هي كم كلمه تنگال كفيله تدمر شخص وتكسره تحت مسمى ابن العم والنهوة جنت سعيده لحياتي القادمه ويه انسان محترم ماحب يلف ويدور واختار الحلال باوعت لحبات الهيل الي بين اصابيعي مغمضه بأبتسامه وادعي بداخلي يارب اجعلها بدايه خير عليه يارب لا تفجعني بنصيبي منتظرة يبلشون العقد وسمعته. سمعته يتفوه بكلمات تافهه بسبب مجتمع انطاه الاحقيه حتى يگولها انسد باب الصاله الي جان مفتوح قليل حتى اكدر اسمع العقد واني ظليت جامدة اسمع الصياح والجدال حسيت روحي بحلم وغمضت حيل اطرده النسوان كامن بسرعه وطلعن وماما اسمعها تتعذر ومتعرف شلون تلملم الموضوع ياقوت كعدت بصفي حضنتي حيل كلبي صار ينبض بعنف غاضب فتحت عيوني اباوع لرجليه المحطوطات بمي وورد وياس باوعت لياقوت الي تباوعلي بارتباك تريد تفهم رده فعلي وخارج عن ارادتي دفعت الطاسه برجليه وتبده المي والورد بالكاع صرت ارجف مو مصدكه الصار رفعت راسي لامه وخواته لحر الي ما يقلن صدمه عنا ماتذكر شنو سويت وشنو حجيت بس فتحت عيوني اني بالمستشفى واهلي كلهم فوك راسي بچيت بصوت عالي بدون ما احجي شي لمتني ياقوت بحضنها تحاول تهدي بيه واني احس نار بگلبي نار حقد وكره ليش سوة هيج ليش ليش خرب اهم يوم بحياتي ليش اذاني واني بحياتي ما اذيته وطول عمري معتبرته واحد من اخوتي حتى من يضوجني انسى وما اهتم ولا اشيل بگلبي عليه طلعنه من المستشفى وصعدت السياره وراسي ساندته على كتف ياقوت الكل ساكت بابا ماما مجتبى ياقوت باقي اخواتي بسياره محمد
كلهم ساكتين وعلامات الخيبه والشفقه عليه تارسه وجوههم اني الي خربت فرحتي
دخلت البيت اجر روحي جر ليالي وغفران اختها ينظفون الصاله كزاز مطشر وكلشي متبعثر هاي اني شمسويه اقتربت مني ليالي حضنتني حضن صامت وايدها تمسد ظهري بلطف واستني بدون ما تنطق حرف تركتهم وصعدت لغرفتي ذبيت صايتي وشفت فستاني الابيض بعدني لابسته وبلشت الدموع تتجمع بعيني تهاويت بالارض بوسط غرفتي وصرت ابچي واشهك بصوت عالي ليش هيج صار بيه ليش
انفتح الباب ودخلت ياقوت كعدت بصفي وحضنتني عيونها حمر وتبجي
– عليج الله زهراء على كيفج ويه روحج
صرخت بقهر :- ليش . اريد اعرف شمسويتله اني ليش ليش كسرني كدام العالم والناس وخرب يومي ليش .
– حقج والله حقج زهورة بس اهدي فدوة اروحلج حتى صوتج راح
– كسرني ياقوت . كسرني واذاني الله يكسره مثلما كسرني ..
محد جان متوقع حر يسوي الي سواه زهراء انهارت كسرت ميز المهر وصارت تبجي وتصرخ اريد الزمها ماكدر حضنتها ابجي على بچيها وحرگه گلبها صوت نحيبها يكسر الگلب
– كلشي ينحل والله بس اهدي كل عقلج بابا والولد يهتمون لهيج كلام
– والناس الراحو والعقد الي خرب والكلام الي راح يطلع عليه عوفيني اروح اشرب من دمه
ظليت اتلاوة وياهه تريد تدخل عليهم وتبجي وماما تجر بيها منهاره ومتفهم اي كلام جرت ماما كلاص مي وطشته بوجهها هدأت شوي وهي تلهث تباوع بالوجوه بكسره وقهر لزمتها من اكتافهه اجرها اريد اصعدها لغرفتها باوعتلي بعيون حزينه ومخذوله وصارت ترجف رموشها صارت ترفرف بسرعه ووكعت بالكاع فاقده وعيها لميتها لحضني اصرخ بيها وماما وليالي يفركن ايدها وخرت شعرها المبلل من وجهها وصرت ابجي بصوت
هاجر:- والله عمي بخت الزلم يتعاركن عليهن وما عاجبهن
درت نظري الهه وخزرتها وصحت بيها:- انتي انلصمي لا اطلع قهره اختي بيج
نترت امي بيها:- لو تسكتين لو تولين لغرفتج ما عايزين كلام زايد
ليالي بخوف:- خاله عفيه ايديها ثلج خلي نوديها للمستشفى
كامت ماما ودخلت عليهم واجو وكلهم دخلو علينا جبتلها صايه وحجاب لفيتها بيها وشالها مجتبى وطلعنه بيها للمستشفى
هبوط نتيجه صدمه حطولها مغذي وكعدت تبجي منهاره
ما مصدكه حر يسوي هيج بزهراء ويدمر احلى يوم بحياتهه طول عمره يعاملها مثل بنين شنو الي تغير
نومتها بفراشهه بعد ما استنزفت طاقتها بالبجي ونامت غطيتها وشلت المفتاح من باب غرفتها اخاف تقفله على روحها وتنهار وتسوي شي بنفسها اعرفها مندفعه طفيت الضوة ونزلت الولد كلهم كاعدين وبابا منحني ليكدام حاط راسه بين ايديه الموقف اليوم صعب كدام اهل دكتور حمزة وعمامي وكسره زهراء وانهيارها اباوع لمحمد يضغط جبينه ووجهه منكمش بألم
مجتبى صافن بغير عالم ومصطفى يدك على حر وهذاك ميجاوب
صارت عيني بعين حيدر وغوركت عيوني بالدموع اشرلي اجي اكعد بينه وبين كرار
سكوت وحيرة محد نطق بحرف حاوط كرار كتفي وطبطب عليه هامس:- نامت؟
هزيت راسي بأيجاب ونزلت دموعي:- تعبانه زهراء كلش .
كام من يمي راح للمطبخ واجه شايل بيده بطل مي وقطع كاكاو فتحلي وحدة ودفعها بحلكي:- اكلي هاج شكلج انتي هم تعبانه .انصاعيت لامرة لان صدك احس نفسي تعبانه شربت مي ومحمد حجه
– خابرو خل يجي لا يظم روحه
مصطفى:- ما يجاوب.
ابو محمد:- اتركوا اليوم الكل اعصاب وتعبانين .مالي خلك اشوف جهرته
علويه نهله:- انه بس اريد افهم بناتي ليش هيج حظهن دخيلك يا علي
عوجت هاجر حلكها تهمس بخبث:- بطرانات.
فرك محمد وجهه بعصبيه والتفت عليها كاعده بصفه وسمعها:- كلمه زايده يا هاجر وحق الحسين افين حظج امشي انگبري بغرفتج ماريد اشوف جهرتج.
