ـــــــــــــــــــــــــــ
كاعدين بعد ما حجي علي رحب وهلا بي وشكره عالسواه اليوم بالمول
احمد / ول يابه ما ضل عكل براسي جيت اكفخهم الا شويه
الحجي ابتسم بأمتنان حقيقي للسواه ،، من زمان يعجبه احمد بس شيسوي لبنته وعنادها
راح ومد ايده يسالم احمد اللي سالمه واخذه بحضنه باسه بخده / ها يالذيب شلونك
سرمد يدحك بوجهه ومبتسم
احمد بنظرة حنية / اذا اكول شلونك شترد عليه
سرمد / ذين حدالله
رجع حضنه ومسح على شعره / عفيه ذيب .
ناديه عرفت احمد عدهم لأن ابوها طلع وطلب تحضر ضيافه لأن احمد الفهد ضيفهم اليوم ،،،، تخربطت احوالها وايدها رجفت وگلبها يدك سريع
حظرت عصير عالسريع وانطته لأبوها اخذه وراح وهي رأسا كمزت لغرفتها بدلت تراكها الاسود وطلعت نفنوف حيل نازك بينسل نص الساق لونه وردي ثلجي ورتبت شعرها سرحته وخلته ورا ضهرها رشت عطر واكتفت بس بالكحل راقبت روحها بالمرايه طالعه اجنن .
نزلت رافعه راسها بشموخ عكس داخلها الجان متلهف على شوفه أحمد اي تعترف متلهفه لشوفته وتريد تشوف نظرة الاهتمام والحب بعينه .
انتبهت لروحها حافيه ملابسه حذائها ابتسمت تك خد هالكشخه كلها وحافية يبوووو رجعت سريع ولبست تكرمون حذاء ابيض سيورا وكعب .
واكفه بصف الباب تسمع حجيهم خلت ايدها على حلكها تكتم شهكة وهي تسمعه يطلبها من ابوها
دمعت عينها لا اراديا .
احمد / لاتكول جاي وحدو انه اجيت اخذ الموافقة حتى اجيب اهلي وانا حاضر بالتطلبو وناديه اتدلل بالتريدو
حجي علي / والنعم منك ومن اصلك بس البنيه معانده ياهو اليتقدملها ترفضه متعلقه بأبن اخوها عمره شهر من ربته حتى هو عباله امه نادية
احمد متفهم لوضع نادية / تدلل بالتريدو واكون ممنونلك اذا قبلت احجي وياها.
صفن الحجي عليه ليش لا خل يكعدون يفتهمون واحد من الثاني يدري بنته تحبه والا جان اتزوجت من زمان ..حجى بصوت هادىء / خير ان شاء الله ،، يلا جدو سرمد تعال افتحلك تلفزيون شوف طيور الجنه
كمز سرمد وطلع يركض والحجي طلع يصيح ناديه واتفاجىء من شافها بالصاله قريب عالباب كاشخه
ابتسم شجعها / بابا نداوي يريد يكعد يحجي وياج اسمعي منه لا تعاندين
هزت راسها موافقه ودخلت عليه.
الحجي اخذ سرمد للهول فتحله طيور الجنه وكعد وياه وسرمد خلا راسه بحضن جده ومدد عالقنفه يتفرج .
( حجي علي انسان واب متفهم لوضع بنته عاش وياها تفاصيل حياته ويعرف كولشي عن بنته معاناتها اليتم بوفاة امها الله يرحمها ومعاناتها لمرضها وانتكاستها وآلامها وايضا خذلان احمد وتدهور العلاقة بينهم وآخرها سالفة ابنه سامي اللي ترك طفل بعمر الشهر بذمة نادية صارت مسؤلة عليه ،، بنته ماتهنت بحياتها وتحتاج ترتاح وهو كاب يريدلها الافضل والاحسن )
نادية / السلام عليكم
سلمت وگلبها يدك سريع يربي شنو هالفخامه والهيبه يبوووو راح اتخربط شبيج ناديه بيعي ثكل رفعت راسها ومشت كعدت على قنفه التخم .
