اريج….كلبي كام يدك سريع واني اشوف خالي اجا بتجاهي
ارتبكت مااعرف شسوي شلت الوشاح الصوف الي على كتفي وخليته على وجهي
بس عيوني طالعات
اجا وكف بصفي بس ضهرها عليه مو وجها
متت خاف يلتفت ويشوفني وتصير مصيبتي مصيبتين
خالي مراح يعوفني مستحيل خاصه اذا شاف عبد القادر وياي وعبد القادر نفسه راح يكتشف حقيقتي
لفيت الوشاح على وجهي حيل بس عين وحده طالعه
وكمت من مكاني احاول امشي بدون ماابين اني مرتبكه
المشكله مااكدر امشي بسرعه بسبب رجلي
شافني عبد القادر كمت من مكاني
هو جان واكف بصف خالي بس واحد مايعرف الثاني
راسا صاح عليه ورده اوكفي
ماكدرت اوكف استمرت امشي راسا لحكني
ماكو بيني وبين خالي اقل المتر
عبد القادر…وووين رايحه وليش لافه وجهج
اريج…حجيت بصوت ناصي خاف خالي يسمع صوتي ويتعرف عليه
….نفسي تلعب
عبد القادر…..ووين رايحه
اريج…اطلع للحديقه بعد مااكدر ابقى كاعده هنا اكثر
عبد القادر…زين اوصلج للحديقه علما يوصل السره وتصيحون باسمج وارجعج
سندني عبد القادر حتى اكدر اطلع برا
بس وصلنا للباب الي بلمرر نريد نطلع
راسا سمعت واحد صاح اريج اريج
كوه ثبتت نفسي مالتفت بس شنو كلبي كام يعزف طبل
يمكن عبدووو سمع صوت كلبي
صح اني ما التفتت بس من سمعت اسمي نزيت بمكاني
وعبد القادر انتبه عليه
اني جمدت مااكدر ارفع رجلي لان سمعت اسمي
عبد القادر…شبيج امشي
راسا دخلت بنيه زغيره تقريبا عمرها اربع سنوات
تركض كالت هااا بابا
طلعت هاي الزغيره اسمها اريج وابوها يصيح عليها
من شفت البنيه دخلت تركض من الباب الي نريد نطلع منه اني وعبد القادر اطمنت
بس عبد القادر شك بيه
كملت طريقي طلعت برا اكو مصطبه بلحديقه
كعدت عليها كعد عبد القادر بصفي
جمانه السعيدي
عبد القادر…شبيج نفسج تلعب لو اكو شي ثاني
اريج…لا نفسي تلعب ورجلي توجعني يمكن بردت
عبد القادر….بس هيج
اريج…اي قابل شكوووو
عبد القادر…..حسيت مرتبكه
اريج…على شنو ارتبك بس نفسي لعبت من الريحه الي جوه
عبد القادر…راح اجيبلج بطل مي
اريج…راح عبد القادر يجبب مي واني عيني على الباب
بلكت خالي يطلع
شلون راح ارجع ادخل وهو جوه
اذا اول مره ماشافني اكيد هلمره راح يشوفني
شلون ياربي شلون اخلص من هاي البلوه
اني كصيت باص قبله يعني اني راح ادخل واطلع قبله
اكيد راح يشوفني شلون راح تنحل هاي المشكله
اليوم اخر يوم اشوف بي عبد القادر اكيد راح
يزعل مني ويكرهني لان جذبت علي
من غير خالي هاي خوش فرصه كدامه يسلمني للشرطه
حتى ينتقم مني
اي اريج راح تنكشف جذبتج شمتوقه مثلا
كلشي راح يمر بسلام
هو اني فكر وماعندي حظ بهاي الدنيا هي كوه
الله يستر
لازم أدبر نفسي قبل لا يرجع عبد القادر
ابد مو وكت خالي هسه
اني اريد وقت بس اتحسن حتى انهزم من بغداد كلها
شلون ياربي شلون بيه
ياربي اني ما غلطت بحق عبادك بس همه الي جاي يااذوني
شفت عبد القادر رجع شلون بيه هسه اذا صاحو باسمي يرجع يدخلني جوه
