رواية حسناء قلبي الفصل الخامس عشر 15 بقلم جوهرة
ـــــــــــــــــــــــ
بأحدى المستشفيات /
رفع اصبعه بوجه الدكتور وهدده بعصبيه / والله العظيم اذا ماكدرت تنقذه لااخليك تشاهد على روحك
الدكتور عذره لان صاحبه حالته حيل خطره الاصابه قريبه عالقلب / اهدأ شوية راح اسوي الاكدر عليه والباقي على الله
نقلوا الجريح بسرعه لصاله العمليات وبقى فارس يفتر بالممر مثل النمر المحبوس بقفص مسح وجهه وبقى ايديه ،، مجاي يصدك الصار صح كدروا يصيدونهم للمجرمين بس مامتوقع رائد سلام ينصاب
جانوا محتاطين للمهمه وكدروا ينفذون بخيير وسلامة وبأخر لحظه انصاب
روحه شايطه للسموات خاف يموت وبركبته طفلين ومرة ،، مراح يسامح نفسه لان سلام حما من الرصاصه صار كدامه بلحظه حرجه ..
بدلته العسكريه ملطخه بدم سلام وجهه مغيم مهموم
فاتت ممرضه سالها / اختي بلا امر عليج شوفيلي الجريح بصاله العمليات
ترددت بالبدايه لان هذا مو شغلها دكتورة دزتها اجيب الابرة الناسيتها للمريض عالسريع بس انقهرت من شافته وضعه مو تمام / اخي تفضل اكعد وان شاء الله مايي غير العافيه احاول ادخل واطمنك ولو ممنوع بس خل اروح للصيدليه
سده بوجهه ،، جر حسره وذبها مابي حيل مقدم احمد ، سده بوجهي اكيد راح يجي
التفت شاف جماعته اثنين منهم بنهايه الممر كاعدين ينتظرون راح عليهم / ارجعوا للمقر الشغله مطوله اني باقي هنا
ودعوا وراحوا بعدما اتفقوا يطمنهم.
رجع وكف يم باب صاله العمليات ارتجى بظهره عالحايط وساند تك رجل عليه
فاتت الممرضه للصاله وعينه عليها بقى ينتظرها تطلع اطمنه ، يعرف ممنوع تدخل بس اكيد راح تعرف اجيب اي خبر عن سلام
فترة وطلعت / ادعيله اخي الله ينجي
فك عينه الحمرا من العصبيه والقهر ونتر /شلون يعني فهميني ؟!!!!!
ارتبكت وهي تشوفه اعصاب بس يصيح / الدكتور والطاقم الطبي يحاولون ينقذوه والباقي على الله.فقد دم والطلقه حيل قريبه عالقلب و…
خزرتهم بعين ضيكه / روحي لشغلج اعتقد هذا الطابق مو مكان شغلج
فارس روحه طالعه وهاي واكفه رزلت البنت بسببه نتر بعصبيه / احترمي نفسج لج ،، شنو شايفه روحج البنت اعتذرت عليش هالاكلان الخرااا هذااا
فكت عينها مصدومه فعلا بطريقه كلامه والفاظه رفعت اصبعها بوجهه وكزت على سنونها متريد يطلع صوتها عيب وهي دكتورة وتستحي لان مصارلها اسبوعين من داومت بهذه المستشفى /؛احترم نفسك وحسن الفاظك
تقدم عليها عاكد حاجبه ونتر / نزلي اصبعج لا اكسره وليييي من جدامي يلاااا
رفعت راسها بتكبر / شلون بشر ولا يستحي عابت اي والله
سمعها جان يرد عليها بأستهزاء / بقينا المستحى لشكولج
ردت ضايجه بعدما التقت بي بالممر / تمام شعجب هنا خير ان شاء الله.
احمد / صديقي متصاوب حالته خطرة جيت اطمن عليه.
/ خطيه الله يشفيه سمعت كالو جريح ترى بعده بالعمليات
احمد / اي جاي اشوفو لفارس واكف بالباب. ينتظر
التفتت عليه من اشرله وبعصبيه حجت / بس لاصاحبك ؟؟!!!! شكد مكروه لسانه ينكط سم.
رفع احمد تك حاجب مستغرب اليدري بي فارس مؤدب متطلع منه العيبه.
سألها باهتمام / حجى وياج
/ اصلا رزلني والله لوما عيب لاعرفه هند منو
احمد / لاه لاه يهند مايصح تلاطعين الزلم عوفي انا اخذلج حقج منو بس تراه معدل وما يغلط.
