رواية عروس الجبايش الفصل الاربعون 40 بقلم ياسة – تحميل الرواية pdf

إذا لم يتقبلنا المجتمع كـ حبيبين! فليذهب هذا المجتمع إلى عزلته الباردة

نحن لسنا أسرى لنظراته القاسية ولا ورثة لقيوده الصدئة. نحن الروح التي أبت أن تُخنق باسم العادات، والقلب الذي رفض

أن يُسجن خلف أسوار التقاليد.

​لتكن قصتنا وصمة عار في سجلاتهم

إن شاؤوا، ولتكن حديث سوء في مجالسهم الفارغة. لا يهم!

كل ما يهم هو تلك المساحة الصغيرة بيننا؛ المساحة التي لا يعرفون عنها شيئًا حيث تسقط الألقاب، وتنهار الأسماء، ويبقى الحب سيد الموقف.

​نحن نختار أن نكون الحقيقة في زمن الزيف. نحن نختار أن نكون الحياة في أرض الموت البطيء.، ​فما قيمة مجتمع يمنع عن الإنسان أطهر مشاعره؟

مجتمع لا يرى في العشق إلا ذنباً،

ولا في القرب إلا خطيئة؟

هو مجتمع فقير، مهما ملك من أموال وسلطة، لأنه أضاع ثروته الحقيقية: الإنسانية والحرية.

​دعهم يتحدثون، دعهم يرفضون، دعهم يحكمون. نحن قد اخترنا محكمتنا الخاصة، وقاضينا هو القلب، وشهودنا هم النجوم التي تراقبنا ونحن نبني عالماً لا مكان فيه لثقلهم.

​إلينا هذا الحب، وإليهم كل ما عداه.

…………………………………..

يُـمن :- قريت رسالته بس ما حسيت بشي ولا تحركت عندي ذره مشاعر ما اگدر اتقبله ولا اتقبل كلامه ولا حتى اتقبل روحي

طفيت النقال و حطيت المخده على عيوني

هذا حدي ما اگدر افكر ولا اگدر اتقبل ولا اگدر اخذ قرار تعبت وكلشي بحياتي جاي إحس بيه غلط حتى النفس اللي اتنفسه إحسه غلط

بقيت مده طويله المخده فوگ راسي وما اسوي شي بس هيج باقية وراها شمرت المخده وگمت للحمام توضيت ورجعت

فرشت سجادتي و گمت اصلي الوتر والشفع وراها لزمت سبحتي وبقيت اسبح

واستغفر واصلي على محمد وآل محمد

ساعة ساعتين ثلاثة وانا ويا ربي وفاصلة من الدنيا وراها رفعت ايدي و دعيت

— يا رب اخرجني من حولي وقوتي الإ حولك وقوتك يا الله ما اريد افكر ولا اريد اشيل هم ولا اريد الأذية تعبت يا الله وانتَ وحدك تعلم أذيتي المريت بيها يارب خلصني و اوگف وياي لا تعوفني وحدي يارب ساعدني مالي غيرك يارب اكتب لي اللي تشوفه من صالحي ونصيبي اكتب لي الصح يارب

تمددت وانا بجادر الصلاة فوگ المصلاية

و بقيت افتح عيوني واسدهن لحد ما غفيت و اول ما غفيت شفـت روحـي واگفه بمكان جبير كلش وفارغ محد بيه وجنت مثل الخايفه و ادور على احد اوگف يمه بس ماكو بس انا بهذا المكام رجعت درت وجهي اباوع منا ومنا نفس الشي الشارع فارغ حسيت بروحي دخت و عطشت بس شارع فارغ ومحد بيه ولا قطرة مي يمي

گعدت على الرصيف بس هو مو رصيف لا يصير اعلى يعني مثل الصبه العالية وحطيت اديه منا ومنا سانده روحي عليهن ومنزله راسي للگاع فجأة صار صوت حركة قوية رفعت راسي شفت الناس كلها جاية شلون اجوا منين طلعوا شوكت هيج انترس الشارع ما ادري

وراهـا شفت طفل صغير وشكلة كلش حلو

يصير تقريباً عمره سبع او ثمان سنوات شعره كيرلي اجى من بعيد يركض عليه

وبـ ايده كاسة ستيل مثل الكاسات العند جدتي اللي تشرب بيهن الجهال المرضه والنسوان الما تحبل جانت بيها كتابة المعوذات واية الكرسي والفاتحة والاخلاص طبعاً الكاسة تصير دائرية وصغيرة وبيها ماي قليل

ابتسم و انطانياها اخذتها من ايده

و شربتها المي عبالك اول مره اضوگه من گد ما رويت بيه طيب بشكل مو طبيعي وبارد شلون جان عبالك اكو فـد جمرة بصدري ونزل هذا الماي عليها وطفاها

صح قليل بس كلش كافي عليه ورواني

و برد أعصابي وهديت والولد بقى واگف يمي لحد ما خلصت شرب و انطيته الكاسة گتله شكراً اخذ الكاسة بس ما رد عليه بشي بس ضحك ورجع يركض مثل ما اجى