انطعن وجهها ولمت شفايفها بغيض وكامت صعدت
وراهه كلمن انسحب لغرفته بالتدريج دخلت غرفتي ابدل هدومي دورت تليفوني لگيته جوا المخدة . فتحته لكيت فارس داك هواي وداز رسايل
اتصلت وكبل فتح الخط:- وينج بنيتي والله ظل بالي.
تنهدت بحزن والقهر واضح بصوتي:- خربت الخطوبه فارس.
اجاني صوته متفاجىء:- شني خربت يا ساتر شصاير شبي صوتج ؟
– فارس ابن عمي خربها للخطوبه قبل العقد بثواني وكف وصاح اني ناهي على زهراء ماعدكم عدنه مرة لزواج والعريس واهله طلعو كلنه مصدومين ب(حر) ما متوقعين يسوي هيج
– ماعرف ما جان مبين عليه اصلا يعاملها مثل بنين اخته واربعه وعشرين ساعه يتناكر وياهه ويضوجها
– حبيبي هذا يحبها مدام يتناكر وياهه.
– اذاهه وقهرها وكسرها اختي منهارة وتعبانه حرام السواه ليش ما حجه من قبل ليش بيوم عقدها
-هو غلطان ما اكلج صح واذا رايدها مفروض يحجي من زمان بس عمي والله سبع ماخلاهه تروح لغيره .
هتفت معاجبني كلامه:- صدك تحجي فارس جاي تبررله فضح اختي كدام العشيرة راح يظلون يحجون بيها سنين شلون خربت خطوبتها
– محد يحجي بيكم الكل يعرف اختج ويعرف اهلج والصار كدامهم وانتو تفاجئتوا حالكم حال الناس انه عن نفسي اصف ويه ابن عمج رغم انه اكره النهوة ولا اعترف بيها بس الغركان يچلب بگشايه وابن عمج غرگان بأختج لهامته لدرجه خرب الخطبه شلون انه غركان بيك يبو عيون السمه غير لو صايرة بت عمي انهبج مو بس انهي عليج
ضحكت بعز قهري وضوجتي:- انت شلون بيك وبسوالف
– اذوب انه عالضحكه طير حب ويغرد
نهرته بخجل:- فاررس عليك الله كافي
ضحك بنبره راخيه سحنت كلبي:- شحجيت انه عمي
ماعرف ليش تذكرت الحلم بنص الحجي وكلبي انقبض هتفت بخفوت:- فارس؟
– حلمت بيك حلم مو حلو وخايفه ؟
سألني بفضول:- خير ان شاءالله.
– حلمت بيك دفعتني من حافه هاويه عاليه متعمد وكعتني من مكان عالي .
– اضغاث احلام حبيبي لا تهتمين اني اذا ادفعج بيوم ادفعج لداخل صدري واذا توكعين وما توكعين الا بحضني .
– اوعدني ما تضم عليه شي ليش ماعرف عنك هواي امور
سكت لثواني واردف:- ماكو شي مهم حياتي فارغه قبلج انتي كل الامور انت المهم والاهم ماكو قبلج ولا بعدج امر يستحق الذكر .
– شلون تلكه جواب لكل سؤال
-حبك ياضوة هو الي يجاوب عني . شوكت اشوفج ؟
تنهدت بحيرة:- وضع البيت متكهرب حتى للمكتب مراح اروح هالفترة زهراء محتاجتني لازم ابقى وياهه هي ما تركتني لما… عضيت شفتي ماريد احجي شي زايد
بلعت ريگي احاول اتدارك الموضوع :- لما جنت ابجي ومقهورة ببعدك
انخفض صوته :- هم بچيتي عليه هم سهرتي وفراشج يأذيج چن نايمه على جمر مثلي
– جنت عايشه بالچذب
سمعت طكه الجداحه وشهكه الجكاره:- من عرفتج النوم هجرني اريد انام مرتاح اريد اول نومه انامهه مرتاح بحضنج وانتي مرتي ومالتي حتى بالي وگلبي يأمنن ويبطلن هواجيس اوعديني ماتروحين لغيري ابد وانه مستعد اقاتل علمودج دهر بس لا تنطين بيه
– جبرتني ظروفي فارس وردت اموت الك اني ما ارهم لغيرك گلبي دك على ايدك
– يا بويه بكلمتين تعرف شلون تشعوطني بت الساده
بيومها نمت على صوته مثل باقي الايام روحي صارت بي ماكدر بدون كلامه وحبه وغزله واحلامه البانيهه النه وحياتنه سوة
حسيت على صوت تليفوني بين الحلم والحقيقه ركزت زين اي تليفوني يدك والغرفه غركانه بالظلام مديت ايدي للكومدي البصف سريري باوعت حر يتصل
رجع كلشي صار لذاكرتي وكلبي اشتعل بنار فتحت الخط
– الله لا يوفقك. الله ينطيك العافيه ويحرگ كلبك مثلما حرگت كلبي ليش سويت هيج
– زهراء اهدي وسمعيني.
– شسمع فهمني شسمع كسرتني كدام الكل واذيتني ليش فهمني ليش
– ماكدرت اسكت حاولت وماكدرت.
– لك على شنو على شنو تسكت الخباثه البيك وصلت تخرب خطوبتي كل ظني المناكر البينه شقه حالك حال اخوتي تالي هيج تسوي
صاح بصوت عالي:- مو اخوج انه مو اخوج ابن عمج .لج تعبت وانه ضام بگلبي هجيت سنين عفت العراق بكبره بسببج واكول انساها تالي رديت وعرفت لا كدرت انساج ولا اشيل حبج من كلبي
قشعر جسمي بقرف مصدومه ومجاي استوعب :- انت كل عقلك تحجي انت شبيك سكران شارب ياحب هذا حر اني زهراء ولك زهراء خاف مخربط ولك ياحب انت مثل اخوي
صاح بنفاذ صبر – هم كالت نعل هم كالت نعل لج مو اخوج
-حر هاي الخرابيط راح اعتبر نفسي ما سمعتها والسويته بيه مستحيل اسامحك عليه
همس بصوت واهن :-زهراء احبج
سديت الخط بوجهه ومن صدمتي ما بچيت عيوني جفت من الذهول هذا يا حب اليحجي وحلفت انتقم منه واندمه عالسواه بيه مو زهراء اذا ما احرك گلبه مثلما حرگ كلبي
كمت الصبح عاقده العزم مانزل دمعه واخلي يبچي دم ثار لقهرتي
نزلت و لكيتهم كلهم كاعدين بالمطبخ ابتسمت وصبحت بصوت عالي كلهم صفنو بوجهي
ضيقت بيبي اسينات عيونها عليه :- انتي لو تخبلتي لو عرمه وما يكسر عينج شي
ضحكت رغم المرارة الي احس بيها:- بيبي منو يستاهل عادي خطوبه ومصارت بيها صالح بعدني صغيره
اخوتي كلهم صافنين عليه بقلق كل ظنهم شخطت وياقوت حاطه ايدها على صدرها بفزع وعيونها مفتوحه عليه
فتحت الكاونتر طلعتلي كلاص صبيت چاي لروحي وكعدت بصف بيبي وياقوت من الجهه الثانيه وعيونها ما ترمش عليه تعرفني زين وتعرف هذا القناع كذب وتمثيل
ذبيت روحي بالتنظيف نظفت المطبخ وطلعت للصاله اكنس بيها رغم نظيفه بس اطلع حرگتي بشغل البيت ماريد ابجي دخل خالو علي واني انظف طفه المكناسه الكهربائيه وجرني باسني من راسي وحضني داهمتني الدموع غصب بس اجتثيتهن من عيوني بيدي قبل لا يوكعن كعد وكعدني بصفه مبتسم:- سباعيه انتي زهورة
هزيت راسي بدون كلام
سألني وكأنه يطرح عليه حل للهروب:- تجين ويانه لايران؟ تزورين وتفترين اونسج مثل قبل صار شكد ما جايه
رفعت اكتافي :- مادري بابا يقبل؟
طبطب على ظهري :- خليها عليه واخذجن انتي وتوته شعدجن عطله وطويله شيرين تكيف رادت تجي ويانه بس عمتج مالها خلك
– اذا قبلوا اي اروح
عالعشه حجه خالو ويه بابا والولد والغريبه قبلو بدون نقاش وتواسيل باوعت لتوته ملامحها جمدت وباوعت لليالي الي فتحت عيونها ورفعت حواجبها استغربت شبيهن
ورا ما فضينه العشه كامو بيبي اسينات وخالو علي يردون يروحون لبيت خالو بسام الشايل بخاطرة لبست امي وراحت وياهم تراضي صارلها كم شهر مقهورة ومشتاقتله من عرس حيدر
اني هم صعدت لغرفتي شفت ليالي تفوت على ياقوت رحت وراهه دخلت واشوف ياقوت تفرك بيدها ملامحها مزعوجه وليالي حاطه ايدها على خدها بحيرة
– شكو شبيجن يا ساتر
باوعت ليالي لياقوت بنظرات تساؤل جاوبتها ياقوت:- احجي ما ضم شي عن اختي..