اذا قبل شويه انهزمت وخالي ما شافني
هسه بس ارجع يشوفني شلون مصيبه هاي
شلون راح اطلع منها
سويت نفسي تخربطت حيل
ماكو كدامي غير هاي الحيله
بس وصل عبد القادر وقرب عليه درت وجهي للجها الثانيه خليت اصبعي بحلكي
وكمت استفرغ كدامه وسويت نفسي تخربط
خطيه هو اجا يمشي سريع
عبد القادر.. هااا شبيج
اريج…بعد مااكدر اريد ارجع للبيت
عبد القادر…شلون ترجعين للبيت وانتي هذا حالج
تعاي اخذج للطوارئ
اريج…مااريد مااريد رجعني للبيت الله يخليك رجعني للببت
بعد مااكدر
عبد القادر…جاي تستفرغين شلون ارجعج للبيت
تعاي يشوفج الدكتور بلطوارئ
اريج…عوفني اني ارجع الوحدي مجاي اكدر اكلك
عبد القادر….انتي ماكله شي اليوم
اريج.. ماادري ماادري اريد ارجع للبيت
عبد القادر….بكيفج يله تعاي اجيبج غير يوم انشاء الله
جمانه السعيدي
اريج…سندني عبد القادر امشي ومخليه الشال على وجهي
خايفه يطلع ويشوفني كدامه
لمن صعدنا بلسياره يله جريت النفس
على اخر لحظه جان انكشفت رب العالمين لطيف وستر حالي
رجعنا للبيت
ام عبد القادر.. هااا شو رجعتو شافها الطبيب
عبد القادر…لا اتخربطت وكامت تستفرغ صممت نرجع للبيت
ام عبد القادر…ياا اسم الله خطيه ليش ليش صار وياها هيج
عبد القادر.. مااعرف
اريج.. دخلت كبل بلغرفه نزعت ملابسي ولبست تراكي
وتمددت
اجت وراي ام عبد القادر
….هاا حبيبتي شصار وياج
اريج…يمكن مستبرده لان نفسي تلعب
….سلامتج الف سلامه راح اسويلج شي دافي
حتى معدتج تهدء شويه
طلعت ام عبد القادر
دخل عبد القادر للغرفه لكاني ممده ومتغطيه ومغمض عيوني
عبد القادر…هااا شلون صرتي اذا بعد عندج الم
اخذج للعيادات
اريج…كعدت على حيلي لا صرت احسن
اسفه لان اخرتك عن شغلك اليوم
عبد القادر.. عوفي شغلي وطمنيني عليج صرتي احسن لو احجز يم دكتور الباطنيه العصر اخذج
اريج…لا صرت احسن يمكن من ريحة المستشفى
نفسي كامت تلعب
عبد القادر…ولا يهمج بعد مانوصل المستشفى
اخذج للعياده العصر على حسابي احنا جم ورده عدنا
اريج…كلت بيني وبين نفسي اليوم على لحظه جان ضعت
وضاع مني عبد القادر
همزين عدت على خير ولو اني والخير مو أصدقاء
يجوز باجر تطلعي مفاجئه ثانيه
مو كل مره تسلم الجره على رائي المثل
عبد القادر…ووين صفنتي موجاي احجي وياج
اريج….تعبتك حقيقتا تعبتك وياي
عبد القادر…ياريت كل التعب مثل هذا التعب
اني اصلا احس بلذنب كلما اشوفج تشتكين لو تتوجعين
اريج.. الله يحفظك من كل مكروه
عبد القادر… ويحفظج وتكومين بلسلامه
دخلت خالتي جايبه ينسون حار
ام عبد القادر…هاج اشربي الينسون كلش زين للالتهابات
الي تصير بلمعده
اريج…شكرا خاله تعبتج وياي
خالتي…ماكو تعب كلش خفت عليج
اريج.. طلعو ثنيبنهم وبقيت وحدي
اريد اتحسن بسرعه حتى إذا انكشفت اكدر اطلع من هذا البيت اليوم لووضعي احسن جان طلعت من بيت عبد القادر كافي تحملني هواي
