رواية عروس الجبايش الفصل الحادي والاربعون 41 بقلم ياسة – تحميل الرواية pdf

يا مَنْ كُنْتُمْ تَحْمِلُونَ اِسْمَ العَائِلَةِ،

وَتَخَلَّيْتُمْ عَنْ مَعْنَاها.

​لَمْ يَكُنْ الفَقْدُ يَوْماً مُجَرَّدَ فِرَاقٍ لِأُمٍّ، بَلْ كَانَ سُقُوطاً مُدَوِّياً لِكُلِّ جِدَارٍ كَانَ يَحْمِي ظَهْرِي مِنْ قَسْوَتِكُمْ. فِي غِيَابِها، وَجَدْتُ أَنَّ الرَّحْمَةَ قَدِ ارْتَحَلَتْ مَعَهَا، وَأَنَّكُمْ تَرَوْنَنِي صَيْداً سَهْلاً، خَالِياً مِنْ سَنَدِهِ الأَوَّلِ.

​عِتَابِي لَيْسَ عَلَى الحُزْنِ، فَالْحُزْنُ طَبِيعِيٌّ،

بَلْ عَلَى الظُّلْمِ الّذِي صَارَ يُقَدَّمُ فِي هَذَا البَيْتِ طَعَاماً يَوْمِيّاً. كَيْفَ لِقُلُوبٍ مِنْ دَمِي أَنْ تُقْسُو عَلَيَّ إِلَى هَذَا الحَدِّ، وَأُمِّي لَمْ تغادرني بعد؟

​لَقَدْ أَثْبَتُّمْ أَنَّ الأُمَّ هِيَ المِيزَانُ، وَبِكَسْرِهَا تَتَهَاوَى كُلُّ القِيَمِ. سَأَمْضِي بِـ وَجَعِي، وَلَكِنْ سَيَبْقَى عِتَابِي شَاهِداً عَلَى أَنَّكُمْ لَمْ تَكُونُوا أَهْلاً لِـ مِيراثِ حَنَانِهَا

………………………..

يُـمن :- اليوم أول يوم بالامتحانات النهائية للعام الدراسي المرحلتي الثانية گعدت من الصبح اراجع و فد مره شاده حيلي بالقراية لحد ما وصل موعد الأمتحان بدلت وطلعت خلصت اول أمتحان وجنت كلش زينه ومجاوبه جواب كامل واليوم الثاني والثالث وانا اجاوب اجوبه كامله والايام ماشية كلش طبيعي

و بُـرهـان للحظة وحده ما تاركني كل شوية يدزلي يسأل عن الوضع شلوني جاوبت لو لا شلون قريت شلون حليت لحد ما وصل أمتحان المادة اللي جان ياخذنا بيها كام يدزلي صوت كامل يشرح بيه المادة بحيث ما احتاجيت ملزمه ولا كتاب طلعت صوته وكمت اقرأ واحل عليه

بس جنت ابد ما ارد عليه ولا اجاوبه بس اسمع واصلاً تعودت على الرسائل مالته وصارت جزء من يومي

ثاني يوم رحت امتحنت وكل اللي رشحهن اجن بحيث حليت وانا مغمضه من گد ما صايرة المادة سهل عليه ومن رجعت لگيته كاتبلي

قريتها بدون ما ارد ومنا وبعد ما كام يراسل ولا يتصل ولا يدز اي شي يوم يومين ثلاثه وهوَ ماكو ضل بالي مو من عوايده هيج يختفي هاي اول مره هيج يطول ما يراسل ولا يسأل

طبيت اكثر من مره على حسابه ماكو ما متصل رجعت فتت للفايبر نفس الشي ما عنده نت ضل بالي عليه و خفت لا صاير بيه شي بس ما راسلته و لا دزيتله شي

رجعت فتت على ريام متصله ما گدرت اسألها ولا حتى راسلتها بقيت ساكته بس گلبي يدك اريد بس اعرف وينه

الأمتحانات الباقية كلها طارت من بالي واهسي كله راح منها گمت حتى من اقرأ ما اركز لان بالي مو وياها القراية ما اركز بيها

