رواية حسناء قلبي الفصل العاشر 10 بقلم جوهرة
ــــــــــــــــــــ
نادية /
كاعده وايدها على خدها تراقب سرمد الجاي يلعب بالحديقه عالزحليكه اشترتها قبل يومين هالولد هذا خلاها تنسى همومها التهت بي وصار كل حياتها عمره ٣ سنوات صار وقبل اسبوع جان عيد ميلاده تمنت ابوه موجود يحسسه بأبوته يحسسه بحنانه بس
يبقى قاسي ميهمه شي من جان عمره شهر بعد مشافه بين فترة وفترة يلا يتصل يسأل عليه ،،، سرمد مثل البلسم بحياتها من يصيحها ماما يخليها تتمنى تضمه بنص گلبها حتى لا يجيسه شي
حجي علي صح متونس عليه بس مرات يحجي عليها يريدها تشوف حياتها خوما تبقى رابطه نفسها بسرمد ،، جان يلح عليها تتزوج شكد يتقدمولها ترفضهم متريد
تتزوج تريد تربي سرمد لأن الاثنين متعلقين بعضهم واليريده گلبها وتحبه راح بعد ماشافته ٤ سنوات مرت على اخر موقف بيناتهم جان ابيت معتز وصار اللي صار بعدها ماشافته
جانت تسمع اخباره من تغريد نقلوا للجنوب هو الطلب النقل ولقاءاته بمعتز قلت بحكم بعده وقليل يزور بغداد بس يزور اهله بين الاجازات بعدها ماسمعت شي عنه وتغريد جانت تكول معتز ميعرف عنه هالفترة شي منقطعه اخباره او متعمد هذا الشي ميريد أحد يعرف أخباره !!!!!
انتبهت على سرمد وكع ركضت شالته ونفضت ملابسه وحجت وياه بهدوء وحب / يلا نروح نسوي سبح واخذك وياي نشوف عمه توته
ضحك سرمد لأن يحب يروح لبيت تغريد جهالها يلعبون وياه ،، تغريد صار عدها ولد ثاني بكد سرمد ،، علاقتها بتغريد احلا شي وقوة اكثر خاصه من سافرت سمر هي ورجلها واستقروا بدهوك بيناتهن بس اتصالات
اخذت سرمد سبحته وبدلتله وهي هم لبست بنطرون وفوكاه قميص طويل شالت جنطتها ونزلت ويه سرمد الجان يدردم عالروحه تلكاها ابوها جان جاي من برا فتح ايديه لسرمد / هلا هلا بالشيخ
ركض ودخل بحضن جده الشاله ويبوس بي
حبيب جدو وين تروح .
نادية / بابا حنروح لبيت ابو ايهم وتعرفه سرمد يخرب على جهالهم.
حجي علي / ها خوش لعد لاتتأخرون انتظركم عالعشا
نزل سرمد وراح يركض كدامها للكراج واستأذنت من ابوها وطلعت ورا سرمد .
،،،،
صاحت تغريد من وكع شي وصار صوت بالهول لان جانن كاعدات بالمطبخ يشربن جاي
تغريد /:ولك أيهم شسويت ،،، متوكح هالوكت وامجد كاعد يتعلم منه
ضحكت نادية / ههههه وانوب سرمد وياهم الله خوش مثلث. ،، ترى سرمد حرك وعنده سوالف بس اووف عسل على گلبي
تغريد / الله يحفظه ، تدرين مرات اكول سرمد هديه من رب العالمين حتى تلتهين بي .
نادية بحب / اي والله مونسني .
تغريد / ناديه ليش رافضة الزواج شبي ابن صديق الحجي ما قبلتي بي ماشاء الله شهاده وظيفته زينه وحالته الماديه طاااك
نادية بتبرير/ ما عجبني ما حسيت باي شي وياه وبابا بلغهم رفضي.
تغريد / نداوي راح ادخلين ال٢٩ فكري بحياتج ياعيني هواي كاعدة ترفضين كم واحد تقدملج ورفضتي
نادية / ٢٨ عمري بعدني صغيرة.
تغريد / هههه ماشاء الله طبعا بعدج بس التفتي لروحج اا لا تضوجين بس …سكتت تغريد وعينها على ناديه تخاف تحجي تروح تزعل لو تنقهر .
نادية / شبيج تغريد صاير شي ؟؟!!
تغريد / نداوي البارحه سمعت ابو ايهم يحجي ويه احمد الفهد يباركله مترفع وأمر نقله صادر لبغداد هألاسبوع راجع
نادية رمشت عينها وحست كلبها ضرباته زادت بقت صافنه على تغريد .
