رواية حسناء قلبي الفصل التاسع عشر 19 بقلم جوهرة
ــــــــــــــــــــ
احمد /
تقربت عليها ورفعت موبايلي بوجهها وبعصبيه خلتها تجفل / منووو هذاااااا ؟؟!!
نادية حست گلبها طاح جوة رجليها رمشت عينها خايفه من عصبيته صمت شفايفها تحاول تتماسك متريده يحس بضعفها وتفكر هاي شلون اخذوا الصور يعني يجسس عليها بس هو جان وياي ،، اكيد واحد من جماعته.
قرب راسه وزمخ ببها / لكلاكه احترمي نفسج وتحجي عدل وياي كاعد اسألج منو هذا الحاضنج احجييي ،، عاط بيها بحرگه خلتها ترجف
احمد بغضب / ولج احجي ترى ماضل براسي عكل
متحملت بجت مقهورة شلون موقف انحطت بي سامي مأمنها متحجي وصاها وعنده ثقه مراح تحجي وأحمد كاعد يشك بيها والدليل بيده شراح تنكر وموقفها ضعيف بس هذا شرفها وكولشي الا الشرف .
نادية وهي تناشغ / هذا اخويه والله
شمر موبايله عالجربايه بسرعه ورفع وجهها بيديه / والنزل القرآن ياناديه اذا طلع كلامج جذب ليصير ذبحج على ايدي ولج صاحبي خابرني متخبل يكول هاي مرتك !!!!!!!
تقرب عليها رجعت خطوة للورا فعلا خافت منه شكله من يصير عصبي يخوف يعني جاي يأذيها ومحاس بروحه
احمد بموقف صعب لأي رجل عجبا مو هو اليمر بهيج ويسكت ،، عقله طار ماضل براسه دين وهو يشوف رجال حاضنها والمشكله مايظهر شكله هذا الخلاه يتخبل تكول اخويه عجل ليش ماجابت سيرتو كبل هساع
احمد نتر بيها / ليش ماكلتي شفت اخويه ليش ظميتي السالفه علية احجي خل افهم. لأن اكو شي غامض اريد اعرفوو.
خزرته بعيون غركانه دمع / مو شرط تعرف .د
تقدم وجرها من زندها / لاتخبليني احجي ريحيني يولي
عصر زندها تألمت وبطلت تقاومه / ليش تعصر بأيدي كفخني جم راشدي احسن يجوز ساعتها گلبك يبرد !!!!
بغضب نتر بيها / انجبي ولا كلمه ترى واصله هينة ،، واشر على خشمه
دفعها وراح شال موبايله اتصل يحجي وعينه عليها ،، وبصوت أعلى كال /؛اريد صورو ساعتين لا اكثر اسمو سامي علي العايد
سد موبايله وراح عليها جانت كاعده عالقنفه مدنكه ومخليه راسها بين ايديها وتفكر بالراح يصير.
صفنت على حذائه من وكف قريب عليها مرفعت راسها سمعته يحجي بعصبية / ساعتين واعرف هين هين
ماردت عليه استغفرت ربها وكامت ،، فاتتها الصلاه اخذت ثوب ومنشفه وفاتت للحمام تسبح وتتوضا .
كعد بمكانها وسند راسه على ظهر القنفه وعينه بالسكف گلبه موجر نار شابه بي يريد يتأكد هو بشخصيته وطبعه آنفه وكبرياء ومهما كان عندو ثقه بحبيبته اي عندي ثقه بيها بس حاير بالشافته عيني اول مرة اول مرة احس روحي عاجز وتعبان وجاي انتظر اليريحني ليش ميحجون عنو حتى حجي علي ماسامعه يحجي بي اليعرفه بينهم خلاف وسافر لأمريكا يشتغل واسس شغله بالتجارة هناك بعد ميعرف عنه شي
طلعت ناديه من الحمام راحت سرحت شعرها وتعطرت بكل هدوء رافعه راسها وكعدت تحط مرطب ابرود خلا اعصابه تفور وهو يراقبها نفس الشموخ والتكبر الجانت تقابله بي قبل سنوات هز راسه وغمض عيونه دعى الله ينطي قدره يلزم اعصابه وياها ميريد يأذيها يدري بروحه من يعصب ميلزم ايده خاف يفلش وجهها بكفخه من ايده يروح يسكطها .
جر حسرة وذبها طكطك ركبته دحك بساعته الوكت يمشي بطيء شافها مدت سجادتها تصلي تنهد وحس بروحه مجاي يركز كام يتوضى حتى يصلي .
ناديه كملت صلاتها ودعت الله يبرد گلوبهم ويهدي احمد صفطت السجاده جان يسحبها للسجادة من ايدها اخذها يصلي
سكتت ماحجت راحت مددت عالجربايه فتحت موبايلها وكعدت تراسل تغريد وسمر .
