يبدو أننا وصلنا خَيط النهايات
و الدليل على ذلك ، جميع الأبيات الشعرية قد نفذت
….
بقيت اباوع بصدمة على جُمارة و تغريد و محمد واكف يبرم بشواربة
رهينة : ولجن انطني أمية شوية بيدي
محمد : هاي سوايتك عمي لا صايرة گبل و لا دايرة
يعقوب : انجب انتَ و لا تحجون بالموضوع
– ليش شني تخاف على وريثك لا ينكتل لو يطگونة عين
رهينة : اسم الله يمة الرحمن
تغريد كعدت و اني اباوعلها بصدمة و حاصرتني الضحكة
يعقوب سندها و گَومها خايف عليها
رهينة : امشي امشي نيمها بغرفتي
محمد : يالله روز امشينا
رهينة : بعد وكت يجدة ضلو يمنه للعشا
– لا جدة شبعت أنا والله
يعقوب خازرة و محمد يضحك رحت للغرفة سلمت على تغريد و طلعت
روز : محمد ترى جان بقينا والله عيب
محمد : عيبيش ولج أنا ما جاي استوعب هاي اختج شني
– بعد هو رزق بيد رب العالمين
محمد : ولج الرزق اله وكت يجي بي ، خرب عرضك عمي
روز : ديالله هسة انتو مو ١٢ واحد لاحك يعقوب على الوالد
– انتِ بس تخيلي امي بهذا العمر وتجينا حبلة
خرب غير اكتلهم اثنينهن الجريمة و اصحاب الجريمة
أخذني للمطعم و اني اسوي الموضوع عادي بس لسه مصدومة
اخذ تليفوني لان تليفونه طافي شحن
روز : ترى اسمي مال وحدة ملطلطة شنو زوجة محمد هسة يكولون ما مصدكة محصلة رجل
محمد : طبعاً وين لاگيها تحصلني
– لااااا ع أساس انتَ ما كتلت روحك حتى تحصلني
محمد : اويلي شكد عفت علمودك عالم خطية خاف يشورن بية
روز : هو اكول ليش ما ترضى تجي جنت شابع هناك
محمد : انجب حبيبي أنا ما أخونك
طلعنه نتمشى و ايدة على متني نفتر على محلات الأثاث اني ادري هو كل ميزانيته خلصت بس ما يجيبلي طاري لهيج مواضيع
الدنيا كلها بچفة عندي و هو وياي نمشي بدون ما اخاف ينقتل
بچفة ثانية لان جانت هاي السالفة الي مخربة كل أحلامي و طموحاتي ويا
روز : محمد ترى ما يهم المهم مكان اني وياك كاعدين بي سوه و انتَ موجود حتى اكل ما اريد عود نروح يم خالة رهينة ما تطرد الها واحد
محمد : تحجي عشرة بالشهر حبيبي ولك هي حتى جدتي
راح تكعد يم زِناد ما تريد عمامي
روز : احسن الها لان هي تتنفس زِناد و تريدة ٢٤ ساعة يمها
محمد : والله حتى أنا أتنفسة لو ما حاسب حسابج
جا گضيت عمري يمة عايش
– ترى هو هم يشحتك يعني راح يتزوج و اخته بالبيت
اكيد ما يرضى
محمد : حرامات أنا ما ردت عمي يعقوب يرجع ردت الوكت يدور بتغريد و محد يلفيها اكعدها يمي و امن عليها
بس هسة وين دخيلك ياربي تعرف تقسم و تعوض
بيت و رجل و طفل نفس السنة
ضربته على ايدة اضحك
روز : كافي شكد نسيواني انتَ روحك بذني السوالف
محمد : غرت من عمي يالله حبلي روز
– لا لعد وين وعودك نفتر الدول كلها يالله نجيب جهال
محمد : و شمدريني راح ارجع للعراق
گلت اخلص عمري بتركيا بذيج الشقة
روز : يالله البيت احلى من السفر المهم صار
عندنا بيت كلشي يجي ورا
محمد : يا سهل لج روز ترى أنا راح اطلع للشغل يعني حسبي حسابج تنظيف و غسل و طبخ مو حسبالج اجي من الشغل انظف البيت
روز : لا معليك راح أتعلم من هسة والله إلا اخلي البيت يلمع
و احنه نمشي وحدة صارت عينها على محمد هو مسوي روحه ما منتبه ادري بي يخاف مني كرصت ايدة باوعلي مبتسم
روز : كيفت مو
محمد : شمكيف ولج غير حاط ايدي على متنج يعني شسوي بعد أشيلج
– هي ملطلطة و انتَ الطط منها
– شني !!!
مشيت كدامة ضايجة و هو إلا شوية يكتلني بالشارع يريد بس اثبت حتى يسولف وياي بس اني ضجت صدك نظرتها ضوجتني
ليش الواحد لمن يحب شي ما يقبل حتى العالم تباوعله
رجعت للبيت ضايجة ادري هو معليه بس الطنكورة إذا اجتي ما ترضى تروح بساع احنه نايمين بغرفة اهل زِناد القديمة جدد كلشي بالبيت
إلا غرفتهم ما جاسها
و سوة غرفة لغريبة فوك لان الغرفة الجوه راح تصير لرهينة
جانت الهوسة كلها و البناء للديوان الجديد و عمار ابو محمد هم ضايج يكول المن مسوي ديوان مو بيتي بي ديوان
و اخوان محمد المشترين كيعان يم بيت شريك الجديد
كلهم يردون يبيعوهن و يشترون هنا و يبنون بس منتظرين علي و محمد يخلصون حتى امهم ما تشك و تخرب ام السالفة
زِناد قَسم الكيعان و حتى شريك يبيع و يرجع يكعد هنا
غريبة : ولج هاي عمتج حقج من شردتي منها
روز : اي والله انتِ ما شايفة شمسوية بالچناين
غريبة : ولج هسة عوفينه من هاي چنتها عالية حامل و رجلها بالعسكرية ما راحت و ياها
روز : ولج زين عالية عدها امها و اهلها أنا لو ما محمد
وياي وين أنطي وجهي تغريد هم عدها رجل و كاعدة عند عيالها و زحمة ابقى يمها هي و رجلها حتى لو عدهم بيت
غريبة : يا شمالج خايبة لا تحجين هيج تعاي ليه والله عين غطة و عين فراش بكل وكت و هي بت اختج راح تجي تصير ام البيت و جدة رهينة هم تجي هنا والله خوش لمة
روز : ما تقصرون والله و بالاخص انتِ غريبة الله شكد يحبنا
من صرتي يمنة و عرفناج لان لو ما كاشفين عجيبة
جان لحد ما متنة ما نعرفج
غريبة : ولج أنا الله يحبني عگب ذاك الضيم و القحط و الخدمة اصير ملكة بجال اخوي و أعيش بخيرة بلاية منة واحد ، و عايشة بنص وادم أنا ما أدري إذا كلها تحبني او لا بس اشوه من الغربة بعد ما جنت غريبة و محد بحالي
صرت بت شيوخ و اخوي شيخ تحلف الوادم بأسمة
روز : ههههه هاي زِناد كلكم تحبونه نفس الحب جا ليش تغريد جانت ما تحبة
غريبة : ياااااع عمت عين اليكرهة حشه اختج لان ناسبناها
بس زِناد ما ينكره و هنيال كلمن بحياتة مثله
روز : هسة جُمارة تنجلط هي خالة رهينة و من تتغزل بي تموت النوب راح تصيرن اثنين عليها
غريبة : أنا لو من جُمارة و عندي مثل زِناد الله وكيلج حتى من الطير أخافن عليه لا ينباگ مني خايبة وين اكو زلمة
يضم ثياب وحدة و هي جاهل يعلگهن بكنتورة و متأكد
راح تحبة و يتزوجها بيوم من الأيام ترى ماكو هيج
روز : صدك ؟ حتى هي ما تدري لان جان خبصتني
غريبة : محد يدري بس أنا من رتبت غرفتة كلي و لا دكليلها
يجوز منه تطلع احلى هو اول و تالي يسولف الها
– عفية هم احفاد رهينة بالحب واحد يكول للثاني أنا أضرب منك
غريبة : لا عيني ماكو مثل زِناد ، ولج أخذتنا السوالف تعاي ساعديني خل نسوي عشا اليوم زِناد كال أتعشى هنا
