كم خاب ظني بمن اهديته ثقتي
فأجبرتني على هجرانه التُّهمُ
كم صرت جسرا لمن احببته فمشى
على ضلوعي وكم زلّت به قدم
فداس قلبي وكان القلب منزله
فما وفائي ل خلٍ ما له قيمُ ؟
+
كريم العراقي
+
✨✨✨✨✨✨✨✨✨✨✨✨✨✨✨✨
+
اني وياهه واكفين بالباب الخارجي للقاعه باوعت ليبره وابتسمت:- اني داليا. اصير بنت خاله لفارس ووو
+
سكتت ضحكت بخفوت واردفت :-اني ضرتج حبيبتي…
+
باوعتلها بجمود لثواني عيني رافضه ترمش وضحكت بسخريه:- شنو هالحجي الماصخ اعرفج تعرفيني تتشاقين ويايه بهالاسلوب عيب.
+
وجهتلي نظره واثقه مع ابتسامه خفيفه :- اكيد مراح تصدكين وعرفت مراح تصدكين لذلك جبتلج الدليل ويايه
+
فتحت جنطتها وطلعت ورقه جرت ايدي وحطتها بيها .. فتحت الورقه بدون اهتمام لان الي دتكوله ضرب من الخيال… اجتاحتني برودة غريبه وأني اقرا العقد اسمه واسمها وشهود والعقد قديم قديم من سنوات ..
+
شهكت ووكعت الورقه من ايدي راسي ثكل مثل الي انضرب بطبر بنص هامته ثقل جبير جثم على صدري وكتم انفاسي
+
همست بصوت متحشرج بصدمه والم:- ش.شنو هذا…
+
انحنت وشالت الورقه من الارض طوتها بعنايه ورجعتها بجنطتها:- عقد زواجنه فارس زوجي من ثمان سنوات وشويه..
+
احس كلشي بيه متخدر هذا حلم لو مقلب لو حقيقه لو شنو صدري يرتفع ويهبط بجهاد حتى اتنفس بصورة عاديه ونبض گلبي بسباق حامي
+
رقت نبره صوتها وصارت مغلفه بالاسف على حالها وحالي:- انتي بنيه حلوة وبت ناس وعيله محترمه اكيد مراح تقبلين تتزوجين انسان متزوج تركني بسببج اني مشمورة ببيت اهلي بسببج بس لان شافج وعجبتي احدى نزواته الما يخلصن .
+
اباوعلها بعيون مفتوحه على وسعهن عقلي رافض يستوعب فارس. فارس حبيبي الي سعى وركض ورايه فتره طويله حتى اكون اله فارس الي يباوعلي بنظره ذايبه الي يبوس اصابيعي واحد واحد فارس الي يحير شلون يعبرلي عن حبه
الي يتغنى بعشكه الي ويراهن محد يحبني بگده ..
+
همست متمكسه بثقتي بي:- انتي وحدة كذابه شدتحجين ؟
+
داليا:- اكو وحدة تكذب بهيج موضوع ممكن ينكشف بكل سهوله قابل شستفاد ؟العقد وشفتي بعينج اذا تردين تتاكدين سألي عني منو داليا وشوفي شلون حاله يتبدل
+
:- ليش ديكذب عليه ليش الي تحجي مستحيل. رغم شفت الدليل بعيني بس كلشي بيه رافض يصدك مستحيل فارس يسوي بيه هيج مستحيل يغدرني ويطعني بهالطريقه
+
ما نبست بحرف بس حطت عينها بعيني ونظرتها اخترقتني كأنها تريد تدخل الي ألقته لدماغي وتحشره بي حتى اصدكه هزيت راسي رافضه وانبذ الكلام عن مسامعي وعن استيعابي رجف كلبي واني اشوف الثقه الي بملامحها وعقلي صار يحلل كل تصرف بدر من فارس
كل اختفاء بحجه الدوام
كل تهرب من سؤال عن الماضي
تذكرت هواي من كلامه يثبت كلامها تهربه عن ذكر ماضيه وحياته العاطفيه
من كال بلحظه غضب( حاولت اقنع كلبي بغيرج وماقنع) يعني عنده غيري من الاساس
ممن سألني( عندج ثقه بيه) لان يخاف ينكشف
ومن كال( بحياتي ماردت مرة غيرج ولا حبيت ولا راح احب غيرج) يحاول يثبتلي ميحب غيري بوكت اني ماطلبت منه اثبات ولا سألته
+
داليا:- اترجاج فكري زين وانهي هاي المهزله انقهرت عليج لان انتي مو مثل البنات الي يعرفهن كل فتره وعرفتج بت عالم وعندج بخت وكلت لازم اكلج وانقذج قبل لا يضحك عليج بعدج صغيره وحلوة والف من يتمناج صعبتي عليه والتجأ للخطوبه والزواج حتى يحصلج ويمل منج ويشمرج مثل غيرج
واصلا انتي صغيره عليه شلون قبلتي مادري …حسيت بروحي تنسحب مني ودخت وجسمي صار يتمايل يمنه ويسره..
+
لزمتني تسندني:- شبيج انتي زينه؟
3
جانت اكو كراسي مسفطه جنب بعض على صفحه مشتني الهن وكعدتني عليهن شوفتني صور الهم كاعدين سوة وهي بملابس بيت صور الهم بغرفه نومه اعرفها هاي غرفته يعني صور جديده مو قديمه وهي بصفه بملابس مفتوحه واني صرت ارعش بطريقه مخيفه مادري من هول صدمتي لو من البرد الجاي يدخل من باب القاعه الخارجي
+
ارتبكت داليا من شافت وضعي :- عفيه اني لازم اروح صيحي احد من اهلج يجيج واحلفج بعزيز كلبج لا تكولين عرفتي مني يأذيني ويدمرني
+
هزيت راسي بأيجاب وهي مشت للباب مستعجله رفعت عيني اتبعها شفت الي اسمه سراج يرمقني بنظره حقيره وابتسامه تفوح خبث مرسومه على وجهه اقتربت منه داليا وطلعو سوة واختفوا من مدى انظاري
+
عافوني بنص اعصار جرف كلشي بيه وطشر كياني والافكار صارت تتعارك براسي مثل جنود الحرب معركه موت مابيها احد يطلع سالم
وصرت اعدد الخدعوني واشتركوا ويا بكذبه
نورهان .. ليالي.. امه .. بيبته .. اخته … اهله .. كرايبه وكلمن مشه ويا بخطوبتنه كلهم كلهم اشتركوا بطعنته اليه زين ليش ؟
+
عيوني تفتر بضياع حواليه حضنت روحي حيل اواسي نفسي واني الجنت اظن عيونه ميشوفن غيري اني الجنت اظن حضنه ما حوى غيري طلع مو الي اصلا ليش سوة هيج اريد افهم متزوج شجابك عليه؟ شلون كذب عليه بكل براعه شلون يباوع بعيوني ويكلي ماحبيت غيرج اثاريني صعبت عليه وحليت بعينه ماحسيت على روحي الا زهراء وليالي فوك راسي
+
زهراء:- وين غطيتي يمعودة ادك عليج ماجاوبين شبيج وين تليفونج.
+
ليالي:- شبيج توته وجهج اصفر ….
+
رفعت عيني بعينها اباوعلها وشفتها غير انسانه مو ليالي الاعرفهه وحدة غريبه عليه
+
همست بصوت ضعيف متشضي من الالم:- خابري حيدر يجي ياخذنه..