– بله هسه منين طلعتو بسالفه ايران ولج اذا درة يتخبل والحسين
باوعت لياقوت الحيرة تارسه وجهها جاوبت عنها:- عادي منروح توته لا تشيلين هم
هتفت:- لا نروح عادي نغير جو من زمان ما رايحين انتي هم ترتاحين معليج بفارس اني اقنعه قابل شيريد يسوي؟
ليالي:- زين عالاقل انخطبو وروحي
– شبيج ليالي يا خطوبه بهالزلك مداشوفين شصار. واشرت عليه بعيونهه تذكرها
همست ليالي بأحراج:- صدك والله اسفه مو قصدي
زهراء- خلي يجي يخطبج شعليكم بالصار خوما توكفين حياتج علمودي شبيه چني العيد
ياقوت- منو اله نفس هسه يستقبل خطوبه وهوسه اني اتفقت ويا نهايه العطله اصلا على شنو يضوج رايحه لبيت بيبي وخالي ترا
راحت ليالي لغرفتها وظليت يم ياقوت حضنتني بكل قوتها كأنها تحاول تعتصر الدموع الي بداخلي ونجحت بچيت من كل گلبي لدرجه خشمي انسد وبلاعيمي احتقنت
صوتي طلع يرجف من بين دموعي:- خابرني الحقير خابرني ويگلي احبج مادري منين نزل عليه الحب فجاة بيوم خطوبتي الخبيث النذل اذا ما ادمره وانهي
– لا تفكرين بهالامور هسه ارتاحي بعدين تصفى
ظليت حاطه راسي بحضنها لحدما غطيت بنومه عميقه..
نامت ودمعتها بعينها وكلبي يتكطع عليها حرت بامرها وحرت بمشاعر حر الي فجاة بينت وظهرت
دكيت على فارس اشتاقيتله اخر مرة تراسلنه الصبح جان بالدوام وكالعاده اول ما بدك يجاوبني بلهفته الاعشقها
– لك مشتاق يا ضوة .
قهقهت بخفوت منصيه صوتي ماريد زهراء تحس:- واني هم.
ضحك بنبره لعوبه:- وانتي شنو؟
حسيت بالإحراج وارتبكت:- هي هاي الگلتها .
زفر نفس عميق:- يجي يوم وتحجيها ما طايرين .گليلي شسويتي اليوم اختج شلونها
– تعبانه وتتصرف بغرابه طول النهار سوت نفسها عادي مو مهتمه وهسه شبعت بچي ونامت بحضني
– احوي كون انه بدالها .
ضحكت بتوتر اعرف راح يضوج من سالفه السفره:- اريد اگلك شي بس اترجاك بدون انفعال
– الاسبوع الجاي بيبي وخالو يرجعون لايران.
– اني وشسمه اني وزهراء راح نروح وياهم نبقى فترة
سكت وماحجه ظليت منتظرة يحجي وظنيت المكالمه انسدت بس شفت الخط مفتوح
همست بتردد:- اشو سكتت احجي شي؟
بين الانزعاج على صوته:- مقررة وراح ترحين المن بعد گايله
هتفت ابررله:-والله مو اني صاحبه الفكرة خالو شاف زهراء ووضعها كال تغير جو واني ماكدر اعوفها وحدها لازم اكون وياهه فارس اختي محتاجتني ونفسيتها مصفرة الصار وياهه مو سهل يعني اعوفها؟
– ما گلت عوفي اختج بس عالاقل گليلي قبل لا تقررون
– گلتلك مو اني القررت يعني شگللهم انتظروا اخابر فارس آشوفه يرضى لو لا؟
حجه بغضب رغم صوته منخفض؛- هو حضره جنابج لو راضيه اجي ونعقد ونكمل جان غصبا عنج بموافقتي يلا تطلعين باب الحوش ولو يجي الحمزة ماخليج تسافرين انوب عليه الدول
فركت وجهي بنفاذ صبر :- رجعنه لنفس السالفه ورجعنه للملامه
هتف بأنزعاج:- روحي عمي روحي سوي التردي يلا حبيبه روحي نامي انه عندي شغل
– منو گلك نعسانه شغليش هسه وانت بالبيت اليوم؟
-ياقوت روحي نامي
انقهرت وصابتني خيبه وصوتي بلگوة طلع :- بس اني اريدك تبقى
تنهد تنهيدات متتاليه:- بعدين نحجي خليني ارست دماغي ماريد اضوجج تصبحين على خير وسده
ما انطاني فرصه حتى اجاوب ضغطت شفايفي مانعه نفسي ابچي ماعرف ليش مديفهم الظروف الجاي نمر بيها مصار يومين من تصالحنه ورجع زعل هوايه صايرين نتجادل ونتعارك وينفعل على ابسط الامور جانب ما جنت اعرفه منه وهسه ديطلع الظاهر جمال وانبهار البدايات خلص .رجعت دكيت عليه مغلق ذبيت التلفون بقهر وبيومها للصبح يلا نمت وهيج مرن كم يوم يراسلني او يحجي ويايه دقيقه من ورا خشمه ويسده بحجه مشغول بالدوام
علنوا النتائج ورحت استلمهن اني اما زهراء ماقبلت تجي ولا توصل الكليه وهالشي حقها تخاف تشوف دكتور حمزة بعد الصار والحمدلله اثنينه ناجحات ويه طلعتي صادفت نورهان تريد تدخل للقسم تسالمنه ووكفنه شوي نسولف وقبل لا اودعها حتى اطلع گلتلها ترا مسافره باجر وصليها لاخوج لان مديحجي ويايه مثل الناس خاف يكول ماحجيت
طلعت ومن القهر كضيت الطريق ابچي جنت متوقعه يجي واشوفه كلت ميتحمل ويجي بس ما اجه قررت اني هم بعد ما اتصل ولا احجي ويا ورا العشه صعدت غرفتي كبل وحضرت جنطتي وصافنه بتليفوني معقوله كلبه انطاه وماحن واجه اليوم اصلا ما اتصل ولا راسلني اكيد نورهان كلتله الفجر طيارتنه كلبي وجعني من قسوته وجفائه نفتح باب غرفتي ودخلت ليالي مبتسمه وفرحانه
– الخاتون معلكه فوك وحبيب الگلب كاعد بصاله .