گمت وراه اباوع عليه شفته راح النهاية الشارع وبعدها اختفى فزيت ويا ما اختفى من عيوني بس شنو فزيت شگد مرتاحة وشگد هادية هيج إحس المثل انطبق عليها مال مي بارد ونزل على گلبي لان من صدگ هذا المي نزل على گلبي بارد ومنعش

گمت للحمام سبحت و بدلت وبقيت گاعدة بالصالة و الهيتر مشغلته والسبحه لازمتها بـ ايدي واردد استغفر الله ولا حول ولا قوة الا بالله العلي العظيم لحد ما غفيت من جديد وانا اسبح واستغفر

انوب للعشرة وامي گعدتني ومن گعدت كلش مرتاحه و نفسي هادية و روحي خفيفه بقيت متمدده بالصاله على القنفه واگول بيني وبين روحي متأكدة ربي العالمين طلعني من حولي الحوله متأكدة هذا الماي وهاي الراحه الانا بيها هيَ علامة وأشارة من عنده الي يعني انا يمج وانا سندج وامانح وجايج الامان مني يرويج ويروح تعبج لا تخافين هيج فسرت الحلم

رجعت امي تحچي عليه ترديني اگوم اكل گمت غسلت و گعدت بالمطبخ اكلت وغسلت المواعين و رجعت الغرفتي بدلت ورتب روحي ترتيب حلو حجابي و هدومي

وحتى الحذاء اليوم اهتميت بيها

وگفت على المراية حطيت كحل ومسكارة

وحمره سحرية الخضره عندي حطيت الخدودي شوية والحلگي هم شوية وطلعت للدوام

وصلت شوية من وكت بقيت گاعدة برى

لحد ما اجت ورود بس شافتني ابتسمت

وگالت

— مدري ليش احسج مرتاحه اليوم

— اي صح كلش مرتاحة

— يارب دوم اشوفج مرتاحه

گمنا طبينا نريد نصعد القاعتنا بعدنا على الدرج و شفت بُـرهـان واگف بنهاية الدرج ويا اثنين بنات مدري عليمن يسألن بيه وهوَ يجاوبهن

دار وجهه شافني وانا اصعد ورجع باوع للبنات لان جان يحچن وياه صرنا انا ورود كلش قريبين منه يعني فتنا صف بصف ويا ورود سلمت عليه وانا كملت طريقي بدون سلام

سمعته رد على ورود وراها اجت ورود عليه گالت

— خطيه والله شو انقهرت ليش ما سلمتي عليه

ما جاوبتها طبيت للقاعة ثواني و اجى طب ورانا جان عدنا اول محاضرة سلم و نزل جنطته على الميز وگف بالنص و بدأ يشرح موضوع جديد وحل اكثر من مسأله وگوم اكثر من طالب يسألهم بالمادة ويجاوبونه وراها باوع عليه و سألني رديت عليه بس گلبي هيج يدگ سريع و غلطت ثلاث مرات بالاجابة وهوَ يساعدني بيها لحد ما خلصت جوابي إحس گلبي وگف وريگي نشف

مستحيل اگدر ارجع اعتبرة استاذي الشي صعب صار عليه وجودي ويا بنفس المكان

و سؤاله الي وجوابي وشرحه كلهم جاي يوتروني

من كملت الجواب گال .. شكراً استريحي

رجعت گعدت و ابلع بـ ريگي من الموقف إحس ريگي نشف انوب افتر سأل غير طالبة وراها رجع وگف بالنص وگـال

— خلصنا محاضرة اليوم وشرحناها بـ اكثر من طريقة واخذنا اكثر من مثال عليها وهسه خلونا نطلع من جو الرياضيات والمسائل الجافة والمعقدة و نحچي بالفن والفنانين شتگولون

الولد ضحكوا وردوا عليه

— أستاذ ان شاءالله منا للتخرج راح نطلع مو بس أختصاص رياضيات واختصاص فنون جميلة ومسرح على ايدك ان شاء الله

— ليش كل موضوع ينطرح عليكم بيه فائدة الكم ليش تخلون اختصاكم ومعلوماتكم محدده بمادة معينه وسعوا افكاركم اكثر و ادرسوا مواد جديدة بعيدة عن اختصاكم راح تستفادون منها وتفيدكم بزمن معين هسه على العموم خلونا نبدي قبل لا يخلص وقت المحاضرة

حچى هيج ومشى يم الصبورة وصارت عيونه على الكل يعني سيطر على كل المكان وراها گال

–سامعين باللوحات الغير مكتمل ؟

محد رد رجع گال

— هاي اللوحات عافوها الفنانين بدون تكمله قبل لا يضيفون اللمساتهم الأخيرة عليها

رجع رفع قلم رصاص ليفوك وبقى يمشي بين السطور و عيونه تتوزع على الكل ومن بينهم انا وانا من شفته باوعلي بسرعة نزلت راسي للگاع رجع گال

— اكو فنان أسمة مجد هذا الفنان جان كلش بارع بالرسم وكل رسمة يرسمها لازم تكون بدقه عالية وموضوع عظيم وبيوم من الأيام قرر يرسم لوحه جديدة بس هاي المره الفكرة اللي جانت باله جانت تحچي عن تحفه كلش عظيمة تمثل شكل المرأة

