اريج…خلص هذا اليوم على خير عبدالقادر راح للشغل وامه بقت وياي
من اجا الدكتور حجيتله عن الم رجلي
كال عادي وسجلي مسكن غير الي جنت اخذه
الضهر جابلنا عبد القادر غده ورجع للشغل وبليل اجا اخذ امه وصلها للبيت وجابلنا عشى تعشينا
جابلي صوبه كهربائيه وجابلي بطانيه ثكيله
عبد القادر…اذا توجعج كعديني خاف انام
اريج…لا انشاء الله ماكو وجع اليوم الدكتور غير المسكن
عبد القادر…. اني متعجب من شي واحد
اريج …شنو
عبد القادر…هاي ثالث مره اروح اسئل عنج بلمنطقه
محد ذكرج بكلمه
يصير انتي من غير منطقه
اريج.. رديت علي بعصبيه .مااعرف مااعرف مااعرف
عبد القادر…ليش صرتي عصبيه
اريج…جاي تلح هواي بهذا الموضوع مو كتلك مااعرف
اذا تعبت مني عوفني
عبد القادر….اسف اتصورت تفرحين اذا كتلج جاي ادور عن اهلج لان اكيد انتي تردين تلكيهم وترجعين الهم
اسف بعد مااحجي بهذا الموضوع
اريج….اني الي تعبت من نفسي وتعبت من وضعي كله
تايها ومااعرف مصيري شنو
عبد القادر…ليش تكولين هيج اكيد فتره وتعدي وراح ترجع الامور طبيعيه مثل قبل واحسن
اريج….ماادري بعد كل هذا الوكت شراح يصير بيه
عبد القادر…مبين انتي حزينه من زمان لان جاي تحجين
عن وضعج قبل وهسه
اذا تذكرين شي عن الماضي كولي
اريج….دفعت البطاريه وردت انزل من الحربايه
عبد القادر…وووين ووين
اريج…اريد اطلع من المستشفى اريد اخلصك مني
عبد القادر ….ارجعي بعد مااحجي بهذا الموضوع الضاهر اني بالغت بلحجي اعتذر منج
بس ولله احجي من حرصي عليج انتي لو بنتي
جان كلبت الدنيا واني ادور عليج
اريج…رجعت للجربايه وسكتت
عبد القادر….اعتذر مو قصدي
اريج…ممكن ما تحجي بعد بموضوع اهلي اني اذا اذكرت شي راح احجي قابل اضم عليك
عبد القادر…تمام موافق
اذا الدكتور سجل خروج من المستشفى ترحين ويانا للبيت
اني راح اعوف كل المعلومات عنج ووين صار الحادث
واطلعج على مسؤليتي
لازم نطلع اذا مو اليوم باجر قابل راح تبقين بلمستسفى
منا لمن ترجعلج الذاكره
اريج…الله كريم
عبد القادر…خوما زعلتي مني
اريج…لا مازعلت
جمانه السعيدي
اريج …اربع ايام والدكتور سجل خروج من المستشفى
اليوم الرابع ام عبد القادر ما ااجت
حقها مسكينه ووينها ووين المستشفى
عبد القادر عاف هويته وسجل كل مداخلات الحادث ووقع على مسؤليته
خاف احد يجي يسئل عني
رابع يوم جابلي كرسي متحرك ونزلني بلمصعد
صعدنا بسيارته ورحنا البيتهم
بيتهم كلش حلو والأثاث يخبل
دخلت لاكتني امه هله هله ومرحبا زارتنا البركه
امشي على رجل وعبد القادر ساندني بايده ويساعدني
على المشي
بلبدايه كعدنا بامطبخ
ام عبد القادر طابخه باجه وكراعين بس الريحه تخبل
شنو البهارات الي خالته ماادري
الريحه تارسه المكان
تغدينا سوا عبد القادر سبح وطلع للشغل بقينا اني وياها
ام عبد القادر….انتي ليش لا بسه اسود ميتلج عزيز
اريج…مااذكر ليش لا بسه اسود
ام عبد القادر… راح اروح اجيبلج كم تراك تبدلين
صارلج كم يوم لابسه هذا التراك
