+
𒊹︎ فِــي حُــضــن الــأرْبَــعِــيــنِــي
+
بــــقــــلـم : Nouhaila Nno
+
PART 𝟒
+
صبح صباح جديد و كل واحد مشا يقضي شغلو جبريل فاق بكري وجد ليه فطورو كلاه و مشا لبس حوايجو لي كانو سبورتيف و خرج لخدمتو
+
ركب فطموبيلتو و تحرك مكسيري … حوالي نص ساعة ديال طريق كان وقف قدام شركة محطوطين قدامها كاميونات و رمايك مشارجين بسلعة (اهياوين ماشي لبيضة و لمحرمات داكشي منعرفش لو هاد سلعة بحال رملة و كينقلو تراكتورات يعني هو عندو شركة نقل لبضائع)و كل كاميو واقف حداه شيفور ديالو من غير واحد مكان واقف فيه حتى واحد
+
هبط من طموبيلتو و داير نضاضر على عينيه و عاقد غوباشتو سورت طموبيل ضرب سوارت فجيبو و تحرك لناحيتهم فحين هوما كانو تقدمو وقفو بإنتضام
+
حيد جبريل نضاضرو علقهم فتيشورت و خشا يدو فجيبو ناطق بجدية : سمعوني اشرفى سلعة متعطا للكليان حتى تشدو لخلاص و تحسبوه لقيتوه ناقص غادي ترجعو ليه لفلوس ولكن قبل قطعو لفلوس ديال لمازوط و غادي تركبو و تزيدو خلفة مع طريق
+
تكلم واحد من شوافرية و كرشو خارجة : وخ الباطرون ولايني لكان شي كليان لي قديم معانا
+
جبريل : كيف ما كانت طينة هاد لكليان ابوعزة كنعرف غير رزقي يتحط فوق طبلة و لكلمة هي لكلمة
+
هزو راسهم شوافرية و جبريل دور عينو عليهم و نطق بإستغراب : سمحمد باقي مدخل ؟
+
تكلم واحد راجل طويل و عريض : اسي جبريل قالك حكا مريض و سوارت راه حطهم عند لكونطابل
+
جبريل : كاميوه عامر ولا خاوي
+
راجل : و كيف كتعرف اسيدي نهار شدينا هاد لمارشي تفاهمنا على حداش لكاميو يخدم دابا كاينين غا عشرة
+
جبريل بتفهم : لكريسون ديالو فين هو ؟
+
دوى دري كيبان هو صغير فدوك رجال ولايني باينة فيه لقفوزية : هاني الباطرون
+
طلعو و نزلو حبريل بنضرو و غمزو : طير جيب ليا سوارت ديال لكاميو
+
مشا دري كيجري و بقا متبعو جبريل بعينيه تا غبر و رجع شاف فشوافرية : دوزو لبومبة عمرو لمازوط هو لول متحنسروش فطريق ، و خليو فجيوبكم صرف ديال ربعالاف باش تعطيو قيهوة لصحاب لحال فطريق
+
حركو ليه غا راسهم و رجع نطق فاش بان لو دري جاي : يلا اسيادنا طريق سلامة و تكايسو على راسكم فطريق
+
تفرقو شوافرية لكل واحد طلع لكاميوه ديراو كيسخنو لموطور باش يقلعو اما جبريل جا وقف عليه ديري كلهث مد ليه سوارت : هاك الباطرون
+
خدا من عندو جبريل سوارت و تحرك بخطاويه لحيهت لكاميو و ناطق بهدوء : تبعني
+
تبعو دري طلع جبريل فبلاصة شيفور ديمارا لكاميو و بان ليه دري واقف لتحت ، كلاكسونا عليه تا قفز و هز فيه راسو حرك لو جبريل يديه باش و داكشي لي كان حل لباب و طلع من جهة لاخرى
+
جبريل تكلم بجهد يلاه يسمعو دري مع صداع داك لكاميو : مولف طرقان ولا غير مخشي اولدي
+
هز فيه دري راسو راد عليه : مولف الباطرون راه كان خويا عيسى ديما كيديني معاه فاش تيكون مسافر
+
جبريل : مزيان اولدي ولف وحفض طرقان هوما لي ينفعوك شحال عندك
+
مصطفى : عندي الباطرن عشرين عام
+
شاف فيه جبريل بجدية : عندك لبيرمي
+
مصطفى : صراحة لا معنديش ولكن راه يلاه ناوي نديرو منين نلقط لحرفة
+
جبريل سكت داك لكاميو بتاسم : لعشية نتحركو و تعلم مع راسك
+