هند بغيض من فارس / عيني شنو معدل لو شويه يضربني عابتله شكد كرهته
ابتسم تك خد بدون خلك / هساع تعاي وياي اريد اتطمن على سلام ان شاء الله يكون بخير.
هند من صارت كباله رفعت راسها وخزرته مشت داخله لردهة الصاله لان ميصير يدخلون للعمليات الا بعد التعقيم وممنوع الاقتراب من صالة العمليات فقط بالردهة القريبة ،، فارس من شافها فر ايده بأستهزاء
وحجى من بين سنونه / تهي بهي اني ناقصني بعد !!!!!!!
احمد بتحذير / فارس عوفك منها واحجيلي الصار .
راحو كعدو على كراسي الانتظار بالممر وحجاله كولشي
خزره احمد / شنو هالحجي انت شعليك هذا قدره ادعيله والله كريم.
فارس / والله شكو دعاء على بالي دعيته اااخ اااخ.
طلعت هند وحجت ويه احمد / الحمدلله اطمن شوي ويطلعو للعنايه المركزة حمدلله على سلامته.
كام احمد من الكرسي عالسريع / الله يسلمج ..الف الحمدلله يارب ..التفت على فارس الجان خازر هند
احمد / يلا فارس انت روح اسبح وغير ملابسك وارتاح
دحك عليه / لا ما روح خل يطلعونه اشوفه .
احمد تذكر. ورجع سال /؛بلغتوا اهلوو
فارس / والله نسينا بعدين من شوكت الاهل يدرون بينا .
هند عافتهم بعد ما استأذنت من احمد وراحت
فارس عينه عليها نتر بي احمد / عينك يووول عينك
التفت لأحمد وميل راسه / لازم بحمايتك اي ليش لا خوش صاكه
احمد / طيح الله حظك يول هاي نسابتنه من طرف المرة
اعتذر فارس راسا وهو محرج / اعتذر والله عبالي تعرفها معرفه عاديه.
احمد / ديلا ما راح احاسبك ادري بيك تعبان وقلقان.
ـــــــــــــــــــــ
هند بعدما حجت الموقف الصار / اي والله هذا الصار.
نادية / لعد هذا صديقه لأحمد لو واحد من معارفه ، هسه اسأله بس ليش رديتي عليه عوفي يمعودة ذول مينحزرون شيطلع منهم لا يروح ياذيج
هند بنرفزة / خل يولي عابتله ابو الوسخ جهرته شلون جانت مغبر وسواد تارس وجهه وملابسه مطكعه دم عيييع لعبها لنفسي
نادية / هههههه ولج قابل يلبس قاط ويتعطر هذا واجبهم اكيد جانو بمهمه ، والله عليج سوالف عمه سهام تكول عليج مخبل نظافه ههههه
فكت حلكها وردت عالسريع / اي خل تفضحني وين متروح تكولها ولاتكعد راحه بيبي.
نادية / ههههه صدوك حجيها ؟؟؟؟
هند بتوضيح / لاااا يمعودة تبالغ لان تشوفني اسبح مرتين تلاثه وجنطتي بيها علبه تعقيم امسح ايدي من تتوسخ
نادية / هههههه والنبي ضحكتيني هذا كله وتردينها متحجي ترى تبالغين بتصرفاتج
هند / تعودت والله شسوي ههههه.
صاحتها عمتها وراحت عليها / بلي عمه كولي
كرصت عينها / شو رجلج مانشوفه لاتصيرين فاهيه اعزمي فد يوم على غدا عشا عيب عمه شيكول علينا
نادية / يووو عمه والله ملتهي بشغله هالفترة هسه من اخابره اعزمه.
حجية سهام / اي بنيتي عفيه بيج .اكول جهازج كمل لا
نادية / الحمدلله بس بقت البدله للحنه والعرس كلت باجر نطلع للسوك ونشوف اشتري وحده.
حجية سهام / وعليمن هالمصاريف اجري بدله احسن الج عمه .
نادية / انتي هيج تشوفين.
حجية سهام / اي هي ساعات وراح ذبيها والله تبذير ، شو كلها العرايس ياجرن
صفنت ناديه بحجايتها / لعد ااجرها جديده
حجية سهام / على راحتج بنيتي ماضل شي كلها فترة زمن وتتزوجين الله يهنيج ويسعدج ان شاء الله
حظنت عمتها وباستها /؛تسلمين عمه حبيبتي ..بس والله شايله هم سرمد هذا وليدي ما اكدر اعوفه وهو نفس الشي .