رجع باوع عليه وانا احس ادمرت دمار والتوتر موتني اكيد راح يحچي عليه متأكدة كل هاي القصة اللي راح يحچيها تخصني وتخصه رجع گال

— مجد الفنان بقى يرسم باللوحة ما يقارب سنوات طويلة اتقن بيها الالوان وأجاد بيها الظلال لحد ما وصل الوجة المرأة هنا بقى ليالي طويلة يخلط بالالون لحد ما وصل للدرجة المثالية اللي تليق بعمق عيونها وبراءة أبتسامتها بس من كملت اللوحة وجهزت بقت عنده مساحة فارغة وحدة بنص اللوحة بمكان القلب تحديداً و ما گدر يكملها مع الأسف

رجع سكت شوية وراها رجع گال

— تخيلوي وياي فرشة الرسم مالت مجد بخيالكم وتخيلوا شلون رسم هذه اللوحة لحد ما وصل المنتصف القلب و توقف

الهدوء بكل مكان والكل مركز وياه رجع حچى هوَ بطريقة هادئة و برزانه كلش عالية وباوع عليه مباشرتنا وهنا ابد ما دار عينه مني بحيث احس غصيت من التوتر ورجع گال

— من بعد ما توقف عن تكمله اللوحة سألو النقاد واصدقاء والمقربين ليش توقفت ليش ما تكمل الجزء المفقود من اللوحة ليش عفتها هيج فارغة ، رد عليهم وگال هاي المساحة الفارغة هيَ رافضة تنملي هذا الجزء إني گادر ارسمة بس هوَ رافض يصير جزء من للوحتي هذا الجزء من اللوحة بالذات نغمه إني گادر اعزفها بطريقـة عجيبة ومثيرة وجميلة بس مع الأسف ما تريد تسمع لحني وطريقة عزفي

​

​

رجع دار وجهه للباقين و گال

— مجد جان يعرف هاي اللوحة راح تبقى ناقصة للأبد ويعرف هذهِ اللوحة رائعة وعظيمة بس ما راح تكمل وبرغم من النقص اللي موجود بيها أو بسببه صارت هذهِ اللوحة هي اغلى والاعز عنده تعرفون ليش

​محد بينا يرد الكل ساكت رجع مشى بالاتجاة الثاني وراها رجع بتجاهي بهدوء مو طبيعي و باوع عليه و گال

— لان هذهُ اللوحة دائماً تذكره اكو جمال گدام عينك وبين إديك بس ما تگدر تمتلكه ولازم تحترمه وهوَ بمكانه وما تتقرب منه وتتركله حرية القرار إذا حاب يكمل او يبقى مثل ما يريد

مشى كم خطوة و رجع وگف وگال

— هسه شتعلمتوا من القصة

محد جاوب رجع مشى من جديد لحد ما وصل النص القاعة وأبتسم أبتسامة بيها حب وحزن اثنينهن شفتهن بهاي الأبتسامة وراها اخذ نفس طويل و گال

— اعرف ما فهمتوا شي منها وما تعلموا شي منها بس اريد احچيلكم واگول إني حالياً مثل مجد رسمت للوحة وصارت اغلى ما عندي واصعب ما واجهت تعلمت منها الحب الحقيقي مو دائماً نگدر نملكة ولا نگدر نجبره علينا بس نگدر نتقبله بكل فراغاته الحب الحقيقي دائماً نشوفة كامل ما بيه فرا و اللوحة اللي ترسمها بعقلك تگدر تشوف اللوانها كاملة قبل لا تكتمل على أرض الواقع

رجع گعد على الكرسي وگال

— اللوحة هيَ حياتي

— المرأة هيَ محبوبتي

–المساحة الفارغة بمكان القلب هوَ رفضها الي وعدم رغبتها بـ أن تكون جزء من حياتي ومني مع ذلك إني جداً أحترمها وأحترم تقبلها ورفضها وتفكيرها وعقلها واتمنى يجي يـوم و اللگى الالوان اللي تنسابها و ارجع الون بيها الفراغ واكملها

بـ أجمل صورة وبالأخير إني كلش أحبها وهيَ اغلى لوحاتي

سكت ويا ما سكت أبتسم رد عليه واحد من الطلاب

— يا حظها بيك أستاذ

رجع الثاني گال

— عمي والعباس هاي متعافيه الما تقبل بيك

گام هوَ من مكانه و شال جنطته و گال

— ادعولي الگى الالوان اللي تناسب الفراغ واكمل لوحتي مثل ما رسمتها بخيالي

صارت ضجه بالقاعة كلها تحجي وراها گال

— اشوفكم المحاضرة الجاية ان شاءالله

طلع من القاعة وصار حديث الساعة كلها تسولف بيه و كلها تسأل منو يحب وين حبيته وليش هيج ما قابله بيه شناقصة ما ادري شنو بحيث فتح على روحه باب ما ينسد بعد لو الدنيا تنگلب ورود باوعت عليه تريد تحچي ما خليتها تگول كلمه سكتت مني