جنت من اروح للأمتحان يا دوب اطلع درجة نجاح بيهن لحد ما خلصت الأمتحانات انا فد مره قلقة ومتوتره اخر شي گمت اعصب بدون سبب وامي إذا تريد شي مني ما اسوي وإذا لحت عليه ابقى اصيح ما اسوي تعبانه و مالي خلك

و ضايجة

مرن أسبوع عشر ايام اسبوعين وانا فد مره انتهيت حتى ريام گطعت وياي بهاي الاسبوعين اخر شي ما تحملت گعدت وحدي و شبعت بچي ليش ابچي ما ادري

بس احس مفتقده شي و اكو بهته بـ ايامي

بس كابرت وبقيت مصره على وضعي وما راسلت ولا خابرت ولا حتى سألت ريام ولا راسلتها الى ان شفتها ناشرة منشور على حسابها بالفيس بوك منذ عشر دقايق جان

صورة البُـرهـان نايـم على سدية المستشفى والكانولا بـ ايده و كاتبة فوك الصورة كلام على الاخ وتطلب من الاصدقاء يدعون الاخوها

احس گلبي انقبض وكمت ارجف شبيه ليش بالمستشفى وليش بـ ايده كانولا وليش هيج متغير متت دمي نشف

دخلت للتعليقات ما جانت اكو هواي تعليقات بس قليلة لان ما صار هواي من ناشره المنشور اكو جم تعليق بس يتحمدوله بالسلامة يعني ما اخذت منهم جواب شافي ولا فهمت شبيه

انطيت لايك للمنشور بس ما علقت عليه

طبيت الها على الخاص وكتبت الها

ربع ساعة يلا شافت الرساله وراها ردت

— شلونج اخبارج

— الحمدلله انتِ شلونج

— زينه على الله

شافتها وبعد ما ردت عليه رجعت كتبتلها

— سلامات شبيه بُـرهان

— تعبان شوية وسوى عملية

— عنده العافية عملية شنو

— عنده خلع بكتفه صار مده يعاني منه وما فاد وياه لا علاج ولا مسند كلش مأذية وهناك من سافر راجع عليه واقترحوا يسوله عملية ويخلص

قريت رسالتها وإحس فد مره مهبوطه كتبت الها

— عنده العافية وهسه شلونه

— والله فد مره تعبان لان صارت عنده مضاعفات وره العملية ومصخن من يوم العملية لليوم ما يبرد

— عنده العافية ان شاءالله

— الله يعافيج ويبعد عنكم الشر

طلعت من المحادثة و بقيت گاعدة وايدي على خدي ضايجه عليه هوَ لحد الأن ما مأذيني وحباب صح ما قابلة على اعترافه بس ما مأذيني وهواي جاي يساعدني وكل رسائله جاي استفاد منها لان كلها نصائح وحكم وفائدة

واحس تعودت عليه وعلى كلامه ومن ما راسلني هذيج الايام ضجت وتوترت لان تعودت لان دائماً يراسلني و حسيت بفراغ من اختفى

وره ما عرفت سبب اختفاءه و أطمنت هوَ بخير صح طلع مسوي عملية وبعد تعبان بس المهم بخير وسالم

بس بقيت لا راسلته ولا حچيت وياه لحد ما مشت ايام العطله گاعدة بالبيت و ما عندي كل فعاليات عايشة ويا امي والف الحمدلله حياتي اليوم تختلف عن حياتي قبل جم سنه وين جنت وين صرت وهذا كله بفضل ربي عليه

بُـرهـان فتره شهر كامل هوَ مختفـي وراها رجع دزلي رساله كاتب بيها

— أَيُّهَا الغَائِبُ الّذِي تَحَوَّلَ إِلَى مَجْهُولٍ

كَانَ سُؤَالُكَ سَيُعِيدُ لِي شَيْئاً مِنْ كَرَامَةِ حُبِّي الّذِي تَهَاوَى. لَكِنَّكَ أَبَيْتَ، فَزِدْتَ وَجْعِي وَأَقْنَعْتَنِي أَنَّ الحُبَّ يَمُوتُ مَوْتاً مُذِلَّاً

لَا يَتْرُكُ خَلْفَهُ حَتَّى رَمَادَ الاهْتِمَامِ

أَيُّهَا الغَائِبُ الّذِي كَانَ حَاضِراً فِي قَلْبِي فَقَطْ لَقَدْ تَعَلَّمْتُ أَخِيراً أَنَّ الحُبَّ الّذِي لَا يَجِدُ لَهُ صَدًى، لَيْسَ سِوَى عِبْءٍ يُثْقِلُ صَاحِبَهُ.