بس بهذا وضعي مااكدر اروح الاي مكان
اصلا ماعندي مكان اروح علي ولا عندي شغل
اصرف منه لازم اتحسن بأسرع وقت
قبل لا تطلعلي مصيبه حديده
جمانه السعيدي
اتغدينا وعبد القادر حيل مهتم بيه يخاف
خاف صارت عندي مضاعفات بسبب الحادث
ماطلع للشغل دخل نام والعصر حضر نفسه حتى ياخذني للدكتور نفسه بس للعياده على حسابه
بدلت لبست النفنوف الي اختاره اليه
بس شافني ضحك ودنك
اريج…ليش ضحكت
عبد القادر…… ماكو شي
اريج. مااطلع اذا ماتكول ليش ضحكت قبل شويه
شكلي بي شي
عبد القادر…. الصراحه
اريج.. اي الصراحه الكامله ما ينقص منها شي
عبد القادر…الصبح جنتي طالعه كلش حلوه واني انعجبت بشكلج بس يمكن اني حسدتج
لان اتخربطتي وخوفتيني عليج
هسه انتي طالعه احلى من شفتج ضحكت
كلت يمكن هلمره تموت
اريج….هههه لا مااموت على قلبك انتي اكيد تريدني اموت حتى تخلص من مسؤليتي
بس اطمن عى قلبك ماااتزحزح
عبد القادر… هههههه ياريت تبقين هنا لان تعودنا عليج
اريج….اني الي مااعرف شلون راح اكدر اعوفكم واروح
عبد القادر… لا مراح تعوفينا ايجوز العائلتين يصيرن أصدقاء
اريج…ايجوز كلشي يصير يله نروح
عبد القادر…اي نروح يله امشينا
وصلنا للعياده والدكتور فتح ايدي
الدكتور….لا ماشاء الله ايدها هواي احسن وما محتاجه
تنعاد عليها الجبيره مره ثانيه
شو انطيني ايدج ارفعيها نزليها ضمي اصابعج
افتحيهن شيلي هذا الكتاب
الزمي ايدي واضغطي عليها حيل
بعد اكثر اكثر حيل حيل
الدكتور.. زين كلش زين عدها تحسن واضح
حتى اعصاب ايدها سليمه
بس مهم ادفين ايدج ولاتشلين بيها شي ثكيل
على الاقل لمدت شهر حتى تتحسن اكثر
اريج…دكتور رجلي صح امشي عليها بس توجعني
الدكتور….اكيد توجعج بعدها ما صارت زينه
العظم بلبرد صعب يلتئم بسرعه
لاتوكفين عليها هواي ولا تمشين مسافه طويله
راح اسجلج علاج للاتهاب حتى تتعافين بسرعه
ومجموعة فيتامينات كلش ضروريه
ارجعلي بعد شهر
عبد القادر…شكرا دكتور الله يطمنك
الدكتور….رجعتلها الذاكره لو بعد
اريج. .خفت من هذا السؤال
عبد القادر…لا بعد ماكو اي تقدم من هاي الجهه
الدكتور…راح اكتبلك اسم دكتور جمله عصبيه
أخذها اله هو الي راح يساعدها ترجعلها الذاكره
اريج…اخذنا العلاج اخذنا عشى ورجعنا للبيت
هذا اليوم عبد القادر ابد ماطلع للشغل بس الصبح قبل لا اروح للمستشفى راح نزل البضاعه ويا العمال ورجع
ضاع علي هذا النهار بسبي
رجعنا للبيت تعشينا اني فرحانه لان ايدي تحسنت
كمت خدرت الجاي ونضفت مكانه الي تعشينا بي
اليوم ماكو مواعين كله سفري
جمانه السعيدي
عبد القادر…ممكن تكعدين الدكتور كال ماكو تعب لمدت شهر
اريج.. واني قابل شسويت
عبد القادر…ولو اكعدي واسكتي مااريدج تتعبين
اريج …شويه وعبد القادر راح جاب أوراق وكعد يدقق بيهن
اريج…شنو ذني
عبد القادر اليوم اجتني بضاعه وجاي ادقق بلحسابات
خاف اكو غلط
اريج.. اساعدك
عبد.القادر…جيبي الحاسبه
