اريج…واخيرا لكيت مكان اكعد بي واستقر
بعد ماطلعت روحي واني انتقل من بيت البيت
سهيله….تعاي نحضر العشه وسوالفيلي شصار وياج
اريج…نزعت الرداء بس الشال عفته على راسي
طلعنا للمطبخ
اريج…اكعدي خاله انتي واني اطبخ
سهيله….فدوه العينج حبيبتي طلعي كبه من المجمده
وهاي السله بيها بتيته
اريج…اكو خبز بلمجمده
سهيله…لا هسه ماجد يجيب وياا صمون الجهال يحبون الصمون بليل يسوون لفات
اريج…خليت الطاوه على النار خليت دهن وبديت اكلي
نسولف اني وياها
شويه واجا زوجها من شافني تفاجئ بيه
سهيله…هاي اريج بت سعدون
ماجد…اهلا وسهلا
اريج…هله بيك عمووو
سهيله…ادخل جوه علما نكمل العشى
اريج…نزل العلاليك من ايده ودخل جوه
كملت تكلا وثرمت زلاطه طلعت الصمون من العلاكه
خليت سفره بلكاع اجو الجهال
اجا ماجد كعدنا نتعشى كلنا سوه
ماجد…شبي وجهج
اريج…زوجت خالي ضربتني
سهيله …شايف ابنيه مرتبه وحلوه وخريجة تحليلات
وخالها يريدها تزوج ابنه عمير الدايح
لاشغل ولا عمل ولأن ما قبلت ضربوها
ماجد….لا ماتستاهل الضرب شبيهم ماكو بكلبهم رحمه
اريج…لان شفته يحجي بالرحمه ودافع عني فرحت رفعت عيني
لكيته يباوع عليه بس نضرته ماعجبتني
دنكت راسي ومااخذت ابالي شي كلت ايجوز لان وجهي
بي آثار ضرب
بعد ما رفعت عيني بعينه ابد كملنا عشى غسلت المواعين
ورجعتهن وخدرت جاي
راح ماجد دخل بغرفته وسهيله بقت وياي بلمطبخ
سهيله…هاج يمه ملاك اخذي جاي الابوج
ملاك شالت الجاي مشت شويه وكلبته
سهيله ثول كون ثول بعد شكبرج اصيرين
رادت تكوم سهيله تاخذه الجاي تعرج
اريج…اني اخذله الجاي جيبي
اخذت الكوب وصلت الغرفته دكيت الباب
اريج…عمو هذا الجاي
ماجد….تعاي ادخلي جان متمدد على الجربايه كعد
مد ادي ثنيينه شلون حضن الكوب حتى يلزم ايدي
سحبت ايدي صاح وراي شكرا
ابتسم شبيج خايفه جمانه السعيدي
طلعت كلش ضايجه هذا شبي
رجعت كعدنا بلمطبخ والجهال جابو كتبهم وبدينا نقريهم اني وامهم
كملنا الساعه صارت عشره بليل
سهيله…تنامين بغرفة الجهال لو بلاستقبال
اريج…لا انام وياا الجهال
سهيله …خاف يضوجج
اريج….لا مايضوجوني اني احب الجهال وجهالج حيل محبوبين
اريج….بيني وبينكم كنت خايفه من ماجد خاف انام وحدي
ويجيني على الاقل وانام اني والجهال بلغرفه احسن
فرشنا الفراش سهيله راحت الغرفتها واني غسلت ودخلت اني والجهال للغرفه سديت الباب وطفيت الضوه وتمددت
كلشي فات من عمري مر عليه استرجعته مثل شريط فلم وجاي اباوع علي
بعد كلشي صار تمنيت لو مزوجه وكاعده وساكته
من اجاني هذا الولد الموضف
احسن من وضعي هذا الف مره
جان هسه عندي بيت وجهال ومستقره بمكان
ماهذا حالي
كلبي خايف من ماجد مااعرف ليش حسيته مو راحه
رغم هو شكله ابد مو حلو ضعيف اسمر وجها محفر
شواربه طوال خالتي احلى منه الف مره
نمت الصبح كعدت على صوت سهيله تكعد الجهال يرحون للمدرسه الساعه سته ونص الصبح
اني هم كعدت غسلت وصليت طلعت لكيت سهيله مشغله الصوبه