تغريد / ناديه ، احمد بعده ممزوج
غمضت وجرت حصرة وذبتها بعدها رفعت راسها / اني شلي دخل معقوله ممزوج تلكينه مكضيها هناك متعه هاي سوالفهم ميكدرون بدون نسوان.
اعترضت تغريد / لا ولج لاتظلمينه للرجال ،، معتز يكول تغير هواي من يوم العرفج .
نادية / عوفي سالفته رجاءا.
تغريد / لا ما اعوفها عليج الله بعدج تحبينه .
نادية بغيض / لاتحلفيني .
تغريد / نداااوي حلفتج .
نادية بقهررر / اي والله ما بطلت يوم عن حبه بس البگلب خلي بالگلب بعد منلتقي كل واحد عايش حياته .
تغريد / تدرين اذا رجع وشافج وعرف بيج ممزوجه اتوقعه يتقدملج الله عليج وافقي هالمرة لاترفضينه
نادية / ما اتوقع ولج هذا عنده كبرياء فضيع اني اخر مرة اجاوزت عليه بالحجي وتندمت والله بوكتها ،،، بس شيفيد الندم شفتي نقل للبصرة صارله ٤ سنوات حتى اخباره منسمعها وبعدين اني هسه ملتهيه بأبني
اووووف ياتغريد وسرمد منو اله اذا تزوجت وعفته يعرفني اني امه .
تغريد / لاتزعلين سامي شكد قاسي وميستحي على روحه ذاب ابنه عليج
نادية / لااا عفيه لاتحجين شنو ذابه هذا حبيبي وابني فدوووه لگلبه .
تغريد / الله يحفظه بس انتبهي لنفسج ندااوي الله يخليح ولج الزلم يشوفوج ويتحصرون مو سولفتلج على اقرباء معتز يكول سحل روحه عليها خبل معتز يوميه يخابره عليج اخر شي كاله البنية محجوزة والحاجزها مسافر يرجع ويتزوجون. إن شاء الله
فكت عينها /. مسولفتي ليش بعدين شنو من يرجع يتزوجها صدوك يحجي ديلا شلون رتبها
تغريد / إن شاء الله يرجع احمد ويتزوجج ااويلي يوم عيد وأشوفج متزوجه
نادية ضحكت على سوالف صديقتها / ههههه متبطلين سوالفج ،،صدوك خابرتي سمر .
تغريد / اي اليوم الصبح حاجيتها تكول مشتاقه للمتنه وطلعاتنا من نفر بالمولات وسواكه ههههه.حلفتني اجيب الجهال واجي تكول الجو يخبل بدهوك بي بروده حزيران مو حار مثل بغداد ههههه .
نادية / والله يرادلنا روحه للشمال شتكولين .
تغريد / غير يقبل معتز هسه يطلعلي مية عذر اول شي يتحجج بشغله ..اني احجي ويا واردلج خبر.
ــــــــــــــــــ
بيت أهل احمد /
ام وضاح / رتبتي غرفه اخيج .
مريم / اي عمه وهويتها يلا انا اروح اكمل الغدا فدوه عمه عينج على التوم لا يسوولي مصيبه مثل البارحه
ام وضاح / روحي يمه انا هينة يمهم شوفيهم كاعدين يلعبون بملاعيبهم
مريم صار عدها توم عمرهم سنتين حسن وزهراء مخبلين العائله كلها تريدهم مدنفشين كولش حلوين يشبهون امهم بس ميكعدون حركين لازم واحد يبقى عينه عليهم .
علاقتها بزوجها وضاح تغيرت حيل صارو اكثر قرب وشوي فك وياها من وحدهم بيناتهم مدللها حتى صار يغازلها وهي مكيفه على سوالفه لأن تريده يحسسها بحبه اكثر .
ملتهيه تثرم بالزلاطه واكفه عالسنك ما حست الا على واحد يحظنها من ورا ويخلي راسه بركبتها فزت بعدين ضحكت بصوت ناصي / وضاااح هبطتني والله
شمها حيل وباس ركبتها / ميت عليج كملي واصعدي وراي
قرب راسه وهمس جدام شفايفها / لاتخليني اسمط ابوج ولج ما اتحمل جنت كاعد بنص الزلم ابيت عمي سبع وجيتي على بالي جلبوا بيه عالغدا وتدرين بيهم من يلحون وانا طافرة روحي ههههه.
مريم / بعد گليبي والله كملت كولشي بس اوصي عمتي عالجهال خطيه صار ساعه كاعده وياهم.