احمد بهدوء / وعليكم السلام والرحمه كل الهلااا يا هلاا بالزين كلوو شلونج غلاا
وراح كعد بصفها وجسمه فره عليها ناديه مدنكه راسها ورجفت ايديها لان قريب حيل عليها ، عيونه تأملت كل تفصيل بيها مشت على كل جسمها زاد نبضه وكصته عركت وهو يفكر بيها وبحلاوتها ونعومتها وهساع كاعده اذا تحرك راح يطخ جسمها
همس بصوت خفيف / ارفعي راسج تا اشوفج ليش ضامه عيونج هالسود الحلوات
ناديه رفعت راسها لا اراديا وبقت مخدرة وهي تشوفه بهالقرب عطره يخبل سطرها جرت نفس قوي تريد تعبي نفسها وروحها اكثر منه ..تعترف ويه روحها تحبه باقيه على حبه بس الظروف هواي باعدت بينهم .
احمد همس ولهان عليها كلش / مشتاگلج چثيررر ، ناديه يبعد گليبي مكافي بعد ، رايدج مريتي تنورين بيتي نكمل حياتنا سوية
ثقي برب العالمين اربع سنين مارحتي من بالي اخبارج توصلني .
فكت عينها مستغربه عرف راح تسأله جاوبها / اي والله ولا تزعلين اذا كلت جنت مخلي موظف عندي بتابع اخبارج ويتصل بيه بس للأسف توفى الله يرحمو سؤال محيرني ليش ما خبرني سرمد مو ابنج
مرت عليه ايام وانا القهر ياكل بروحي لأن صرتي بحضن غيري ومن شفتج تبجين بالمول روحي انسحنت عليج ردت اخذج بحضني واطمنج اكلج انا بظهرج لاتخافين راح ارجعلج وليدج ااااخ يناديه مو كافي انا اريدج خل نتزوج
بقى عينه عليها يريد يشبع من شوفتها الحلوة يريد يعرف جوابها.
بلعت ريك جاي تشوفه شلون متلهف عليها شلون نظرة عيونه محاوطتها ابد ابد متنكر حبها لأحمد الفهد وهسه كل احساسها ومشاعرها ثايرة بي وبقربه
نبضات گلبها زادت وهي تحس بجسمه طخ جسمها لأن كاعد لزك بصفها رمشت عينها من دنك وشاورها وانفاسه تلفح وجهها / ما جاوبتيني يالغلاااا
دنكت وايدها تعصر بيها وتفرك اصابعها /عندي شروط اذا وافقت عليها اني موافقه اتزوجك.
مد ايده ورفع راسها / لا تضمين عيونج الحلوات خليهن بعيوني واحجيلي
تنهدت وعينها بعينه / ما اكدر اعوف بابا وسرمد كل حياتي همه
ابتسملها وگلبه ارتاح لأن. مبين عليها موافقه.
رد عليها / انا ما اقبل تعوفيهم الحجي يكول هذا وليدج شلون الام تعوف وليدها
اول مرة تبتسم لأحمد من فترة طويلة ،، كلامه حيل عجبها لأن فاهمها صح حبت طريقه كلامه ولهجته من يحجيها بيها كميه حنيه واضحه.
نادية / اذا اتزوجك نعيش بهذا البيت ماريد ابعد عن بابا.
رفع تك حاجب ماعجبه هذا الشي / ول يابه انا تاليها اصير كعيدي تردين الناس تاكل وجهي له له يناديه ماحبيتها منج هالسالفه .
كلبها نغزها مبين رافض لأقتراحها بس هي متكدر تعوف ابوها .
نادية بحزن / ما اكدر اعوفه هو كل حياتي شلون ابعد عنه.