كمت من فراشي كلبي مهبوط:- يا حبيب الگلب؟
حركت حواجبها بتلاعب:- ليش اكو غيره حبيب الگلب ؟
رفعت حواجبي بصدمه:- فارس هنا؟
هزت راسهه تضحك:- اي عيني صارله فوك النص ساعه هو وحيدر وحدهم سلمت عليه واجيتج
عكدت حواجبي باستغراب:- شعنده؟
غمزتلي:- مشتاق لحيدر ويحوس عليه بلكي يشوفه
شمرت المخده عليها:- ترا داحجي جد شعنده؟
رجعت ذبت المخدة عليه:- شعنده والله عادي ترا دايما يلتقون هو وحيدر صارو اصدقاء ورا خطوبتنه كم مرة التقو بالكوفي ينرگلون سوة
– مم ابد ما كالي تعرفين.
-عادي الزلم مو كلشي يحجون عدهم هاي التفاصيل مو مهمه.
رجعت مددت بفراشي :- وهسه شتردين اروح اخذه بالاحضان اصلا ما نحجي اني ويا زعلان من يوم الكلتله نسافر
– ضايج من وضعكم يريد شي رسمي ترا حقه وانتي بس تأجلين.
– ليالي حبيبي خليني ساكته اني محد يفهمني ولا راح تفهموني كلمن يصيح ياروحي محد مهتم لرغبتي
– هيج صرنه ست ياقوت اشكرج وكامت طلعت انوب حتى ليالي زعلت
تعبت واني احاول ارضي الكل محد فكر بيوم يرضيني رجع اندك الباب وضنيتها ليالي بس فات كرار شمر روحه على السرير يم رجليه
– نكوم نفتر بسيارتج ناخذ ذيج الخبله نغيرلها جو؟
– تقبل تطلع هي؟
– غصبا عنها نروح نجيب موطه وكنافه ونفتر ونرجع شتكولين وحرك حواجبه بتلاعب . خل نشوف سياقتج من ذيج النوبه المصخمه بعد ما صعدت وياج
ضحكت واتذكرت من دعمت الرجال نص الليل واجاني فارس يرعد :- يلا روح طلعها علما ابدل
احس كلبي جوة بالصاله بس شكدر اسوي قابل اروح اطب هو اصلا زعلان وميقبل يحاجيني مثل العالم وهسه مكابل اخويه
بدلت ونزلت لكيت زهراء كاعده ومبوزة طلعنه شفت حذائه بباب الصاله واسمع ضحكته باوعتلي زهراء وابتسمت بخفوت تنهدت بصوت عالي وطلعنه بس راح واهسي وبالي وفكري بلي كاعد يم حيدر وكفنه يم محلات ونزل كرار نزلت وصعدت بصف السايق مالي خلك اسوق
زهراء:- والله انتو مدري شلونكم .
– شسويتله اني ترا زودها ؟
– احجيله كلشي وارتاحي حتى يعذرج
انداريت عليها:- انتي عبالج يسكت لج اختي اذا احجيله اعرفه يروح يسويله سالفه وتصير كره وعداوة وسالفه هاي اذا بقه يريدني بعد ما يعرف سيف حاول يتحرش بيه
– لا تبالغين ترا مو متخلف لهلدرجه حتى ميريدج لان صار هيج وياج بس اني وياج احتمال يتمالخ هو وهذاك الكلب وتتعقد الامور.
– دسكتي اجه كرار.
صعد بمكان السايق:- ها شو هنا مو عساس انتي سايقنه اليوم الله يچرم
– دمشن للبيت مو وجه نعمه وجوهجن تتلاطم رجعنه للبيت نزلنه وقبل لا نفتح الباب انفتح وطلعو منه حيدر وفارس . بلعت ريگي بتوتر وتراجعت مدري وين اولي لا اكدر اطب ولا نرجع لسياره احس الكل يسمع نبض گلبي العنيف وحبي مفضوح
وخر هو على صفحه داير وجهه سلمنه بصوت ناصي عالسريع ودخلنه بسرعه اني وزهراء طبيت اركض بالحوش ووجهي يشع حرارة
لكيت امي وبيبي وليالي وهاجر بالمطبخ حطيت علاليك الموطه والكنافه كدام ليالي وبستها من خدها كبل ضحكت وكرصتني اخذت روحي وصعدت لغرفتي
طبت زهراء وراي تضحك:-لج هذا شطوله اول مرة انتبه
– زهراء انجبي مالي خلك سوالفج
– يمه تغار عليه
– يا اغار يمعودة حسيت الكل يعرف .
– والله هو وجهه كام ينطي الوان لگفته يخطف نظره عليج
– هن ثواني لحكتي تشوفين كل هذا .
– واني افوت هيج مواقف ؟
اثنينكم مدري شصار بيكم مدري اني لان اعرف حسيتكم مكشوفين كعدت بصفي وضربتني على زندي وتغمز . بشرفي هالفارس مز ماعنده اخ ؟
باوعتلها صفح:- واني مقهورة عليج اكول نفسيتها تعبانه چنج حصان عرج ما يطكج
ضحكت بصوت عالي:- خيه شسوي اموت روحي لا حبي اني اطلع حقي من عينه ما ادمر نفسي علمود احد
– قادرة عمي قادرة..
سكتنه اثنينه باوعتلهه بطرف عيني وهمست:- شفتي شكد حلو اللئيم ؟ ورجعنه اثنينه نضحك بعدنه نضحك واجتني رساله
همشت زهراء التليفون من ايدي عبالك تعرف هو قرتها بصوت ناصي:- انتي وين طالعه بهالليل وكم مرة كتلج لا تشدين حزام
عوجت حلكها :- دكوليله وين طالعه بهالليل لا يطلكه عرج
ردت اخذ التليفون من ايدها بعدت نفسها وتكتب دزت الرساله وشمرت التليفون عليه وطلعت من الغرفه تركض عفتها شلت تليفوني اريد اعرف شدزت فتحت عيني واني اقرا( اووي حبيبي تغار عليه فدوا لطولك)
كبل دكيت عليه اول مافتح الخط:- والقران هاي مو اني كتبت هيج زهراء الحقيرة.
ضحك بمرارة:- ادري متطلع منج .