هبط جبريل من لكاميو خلا دري من وراه فرحان لما لا و هو كان يتلصق فشوافرية يعلموه و يقريوه من حرفتهم ولايني كان مل واحد فيهم حاضن بيضتو تحتو
+
خشا جبريل سوارت فجيبو و دخل للشركة لداخل و بضبط لبيروه ، لقا شلا وراق محطوطين كلس كيفيريفي فيهم و مركز مع كل حاجة كيديرها …
+
||…مكان اخر…|
+
بهاء ناض فصباح بكري بزاف داز للكورنة لبس واحد لبوط و دخل كيخطي فدم ديال ضحايا و كيشوف لخدمة كي غادة مشا لواحد جهة خاصة غا لأضحية ديالو وقف على دراري لي دايرين حذيث و مغزل
+
بهاء : كي غادين مع لخدمة اشباب
+
ردو عليه كاملين فدقة : ها حنا المعلم
+
بهاء غا كيبتاسم و مرة مرة كيحك نيفو : ياله الله يرضي عليكم خففو يديكم خلاص شوية و غنصيفط حميد يجي ياخد دبايح
+
رد عليه واحد من شباب لي كالس كيفصل فواحد لحولي : اكون هاني المعلم احنا لجود و لعمل
+
بهاء عطاهم بضهر خارج و رامي ليهم كلامو : غا بين ليا
+
خرج ركب فسيارتو و أكثيفا تيليفون مع طموبيل ، دوز الاتصال لجوديا و مركز فطريقو مكانش بزاف ديال لوقت تا جوباتو بنبرة نعسانة
+
بهاء تبسم بلا ميحس : افين انعاسة
+
جوديا باغا غترجع تنعس : شباغي
+
بهاء عقد حجبانو : نستي علاش تافقنا ولا شنو
+
جوديا : و قلنا لغدا ماشي لفطور
+
بهاء هاد رجعات فيه نفس : و كيف كيف مهم نوضي قدي لي غتقضي انا انمشي نضرب طلة على محالات و ندوز عندك
+
جوديا : ايه يه وخ
+
قطع الاتصال و كمل طريقو بالموسيقى دخل لواحد سوق نمودجي باركة طموبيل و نزل منها دخل و كيهندس دنيا بعينيه تا وقف فالمحال ديال تكزارت
+
خرج عندو راجل لي كان لابس طابلية ملطخة شوية بدم : اهلا اهلا سي بهاء مرحبا فمحالك
+
بهاء ركز على طبايع لي فطابيلة و دوى بحدة : الله يحفضك اجلال ، شحال من مرة قلت ليك متبقاش تلبس طابلية و هي مسخة عليك
+
جلال حنا راسو و يديه قدامو : سمح ليا اسي بهاء متعاودش غا بتلفة و مرديتش لبال
+
بهاء حط يدو على كثف جلال : جلال نقاوتك هي صورت لمحل عند لكليان سير بدل عليك هاد طابلية و نيطواي لكونطوار من ديك شحمة لي لاصقة و دميات اصحبي
+
حرك لو جلال راسو و رجع غادي داخل يبدل عليه بقا بهاد متكي على لكونطوار تا تم راجع شاف بهاء بنص عين : و دابا يييه ارى ا داك لكناش نشوف
+
جبد ليه جلال واحد لكتاب قدو قداش .. حلو بهاد بدا كيدوز عينيه و كيضرب لحساب و كيزكل والو تا من صحاب لكريدي حسبهم عاد سد لكتاب مرجعو ليه : لعشية غيجيب ليك حميد شي حوالا و عطيه لمدخول دهاد سيمانة
+
جلال : كون هاني اسي
+
خبط بهاء على لكنطوار و زاد : الله يعاون
+
خرج ركب فسيارتو و دار على كاع لمحلات لي فاتح فالمدينة دار معاهم نفس لعميلة لي عندو شي ديفو كيصححو ليه و كيحسب رزقو و يخرج تاوصلات طناش و نص ديال نهار عاد تحرك بإتجاه درب د جوديا
+
كانت نص ساعة ديال طريق توقف قدام باب دار خدا تيليفونو دوز ليها الاتصال جوباتو فالبلاصة : افينك
+
جوديا : هاني كلبس
+
بهاء شاف فساعة لي فيدو و كيهضر : يلاه هاني عند لباب
+
حوديا قطعات عليه و كتفرنس ناضت للكوزينة كلسات كتفطر على خاطر خاطرها سالات و غسلات لماعن و كطل على ساعة ، تا سالات لماعن عاد دخلات للبيت خدات اونسومبل فيه صاية فالبوردو طويلة و طوب ديالها