وراها طب علينا دكتور سمير و بدأ بمحاضرته بس انا ابد بالي ما صار يمي بحيث رحت بغير عالم وكلش احس هبطت من الموقف النحطيت بيه

ما ادري شلون خلص اليوم وشلون قاومته للأخير ومن رجعت للبيت خلصتها بس صافنه وفـد مره مالي خلك

ثاني يوم ما رحت للدوام مالي واهس بشي ومتضايفة وما اگدر اشوفه واحط عيني بعينه باليوم الثالث من داومت شفت ريـام واگفه هيَ و بُـرهـان واحد من الدكاترة واگف وياهم جانوا يسولفون بس بُـرهان مثل الضايج و يأشر بـ ادية و يحچي بنزاعاج

وگفت بالجهة البعيدة ومتأنيتهم يخلصون وريـام تبقى وحدها حتى اشوف موضوع مناف شنو و شعدها وياه و شلون هيج واحد يعرف الثاني شلون تعرفوا

الظاهر شافني بُـرهـان لان باوع عليه من بعيد وراهـا نهى كلامه وياه الدكتور الجان واگف يمهم راح و ريام باوعت عليه واجت تمشي بـتجاهي و بُـرهـان راح بغير جهه

وصلت يمي سلمت عليه باستني بس ضايجة سألتها

— شكو ليش ضايجة

— رفضوا طلب بُـرهان مالت الدكتوراة

— الله لا ينطيهم من البارحة لليوم ما ماكل ولا نايم وضغطه معلك

— خيرها بغيرها كل تأخيرها وبيها خيره ما مقسومتله هاي السنه

— هاي السنه الثانيـة ينرفض بدون سبب لج اصلاً هاي السنه حتى ما انطوه مجال سدوها عليه من اول لحظة

سكتت ما رديت بس ضجت خطية هوَ حتى لو اعترف و طلع عن المألوف بـعترافة الي بس ما يستاهل لان إنسان مثابر ومجتهد ويحب العلم رجعت گالت

— انتِ شلون وضعج

— زينه الحمدلله

— تعالي نگعد بالكافتريا شوية قبل لا تفوتين للمحاضرة

— انا هم اريد احچي وياج شوية

— تمام تعالي يلا

مشينا للكافتريا گعدنا هيَ راحت جابت نسكافية واجت گعدت مقابيلي وتگول

— خير ان شاء الله شكو بشنو تردين تحچين

— قبل عشر ايام او اكثر ما اذكر بالضبط

يا يوم شفتج واگف ويا منـاف

تفاجأت من سمعتني گلت اسمه و بسرعة ردت

— بس اول شي احچي الصراحه انتِ وين تعرفينا وشنو اللي بينكم أمانه جاوبي حتى افهم وافهمج

— بصراحه قبل كم شهر تعرفت عليه هنا بالجامعة يعني صار بيناتنا موقف و تعرفت عليه من خلال هذا الموقف و كلش طلع مرتب و حباب واحسه وجال شهم

حچت هيج وابتسمت وانا احس عيوني گامت اطلع شرار رجعت گالت

— وراها تشكرت منه و بعدين شفته مره ثانية هنا ومره ثالثة برى الجامعة ومنا وصار بيناتنا سلام وسؤال وجواب وراها گال سألت عنج وعن اهلج وكلش حاب يتعرف عليه يرتبط بيه يعني يرد يرتبط بيه بمشروع زواج

إحس لزمني مغص وعيوني گامت تحرگني لا مناف لا ما تسويها مستحيل ما اصدگ هيج تطلع طلعه حقيرة ، رجعت گالت

— بقينا نحچي يعني نتعرف بس الى الان ما بيناتنا شي جدي مجرد تعارف بسيط هيج سؤال وجواب و هذا هوَ انتِ وين تعرفينه

دخت گمت ما اسيطر على روحي نزلت راسي للميز رجعت گالت

رجعت رفعت راسي و باوعت عليها شفتها تباوعلي بقلق رديت

— نصيحة ريـام عوفيه لا تحچين ويا ولا تردين عليه وإذا شفتية جاي بهذا الاتجاة انتِ اخذي الاتجاة المعاكس

— ليش شبيه وين تعرفينه انتِ

— اعرفه عز المعرفه ريـام منـاف جان خطيبي

انصدمت صدمة بحيث ما ترمش بس صفنت عليه، رجعت انا اگول الها

— وخربت الخطبة من زمان وما صار بينا نصيب بس هوَ ما ناوي يعوفني و بنفس الوكت ما يحب اخوج و يدري بيه يفكر بيه فـ قرر يستغلج حتى يضرب بـُـرهان بيج

— لا يُـمن الله عليج لا تشاقين

— والله ما جاي اشاقة مناف خطيبي السابق وبيوم الي شفتج واگفه يمه حچيت ويا يعوفج ويطلعج من اللعبة بس ما سمع مني اصلاً ما رد عليه وعافني احچي وحدي وبعدين گال رجعيلي و انهي اللعبة گبل لا تبدي

الأبنية ضلت ساكته بس احس بدگات گلبها وصلت يمي واديها شلون گامت ترجف جانت تحاول تسيطر على روحها بس ما تگدر وراها جرت بطل المي شربت منه شوية وگالت