+
ليالي بأستغراب:- مو كلتي فارس يرجعنا.
+
غثيان اصاب معدتي لمجرد ذكرت اسمه :- اتصلي حيدر..
+
زهراء:- هياته فارس اجه…
+
ارتعشت اكثر واني ارفع راسي اشوفه يدخل الباب الخارجي اباوعله منو هذا ماعرفه منو هذا الممثل الي يستحق الاوسكار جان مبتسم والمفروض عيونه تباوعلي بحب وشوك بس ماظنه حقيقي هذا وهم معيشني بي عكد حاجبه مستغرب كعدتي ووجهي الي ميتفسر
+
صار مقابيلي سلم عالبنات وحط ايده على كتفي:- شلونه الگمر ضاوي
+
لمسته جانت اقرب للصعقه الكهربائيه خلتني انتقض مبتعده عنه
+
وكفت اريد ابتعد عنه مو كادره اسمع منه حرف مو كادرة اشوف وجهه
باوعت لليالي وصكيت سنوني كلماتي تطلع مشدودة من بين شفاهي:- كتلج اتصلي بحيدر يجي ياخذنه
+
فارس بأستغراب:- شبيج حبيبي..
+
تهربت من النظر بعيونه عبالك اني المسويه ذنب مو هو :- مابيه بس تعبانه دايخه اريد ارجع للبيت
+
اقترب مني حاوطني بأيد والثانيه يرفع وجهي من حنچي:- اوديج للمستشفى دايخه
+
بلكوة اتحملت لمسته احس كلشي بي كذب لمساته واهتمامه كذب هزيت راسي ب(لا) وصوتي طلع واهن:- بس اريد انام بفراشي
+
حاوط اكتافي بيديه ودارني يمشيني:- امشي حبيبه اوديج للبيت انتي تعبتي هالفتره اعراس وهوسه وحبيبي نازك ورهيف ما يتحمل تعب كبل يذبل
+
داهمتني رغبه بالتقيوء هو شلون يكدر يمثل بهالاتقان؟
محاوط خصري بتك ايد ساندني واني احس روحي بلشت تنسحب مني
فرقت شفايفي اريد اخذ نفس غمضت بتعب ورخيت جسمي بعد ما اكدر اتحامل على نفسي اكثر اخر شي اذكرة لزمه فارس القويه الي من وكعت ……
+
فتحت عيني اني بالسياره بحضن زهراء رفعت راسي دايخه وارجف
+
زهراء بقلق:- توته شجاج تعبانه يلا هسه نوصل المستشفى
+
اندار فارس بسرعه وهو يسوق :- حبيبي شتحسين دايخه ؟
+
هزيت راسي رافضه المستشفى وصوتي بلكوة يطلع احس مخنوكه ماكدر اتنفس:- لا ودوني للبيت اريد انام
+
ليالي:- بس يحطولج مغذي علمود الهبوط خاف ترجعين تتخربطين نص الليل ..
+
:- ماريد عفيه رجعوني رجعوني للبيت
+
هتف فارس بنفاذ صبر :- ماكو للبيت شني هسه هذا العناد نحطلج مغذي ترتاحين وارجعج للبيت
+
:- مابيه شي مابيه شي اريد بس انام..
+
فارس:- ياهي المابيها شي ؟منو توهه ماعت روحها بيدي امي؟
+
سكتت ماريد احجي ويا اكثر وحطيت راسي على رجل زهراء وغمضت احس اريد انام راسي ثكيل بشكل ماعرف شكد مر وكت حسيت جاي انسحب من مكاني فتحت جفوني عالنص شفت روحي بين ايده شايلني وراسي مسنود على صدره لامني حيل بحضنه يدخلني للمستشفى وزهراء تلملم بفستاني من يم رجليه
+
دخلوني للطوارئ شبه فارغه مغمضه رافضه اشوفه ويطعني بكذبه وتمثيله اسمعه يشرحلهم عن وضعي حسيت عالممرضه تجر كف ايدي بخفه حتى تحطلي كانيولا فتحت عيني ابتسمت الي
+
الممرضه:- ها حبيبتي الف سلامه يحلوة …. جبرت نفسي ابتسم مجامله الهه ورمشت بعيوني بأمتنان البنات محشورات يمي وفارس ساد البرده التفصلنه عن باقي ردهه الطوارى وواكف يمها يباوعلي صرت حتى ماعرف افسر نظراته حقيقه لو كذب .. قاست ضغطي وسكري وكالعاده هبوط حطولي مغذي وفارس طلب من البنات يوديهن لسياره منظرهن ولبسهن مو مال يبقن والمكان ضيق
بالبدايه زهراء رفضت بس ليالي قنعتها وداهن بسرعه ورجعلي سحب الكرسي قريب مني واني نايمه صفح صار مقابيلي باوعتله وعيوني غدرتني ودمعها اتبدى على وجناتي.. بيه صرخه تهد جبال
+
فتح عينه بقلق وامتددت ايده يمسح عيوني بخفه:-ليش البچي يا ماي العين يوجعج شي؟
+
همست بنبره مكسور منه متشضيه واني اشوف حياتي صارت كومه قش تطشرت بهبه ريح :- تعبانه .. اريد كرار …
+
ابتسم بعطف:- وانه وين رحت ولج علويه لا تحركين كلبي انه يمج وتكولين اريد كرار؟
+
رفعت نفسي بوهن :- عفيه خل نطلع اريد ارجع للبيت شيل بطل المغذي ويكمل بالطريق اهلي يظل بالهم
+
يباوعلي بحيرة مستغرب تصرفاتي بس ماحجه لان ديشوفني تعبانه
+
فارس:- انطيتهم خبر ورادو يجون بس طمنتهم انتي زينه مو مثل ذيج المرة
+
كعدت ونزلت رجليه من حافه السديه اقترب مني وحاوط وجهي بيديه ورفعه بمواجهته :- شبي گليبي حزين ليش البجي بنيتي..
+
هتفت بنفاذ صبر :- انت ليش مدتفهم اريد ارجع للبيت تعبانه تعبانه
+
حواجبه ارتفعن بذهول:- ياقووت؟ عليمن تصرخين شبيج بويه كومي اوديج مادري بيج طنكورة من تتمرضين..
+
درت وجهي عنه وماحجيت شال بطل المغذي المعلك رافعه بيد وبيده الثانيه ساندني حيلي مهدود فارس هد حيلي مجاي استوعب الجاي يصير يعني يحبها مثلي .. يحضنها .. يغازلها.. ضحكت بسخريه بداخلي على نفسي من منو داغار؟ من مرته اني الدخيله مو هي… صعدني بالصدر والبنات يسألوني اذا زينه اكتفيت بأيماء براسي … علك المغذي بالمرايه وحرك السياره رجعت ظهري مرخيه جسمي ودايره وجهي ناحيه الجامه ودموعي تنزل بصمت عجزت اوكفهن
+
وصلنه البيت ونزلن البنات باوعتلي زهراء بأستفسار:- روحي هسه انزل
+
انصاعن لطلبي وفاتن جوة انداريت عليه :- باجر تجي لو هم تكذب عليه
بهاي
+
فارس :- بشنو مجذب عليج حتى اجذب عليج بهاي..
+
بلعت ريكي امنع نفسي اكله كلشي عرفت وانت اكبر مخادع عرفته بحياتي :- هوايه كلتلي اجي وما اجيت..
+
فارس :- حبيبي مو تعرفين دوامي مطلع عيني ليش انه ماريد اگابل هالوجه الحلو ..