+
عاد كلسات كتقاد لراسها ميكاب هبطات عينيها على تيليفون لي كان كيفيبري لقات بهاء كيصوني من بعد ساعة و هي مشوجراه : الو
+
بهاء : وااالاخت تغدينا بكري
+
جوديا كدير فغاجو و كتهضر : و صبر هاني خارجة
+
بهاء بفقدان صبر : و سربينا خلاص
+
قطعات عليه و كملات على خاطرها و تريحات لقات نضرة على لبيت عاد خرجات .. زدحات لباب ديال دار و طلعات لطموبيل و عاقدة حجبانها كثر منو هو لي كان فكهم فاش شافها خارجة
+
بهاء بدا كيصفر و كيطلعها. ينزلها : بابابابا على توت البري
1
جوديا بتاسمات حشمانة : ايوى شتي و تا كالس تنگر
+
بهاء : اسموحات ازين ولايني راه تعطلتي
+
جوديا هزات راسها بأه و عاطياه لخاطر : يييه يييه عندك الحق
+
كسيرا بهاء و دوزر طريقهم غير ضحك و تقشاب تلاقاو مفرفرين بجوج تا قاطعهم صوت تيليفونو جاوب كان غا من لخدمة هو كيهضر و هي مركزة معاه تا قطع و هي تشوف فيه قاتلها لفضول
+
جوديا : فاش خدام ابهاء
+
بهاء شاف فيها بنص عين و مركز فطريق : كزار احنينتي
+
جوديا دورات عينيها و حابسة ضحكتها و كتلعن فديمنة : مزيان مزيان
+
مقدرتش تزيد تحمل و هي طلقها بضحكة مكركبة خلاتو دور راسو و كيشوف فيها مبتاسم : امالك
+
جوديا بدات كتنش على راسها و كتسوط بكثرة ضحك : كانت لهايشة ديال ديمنة قالت ليا غبار و مكتسواش
+
عض على شفايفو و متمتع بضحكتها : مكنسواش حيث مدبحتهاش و قطعتها طراف طراف
+
وقف طموبيل قدام ريسطو و هبط بالخف فتح ليها لباب و مد ليها يدو ، تبسمات و دارت يديها فيديه تاهبطات و دهلو بجوج بيهم لداك ريسطو هي من دخلة و كتشوف فديكوغاسيون ديال ريسطو و ناس لي كالسين
+
جاها كلاص بزااف كلسو فطابلتهم هزات ل menu بين يديها و هي ترجع تحطو بزربة مخرجة عينيها و شافت فيه مبهوضة : نوض نوض المسخوط يلاه نمشيو لشي بلاصة اخرى
+
بهاء هز راسو فيها مستغرب : مالك اش طاري
+
جوديا كتشوش : اويلي واش مكتشوفش الاثمنة شوف نقول ليك انا يدي عزازين عليا مباغياش نغسل لماعن و تخسر ليهم صباغة
+
بهاء قرب راسو لعندها طانز : معليش انا نغسلهم عليك
+
جوديا : و بهاء الله يهديك نوض تحرك واك هاد لويل غالي بزاف
+
بهاء كاع نداعا فيها عيط على سيرفور لي جا عندو قال ليه طلبيتو و شاف فجوديال مسولها : اش باغا تاكلي
+
بقات ساكتة حشمات تا قول اش بغات لي حطات فيها يديها فال menu غالية : بحالك
+
تحرك سيرفور يجيب ليهم داكشي لي طلبو و هي بحالا كالسة على شوك و هو غا كيشوف فيها و حابس ضحكتو صافي سالات معاه
+
حط يدو على حنكو و عينيه عليها كيفاش كيتبدلو ملامحها : جوديا متفكريش بزاف لخلاص حالو ساهل را نعرف نبيع كلوتي و منخليش يدك تقيس لما
+
جوديا بداو كيترخفو ملامحها و ابتسامة خفيفك كتبان على ثغرها رمشات بزربة : مغاديش نتحشرو بعدا راه فراس مالي غير 400dh
+
بهاء تقاد فكلسو و شد ليها يديها بين يدو : ديما مسبقة الاحدات حد مقال ليك خلصي سكتينا
+
جوديا ربعات يديها و حركات راسها : يه يه لي قلتيها عندك فيها لحق منين نتا لي غتخلص (هزات يديها عيطات على سيرفور تا حا لعندها) شوف اخويا جيب ليا واحد لموخيطو و شي بلا ديال لحوت و…. بقات كتملي عليه و هو كيقيد تا قالت براكة و شافت بهاء : هاني درتها لك قد فمك