زوجها كعد طلع يغسل
اريج….اكلي بيض لو اسلكه
سهيله….لا سلك احسن وعدنا جبن بلثلاجه
جيبي الصمون اني احمي على الصوبه
خليت البيض بجدر على النار وخليت القوري على الصوبه
دخل زوجها كال صباح الخير
رديت علي واني مدنكه صباح الخير
ماجد…شلونج اليوم
اريج…زينه ابد ما رفعت عيني بعينه خاف اباوع علي ويكول هاي مكيفه
ماجد…اذا تحتاجين ترحين مستشفى اني اخذج
اريج…لا شكرا تسلم
جمانه السعيدي
كعدو يتربكون واني رجعت الغرفه الجهال
سهيله تعاي اتريكي
اريج…ماااشتهي اريد ارجع انام شويه
سهيله بكيفج
الجهال اجو وراي حتى يبدلون
اني بدلتلهم ومشط شعر ملاك بعدين أخذهم ابوهم وطلع
سهيله…ارجعي نامي ماعدنا شي اليوم
راح اطلع سمج
الضهر نكلي للغده
اريج….زين رجعت نمت كعدت الساعه ١١ سمعت سهيله تحجي وياا امي
اشرتلي تحجين وياها
اريج….لا مااريد احجي وياها
صلينا اني وسهله وبديت اكلي بلسمج علما الجهال يجون
شويه رجعو هما وابوهم
ابوهم عنده بسيطه مخضر بلسوك
دخل كبل للمطبخ
بس شافني واكفه بلمطبخ وحدي
ماجد…شلونج اريج
اريج…الحمد لله
نزل العلاليك واجا قرب عليه
ماجد…اكلي بمكانج خاف اضوجين من الزفره
مد ايده لزم ايدي على اساس ياخذ مني الملقط الي اطلع بي السمج
اريج.. سحبت ايدي وكتله شكرا . كملت
اجت سهيله هو راسا دنك على العلاليك سوه نفسه يعزل بلمسواك
اريج…ما تتوقعون شكد ضجت بعد وين اروح ياربي
شلون راح تخلص وياا هذا الحيوان
هسه خالتي زينه ليش انت هيج نفسك دنيه
مزوج وعندك اطفال ليش هاي السوالف التعبانه
تغدينا هو وخالتي دخلو يرتاحون شويه واني نظفت المطبخ
ودخلت بغرفة الجهال ادرسهم
من راد يطلع العصر للشغل سمعني اسوالف اني والجهال
فتح باب الغرفه بدون مايدك الباب
اني كنت كاعده ومندكه اقري باامير ونازعه الحجاب
من فتح الباب اني نشغت لان تفاجئت بي
ماجد…اسم الله هاي شبيج اريد اسئلج هم تردين اجيبلج شي وياي
اريج…اني سحبت الشال خليته على راسي وعدلت كعدتي
….لا شكرا كلشي مااريد
امير…اني اريد جبس ثنيين
ملاك…اني اريد من هاي النستله الي احبها واريد جبس
وكاكو
امير…اني هم اريد كوكو
ماجد….وانتي ليش ماتكولين شتريدين
اريج…شكرا مااريد شي
ماجد…… بكيفج
طلع وسد الباب سهيله نايمه ماتدري بلدنيا وين ماوين
اريج…هاي شلون بلوه مراح تخلص ابد
جمانه السعيدي
كملت تدريس الجهال كعدت سهيله
سهيله.. هااا عذبوج الجهال
اريج…لا ولله ونسوني شنسوي عشه
سهيله اني وصيت ماجد يجيب عجينة فلافل صمون وعمبه وببسي
اريج…زين ادخل اسبح
سهيله…اي اسبحي اني اكلي فلافل بمكانح لان تصير بيج ريحه
اريج…خاف ماتكدرين
سهيله …اخلي الكرسي واكلي
انتي اجيتيني رحمه من الله ولله جنت بلضيم
حتى مااكدر انام اليوم شبعت نوم
والجهال هم خلصت منهم
اريج….انتي الي رحمتي حالي من الجهوله بلبيوت
باوعت عليها وكلت لو تدري برجلها يتحرش بيه
جان طردتني من هذا البيت