كمل وطلع للبلكونه كعد عالكرسي صارت الساعة ٩ التفت شافها غافيه تذكر حتى منزلو للمطعم يتعشون تنهد هو منو عندو نفس ياكل رن موبايله وفتحه عالسريع ،بقى يسمع غمض عينه وفرك كصته بقوة
نتر / شنو يعني ماكو هألاسم تاكدت حجوزات المطار الفنادق اييييي خلاص مشكور تعبتك .
سده وخلاه بجيب البنطرون جان لابس كابوي ازررك
دخل للغرفه وركع باب البلكونه بقوة طلعت صوت قوي فزت ناديه مرعوبه خلت ايدها على صدرها جانت ممركزة بعدها النومه بعينها
بعصبيه وغضب رفعها من الفراش وكعت يم رجليه وايدها عورتها عاطت مرعوبه دنك ثنى رجله وحجى بقهر ودمارات ركبته نطت / ولج مو انا الاتقشمر مووو ناااااا
جر شعرها وعته بيده شافها شلون تألمت بس جان فاصل ما ظل عنده شعور ضربها بيده على حلكها رأسا شفتها طكت دم
الغضب مسيطر على كل خلية بجسمه / جلبه عبالج مراح اعرف ،، انا أحمد الفهد الكل تحسبلي مليووون حساب تجين انتي تخدعيني !!!؛؛؛
كوووومي تا شوووف
سحبها بقوة من زندها وكوة وكفها دنكت راسها وايدها على شفتها انترست دم رفعت راسها ودموعها وشهكتها تشك گلبها شك وهو يباوعلها بغضب وقهر وعيونه دم ومدمعه
راح يتخبل مجاي يصدك يريد تريحه لايروح يموتها
دفعته بقوتها الجانت بايده ومتهالكة وراحت للحمام تغسل حلكها من الدم شوي وطلعت والمنشفه ضاغطتها على شفتها ،، تصرفه هذا خلاها تحقد عليه شلون يتهمها وهو يدري بيها ويعرفها ،، شلون هيج يعاملها بقسوة هذا لو مسدسه بيده يفرغه براسي نغزها گلبها والتفتت للكنتور جان بي سلاحه لأن وين ميروح ياخذه ويا ،، بسيطه احمد علية وعلى اعدائي والله والله ماراح اعبرها الك السالفه
راحت اخذت موبايلها من الشحن وهو عينه عليها لان گلبه وجعه من شاف شفايفها تجري دم بس غضبه وقهره شلو حاله شل
اتصلت بسامي وصوتها كوة يطلع وفتحت سبيكر وسألته / سامي اني منو بالنسبه الك
سامي تفاجىء بأتصالها قبل ساعات جان وياها / اختي الصغيرة وحبيبه اخوها شبيج نداوي صوتج متغير
بجت متحملت من زمان مسامعه نبرة الحنية بصوته
صاح بيها ماتحمل بجيها وصوتها المخنوك / نداااااوي شبيج ؟!!!
شهكت وهي تسأله / وين شفتك اليوم .
سامي باستغراب / يمعودة مو التقينا بالمول بقسم الالعاب هاي شبيج ، ناديه هذا الكلب والناقص اذاج احجي لاتسكتين
احمد عاكد حاجبه ويسمعهم ومن سمعه غلط تقرب يريد ياخذ الموبايل سدته راسا وخلته ورا ظهرها ورفعت راسها وعيونها مليانه دموع / لاتقترب مني ،، تعتقد سمعت حجينا وعرفته اخويه
كز على سنونه / اربيل كلها مابيها اسم سامي العايد الا اذا …..سكت وفكر بيها ويه نفسه عض شفته الجوة بقهر من خمن الجاي يصير راح للكنتور طلع مسدسه وخلاه بحزامه عافها يريد يطلع ركضت وراه
عتت ايده / وين وين ماخذ سلاحك ؟!!!
التفت عليها رافع تك حاجب وكعت عينه على شفتها الفوك وارمه وبيها بقايه دم بلع ريك غصب عنه أذاها يعترف ميكدر يتحكم بروحه من يعصب وزين ختمها وياها بجف على حلكها هذا اهون شي سواه / استغفر الله العظيم
رجع تنهد / انكلعي من وجهي هساع لاتختبرين صبري .
نادية / راح تتندم عالسويته بيه
جر ايده من ايدها وطلع ،، متحملت الحاي يصير بيها وتذكرت من كال ماكو اسمه بكل اربيل شنو قصده لعد بأسم منو دخل للعراق.
اتصلت بسامي رأسا رد عليها / توني كاعد اتصل بيج نداوي اريد اشوفج هسه.