​لَمْ أَعْتِبْ عَلَيْكَ يَوْماً عَلَى عَدَمِ حُبِّكَ،

فَـ المَشَاعِرُ لَا تُسْتَجْدَى. بَلْ كَانَ عِتَابِي المُتَخَفِّي عَلَى شَغَفِي الّذِي تَجَاوَزَ حُدُودَ وَاقِعِكَ، وَعَلَى رُوحِي الّتِي تَعَلَّقَتْ بـ خَيَالٍ

لَمْ يَكُنْ لَهُ وُجُودٌ فِي دُنْيَاكَ

قريت الرسائله اكثر من مره جاي يعاتبني لان ما سألت عليه و بنفس الوقت جاي يگول بعد ما احچي وياج لو شنو قصده

رجعت اقرأ بيها مره واثنين وعشرة لحد ما حفظتها على گلبي كلمة كلمة

بس لا رديت ولا جاوبت الى أن مشت الأيام وبعد ما راسل ولا سأل ولا دز جنت كلش افتقده و افوت كل يوم على حسابة بس ما احچي وياي ولا هوَ يحچي وياي يعني انتهى الموضوع وانسحب من حياتي من شاف ما اگدر اتقبله

وهوَ اصلاً ما جان ينشر بحاسبة يعني انگطعت اخبارة عني بس مرات ريـام من تنشر اشوفه يعلق الها لو ينطي لايك على منشوراتها

اما الوضع بيتنا كلش طبيعي حالنا حال اي عائلة عراقية ماكو شي صار ولا احداث صارت والامور ماشية طبيعية الا أن بأشرت

بالمرحلة الثالثة و هاي الفترة العدت كلها

لا انا ولا بُـرهـان حاچين ومتواصلين هوَ انسحب وبعد ما دزلي ولا راسلني وانا من الاصل ما اراسل ولا اجاوب

بأشرت ادوم و هاي السنه هوَ ماكو وانا مثل السنتين الفاتن ما عندي صديقات غير ورود بس هنا علاقتي صارت احسن ويا طلاب شعبتي يعني تعلمت عليهم و صار بيناتنا سلام اكثر وحچي اكثر من قبل بس بحدود

دكتور بهـاء هاي السنه رجع ياخذنا ومثل ما معروف عليه متشدد بشكل مو طبيعي وهاي المرحلة كلش صعبه و المادة صارت اصعب علينه وجافه فد مره

الدكتور ما حچى اي شي وياي ويعاملني حالي من حال باقي الطلاب مرات لا يميل اتجاهي و يتساهل وياي بشغلات بسيطة

ومرات لا يشد فد مره وياي بحيث اكوم اكرها محاضرته واتمنى تنلغي من الجدول

السنه صارت متعبه الي بس مع ذلك شديت حيلي وطعلت بيها من العشرة الاوائل الحمدلله وهذا الشي جان دافع معنوي الي بحيث صرت افتخر بروحي واشوف نفسي شي مهم بالمجتمع

لحد ما خلصت السنه وانا الحمدلله حياتي ماشية كلش طبيعية وماكو شي مو زين

ومدلله بيت امي و بوجود عمي الله يطول عمره

بهاي السنه زهـراء حبلت وجابت ولد وسموا أبنهم رضا و رضاوي يا رضاوي اية من الجمال مدبدب و ابيض يجنن ينطي شبه الفهـد و شوية المراد