انتي اقري الرقم واني ارجع احسب بلحاسبه
اريج…اي حاضر
لزمت القوائم واني اردله وهو يحسب بلحاسبه
وخالتي ممده يمنا وتسولف علينا
عبد القادر…جنت متوقع اكو غلط بلقوائم باجر اتصل عليهم
اريج…انت كل ما تجيب بضاعه ادقق القوائم
عبد القادر…اي خاف اكو اي غلط
شويه واتصل اكرم حتى يطمن عليهم
طبعا هو يعرف قصتي من يوم الحادث خالتي حجتله عني
طلب يسلم عليه
عبد القادر.. أكرم يريد يسلم عليج
اريج.. الووو هلو أكرم شلونك
أكرم…هلو بوردتنا الحلوه شلونج
عبد القادر…..شنو وردتنا ولك
أكرم…انت شكووو شنو علاقتك اني يعجبني اكول وردتنا
اريج…هلو بكرمنا على وزن وردتنا
أكرم…هههه هههه خرب لعبتها صح
عبد القادر… عراقيه ماتكدر عليها
أكرم….وينها العراقيه اتحسر على ريحتها هنا
عبد القادر….هااا الاوكرانيه ماعاحبتك
أكرم…مو مثل العراقيه كلشي بيها حلوه
باعي ورده تسمعيني
اريج….اي اسمعك أكرم
أكرم….شنو رائيج نزوج اني وياج
اريج…..ههههه انت غير مزوج
عبد القادر…..اي يامن تعب يامن شكه ويامن على الحاضر لكه
صار اسبوعين اعالج واطبب واداري
وانت تريد تاخذها على الجاهز
اسكت لا اتصل على زوجتك واحجيلها
أكرم….صدك احجي مو اتشاقا صح اني ماشايفها
بس امي كلما اتصل تبقى تحمد بيها وتوصفها
الحد ما حبيتها بدون مااشوفها
اريج.. اخذ التليفون مني عبد القادر بعصبيه
عبد القادر…ولك انت ما تعرف تحجي الغربه علمتك
على الانفتاح وكمت تحجي بدون قيود
أكرم….عوف ورده تحجي انته مالك دخل شنو دخلك بيني وبينها
صاح أكرم بصوت عالي ووورده انتي موافقه
اريج…ههههه
أكرم…سمعتج تضحكين يعني موافقه موووو
بشرفي بس تجين هنا بعد ما ترجعين للعراق ابد
عبدالقادر……مو صوجك صوج الي يتصل بيك
يله روح الله وياك
اريج…الموضوع جان شقه بس عبد القادر ضاج
واني طرت من الفرح
مادام اهتم وضاج يعني اكو شوية مشاعر من جهتي
اريج….ليش ضجت
عبد القادر…خلي يولي مايعرف يحجي لا تصدكين كلامه
اريج…ضحكت بصوت عالي
عبد القادر…شو فرحانه بكلامه
اريج….حلو أكرم وسوالفه حلوه
عبد القادر….كومي منا كومي انتي واكرم متفقين عليه اليله
اريج….ماكدرت انام شكد فرحانه بغيرة عبظ القادر
لو يمي كرم جان بسته حرك مشاعر عبد القادر وخلاني
سعيده
احبه مو بيدي الإنسان الصح بلوقت الغلط
ثاني يوم الصبح كعدت لكيت عبد القادر طالع للشغل
كعدنا اني وخاله بلمطبخ حضرنا الغده
واني كنست البيت بلمكناسه الكهربائيه
للضهر اندكت الباب قبل موعد رجعت عبد القادر
بنص ساعه تقرببا
فتحت الباب ابنيه سمره لابسه ملابس مدرسه وجنطتها على جتفها تقريبا عمرها ١٥ سنه
تباوع عليه نضره كلها حقد وكره
اريج….تفضلي
دفعتني ودخلت زاد فضلج هذا بيت ابوي
شمرت جنطتها بلطرمه ودخلت كبل للبيت
شافتها خالتي ضاجت
خالتي….هله بيبي شلونج
روان….هله بيبي
اريج….اني دخلت وراها اباوع عليها بستغراب
روان….هاي منو بيبي الي فتحتلي الباب
الخدامه الجديده