حجية سهام / هسه من كالج عوفي ،، يفوتن جم يوم ورى العرس واخذي يمج
تنهدت / الله كريم.
ــــــــــــــــ
نادية /
بالليل ورا مانيمت سرمد خابرت احمد / هلاو شلونك.
احمد / هلاا وغلاا شلونج غلاي يابه اعذريني ماجاي اتصل حيل مشغول حتى للبيت ما واصل .
نادية باهتمام وصله / شلون صار صديقك حجتلي هنده.
الحمدلله تعدى الخطر .
نادية / حمدالله على سلامته
احمد بتعب / يسلمج الله
نادية / باجر معزوم عالغدا فرغ روحك ولا اطلعلي عذر والنبي ازعل
احمد / ول ول يابه صار بيها زعل ان شاء الله احاول لاتزعلين علينا مابينا حيل
تنهد بصوت / ياويل حالي وين انطي وجهي هساع خل نكعد سوا وكوليها .
نادية بضحكة خفيفة / اموووت عليك يلا تريد بعد.
احمد / والله العظيم طخت هساع اجيكم البيت بس هين هين يصير خير .
لمت شفتها والضحكه تارسه وجهها / احمممد لاتتحلف مابيه حيلك .
احمد / عجل ترديني اسكتلج يلا ما اتحجى باجر حضري روحج ورا الغدا اخذج لبيتنا .
شهكت معترضه لااا عيني للباب الكراج ما اطلع وياك ،، ادري من تستفرد بيه شراح تسوي
ضحك لكلامها يدري بيها فاهمه وواعيه وحجيها هذا ولسانها بس بالموبايل ومن تصير بين ايديه تستحي
واوضاعها تتخربط وهو حب يناغشها يحب يسولف وياها.
تذكرت سالفه هند وسالته عليها رد علية /يابه الولد جان بحال مايعلم بي الا الله خل تعذره فارس معدل ماتطلع منه سالفه عوجه.
ناديه / يووو لو تسمعها من تحجي عليه والنبي تخرب ضحك هي شويه حساسه وطبعها نحس
احمد / اي مبين عليها ماتحب تختلط هههه كون تصير من نصيبو والله لا اتطلع عيونو .
نادية / ياااا ههههه لو تسمع تنتحر
احمد / شدعوه يابه وين تلكى احسن منو لاتخليني احطها بعقلو ههه
نادية / يمعود عوفهم لاتتدخل عليك الله هند حساسه مابيه حيلها خاف تاخذها بغير شكل السالفه .
بقوا يسولفون الى ان نعست عاد مست عليه وسدته راحت توضت لبست حجاب الصلاه وصلت ركعتين قبل متنام بعدها مددت بفراشها وعالسريع نامت
ــــــــــــــــ
بعد أيام بالمستشفى /
عميد ابراهيم / الحمدلله هسه انت احسن من اول ايام وسالت الطبيب اكدلي تحسن صحتك تدريجيا
رائد سلام / الف الحمدلله ، اشكرك اهتمامك سيدي
رد احمد / يول سلام مكانك مو هينة محتاجينك بيناتنا
ابتسم سلام وهو يطبطب على جرح صدره بهدوء / ما يمنعني هالجرح عن واجبي بس يسجلي الطبيب اطلع منا للمكتب
ابتسم فارس اللي واكف فوك راس سلام / اني ما صدكت تطلع من حلك الموت وتريد تطلع منا لا ما اقبل سيدي وهسة اروح احجي وية طبيبك يخليك هنا شهرين
ضحك احمد / اسمع كلام فارس وارتاح هالفترة
عميد ابراهيم / شوكت ما تشوف نفسك مصحصح ارجع ، اهم شي صحتك ، يلا اني اروح ، محتاج شي
سلام / ماقصرت سيدي طول هالفترة وسيادتك مغركني بافضالك ولا يهونون جماعتي
فارس رد بسرعة قبل ما أبوه يتكلم / عزيزنا وغالي علينا
ابتسم العميد وأشر لابنه / يلا تعال لاتبقى مكابل رائد سلام ترى وراك دوام
استعدل فارس بوقفته / امرك سيدي
طلع العميد بعدما سلم عليهم وفارس طلع وراه
احمد تنهد / لا اشغلتني ولا شي اهم شي انت سالم ومعافى ، هبطتنا عليك چثير ، و إن شاء الله تطلع من هينة تا تحضر عرسي
سلام بمودة خالصة / أن شاء الله والله يتمملك على خير
ــــــــــــــ
احمد /
موجود أبيت حجي علي عالغدا بعدما اتصل عليه الحجي يعزمه ، هالفترة تكررت روحاته لبيتهم ،،،، الكل كعدو بالهول مدت ناديه سفره وجانو محضرين اشكال وناديه ساعدت ام سليم هند مقبلت تكعد وياهم عالغدا تحججت تعبانه تريد تنام عافتها تدري بيها منحرجه من احمد.