الهنا والوضع كلش تمام و انا عطلت اخر السنه مرحلة ثالثـة و گعدت وهنا گمت بعد ما اسأل ولا اتفقد حساب بُـرهـان وتعودت لان بعد ما يراسل ولا يسأل واحنه من الاصل ما بيناتنا علاقة يعني بس هوَ جان يراسلني ويسأل عني وتعودت على سؤاله فتره من الزمن وراها راح الحال سبيلة وانتهى الموضوع

وصل موعد الدوام وانا هاي السنه مرحلة اخيرة و هنـا مثل كل مره نروح انا وامي نجهز للدوام وامي ما تخلي شي ما تجيبه الي

جهزت غراضي واحتياجتي و منتظره الدوام الاسبوع الجاي اباشر و امي جانت بالشغل ومن رادت ترجع للبيت خابرتني تسأل إذا اريد شي گلت الها مشتهيه لحم بعجين مثل اللي تجيبنه كل مره گالت

–صار تددللين حظري الصينية والطرشي واني ربع ساعة واجي

_گمت حضرت الطرشي والصينية وگعدت اگلب بالنقال ومتانيتها هسه تجي هسه توصل ماكو عدت نص ساعه وراها صارت ساعه انوب ساعتين ضل بالي عليها تأخرت

خابرتها ماكو ما ترد رجعت دكيت مره واثنين ماكو احس متت من الخوف جسمي كام يرجف

طلعت رقم عمي دكيت عليه جان بالدوام

گتله امي كالت جايه بالطريق وصار ساعتين وماكو وخابر عليها ما ترد عليه

سديته منه وضليت اخذ البيت واجيبه وكل شوية افتح الباب اباوع للشارع بلكي اجت بلكي وصلت بس ماكو

رجعت دكيت على عمي ما يجاوبني دكيت على تميم على مراد محد يرد عليه هنا إحس الدنيا وگفت و اختنگت و لا ارادياً گعدت بالخوش وضليت ابچي

والنقال بـ ايدي و ادگ عليهم واحد واحد محد يرد عليه رفعت راسي الربي و گتله اللهي انتَ احن من امي عليه بس لا تفجعني بيها ولا تكسر ظهري عليها انا بدونها اضيع

اندگ الباب گمت ركضت فتحته عبالي اجت بس طلعت خالتي ام تميم و عبير انا شفتهن اجن وانا متت هنا تأكدت امي بيها شي واجن عليه

حظنت خالتي وابچي بصوت عالي وهيَ تسكت بيه وتگول ماكو شي لا تبچين

طبينا للصالة وانا اسأل بيهن ليش ما ترد شبيها ليش ما تجاوب وين راحت محد بيهن تجاوبني وتريح گلبي لان اصلاً ما يدرن وينها وليش ما ترد

ساعة وره جيت خالتي وخابر عمي عليها اسمعها تكله اي، اي، اي، بس هيج خلصتها وانا يمها وجسمي مثل السعفه يرجف ما اگدر اسيطر على روحي انتهيت

و من سدته گلت الها

–خاله لا احچي فدوة شبيها امي

طحت بالگاع على ركبي ما گدرت اوگف

رجعت گالت

— ما بيها شي ما بيها بسيطه لا تخافين

— اخذيني الها فدوة خاله اخذيني

جنت احچي وابچي و گلبي يدك سريع وبطني مغصتني موتتني من الهبطه والخوف ردت عبير

عبير :- بس گولي يا الله على كيفج مو هيج خلينا نفتهم اول شي

شالت نقالها ودگت على تميم گالها من عابرة الشارع ضاربتها سيارة و هسه بالمستشفى فاقدة الوعي

انا سمعت فاقدة وانا فقدت اكثر منها كلمة تخبلت تسودنت قليلة لحد ما خالتي خابرت على تميم اجا اخذنا انا وخالتي للمستشفى الطريق كله بس اتوسل بيه شلونها يرد عليه زينه بس جذب مبين مو زينه من شكله

لحد ما وصلت للمستشفى رجليه ميته مدري شلون اخطي بيهن طبيت وتميم وخالتي وياي لگيت مراد گاعد ببـاب الانعاش ما گدرت امشي بعد گعدت گعده وانا اشوفهم حاطينها بالانعاش