+
باوعت للمغذي خلص .. سد جهاز الاعطاء وفصله عن الكانيولا الي بيدي اخذ كلينكس من الباكيت وشال البلاستر من الكانيولا وضغط بالكلينكس وطلعها من ايدي
+
فارس:- اجر وعافيه حوريتي…
+
:- خل انزل هسه ماما ظل بالها تستحي تطلع.. نزلت عالسريع وسديت الباب فتح الجامه وصاحني
+
فارس:- ياااقوت!!
+
انداريت عليه:- ها؟
+
ايتسم بعذوبه:- احبج…
+
ابتسمت غصب ابتسامه كاذبه وردت اندار صاحني مستغرب:- ما انطيتيني بوسه وعبرناها انوب ماكو احبك؟
+
:- باجر اكلك … ابتسم واني عفته ودخلت سديت الباب شفت ماما واكفه بباب المطبخ الخارجي اجتني بسرعه
+
علويه نهله:- شلون صرتي…
+
ذبيت روحي بحضنها وبجيت بصوت عالي اثار قلقها
+
علويه نهله:- ولج شبيج يمه …
+
بصوت متقطع جاوبتها:- ماما تعبانه راح اموت اريد اموت
+
علويه نهله:- اسم الله ماما لا تكولين هيج
+
على صوتي اجو كرار وبابا
مهبوطين عليه هتفو اثنينهم بنفس الوقت
+
سيد حسن:- اسم الله بابا شبيج؟
+
كرار:- توته شبيج ..
+
مسحت وجهي :- مابيه لتخافون بس راسي يوجعني وبچيت اسفه خوفتكم
عفتهم بحيرتهم صافنين لحكني كرار وصعدني الدرج حاضني كلتله اريد ابدل تركني يم باب غرفتي ونزل دخلت و قفلت الباب نزعت حجابي شمرته والفستان كورته وحطيته على وجهي اكتم صوتي واصرخ بچيت حد كطع النفس
+
ويومها قفلت تليفوني و جفني ما غمض لصبح ودموعي ما نشفن ظليت اتلوة بفراشي والف ليش براسي نار بصدري شاعله لا تبرد ولا تطفى لشوكت ناوي يظل خافي عني حقيقته لشوكت يباوع بعيني ويجذب بدون ما يرفله جفن معقوله ما انقهر عليه زين ليش اريد اعرف ليش شسويتله
لمعت براسي ذكرى من اخذني لبيته عنوة وسوة عندي انهيار عصبي من عرف بخطوبتي من سيف يعني معقوله رجع حتى يضوكني نفس الالم حتى ينتقم مني معقوله كل هاي الفتره هو بحرب بارده ويايه حتى بعدين يطعني علقني بي وغركني بحبه واهتمامه وغزله لمساته وبوساته كلهن تمثيل وهو يوميه ينام بحضن مرته كم مرة سده مني وراح لحضنها بحجه الواجب ؟ كم مرة كاللها احبج عقلي صار ينسج مشاهد غراميه الهم سوة صرت اتخيله حاضنها بين ايديه وانطحن بالغيرة مثل حفنه شعير بالرحى ينطحن على البطيء وبتعذيب
+
فتحت باب غرفتي الصبح وتوجهت للحمام وبعز البرد سبحت بماي بارد اشهك من برودة الماي التلسع جلدي بس ناري مجاي تطفى ولا تهفت اريد امرض روحي حتى التهي عن مرض گلبي اختلط المي ويه دموعي المخذوله
عجبي على عيوني ما نشفت ولا خلص دمعها من البارحه رجعت لغرفتي انشف بروحي واضغط على كلبي احسه راح يوكف واتمنيت يوكف صدك واخلص الظاهر اني ما مكتوبلي الفرح ابد وحظي ويه جنس ادم عاثر واحد دخل حياتي عنوه واذاني جسديا ونفسيا وعنفني باكثر من طريقه والثاني اتسلل لحياتي بخبث سرق مشاعري وامتلكني حتى يغدرني
شراح اكول لاهلي شلون راح اواجهه اليوم هو الغلطان واني الخايفه وبنص كل الهوسه الي بدماغي عندي امل كلشي يطلع كذب وداليا مو مرته…
+
لبست بجامه سوده وبلوز ابو الرگبه وردي مشطت شعري وهو ينكط مي وصرت اذب حركتي بي ملخته وهلسته بالمشط لميته بدون ما انشفه اعاقب روحي على خيانته وتسألت بسخرية هو خايني اني لو خاينهه هي؟
+
مانزلت لا للريوك ولا الغده وعافوني براحتي عبالهم مثل كل مرة اتخربط اظل اليوم الوراه اعتزل وزهراء تجيبلي اكل لغرفتي
+
ماحطيت لگمه بحلكي ومگابله الساعه انتظره يجي بعد ما اصبر .. راسلته استعجله وكل ظنه من شوكي جاي استعجله وراح استقبله بالاحضان
+
دخلت زهراء عليه ورفعت حواجبها مستغربه شكلي:- فارس اجه اشو لا مبدله لا شي وشعرج بعده رطب شبيج توته من بارحه وضعج مگلوب..
+
كمت وكفت وكلبي يرجف بخوف من الراح يصير
همست وآني اعبرها :- شويه انوب تعرفين شبيه
نزلت ورجليه احسهن هلام بلكوة واكفه عليهن دخلت للمطبخ وطلعت باكيت عصير من الثلاجه وشربته بسرعه محتاجه حيلي ومحتاجه اكون بكامل وعيي ماريد اتخربط كرهت ضعفي ولعنت سيف ولعنت حظي الجاب فارس بحياتي
+
فتحت باب الصاله بيد ترجف وصوت نبضاتي عالي بأذاني
الولد ماكو بس بابا كاعد ويا وكف من شافني
سيد حسن: – يلا اعوفكم تسولفون شوي، ودخل جوة …
+
سديت الباب اقتربت منه وكف مبتسم وعيونه تفتر على شكلي عض شفته فارس:- حتى بهدوم البيت تكتل كتل..
+
راد يبوسني درت وجهي رافضه وكعدت
+
باوعلي بصدمه:- شصاير؟
+
:- اكعد اريد احجي وياك
+
كعد بصفي ومد ايده لقراصتي فتح شعري بحركه سريعه وصار يمشط بي بأصابعه:- ليش عايفته رطب هيج تتمرضين ..
+
لزمت ايده الي بشعري ونزلتها باوعت بعيونه ضايعه خايفه مرعوبه حسيت هاي نهايتنه هنا وهذا حدنه سوة
+
باوعت بعينه اريد اشوف رده فعله هم راح يكذب:- فارس انت ليش خطبتني؟
+
لزم خصله من شعري حطها ورا اذاني وابتسم بعذوبه:- حتى اعيش.
