رواية حسناء قلبي الفصل التاسع 9 بقلم جوهرة
تغريد /
ناديه اكعدي ويا واسمعي للأخير ليش هيج ولج والله الرجال ذابح روحه يتوسل بمعتز بس يريد يسمع اخبارج يكله خل ام ايهم تقنعها ..مايدري هذا قافل …اشرت على راسها وبقت ادحك على ناديه الجانت مدنكه تكتب
صاحت بيأس لأن نادية مطنشتها /شوفو القهر ولج ندداااوي !!!!
نادية بلا اهتمام / ايبااااه على اساس جان قبل ميسولف لو شايفته شلون جان يحجي وياي يذوبج بكلامه ورومانسيته ،،
يووووو كوه تخليني احجي عوفينا منه يستاهل شلعان الگلب وبعد اكثر.
تغريد / نادية شكد تغيرتي ماجنتي هيج ؟!!!!
نادية بقهرررر / اااخ يا تغريد الزمن يغير والمريت بي مو قليل هسه تكولين انتي مو اول وحدة يعوفها حبيبها ،، لا اني ما اقصد بس على احمد لأن عافني اقصد ظروفي فقداني لأمي الله يرحمها مشاكل بابا وسامي اللي عافنا وحدنا وهاجر ،، قشمرة احمد عليه وخداعه واخير وحده المرض الصابني
جرت حصرة وذبتها /؛الحمدلله على كل حال ،،، بس تدرين هاي الشغلات كلها احسها قوتني صرت اعرف شلون اواجه الدنيا
دوختج هههه ولو انتي تخربين عالسوالف
تقربت تغريد عليها يم المكتب ودنكت راسها / ناديه احلفج بالله تفكرين بأحمد والله العظيم محد يلوكلج غيره
نادية ضيكت عينها وابتسمت تك خد / تذكرين بالحفله جانت اغنية الوك الحمد مالوك أنا لغيره
رفعت تغريد راسها وضحكت / ههههههه هااا يعني وصلتج حسيتي هههه عليج الله شفتي شلون جان مسلطن عليها ويسوي حركات بيده بكل ثكل
هزت راسها وبالها راح يم الحفله صدك جان حيل متونس ويه الاغنية وحركاته بثكل حلوة
نادية ضربت تغريد على ايدها / عابت كوة تريد تذكرني ،،، يلا ارتاحي عجبني بوكتها جان حيل فخامه وهيبة
راحت تغريد وشبكتها وهي تضحك / يدين النبي يلهووووي البت ساحت خلااااس هههههه
دفعتها ناديه / اوووي وخري ولج عبالج معتز وتحضنين بيه صايرة مصرية ههههههه.
عافتها وراحت كعدت عالكرسي والفرحه بوجهها لأن حستها لانت شوي بعد ماحجت خلها شوي متريد تضغط عليها.
ـــــــــــــــــ
احمد /
كاعد بالمكتب فاتح ملف وصافن بي قرا كل كلمه منه جان موصي واحد من ربعه يجيبله معلومات كامله عن نادية يريد يعرف كلشي عنها وهذا الصار معلومات هواي عنها واهم شي وريح گلبه ماعدها علاقه برجال !!!
تفاجىء عدها اخ ما سامعها يوم ذاكرته مهاجر لأمريكا من سنين اسمه سامي ،، ضيك عينه وجر قلم رسم دائرة عالاسم وبقى ينقر عليه بالقلم
يحتاج يعرف عنه كلشي وليش عافهم وهاجر رغم حالتهم المادية حيل زينه.
أخذ موبايله واتصل على سلام ظل يدك اخر شي فتح خط
احمد / هههههههههه انعل شيطانك يول بس لا البالي جاي يصير هساع ههههه
سمعه وهو يأفأف ويهمس بكلام وية زوجته عرف اتصاله مو وكته بس شيسوي ضايج ويريد يوصي على شغله
احمد / ادري درعمت عليك وغرببلتك بنص االيل انه كلت يجوز بعدك مانايم.
سلام صاح / عمي ما مخمود ولك كااااااعد بسيطه ابو شهاب اردها الك خل ارجع العراق وادلل ههههه.
احمد مكشر بابتسامة / سلام صحصح وياي اريد معلومات كامله عن واحد ، تمام يخوك وما يحتاح اوصيك بحث سري هذا
سلام / تأمرني ضلع شعندي غيرك انطيني الاسم
شوي ودزه برساله لحظات واتصل سلام عليه.