-هسه مفروض افرح لو اضوج؟
– افرح لان تعرف اخلاقي لو اضوج لان انت تشوف متطلع مني هيج شغلات؟
– الصراحه اثنينهن سكت ثواني واردف مشتاقلج
داهمتني مشاعر مختلطه اريد ازعل واعاتب وبنفس الوقت مشتاقه اله ولصوته وسوالفه همست بعتاب:- ليش دتصرف هيج ويايه
صوته هادئ بس الانزعاج واضح عليه:- ياقوت كم مرة لازم اكلج هالوضع مضوجني
– لان ما اريد اجرحج ماريدج تشوفين مني الموحلو موسهل علي ابتعد عنج واني الي لگيتج بعد هالسنين
-والي صبر كل هاي السنين ما يصبر كم شهر؟
– تؤ.. وضايك خلگي ماريدج تسافرين
-وهسه شسوي شبقه للسفره وانت ما راضي
تنهدت بصوت عالي:- شوكت طيارتكم؟
– الفجر بالاربعه ونص . تعال هنا شعندك جاي على حيدر؟
– اطلبه دين واجيت اخذه؟
استغربت :- دين ايش حيدر شيسوي بالدين ؟
قهقه بخفوت:- دين قديم ناسي
– حرام اذا افتهمت شي .
– احسن. بعدين شني عجيبه ترا صديقي اجيت اشوفه ماحجيلج عنده اخت تشك شك تعرفيها؟
ضحكت وكلبي رفرف بفرح حسيته فاك شويه من الزعل:- لا ماعرفها شلونها؟
– شلونها چنها العافيه ميت بعيونها انه بس هي متحبني تريد تعوفني وتسافر
هتفت معترضه:- شلون متحبك اصلا تموت وشهكت لاطمه حلكي .حسيت روحي دخنت من الخجل وحرارتي ارتفعت
ضحك بصوت عالي لدرجه كام يكح:- يا بويه تموت عليه عمي على زله لسانج الحلو روحي سافري راضي من گلب ورب
– انت فد واحد لوتي وتجرجر لساني گوة.
صوته انخفض ونبرته صارت لعوبه:- اخ شلون جرة اريد اجرة.
صفنت ثواني يلا افتهمت قصده شهكت فاتحه عيوني:- عزا عزا امشي روح متستحي
ظل يضحك ويسولف ما كدرت انام وبقيت ويا لحدما صار وقت ابدل سديته منه وبدلت ولگيت زهراء هم مبدله ومتحضره
ودعنه اهلي وحيدر وكرار اخذونه للمطار كرار ينزل الجنط وحيدر اخذني على صفحه :- توته ما اوصيج على زهراء وضعها معاجبني
اشرتله على عيوني:- بعيوني هاي اختي شلون توصيني عليها
بوسني من خدودي وكرصهن بخفه:- بنيتي العاقله الماكو مثلها ديري بالج على نفسج واي شي تحتاجين تلفون واحد كم ساعه احنه يمجن
– ان شاءالله حبيبي.
– من ترجعون عندي موضوع بيني وبينج
عكدت حواجبي مستغربه:- شنو؟
– روحي وتعاي ونحجي اصلا انتي محتاجه هالسفره من زمان .
– براحتك حبيبي .
صاح كرار من يمه:- يلا شني ؟
رحنه عليهم نتمشى زهراء حاطه سماعات بأذانهه وتاخذ صور دخلنه التفتيش وهوسته وكعدنه بالانتظار رحنه من وكت من ورا بيبي اسينات تخاف تروح علينا الطياره شيخلصنا منها
كعدو الولد بصفنه شوي وكرار كالب وجه كاعد بصفي كل شويه يضربني بعكسه :- كلبج ينطيج تعوفيني
– هو انت عيشتك بالدوام هسه صرت عزيزة
حاوط رگبتي جرني حيل شلع راسي:- افا لج اني تكج راح اشتاقلج يبعد چلاي؟
بعدت ايده اذاني:- كرار بطل هاي الحركه سويت عندي ارتجاج لا تصير حقير .
رجعت ابتسمت وشبكت ايدي بيده. اني هم راح اشتاقلك بعدين غمض فتح خلص الشهر منطول اكثر
كام حيدر من مكانه:- بعد انتو بس تنتظرون الطياره خل نروح اني مقفل نعسان وراي دوام
– اي روحو شعدكم بعد تنتظرون سلمنه عليهم وطلعوا.
ماكو خمس دقايق ودك فارس خالو وبيبي كاعدين وبصفهم زهراء واني باوعت عليهم خالو مشغول بتليفونه وبيبي تقرة تسبيحات فتحت الخط
– يابه حتى الفجر هيج انت حلو يا ضوة.
– شنو لحظه انت وين اشو نفس الهوسه يمي يمك .
– طلعيليج اي حجه وتعاي طبي للحرة خل اشوفج.
كلبي صار يركع بصدري كمت وكفت اقتربت من خالو:- خالو اروح للحرة محتاج شي ؟
– لا حبيبتي بس لا تطولين .
باوعتلي بيبي اسينات:- شعندج هناك يضحكون عليكم الشغله ام خمسه يبيعوها عليكم بميه .
– اريد اشتري عطور بيبي هنا اصليه
كامت زهراء:- همزين ذكرتيني امشي نشتري. حطت ايدها بيدي نتمشى ودخلنه حجيت بدون ما اباوعلها:- ترا فارس هنا دير بالج تفضحينه
فتحت عيونها:- عزا بعين العدو ولج وين هنا يمعزايه يام المواعيد
كرصتها فاتحه عيوني واحجي من بين سنوني:- الخط مفتوح طيح الله حظج
فركت ايدها:- هسه شگلت خفت شكلج .
طبيت وشفته على صفحه واكف يفرك كصته وعيونه
لا ارادي ابتسامتي شكت حلكي نزل ايده ولمحني ابتسم واشرلي بعيونه تعاي
اقتربت منه واحس كلشي بيه يرجف عيونه حمر مبين ما نايم وتعبان
وكفت كدامه وزهراء وكفت مسافه عنا عينها على بيبي وخالو رغم ميشوفونه
رفعت نظري اله :- شجابك وانت تعبان هالشكل .
– جابني گلبي الراح يطير وياك مشتاق انه
شكد ارتبك من يحجي بالتليفون يزيد اكثر من اشوفه بالحقيقه لساني ينربط وماعرف احجي نزلت راسي مبتسمه :- ماطول والله هو شهر هيج
زفر بضيق:- سهله عندج الشهر انه اليوم يمر عليه بسنه وانتي بعيده عني
بلعت ريكي وباوعتله واحس كلبي يريد يحضنه:- اني هم مو هين عليه اروح وابتعد عنك
اتسعت ابتسامته وعيونه تباوعلي بجرائه :- هونج على گلبي ترا اخطفج هسه واروح رايدلي حجه وداعت هالوجه اليضوي
فتحت عيني تراجعت ليورا اضحك:- عزا تخوفني مراتٍ تدري؟
ضحك بعذوبه واني فهيت صفنت بضحكته غمازته حفرت بخده زادت وسامته انتبهلي وحذرني:- لج لا تباوعين هيج وستري على روحج علويه
همست بأحراج:- شبيك شلون باوعت؟
عيونه لمعن وابتسم:- كلتيلي احبك بدون حجي .