حجى بسرعه / انزلي ناديه راح اقابلج خلال ربع ساعه اخذي تكسي .
نادية / وين خل افتهم
فهمها وين يقابلها وحذرها تحجي ، سدته وراحت عالسريع لبست بنطرون وقميص طويل ولفت شالها عالسريع اخذت جنطتها والموبايل ونزلت بسرعه تخاف احمد يرجع احمد اللي عتبها وزعلها عليه جبير
صعدت تكسي ودلته بالمكان جانت عينها ادور بالشارع تخاف مراقبينها كولشي تتوقع من أحمد بعد
وكف التكسي انطته الاجرة وراح مشت بخطوات خايفه ،، الساعه قريب ال ١١ وهاي المنطقه قليل ناس بيها جانت مساطب على طول الرصيف اليطل عالوادي راحت كعدت وتتلفت محست الا على ايد انحطت على جتفها ،، فزت واكفه بعدها تنهدت وهي تشوف سامي .
نادية / خوفتني والله
عكد حاجبه ومد ايده لوجهها ورد بغضب /طيح الله حظه هذا ضاربج ؟!!!
انطلق دون إعلانات
وخرت راسها ورجعت خطوة للورا متريد تتقرب تخاف احد يصورها ويدزها لأحمد بعد متأمن ابد
نادية / سامي شنو السالفه جاي احس اكو غموض بحياتك سامي شلون دخلت للعراق بأي اسم عليك الله ريحني.
سامي / اجيت عن طريق تركيا وبغير هويه ارتاحيتي هسه ،،، اسمعيني عدل ماريد هذا الكلب يعرف ،، بكولشي داحس خشمه .
نادية بلا وعي سالت / منوو ؟!!!
سامي بغيض / رجلج خاتون رجلج ،،،
ناديه اخلي يمج امانه حافظي عليها الى ان اخذها منج توعديني .
نادية / غير اعرف شنو الامانه ،، سامي لاتورطني قبل شويه راد يذبحني
عباله عندي علاقه مصورينه من جنت بقسم الالعاب
ودزوهن لأحمد لو تشوفه شلون انكلب ميصدك الا كلتله هذا سامي اخويه ورجع اتصل بجماعته يريد يعرف مكانك وكالوله ماكو هيج اسم.
عكد حاجبه وشغل دماغه طلع من جيبه فلاش صغير / هذا امانه عندج امانه ناديه حافظي عليه ولاتخلين احمد يعرف بي طلع كلينس من جيبه ولفه انطاهيا
أخذته وخلته بجيب صغير داخلي بجنطتها ممبين رفعت راسها / سامي صدك شنو اسمك الدخلت بي .
ابتسم بهدوء / عوفج من اسمي ديري بالج على روحج ، اشوفج قبل مترجعين لبغداد هسه امشي ارجعج للفندق خاف الشفيه يستفكدج صاير حامي الحما.
جاي يمشون محست الا رجال طفر عليهم وتعارك ويه سامي جانت لهجته مو انكليزية متدري شلون يحجي
عاطت و سامي دفعها صارت ورا ظهره وهو يحذرها / روحي ناديه معليج بيه هذا واحد سافل يريد يتربى حجى ويا وردله ذاك بخشونه وعصبيه
متدري الموقف شلون صار الاثنين تلازمو وبدوا يتعاركون رغم سامي طويل وضخم بس كدر ذاك يوكعه ، يترافسون واحد ضرب الثاني وهي خايفه وتبجي كام سامي وبدا يضرب بي دفعه الرجال وصار قريب من حافه الوادي تلفتت تريد احد يدخل ويساعد اخوها الدنيا ليل والمنطقه المتواجدين بيها سنطه
عاطت بحرگه على سامي من شافت الرجال دفعه للوادي وبنفس اللحظه وكع الرجال بمكانه ركضت تصرخ بحرگه وخوف وعينها ادور جوا بالوادي الاظلم البلع سامي
كعدت بالكاع تبجي بصريخ يكطع الگلب جان تجفل من حست احد حظنها من ورا وسندها بقوة ،، شمت عطره ومن سمعت صوته شهكت شهكه قويه
احمد خايف عليها / اسم الله اششششش هذا انت اطمني
عاطت وراسها مدفون بصدره / قتله قتل اخويه
بقت تبجي وتشهك وتردد شفته بعيني ماااات مااات ماكدرت انقذه ، ساااامي مااات لاااا لاااا يجوز مامااات عفيه احمد شوفه يجوز بعده عايش الله يخليك
حاظنها ويمسد على ظهرها اشر لجماعته يتصرفون واخذها بالسيارة راجع للفندق.
العشرين من هنا