روز : اساعدج شسوي كليلي
– ساعديني و تعلمي شني نيتج انتِ باجر مو تكعدين وحدج ببيتج رجلج يبقى ملطلط ياكل من البيوت
روز : ما يصير الاكل بيدي طيب لو احط روحي بي
غريبة : لان ما تنطين روحج فكة تتعلمين عايشة على الما اعرف حتى ما تتعبين مثل هذا اليكول كاتل الجوع بالراحة
دام زلمتج يطلع و يشتغل و يجيبلج حتى يدللج انتِ هم دللي
روز : ترى هو يعاملني مثل الطفلة و مدللني يعني لا عبالج
يعوفني لان ما اطبخ
غريبة : ما يعوفج شحدة بس انتِ هم لازم تتعلمين
بعدين اكلج رجلج ما يشبههم عليمن طالع
– مو حلو على أساس من حلاته ، مزاعلته أصلا
– هههههههه ولج ليش
روز : من طلعنه وحدة باوعتله و هو ما سوه شي
– جا شيسوي قابل يطگها انتِ صدك جاهلة
أساعدها و هي تعلمني و تنصحني صدك غريبة تنحب بساع
و هنيال كل بيت موجودة بي منها بحيث حتى الشغلات الصعبة
بثواني تسهلها
وكفت اثرم زلاطة و هي تعلمني شلون أنعمها اكثر عدلت شالها و ضمت ظفيرتها من طَبوا زِناد و محمد و ولاء
زِناد : ها خوية طابخة لو اروح يم جدة
غريبة : ليش خوية شني ما جابتك الريحة مال الاكل
ضحك و هو ينزع غترتة
ولاء : مو كلها طابخة و الشارع متروس ريحة اكل ما تدري من يا بيت طالعة
غريبة : يالله غسلوا و كعدوا راح أصبَن
زِناد : تعيشين
حطت الصينية و دفعتني عاضة اصابيعها ثرمت الزلاطة بساع
صبتلهم و كعدوا ياكلون و اني وياها ناكل بالمطبخ ما ننشاف لان هم ببداية الصالة و بين المطبخ و الصالة قاطع
ولاء : جُمارة بنتي زعلانة منك ردت أجيبها ما قبلت
دكول جان يومية يجي يشوفني هسة بعدة ما تزوج و نساني
زِناد : ههههههه لاااااه والله حقها
محمد : عمي سكتوا ماكو مثل حمودي ابن سلام
ولو بت سلام جوجة هم لسانها ما ينجرع تضحك عليه بحچايتين الله وكيلكم
زِناد : أنا مو كايل الكم ما تطلع هي و دشداشتها و حجابها الكاها جايه تتمخطر جنها جدتي الله وكيلكم
غصيت باللكمة و كمت اضحك و كلهم ضحكوا ضلت غريبة
تدك على ظهري و تشربني مي
محمد : اكله اول امس طلعت لكيتها تهف من راس الشارع
من عاينتني غطت وجها و اندارت عود هي غريبة و تيهت
كل ضنها يعني أنا ما لچحتها
ولاء : هههههه كارثة
محمد : تالي صحت الها آيست و اجتني عود خايفة جريت أذانها كامت تبجي كلت الها اليوم جلسة بالليل اذا ما يسويلج حل أنا أدبج ، دكلي و ابوي شني انتَ عمي و تكسر راسي يمن اروح فدوة لهاي الشوارب
زِناد : حاجيت ابوها
– لا والله ما اكلة لا يطگها و تجي تعاتبني
زِناد : هو انتّ ضحكت عليك ابوها ما تضحك عليه
ولاء : عمي هي جهال لو شياطين
زِناد : عمي يعقوب كون يخلص بيته و يستقر اعاينة من يوم الاجة لليوم ما مرتاح
محمد : ليش ما مرتاح انتَ الما مرتاح غير ابنه جاي بالطريق
– لااااااه
صار هدوء و محمد يضحك و حتى غريبة فتحت عيونها بصدمة تباوعلي
حطيت ايدي على حلكي و عاضة شفتي
ولاء : لا صدك
محمد : اي والله جا شني اجذب عليكم
صعدت بغرفتي وره ما خلصنا غسل اماعين اني و غريبة و هم كاعدين بالحديقة و غريبة ترتب بغرفة زِناد و جُمارة كل يوم ترتب شي على راحتها و غريبة صارت عدها الحرية زِناد يخليها تاخذ اخو محمد
الصغير هادي و تروح لأي مكان
عيني من الشباك على بيتي يومية اباوعلة شوكت يخلص و ارتاح
من سمعت صوت محمد صعد غطيت روحي بالبطانية
حتى ما يكعدني لان ما اريد احجي ويا فتح الباب و طب للغرفة يغني
لحد ما صار قريب مني شال الغطه يريد يتأكد اني نايمة لو لا
محمد : حضرة الزعلان بيش مزَعلك
أنا المداريك اكثر من هلك
درت وجهي عنه بعصبية كعدني و خلاني بحضنه ضربته و اريد اكوم
وهو محاوطني بأديه و يضحك
روز : وخر احسنلك لا تصير مو خوش افتهمت لو لا
محمد : اخرب ع المو خوش
روز : حرامات ما خليتك بالسجن
محمد : يا حرامات هو أنا مسجون و انتَ تبجي
– دير بالك مني ترى كلشي اسوي
– طبعا حبيبي أدير بالي جا انتَ اول و تالي بيك رس من اختك
روز : ما تعوف اختي بحالها
محمد : ها هسة تطلع حامل بالوريث و يطيح و أنا حاسدها
روز : هذا كله و ما حاسدها لعد لو حاسدها شلون
– ههههههه ، خرب فلا أطيقها و لا أطيقها
روز : ترى حتى هي يجوز بيوم من الأيام تحب زِناد و انت ما تحبك
محمد : نعلعلة والدية إذا خليتها تحبني
روز : محمد انتَ شنو تريد جهال ؟ أحسك تحبهم
محمد : أنا احبك انتَ انعل ابو الجهال
– و إذا طلعت اني ما اخلف
– عادي طبعاً هاي الزعاطيط تارسة الشوارع
اخمطلج واحد و ربي
روز : يعني تريد
حضني بأثنين اديه قوي و باس خدي
محمد : أترجاك هسة تچفيني شر الجهال لان رجال مضطهد
و عندة بناء و جد جدة مشتعل من يخلص البيت و نسافر
و اشتري سيارة عود ميخالف نفكر نجيب النه چلب
روز : بعدهم ما جايين و سويتهم چلاب
محمد : چلاب ولد چلاب
– تريد أحاجي تغريد على فلوس لان هي راح تبيع البيت مالتنا و تساعد رجلها اني هم أساعدك
محمد : ليش تحاچيها غصباً ما عليها هي من تبيع تجيبلك حصتك خليهن الج أنا ان شاء الله ما اعتاز
روز : ليش مستعجل زِناد على العرس
– صارت بيه خوفة الزلمة ساعة و هم طلعتلة سالفة صفح
روز : امك تحجي وياها
محمد : احجي وياها تريدج ترجعين و عالية هم راح ترجع
انتن مو رفيجات بين ما يخلص البناء
– لا دخيلك محمد ما ارجع يم امك
– بداعتي
– بداعتك شنو محمد بداعتك و اني مو ما احجي وياك أصلا شكو تحجي وياي تريد ترجع يم اهلك ارجع اني اخاف من امك شكم يوم ما تحملتها
محمد : تعز عليه نومتج هنا ادري بيج ما ماخذة راحتج
روز : عادي اصبر لحد ما يخلص البيت
مو جاهلة اني و امك كل شوية ضاربتني
و ولو عندي ام جان بقيت يمها لحد ما خلصت البيت حالي حال عالية
انهضمت و اني احجي مسحت دموعي
و هو لزم ايدي يبوسها و يسكتني
محمد : هاي هي كافي كافي والله بأسرع وكت احاول اخلصلك بيتك
و تكعد بي و من هذا الشارب لك تبجي ، طاح حضك
روز : ضمني يمك
حجيتها و غطيت روحي بـ چاكيته
…
يخابرني بالأسبوع مرتين و اني الوب و شريك اخوي بعدة قافل إذا ما يكمل البيت ما ارجع لبيت عمي عمار و فوك الضوجة أنا أعاين روحي تعبت من الحمل و من الثگل امي تهون عليه و دكلي تخلص و تصير سوالف و شمعة كل ما تعاين حالي تخاف اكثر