ابتسمت ومادري وين اودي وجهي كلامه يسحل الگلب
زفر حسره واردف لا تطولين وتشلعين گلبي ردي بساع
هزيت راسي:- منطول والله فارس لا تعرض كافي خاف يصير شي
– لا حبيبه اسم الله عليج حاطج امانه عند موسى ابن جعفر ترحين وترديلي بسلامه ما اوصيج لا تطلعين وحدج ولا تطلعين بالليل
اشرت على عيوني:- صار من هاي العين وهاي العين.
عض شفته بتلاعب:- ابوسهن .
شهكت بخجل ودكات گلبي يخوضن معركه بصدري:- عزا عيب لا تحجي هيج .
– شكد ضاملج سوالف عيب اصبريلي بت الساده
– خل اروح انت ماعندك ستوب .
عيونه مرت على طولي واشرلي بعيونه على دكم صايتي:- دسديها بنطرونج طالع علويه.
دنكت اباوع مبيها شي :- اذا اسدها تضايقني بالمشي شطالع مني شسالفه.
– كون البسج بوشيه ببالي ورا الزواج.
باوعتله بصدمه:-هااا؟ مستحيل لو اموت مالبسها
هز راسه مبتسم – خير ان شاءالله يلا حبيبي روحي كعدي يم بيبيتج استودعتج الله
– يلا مع السلامه انداريت ومشيت كم خطوة رجعت انداريت عليه لكيته يباوعلي سويتله بيباي بيدي شمرلي بوسه خلاني افتح عيوني كل قوتي انداريت امشي سريع اسمع صوت ضحكته عاليه اخذت زهراء ورجعت
البنات صار اسبوعين من سافرن وحسيت بملل ووحشه عليهن البيت فارغ بدونهن انوب تعب الحمل ووالوحام والدوام رغم متساهلين ويايه وينطوني اجايز اليوم جمعة تاخرنه شويه بالنومه كعدت لگيت حيدر نازل كمت غسلت وبدلت ونزلت تفاجئت عدنه خطار بيت خال حيدر تصالحو هو وخاله ام محمد وبعد راح تنفتح رجلهم علينه مانكر ضجت لان بتهم جانت تريد حيدر رغم مشايفتهه بس مستحيل ابين هالشي بالاخير اني زوجته وشايله ببطني طفل منه لكيت مرت خاله كاعده بالمطبخ بس ماشفت احد ثاني سلمت عليها وهي كصتني من فوك ليجوة وسلمت من ورة خشمها
فتحت الثلاجه طلعت برتقاله ماشتهي اكل وكعدت اكشر بيها
علويه نهله:- يمه البرتقاله لا تكض كلب لا شي سويلج بيض جبن بيهن فايده
– خاله ماكدر نفسي تلعب منهن برتقال شويه يخفف عود بالغده اعوض
ام مثنى:- كبل نحبل وكلشي ناكل بنوات هلوكت يتمضيكن هواي عود نزاكه
رغم غثتني بس مجاوبتهه وخاله هم غلست تنظف باللحم عالسنك سمعت باب الصاله الداخلي ينفتح واجه حيدر منه ابتسم وكعد بصفي وهمس:- صباح الخير غزالي . اخذ البرتقاله من ايدي يكمل تكشير وينطيني شيف شيف بيده
شاورته بنفس مستوى الصوت:- صباح الخير حبيبي. اخذت منه شيف عاشت ايدك عمري.
حيدر:- شلونج اليوم ؟
غمضت عيوني وفتحتها اطمنه:- لا اهون الحمدلله .
بعدنه نحجي وطبت هاجر وياهه بنيه شكره وعيونها صفر كبار متروسه بس بترتيب عرفتها منتهى عيونها مثبته عليه مشالتهن وما سلمت كعدت بصف امها ووجهها صار احمر . تبادلنه اني وحيدر نظرات فهمنه بعض رجع اندار على مرت خاله:- عمه اول مرة تشوفين ليالي مو؟
لوت حلكها معاجبهه:- اي يمه الله يسعدكم..
كرصته من جوا ميز الطعام وهو ضحك الكل انتبه عليه ميعرفون ليش يضحك واحنه ساكتين كام وكف باس راسي واخذ بيدي يگومني
– يلا حبيبي غسلي ايدج حتى تسلمين على خالي يريد يشوفج
غسلت ايديه بسرعه ولميت شعري عدل ولفيت حجابي دفعني كدامه بخفه ايده بظهري ودخلني الصاله
كاعدين يسولفون مندمجين عمو ومحمد وخاله
حيدر بصوت واضح:- يابه وينه خالنه مرت حيدر تريد تسلم عليه
اندار خاله ووكف مبتسم مجامله طويل وعيونه زرك وشعره ابيض والتجاعيد معلمه على وجهه يشبه خاله ام محمد وشكله هيبه ووقار كلش
– هلا بويه هلا ولو متأخرة بس ميخالف الظروف حكمت بالمبارك بنتي الله يبارك بيكم ويسعدكم
استحيت كلش وجاوبته بصوت خافت:- الله يبارك بيك عمو تسلم .
طلع محفضته من جيبه وجر منها ورقتين دفعني حيدر اتجاهه وهمس :- عيب اخذيهن
ابو مثنى:- ماكو شي من قيمه مرت الغالي وحطهن بيدي . شكد خجلت ابد ما حب فقره الواجب والفلوس تشكرت منه ورجعت وكفت بصف حيدر
:- يلا روحي يم البنات عفتهم وطلعت اهفي على وجهي
طبيت للمطبخ ويه حجايه مرت خالهم صارت ترس بأذاني عبالك متقصده تحجي ويه دخلتي
– اي هي صارت للدايحات الي يصادقن يصيرن مرت فلان وام فلان بنات البيوت المتربايات محد يريدهن عبن ماعدهن سوالف طايح حظها يوكعن بيها الزلم
وهاجر تأيدها :- صادگه عمه.
خاله واكفه عالسنك متشوفني مجاوبت وهالشي قهرني اكثر اختنكت وحسيت راح ادمع انداريت صعدت لغرفتي بدلت وكشخت بگلبيه مرتبه لبست ذهبي حطيت مكياج وفتحت شعري وذبيت شال شلون مجان ونزلت اذا يظنون اروح اختل بعد ما حاربت اخواني علمود حبي غلطانين
كفيت رداناتي اتمخطر بمشيتي:- خاله اساعدج بشي .
– نظفي الخضره اذا الج واهس .
ابتسمت:- اي صار طلعت صينيه وطاسه جبيره وحطيت بيهن علاكه الخضرة وكعدت على ميز الطعام صرت اطلع باگه ورا الثانيه انظف
حجت مرت خالهم موجهه كلامها الي:-شكد الج عود ؟
– ٣ اشهر ونص خاله.
– بسرعه حبلتي ما انطيتي فكه لزلمه .
رفعت حواجبي على جرائتها وابتسمت بخبث:- خاله لو عليه فد سنه سنتين بس حيدر هو جان مصر يريد اطفال والحمدلله رب العالمين مقصر ورزقنا مدام الصحه موجودة اخلفله درزن اذا راد
كشت ملامحها:- يا كش بزون خما بزون.