سلام بصوت مليان جدية / منين تعرفه ؟؟!!! هذا تاجر عراقي بأمريكا وعنده تجارة هنا بس عليه علامه تاجر اسلحه فد واحد شايف روحه شوفه
احمد / عجل سويلي تقرير كامل عنو وارسله .
سلام / من عيوني ضلع تأمر أمر .
احمد / اعذرني يخوي ازعجتك ههههه.
سلام / لاااع ما زعجتني طيرت ام الرومانسية هههه
احمد /؛ول ول يابه تنكط رومنصية سلووم ،، ديلا تصبح على خير .
سلام / شسوي عيوني شعندي غير الحب هههه يلا تصبح على خير واجمعين يارب .
رجع ظهره عالكرسي وغمض عينه فكره راح لنادية هالاسبوع حيل على باله من بعد اخر مره شافها لعق شفته بلسانه وهو يتخيل بوستها صاير ميتحمل اذا شافها…….. يربي شكد حلوة وترفه ااووووف دماااار والله مجاي اكدر ابعدها عن تفكيري اول مرة اتندم هالكثر بحياتي شلون بيه يربي اريدها احبها
اريدها بحظني ااااخ ينار گلبي ماجاي اكدر احصلها اخاف اتهور وااذيها بتصرف وهي راس يابس اااخ عجل شسوي دماغها ما يلين والله االاشوفو ابقى اضغط عليها بلكن اطخ راس شلعت گليبي .
رفع تك حاجب وعدل كعدته دحك بساعته بعد وكت ينزل البيت ،، اجازته باجر ميروح لأهله الا اذا سوى حل باجر يشوفها صار اسبوع على اخر مرة ،، وين يشوفها
خل يتفق ويه معتز يشوفها ابيتوو ..
فتح موبايله واتصل /:هلا ابو ايهم شلونك يخوي.
معتز / كل الهلا ابو الشباب شخبارك.
احمد / ااااخ اخيك تعبان
معتز / والله تكول اكوم واكعد اني احجي وياها تكول متغيرة هواي مو مثل قبل
احمد جر حسره وذبها وهو ناوي نية / اريد فزعتك معتز اعزموها ابيتكم وانا اجي اشوفها واحجي وياها شتكول .
معتز / احمد تروح تزعل علينا وشيخلصني من المره غير اطنكر عليه ههههههه .
احمد / بروح ابوك العزيز سويها لخاطري .
معتز / احمد مو تشوف روحك صاير هالاسبوع بس تسولف بيها وكعت مو ؟؟!!!!
احمد / ااااخ ااااخ جاي احاول اضغط على روحي ما افكر بيها بعد ما رفضتني بس ارجع وادورها متندم متندم لأن عفتها احسها جانت شي عزيز وخسرتوو وهساع اريد ارجعه .
معتز /:شوف اني سمعتها البارحه تحجي وياها موبايل الفهمته مشتاقه لأيهم انت تحضر بس ادكلك تجي للبيت بعدها الله يستر ، احمد ما ريدها تحس جاي نخدعها تروح تزعل علينا وهاي مرتي روحها بيها .
احمد / معتز والله رايدها افهمني ماتروح من عقلي وگلبي من اشوفها وداعتك المكينه تضرب وتكط خيط وخيط
معتز بضحكة قوية / هههههههاااي الله يعينك هاي انت هيج تحجي والله ما صدك والنسوان الجنت تتزوجهن بين فترة والثانية
احمد / عجل اروح للحرام هههههه ماتكعد راحه يول انا وين احجي وانت وين ،، عوف هاي السالفه بطلت منها صار فوك الشهرين مايحتاج لأن هواي تغيير صار كمت اشوف نداوي وبس .
معتز /:ههههه يا الله يا رب ، المهم انتظر اتصال مني بس ما وصيك على كيفك وياها وسوي نفسك متفاجىء بيها واني ماراح احجي ويه المرة خليها بيناتنا .
سلم ودعه وسد موبايله وشمره ورجع اخذ ملف من المجر يراجعه يريد يشغل روحه بأي شي .
ــــــــــــــــــــ
تغريد/
مو تنسين باجر تجين انتظرج .
