رواية قانون القلب اقوي الفصل الثامن 8 بقلم رسل احمد – تحميل الرواية pdf

(((اذا تنفذون الشروط الي كاتبتها نهايه البارت باجر انزل بارت )))

عندما وقفت هناك

كنت جسدا ثابتا يدعي اللامبالاة

ولكن كل شيء بي كان يركض اليك

كطفل تاه في سوق ثم راى والدته

بين جموع الناس

ظل صافن بعينها:- زهراء انتي ليش ماعندج احساس؟؟؟؟

بلعت ريگي مستغربه واحجي بگلبي هذا شبي جاوبته من ورا خشمي:- بشنو ماعندي احساس بله؟

فرك لحيته وقهقه:- ماعندج احساس شكد مزعجه وهواي تلغين حتى الواحد من يحاول يجاملج تجفصين بيها …

فتحت حلكي بصدمه واشرت على روحي:- هاي عليه اني.. ترا اني بدوامي على حب الله وانت الي جاي مندك بيه شتريد اسكتلك؟؟

اصلا انت شعندك هنا؟

رفع فايل كدامي:- ما جاي علمود خلقتج جاي علمود بنين اسويلها استضافه للصباحي ومارهمت لازم عالسنه الجايه

بوزت بوجهه مستحيل اكدر اعبرله حجايه تصير بيه حكه اذا اسكتله:- لا عليك الله تعال يوميه علمودي اذا ما شوف وجهك ماعرف اداوم …

ضحك هاز راسه :- والقران خبله ،علويه صيري حبابه.

جاوبته:- سيد لا تندك بيه اطلع خبال الساده براسك علويه زهراء اني على سن ورمح

ابتسم ابتسامه عريضه:- والله ونعم منج علويه زهراء خبله ومخبلتني هم

يلا لج لقسمج ماعدنه بنوات يفترن

كشرت بوجهه :- ديلا ادعبل باي مشيت مسافه وحسيت لازم انهي السالفه الصارلهه سنين واريح كلبي . انداريت عليه لكيته على وكفته يباوعلي رجعت وكفت كدامه

سألته بتردد:-حر انت عبالك صدك اني عندي علاقه باحد ترا والله اني ما مسويه شي وبيومها جنت دامشي وهو هذا الولد مدري شگال واني جنت صغيره وضحكت وعلى حظي صارت كدامك بس ترا والله ماعرفه

ابتسم:- اعرف كلش زين ولو اني شاك واحد بالميه عندج شي ويا جان شفتي تصرف ثاني

سألته بفضول:- شتسوي قابل تضربني؟؟؟

حر:- جان اول شي اخبزج خبز العباس ارجعج للبيت كفخات واحطج بحلك ابوج واخوتج وتعال يحر اتزوجها واستر عليها وابتلي بيج

كشرت لعبانه نفسي:- اييع اتزوجك شبيه تخبلت ما اخذ واحد اجلح جهالي يطلعون مو حلوين اريد اشكر حتى نخلف حلوين..

حر:- ادبسزز شني ايع مو بعينج انه مو اطيح حظج وكدامي تكولين اريد اشكر ولج امشي ولي انتي مو مال واحد ينطيج عين تكومين تجفصين ولي ولي لا بارك بيج عافني ومشه سريع متعصب يتعارك ويه ذبان وجهه حسيت روحي صدك جفصت يلا عادي مهم عرفت بعد ماخاف من سالفه ام العلاقات الصارله سنين يذلني بيها

——ياقوت—-

شكد صعبه لما الانسان يخوض حرب داخل گلبه اني حربي مستمرة مابيها اي هدنه اتمنى هاي النار الي بگلبي تطفه وانساه اتمنى اعيش طبيعي شهور واني ادوس بنفسي تعبت واني اشتاقله تعبت واني اكره سيف اكثر تعبت واني كابته كلشي بگلبي يعني معقوله اعيش حياتي هيج بهذا الالم هاي الهوسه الي براسي شوكت تهدأ

يوميه ابررله الصار بيه بخيالي قبل نومي احجيله الصار بيه اشكيله مظلوميتي بس مالكه جواب، يمكن نساني واكيد كرهني كره عله گلبه

واتسائل على شنو يبقى يحبني ويذكرني مشاف مني غير الشين صد وتردد حتى مشاعري مجنت احجيها اله واخرتها خطوبتي .حتى دموع مبقت انتهت طاقتي ..