و هالايام جثير مضنوكين من وره ديانة شريك اخوي يجون يكسرون الباب علينه و امي تطلع الهم دكول الهم ما موجود
شمعة بدلت و خابرت اخوها خاطر يجيها راحت ناوية تاخذ من فلوس نيشانها المَرمر شريك ، و لأنها بالليل جاية تبجي و زعلانة من اهلها
و امي تسكت بيها لان مايصلح على الطفل
ام شريك : انتِ شلون ترحبن والله لو يدري شريك يكطعج
شمعة : جا أعاين الديانة يومية داكة بابنة وهو ياكل بروحة
– خليها على الله هي تصفى
– هو حگي عمه موش مانين عليه و ما يرضى حتى ابيعن ذهبي و يطيهم يكول مسوي سلفة من استلمها اطيهم
ام شريك : والله أنا بعت العلية و الوراية خاطر أعاونه
و يكمل كل غراضة و يرتاح بقوا بس ذولة
بـ السبعة بالليل دكوا الباب و امي طلعت الهم وهم يصيحون عليها
و احنه واكفين بالباب نباوع الها
شمعة : عمة لا دكليلة عليج الحسين أنا باجر
أتعارك وي امي و ابوي اخلي غصباً ما عليههم يدزولي من الفلوس
ام شريك : خاف يردون باجر ، إذا ردوا اروحن لزناد
عالية : لا ما يرجعون ان شاء الله مال السل مو كتيلهم خمس ايام و ينزل بعد شعدهم جايين
و احنه نحجي دك شريك على امي فتحت السماعة و حطته على أذنها
ام شريك : هلا يمة هلا يبعد امك شونك
شريك : شونج يمه شلون صحتج انتِ و البنات
ام شريك : و الله كلنه نبوس ايدك و مشتاكيلك
شريك : الله يخليج ما بقى شي ، يمة اكلج اكو اثنين ذولة
إذا دكوا الباب و أنا ما موجود لا تفتحي كليلهم شريك مو هنا
– اجوي يمة و طلعت الهم
شريك : شعندج طالعتلهم يمة احجي من ورة الباب صدك تحجين
ام شريك : ولك شريكان ترى أنا امك موش شمعة شني تغار عليه
– كلجن أغار عليجن يمة و ما اريد الهوى الهاب يحرك عبيچن
و لا يلمحجن بشر عليج الحسين يمة لا تخلين بالي يبقى يمجن
ام شريك : ولك يمة يااا جا ما تأمن بأمك والله هذّني مكابلتهن و كاعدة لا نمشي منا و لا منا كاعدات و ساكتات
– احسن يمة احسن الدنيا مو أمان
– أنا ترضى لو ما ترضى ترى كلت راح اروحن لزناد بس يجون بعد هو يسويلك حل موش ابن عمك و جبيرك
جا ولد العم المن تنراد و هو والله ما يقصر
شريك : لااااا يمة ديري بالج تروحيلة وعلي تصير مو خوش عوفي زِناد زحمة جثير مكلفة أنا و هو هسة حاجزلي قطعة وي الولد ما يرضه تبقن هنا زحمة هسة شيكول عليه
ام شريك : صدككك ، اي والله يوم السَعد الـ نرد بيها يم جدتك
و عمامك والله ابن آدم إذا ما يكعد بنص هَله لا خير بعمرة
شريك : شمعة إذا يمج كليلها تدك عليه
– اي ذني يمي
– و هاي يمة الحَلة مال الإعدادية لا تخليهن يطلعن بالكراج
ترى كل ولد ملطلطة
ام شريك : ولك شكالولك عليه شني ما أخوف أنا
ذني كاعدات هن وبطونهن وين موليات شوداهن يم المدرسة
اوف منك و من غيرتك
شريك : تحمليني يمة
– هاك بعد امك هاي مرتك احجي وياها ، ولج الله يساعد كلبج
شمعة : احلى من العسل على گلبي
اخذت التليفون و راحت للبراني
ام شريك : هذا اخوج لا ينجرع و لا ينگحم
عالية : حقة جا أنا لو رجال و مرتي شمعة أحطها بجام خانة و ما اخلي احد يعاينها غيري
– هههههه النوب الحبالة لايگتلها
من نهاية شهر الثامن و أنا الأوجاع موتتني و كل يوم حسبالي جاي اطلك و تاخذني للمستشفى يحطلي مغذي و اصير زينة يطلع ماعندي ولادة و امي من كثر ما تخاف من شريك تاخذ حتى شمعة ويانة
و جدة ثاني يوم من تسمع تجينا
رهينة : دكي علينا من تصير هيج خل يجي واحد من الولد ياخذج خل ياخذج سلام بسيارتة
ام شريك : ما اريدن منهم منية بتي هي الشهور كلها يمي
ما اجت عمتها و لا دكت الباب عفه كلبها شني من حقد شايلة
– ولج هي هاي روحها ما تحبها
شايخة على الوادم عدها عشر ولد و ولدها عشرتهم ما يطيقوها
ام شريك : ماكو هيج كش و غدي والله ما ينلام شريك من ما ردها الهم هسة هي ما يكسر كلبها ابنها الراح يصيرلة بالشهرين ما نازل
رهينة : خل ينجب ابنج جا هاي الولد وين تنطي وجها إذا الأمهات مابيها خير ، لحد ما يدمرن حياتهم يالله يرتاحن
شمعة : جدة هو غير يخاف عليها منهن لا امة و لا اختة و لا خالاته يتأمنن
رهينة : و انتِ شني شالتج الغيرة هاي كلها لخاطر كلت عليه ينجب صايرتلة مدافع
شمعة : يمة بعد عمري طبعا ادافعلة جا شعندي غيرة احبل اجيب
ضحكت جدة و ضربتها على رجلها
رهينة : مغزر وياج لازم
شمعة : ههههه يا جدة شمالج ، و طبعا مغزر وياي جا شلون هذا عاديت الدنيا لخاطرة و لخاطر عيونه
رهينة : اخذ وحدة منهن اخليها يمي خو ما اثنينهن بركبتج
ام شريك : لاااااا يمة دخيلج شيخلصني من هذا المسودن و هو كل شوية داك عليه روحه هنا
دك علي على تليفون امي ردت ما أجاوبه بس كلبي ما ينطيني
عفتهن و رحت للبراني جاوبته فتحت خط و من سمعت صوت رمي فزت روحي و الخوف شكل بية حتى بطني كانت توجعني
علي : الو
عالية : الو علي وينك انتَ وين يمة شني هذا الرمي
– ماكو شي حبيبتي شلون صرتي
– على أساس شلون يهمك
– شلون ما يهمني ليش هو انتو دقيقة من بالي ترحون
– جا ما تجينا
– وين أجيكم أبقى اكل بروحي انتو يمي و ما اكدر أخذكم
خليني بعيد احسن بين ما يخلص البيت بس يشدون الشبابيك اجي اخذج عود ابقي بالغرفة لحد ما يكمل البيت
عالية : ترى ما ضل شي و اجيب شنو نيتك هم ما تجي
و امي جثير ضايجة من اهلك
علي : أنا ما احجي وياهم ، معليج بيوم الـ تجيبين اجيج
– خاف تجذب عليه
– شلون اجذب عليج وداعتج اجي
عالية : اي تجي علمود ابنك موش علمودي
– يعني ابني منو امه غير انتِ يا شلولو
– لا موش امة و لا أريدكم
– مشتاقلج يا ادبسز والله عطشان
سديت المكالمة منه وانا دموعي تجري جثير الشوك يتعب
و روحي شكد ما تكابر من تسمع صوته مدري شيصير بيها و تنسى كلشي امي يومية تقفل البيبان العصر و تروح تجيب الها جم شغلة لجهاز الطفل
عالية : يمة عليمن ترى الجبتيهن كلش كافي هو يجي ابو
و يجيبلة انتِ احتاري بروحج
ام شريك : ولج مو عيب هذا حفيدي و معروف الحفيد الاول
تجهزة ام امة و إذا لاحفادي ما اجهز المن اجهز