حتى اتنفس حتى هذا الگلب يظل ينبض شبيج اليوم يشرياني ؟
+
سألته بصوت يرجف:- لشوكت ناوي تضم عليه؟
+
عكد حواجبه:- شضام عليج؟
+
نزلت راسي اباوع لحلقتي وصرت افرها بأصبعي رجعت باوعت بعينه التباوعلي بفضول وهمست:- داليا شلونهه
+
جمد لثواني وراهه فلت وجهه ونبض صار يتحرك بخده انتظرته يكلي داليا منو بس ما صار وعيونه فاض بيها الذنب بلع ريگه وهمس :- منين تعرفيها؟
+
نزلت دموعي مثل جمرات يطيرهن الهوة ويحركن المكان اليوكعن بي ونغزات الم صارت بصدري :- يعني صدك مو چذب؟؟
+
راد يلزمني من اكتافي وكفت منتفضه وابتعد عنه ودموعي صارت تتسابق
+
راد يقترب مني واني اهز راسي رافضه وصرت ارجف مثل السعفه صوتي يخرج على شكل كلمات متقطعه واحس الكلمه توجعني:- متزوج .. انت متزوج ليش سويت بيه هيج فهمني
+
قبض على اكتافي بقوة وعيونه تتوسلني نبره صوته متعذبه:- وعيونج ردت احجيلج بس ماكدرت .. خفت تطيرين من ايدي بعد ما حصلتج بالكوة
+
حاولت ادفعه بس متمسك بيه بأستماته:- انت شدتكول شنو ردت احجيلج ؟؟انت متزوج وخر عني ..
+
فارس:- حبر على ورق وعيونج بس اهدي وخلي احجيلج وراح تفهميني
+
ضحكت من بين دموعي بسخريه:- حبر على ورق هههه حبر على ورق ماكو شي اسمه حبر على ورق هذا زواج مو فلم هندي باوع ماريد اسمع حرف منك ولا مستعده اسمع اي تبرير لان لو تجمع تبريرات الدنيا كلها ما تشفعلك
+
لزمني من وجهي بأثنين ايديه وصار يلهث:- ياقوت انتي هي حبيبتي انتي مرتي انتي زوجتي ماكو غيرج صدكيني منو كلج فهميني منين عرفتي؟؟
+
ثار جنوني وصرت اضرب بصدره وادفع بي صرخت بقهر بخذلان بشعوري بالخيانه والاستغفال:- هذا الهامك هامك شلون عرفت وعايف المصيبه الاصليه هسه تطلكني كدام بابا واخوتي وروح ماريد اشوفك ماريد المحك اختفي من حياتي انت واحد كذاب مخادع خاين اني ولك اني تسوي بيه هيج
+
فارس :- حبيبي بس اسم…
+
صرخت بصوت اعلى:- لا تكول حبيبي كافي ميحتاج تمثل بعد انكشفت وشفت حقيقتك ولعبك …
+
صك على اسنانه بغضب:- خليني احجي واسمعي ردت ارده
رفع ايده صم شفايفي وبيده الثانيه لازم راسي من ورة يثبتني :- زواج حقيقي ما متزوج وماكو غيرج مرة احسبها مرتي شغله سويتها من سنين بس حتى احل مشكله وما يصير دم لا واصلها ولا متقرب منها ولا شي ماكو غيرج مرة توسدت حضني اعترف غلطت ما كلتلج بس ماردت اخسرج وجنت ناوي اكلج ورا عرسنا ..
+
باوعتله بصدمه بعده يكذب واني شفت صورهم بعيني سوة مستمر بتمثيله وعرف يرتجل سيناريو سريع حتى يطلعه من كذبه
+
بعدت ايده المغطيه حلكي وهمست بعذاب:- كذاب .. انت واحد كذاب .. دفعته ولزمت حلقتي اريد اقلع حتى اصبعي وياهه احسها تخنكني اريد اشمرها بوجهه لزم ايدي يمنعني
+
فارس:- ما تنزعيها والحسين ما تنزعيها
عصر ايدي حيل حسيت بالحلقه تحفر بيدي نترت ايده وانداريت ناحيه باب الصاله نيتي اصيح بابا حاوط بطني باثنين ايديه وجذب ظهري لصدره احس روحي راح تطلع مني من قهري وكسرتي بي
همس يم اذاني بتوسل:- اسمعيني ولا تخربين كلشي بعد چم شهر عرسنا ولج ماعندي غيرج وحك هو علي ماعندي غيرج
+
صرت أصارعه اريد بس افلت من ايده بس قابض عليه مثل الكلبچات غمضت عيني حيل وحجيت بخيبه:- كل الكلام ما يغير الحقيقه انت متزوج وقبل لا تعرفني بسنين واتعمدت تخفي عني حقيقتك بكل مهاره واتقان وكل الحواليك شاركوا وياك وماعرف شلون قنعتهم بس اني ما اقنع بكلمتين حب ماينعرف صدكهن من جذبهن ومو اني الاتشارك ويه مرة ثانيه هدني ماريد اصرخ والم كل اهلي وخلينا ننهي هلمهزله بگاعهه
دارني لمواجهته بعنف ضغط على اكتافي بقوة المتني ورفعني يقربني منه ويباوعلي بغضب لاهب
+
همس بغضب مكتوم:- شتردين تنهين ؟
+
باوعتله ببرود عكس جهنم الجاي تاكلني بصدري:- لعبتك هاي ننهيهاوتطلگني وتروح ترجع لمرتك اني مستحيل اصيرلك مرة
+
شفت عينه تتوسع برفض :- كلتلج احجيلج كلشي وسالفه اطلك هاي لا تفكرين بيها اصلا احتمال غير وارد
انه اكعد كدام اهلج واحجي كل الصار ونحلها ..
+
جذبت روحي من ايديه وابتعدت عنه:- حل غير طلاكي ماعندي
توجهت للباب وفتحته مشيت بسرعه لغرفه بابا ودكيت الباب سمحلي بالدخول فتحت الباب ودخلت بابا متمدد على سريره بيده كتاب نزع نظاراته يباوعلي مصدوم شعري مفلول ووجهي متروس دمع وارجف
+
سيد حسن:- شبيج بابا شصاير ليش هيج حالج؟
+
رجفن شفايفي وصرت اشهك:- بابا تعال للصاله اكو حجي لازم تعرفه انت واخواني
+
دخلت ماما الغرفه والمنشفه على راسهه توهه طالعه من الحمام تباوعلي باستغراب
+
علويه نهله:- شبيج ليش تبچين
+
مسحت وجهي :- بابا يلا قبل لا يروح .. طلعت ورجعت للصاله فارس كاعد ومنحني ليكدام لازم راسه بأثنين ايديه
سمعت بابا يصيح الولد ودخل للصاله كعدت بعيد عنه قريب الباب وتحاشيت النظر اله مستحيل اضعف اله اني المخدوعه هنا اني المغدورة والي انضحك عليها
+
دخل مصطفى وراه حيدر وكرار محمد ماموجود من بارحه ما اجه للبيت ومجتبى بعده ماراجع من الشمال هو وبنين
+
سيد حسن:- شنو الصاير.. ابني شبيكم وليش بنتي هذا حالها واحد منكم يحجي
+
رفع راسه من بين ايديه وعينه صارت بعيني اترجاني بصمت ما احجي تحمحم وكال بصوت منخفض:- ماكو شي عمي زعل حبايب انه زعلت العلويه وانه الي ارضيها واستسمح من..
+
قاطعته وحجيت بأندفاع :- فارس متزوج بابا .. متزوج بنت خاله من سنين واحنه مندري المي يجري من جوانه …
+
صمت مطبق سيطر على المكان الكل رافع حواجبه بذهول من الي القيته على مسامعهم
+
صوت حيدر كسر الصمت وهو يوجه كلامه لفارس:- فارس!!!! الجاي تكوله ياقوت صحيح؟؟؟
+
غمض عينه بتعب ورجع فتحها موجه نظرات عتاب الي :- اي صح .