اريج…مااريد اكلفج مايحتاج انطيني دشداسه من ملابسج علما اسبح واغسل تراكي وينشف
ام عبد القادر….يااا تلبسين من دشادشي مالات عجايز
اريج…شبيها العجايز هنا الخير والبركه
ام عبد القادر…الله يرضا عليج
جمانه السعيدي
اريج لفيت ايدي ورجلي بعلاليك حتى لا يوصلهن ماي
ودخلت للحمام سبحت
الله راحه نفسيه الماي دافي قبل لا اسبح شفت شكلي بمراية الحمام
صدك كفشتي عبالك مخبله
حقه عبدو يكول عليه مخبله طلعت من الحمام لا بسه دشداشه ام عبد القادر لونها نيلي وعريضه
كعدت كبال الصوبه ادفي جسمي
ام عبد القادر علما تدفين اروح بشغله وارجع بسرعه
عافتني وحدي بلبيت وطلعت
هاي المره شكد كلبها طيب وين اكو واحد يعوفله غريب بيته ويطلع
لان هي نيته بيضه وماعدها غش ويا الناس تعامل الكل بعين طبعها
بقيت كاعده بمكاني منا لمن رجعت اذن المغرب يله رجعت
جايبتلي تراكات ثنيين وواحد احمر كلش حلو
وواحد اسود ابيض يخبلن قماش وموديل
اريج…ليش كلفتي نفسج خاله
ام عبد القادر….شنو كلفت نفسي قابل هسه اني شجبت
اريج بعدنا نسوالف دخل علينا عبد القادر
بس دخل وشافني لابسه دشداشة امه ضحك وضم ضحكته
عبد القادر…حجيه هلي شلبستي البنيه
ام عبد القادر….رحت جبلتها تراكات ثنيبن
عبد القادر….بس حلوه عليج همزين سبحتي
ومشطتي شعرج
ام عبد القادر….ياا شبيها تخبل
عبد القادر….لا يمه قبل لا تسبح جانت جنها
وسكتتتت
اريج…كول لا تستحي كول مخبله
ام عبد القادر…لا حشاج شنو مخبله اصلا مبينه بت ناس
ومؤدبه
عبد القادر….يله اكو عشى لو اطلب من برا
ام عبد القادر….هسه عشر دقايق وكلشي يجهز
طلعت أشكال واللوان من المجمده وكعدت تكلي واني حضرت الزلاطه واني كاعده
كملنا اكل
ام عبد القادر…انتي راح تنامين بغرفتي اني وياج
ثنيينه انام هنا
وعبد القادر…ينام بغرفته فوك
اريج…باي مكان انام ماعندي مشكله
ام عبد القادر….شلون باي مكان مايصير اعتبري البيت بيتج
اريج…تسلمين خاله
دخلنا الغرفتها شكد حلوه ومرتبه عبالك غرفة بنيه شابه
بيها عطر كلش طيب
ام عبد القادر…انتي نامي هنا على الجربايه واني راح افرش بلكاع وانام
اريج…لا اني انام بلكاع لا تغيرين مكانج
ام عبد القادر…اني ماأحب انام على الحربابه احب نومة الكاع
اريج…نزعت الدشاشه ولبست التراك الأبيض والأسود
يخبل شكد حلو عليه
البجامه اسود كحلي طوخ والبدي ابيض منقوش
جلد النمر ابيض واسود رفعت شعري خليت معطر
تمددت على الجربايه
جمانه السعيدي
ام عبد القادر….شكد جنت اتمنى هذا البيت هسه متروس جهال عمت عيني عبد ماعنده حظ ويا النسوان
عود اني رحت خطبتله
شمدريني الناس كلها كالت بت حلال
تالي طلعت شيطانه لعبت بينا لعب اخر شي
حبت رجال بكد ابوها طلكت وراحت ازوجته
مابقت وياا غير سنتين وطلكت
اريج…هو ماعنده اطفال
ام عبد القادر….لا عنده بنيه عمرها ١٥ سنه بس الله يستر منها غالبه امها قاطات بلوكاحه
اريج…ليش ماازوج بعد ما طلكها
ام عبد القادر…استغفر الله مليت واني احجي ويااا