عالية : خوش مدللات الآباء
ام شريك : عمت عينج مو جاي يبنيلج بيت الولد جا بعد شيسوولجن و ترضن شبعنه ضيم من العيال يالله كعدنا ببيوت
– جا تجيبين جدة رهينة لعمتي
ام شريك : ولج لا يغرج جدتج هم جانت مشبعتنا ضيم بس هسة غير كبرت و الجناين هم كبرن ، بس واحد يحجيها لله هي تفرح دوم من تعاين ولدها وي نسوانهم متصافين
ما تسوي مشاكل
شمعة : يالله إذا هيج زين الباقيات سهلات
– اي بس خلي جنة ما تسمع حجيها لو تطلع من شورها
ما تحشي رجلها و تخلي يطگها هي تكض العصى و تطگها
عالية : جنج مكتولة يمة اعترفي
ام شريك : اي ولج مرة ضحكت علينا عجيبة كالت كشخن و امشن اطلعجن للسوك جانوا رجولتنا كلهم رايحين للبصرة فاتحة طكينا المكياج تخم و حطينا العبي بلاية حجابات
رحنة للجمعية نشتري و كلها تعاين علينا شبعنا تصچيم بذاك الوكت و لحگونا جم واحد للبيت تالي فتنت علينا
ربيعة مال السل جانت هي و جدتج وحدة تغار من الثانية
و كل وحدة تريد تكضب زلة على الثانية
شمعة : عزه و شسوت الجن جدة
ام شريك : يا ولجن شني الما سوته كضت الصوندة و كطعتنه و احنه مثل بلاعين الموس فوك الكتلة تهددنا دكول الهم من يجون و احنه ندري لو دروا ننكتل فوك كتلتها و نتطلك جرعنه المر و سكتنه
عالية : تستاهلن جا مو عدجن رجولة شعدجن رايحات تدورن زلم
ام شريك : انجبي لج غير هم سرسرية شلنا غرض احنه
شمعة : ها عمة حتى انتِ مو هينة
ضلت امي تذكرلنا مواقف كبل و جدتي شلون جانت و اني و شمعة نموت من الضحك لحد ما كمت ابجي من الضحك هي شمعة اشوه مني بس أنا دومي عكس العالم شكلت عندي الضحكة بحيث حتى من امي تكح اموت من الضحك
ام شريك : ولج يالمستهترة ساعة و طلگتي
و انا اضحك اكللها يمة والله شو بطني توجعني ما صدمتني حسبالها مثل كل مرة
لحد ما ظلمت الدنيا و الوجع ما هدني تالي كمت اصرخ
امي خابرت جدة لان دنيا الليل و ما تكدر تخلي شمعة وحدها ولا تاخذها ويانة لان مهددة بالإسقاط و تخاف عليها
اجتي جدة و ولاء اخذتني امي بسيارة ولاء
و بقت يم شمعة ، بس امي ماخذتني و متأكدة راح ترجعني مثل كل مرة
صحيح امي وياي و شايلة همي بس ما بعيني غيره علي
يجي يمي و يعاين حالي من كثر ما مشتاكتلة أنسى حتى الوجع
وصلت للمستشفى و جنت اتمنى مثل كل مرة يحطولي دوه و اصير زينه بس طلعت عندي ولادة ، الخوف إحتل جسمي كله
و امي فرحانة و تدعيلي الله يسهلها عليه و أنا ما الهج غير بأسم علي
عالية : خابررري يمة خابرييي هو كال اجيج
ام شريك : ولج حتى تليفوني نسيته هناك من الهبطة هسة خلي عينج بعين الله جيبي و ارتاحي يمة
جنت اكولن ليش الجنة جوه رجلين بس الأمهات ما يكولون جوه رجلين الإباء هم خو الإباء تطلع و تشتغل و تداين في سبيل تدبر كلشي بالدنيا لجهالها يعني اثنينهم يتعبون
بس من عاينت الولادة شتسوي بالأم و شلون تطلع روح من روحها
عرفت ماكو شي اللهي غلط
فضحت الدنيا بالعياط و امي ما يخلنها تجي يمي و روحي تلوب مثل الطير المذبوح لحد ما سمعت صوت طفل يبجي و الوجع الجنت احس بي نسيته طبت امي تصلي على محمد و اني روحي تاهت
ام شريك : صلاوات على النبي
– حجية هذا علاوي وينة ما دكليلي اليوم نسبينا بأسمة عاد حلو يستاهل هذا الحب كله
– يمة نسيبي يخبل فدوة لعينة
امي فوك راسي تبوسني و تمسح وجهي
ام شريك : يالله يمة هانت هانت و خلصت وليدج يجنن مثلج
غمضت عيني من التعب و حولوني بغير غرفة كل شوية افز و ارجع انام
احس روحي مهضومة اكثر من ما متوجعة ، شوية و فزيت على صوت ضحك بالغرفة ايد خشنة على گصتي و تمسح عيوني
فتحت عيوني على كيف
علي : ها حبيبتي الحمدلله على السلامة
حجاها و باس راسي و أنا مثل الجاهلة دموعي علي خدي كامت تجري شبگني و هو يسكت بية و يضحك
ام سلام : اي الحمدلله على السلامة
باستني و باوعت اله مصدومة هَزلي راسة بمعنى عديها
جابوا الطفل و اخذته امي شالته وهو عينه عليها لحد ما وصلت يمة
شاله يضحك و الفرحة ما سايعته اخذه يأذن بأذانة و مبتسم
علي : ما شاء الله ما شاء الله
اخذته امه تبوس بالطفل و تعاينلة
ام سلام : شتسمي يمة سمي عمار على اسم ابوك
علي : لا زِناد
ردينة للبيت الصبح و جدة بايتة يم شمعة حتى جدة تخاف من شريك
سوو غده بـ بيت عمي عمار و اخذوا الطفل مني بس من خلص الغده
جابه آلية همزين تارسينة فلوس
علي : امشي وياي للبيت انا اداريج
عالية : ما اروحن لأهلك المسمومين لو تموتون و شريك العصر ينزل
علي : ولج هيج كلبج ما يرف عليه
عالية : والله ما اكسر كلام اخوي الشايل همي الأشهر ذيج كلها و انتَ شارد و اهلك زاتيني مثل الغريبة موش حسبالك اجتني امك باستني راح أضعف و ارد وياكم ترى أنا مسمومة اكثر منكم صرت
علي : كافي كافي انهجم بيت لسانج حتى و انتِ مريضة
يالله ديري بالج على ابنج ما راح التحق
الخميس عرس زِناد ، كل شوية و أجيكم من تحتاجين شي دكي عليه
…
طلعت من الكلية هلكانة تعب و روحي صايرة بخشمي والله السادس نعمة وكفت برة كتبي و اللابكوت بيدي و عيني على السيارات وين سيارة زِناد ماكو
حنين : شنو اليوم ما يجيج
جُمارة : لا شلون ما يجيني معقولة نساني خل ادگ عليه
فتحت تليفوني اتصلت
حنين : بالله فتحي سبيكر خل نسمع صوته
باوعتلها عاقدة حواجبي حركاتها مو طبيعية
جُمارة : لا السماعة عطلانة
انطاني رفض ثواني و سمعته دك هورن اشرتلها باي و فتحت باب الصدر شمرت الجنطة و الكتب و كلشي بيدي
زِناد : سلامات
صعدت و سديت الباب قوي
زِناد : بعدج ما صرتي دكتورة و تصلحيها من راتبج
جُمارة : يعني مو تدري بية زِناد احل من وكت صارلي ١٧ دقيقة منتظرتك و اني تعبانة يعني بهذا الوقت جان
مبدلة و متغدية و مرتاحة
يباوعلي هو و مبتسم يمسح بـ شواربة
ابتسمت بوجهة و مديت ايدي على ايدة
جُمارة : بس شيلهن من شواربك انتَ مو لوتي تدري بية احب هاي الحركة تسويها حتى اسكت
زِناد : ههههههه اخ منج
جُمارة : اخ منج و اخ منج و يالله اشتريلي اجنحة ما اريد اكل وياكم
زِناد : شنو اشتغل عندج اني لِج
جُمارة : تشتغل عندي جا شنو اجيبلي واحد من الشارع يشتغل عندي و يتصخرلي طبعاً اصخرك من اريد شغلةً