ورا الغدا كعدوا يشربون جاي ..احمد خبرهم يقدم موعد العرس فاجأها البارحه بالليل مكال شي غمزلها بعينه وسوت روحها جاي تعدل بملابس سرمد الكاعد بصفها يعني اسبوع الجاي ناديه فكت عينها لان
الحجي ماعنده مانع كاله سوي التريد بعد هي مرتك وانتم بكيفكم .
احمد / هاي هي عجل باجر الغرفه ينصبونها والبيت شفتي وعاجبج
حجية سهام / يمه بالخير عليكم وغراض نداوي بعد ماتنصبون الغرفه نجيبهن ان شاء الله ،،، يلا اني اترخص منك وليدي اخذ راحتك هذا بيتك
والتفتت عالحجي واشرتله عاد كام / اروح اصلي الظهر فاتتني
طلعوا واحمد ابتسم وغمزلها / والله عمتج مرة معدله كالت خطيه هذا خل اعوفه ويه مريتو يشبع منها.
بقوا يسولفون بشغلات العرس والنواقص وشيحتاجون .
اتفق وياها الحنه بقاعه بس العرس راح يصير بالطارميه وعلى هذا صار الخلاف جانت تريد قاعه وتدخل بطله ملكيه ومن هالسوالف واحمد دك عناد وياها لان هناك اهله وعمامه محضرين نفسهم لعرس جبير قنعها بالحنه يسويلها اضخم شي واحلى ما يكون ،، جانت مغثوثه منه لان اليريده يصير وهي ممتعودة على هالشي .
،،،
الاسبوع كضته هي وتغريد ومرات هند اذا عدها اجازة تطلع وباهن سمر صديقتها تخابر بيها وطمنتها تجي قبل الحنه بيوم .
راحت لمركز تجميل ودللت روحها عالاخر وياها تغريد خطوة بخطوة وهند تضحك عليهن من تطلع وياهن
وكوة يجرنها عاد رتبت بشعرها ونظفت وجها وشويه عدلت حواجبها طلعت تضوي وهي ببضه حيل طلعت حلوة.
راحن قبل يومين ودت غراضها كلهن رتبنهن بالكنتور
ناديه اول مادخلت الغرفه فكت عينها كلبها يدك سريع يربي شكد حلوة عمتها صاحت اللهم صل على محمد وال محمد ماشاء الله شايفين الخير.وطكتها بهلهوله وياها الحجيه ام وضاح جانت جايه قبل يوم هي وام محمد عزلت البيت ورتبت الغرفه ونظفتها
وفرشتها وراها راحت ويه وضاح وبقت الحجيه.
احمد دخل وراهن / تسلمين حجيه بارك الله بيج.
حجية سهام / عاد ما وصيك وليدي دير بالك على بنيتنا
اشرلها على عينه. / احطها بعيوني.
ناديه التهت ترتب هي وهند والحجيات واحمد راحو كعدو بالهول يسولفون عالعرس.
هند رتبت الغراض / حلوة الغرفه الف مبروك حبيبتي ، ماشاء الله شلون ترتيب ونظافه.
نادية / هاي ترتيب مريم كولش مرتبه ونظيفه.
هند / ها زوجة حماج الجبير اي اذكرتها
صفطن الملابس والغراض الباقيه ملابس احمد وبدلاته العسكريه على ترتيبهن ما راحت يمهن يلا لحكن على غراضها .
الاسبوع ركض وجان يوم الحنه والكل مخبوص عازمين هواي ناس……
ـــــــــــــــــــ
باجر الحنه والعرس شايفين الخير حبايب كلبي
ومبارك عرسك يالهيبه ومبارك عرسك يالهيبه