مايفيد ااحجي يكول كرهة النسوان كلهن
ولو بيني وبينج اني اشك هي مسويتله عمل حتى لا يزوج
اريج…ليش تكولين هيج
ام عبد القادر…مو اني لزمت بتها ترش بيتنا سحر
ومن سئلتها تكول ماما كالت
اريج…يااا هاي صدك مؤذيه
ام عبد القادر…اووو شحجيلج منا الباجر مايكفي كلام عنها
مااعرف شنو من طينه هاي
مرات اكول لله رحم حاله وخلصه منها لو باقيه
جان ابني صار بي شي من وراها
صدكي بس طلكها صار احسن ووضعه كله تحسن
بس نفصلو هو وياها
اريج…شكد صار من انفصلو
ام عبد القادر…١٢ سنه وهو رافض فكرة الزواج
هي بعد ما انفصلت من زوجها الثاني
شكد حاولت ويلا وشكد ودت ناس علي بس هو رافض
يكول لو تبقى بس هي بلدنيا وابقى بدون زواج ماارجعها ابد
تريد ترجع علمود الفلوس مو ميته عليه
اني كلب والده اريد ازوجه وافرح بي العمر يمشي وهو جاي يكبر اريد اشوف جهاله قبل لا اموت
اريج…عمرج طويل انشاء الله
ثاني يوم كعدت لكيت عبدو طالع بس الحجيه بلبيت
كعدنا اني وياها بلمطبخ
هي تطبخ واني اساعدها واني كاعده على ميز الطعام
اساعدها على الخفيف لان مااعرف اشتغل بايدي اليسرا
جمانه السعيدي
للضهر دخل علينا عبدو جايب وياا مسواك
عبد القادر…السلام عليكم
التفت عليه اني كاعده على الميز ولا بسه التراك الجديد ورافعه شعري
حجا بضحك منو عدنا اليوم
ام عبد القادر…منو ماعدنا احد
عبد القادر…لا اكو بنيه عدنا اليوم
اريج…ترقيت من مخبله إلى بنيه اليوم
عبد القادر…لا حقيقتا طالعه بنيه
ام عبد القادر…انت ليش تحجي عليها اليوم اني شكد تونست وياها
عبد القادر…بس يطلعون اهلها وترجع الهم
يوميه اخذج البيتهم تشوفيهم
اريج….مو كلنا اذا ضايج مني اروح
عبد القادر….لا ماضايج منج شدعوه هيج بس يقرب عليج
واحد تكمزين
اريج…مو انت ادوس بلبطن
عبد القادر…اسف عيوني إذا دست بطنج
اعتذر
ام عبد القادر…تعالو نتغدا اليوم مرك سبزي وتمن
عبد القادر….يله بسرعه اريد ارجع اليوم تجينا بضاعه
واذا مااوكف فوك راس العمال يلعبون بلغراض طوبه
اريج…تغدينا اني اكل على كيف لان مااعرف اكل بايدي اليسرا
وام عبد القادر اجيب لحم وتخلي كدامي
عبد القادر…… كافي راح تسمنيها
ام عبد القادر…خليها تسمن
اريج…كافي خاله
ام عبد القادر…اني راح اسميج ورده لان انتي حلوه مثل الورده
عبد القادر…ادري توج متعرفه عليها ونازله بيها غزل
واني ابنج صار عمري فوك الاربعين ولا يوم سمعت تغازلني
والنوب اسمي عبد القادر حتى ماله دلع شكبره
اريج…لا اضوج راح نسميك عبدووو
عبد القادر…اشكرج ماأحب عبدوووو
اريج… انت مايصيرلك دلع اسمك هذا اسم فلكه
مطار قريه مو اسم بشر شكبره
عبد القادر…بس انتي يصيرلج دلع موووو
اريج…قول اعوذبرب الفلق خاله اكو حاسود دخل بينا
الله يستر من عينه
اريج…خاله ليش سميتي عبدوووو
عبد القادر…هم كالت عبدوووو
ام عبد القادر…. على اسم عبد القادر الكيلاني عجبني الاسم
لان اسمه حلوووو
اريج…مو كتلك اسمك جبير مو مال بشر
عبد القادر….هسه شلون اغيره علمودج
اانتظرونا…….