+
دازو دقايق تا تم حتي سيرفور عمر ليهم طبلة من طرف تالطرف بهاء دور عينو على داكشي لي طلبات و كيهضر مستغرب : غتاكلي هاد شي كامل ؟
+
جوديا كتخشي فوجهها و كتدوي : حسدتيني دير بحالي
+
بهاء : لا لا اختي غا بصحة غاخفنا عليك لضرك هاد تخليطة
+
جوديا : و راس راسي و ناس حايرة فيه ديها فراسك شوية اصديقي
+
بهاء حنا راسو كيضحك كياكل من سوشي بواحد طريقة راقية خلاتها بلا هواها تهز راسها و متبعاه كيف تياكل تا نطقات طانزة عليه : و هادي هي ديال كزار و معشي بالفت
1
بهاء : خشي خشي فوجهك وجه لفت
+
صونا ليه تيليفون كان جبريل لي مصوني ليه فتح بهاء سبيكر و كياكل مخلي تا جوديا طالقة معاه ودنها
+
جبريل : وي بهاء كتسمعني
+
بهاء : واه ابن عمي كاين منقديو ؟
+
تسمع صوت جبريل جدي : ليلة غادي مسافر دوز لعندي لدار جيب ليا واحد صاكدو فيه حوايج ديال يومين
+
بهاء بتساؤل: وخ معاش باغيهم
+
جبريل : دابا طلق راسك
+
قطع عليه خلا بهاء كيشوف فساعة ،حنحنات جوديا و كتمسح يديها : احممم هاني غادية للطواليط
+
ناضت مشات لطواليط جبدات تيليفونها بزربة عيطيات على ديمنة مرة و حوج سيدة مكتجاوبش تالمرة تالتة عاد مجاوبة
+
جوديا بفقصة : يالحمارة يا لهايشة فين حاطة تيليفون
+
ردات عليها ديمنة لي صوتها كان مخلط مع صداع ديال صيشوار و لغا ديال لكليانات : و راه خدامة مالك اش كاين
+
جوديا ساطت و حاطة يدها على خصرها : و نوضي احبيبتي شدي فسيد راه غادي مسافر شوفي كيديري تلقطيه
+
ديمنة بعدم فهم : اويلي فين غادي
+
جوديا : منعرف ولكن راه غادي غير يومين و غيرجع و قال لبهاء يدوز ليه لحوايج دابا
+
ديمنة بتفكير حيدات تيليفون من ودنيها و شافت فالكليانات : لعيالات غا سمحو صونار ليا دارنا جدة ماتت (بدات تدمع عينيها بواحد سهولة قدامهم تا ناضو كيعنقو و يعزيو فيها و خرحو مسرسبين عاد رجعت تا دوي فتيليفون) سمعي اجوديا بقاي لاصقة فبهاء و صيفطي ليا لوكال ديال دارو و لبلاصة لي غادي تعطيوه فيها حوايجو يلاه سيري نمشي ندوش و نجمع شراوطي
+
قطعات الاتصال خلات جوديا غا كتشوف فتيليفون و كدور هضرتها فدماغها ..خرجات عند بهاء لقاتو خلص و جمع لوقفة كيساينها
+
شافت فيه مبتاسمة : شوف لكنتي مشغول غا سير انا انرجع راسي
+
جرها من قرفادتها و جرها خارجين : معندك فين ترجعي الالة
+
جوديا مخبية ضحكتها و كثبث فيه : معليش راك مشغول
+
بهاء : زيدي براكة من كثرة لهضرة
+
طلعو فطموبيل تحرك مكسيري مدوزين وقتهم وقف قدام لبارطمون ديال جبريل و خلاها فطموبيل و طلع هو كيجري يقدي لغراض اما جوديا صورات لبلاصة و صيفطات لوكال لديمنة
+
لي كانت فهاد لوقت سدات صالون و زادت كتخيط فدروبك تا وصلات لدارها دخلات ديريكت للدوش تحممات و تشفات شعرها بزربة و خدات صاك صغير جمعات فيه حوايج ديال يومين باغا طبق شنو كيدور فبالها
+
لبسات عليها سروال ديال تجينز و تيشورط و ضربات فوقهم تجاكيط و كلسات كتسنا جوديا تصيفط ليها فين كاين
+
دازت ساعة تا كيوصلها لوكال من عند جوديا لي كالسة فطموبيل و كتراقب بهاء للي واقف مع جبريل فباب شركة دقايق مكثار مقلال خلاو ديمنة تستغل لوقت و ضرب مسافة ديال طريق ..