(العناية المركزة)

معناها حالتها خطرة ومو زينه دنگت عليه خالتي و گومتني وانا يا عيون التبطل بچي واشوف الدرب واكمل مشي

وصلت للباب ما خلوني اطب گالوا يجي الدكتور يلا اطلين ربع ساعة يلا اجى الدكتور و خلاني اطب الها طبينا انا وخالتي وانا شفت الاجهزة بجسمها وفاقدة وانا بساع فقدت وطحت ما دريت بروحي بعد

ومن صحيت لگيتهم منوميني بالطوارء

و حاطيلي مغذي لان ضغطي مصفر بچيت يچيت لحد ما انتهيت وگمت رجعت صعدت يمها بالانعاش لكيتهم جاي يجهزون بيها يردون يطببونها للعمليات

وقع تميم على مسؤوليته لان عمي ماكو

بعده ما جاي من الدوام واخذوها ومشوا بيها للعمليات

احس روحي راحت وياها و گلبي طاح بالگاع جسمي يرجف عيوني تصب حلگي يبس بطني خاصرتي كلشي بيه جاي يوجعني انتهيت عليها

بقت بالعمليات ساعتين ونص وبهاي الساعتين وصل عمي هنا عبالك شفت ابوي گمت وحطنته واصرخ كل صوت ولا الثاني وهوَ حاظني ويسكت بيه بس شني منتهي گوه واگف على رجلية

لحد ما طلع الدكتور گال الحمدلله العملية نجحت بس راح ننتظر منا الفد سبع ساعات إذا ما استجابت نرجع نفوتها عملية ثاني

رجليه ما گمت اگدر اوگف عليهن ضليت بالگاع ما اگدر اگـوم ، والكل گاعد يمي متانين الوكت يمشي بلكي نحصل نتيجة

ساعة ساعتين ثلاث ساعات وهيَ فاقدة

لحد ما إذن الفجر احنه بعدنا بالمستشفى ولا نايمين ولا ماكلين ولا شاربين

گمت للحمامات توضيت و رحت ادور مكان نظيف اصلي بيه بعدين الممرضه طببتني بردهت النساء وانطتني سجادة من وحده من المريضات فرشتها و صليت

ما حچيت شي ولا فتحت حلگي بكلمة غير بس يا الله امي وسجدت و بعد ما رفعت راسي ضليت بس ابچي بدون صوت وبدون كلمه بس ربي يسمع حركتي وشوف بچيتي ودعائي

وراها گمت رجعت المصلاية وطلعت فوك يمهم بعدهم گاعدين لحد ما صارت بالسته ونص الصبح رجعوا طببوها للعمليات مره ثانية

ما بقيت دعاء ولا نذر ولا قرآن ولا تسبيح

ولا دموع انتهيت من السته ونص لحد الساعة بالتسعة يلا طلعوها

ونفس الشي گبل للعناية ما يخلونه نشوفها

صارت عليه الدنيا ظلمة واختنگت ما گمت

اسيطر على أعصابي جسمي باد و نحلت فد مره

خالتي جابتني وحطت راسي بحظنها غضمت عيوني و دموعي تجري بحظنها لحد ما انتهيت وبعد ما گدرت اقاوم اجى الدكتور گال

— گعدتكم هنا مالها اي فائدة الافضل ترحون ويبقى بس واحد منكم ليش كلكم هنا بدون نتيجة

ما قبلت اروح اريد ابقى يم امي بس عمي وخالتي جبروني جبر ورجعوني للبيتهم

رجعنا انا وخالتي و مراد بس تميم وعمي بقوا

طبيت البيتهم وحيدة وغريبة مالي احد بعد بالدنيا انتهيت وضعت إحس بروحي ثكيله على الناس ومسكورة والقهرة الجاي تحس بيها ما الها مثيل

البنات زهراء وعبير وبنات عمي هاشم كلهن ما قصرن وياي وبس طبيت كلهن اجن عليه يبوسن بيه وياخذن من خاطري وعمي وخالتي والولد كلهم صاروا اهلي بس انا إحس ثكيله وحملي ثكيل عليهم