احمد / والحجي راضي بسالفتج
سكتت مجاوبته لان تعرف ابوها زين مراح يرضى
ضغطت شفايفها ورفعت حاجبها جان ترد / شلون اتخلى عن بابا يعني من كلامك متقبل على شرطي .
نتر بيها / لا تبقين تتشرطين ماحبو هالاسلوب انا كلتلج ادللي بالتردي اقبل اي شي بس مال اكعد اكعيدي ابيتكم هاي الما اقبلها انا رجال معروف والي مكانتي واهلي ناس معروفين الهم صيتهم مو انتي التصغريني بشرطج هذا
وكف وعدل سترته ومسح على شعره ورجع التفت عليها وهو خازرها /:خلصتي شروطج لو عندج بعد
فكت عينها شبي هذا توا يسحل روحه عليها ويقنع بيها
وكفت وعينها عليه / اي شغلي بالجمعيه ما اعوفه
حجى بثكل واضح ورافع خشمه / يجرالج وهساع صيحي الحجي عندي حجايه وياه
التفتت الحجي على ناديه وعكد حاجبه وحجى بلهجه خشنه / شنو هالسالفه الطلعتي بيها ومنو كالج اني اقبل على هالشي اسمعي بنتي وجدام هالرجال الخير تنطين موافقتج هسه جدامه حتى يعرف يتصرف لاتبقين ساكته
اعترضت / بابا بس اسمع اا…..
قاطعها رافع ايده / خلاص بنيتي خليني ارتاح ما ريدج تشلعين گلبج.اكثر ماهو مشلوع
تقربت وحضنته / شلون تريدني اعوفك
طبطب على ظهرها بعدما حضنها / لازم تشوفين حياتج بنيتي
التفت لأحمد /:عندي اقتراح ولا تكول
كاعدين يدورون سوالف ،، شنو رأيك تشتري بيت قريب علينا اكو جم بيت معروضات للبيع واني بحكم هاي شغلتي العقارات اكدر اشوفلك بيت تريده ملك لو اجار
احمد / حجي رحمه الله والديك بس انا عندي بيت ملك بمنطقة…. وهي قريبه على منطقتكم .
حجي علي / هاي هي وليدي على راحتك.
صفن على ناديه الرتبت كعدتها ومدنكه راسها.
يريدها ترفع عينها بعينه يريد يشوف شراح تسوي.
الحجي اختصر كولشي / يلا بابا نداوي اذا موافقه عالزواج حتى نرتب وضعنا.
هزت راسها ميته خجل من ابوها اللي ضحك من كل گلبه فرحان بيها /وههههه ايابه ايابه بنيتي تستحي من ابوها
رفع راسه لأحمد / شايف الخير وليدي
ابتسم احمد / الخير يصيب الجميع.مشكور عمي
بعدها ترخص ورا ما اتفق ويه الحجي يجيب اهله وعمامه بعد يومين .
كرصت الحجيه ام وضاح عينها بزينب / ولج زنيبه لا تخليني احجي صارلج ساعتين مرتبه روحج وتفترين على زلمتج شنهي مراح يطير كاتمه نفسو
ابتسمت زينب وراحت جرت راسها باسته / تمونين عمتي حبيبتي ..
ورجعت تتلمس بالصايه اللابستها
عمتها /:الله تخبل عليج طالعه صاكه والله.
ام وضاح / اكول امشي صيحي ام محمد وين صارت ملتهيه وي الجهال لاتبقين اتموعين فهد موهنا ويشوفج .