غير انتَ خطيبي يعني
زِناد : شني تصخريني لج جُمارة ساكتلج لان حالياً مرتاح
جُمارة : ليش مرتاح شعندك صاير تخوف
ما جاوبني مبتسم و عينة على الطريق قريب ما نوصل البيت انتبهت على روحي شكد احجي و هو ما يجاوبني بس يضحك
جُمارة : صدك اني نسيت اسألك عود شنو هاي جاي يجهزون للعرس و اني ما ادري يا عرس هذا
زِناد : عرسج يعني عرسمن
جُمارة : واو واو ما شاء الله عليك شيخ هاي اول مرة يصير عرس العروس ما تدري بي ما صايرة قبل
– عادي تصير وياج مو مشكلة
طبك السيارة و اني نزلت انزل بغراضي و هو يباوعلي يضحك
جُمارة : هذا اعتبرة تهديد تحذير مادري شتريد اعتبرة زواج ما اتزوج هسة و شتريد تسوي سوي
زِناد : هسة أنا حجيت و اريد مرة دكول لا
– لا و الف لا و الفين لا
طبكت الباب قوي و طبيت هو ما نزل وراي و أجنحتي بيدي لكيتهم ياكلون سلمت و صعدت أكلتهن و نمت بعد ما نزلت
بالليل كعدت شبعانة نوم و ورود ما دامها هنا البيت و الغرفة يلمعن لمع بكل دقيقة حتى هدومي و كتبي لكيتها مرتبتهن نزلت بالهول لكيتهن كلهن ملتمات يسولفن و يضحكن و جدة كاعدة بالنص
لارا : و اخيرا نورت ام خصر منحوت شرفي يا عروس
اجيت لجدة بعصبية
جُمارة : يا عروس جدة يا عروس كولي لحفيدج جُمارة دكول لو تموت ما اعرس بمزاجك إلا بأخير السنة
رهينة : يااااع ماتت عظامج ولج و شني الفرق هسة لو بعدين تراه ما راح يبطلج كاعدة ببيتج و بغرفتج و تقرين على أساس راح يسرحج بالهوش لو توكفين معزبة للخطار
همزين يدري بيج و حافظج لا سدة و لا هدة
جمارة : خابري يالله خابري خل يجي تليفوني فوك
رهينة : اخابرة جا يكيف يجي راح اكله مشتاگتلك تريدك
– اي مشتاقتلة هو اني الظهر تعاركت ويا
– عمت عينج شالعة گلبة حتى من اخذج ما ارتاح
لارا : ما بدك تتزوجي و نحنا صارلنا أسابيع بنتجهز ما كذبوا الي قالوا المعاريس اثنين و المجانين الفين
نورس : دتعاي تعاي خلي أقيس لج و اخلص من ثيابج
حتى يطلعن حلوات مادامني متحمسة
رهينة : سويهن كلهن مخصرات و دلعات خل يشبع
بعد عمري خلص عمرة محروم
جُمارة : بعد بعد فضحي الرجال هسة هو شاكيلج و ترى بالنسبة الي لو يشوفني لابسه كونية ينعجب بيه
رهينة : خايبة وعلي يجمارة إذا ما دللتي بعدين أنا ليش متعبة روحي هو أنا يمج بالبيت اصگرج
جُمارة : ما تبقين يم ولدج حتى هناك لاحگتني ما تخلين الواحد يرتاح ، استغفر الله
– هسة خل يجي أنا اعلمج بسيطة
نورس : لا احجي الصدك جُمارة بعد صرتي جبيرة راح تتزوجين عود زِناد شلونه وياج يعني من تحجون
ام عدنان : جا ما عاينتنة بيوم الملجة ما جنه الشيخ
الانعرفة طاير بيها طيور
لارا : يعني كيف بيتغزل فيكي احكيلنا
جمارة : عيب عليجن ما تستحن و بعدين ترى ما شايفته هواي عندي امتحانات و بالطريق ابوي ويانة اكثر المرات
و مرات يعني تصير اشياء خفيفة و يالله سكتن
رهينة : جا هو هم فاهي منطيج على مايج لو منه وعلي
يطلع القضى و المضى بيج
نورس : يجوز ما يريد يتعبها خطية
رهينة : الووو ها يجدة شونك شو ما اجيت اليوم على العشه و لا على الغده شني زعلان
… تعال جُمارة تكول مشتاكتلة
جُمارة : تعال دتعااااال اليوم
سدتة جدة تضحك و امي كاعدة تباوعلي و تضحك نورس تاخذ قياساتي و دمعة تباوعلي صفح
ورود : جُمارة اخذي البدلة وردية فاتح جثير يلوكلج هذا اللون و الله
جُمارة : اشوف اشوف
رحت للمطبخ اشوف شي اكله تعاجزت اسوي كعدت يم امي
جُمارة : ابوي وين ما تخابري يجيبلي حلويات
تغريد : خابري من جدتج
– استحي كليلة انتِ
خابرتة و انتي كاعدة يمها اسمعة يكللها صار ، هاي جُمارة و ام جُمارة شتريد و امي تكله سلامتك و ابوي يشهي بيها بس يريدها دكول اي
رهينة : ما خابرني زِناد مو راح يجي يجيبلج ويا
جُمارة : ما احجي ويا و لازم اصير ثكيلة شوية
– انهجم بيتج
اجه ابوي قبل زِناد و جابلنه حلويات كعدنا يم جدة ناكل و نسولف راحت امي نامت فوك بغرفتها بس ما اشتروا غرفة
منتظرين البيت بلكي يخلص ، بقوا عمامي الصغار و عمي فاخر يم جدة هم و نسوانهم كاعدين يسولفون
جدة : جا وين زِناد خاف راح نام
قاسم : لا سيارتة ما موجودة بالشارع
شوية و طَب كال السلام و كعد يم جدة على الكرويتة و اني بينك و بين جدة كاعدة بالكاع بيدي جبس و ببسي و هم يسولفون ما يشبعون حجي لحد ما صعدوا كلهم بقت شمعة و عمي فاخر كاعدين
مد ايدة زِناد لقوطيتي اخذها شرب منها و انطانيها
رهينة : يابة ما تريدني بـ بيتها مرتك
لميت شفتي لداخل حلكي اضم الضحكة
زِناد : تتشاقة وياج جدة
حجاها و مد ايدة على ركبتي كرصني شهكت لان نزيت
فاخر : تعاي دمعة صعديني
لزمت ايدة تصعده وعينها علية خازرتني
رهينة : والله جثير مرتك مستهترة و انتَ مرخيلها الحبل و انا ساعة و طكت حوصلتي منها اكضها بالعصى اكطعها
وكفت الها و ايدي على خصري
هو يضحك جر ايدي وكفت يم رجليه
زِناد : لااااه ما تنطگ جُمارة جدة
رهينة : شطلع عينها غيرك بس أنا أعرف شلون ايدبها
حطيت ايدي چتفة و كعدت على رجلة جدة لطمت على خدها
جُمارة : شحدج تضربيني شنو تايهتلج
رهينة : جا موش تصيحين متعاركين
جُمارة : عرك الحبايب جذاب و شو جنج مكيفة إذا نتعارك
هو بچف لازم ايدي و جف ايدة الثاني ورة ظهري
و صافن على حلگي من احجي وي جدة
رهينة : وخري لا ينزل واحد من عمامج و لا يطب احد
جُمارة : رجلي شنو وذا جا قبل شوية ياهي تصيح محروم
زِناد : هي مال محروم صدگ محروم
درت وجهي خازرته صار وجهي قريب عليه ضرب خشمي بخشمة
رهينة : و ما تريد تعرس دريت بيها يو لا مو اكلك جثير
منطيها مجال دكلي لا جدة
جُمارة : اي و ما اتزوج
مد ايدة على جفني شال شعراية و مسح عيوني
زِناد : بكيفها هيَ
باوعت لجدة بنظرة انتصار و جدة انهارت كرصت خده وهو باس ايدي
رهينة : ياااااااع زِناد تبوس ايدها عابت جهرتها
مديت ايدي كبال وجهة بأسهن اثنينهن وجه و گفة و هو يضحك
و جدة تشهك شهكة وره لثانية
رهينة : امشي اخذها لغرفتي امشي ولكم تخزينا و انفضحنا يبووووو عليج يرهينة
زِناد غص من الضحك و اني اباوع لجدة بشماتة