حيدر اخوي رجع لسالفه خطوبته وهالشي فرحني شويه وطلعني من حالتي وصار عندي امل عالاقل اخوي يحصل حبه سولفنه اكثر من مرة وگلي دخل ناس اقارب ليالي واسطه حتى يوافقون وبابا من شاف اصراره ما منعه ووگف وياه على هذا الشي رغم تذمر علويه نهله لانها تكره اي شي بي عرضه وتتشائم حسب قولها بس مع ذلك سكتت حيدر رجال واعي متكدر تفرض عليه شي عكس ارادته

كاعده اكتب مذاكراتي افضفض بيها شفت دكتور نفسي على اليوتيوب يكول اذا ماعندك احد تحجيله احجي للورق وهذا الي گمت اسوي يوميه افضفص لدفتري صار صديقي الملازم الي خاصه وقت الليل اكعد احجيله واشكيله وحتى ابچيله وراهه ادفنه بمكان محد يوصله مالي خلك زهراء تلگفه وهي مثل الچيس المزروف متعرف تضم حجايه بگلبها .. ثاني يوم جانت سفرتنه لكربلاء خلصت امتحانات اخر السنه وكالعاده نروح هناك نشبع زياره ونشوف الاقارب

وكف كرار بباب غرفتي المفتوح :- ها وين جنطتج خل انزلها ويه جنطه زهراء

اشرتله بصف الكنتور:- هياتهه ..

اقترب مني واكفه كدام مرايتي الطويله البس بحجابي لزمني من أكتافي ودارني عليه ….

كرار:- توته ؟؟

جاوبته متهربه من عيونه:- ها؟

كرار:- ليش زعلانه يبعد چلاي..

ابتسمت بحزن اباوع لوجهه الحلو شلون نظراته تنتظر مني جواب والقلق واضح عليه:- مابيه گليبي شبيك وين الزعل بالموضوع..

بوسني من عيوني اثنينهن:- صارلي هواي ماشفتهن يضحكن صدك ،عبالج الدوام ماخذني منج وماحس بيج احس بيج حتى وانه نايم

غوركن عيوني ونهرته بضربه على كتفه عن فعلته:- ليش تبوس عيوني . بوسه العين فراك

ضحك بصوت عالي:- باقي على گلبج لتخافين .

مسحت عيوني وانداريت اكمل حجابي :- يلا اخذ الجنط محمد ميتحمل ينتظر هواي يكوم يدردم

نزلت جوة لكيت الكل متحضر حتى بيت عمي ابو حر موجودين وزهراء كالبه خلقتها لان متتوالم ويه حر ابد عبالك ضراير وحيدر اول مرة من السنه الراحت اشوفه مرتاح ومبتسم دعيت ربي يتممها ويفرح گلبه تعب هواي

صعدت بسياره بابا وزهراء مورثه تتخوزر هي وحر الي كل شويه يغثها ويرجع يضحك عليها

حطيت سماعات بأذاني كل مرة اكضي طريق كربلاء اسمع قصايد بس هالمرة طلعت اول اغنيه دزها الي عبالك اريد اعذب نفسي فوك العذاب والعطاب الي بگلبي واجلد ذاتي ..صوت المطرب الشجي صار يغني

من تزعل .. من تزعل توحشني الدنيا

سندت راسي على صفحه وغمضت وغطيت وجهي بحجابي دموعي صارت تجري واحسها تچويني عبالك تيزاب مو دمع حسيت كل كلمه منها عتاب منه يعاتبني كم مرة خذلته وكم مرة اذيته وكم مرة صديته وهسه جاي ادفع ثمنهن وحدة وحدة اختنكت بدموعي اكثر من وصل مقطع

حبيتك.. حبيتك .. وانه ادري بگلبي مايكدر يكتم اشواكه

حبيتك وانه ادري بدربي ويه دروبك ما يتلاگن …

بس حبك قدري المكتوب شوف شكد حملني ذنبوب

ماكدرت اكتم اكثر وصرت اشهك بصوت وانتبهو عليه نزلت زهراء حجابي من وجهي وباوعتلي مصدومه جرت التليفون والسماعات من اذاني وحطتهن باذانها من ورا الحجاب .. باوعتلي بنظره اقرب للشفقه

ابو محمد:- اسم الله بابا شبيج ليش هالبچي ؟؟

جاوبت زهراء عني وانقذتني:- بابا جاي تسمع القصيده الي تحبها بيبي الله يرحمها..