+
تعالت الأصوات مصطفى يصيح وحيدر يستفسر وكرار يلوم وبابا ساكت
+
وكف فارس على حيله متجاهل الكل ووجه كلامه لابوي:- عمي عندي اسبابي وعندي اعذاري ومستعد اشرحلك كلشي
+
باوعلي بابا وصاح بالولد يسكتون ووجه كلامه لفارس:- يا اعذار وانت متزوج ؟
+
فارس باصرار:- مو زواج الي ببالكم اسمعني ولا تظلمني.
+
باوعلي بابا وسألني:- وانتي شتردين بابا؟
+
همست بأصرار:- ماراح اسمع ولا اريد افهم الحقيقه وحده
هو متزوج وكذب علينا شفايده الاعذار بعد مراح يتغير شي والاريده هو الطلاك..
+
باوع بابا لفارس بينما اني اتجاهلته حجه بصوت مكتوم ومتحكم بغضبه هذا بابا باسوا المواقف يتحكم بغضبه:- روح ابني اخوتها نصهم مو هنا وچبيري ما موجود الحجي يصير بحضور الي اجو وياك ودگوا صدورهم وكفلوك وانطيتك مرة كدامهم جيب عمامك وتعال
+
مصطفى:- بووويه لا تبرد السالفه توك سمعته يكول متزوج خل يطلكها ويروح ماعدنه مرة اله …
+
حجه فارس بثبات:- طلاك ما اطلك مرتي اريدها
والي يريده عمي حق باجر انه وعمامي يمكم وتسمعون كلشي زواجي من بت خالي حبر على ورق والبنيه ببيت اهلها ما واصل يمها
+
كمت وكفت وعفتهم بهوستهم وطلعت وسديت الباب طبكت جفوني بقوة وذبيت حسرة شثكلها شفت امي وليالي وزهراء يم الباب ومبين على وجوههن سمعن كلشي وعيونهن متروسه شفقه ذبحتني
+
وهاجر واكفه عالدرج مبتسمه ابتسامه شماته جانبيه عبرتهن ووكفت ورجعت وكفت كدام ليالي
+
همست بقهر ودموعي تنزل:- حرامات اعتبرتج بيوم اختي ….
2
غوركت عيونها بالدموع وهمست :- والله ردت… رفعت ايدي امنعها تكمل
+
:- كلشي ماريد اسمع وكولي لابن عمتج يطلكني ولو يموت ما ابقى ويا .. عفتهم وصعدت الدرج واكيد هاجر مراح تعديها بدون تعليق
+
همست بخبث:- حيل فدوا لعينك ربي ما تطك بحجار راح تطلكين مرتين…
2
عبالها اسكت متدري النار بيه اذا اطلعها احرك شكو شي يجي كدامي ابتسمت من بين دموعي وشاورتهه باذانهه:- اي صح ربج ما يطك بحجار حفرتيلي تالي ربج طيح حظج ورجلج تفله ما يتفل بوجهج مبقيج خدامه لجهاله وكلبه مو وياج اني اهلي كلهم وياي ..
عفتها بصدمتها متعودة تسممني واسكت الها ماتوقعت ارد عليها بهذا حالي
دخلت غرفتي وقفلت الباب دكت زهراء الباب حتى افتحه تالي ايست وراحت واني كعدت بنص فراشي وصافنه بحياتي الي انهارت بالليله ويوم والايام الوردية العشتهن كم شهر طلعن حلم وهسه صحيت منه
جفني تاخ من البجي والدموع حفرت مسارها على خدي رجع اندك باب غرفتي واجاني صوت كرار من خلفه
+
كرار:- توته فتحي الباب احاجيج راح والله راح طلع من البيت
+
صرخت بقهر:- عوفوني بحالي عوفوني لا احرك روحي .. تعالى صوت نحيبي ولطمت على وجهي بقهر وحسيت نفسي راح اموت وماكدر اجر نفس والم قوي صار بصدري كلت هاهيه راح انجلط واموت صرت اشهك وصوت غريب يطلع من صدري مثلي الي يصارع حتى ميغرك والرعب استولى عليه كمت اضرب على صدري حيل وكرار صار يدك الباب بعنف ماعرف شلون وصلت الباب وفتحته لزمني من اكتافي طلعني ويصيح على امي اباوعله بعيون متوسعه اريد اتنفس ماكدر وكلبي يوجعني ارتبك وماعرف شيسوي ظل يضربني بخفه على وجهي انرشك مي بوجهي ماعرفت مصدره وغابت روحي لثواني وفتحت عيني بتعب مصطفى منومني صفح ويدك على ظهري بخفه ويغلط ويسب بفارس
+
حيدر:- هسه هذا شنو الصار بيها خلي نوديها
+
مصطفى:- نوبه هلع لان انقهرت من ورا هذا ال.. استغفر الله هسه تنام وترتاح ولا تطلعون صوت ولا تحجون كدامهه
+
كرار:- اجت تموت صارت زركه خل نوديها؟
+
مصطفى:- هواي اشوف مثل حالتها يجون للمستشفى بس يهدون تروح منهم مراح يسوون شي الها
1
كومتني ماما تسمح بوجهي دخلتني الغرفه وزهراء رفعت الغطه ذبيت روحي على الفراش وغطتني
+
همست بوهن:- عوفوني وحدي..
+
ما عارضن طلعن وسدن الباب
نمت كالعاده اهرب من كلشي يأذيني بالنوم شفت احلام وكوابيس مخربطه قلقت نومي فتحت عيني الغرفه تسبح بظلام شكد نايمه اني ؟احس روحي خارطه من الجوع وحيلي بايد وراسي يوجعني فتحت تليفوني المقفول داشوف الساعه وانهالت عليه الرسايل من فارس والمكالمات الفائته ساعه ب١٢ ونص سويته صامت بعده بيدي دك عليه اكيد وصلته رساله متاح حاليا حتى الشركه متعوفني بحالي
+
تركت التليفون وكمت غسلت وجهي ونزلت البيت سنطه دخلت المطبخ لكيت ماعون مغلف بنايلون شفاف بي اكل الي اكلت منه شويه وحسيت كل لكمه تنزل مثل التيزاب بمعدتي تركته وشربت عصير عيني صارت على سياره محمد بالحوش يعني جاي فتحت باب المطبخ ولمحته نفس كعدته الي يكعدها بالحديقه البرودة توصل للعظم وهو كاعد بتيشيرت نص ردن اقتربت منه وجريت واحد من الكراسي وكعدت بصفه رفع راسه يباوعلي
+
همس بصوت متحشرج:- ها توته كعدتي .. اجيت عليج مساعه نايمه ماحسيتي عليه ..
+
اختنكت بغصه :- حجالك بابا؟
+
هز راسه بأيجاب:- حجالي يصير خير باجر والتردي يجرالج
+
همست :- اريده يطلكني.
+
محمد:- شي منتهين منه هذا بس خلي ببالج ماظن يطلك بسهوله راح يناطح ويانه واحتمال نحتاج نرفع عليه دعوه بالمحكمه..
+
رجف كلبي وعيوني دمعت نزلت راسي بقهر:- جان لازم اسمع كلامك من البدايه انت جنت رافض..