جُمارة : بعد اكثر من هاي الأدلة شتردين جدة
رهينة : والله لو يدرون بيك تبوس أدين هاي الفرخة جا شروك على الحبل
لزمت وجها بأثنين ادية بست خدة وهو كل شوية يضغط على خصري قوي يريدني اتأدب وهو مكيف
رهينة : والله عاينت نسوان ما يستحن بس مثلج ما عاينت
هي ترزل بية و اني ارفعلها حواجبي و اقربلة خدي يبوسني
زِناد : انتِ هم كليلهم جدة ترى حصصهم من هذا البيت ما تطلع الهم قطع و بنيان يعني كلمن خل يطلع المضموم
رهينة : يطلعون شبيهم جا دفانة و بعدين صكد يجدة تهد هذا البيت هو صكد تعبان بس حرامات
زِناد : يعني إذا تعبان المن مخلي جدة حرز لو شني
بعدين أنا أريد اسوي مخزن و اكبر المعمل
رهينة : صكد يجدة جا هدة و انعل والديه يبعد جدتك
عسى ايدك هاي ما تمسها النار
جُمارة : اممم اي جدة شكد يكفيج بالشهر حتى بعد زِناد يحسب حسابة و يضم فلوسة ورا جهالة و مستقبلهم
و سيارة مرتة
قرب شفته يم اذاني
زِناد : مو ما اريد اطيح حضج
رهينة : و انتِ شني تحاسبيني هو دومة يكلي الصاية و الصرماية بيدج و ما تجي وحدة فوكاج و فلوسة يمي يضمهن ما يأمن بغيري
زِناد : انتِ الحظ و البخت جدة
جُمارة : هذا قبل الحجي جدة من جنت اني ما موجودة بعد إجيت و فلوس رجلي يمي عود من تحتاجين اني انزلج لا تخافين بس على كيفج بالصرف عدنا مسؤوليات
رهينة : انعل ابيج لابو المسؤوليات ولك زِناد ما تسمعها
زِناد : هسة من الزينات جدة إذا طلعت تخاف على فلوسي شعليج بيها انتِ الج الصافي
خليت راسي على متنة كعدني بصفة على الكرويته و خله راسي على صدرة ريحة دشداشته طيبة
جُمارة : و إذا اني كتلك اريد
زِناد : روحي الج ترخص صدك چذب
رهينة : والله جنك نعست سحرت عليك هاي الفرخة سودنتك
كوم نام يجدة كوم وراك شغل و انتِ مو وراج كرّية الله يچرم
ما تنامين
جُمارة : اريد ابقى يم خطيبي عادي انعل ابو الدوام
رهينة : هذا كله و تصيحين ما اريد اعرس عمي خل نعرسج و نستر على ارواحنا احسن النا
زِناد چتافة تهتز من الضحك و اني مغطية وجهي بزندة ما اريدها تشوفني اضحك
جُمارة : يالله حبي روح نام روح اكو عالم راح تتخربط خطية
كام يعدل بدشداشتة و بيدة تليفونه و جگايرة جدة مدت ايدها اله تريدة يگومها قربتلة خدي باسني و صعدت أتمشى من يمها اتمخطر
وجدة تغلط عليه لكيت دمعة واكفة يم الباية الاولى تريد تنزل عبرتها و صعدت نمت
اخلص من جدة و دمعة بالبيت تجيني حنين بالدوام
من نزلت من السيارة لكيتها تريد تفوت بقت واكفة تنتظرني حتى نطب سوه
زِناد : ديري بالج على نفسج
حجاها و فتح محفظته ينطيني مصرف
زِناد : بوسة ع الأقل لو بس يم جدة تشعلين الخلفوني
ضحكت و رجعت صعدت بالسيارة بستة و نزلت ضميت الفلوس بجنطتي
حنين : ما تستحين ولج شلون تبوسي كدام العالم
جُمارة : خطيبي عادي ، بعدين سكتي جاي اتلوگلة
بلكي يشتريلي سيارة صغيرة يعني شكو بيها
– سيارة وين اكو شيوخ عدهم مرة تصعد سيارة
– عادي قبل ما جان عدهم احد يداوم و لا وحدة تطلع بدون عباية و كلهن علمودي خلاهن يصيرن
حنين : يالله تعاي ناكل ورانا كومة امتحانات
– اي والله
اول ما طلبنا اكل و كعدنا دگ تليفوني رقم جدة جاوبتها و اغور بيها
على زِناد و اضحك وهي تسألني ابوي راح ويانه لو لا
حنين : شنو جدتج تغار منج
رهينة : لا يمعودة اتشاقة وياها هي أصلاً اكثر بشر يتمنى يشوفنا سوه مرتاحين بس هي فطيرة يبين عليها
تحب زِناد اكثر مني ، يا بس مني تحبة حتى اكثر من روحها
حنين : ليش تحبة شنو ماعدها غيرة قابل
جُمارة : عدها عشيرة كاملة بس هو عدها بالمرتبة الاولى
و طبعاً هو بكلشي مرتبة أولى ، فدوة لوجهة
بقت ساكتة و اني هم سكتت خلصنا المحاضرات بدون ما نضرب وحدة
و بكل محاضرة امتحان بحيث هلكنا من صدك
قبل لا اطلع دكيت عليه حتى إذا بعدة مجاي ابقى كاعدة جوه
بس طلع واكفلي جوه حنين قبلي طالعة هي و عماد تسولف برة
مشيت للسيارة صاحت عليه اشرتلي تعاي ما كدرت افشلها و الطلاب واكفة و خفت من زِناد لا يسويلي سالفة
بلعت ريكي و رجعت الها بعدني ما خاطيت خطوتين و سمعت زناد صاح اسمي و فاتح الجامة
نكعت شفتي اريد أوخر الخوف و عفت حنين رحت للسيارة كبل صعدت
جُمارة : شبيك صاحتني و ما كدرت افشلهة
زِناد : تريدج هي تجيج مو تشتغلين عدهااااا انتِ
– لا شبيك شدخل بس مو كلها واكفة شلون اكللها ما اكدر
– من البداية علميها حدودج شنو لو السالفة سفردحي بالكلية
سكتت لان هي تدري و اني الف مرة كايلة الها بالاخص ذولة الاثنين ملطلطين و ما اريد تقربني الهم
جُمارة : ترى اني ما اكدر احك راسي من الامتحانات بيا حال حتى ما الحك اخلي لكمة بحلكي و عفتها و اجيتك بعد عليمن منهار
زِناد : باعي انا لان ادري بيج شنو مخليج على راحتج ما اريد اكتم على انفاسج ساعتها حتى الدوام من وحدج تكرهي و تبطلين
جُمارة : مو لان اخاف منك اني من الأساس ما اريد اختلط بأحد و اريد دائرتي تبقى صغيرة لان شبعت صدمات و اذية
فـ ماكو داعي لهذا الكلام
سكت و اني هم سكتت طلع حرگتة يغلط على الما يعرفون يسوقون بالشارع و اني بداخلي عاذرتة لان فعلاً بعد كل الي صار الواحد حتى بخيالة ما يثق و حنين بالاخص اني ما مرتاحة بعلاقتي وياها
و من هذا الموقف كون تنسحب مني و تعوفني
بقت عيني عليه لحد ما وصلنا ما احب اشوفة ضايج احسة هواي تعب و خلاص لازم يرتاح و بعد ابد ما ينقهر نزلت و طبيت للبيت عبالي ما راح ينزل بس نزل وراي ريحة الطبخ تارسة الساحة
قبل لا نطب للمطبخ درت وجهي عليه لكيته يباوعلي
جُمارة : بعدك ضايج
زِناد : ما ضايج بدلي و نزلي تغدي يالله
ابتسمت بوجهة ومشيت كم خطوة لحد ما وصلت اله حضنته
جُمارة : ترى مستحيل اسوي شي يضوجك
ابتسم وايدة على ظهري بَاس راسي
زِناد : حبيبتي انتِ و حياتي
سمعت صوت ابوية قريب عدلت حجابي و طبيت للمطبخ بَاوعلي كلهن
بس لا كلهن شافني خليتو صعدت فوك بسرعة سبحت ونزلت
لكيتهم صابين اكل كعدت يم ابوي ، حضني
يعقوب : هالايام حتى ما جاي اشبع منج من وره الدوام
راح تعرسين و ياخذج زِناد و تخليني وحدي