وين اروح وين امشي منو الي بالدنيا من بعد عينها دلالي گعدتي نومتي دوامي اكلي شربي الليل ونهار حايرة بيه واخر فترة كلش تعبتها وصرت نحسه وهيَ وياي كله صار و من عيوني و تدللين

ما معقوله هيج اخسرها واضيع بدونها

تحملت كلشي و قبلت بكلشي بس لا امي ما اگدر اموت وراها والله اموت ياربي لا تفجعني بيها

سوت زهراء اكل وجابته تريدني اكل بس ابد ما اكلت مخلصتها بس ساكته ودموعي تجري خالتي شگد حچت وياي باستني ماكو لا احچي ولا ارد بس دموعي عشرة عشرة

بعدين راحت سحر ورجلها البيتنا جابت هدوم الي و رجعت سبحت وخالتي خابرت المضمده صاحبة تصير يجرانهم اجت ضربتني ابره فاليوم تريدني بس اريد انام وترخه اعصابي لان انتهيت

وصدگ بس مشى مفعول الابرة بيه سلمت امري الربي ونمت وانا هموم العالم كلها فوگ گلبي بس شنو كل دقيقة افز اسأل وارجع انام تزهرمت تزهرم

لحد الليل كلش سمعت صوت تميم جاي بسرعة گعدت لبست ربطتي وطلعت جان يحچي ويا خالتي و بس شافتي طلعت بسرعة سكت سألته

تميم :- لا بعدهي

— شوكت تصحى شوكت تگعد

حچيت هيج ونطيت من البچي رجع گال

— انطانه الدكتور 72 ساعة ادعيلها منا لمن تعدي هاي الساعات بخير وسلامة

ما جاوبت شي بسرعة افتريت ورجعت للغرفه طبيت وسديت الباب الدنيا ضاگت عليه دخيلك ربي وين اروح وين امشي ما اگدر بعد اختنگت

اريد احد احچيله اشكيله لا عندي اخت لا اخ لا عمه لا خاله لا اهل المن احچي ويامن اشارك مصيبتي

شلت النقال واگلب بيه المن اشكي المن احچي ماكو احد غيرها هيَ امي وابوي واختي واخوي وعمتي وخالتي وصاحبتي وكل الدنيا منو الي غيرها ويامن احچي ويامن اگعد وين اروح

دگيت على ورود ما جاوبت يمكن نايمة

رجعت طلعت من الاسماء صارت ريـام گبالي دگيت عليها ثواني وردت بس گالت الو انفجرت من البچي

تريد بس تفتهم شبيه ما احچي بس ابچي

خلص رصيدي وانگطع الخط وانا ما مجاوبتها شبيه رجعت هيَ دگت عليه جاوبتها وحچيت الها وضع امـي تخبلت

و گالت

راح اجي اني وبابا ما خليتها تجي لان الدنيا صارت كلش لليل شجيبهم بهذا الوكت

رجعت سديته منها و حطيت راسي بين رجليه وميته من البچي اقل الخمس دقايق ودگ عليه رقم طويل انا ما جنت اعرف بالارقام الطويلة دولية عبالي من غير شركة

فتحت خط بس ما حچيت ثواني واجاني صوته يگول الو انا سمعت صوته وانا ما صدگت الگى واحد واحچيله البيه

انهاريت على الأخير متت كل صوت ابچي تگول طالع من نص روحي عافني ابچي كلش هواي وراها گال

بُـرهـان :- كافي بچي سكتي

ما ارد بس ابچي رجع گال

— گولي يا الله وان شاءالله مابيها شي شده وتزول انتِ مؤمنه بقضاء الله وقدرة والإنسان معرض للبلاء خلي إيمانج بالله وسلمي امرج اله و ادعيلها واستغفر ورددي الحوقلة وان شاءالله ما بيه غير العافية