+
مسد على شعري بعطف:- وانتي شمدريج تشمين گفه ايدج باجر يجي ونفهم منه شني السالفه وراهه يطلك ويروح خطبه وما تمت وانتي بنفس مكانج وبيت ابوج وما تغير شي
+
حطيت ايدي على وجهي وانتحبت حد كطع النفس
سألني بنبره عطوفه:- تحبي؟
2
مسحت وجهي بردن بلوزي وخجلت احط عيني بعينه سكتت عن الكلام وصوت شهكاتي بس الينسمع
+
رجع كرر سؤاله :- تحبي ؟ ترا ما جاي اسألج عن صاحبج اسألج عن رجال هو شرعا وقانونا زوجج وصارلكم بالاربع اشهر مخطوبين اكيد تصير عندج مشاعر
+
سخرت بداخلي اخ لو تعرف يا محمد اختك من شوكت تحبه اخ لو تعرف صارلي فوك التلث سنوات احبه وعساس هو يحبني لو تعرف شكد شكيت لمخدتي وسكيتها دموع حبه وشوكي اله من جان بعيد عني اثاري دموع البعد اهون من دموع الغدر ياريتني ارجعلها وابجيله بعد واشتياق ولا كعدتي هاي ابچي قهر وخذلان
باوعتله بعيون محمله سحاب متروس دمع عرف جوابي ابتسم بأسى وزم شفته بأسف على حالي
+
محمد:- ما اكلج لا تنقهرين هالكلمه تافهه انه بيه نار وغيره كطعت جوفي وذر على وحدة مو الي كيف انتي؟
+
غريب الحديث البيني وبين محمد اثنينه مجروحين وكاعدين نشكي لبعض ومن شخصين يحملون نفس الدم واسم الاب الظاهر صابتنا اني ومحمد لعنه هذه العيله هو احترك بحب صامت من طرف واحد واني دخان ناري علت وورجت الدنيا عليه وفضحتني
+
رفعت وجهي لسمه وغمضت همست بتمني:- ياريت اكدر اروح هسه يم ييبي اسينات واضم روحي يمها بس الدوام رابطني
+
محمد:- واجهي الهروب مو حل .. لشوكت تظل اعصابج هشه صيري قويه توته لج انتي محاميه باجر عكبه توكفين كدام قاضي هم ترجفين وتبچين اريدج نچرة محد يكدر يكسرها كومي يلا غسلي وجهج
+
كام ولزم ذراعي يحثني اكوم ويا حضني حيل وطبطب على ظهري بخفه باس راسي وهمس:- تنحل وعيونج وما يصير الا التردي
+
شهكت متمسكه بي:- راح يحجون عليه بكل العشيره على مرتين تطلكت مراح تخلصون من كلامهم .
1
دفعني عنه وعكد حاجبه:- الي يحجي ويفك حلكه اشگه اله عسى ما عشر مرات بنيتنه غاليه ما نشمرها علمود حجي العالم انه الي ادافع عن المظلوم اظلمج؟ ظلمتج مرة ومستحيل ارد اعيدها
+
رجعت حضنته ودعيت ربي يخلي الي ويبرد كلبه تمشينه ودخلنه المطبخ غسلت وجهي وتوادعنه هو دخل غرفه المكتب واني صعدت غرفتي
ظليت صاحيه للفجر اتگلب على نار هاديه دماغي واكف وكلبي يوجعني حبه يوجعني احبه وماتخيل احب غيره ما اتخيل نفسي بحضن ثاني بس السواه ما ينغفر وكرامتي وجعتني حيل سألت نفسي هو يحبني صدك لو مثلما كالت داليا نزوة وصعبت عليه وكل صعب مريود وصرت تحدي اله وراد يجيبني بأي طريقه شنو جان ناوي يتزوجني وراهه يشمرني ؟ الف سوال وحتى الاسئله والتكهنات المو منطقيه فكرت بيها
اتذكر بسمته وعيونه التلمع من يباوعلي يحسسني بس اني انثى بالدنيا وماكو غيري وماكو احلى مني يعني هذا كله لعب ؟ وهو عنده زوجه من سنين حسيت بتعب والم دب بكل جسمي عرفت نفسي راح اوكع طريحه الفراش وصرت اون بألم من الحراره الي كسحتني ادراكي غاب عني مدري نمت مدري فقدت ماعرف شصار بس حسيت على كمادات بارده على جبيني شهكت من برودتهن كل شويه اسمع صوت واحد من اهلي يم راسي بس مابيه احجي عيوني عليهن ثكل صاحتني ماما وهي تبدل الكماده الصارت نار بثانيه بارده
+
علويه نهله:- توته كومي ماما بس شربي شويه شوربه واخذي علاج.. هزيت راسي بضعف وكل الي طلع من بين شفاهي انين خافت رافض بعدت الكماده عني وسندتني هي وزهراء وحطت مخاديد ورايه
حاولت زهراء تشربني كم خاشوكه اتجرعتهن كوة وحسيت معدتي گلبت اشرتلها راح اتقيأ عسريع جابت سله المهملات وفتحت غطاهه وخلتها كدامي تقيات مرارة وكل الي ببطني وصرت ابچي شربتني مي ومسحت وجهي ورجعت مددت انطتني حبايه بلعتها ونمت رجعت حسيت على وخزة الم بظهر كف ايدي فتحت لكيته مصطفى يحطلي كانيولا ضربني بيها ابره وعلكلي مغذي رثيت حالي وكرهت هشاشتي اني ليش هيج اتمرض من انقهر ليش حتى صحتي تخذلني
من بعد الابرة والمغذي حسيت حالي انتعشت شوي الحرارة خفت والرجفه راحت دخل كرار وجهه احمر ومبين عصبي سد المغذي وشاله وعاف الكانيولا بيدي
همس بغضب مكتوم:- خليها ما اشيلها الج خاف تحتاجين علاج سكت لثواني وسألني:- تكدرين تنزلين ابوي يريدج جوة ..
+
:- ليش؟
+
كرار:- هذا فارس هنا هو وعمامه وبابا يريدج تنزلين انه واخوانج ما رضينه بس بعد السيد يحكم …
+
هزيت راسي بأيجاب:- عادي انزل .. كمت تمشيت للحمام غسلت وجهي باوعت لروحي وجهي اصفر وعيوني داخلات بنگرة وشفايفي يابسه بدلت بجامتي وبلوزي ولبست صايه وربطه اختاريتهه لا على التعيين هيج جريتها ونزلت ويه كرار
فتح باب الصاله وايده بظهري دخلت عيني بالكاع وكلبي ينبض بسرعه جامحه.. بلعت ريكي وسلمت بخفوت وكعدت على كرسي التخم الي يم الباب .. مارفعت عيني ولا باوعتله عمامه اربعه ويا
حجه ويايه احد عمامه صوته جهوري وعالي :- شلونج علويه طيبه ان شاءالله
+
هزيت راسي بأيجاب:- بخير الله يسلمك..
+
حجه ويايه بطريقه محترمه لكن الي طرحه ما عجبني:-
، أنه حاب أحچي وياچ من عم لبنيته ان شاءالله الاريده منج لا تستعجلين بالقرار. إنتي هسه زوجته شرعاً، والقرآن الكريم گال: (وإن خفتم شقاق بينهما فابعثوا حكماً من أهله وحكماً من أهلها إن يريدا إصلاحاً يوفق الله بينهما). يعني حتى إذا صارت مشاكل، رب العالمين يوصينا أول شي بالإصلاح.
+
والنبي محمد ﷺ گال: أبغض الحلال عند الله الطلاق
+
جاوبته وعيني بحضني:- صح ابغضه بس مو حرام وما انوجد عبث هو حل للامور المابيها صلح واني اريد اتطلك
+
استغفر ربه وكال:- اغزي الشر يا بنيتي رجلج يريدج وترى الحياة الزوجية من أولها تحتاج صبر وتحمّل، وبعدها تصير العشرة تخلي الوفاق يزيد والفوارق تختفي
+
أرجوج تفكرين بالعاقبة، وخلي نطي مجال للكلمة الطيبة، الله گال: (وجعل بينكم مودة ورحمة)، والرحمة ما تگوم إلا بالصبر والتسامح.
