميلها مازن ناحيتها
مازن : ملك لوسمحتى كنت عايزك فى كلمة ممكن
ضحى : طيب انا هامشى انا بقى
ملك : لوسمحت يامازن ابعد عن طريقى
مازن : انا بحبك اوى ياملك انتى ليه رافضانى انتى بتحبى حد تانى
ملك : مازن انت انسان تافه اساسا اللى زيك مايعرفش يعنى ايه حب كل يوم والتانى
مع بنت شكل
مازن : بس انا بحبك بجد ياملك ومستعد اغير من نفسى عشانك بس تبقى راضية عنى
ملك : غير من نفسك علشان تبقى افضل وتبقى انسان ناجح مش علشان اى حد مهما كان
بعد اذنك انا ماشية وياريت ماتكلمنيش تانى سلام
***محمود لما عرف ان هاجر هتتخطب دخل اوضته وانهار من العياط لدرجة ان صوته كان مسموع
برة رغم انه كان قافل باب اوضته عليه
مجدى سمع صوت بكاءه صعب عليه جدا وخبط على الباب
محمود بصوت كله بكا وحزن : مش عاوز اشوف حد ابعدوا عنى
مجدى : افتح يامحمود انا ابوك
محمود قام فتح : اتفضل يابابا
مجدى قفل الباب وقعد جنبه على السرير : بص يامحمود يابنى انت عارف انك غالى على
اوى وعمرى مارفضتلك طلب ، انا عارف ياابنى انك بتحب هاجر بس والله لوكان ينفع نناسب
الناس دى كنت طلبتهالك بنفسى
محمود بص لوالده بكل غل : وماينفعش ليه هاه علشان مشاكلك مع ابوها
مجدى : لا ياابنى مش ده السبب انا هاقولك على الحقيقة اللى مخبيها من سنين طويلة
وماكنتش حابب حد يعرفها بس توعدنى ان كل كلمة هاقولهالك هتبقى سر بينا
وخلصت حلقتنا النهاردة توقعاتكم 
ياترى ايه هى الحقيقة اللى كجدى مخبيها من سنين
امل هتعمل ايه لما تعرف ان طارق هيتجوز
ملك لما تعرف ان خالد خلاص استحالة يبقى ليها لانه خلاص بقى بيفكر فى اية
هتعمل ايه
ملك ممكن تدى فرصة لمازن انه يقرب منها ولا لا