جُمارة : ما أخليك وحدك طبعاً هو اني هنا و انتَ وزناد يومية توصلوني و بالليل يومية تعال بحديقتنا
يعقوب : شدگولبن نخرب كلشي هسة و نطلع زِناد من السالفة ما دام اكو وكت
زِناد منتچي على التخم مبتسم و يباوعلي
رهينة : والله عاد موش بس بنتك عزيزة انا ابني هم عزيز
و إصبع ايدة لو يرفعة الف حديثة تتمناه بس غير هوَ يحبك و راد يناسبك
عدنان : مو مال دروب جدة هو من زمان زِناد
يريد من عمي مره
يعقوب : هسة شگلتي القرار قرارج نرجع الهم فلوسهم
و تكعدين يمنه اني وياج وامج كل شهر اسفركم
غسان : ما تأخذوني انا
سرى: ضل انتَ بكل عزة لطام و بكل جدر جفچير
غسان : شلها غرض العبدة
قاسم : شو هي ساكته جُمارة چنها السالفة مكيسة يزناد
يعقوب : ها تعوفينه لو تبقين ويا
زِناد : هسة خلوها تاكل جوعانة الطفلة
قاسم : طفلةةةةةة
يعقوب : هاي هي زِناد عوفها بنتي يجوز تسرعت
و هسة صحت على نفسهـا
زِناد : هاي هيَ براحتها
كلها مبتسمة رفعت عيني على زِناد يباوعلي بطرف عينه
جُمارة : لا يابة اني صاحية و اريد زِناد طبعاً
عمامي و ابوية ضحكوا بصوت عالي و هو ياكل ومبتسم استحيت حتى اكل ما اكلت هواي غسلت و صعدت نمت
من كعدت العصر لكيته كاتبلي رسالة من تكعدين خابريني خفت ودكيت عليه بساع جاوبته بصوتي المطفي
– ها زِناد شكو
– ماكو شي ، صح النوم يجيبولج اجنحة لان ما تغديتي عدل
– ما اريد هم يجيبولي انتَ تجيبلي
– بـ مشية انا رايح و بالليل متأخر اجي تنتظريني
– انتظرك
ضحك وسَدة انصدمت من نزلت و دك عليه كال طلعي برة كاشخ آخر قيافة و جاي جايبلي اجنحة انطانياها و راح حسيت روحي حمامة
و ناقصني بس جناحات
و قررت ما اخرب فرحتهم
أثناء الامتحانات هم يجهزون كلشي و بس يسألوني على الالون
و البدلات أخذني هو و غريبة اجرتهن مدري شلون مشت الأيام بسرعة
و قبل كل التجهيزات اخذلي اجازة اسبوع
هذاك اليوم جنت اكول لو اموت ما اخذ واحد من احفاد رهينة
و اليوم واكفة اني و بدلتي بالصالون كبال المرايا
و شعري الجآن ماكو هسة صار تسريحة ناصية و مرتبة
و كل الجروح القديمة طلع بأثرهن ورد الوان حَلاهن
غريبة يمي تعدل البدلة و تهلهل و روز كالعادة مهمتها التصوير.
جُمارة : اني ما سألته استحي هو ما يجي بالحنة
غريبة : لا جا هو الج محط رجل من المعازيم و العالم التارسة الشارع معروفة العروس يحننها حبايبها و العريس حنته برة يم الزلم
جُمارة : بس ليش يعني ما اطك ويا صورة بهاي بدلتي
غريبة : مو مشكلة هسة من تخلص الحفلة نخلي يطب ياخذ وياج صورة
– شنو الفايدة المكياج رايح و كلشي رايح
و اني احجي وياها هو دك عليها كالتله خلصته و محد يجينا
شوية و اندك هورن طلعت مدت راسها
غريبة : يالله ولج اجاج هوَ بعد شتردين
طلعت وياهن كوه اشوف و كلساع اعثر
لحد ما نزل هو صعدني و يدردم
زِناد : بعد بعد سونه فرجة لامة محمد يعني إلا حنة هسة مو باجر عرس وفضنها كلها سوه
غريبة : يا خوي شني هاي بس يمك جا هي الحنه احلى من العرس بعدين هي مرتك مطنكرة خاف ما تدري
زناد : ليش شصاير شنو الما عجبها
– تريدك تجيها بالحنه تطك صور وياك
– بذيج الهوسة هي مال صور باجر عود باجر
رفعت الكبوس بعصبية و باوعتله
جُمارة : ترى جذب لا اريد و لا تجي تصور وياي اني أصلاً
صوجي
وهو يسوق دار وجهة عليه بقى فاتح عينه يباوعلي محتار ليا جهة بوجهي يباوع
زِناد : غطي وجهج نزل البركع اشتعلت صفحة الخلفوج
غريبة : خوية لا نندعم
– شني جاهل و أدعمج شو انتِ هم مدري شلونج
غريبة: لا حشاك بعد كلبي بس اخاف عليك
وصلنه للبيت و الهوسة ما تتسولف كعدت بالاستقبال و جدة تهوس و تهلهل من كد ما متحمسة جايبة ملايتين و ما مخلية وحدة تعتب عليها ما عازمتها تريد العمارة كلها تدري زِناد اخذ جُمارة
امي بنص الهوسة جابتلي لفة صغيرة
تغريد : أكليها ادري بيج ما تتحملين ع الاكل
روز بكامل أناقتها و كل فستان تلبسه تبقى كلها تسألها منين
و تجاوبهن زوجي جابهن الي من تركيا نص يصدكنها و نص لا
و عالية تخبل صايرة لابسه فستان احمر و بيدها ابنها يجنن
و يشبها واكفات هي و روز يسولفن
شمعة بطنها جبيرة و كاعدة بصف عمتها و لابسة سمائي
تباوعلي مبتسمة و جدة ما مصدگة بـ ابن عالية كلساع تبوسة لان اسمة زِناد ،
رحمة بن عمي عمار طالعة حلوة و كاعدة يم امها بس خازرتني
و الفرحة كلها لجدة و لربيعة متكابلات يركصن و كامت وياهن ام شريك دكول زِناد يستاهل و الملالي تقرا بالبيت و ولد عمي عمار جايبين
مطرب بالشارع و شاعلين الجو
رهينة : اخذنه النادرة هي و شهادتها
هو الرادها و جدته تمنتها
كعدت بالنص حتى يسوولي الجلوة و اجتي اللحظة المنتظرة
جدة بيدها علبة الذهب طبعاً جدة ماكو وحدة مثلها تحب تتباها
و بعدين تصيح طكونا عين الما يخافون الله ، جا جدة طبعا يطكونة
هاي الدنيا بيها المحروم و الشبعان و بيها الفقير والزنگيل
صحيح اني منتظرة هاي اللحظة لروحي بس من اصير بمكان جدة و بمقامها ما اسوي هاي الفقرة كدام العالم
اخليها بيني و بين چنايني لان هن كلهن ما دام چنايني راح يحصلن ومحد تغار من الثانية بس كدام النسوان الغربة لان يجوز يبقن يتحسرن و العالم طبقات مو كلها تعيش نفس المواقف و المشاعر
و بالأخير الماديات هاي كلها تروح كدام راحة الانسان و سعادتة
ياما و ياما ناس عاشت بقصور و شبعت ذهب و فلوس بس هي فاقدة
شي اسمه راحة بال و حب و بساطة ، و بنفس الوقت عالم عايشة بـ بيوت بسيطة و إمكانيتهم محدودة بس كل واحد كلبة على الثاني و ماكو مجال للحقد بيناتهم
رهينة : انا متعودة البس كل چنة عندي 6 بتوت
بس هاي جُمارة مرت زِناد بعد مامش وحدة تعرف شني زِناد بگلب رهينة و انا ناذرة هاي الأدين اثنينهن ينترسن ذهب
لبستني بكل ايد ست بتوت و اني عيني عليهن مال ابيع الذهب الجابة زِناد و البتوت ذني و اشتريلي سيارة ارقى موديل
و حنة النسوان خلصت و انتهت و حنتهم بعدها بالشارع لـ ١١ بالليل
يرگصون و يهوسون ما طبوا
رهينة : ما يخلونه يروح ينام باجر وراهم عشه الزلم
ينراد الهم حيل ما مدشن