نادية / دروحي هسه لبيتج الحكي سوي غدا لمعتز لايروح يسحلج
حجت ناديه تتشاقى وباها وبعدها يم سيارتها واكفه ودعت تغريد الصعدت بعدما السايق اجاها .
على اساس باجر عصريه تمرلها كولش مشتاقه لأيهم توصي تغريد تكللها جيبي وياج اشوفه وتغريد قافله تتحجج بس الحقيقه معتز مقبل البارحه جانو يحجون كال تريده تجي تشوفه شنو ماخذته وياج للجمعيه عوفي يم امج ومن اطلعين مري عليه استغربت كلامه لأن ميدخل قبل اذا تاخذه وياها سكتت متريد تكبر السالفه وهي متسوى.
ثاني يوم العصر كاعدات يسولفن بالاستقبال وناديه حاضنه ايهم وتبوس بي وبيده لعبه اشترتها اله / فدووه لحبيبي ولج توته اخذه وياي لبابا هسه يفرح بي يحب الاطفال
تغريد / يمممه ابني ما انطي ازوجي وسوي مثله هههههه
شمرته نادية عليها بحذر / عابت عابت هاج اوخذي ما ريده
ورجعت كرصت خده على كيفها / اوووي حبيب عمتو .
تغريد / ههههه اااخ منج
صفنت عليها وكملت /؛ولج نداوي اليوم طالعه صاكه شمسويه تغيير من وراي يلا اعترفي
نادية سحبت شعرها رجعته ورا جتفها /شبيج بس اليوم الصبح جنت بمركز تجميل دللت روحي شوي هههههه.
تغريد / اي بالعافية مو جاي اشوف طالعه بعد احلااا .
نادية بهدوء / تسلمين يعمري انتي الاحلى
شربن عصير واكلن كيك وراها استأذنتها
تروح تنيم ايهم لأن كام يغفي وبقت كاعده وحدها شوي وسمعت صوت معتز يحجي
معتز / تعال تفضل كل الهلا بيك ضلع
متدري ليش كلبها نغزها وفعلا نفس ما حست نغزة صابتها وهي تشوف معتز واحمد يدخلون الاستقبال.
معتز رأسا ابتسم ورحب / يا هلااا واني اكول البيت منور اثاري نادية ضايفتنا حي الله من جانا.
احمد عينه على معتز الجان يحجي خزره لأن معجبته نبرة التهلي والتمرحب ميريده يحجي وياها ويدك ناعم ،، اشتعلو اهلج انوب شطالعه لخاطر محمد ،،، بقى مركز عليها
كامت وياريتها بقت كاعده جان ارحم
واكفه كبالهم رافعه راسها بشموخ وردت على معتز بكل هدوء ورزانة / الله يسلمك ابو ايهم الله محيي اصلك
احمد ايده بجيب البنطرون والثانية شايل موبايله وسويج السيارة وينتظر معتز يتصرف
معتز / اعذروني هسه ارجع اخذ راحتك ضلع
.
طلع مستعجل وسد الباب وراه ،، هنا نادية صوفرت استحت حيل تبقى ويا بعد اخر موقف بيناتهم تلفتت اتدور جنطتها راحت تريد تاخذها عالمقعد كبالها ،، احمد تقرب منها وكف وراها وبصوت ناصي ..شلونج
بعد گليبي
فكت عينها والتفتت عالسريع جان اطخ بصدره شهكت وهي تشوفه بهذا القرب.
حاولت تبعد بس قفل عليها بحظنه / احلفج بالله اهدي واسمعيني
دحكت بعينه ومايفصل بينهم الا سانتيمات بسيطه
نادية / شلون يعني وياك ،، عيب هيج تتصرف على شنو شايف روحك ؟؟!!!!
دنك عليها وهمس وعيونه تريد تاكلها.