نفس الشي ما اجاوب بس ابچي رجع هوَ يگول

— كافي بچي حرام عليج هيج تأذين نفسج هاي هيج تبچين من البارحة لليوم راح تموتين

نفس الشي ما ارد گال

— يُـمن يعمري تسمعيني كافي سكتي

يُـمن :- منو الي وين اروح وين امشي شلون اعيش بدونها من البارحه لليوم ما صاحية حالتها خطره شلون اعيش شلون اكمل بدونها اموت والله اموت

— گولي يا الله وان شاءالله شدت وتزول بس بطلي بچي لا تضعفين ولا تنهارين انتِ قوية ومؤمنه والمؤمن مبتلى وهذا اختبار الإيمانج گولي يا الله و تركي امرها وامرج لله وشوفي شلون راح ترجع تگوم بسلامه بس بطلي البچي الله يخليج

— وإذا ما گامت شلون بيه

— لا تقنطوا من رحمه الله خلي إيمانج بالله قوي عمري انتِ كافي بچي لا تتمرضين مو زين عليج

فصل الخط يمكن خلص رصيده ثواني ورجع دگ عليه على الماسنجر ما جاوبته

بس ابچي رجع دزلي رساله

— صيري قوية وخلي إيمانج بالله قوي واني يمج بكل وقت بس لا تبچين حبابة الله يخليج مو زين عليج البچي يتعب عيونج وما يغير من الواقع بشي فرشي سجادتج وصلي و ادعي ربج وان شاء الله تگوم بالسلامة

ومثل ما گال گمت توضيت وفرشت السجادة و گعدت اصلي وادعي و استغفر

الى ان صار وكت صلاة الصبح صليت الصبح و شلت سجادتي و تمددت بالفراش

ودموعي وحدها تطيح ما اگدر اسيطر عليهن

انوب من گد ما تعبت وعيوني تعبت من البچي ومن الاصل انا ماخذه فاليوم غفيت وبعد ما فزيت غير بالعشرة ونص على صوت عمي جان يحچي ويا خالتي يريدها تگعدني

طفرت من مكاني وطلعت عليه شفته شصاير بحاله تعبان تعب الله وحده يعلم بيه بس شافني طلعت بسرعة فتح اديه الي رحت حظنته و انهاريت بحظنه عافني ابچي لحد ما ارتاحيت انوب خالتي اخذتني غسلت ورجعت گعدني يمه صبلي جاي و سوالي لفه و وگف اله اكلها

ما قبلت اكل بس جبرني عليها جبر اكلت شوية منها وشربت الجاي واباوع عليه بلكي اكو تطور او نتيجة بس للأسف ماكو والهسه بعدهي على نفس الحال رجع گال

— امج گبل هم مسوية عملية داخله مستشفى

— ما اتذكر ما ادري

— ما حاچيتلج هم مره متمرضه نايمة مستشفى مسوية عملية ماخذه علاج شي

— لا ما حچت شي على المرض ليش ما اتذكر تمرضت ليش

— الدكتور يسأل ويريد تقارير كاملة عنها

و اخاف قبل مسوية عملية واني ما ادري لو متمرضه وماخذه علاج الهذا السبب جاي اسألج

— لا ما اتذكر شي بس ما مسوية يمكن

سكت ما حچى شي بس گام الغرفته طب وسد الباب شوية وسمعته يخابر ما عرفت يخابر من بس جان يسأل على وضع امي قبل اخاف عدها شي لو مسوية شي يعني عمليه علاج

بقينا هيج لحد الظهر رحنا للمستشفى انا وعمي وخالتي لگيناها بعدهي نايمة بالانعاش وكلش متغيرة وتعبانه وشعرها مزينيه الها لان مسويلها عملية براسها

انا شفت شعرها مزين وانا تخبلت ضليت اللطم على وجهي و ملخ بخدودي فقدت كل قوتي وكل اعصابي طلعوني ما قبلو على الصوت لان مو زين عليها الصوت العالي

طلعوني برى الغرفة والدموع ما گمت اسيطر عليها و راها گمت اتقيأ صعد ضغطي علگولي مغذي وانطوني ابره ورجعتني خالتي للبيت غصباً عليه