أتمنى منچ تهدّين وتخلّين مجال للصلح، والله يكتب الكم الخير، ويجمعكم عالنية الطيبة.”
+
صوتي رجف ودعيت ما تخذلني دموعي وتنزل:- ابنكم خدعني اني واهلي وما جاب طاري زواجه وما انطانه الحق انقرر وهسه من حقي اقرر اني مو مستعده ولا مجبورة انحط ويه زوجه اخرى ولا اكدر ادخل بخطيه زوجته واكله طلكها حرام عليه بس من حقي اطلب حريتي وطلاكي
طول الحديث فارس ما حجه بس من طلبت حريتي ثارت اعصابه
وهتف بصوت غاضب ورافض
+
فارس:- طلاك ما اطلكج لو تنطبك السمه عالارض انسي .
+
صدت عيني بعينه وانهار تماسكي مال راسه
يباوعلي بعيون متوسله تجاهلتها ودنكت راسي ووكعن دموعي بحضني
+
رجع عمه يبرر:- سالفه بنيه خاله فهي زوجته على الورق لمشاكل قديمه حدثت وفارس جان طباب خير وعقد عليها وماتت السالفه وراحت حتى محد يذكر هو عاقد عليها
+
ضحكت داخلي بمراره مستحيل اصدك هالشي واني شفتهم بعيني بغرفته بالصور باوعت لمحمد استنجد بي وفهم نظرتي
+
محمد:- الله بالخير عليكم جميعا الكل رد عليه …استرسل. العلويه متريده ونفسها طابت منه وهالشي من حقها مهما كان عذرة لزواجه هذا شي ميخصنه الاساس واحد هو اكو زوجه اخرى على ذمته على الورق مو على الورق ،كدام الشرع وكدام الله هي زوجته وهالشي احنه ما عدنه علم بي من الاساس ومنرضى بي خلينا ننهي المسألة بوديه ومدام الكل موجود ويرمي عليها اليمين ويا دار ما دخلك شر
+
فارس:- سيد محمد خليك محضر خير ولا تشجع على خراب بيت اختك قبل ما ينبني …
+
محمد بهدوء:- اذا الاساس غلط ومبني على كذب وخداع لازم ينهدم لان بيت ساسه غلط ما يتحمل ويوكع بأول مطرة..
+
تدخل عمه مرة اخرى:- والزلمه مستعد يجيب بنت خاله وتثبتلكم كلامه عمي انتم ساده وبختكم جبير ما ترضون على دمار وخراب والزلمه يريد مرته
+
محمد:- ومرته ما تريده غصب؟ لو نجبرها خلينا نعبر النهر دامه ضيك .
+
فارس:- ما اطلك وانه هم محد يكدر يجبرني وطلاك ماطلك
+
محمد:- ليش تجبرني اوصلها للمحاكم .
+
فارس:- شتريد تطلكها مني بالقانون هم تبقى مرتي بالشرع مدام لساني مانطق بكلمه طلاق .
+
اباوع لمصطفى يريد يكوم يفترسه ومحمد يخزر بي حتى يسكت وحيدر منزل راسه محمل نفسه مسؤوليه ويشعر بالذنب وكرار يلوب بمكانه يريد يحجي بس مايكدر يتجاوز محمد
وابوي عايف دفه الحديث بيد محمد وفارس شويه وينفجر يريد يمردني ونظراته تتوعدلي حسيت روحي كاعده اباوع لمسرحيه احنه وين چنه ووين صرنا شرد بالي عنهم وانفصلت عن الواقع وحتى الحديث الي يدور بينهم صرت ما اسمعه غمضت عيني اردد بداخلي هذا كابوس كعدي ياقوت هذا كابوس مو حقيقه فتحت عيني على وكفه عمامه وسلامهم على بابا والولد وطلعتهم كمت دخلت للصاله الوسطانيه امي وزهراء ايدهن على خدهن وهاجر تكرز حب وليالي ماكو رجع بابا فتح باب الصاله وصاحني
+
سيد حسن:- تعالي بابا ياقوت.. اقتربت منه وشفت فارس راجع وكاعد مرجع ظهره عالتخم ويفرك بين عيونه ووجهه منكمش بألم
+
سيد حسن:- اصر يحاجيج لخاطري بابا اسمعي والتردي يجرالج
+
هزيت راسي بدون كلام ودخلت تركنا وحدنا وسد الباب كعدت على نفس الكرسي بدون ما احجي شبك ايديه ولام شفته الجوة داخل حلكه بنفاذ صبر
+
فارس:- خير ان شاءالله اكو رجال غريب وانه مادري؟
+
باوعتله بأستفهام
+
فارس:- المن متلفلفه بصايه وحجاب عمامي وطلعو .
3
همست ازيح نظري عنه:- مرتاحه هيج.
+
كام وكف واقترب مني ببطىء توترت نبضات گلبي وانفاسي تسارعت قربه يفرهد حالي وريحه عطره وحدها كفيله تشعل حبه بگلبي صار كدامي ومد ايده لزمني من فكي يحثني اكوم بمواجهته لمسته تضعفني وكرهت سيطرته عليه وكفت كدامه رافع وجهي بس عيوني نازله ماريد احطهن بعينه واشوف غيري بيهن واموت باللحظه الف موته
+
همس بصوت خافت وايده تتلمس بوجهي بخفه:- اسم الله عليج من التعب يا تعبي وردتي ذبلانه
+
قلصت روحي وجذبت وجهي بنتره من ايده رافضه قربه :- رجاءا بدون كلام ماله داعي واحجي شتريد وروح بعد خلص انكشفت والالاعيبك متأثر بيه
+
فارس:- اريدج !! هذا الاريده.