الله يستر من الجاي وتعدي على خير
دخلت سبحت طلعت مشطت شعري سمعت ماجد اجا
ماطلعت من الغرفه لفيت شعري بلحجاب
مااحس اله فتح باب الغرفه عليه همزين لا بسه حجابي
ماجد…ليش كاعده وحدج تعاي يمنه
اريج.. هسه اطلع عمووووو
ماجد… اول مره اسمع كلمة عمو هلكد حلوه
طالعه تخبل من حلكج
اريج…مارديت علي مااعرف شلون اتصرف ويااا
ماجد…يله كومي موحلو الاكل بدونج
سهيله تكلي فلافل ومشغله التلفزيون بلمطبخ مسكينه مجاي تسمع ماجد
لفيت حجابي وطلعت ورا
اريج…اساعدج خاله
سهيله….لا كملت بس افرشي السفره وخلي الزلاطه
والببسي والصمون عليها اني كملت
كعدنا نتعشى اني اكل على كيف ومندكه وهو يسولف ويضحك ويحجي نكت يريدني اضحك
واني عقلي بغير عالم
خايفه انطرد من هذا البيت ووين اروح
بعد ماعندي مكان اروحله
لان اذا استمر ماجد يتحرش بيه مستحيل ابقى هنا
خالتي ما تستاهل واحد حقير مثل ماجد كلبها طيب وحنينه
بعد العشى ماجد بقا بلمطبخ هو وخالتي والجهال
اني غسلت المواعين وخدرت جاي
انطيته الخالتي تصب
وشلت جيس الزباله اريد اطلعه بلباب
مااحس اله ماجد جاي وراي لزمني من ايدي
ماجد….انطيني الجيس لاتشيلين الزباله ذني الادين لازم يشيلن ورد مو زباله
اريج…عفت الجيس ورجعت ركض دخلت للمطبخ
سهيله….ماجد ماقبل انتي اذبين الزباله يكول زحمه
اريج.. غسلت اديه ورحت الغرفة الجهال
سهيله…تعاي اخذي جاي ليش رحتي للغرفه تعاي
خل نسوالف
اريج… اريد اراجع للجهال دروسهم
سهيله…تعاي اخذي جاي وروحي الف رحمه على والديج
خلصتيني من القرايه مالت الجهال
اريج…قبل لا ادخل للغرفه دخل ماجد وين اريج
سهيله….انت لازم تصرفلها راتب خلصتنا من قراية الجهال
ماجد…اليوم كتلها اجيبلج شي ويا الجهال ما تقبل
سهيله….اريج روحها عزيزه بس الوكت اغبر لعب بيها لعب
ماجد .. اله ادللها دلال ماصاير اهلهاما يفهمون اكو واحد يفرط بهيج جوهره ثمينه
سهيله….امها اتكول خليها يمكم مااريدها ترجع عليه زوجها متخبل من اريج
وعمها طردها وخالها مايريدها
مسكينه اريج الوكت كله ضدها
ماجد….احنا بعد ما نقبل تعوفنا وتروح البيت صار حلو من دخلت بي اريج
اريج…. بقه ماجد يلاحقني بلحجي والنظرات واني اتهرب منه رغم اني ابد ما منطيته وجهه
بس ما بطل يلاحقني وخاصه من سهيله كالتله
اهلها مايردوها حس اني فريسه سهله
بنيه حلوه شابه محد يريدها وماعدها مكان تروح علي
اكيد راح تستسلم بلاخير وتقبل تسوي وياي علاقه
احسن ما تنطرد بلشارع
مايدري اني اهون عليه انام بلشارع
ولا اخون خالتي
مر اسبوع وهو يحاول وياي بس على الخفيف
يعني ماضاعط عليه حيل واني جاي اتهرب منه واجاهله
كنت اكول بلكت يمل ويبطل بلكت اكسر خاطره
بس هو بلعكس جاي يتمادى عليه أكثر واكثر
يحس اني ضعيفه وماعندي ضهر يحميني
اذا غلط وياي محد راح يوكفله ويحاسبه
كان منتظر الفرصه حتى يستفرد بيه ويعتدي عليه
مفكر اذا اعتدى عليه راح اصير تحت امره
لان اخاف من الفضيحه