— حسبي الله ونعم الوكيل

حچت هيج وشالت جنطتها وگامت گمت وراها وگفتها باب الكافتريا واگول

— بس اوگفي شوية الله عليج سمعيني

رجعت وگفت وتباوع عليه ودمعتها بعينها گالت الها

— والله انا مالي شغل

— اعرف لا تشيل هم

— والله انا من اول يوم الشفتج ردت اگلج بس ما لحگت بيج وخابرت عليج بساعتها ما جاوبتني انوب صارت غير سالفه بوجهي وتمرضت و ما گدرت احچي وياج بعد

— يُـمن صح اني هسه بحاله صدمه واحس گلبي راح يوگف من القهر والاستغلال الاني بيه بس ذكرتيني بـ شغلتج اللي تمرضتي عليها تدرين بـ اخوي يحبج و جاي يموت باليوم الف موته من التفكير والقهر تدرين حچالي شلون اعترفلج بس ما جاب طاري خطيبج او بالاحرى ما شيفني وياه ولا اني فاتحة موضوعه گدامه يعني ميعرف باللي جاي يصير بس گال اعترفت اليُـمن

و رفضت وتركت الدوام اسبوع ورجعت تعبانه وشكلها مريضة ومحمل نفسه ذنبج حاولت اتصل عليج ونحچي بس ما قبل

ما يرد احد يأثر عليج ويحرجج بس والله أخوي يحبج و مشتريج بـروحه

— شتحچين انتِ الثانية شلون هيج الموضوع عدكم عادي

— وليش مو عادي اعرف تفكرين بالناس وبيت خالتي بس ترى احنه خرباتين وياهم صار اكثر من سنه وما عدنا اي علاقة بيهم والگلب يا يُـمن سلطان نفسه ما يمشي وره احد ما يمشي غير بشوره خليني احچيلج شغله بُـرهان مو غبي حتى يجازف هيج مجازفه ولا ما يفكر بالعواقب ولا ما يحسب حساب الكلشي ترى ما يخطي هيج خطوة ويعترفلج إذا ما دارس الموضوع صح

يُـمن الناس ما عاشت العشتية ولا شافت اللي شفتيه الناس الها الظاهر وما راح ترضا عليج لو تموتين گدامهم وبكل الاحوال انتِ غلطانه بنظرهم إذن طز بالناس

— لا ريام لا ما اگدر اتقبل الفكرة من اساسها

— حقج بس الوقت كفيل يخليج تتقبلينها وتتقبلين راعيها يُـمن لا تخسرينه والله مو لان اخوي بس والله هيج شخص يفوت هاي الفوته ويجازف هاي المجازفه ويتحدى الظروف والاهل والمجتمع والعادات والتقاليد برأيج اكو منه

وداعتج يـا يُـمـن هو هذا العوض الصحيح الـمفروض انتِ اللي تجازفين وتختارينه لان هيج إنسان ما يجي الكل ابنية ولا يمر بحياة اي وحده

نفس الشي بقيت ساكته ما ارد رجعت گالت

— فكري زين و باوعي للموضوع من ناحيتج انتِ مو من ناحية الناس و عوفي الناس واشتري اللي مشتريج اشتري نفسج وراحتج و سعادتج

نفس الشي ما ارد رجعت هيَ هم سكتت وراها گالت

— اني أستأذن منج راح اطلع للبيت كلش احس تعبت وجاي ارجف

حچت هيج و أبتسمت مقهورة ومختنكة وراهز افترت و مشت للباب وانا بقيت بمكاني رجعت باوعت للساعة شفت وكت المحاضرة بادي صار كم دقيقة حرت اروح لو لا بعدين گلت خليني اروح ليش تفوتني شو عدنا بُـرهـان واكيد ما يحچي شي لان يعرف اخته جانت يمي وتأخرت وياها

صعدت وصلت الباب القاعة سمعت صورته يشرح ما گدرت اطب بقيت على وگفتي وراها افتريت ومشيت بعيد عن القاعة بقيت وحدي ومثل الضايعة وحايرة لحد ما خلص وكت محاضرته و شفته طلع ويا ما طلع وگع من عنده قلم دنگ عليه شاله ويا ما جاي يرفع روحه حسيت عليه مثل اللي انوجع و رفع روحه من الگاع بصعوبة

انوب گام راح بدون ما يشوفني لان انا جنت صايرة وراه و بس شفته طلع من الممر طبيت للقاعة گعدت بمكاني گالت ورود

— وين جنتي ليش ضاربة المحاضرة

— ما ادري وما عندي جواب و ما اريد احچي ورود عوفيني الله عليج

سكتت من عندي وره خمس دقايق رجع فات علينا من جديد انصدمت ما توقعته يجي مره ثانية وبهاي السرعة اول ما فات عيونه صارت على مكاني وبس شافني گاعدة رفع حاجبه مثل اللي متوقع راح يشوفني جاية وراها گال