وهنا تدخلت خاله ام محمد واخيرا:- اسم الله شسالفه رزق هذا من الله الاطفال نعمه ناس هواي تتحسر عليها بعد بكيفهم يخلفون هواي يخلفون قليل
منتهى ابد ما طلع صوتها بس ترمقني بنظرات حقد وغيره وتجاهلتها واحس عاذرتها انسان من زمان الكل يكول راح تتزوجي يروح يحب ويتزوج غيرها وكل احلامها البانيتها وياه تلاشت كبرت عقلي وكلت مستحيل ادخل وياهه بحرب مالهه داعي
دك تليفوني شفتها زهراء داكه كاميرا فتحت الخط وحطيته بالشباك كدام السنك جاي اغسل بالخضرة
– هلاو زهورة شلونكم
– هلو حب احنه تمام شخباركم اكلج شسالفه امي ادك عليها ومتجاوب
وخرت من كدام الكاميرا اشوفها منو عدنه وحجيت بصوت واضح:- بيت خالج ابو مثنى يمنه وتليفونها مادري ماشفته يمكن بالغرفه
سلمت عالكل وسولفت شوي ويه امها ودخلت ياقوت عالخط سلمت عالكل
– ليالي الجو يخبل والزياره تجنن ليش متجون انتي وحيدر تغيرون جو انتي هم فتره الوحام تعبتج والله ترتاحين
– مادري اشوف حيدر هم فكرة والله صدك تعبت من الوحام
وهنا منتهى نطقت :- يا هاي ياهي التحبل لازم تسافر والله شني الوحام تعبها جا العراق فرغ هيج.
اجه تدخل سريع من زهراء:- لا عيني مو اي وحده بس مرت سيد حيدر هاي عزيزته يدللها دلال ليالي صيحي حيدر خلي اسويله واهس
– كاعدين بالصاله زهراء وين اصيحه . اندارت زهراء على ياقوت تحاجيها . توته دكي على حيدر كليله خل يجي كدام الكاميرا وتغمزلي عرفتها تريد تضوج مرت وبنت خالها ملعونه ولا تكعد راحه
وصدك دقايق وحيدر اجه وكف بصفي اني مستمرة اعيد بغسل الخضرة انتچى بيده على كتفي يحاجي البنات
– ها ولجن شلونه الوضع
ياقوت: هلا حبيبي الوضع عال العال .
زهراء:- مكانكم خالي خالو يوميه يفر بينه ويوميه نتمشى للامام نشبع زياره
حيدر:- بالعافيه حبيبتي باعن زين مو تجن متزوجات متعه اشوي على اذانجن بصل
الكل خرب من الضحك وياقوت تصيح عزا وجهها صار احمر
وخاله ام محمد صاحت بي وتعض باصبعها متحب هيج شقه زايد
زهراء:- حيادر الحلو شنو رايك تجيب مرتك الحلوة عشر ايام وتجون تتونسون ونرجع سوة للعراق
حيدر:- ببالي والله اذا انطونه اجايز
كرصني من خدي واردف اذا هي ست ليالي ماخلت علينه اجايز ما ظن ينطونه
زهراء:- ترتيباتك تكتيكاتك انت المدير صاحبك وكعه بالخوة .
– الله كريم اشوف . ها توته ساكته
ياقوت:- ها حبيبي لا اسمعكم شلونكم الفصعون خما متعب امه
ليالي:- شويه اهون من ذيج الايام الحمدلله .
سولفنه شوي ونهينه المكالمه اندار حيدر لامه:- يمه اذا نروح ترحين صارلج هواي ما رايحه ؟
– لا يمه انه وابوك نروح وحدنه چا كلها تروح منو يظل
– براحتج بعد لاخر لحظه الدعوة مفتوحه
ام مثنى:- چا الحبله شلون تصعد طيارة يموت الفرخ
حيدر:- لا اسم الله عمه شسالفه اذا الوضع زين ماعليها شي
ام مثنى:- عود خوش
باوعلي حيدر وابتسم غمزلي:- تردين تروحين؟
هزيت راسي بحماس :- ياريت والله البنات حرمصوني اريد ازور هم؟
اشر على عيونه:- من هاي وهاي يا بعدهن نرتب الاجازة والاجراءات ونطفر. تحمست ولزمت خدة بسته حيل فتح عينه عليه وضحك وجهه صار احمر خجل لان كدامهم وهزلي راسه واني ارتبكت نسيت روحي انداريت لسنك سويت نفسي مشغوله متحاشيه نظراتهم رجع حيدر لصاله اجت منتهى للبراد قريب عالسنك وهمست بصوت تعرف زين راح اسمعه:- شكد بربوك
غمضت حيل تمنيت الطش طاسه الخضرة براسهه بس باوعتلهه وابتسمت ببرود وعفتها ورحت كعدت وهي كعدت بصف هاجر يتوشوشن طبيعي يتوالمن نفس السم والحقارة
خاله راحت تصلي وام مثنى تبرعت تطبخ التمن رغم محد طلب منها بس الظاهر متعودة وماخذة ميانه تطبخ وتوكف عالطباخ رحت للحمام وطلعت لكيت حيدر واكف بالصاله الوسطانيه ومدنك راسه يهزه ومنتهى واكفه يمه وتأشر على تليفونها صعد الدم براسي واقتربت منهم اريد اعرف شتريد
منتهى:- اي والله ابن عمتي وقفل الرمز من ورا جهال مثنى لعبو بالرمز وهسه مدري بلكي تودي لابو الموبايلات هذا العدكم براس الشارع يفتحه الي
حيدر:- خير ان شالله عود نودي.
حاوط كتفي وقربني منه يعصر بزندي يعرف اعصابي فارت وترخص من منتهى واخذني نصعد لغرفتنه اول ما طبيت الغرفه شمرت حجابي عالسرير وانداريت عليه احجي بحرگه عاوجه حلكي واشر بيدي:- بلكي تودي يفتحه فتحو راسج كون ماكو غير حيدر ام دودة
ضحك ولزمني صم حلكي بيده:- ولج ولج لسانج شني هالالفاظ ليالي عيب
وخرت ايده وعضيتها :- شعندك واكف وياهه ها اخطبها الك حبيبي خاف عاجبتك
لزمني من خصري ولزكني بي؛- ليش عيوني وكلبي يشوفن غيرك يالغزال
ضحكت العب بدكم دشداشته:- اضحك عليه بسوالفك واني اكبر قشمر
عض خشمي وباسني :- افا صرت اضحك عليج ولج انه حيدر انه الحبيب
رجع باسني من شفتي وايده بدأت تتجرأ بعدته عني ادفعه واضحك:- حيدر عيب مو وكتها راح يصبون غده ويصيحون
غمزلي وصوته انخفض:- خليني اتغده بيج مارايد غداهم .
ضربته على صدره:- منحرف امشي ننزل .
كعد عالجربايه يحجي بجديه :- خابرني فارس قبل شوي.