وضاح غمزلها / انا احاجيها يلا الحكيني بسرعه هااا قبل ما انسى الولد راحو لجدادهم عمي رضوان جلب بيهم يكول بس انت بيت سبع يردون يغدونك انا هم اغدي احفادي
مريم / فدوه لأبوي الله يحفظه النا ولو توك سمطته
وضاح / هههه انتي شكو هذا عمي عزيزي ابو مريتي ههه لو تشوفين محمد نافخ ريشاته هو وابراهيم على اساس زلم ورايحين يضيفون بيت جدهم
مريم بحب / والنعم على ابوهم المعدل
دحك بعينها الحلوة وغمزلها / استعجلي
عافها وطلع سمعته يحجي ويه امه وصاها وصعد للغرفه
شوي وصاحت عمتها / مريومه وينج
مريم / ها عمه ادللي رايده شي.
ام وضاح / يمصكوعه اصعديله رايدج شعندج لسه بالمطبخ امشي وراه جاي حامي عليج
مريم بفشلة استحت / عمممممه والله فشلت .
ام وضاح / لا بعد عمتج انا احجي الصدك ماجاي افشلج روحي وخلي وليداتج ملتهين حتى على ابوهم من بوسهم ما صدوا
صعدت وراه واول ما دخلت جرها بحظنه يبوس بيها ،، اعترضت تريد تبدل وتتعطر هي سبحت ورا ما كملت شغلها الصبح بس تحب تحضر روحها لوضاح.
وضاح بحب /:اششششش راضي بيج تخبل ريحتج افيش اخرررب عليج
عافها ونزع شماغه والعكال وفتح دكم دشداشته
اشرلها فاتح ايديه راحت بحظنه وبقى يبوس ويعصر بيها بحنية

وهي فاقده عليه تحبه تموت عليه وكولشي تسوي حتى ترضيه .
،،،،،،،،،
ساعه ونزلو سابحين وضاح راح كعد يم امه الحجيه
الجانت منومه الجهال بصفها باس راسها وايديها
/ الله يحفظج النا يمه ويطول بعمرج.
باسته بخده / بعد امك وعشيرتها ها ابو محمد اشوفك مرتاح
وضاح / هههههه اي والله الف الحمد لله
طبطبت على ظهره./ الله يديمها عليكم ييمه مريومه ذهبه مصفايه. ،،، اخيك اليوم يصل لو باجر .
وضاح / ان شاء الله اليوم خابرني كال العصر يمكم .
ام وضاح / الف الحمدلله من نقلوا جان ببغداد اشوفو بالشهر مرتين ثلاث من راح للبصرة اتحصر على شوفتو يمه وضاح اخيك ما عاجبني احسه ضايج وكوة يضحك
ما حجيت ويا عالزواج مو حتى شيبات بينت براسو.
وضاح / يمه والله كل مرة احجي ويا يكول انه اتزوج بس مو هساع
ام وضاح / ول يابه شينتظر عمرو راح يصير بالاربعين.
وضاح / هههههه يمه الله يهداج ٣٧ بعده شاب جسم وترتيب ومعتني بروحه حتى شيبات ممبينات انا الشايب مو احمد.
كرصت عينها عليه / شايب وماتكعد راحه صكطت البت .
وضاح طكها بضحكة قوية على سوالف أمه / ههههههههههااااااااااي
أمه الحجية متكعد راحه الا تقصفهم.
ام وضاح / هو شكو فرق بينكم انت تكبروا باربع سنين لو عايشين الولد الراحولي جان هسه انتو خمسه بعين العدو
ام وضاح توفولها ولد اثنين بداية زواجها واحد عالولاده والثاني اجهاض.
ام وضاح /:يمه ما وصيك على كيفك وياها خطيه البت تتعب شايله البيت كلو على راسها.
وضاح / اكول يمه عليج القرأن هي شكتلج مني
شهكت امه / لاااا والله هي كون تسولف هالعوبه من تشوفك تحير شسوي ميته عليك بس اشوفها تراكضلك ادور رضاك على حساب تعبها تحبك يبعد امك.
ـــــــــــــــــــ
رجع احمد ناصر الفهد لبغداد بعدما ترقى برتبه مقدم جانت رتبته مكافئة لجهوده وتفوقه بعمله اول شي سواه زار مقر شغله استقبلوا بحفاوة وترحيب يليق بي خاصة اللواء ابراهيم عبد الحق
ورائد سلام صديقه استلم شغله بالمكتب واستأذن من رئيسه يزور اهله فأنطا اجازة اسبوع ..لواء ابراهيم جان موجود ليرحب بي اما مكتبه فانقل للوزارة وهسه مديرهم صار سنه تقريبا عميد مصعب ال…
انسان متشدد بالعمل .