انخفض صوت ابو محمد بحزن وهمس:- الله يرحمها

اندارت عليه امي وانطتني بطل مي:- هاج شربي يلا ماما كافي واقريلها الفاتحه ….

شربت المي وقريت الفاتحه بس قريتها على گلبي الجاي يموت باليوم الف موته ودعيت ربي يسامحني لان افكر بي واني على ذمه رجال ياربي سامحني واغفرلي يارب والله ما سويت غلط بس ما على القلوب سلطان ومجاي اكدر اتحكم بگلبي ….

اقتربت مني زهراء وحطيت راسي على جتفها وشابكت ايدي ويه ايدها اعرفها تريد تسألني كالعاده بس متكدر كدام ماما وبابا غمضت عيني

ورجعت بأفكاري لذاك اليوم ، اليوم الي عرف سيف شلون يخليني ارضخ

——قبل ست اشهر——-

صارلي يومين محاجيه ويه فارس زعل وزعلني فكرت اتصل بي واكسر القاعده اعرف شكد يريد تتم خطوبتنه بس اعرف بهالوقت صعب لازم اعرف شلون اتخلص من سيف حرت حيرة چبيرة وحقدت على سيف صايرلي مثل العظم الي يوكف بالزردوم بحياتي

اصابعي ترجف بس كلت ميخالف بلكي اذا نحجي بهدوء وتحضر يفهم كلشي شلت الحظر عنه ودكيت عليه ايديه صارن مي من التوتر بحياتي ما داكه عليه ماطولت الدكه وكبل جاوبني ولهفه صوته وصلتني

— ياقوته داكه عليه بعلم حلم ؟؟

— سيف لازم نحجي ونلكه حل..

— نحجي يبعد الروح نحجي امريني حبيبه..

غمضت عيني حيل اكره كلامه اكره سوالفه اكره غزله

— سيف شوكت تعوفني بحالي والله حرام عليك …

نبره صوته تغيرت واحتدت يمكن كل ظنه اني مخابرته اكله تعال راضيه وقانعه

— مخابرتني علمود هالحجي الماصخ..

— سيف انت مو تكول تحبني الي يحب ميأذي الحب والاذيه ميتواجدن بگلب واحد ليش دتأذيني خليني امشي بحياتي …

صرخ بيه بصوت عالي:- هاا تردين تمشين بحياتج ويامن ان شاءالله ويه النقيب؟؟؟؟

— معليك ميخصك ويامن بس اريدك تتركني بحالي يا اخي ما احبك مو گوة مو جبر ما احبك ولا راح احبك …

— چا تحبين منو النقيب مو

وهنا جانت غلطتي استفزني خلاني اشوط وجاوبته باندفاع

— اي احبه .. وماحبك يلا ارتاحيت واذا انت رجال صدك تعوفني لان گلبي مو وياك ويه واحد ثاني …..

— يصير خير يصير خير….. سديته منه ورجعت حضرته واكل بروحي هسه اني شجاني حجيت هيج اجيت اكحلها عميتها وخليته يحقد انوب خفت يروح يسويلي فضيحه بعدني بدوامه تفكيري وطبت هاجر وجهها ينطي الوان ميتفسر

– انتي شمصخمه؟؟؟؟

—شكو

— شحاچيه ويه سيف يعني الا يلوحني طشاركم وينهجم بيتي يلا ترتاحين

— شكو شبيج ؟؟

فتحت تليفونها وايدها ترجف وفتحت التسجيل سيف مسجل مكالمتنه كاامله وصوتي واني اعترف بحبي لفارس ترس اذاني

صرت ارجف برعب ماتوقعت يسويها ليش ديسجل المكالمه

باوعتلي هاجر بخوف حتى هي خايفه :- فتحي الحظر وجاوبي واتفاهمي ويا كافي ياقوت هذا التسجيل اذا طلع حتى اني حظي يطيح