عكدت حواجبي مستغربه:- خير اكو شي؟
باوعلي مضيق عيونه:- معقوله ما تدرين؟
زاد استغرابي :- لا والله شكو؟
– تذكرين من اجاني قبل فتره خابرني هسه يتطقس
هزيت راسي بأي اتذكر وصار يحجيلي الحديث الدار بينهم
– خابرني كالي عندي موضوع جايك بي مخصوص واجه كعدنه وسولفنه وضحكنه وقبل لا يروح فتح الموضوع
فارس:- سيد حيدر انت صرت تعرفني صار بينه زاد وملح وجربتني
– والنعم منك حبيبي زلمه معدل .
– سيد انه قبل كم سنه طلبت القرب منكم ووكتها اجاني الرد بالرفض ماريد اسأل ليش بعد راحت هي واسبابها
وسمعت من اخيتي قسمه العلويه ما صارت رب العالمين ما كتبها
واليوم انه اجيت عليك بذات مو انتقاص من الساده ولا اجيت وحدي اقلل من مقامكم لا والله مقامكم عالي وچبي
بت الساده تستاهل نمشي العراق كله حتى نطلبها بس ردت حجي من اخ لاخو وانت ان شاءالله اخوي واقربهم الي
ماردت افشل اهلي وعشيرتي مثل المره الراحت .
انه جاي عندي دين يمك ورايد ارده سيد طمعان بنسبكم والقرب منكم واجدد خطبتي للعلويه واني حاضر بلي تأمروا
– الصدك فاجئتني وماعرف شگلك انت زلمه ما تتعيب اي واحد ينطيك وهو مغمض بس
– بدون بس سيد لا تجاوبني هسه تناقش انت والاهل والساده وردلي جواب سكت ثواني فرك كصته بتوتر ورجع شعره ليورا واسترسل يكمل كلامه. الرجال يتمنى مرة صالحه تشاركه حياته وتربي جهاله ومالكه احسن من نسبكم
– فارس الله شاهد ماعندي مانع بس العلويه طلعت قبل كم شهر من تجربه اذتهه هواي انه جاي احجيلك لان امون عليك غير واحد ما احجي هيج ويا عن اهل بيتي بس ما ظنها تكدر تتزوج مو هسه حاليا تدرس وتريد تتخرج
– تتخرج شنو المانع انه خواتي دراسات والصغيره السنه تتخرج وانه ما امنع بنيه من الدراسه
– الله كريم احاجي الوالد واخوتي وان شاءالله خير. وراهه استاأذن وراح
ليالي:- شنو رأيك انت ؟
باوعلي بشك:- اشو ما تفاجئتي ؟
– تريد الصدك لو ابن عمه؟
– هو كالي يريدها بس ما ادري محاجيك والله فارس قصده شريف لا تباوع هيج يعني بنيه حلوة ومؤدبه واهلها ناس محترمين شافهه كم مرة وفارس متعجبه اي وحده ترا هواي عرضوا عليه بنات كرايبنه بس ماراد كلهم يتمنون يخطب منهم لان انت تعرفه شنو
فرك كصته بحيرة:- حاجيت ابوي والولد بس محمد ومصطفى ما راضيين يعز عليه ارده وهو سعى وتعب حتى اخذج.
هتفت بانزعاج:- ليش غير افتهم شنو الناقصه شهاده عنده منصب عنده ترا راح يترقى ويصير رائد وعنده خير من الله شبي ويرفضو جربتو الكرايب ورغم ما تحجون شلون فسخت بس واضح مأذيها
هب واكف من مكانه :- خلي ترجع وارجع افتح السالفه كدام الكل ونشوف اذا اله قسمه عدنه بيها الخير
امشينه ننزل يلا واكلي زين لا تظلين تنقشين بالاكل شايله روح ببطنج الها حق عليج
نزلنه واني شايله هم فارس بكلبي اذا رفضوا يتخبل ودعيت ربي يسهل ويقبلون وينجمعون .
شكد الواحد يتظاهر بالقوة من يمر بي ظرف يكسره بس لابد تجي لحظه يتجرد من هذا الادعاء ويظهر ضعفه بيت بيبي القريب من الامام الرضا عليه السلام انطاني الفرصه اعبر بيها عن قهرتي يوميه العصر نلبس عبينا اني وتوته ونروح نتمشى للامام واكعد ابچي بحضرته واشكيله واحسه يسمعني جاي احاول اتخطى الصار بس يوميه ينعاد كدام عيوني من احط راسي عالمخدة اختنك بحسرتي ودموعي
سديت طباكات عباتي وطلعنه اني وتوته مثل كل يوم نتمشى هنا عادي البنات يروحن يزورن ويطلعن وحدهن بعدنه بالفرع وشفته يتمشى ناحيتنه هزيت راسي وعيوني مفتوحه بذهول لزمت ايد توته :- هذا شعنده هنا شعنده
ياقوت:- اوكفي لا تصيحين خل نفهم ..
اقترب من عدنه وصار كدامي شكله غير ونظرته . مو نظرات حر الي اعرفه تختلف عن قبل كلشي بي يختلف
– السلام عليكم.
تصاعدت الدموع لعيوني والم حقير اصاب معدتي من شده كرهي لشوفته:- لا هله ولا مرحبا شعندك هنا شعندك
باوعلي بترجي :- زهراء لازم نحجي لشوكت تتهربين مني حتى من تليفونج حاضرتني
ياقوت:- حر عوفها متريد تحجي السويته مو قليل ليش جاي هنا اهلك اهلي يدرون بيك؟
هز راسه نافي:- محد يدري الصبح وصلت واختج ما تنطي فرصه احجي
جاوبته كازه على سنوني واباوعله بحقد:- شنو تريد اسمع شلون خربت خطوبتي شلون هنتني كدام الكل؟
جاوبني بنبره خفيضه ونظره ذابله:- لج افهمي احبج والحسين احبج ماكدر اشوفج تصيرين لغيري
ضربت على فخذي حيل وصرت الوب بمكاني وباوعت لياقوت:- هم كال احبج هم كال انت عقلك بي شي هيج فجاة بيوم خطبتي نزل عليك الحب بچفيه من السمه
صوته ارتفع بنفاذ صبر:- لج من عمرج ١٥ احبج من يوم الي تحرش بيج هذا الزعطوط بطريق المدرسه فار دمي وغرت عليج رغم انتي جاهل وعرفت نفسي احبج صارلي سنين انتظرج بس تكبرين وتحسين بيه وبلوعه كلبي تحسين بلي كاتمه
اندرايت ارجع للبيت امشي سريع لحكني وصار يحجي بعصبيه:- باعي لج والحسين لغيري متصيرين كاعدلج ركبه ونص اريد اشوف كلب ابن كلب يجي يخطب انوب اسويها عليج كربلاء سيد حر انه ما يوم حجيت حجايه ما نفذتها
ياقوت:- يمعودين مو هيج لخاطر الله العالم تباوع زهراء على كيفج امشي
وكفت بمكاني وباوعتله صرت بمواجهته وابتسمت ببرود وهمست بتحدي:- اذا انت سيد حر اني علويه زهراء
ابتسم :- علويتي العرمه
ضحكت باستهزاء:- احلامك اصير علويتك تعرف شنو احلامك اكعد يم بابا واعنس طول العمر وما اصيرلك مرة
فرك لحيته وابتسم صفح:- اذا انتي راسج يابس انه راسي حجر والاريده يصير الي وبنفسج انتي راح توافقين تصيرين الي واذكرج ام خشم اليابس