رحب بمقدم احمد الفهد وتعرف عليه لان يسمع اخباره وسوالفه من جماعته واصدقائه البعمل وخلاله واهس يشوفه ويتعرف عليه .
كاعدين هو وسلام بمكتبه / بذات متكول ضلعي انزل بغداد اشوفه اربع سنين ثلاث مرات اشوفك باقين بس بالموبايل.
احمد / تدري ما انزل قليل واذا نزلت اكضيها يم الاهل. شخبارك انت بعدين صايرلك كرش ههههه.
سلام / هههههه جاي العب رياضه اي حقك تشوف روحك جسمك رياضي تريدني مثلك
احمد / عجل غير اعتني بروحي تعرفني احب اداري نفسي
سلام / هههههه اي والله حيل اعرفك ابو الحب شخبارك ويه النسوان .
احمد تنهد / وداعتك بطلنا من زمان.
سلام / لاه لاه ما تقنعي احمد الفهد بطل يتزوج ،،، علينا احمد اعرفك زين ترى.
احمد / ههههه ولك ترى اهفك بالكرسي والله احجي الصدك مالي نفس اتزوج واطلك لعبت نفسي.
سلام / اي يجوز ،، خل اسكت .
احمد / احجي ليش تسكت.
سلام / بعدك تريد البنية الرفضتك.
تنهد احمد ورفع تك حاجب / هذا انت تعرف بعد شكو تسأل ،،، سلوم كوم لشغلك انا طالع للطارميه هساه الاهل على نار ينتظروني.
سلام / اي الله وياك سلملنا ،، شوكت ترجع.
احمد / اسبوع ان شاء الله.
ـــــــــــــــــــ
يم اهله الكل جانو موجودين بالمضيف العمام وولدهم يباركون لأحمد نقله وترفيعه وضاح عزمهم على غدا باجر يذبح ويسوي غدا .
وعزم الجيران والمعارف جاب طباخ هو اليتكفل بالاكل والبيت بس يحضرون الجاي والكهوة .
جانت عزيمه مرتبه بيض وجه هالوضاح .
بالمطبخ واكفات يصبن جاي زينب ومريم ونسوان عمامهن وبناتهم وجم وحدة من الجيران كاعدات يم الحجيه بالاستقبال.
حجت زينب بصوت ناصي /؛هسه شكو بيها لو تجي وحده منهن تساعدنا .
مريم / مو تعرفين ذبتهن جناين ميدخلن روحهن اولهم نسوان اخوتي من يطلعن خطار عبالك شوف وين رايحات كبور تلفهن اي والله.
زينب / حتى بنات عمج سبع شدعوه يابه.
مريم / زينب فدوه رحتلج عوفيهن خل نخلص على خير .
زينب / اكلج سمعت فهد يسولف ويه عمتي على وحده من بناتكم على اساس يزوجوها لأحمد
عكدت مريم حاجبها وتخوصرت. /؛منو بالله هاي ،، شو الكبار متزوجات واثنين صغار صح عشرين سنه بس هو مايقبل ،، اي وشكالت عمتي .
زينب / تكول انا ما ادخل ويا دماغه قافل خلي براحتو
مريم / اي صدك لأن جم مرة حجت وما قبل.
زينب / زين يسوي لاتزعلين ترى هن عرمات بنات عمج سبع خاصة بنات مرتة الثانية والله بنات الجبيرة المزوجات درة مال الله.
مريم / اي صدك فدوه لعينهن سعاد وماجده حبابات مدري شعجب ما جايات لمحت رجالهن قبل شويه دخلو
زينب / يجوز ملتهيات بجهالهن ،، يلا خفي ايدج صبي اها شوفي الذيب جاي ياخذ صينيه الجاي هلا هلا بنسيبي هههههه.
خجل محمد وخدوده حمرت ..
زينب / هههههه فدووه لله شوفها شلون تصير مرة .
مريم / ههه والله زينب عندج سوالف سنتين عمرها وحاجزتها لمحمد .
انطت الصينيه لمحمد الطلع عالسريع لان يضوج يسمع سوالف النسوان.
زينب / فدوه حبيبي شلون يستحي ،، اكلج انتي مو وضاح اكبر منج بعشر سنين لاتحجين خل احجز لبنتي من هسه وين الكى مثل ولدج فديتهم.
ضحكت مريم على سوالف زينب تونس دائما متخلي الواحد يمل.