اني من التعب نمت بغرفة جدة كعدت ثاني يوم الظهر اول ما اكلت و سبحت هم اخذني للصالون و روز كاعدة يمي تشوفني فيديوات ناشريهن على الفيس حقة ما يكدر يطب على هاي العالم
بحيث جماعة شريك و علي جايين بالهمرات و حاطين صواني الاكل
وشريك ياكل وياهم ومحمد يصورهم
شريك : هسة دطفي لا تنشره لا يشوفة الضابط و يتعاقبون
– لا خوية لا تخاف كال جيبولي وياكم عشا و معليكم
علي : سلام خوية صبلة ترى رائد حيدر مكروه ، اهووووو محمد سده راح اجي أفلش وجهك
زِناد بدشداشته البيضة و عبايته الجوزية واكف بالنص يوجّههم
و احلى صورة ناشرها ابوية لازم ايدة و هو محَني اصبعة
و اثنينهم يضحكون
كاتب جوه الصورة
– ذلك النصر العظيم
ردت مكياج العرس يشبه مكياج الحنه لان جان كلش لايكلي
اليوم احس روحي فرحانة اكثر من البارحة و بالاخص بعد ما شفت الصورة بس غريبة اجتي وياي لان الزفة راح تصير من الصالون للبيت
كعدت انتظر و احس روحي صخنت
غريبة : ان شاء الله يمهلج و يسهلج و ينور حياتج
ما عليج غير بـ زِناد كونه يرتاح و كلشي خلي عليه
بلعت ريكي و طارت كل الفرحة من سمعت صوت الموسيقى و الطبل برة
وكفت غريبة عدلت عبايتها و غطتني كعدوني بالصدر واني ما اشوف و لا اسمع من كد الهوسة و التوتر
لحد ما تحركت السيارة يالله فرزنت صوت جدة و غريبة وراي
رهينة : كللليشششش سويتها يبو خيمة الزركة و عاينت عرس زِناد كبل ما اموتن
زِناد : عمرج طويل جدة
رهينة : شيل الكبوس من وجها خل اعاينها شطالعة
زِناد : لا كلها الوادم جاي تعاين تريد تشوفها
خليها مغشاية جدة ، هي حلوة جدة قابل جديدة عليج
– تغار عليها مني يزناد هيج صارت
زِناد : تغشمين روحج يعني جدة
غريبة : لعابة طالعة لعابة
رهينة : صكد جا ما تاخذها للمصور
– سهلة
البارحة كتلت روحي على الصور و اليوم من الخوف ما أريدهن
طبعا هو كوة مقتنع بهاي الفكرة الظاهر غريبة مقنعتة لان يمشي و يغلط عليها شال الكبوس من وجهي هوَ و باوعت مصورات اثنين واكفات مبتسمات ، شالم الكبوس و عدلن بدلتي هو يباوعلي و يمسح بشواربة
مصغر عيونة و ما شالهن عني متأكدة يسأل نفسة
هو بحلم لو واقع
لابس الدشداشة بيضة و العباية حليبي وي چفوف اديه و الغترة كلشي ابيض و خط العباية الذهبي يلمع اباوع لادية ترجف جابتلي المصورة مي و بدن يوصفن اللقطة و احنه لازم نسوي مثلها
وهو بكل لقطة يستغفر ما عاجبه الوضع
– آخر لقطة بوسها من خدها
لزم حنجي و ما استغفر بقى بائسين بوسة طويلة لحد ما اخذت كم لقطة
حجيت بصوت ناصي
جُمارة : ها شو ما استغفرت بهاي
زِناد : بالله هاي تسوه
رجعت لبست الكبوس و كلها تركص بالشارع نزلت الزفة بـ بيت جدة
و التهوا بعشاء العالم امي كاعدة بصفي كل شوية تبوسني
تغريد : انا بسببي أخرت كلشي جاي يصير جُمارة يمة
سامحيني
جُمارة : مو ذنبج كلشي صار مكتوب يجوز لو بذاك الوكت ما فرحانة اني هلكد
تغريد : والله ما يهون عليه فراكج بس ما دامج مرتاحة روحي سبع سعادات ان شاء الله
جُمارة : اني احب زِناد يمة و بس هو يستاهلني
– الله يوفقج و يحفظكم
حياة رجعت تمشي طبيعي و واكفة ترتب وياهن وهذا هم من ضمن احلى الاشياء الي تشوفها العين ، عمة ورود موجودة و كاعدة تقنعها ترجع بس ورود مبينة قافلة ، ولو هو شراع ما يتعوض بنص الزعل
ويدز كتبها يريدها تقرا حتى تنجح
عالية : اويلي جُمارة زواج بدون عمة و تخيلي الحياة
روز : ما اسمحلج ترى رهينة تعادل عشر عمات
ورود : لا يجوز لو جمارة وياجن جان حبتها مرت عمي عمار
دكول هاي بيها فلوس و راتب استفاد بيها
عالية : باع هاي البطرانة بابا عمتي ضد الجناين بصورة عامة بحيث حتى جُمارة تعيرها ، دكلها خابصة روحج علينه هو انتِ خلگ دكتورة يكلولج روسنه توجعنة تكتبيلهم براسيتول
ضحكنا بصوت عالي ، صبولهن عشا و وراها طَبوا عمامي و زِناد و ابوي و ولد عمي يهوسون لزناد وهو يضحك و اكثر ثلاثة محمد و شريك و علي ذولة على كولة جدة صدك مغزر بيهم زِناد
ابوية باس راسي و يأمن زِناد عليه لحد ما صفيت بيد زِناد من الخوف دموعي كامت تجري كالوله نروح للبيت مشي ما قبل من بيت. جدة لبيته اخذنا بالسيارة صعدتني غريبة فوك و بعدهم محتفلين جوه
غريبة : كومي بدلي هسة شوية ويصعد زِناد
جُمارة : اكلج شو احس روحي راح اموت مختنكة
– هههههه يا يمة اسم الله بدلي بدلي و هاي الثلاجة يمج بيها حلويات و شرابت و فواكه ادري هسة ما تاكلين ثكيل
اول ما طلعت قفلت الباب و بدلت ردت افتح شعري و بطني وجعتني من الجوع اكلت لحد ما حسيت روحي شبعت
شو من شبعت حتى الخوف راح
وكفت افتح بشعري و غسلته التفتت على الغرفة مبتسمة لوحتي الشگها
امجد راجعة جديدة و معلگة فوك تاج الجرباية
تمددت على الجرباية و اباوع للغرفة مبتسمة شكد حلوة
بحياتي ما توقعت تصير عندي هيج غرفة حلوةً يمكن حتى لو اني اختارها ما اختار هيج
سمعت صوت يدة الباب نزلت بلعت ريكي و غطيت راسي
طاح المفتاح بالكاع ، غمضت عيوني من سمعت طگت القفل
هذا شنو يدري بية راح اقفل الباب سويت روحي نايمة و اسمع صوت محابسه و ساعتة ينحطـن على الميز
بقيت مغمضة لحد ما رفع الغطا و صار قريب عليه شهكت
زِناد : دخيلك يا ربي
جُمارة : عفية زِناد
– نامي يابة نامي
من شفته هيج حباب تطمنت رجعت راسي على المخدة ما
تقربلي و اني عيني على جفوفة شوكت ينزعهن
بيدة تليفونة طفاه وغطاني عدل
شوية و سحب راسي على ايده بلعت ريكي و بقيت ساكته
زِناد : هذا الحلم الصدگ ما اريد أكعد منه
جُمارة : هيج تحبني حُب
زِناد : ما يجي مثلة بهاي الدنيا كلها بحيث باجر من تكبرين و تسولفينه لأحفادج ما يصدگون
جُمارة : انتّ موجود و تأكدلهم طبعاً
– ان شاءالله
جُمارة : مو بس انتَ تحبني ترى اني اموت عليك
زِناد : جُمارة گلبي انتِ
– احلى بشر بالدنيا انتَ
زِناد : احلى بشر لو احلى وحش
جُمارة : امممم اني احب احلى وحش بس اخاف أكولها
زِناد : جُمارة و الوحش ، ههههه
جُمارة : وحش و احلى الوحوش
ضحك بصوت عالي حسيت روحي بردانة تغطيت
و هو حضّني بأثنين اديه ..
…
إذا صارت ثَلج و البَرد مَر بينا
خيولي الحَطب و الجمر و النيران
بَس حضنك يدفينا
– رُسل فَهد
الخامس والخمسون من هنا