+
توادع بهاء مع جبريل و رحع طلع فطموبيل محرك غامز جوديا : ها مسمار و طرقناه ازين فين نمشيو دبا
+
جوديا : معرفتش فينما بغيتي
+
بهاء دور لفولون تاتحكو روايض و زاد مكسيري : مطلبتي غير لموجود
+
قلعو من تما خلاو لبلاصة مطراسية وقف فبلاصت طموبيل طاكسي من لكورسة ، هبطات من طاكسي من بعد ما خلصاتو دايرة نضاضرها على عينها و كتقلب عليه بعينيها
+
تقدمات بخطواتها و راسها كيدور و عقلها كيدور معاه ، زادت غا شوية كيبان ليها واقف بعيد مع شي وحدة هازة فيديها وراق كتوريهم ليه ، عقدات حجبانها و شفايفها كلاتهم من قوة لعضان
+
تقدمات بخطاويها لمتوازنة تا وقفات عليهم و صاكها فيديها ، هز فيها جيبريل عينيه و رجع شاف فالمرأة و نطق بهدوء : سيري تاتحطيهم ليا فالفبيرو و نعاودهم
+
تحركات المرأة من جنبهم و ديمنة متبعاها بعينيها مخنزرة ، اما جبريل خشا يديه فجيبو و عقد حداش :اش كديري هنا ؟
+
ديمنة شافت فيه و حيدات نضاضرها من عينيها لي كانو منفوخين ولكن واش بالبكا ، طبعا لا هي ماشي حمقة باش تبكي عينيها على قبل سبب بايخ ولكن تأدي نفسها و تشم من مادة كيماوية عندها عادي
+
دلات شفايفها منين بان ليها كيحقق فعينيها : جيث غير نطلب منك سماحة وخ حالتي ديال لكلاب
+
جبريل بتشوش : مال عينيك ؟
+
ديمنة حنات راسها كتبوحط ولاعبة عليه : ما مالهم والو غير بقا فيهم لحال من غواتك و معيورك
+
جبريل حط يدو على داقنها رافعو تاقابلو عيونو سودوين مع عينيها : و مبقاش فيهم لحال منين كانو كيكدبو بلا حشمة بلا حيا ؟
+
ديمنة عضات على فمها و ناطقة بتردد : مكنتش قاصدة حق سيدي ربي (ثبتات فيه شوفة مزيان) سمح ليا
+
جبريل بحدة : تالكدوب اديمنة كنفر طواسل مو بنادم
+
طلق من دقنها و خطف فيها شوفة : سيري بدلي ساعة بأخرى
+
ديمنة قربات منو بخطاويها : لا مغاداش اصلا جاية معولة نمشي معاك
+
جبريل بإستغراب: فين للقبر
+
ديمنة : لكانو يخشيوني حداك معنديش لمشكيل
1
جبريل : براكة من تبرهيش اديمنة و سيري بحالك
+
ديمنة هزات صاك قدام عينو و بعناد : معندي فين نرجع راه محالي سديتو بسبابك باش ندوز معاك هاد ليومين
+
جبريل هبط عينو لصاك مفهم تالعبة : واش مريضة فكرك اشمن يومين ولا تلتيام منين جبتي هاد لهضرة و كيفاش بعدا وصلتي للهنا
+
ديمنة قلبات عينيها سايطة بجهد : و لي عندو فمر ما يتلف
+
جبريل شاف تا عيا و صغر فيها عينو : زامل ديال بهاء هو لي نعث ليك
+
حركت راسها بلا : لا عيب تقلد بيه راه قلت ليك سولت و وصلت ليك
+
جبريل : تا قضية سفر قالوها منساوهاش مزيان
+
ضار عطاها بضهر و زاد بخطاويه تا تبعاتو و كتنكر : واا دابا شنو راه الا مامشيتش معاك غنبقا هنا داري و مراجعاش ليها
+
تلفت لعندها مخنزر فيها مكرهش يجمعها معاها بشي طرشة زير على يدو و رجع هدا ليها صاك من يديها و ناطق : تبعيني
+
+
يتبــــــــــــــــــع …
+
كيف لعادة تعاليقكم و نجيماتكم الالياتي و كنحبكم 💋
+
و قولو ليا فنضركم فين غتبعو واش غادي يديها معاه ؟ وخ هاهوا داها معاه دري لي قال لو نديك معايا كيف غيدير لو ؟
4