شلون مشت عليه الساعات ما ادري شلون عدا عليه الوكت ما ادري فقدت كل اعصابي ورحت بغير عالم لا جنت احچي ولا اگول ولا اكل ولا اشرب بس گاعدة ودموعي تصب

للمغرب و اندگ الباب علينا عمي بالمستشفى ومراد ويا وبس تميم جان هسه راجع خطيه وتعبان وغافي على القنفه بالصالة

راحت زهراء تفتح شوية ورجعت اسمعها تگعد بـ تميم وتگله هذول عمام يُـمن بالباب

طفرت من الگاع لباب الغرفة فتحته وطلعت تميم گام يريد يروح الهم لزمته من ايده وگتله

— لا تخليهم ياخذوني عليك الله

تميم :- ما ياخذونج بكيفهم شنو

— لا ياخذوني والله هاي لان سمعوا بـ امي اجوا عليه

— لا تخافين بس خل اشوفهم شعدهم جايين

حچى هيج وراح يشوفهم شوية و سمعنا طببهم للديوانية وراها بشوية صار صوته عالي وسمعنا يصيح عليهم هنا خرطت مني العافية واحس انتهيت على الأخير

وراها طلع بالحوش يخابر بعمي وانوب اجي علينا بالصالة بس شنو ميت ويرجف من الاعصاب سألته

ما جاوبني بس رد

— سريرية گـ…. انعل ابو خيرهم

ام تميم :- شيردون

— يردونها يگولون بنتنا وما يصير تبقى بيتكم

گعدت بالگاع ما وگفت على رجلية بعد وخالتي ردت

— شنو يردونها ما صدگوا

— انعل الجابهم

— ابوك كتله لو لا

— اي جاي بالطريق

— تروح يمهم يا يمه ما يصير يضلون وحدهم

— عوفيني يمه بس اروح احط طلقة بگلب عمها النذل

امه سكتت منه و اجت عليه گومتني وهوَ ما تحمل بسرعة گام طلع برى

ام تميم :- گومي يمه حبيبتي لا تخافين عمج هسه يجي و يحچي وياهم

— لا خاله متأكدة منهم ما يعوفوني راح ياخذوني

— لا مو بكيفهم عمج والولد ما يخلونهم

ضليت بمكاني ما تحركت و جسمي شلون السعفه ويلعب بيها الهوه هيج ارجف لحد ما اجه عمي

طب يمهم بالديوانية والهدوء صار ماكو صوت ما نسمعهم وراها صار صوت عالي وانوب رجع نصى الصوت وراها گبوا كلش وراها سكتوا وانوب رجع الصوت صار عالي

وهيج انا ضاله اعالج حالي حال الميتين

بس الله يعلم بحالي شلونه لحد ما اجى عمي عليه گمت وگفت وباوعت عليه وسألته

اجى عليه باسني براسي وگال

— حبيبتي عمو هذول جلاب وجاي يكولون بنتنا وانتَ رجال غريب مالك يمها شي ويردون ياخذونج بحجه بنتهم وما يصير تبقين هنا عيب وحرام وعرضهم

— يعني شنو عمي راح اروح وياهم

عمي سكت وانا حطيت اديه على وجهي ومتت من البچي انوب رجع گال

— شاسوي فهميني شلون امنعهم ربطوني ومالي حق بيج ولا الي حق امنعهم اهلج هذول شأسوي بله فهميني

تميم :- ليش ما تخليني اني اتصرف وياهم يابة عشر دقايق ادز الهم دورية تشيلهم وتشمرهم وره الشمس ليششش مسكتنيي ليشش

— ما يصيرر ما يصير مو لعب الابنية بنتهم ما نگدر نمعهم منها

— يعني ترجعها وياهم

عمي سكت ويباوع عليه حاير وميت من القهر و مراد وتميم اثنينهم واگفين حالهم مو احسن من حال عمي رجع تميم گال

— هسه مشكلتهم احنه غربه عليهم وما يصير تبقى يمنا

— سهلة هسه اعقد عليها و انعل ابو شرفه اليفتح حلگه ويحچي وياها بكلمة

يتبع…….

الثاني والاربعون من هنا