احمد / لخاطر النبي لا تكولين عيب ولج انا منتهي عالأخير رايدج رايد كربج ترى راح اتهور واخذج غصب والله هساع وبهاللحظة مستعد اخذج واعقد عليج ، ناديه جري وياي عدل لاتخلين خبالاتي تطلع متعرفيني زين الاريدو اخذو لو على كطع هالركبة
دفعته بقوة بس ضغط عليها بحظنه وايديه تمشي على ظهرها ،، خافت يدخلون ويشوفوهم بهيج وضع
نادية / تخبلت انت عوفني واحترم نفسك ترى هواي سحلت روحك واني ممعبرتك
حجايتها خلته يعصب فك عينه عليها وخزرها بحيث جسمها انكمش بحظنه ارتعبت وهي تشوف ملامحه تغيرت حست بندم لأن حجت هيج كلام
نتر بيها وانفاسه قريبه تضرب وجهها / مااا صاااارت ولا انخلقت المره التهيني جااااي تعيريني لأن اتقربلح هين هين والله لخليج مرهونه الي واكص راسو اليجي صوبج بس خل اختم شفتج هذه بعدها اطلع ،،
ولا تفرحين راح تبقى عيني تراقبج واشوف شلون راح تبعدين عني بداخله يدري الراح يسوي حرام عجل شيسوي بريدها تقبل بأي طريقة
انهبطت وهي تسمع وتشوف التهديد والوعيد بعيونه وبصوته
افترس شفايفها خلاها تتوجع جان فاصل ومقهور من ردها راد يحسسها بحبه بكميه الوجع السببته برفضها اله .
ناديه بعد متكدر تقاومه رخت بجسمها بين ايديه ،، وحست على روحها وهي تبادله بوساته متكدر تنكر
احساسها بي هي تحبه بكل ذرة بروحها لهذا جان جرحها منه ثخين
احمد بعد ميكدر راح يتهور وهو يشوفها لانت بين ايديه عض شفتها الفوك بقوة خلت دمها يسيل دفعها عنه بقوة خلتها تعثر لأن جانت ممركزه وبغير عالم.
مد ايده ومسح شفته لأن طعم الدم واضح شاف اصابعه بيها دم رفع راسه شاف شفايفه مورمه وشفتها الفوك بيها دم راح جر كلينس من علبه جانت عالطبله مسح شفايفه واصابيعه ومد ايده / اخذي نظفي الدم على شفايفح
ما عبرته لان بعدها تحاول تتماسك تريد تستوعب السواه .
تقرب وخله ايده ورا راسها ورفعه وايده الثانية مسح شفايفها بهدوء عكس تصرفه قبل شوي .
بقى صافن عليها وهي مدنكه راسها و قبل
ميطلع كاللها / اهتمي بروحج زين ولو انت ذيبة مينخاف عليج.
عافها وراح بقت عينها على الباب الطلع منه كعدت منهاره عالكرسي وصافنه عالباب سألت روحها شيقصد يعني بعد معليه بية يعني راح طلع من حياتي ، وكلامه قبل شوية وياية وتهديده الي ؟!!!!!!
خلت ايدها على شفتها الجانت توجعها ،، شنو قصده خلالي ختم يعني اني مراح افكر بغيره ليش اني منو شاغل تفكيري غيره….بس هو راح راح واني السبب اني الماريده بحياتي بس اني احبه رغم السواه بيه احبه بس ما اكدر اسامحه هسه ليش ما انتظر اكثر ليش ما طول خلك وياي ..اااه خلاص خلاص نادية هو بطريق وانتي بطريق .
احمد من طلع للسيارة صعد ورأسا اتصل على معتز وطلب تروح زوجته تشوف ناديه لأن عافها منهارة
وفعلا شوي ودخلت تغريد حظنتها /:حبيبتي سلامتج شبيه احمد خابر معتز علمودج
رفعت راسها وبينت عيونها الباجية .
تغريد شهكت وهي تشوف الاثر بشفتها /عزززا ولج هذا مرد شفايفج مرد !!!!!!!
ناديه بجت وهي تحجيلها الصار ، تغريد تواسيها
تغريد / اهتمي بنفسج حبيبتي معليج بكلامه لاتخافين منه والله زود الحب ذابح روحه عليج ومن قهره هيج حجى وتصرف اروح اجيبلج ثلج شوي يخف الورم .
،،،،،،،،
من يوم الصار بينهم هالموقف احمد بعد ما تقرب عليها بس جان يسمع اخبارها من معتز اخر شي طلب منه لا يذكره بيها الا اذا هو سأله ومعتز احترم رأي صاحبه لأن هو علموده يحجي.
ويوم دخل على العميد ابراهيم وبيده طلب نقل للجنوب تحديدا البصره العميد اعترض لأن منصب احمد حساس وميريد يخسره حاول يعرف منه السبب بس ما قبل يحجي خلا للطلب على جهه وكاله راح يراجعه ويرفعه لمكتب الوزير .