زينب / ههههه يبوووو قصف قصف اليوم شبيج عيوني عمتي
ام وضاح / احمد خلاني صافنه بسالفته عجل يحبها صار سنين يكلي مارضت الا هساع ،،، وعنها مارضت هالعوبه مخليه وليدي يتصفن لايبه روحو وانا اكول ليش ميرضى يتزوج مجابل البت عاد كون تسوة نطرتو الها وتسوى ظلتو هالسنين هذه
زينب / عيني جيناتهم الوراثية هاي كلهم يتشابهون ونفس التصرفات
ابتسمت مربم تك خد / عجل غير خوان بس وداعتج مو مثل العندي خوانه يهونون وضاح صعب طبعه صار سنين معاشرته وادري يحبني بس من يعصب ينسى كلشي وينكلب طنطل علية
زينب / الله يحفظهم بس تردين الصدك ابو محمد هيبه وشخصيته قويه.
ام وضاح صاحت بيهن / ها شبعتن سوالف لا..ولج يمه ليش البت تبجي شو جيبيها يمي.
مريم انطت زهراء لعمتها جانت كاعدة عالقنفه بالمطبخ / لا يبعد رويحتي ليش تبجين شو خابري وضاح يجي ياخذها
تريدو البنت روحه معلكة بأبوها
شوي ودخل وضاح وأحمد /:يلا تحضرن راح نطلع وانت يمه تصعدين بسيارتي لو ترحين ويه ابو محمد.
ام وضاح / وياك بعد گليبي هااا عمامك ياهو يروح.
احمد / عمي رضوان وعمي سبع وولدهم وياهم ومناك نتلاكى بغداد لواء ابراهيم ومعتز وسلام
ام وضاح / اي شايف الخير بعد امك واهلها وذول صحبانك الله يبيض وجهم.
انتبه وضاح لزوزة جانت بحضن جدتها تشاهك ومادة ايدها لأبوها،، شالها يبوس بيها سكتت وخلت راسها بركبته.
ام وضاح / شلون تعلوم هذا يوضاح صارلها ساعه تبجي عليك.
وضاح باس خدها وشمه / اوفيش بنيتي وريحتها ،،
التفتت على مريم / وليش تخليها تبجي انا مو اكلج زوزة تهتمبن بيها اكثرهم.
تقربت وشاورته لان الكل منتبهين عليهم / مو تدري بيها من ادور عليك وما تلكاك تشبع بجي
تمت خطوبه احمد وناديه وعقدوا سيد …ناديه جانت فرحانه وطبعا تغريد وياها ماعافتها .
احمد حيل ارتاح وهو يسمع صوت ناديه وموافقتها
جانت حيل حلوة وانيقه بفستانها الاوف وايت وتسريحه فخمه خلت الكاعدات مسطورات بيها ام وضاح كاعده بصفها ورافعه راسها بشموخ وعينها على ناديه
دخل احمد يلبسها تخم الذهب جان مشتري ويه الحلقات بدون علم اهله وناديه ،، تفاجأوا بتصرفه لان اتفقوا يطلعون سوا يختارون الذهب وبحفله المهر يلبسها بس هو سواها ودخل بعد ما استأذن من الحجي الجان طاير بأحمد الرفع راسه بالجاهه الجايبها ويا كلهم شخصيات وكذا ناس محترمه
احمد عينه مانزلت من ناديه وهو يشوف جمالها ونعومتها من لزم ايدها يلبسها الحلقه.
كمل وباس خدها والكل هلهل وباركله وامه تبوس وتحضن بي فرحانه بي بعدها طلع للزلم
ام وضاح عجبتها ناديه وصافنه عليها ،،
دخل سرمد يركض وذب روحه بحضنها / ماما حلوة .
باسته بخده / فدوه لحبيبي
ام وضاح عيونها نطت وسألتها رأسا / ابن منهو الله يحفظو
ناديه حظنته وهي تكول / هذا ابني حبيبي
بلعت الحجيه ريكها وجها كام ينطي الوان اشرت لزينب اجت كعدت بصفها و شاورتها / اتصلي خل نروح
زينب / عمه بعد وكت خاف فهد يرزلني !!!!
ام وضاح كزت سنونها و حجت بصوت ناصي / لاتخليني اسمط شيب الخلفو ولج اتصلي عليهم.
ــــــــــــــــــــــ