— أستاذ عمار ما يگدر يحظر اليوم فـ راح اشرحلكم المادة بمكانه

گالت يُـمن سلطان

— الله أستاذ لو كل المواد تاخذنا انتَ

باوع الها وابتسم ورد

— ولو كل القاعات قاعتكم

رجع يوسف الممثل ضحك و گاله

أبتسم بدون ما يرد وراها باوع عليه و گال

انخبصوا خبص بكلامه وكلهم يردون عليه والله احنه اللي نحبك واحنه اللي نحترمك

وراها سكتوا وبلش يشرح بالمادة مال أستاذ عمار

شگد ما المادة جان يسهلها أستاذ عمار علينا شگد ما اليوم صارت اسهل و طريقة شرحة تجنن بحيث المعلومة تنطبع طبع

بالدماغ

لحد ما خلص شرح و طلع طلعت وراه يُـمن سلطان تصيح أستاذ أستاذ ما ادري شتريد من يمه ورود بسرعة باوعت عليها ورجعت باوعت عليه وگالت

— بس باعي شلون إنسان كامل شلون كلام شلون ثقافة شلون شخصية شلون رجوله لج شوفي هاي البـ… شلون مگطعه نفسها بس كون يباوع الها بس باعي الثكل والرزانه خرب حظج شگد ما تفتهمين

و غبية

ما ارد ولا احچي وكلش ضايعة وعقلي شكل وگلبي شكل فد مره انتهيت خلصت الدوام ورجعت للبيت

امي بس شافتني طبيت گالت بدلي بسرعة نروح نشتري ملابس العرس ولاء

— الخميس الحنه ما بقى وقت

— خليها غير يوم

— لا اليوم نروح ما دام عمج ما يجي اليوم خلينا نخلص احتياجاتنا يلا استعجلي

— ما ابدل اروح بهاي هدومي

— و الاكل هم ما تاكلين

— ما اشتهي من نرجع عود اكل

— بكيفج خليني راح ابدل

راحت بدلت وانا بس غيرت حذائي وطلعنا انا وياها للسوك اشترينا للحنه والعرس

ومرينا بطريقنا على الخياطة تخيط يمها امي دشداشات انطتها القطع والفصال وانا هم اخذت قطعين انطيتهن الها و شوفتها فصال عاجبني و رجعنا البيتنا

بدلت وغسلت واكلت و راها بديت اقرأ لحد الساعة بـ 12 بالليل يلا كملت واجباتي

اجيت تمددت بـفراشي والنقال بـ ايدي اگلب بالفيس لگيت اشعار جايني من خساب بُـرهـان مكتوب بيه

— الجمعة راح اطلع برى العراق ما اعرف إذا اگدر ارجع بعد او هاي الروحة ما بيها رجعة للأبد، راح اعوف اهلي و دوامي وكلشي ما اخذ وياي راح اطلع فارغ بدون كلشي يُـمن اريدج وياي اريد اخذج بعيد عن كل الناس اللي اذوج وتعبوج اريد اشتريلج سعادة من كل دول العالم واحطها بين اديج اريد ارسملج طريق جديد يُـمن وداعت عيونج أحبچ و اتمنى اخذج من كل الدنيا واضمج بروحي اتمنى اعيش وياج الحب إحس تعبت ما اگدر اكابر ولا اگدر ابتعد قربج يحرگني وبعدج يحرگني وإذا وگفت بنص اموت حرگ من الجهتين إني اريدج ومستعد الكلشي، الكل مواجهه وكل تحدي مستعد اتحدى بيج كل العالم اتحدى الزمان والمكان والظروف والعادات والتقاليد والمجتمع واهلي و نفسي مستعد الكل ردات الفعل بس خليج الي خليج من نصيبي حبابة لا تگطعينها بوجهي فكر و اخذي راحتج بالتفكير حطي الشروط اللي تخطر على بالج أو اختبريني وشوفي مكانتج بگلبي يُـمن مستعد اخسر الكل وابقى وحدي بهاي الدنيا بس كون تصيرين من نصيب والي مستعد ابيع الكل واشتريج أحبـچ و داعت عيونج الماخذه گلبي

ما جاوبته ولا رديت طفيت النقال بس ما نمت ولا ارتاحيت ولا غمضت بحيث امي گعدت الصبح وانا بعدني گاعدة ما نايمة وراها بدلت ورحت الدوامي ما شفته بيومها ما جاي اصلاً

بقيت گاعدة و بالي مو وياي وحسبه تاخذني وحسبه ترجعني وثاني يوم نفس الشي ما شفته و باليوم الثالث نفس الشي ما اجى للدوام وبمكانه اخذتنا ست دلال

سألوها الطلاب عليه ردت ما اعرف بس على الغلب راح يترك الدوام عنده دراسة برى العراق

وراها صادف خميس وحنه ولاء وانا ما رحت للدوام التهيت بالحنه صح بدلت ومكيج وطلعت حلوة بس ابد ما ارتاحيت كلش ضايجة ومقهورة وبالي مو صافي

زهراء ابد ما فتحت موضوع وياي ولا حاولت تجيب طاري اخوها و باقي البنات شگد سوالفهن حلوة و الضحك واللمه والفرحة تخبل بس انا ما احس بشي كلش طافية وتايها