+
:- واني ماريدك طلگني وفضها لان مستحيل ارجع لواحد مثلك يمثل الحب وخدعني وخدع مشاعري
+
اعترض رافض اتهاماتي:- امثل؟ انه وياج متعري من كل قوة وتمثيل ماخدعتج بس ماكدرت احجيلج ،،كلشي ممكن يكون چذب الا عشكي الج وطلاك يحلوة ماكو ولا تذكري على لسانج لان لو تطالبين بي منا لنهايه العمر ما يصير ولا يتحقق عشم ابليس بالجنه
+
ضحكت اسخر منه:- هه شعندك بيه وانت عندك مرة من سنين؟
+
بحركه سريعه جذبني من خصري ولصقني بي :- انتي مرتي وماعندي غيرج حرمت كل النسوان على روحي من يوم الي عيني لمحتج ازعلي حقج واخذي وكتج بزعل بس نهايتج بين ايدي وبحضني مايلمج غير حضني
+
توسلته يتركني:- اترجاك هدني .. رفع ايد وحده عن خصري وجر بيها حجابي وشمره بأهمال عالتخم دفعته بس هيهات يتزحزح
+
قيدني بقوة ودس وجهه برگبتي وشعري صرت ارجف لقربه الي يهزني حتى انفاسه الدافيه تذوب كل مقاومتي
همس بصوت متخدر وهو يشم بيه:- ولج لو على موتي ما اعوفج بدون نحرج انه اموت حتى الموت ما يخلصج مني
+
استغليت ضعفه ودفعته بقوة ودموعي نزلن:- موت ما تهمني اني ماريدك بعد چزت روحي منك وكرهتك وطلاك غصبا عليك تطلكني اني صوجي عفت الي يشتري مني النظره علمودك وتالي هذا الحصلته منك
+
طارن عيونه بغضب لدرجه خفت منه يأذيني انقض عليه لزمني من فكي وضغطه بقوة خلاني اأن بألم هز راسي بعنف يضغط عالحروف الي ينطقها:- اذبحج وحق الله اذا تجيبين طاري احد على لسانج لج لا تخليني اطلع خبالي عليج ما اريد أذيج اخذ روحج بيدي وادزج للموت وطلاك ما اطلك واريد اشوف شلون غصبا عني ومنو هذا اليجبرني
+
حطيت ايدي فوك ايده اريده يهدني مرد وجهي وعظامي صارت توجعني همست من بين دموعي:- دتأذيني عوفني
+
خفف قبضته بس ما تركني باوعلي بعين تلهب ورخت من حطيت عيني بيها وبلع ريگه يلتهم ملامحي برغبه مرر ابهامه على شفايفي وبلحظه سريعه لكيت نفسي اتجاوب ويا بقبله عنيفه عرف يضعفني بيها تمسكت بي وعقلي غاب وتجاوبي شعله اكثر دس ايده بشعري يقربني اكثر احبه واريده وحتى جسمي رفض غيره وتجاوب بس وياه كلشي بيه يخذلني ويريده عقلي رجعلي بمنتصف الطريق فتحت عيني على وسعها اني شجاي اسوي ليش مستسلمه اله اتذكرت داليا ومعدتي گلبت اتخيلته يسوي وياهه نفس الديسوي هسه اقتلعت نفسي منه ودفعته جان ضعيف وذبلان واندفع بسهوله وصرت ابجي وامسح بشفايفي بعنف مرة ورا الثانيه
+
همس وتأثير الصار بعده واضح بصوته وملامحه:- حتى لو تمسحيهن اثرهن حافر بگلبج ما ينمحي.
2
خزرته من بين دموعي:- اقلعه لگلبي من صدري اذا بعد حن عليك ولك شتريد مني فهمني تريد تدمرني ؟ تريد تردها الي عود وتنتقم مني لان بيوم من الايام عفتك ورحت انخطبت تالي طلعت انت ضاملي الاقوة طلعت متزوج
+
رفع حواجبه ببرود:- واذا اريد انتقم منج اجي اتزوجج ؟ اكو واحد ينتقم من عرضه بس الناقص والماعنده شرف وغيره لا تظلين تخوطين بالحجي داليا مو مرتي العقد البيني وبينها حاله حال عقد العمل عقد ايجار عقد بيع يشبه كلشي الا عقد الزواج وصار من زمان جنت صغير وامها وكعت دخيل عليه حتى اخلصها من خالي واسكته وامي باست ايدي حتى اعقد عليها والصار صار
+
تهاويت على التخم :- مو علويه ياقوت التنحط ويه مرة ثانيه ادوس كلبي الي يحبك واعبر من فوكاه بدون ما ارمش ولك شمتت بيه اليسوة والمايسوة
+
فارس:- ماعاش الي يحط وياج مرة افتهمي يابشر مو مرتي بيش احلفلج مو مرتي..
+
:- ماريدك يا اخي ماريدك بعد من حقي اقرر انت حتى ماكلفت نفسك تگلي وتخليني اقرر صفكت ايد بيد . احنه خلصنه انتهينه
+
فارس:- لو گايلج ترضين اخذج؟
+
هزيت راسي نافيه:- لو اموت بحبك ما اقبل..
+
فارس:- چا لو ينعاد الزمن الف مرة ما اگلج ..
+
ذبلت ملامحي بحزن :- ضمنت اني على ذمتك وتحجي مترهي
تريد اتوسل وتذلني ؟
تدلل ابوس ايدك اعتقني الله يخليك طلكني اني مو حمل حرب ومهاترات فارس اذا صدك تحبني حقق الاريده وطلكني نرجسيتك وانانيتك راضيين هسه ؟
+
جاوبني ببرود وهو يكعد براحه على التخم:- ماطلك .. باوع لايدي البيها كانيولا واردف:- لا تظلين تحركين بيدج طالع منها دم…
+
هو حجه هيج وكأنو هاي اكبر مشاكلنه واني اعصابي انهارت لزمت الكانيولا وملختها من ايدي وشمرتها بالكاع وصرت ابجي واصرخ بي:- هذا الهامك بكل هاي الهوسه انت خدعتني ودمرتني انت مستوعب سوايتك لو لا
+
انتفض واتقدم مني بسرعه ولزم ايدي يريد يضغط عليها حتى يتوقف تدفق الدم واني اتلاوة ويا وادفع بي كز على سنونه بغضب:- اثبتي عاد ..
+
انفتح الباب ودخل محمد عيونه براسه دفع فارس عني وصاح بي بصوت عالي:- كافي واطلع برة عوفها بحالها امشي روح راح تنجلط بسببك لزم ايدي وضغطها بيده بتنا ماتريدك اطلع …
+
فارس:- ما انتهى حديثنا طالع هسه ويصير خير…
+
طلع واني وكعت بالكاع ابچي بصوت ،بمراره وغصه جاثمه على كلبي كلهم كاعدين بالصاله الوسطانيه بصمت مقهورين عليه ومحمد جاب كلينكس مسح ايده وايدي وكومني
+
محمد:- كومي غسلي وطلاك اطلكج منه وانعل ابو لابو اليطلع ورا..
+
غسلت وصعدت لكيت ليالي واكفه بباب غرفتها ودموعها تجري باوعتلها بقهر:- يا حيف كل لحظه اعتبرتج بيها صديقه واخت وامنت بيج طلعتي حية وشاركتي بخرابي وكسرتي غطت وجهها بيدها ونشغت بحرگه بس مو اكبر من حرگه كلبي دخلت غرفتي وقفلتها عليه ما مستعده اسمع حجايه من بشر
+
الايام البعدها اعتكفت على نفسي اجلد روحي يا ناري ويا برودة يحجي بكل صلافه ولا كأنه مسوي شي والامر بسيط عنده كلبي اثقلته الهموم وماعرف مصيري مجهول مثل ماضي فارس الي اول ما انكشفلي دمرني
تليفوني قفلته وضميته بالكنتور مامستعده اسمعه ولا اريد اسمعه .. مجتبى وبنين رجعو والدوام ما بقاله شي غير يومين فتحت تليفوني اشوف گروب شعبتي وكالعاده انهالت عليه رسايله مرة يتوسلني ومرة يتوعدلي مرة يكتبلي احبج ومرة لو تموتين ما اطلك
+
قويت روحي ودگيت عليه جاوبني من اول رنه
+
صوته ملهوف ومو مصدك متصله بي
+
فارس:- حبيبي ياقوتي..
+
غمضت عيني وغصه انحشرت ببلعومي:- مو حبيبتك اني الغبيه الصدكت بيك
+
فارس:- شسوي وتصدكين ماكو بيني وبينها شي وحبي بس الج وعيوني بس الج وروحي بس الج والصار اتفاق عالورق
+
:- طلكها لعد اذا صادق وهي مو مرتك
+
سكت وسكوته خبلني ويأكدلي كلامها وكذبه اجاني صوته متردد
+
فارس:- ماكدر اطلگها …..
17
✨✨✨✨✨✨✨✨✨✨✨✨✨✨✨✨✨✨
6