باوعت للساعة السته العصر يعني خلص الدوام وخلص اليوم و ما بقى منه شي

و باچر جمعة راح يسافر وبعد ما يرجع ومدري ليش انقهرت عليه لان تحارب بدراسته وراح يتغرب برى البلد

بقيت هيج بهذا الحال لحد ما خلصت الحنه ورجعنا البيتنا بيومها تميم جان بالدوام وهـوَ وعمي بس مراد موجود ومن اجن النسوان طلع من البيت

و من رجعت للبيت لحد الساعة ثلاثه الفجر انا گاعدة وثلاثة وربع اجتني رساله على الواتساب من رقمه كاتب بيها

— اتمنيت اشوفج اليوم قبل لا اروح واجيت للجامعة الخاطرج بس ما لگيتج مشتاقلج وراح اشتاقلج اكثر بعد نصف ساعة الموعد طيارتي ادعيلي الله يسهل عليه و احصل على دراستي و اتوفق بيها متأكد گلبج طيب ودعائج صادق و اعرف راح اشوف كل التوفيق على عيونج الحلوة

نفس الشي قريتها بس ما جاوبته بس بوكتها گعدت گعده و دعيتله بنية صادقة الله يسهل عليه ويوصل بسلامة ويوفقه بدراسته

ثاني يوم صادف جمعه رحنا للعرس

و لگيت عمي وتميم نازلين اثنينهم صار هواي ما شايفة تميم وما حاچين لان الدوام ماخذه من عدنا واصلاً متغير وتعبان فد مره وحتى ما بيه حيل للشقة والضحك مثل قبل

راحوا للزفه كلهم بقينا بس انا و زهراء بالبيت ما رحنا و من فرغ البيت اجيت گعدت يم تميم بالحديقة لگيته لازم جكارته ويدخن وصافن بغير عالم گتل

— اي عيني ابو علي صاير نفسية وماله خلك احد

باوع عليه وأبتسم و گال

— اي بالعباس مالي خلك حتى روحي

— شنو الما بيه يا يُـمن

— يا ستار يا ربي شكو

— ماكو بس يومية يموتلي صديق يوميه اشيل واحد من الگاع مضروب براسة لو بگلبه لو بلعومه ماكو بس من اشيلهم الگاع احطهم بحظني ويباوعن عليه

و يبتسمون فرحانين بالشهادة وراها يوصوني بجهالهم بـ امهاتهم ونسوانهم اخخخ يا يُـمن شيب گلبي وتعبت كل شاب يهد الحيل و الگاع تخاف منه هيج يروح مثل شربة الماي لج اخخخ لو بـ ايدي احرك شكو سياسي وشكو برلماني وشكو حاكم اله ايد بالسلطة لج اخخخ يا شبابهم الراح غدر يا جمالهم الصار جوه الگاه مرضني فرگاهم مرضتني طريقة موتتهم

تعبت ماتت الدنيا بعيني فراگهم يراد حيل واني بعد ما عندي حيل

حچى هيج و اخذ نفس طويل من الجكارة وزفره ليفوگ وعيونه حمر دم گتله

يُـمن :- الله يرحمهم وينطيك الصبر

— اي شلونج انتِ شلون اخبارج وين رحتي وين اجيتي

— زين الحمدلله

— هههه اي هدوء

— قبل فتره اتحاصرنا ومناف وجماعته اجونا اسناد لج هناك وتذكرتج ونعلت حظج الخ… ميت مره

حچى هيج وضحك رجعت انا ابتسمت ورديت

— من اجونا سيطروا على المكان ولزموا ابو القناص الجان يضرب علينا يا يابة ههههه

ضحك بصوت عالي وهز راسه ورجع گال

— طلع سيادته مجرم من الطراز الاول خلـه ابو القناص يدخل للأسلام من جديد ومحمد هههههه مدري شلون عاقبه ما ادري عقاب ما شايفة من گبل ولا سامع بيه طلع بيه القضاء والمضاء يمكن جان يشوفه انتِ هههه

— هههه زين يستاهل

— اي بالله يستاهل هههههه

حچى هيج وضحك بصوت عالي وراها گال

— ومن بعد ما خلص منه طگه طلقة بعينه گاله حتى تباوع بيها زين علينا وتقنصنا عدل گـ…

بقيت ساكته وهو يضحك وراها گال

— يُـمن إذا جان اكو امل واحد بالمية ينصلح من بعد الاحداث الاخيرة مستحيل يرجع طبيعي گلبه انغسل ماكو رحمه بعد بگلبه وإذا رجعتيله بيوم من الايام معناها حكمتي على روحج بالموت البطيئ

— لا مستحيل ارجعله بيوم من الايام ورقتنا احترگت وصارت رماد

— شوفي امانه الله هوَ زلم ماكو منه اثنين بس ما يفيدج يدمرج دمار وينهيج صعب كلش صعب واخر فتره صار اصعب من قبل لان بالخط الاول و شاف اللي ما شفنا كلنا

— ادري بيه و اصلاً مو بس يدمرني لا ويدمر كل اللي يمرون بحياتي كلهم تدري مناف مريضه بمرحلة متقدمة يعني ما ادري شلون احچيلك بس والله مو طبيعي

— سوى شي جديد ما اعرف بيه

— قبل فتره شفته بالجامعة و اگف ويا ريـام اخت بُـرهـان

— ومن شفتهم حسيت اكو لعبة بالموضوع لان شجابهم وشـ وگفهم سوى

— حچيت وياه ما جاوبني عافني احچي وحدي وحتى تجاوزت عليه مارد ابد وراها حچيت ويا ريـام وسألتها وين تعرفه گالت بيناتهم بداية علاقة

— لا يابة وين اكو هيج

— يعني علاقة جدية حب وزواج لو شنو ما فهمت

— هوَ واهمها بهذا الشي بس چذب بس يريد يضرب بُـرهان بيها ويساومني على الرجعة

— وبُـرهان شنو بالموضوع ما فهمت

سكتت ما رديت رجع گال

— احچي يُـمن اني اخوج وصديقج وإذا طلع اكو شي ضامته عليه راح ازعل منج احچي وخليني بالصورة لا تحطيني وراج

— بُـرهـان قبل فتره اعترفلي

ضحك ودار وجهه للباب وراها باوعلي و گال

— شعترف بله الأستاذ

ما جاوبت بقيت ساكته استحي احچي رجع گال

— هههههه استغفرالله عمي شني هاي الزلم المسودنه التطلع بحياتج جيرة بفرگج على هذا الحظ

— هذا مسودن والزهرة ادري فكر بالموضوع من قبل لو هيج طب لا فهم

ولا علم

سكت ما جاوبني بس شكله انصدم و اخذله صفنه طويلة وحده وراها گال

— شوفي هيج شخصيات مثل بُـرهـان يشتغلون صحيح ويفكرون و يخططون ويقررون يلا يخطون ربع خطوة و مستحيل يجازفون هيج مجازفه بدون تخطيط وتفكير مسبق للعواقب بس السؤال هنا انتِ شنو رايج

— لا مستحيل الا تخبلت

ما جاوبني بقى ساكت وراها اجت زهراء شغلت الماطور وانسد الموضوع بيناتنا وانا گمت طبيت جوه يم عمي ومراد لحد ما اجت امي و رجعنا البيتنا

اربع اشهر تقريباً انا اروح وارجع للدوام ماكو اي شي جديد كل واحد ماشية حياته حسب ما مرتب الها الا انا عايفتها على ترتيب ربي طول هذا الأشهر بُـرهـان يومية يدزلي رساله على الماسنجر يسأل عني وعن احوالي و يكتبلي شسوى بيومه وين راح وين مشى

بعدين كام يصورلي ويدز الاماكن البيت الاكل الدراسة الطلعة الطبه وحتى لبسه بس انا ابد ما ارد عليه ولا اجاوبه صرت اعرف اوقات دراسته واوقات فراغة وطلعته ورجعته وحتى نومته عبالك عايشة وياه

اكتشف هواي شغلات عن شخصيته وافكارة و معلوماته جان كلشي فيديوات تخص المرأة وشلون تقوي شخصيتها وتكون نفسها وما تعتمد على احد وتصبر قوية ويرجع يدزلي عم الرجل شلون يقوي نفسه ويبني عائله صحيحة

جان يدزلي عن العلم والمعرف و قصص كاتبها كتابة بـ ايده بيها درس يفيدني

و يكتبلي بالنهاية اقريها زين وطبقيها على نفسج

من غير الغزل والشعر والكلام الحلو

صار جزء لا يتجزء من ايامي وساعاتي گمت احس بنفسي تعودت عليه وعلى رسائله ومعلوماته ونصائحه و يومياته

وإذا مره تأخر وما دزلي اگوم افوت كل شوية اشوف حسابه متصل لو لا

اما ريـام جانت الها جزء كبير بـحياتي

لان ما تخلف عنه بالكلام والتصرفات نصائحها معلوماتها كلشي بيها حلو ومرتب صرت احچي وياها اكثر واستشيرها اكثر جانت هواي تعلمني وتنصحني وحتى تساعدني بالدراسة وجانت كلش ذكيه او اخوها ذكي وجاي يشتغلون عليه اثنينهم حتى يوگعوني ما اعرف بعد بس جانت ما تفتح موضوعه وياي بس مرات تنطيني فد كلمة لو كلمتين تخصه تخليني الليل الطويل ما انامه بس افكر بكلامها

اما موضوعها ويا منـاف حچتلي رايحة حاچيه وياه ونهاية الموضوع بدون ما تبين اله انا حچيت الها ، ومرزلته بطريقة ما اعرف الها لان هاي الابنية كلش فاهمه عكسي انا مرات يصير عندي اندفاع واخرب على روحي جانت نسخة مصغرة من اخوها ترسم الشغله صح يلا تحچي بيها وتمشي بيها

و حسب كلامها انتهت العلاقة بدون اضرار الها واله والاخوها وصفحة منـاف منا

و انتهت بالنسبة الريـام اما بالنسبة الي انتهت او بعد الها مشوار هذا اللي ما اعرف لليـوم