حسيت نبض گلبي صار بطيء وصدري ثكل بلكوة اجر النفس اباوعلها بعيون مفتوحه حيل لا بيه ابچي لا بيه اصرخ نذل والله اكبر نذل ويسويها ويدزهن لكل الولد معناته ابويه ينجلط ويموت

فتحت الحظر هو كبل دك عليه عبالك كاعد ينتظر ويعرف ومتأكد عرف يلوي ذراعي

واول ما فتح الخط ضحك ضحكه قذرة وخبيثه بيها اطنان من التشفي والشماته:- متجين الا بالعين الحمرة باعي لج باجر نجي ونخطب وتوافقين خاف قبل جنت مستقتل عليج لان احبج هسه لا صارت تحدي تحطين راسج براسي اكسر راسج وهذا لسانج الي نطق وكال احبه اذا ما اقلعه من عرجه ادبسزز ولج ياقوت اشرب من دمج وما يبرد كلبي

الغضب الي بصوته يشرح هو يعني كل كلمه لدرجه صار يكح من الصراخ

همستله بكره:- وسم الحسن ان شاء الله تشرك وتموت بأنفاسك …

— اي احجي احجي طالعلج لسان كلهن اسجلهن براسي وحدة وحدة واطلعهن من بين عيونج الحلوات بس اصبريلي يلا ولي باجر حضري روحج وسده بوجهي..

من الصدمه والخرعه بيومها مانزلت مني دمعه وقفلت تليفوني ظليت سهرانه للفجر ماكدرت اغمض كمت صليت الفجر ونمت على سجاده الصلاه ساعه او ساعتين فتحت على صوت زهراء

— هاي شبيج نايمه هيج يحظي ؟؟؟

فركت وجهي اكوم وانزع الچادر:- صليت وغفيت محسيت على روحي.

:- تعاي ننزل نتريك سوة..

نزلت وياهه احس روحي مسطورة مدري شبيه مثل الي متبنج ميحس بشي مكدرت اكل وهاجر عيونها عليه تريد تفهم مشاعري

بابا كاعد وبيده استكان الچاي يخوط بي وحجه موجه كلامه للكل:- اليوم بيت عمتكم يجون عالغده مصطفى جيبلنه سمج مسگوف عمتك تحبه

مصطفى:- اي يابه ان شاءالله ..

باوعلي يراقب رده فعلي واني مانطيت اي رده فعل :- ياقوت بابا لحكيني للغرفه…

احس انطعنت بسيخ حار بمعدتي عرفت شنو يريد يحاجيني هزيت راسي بأي وكمت وراه …

كعد على حافه سريره وكالعاده طبطب بصفه حتى اكعد كعدت واني اعرف كل حرف راح يحجي لزم كصيبتي مسدها وباسها ابتسمت بوجهه وكلبي يگلي اذا سمع صوتي يحجي بصلافه شلون احب راح يظل هيج يبوس كصيبتي بلعت غصتي منتظرة كلامه

— باعي بابا اعرف الصار السنه الفاتت مو شوي عليج بس الولد صارله سنه يعتذر ويحلف ويتكفر مو قصده وخطبج مني هواي واني ارده

بس البارحه خابرني وحلفني نكعد نسولف انه وياج وراهه هو راضي وبعد ما يحجي واخر مرة يفتح الموضوع

ابتسمت بمراره يعرف شلون يلعب وهو ضامن جوابي

— بنتي الولد شاريج وحلف مستحيل يأذيج بكد شعره وحتى اذا تردين تعيشين هنا وما تروحين لكربلاء هم راضي رغم اني مارضيت يعوف حلال ابو وشغله صعب اطلب منه هالشي…

ابتسمت بزيف وبست ايده الله وحده يعرف شكد جاهدت حتى تطلع الجمله من حلكي وصوره فارس كدام عيوني ابتسامته ونظراته جريت نفس عميق يوجع صدري:- الي تشوفه بابا انت الي تقرر…

شفته يتفاجأ ما متوقع ردي وسألني يتأكد:- متاكدة بابا؟؟

هزيت راسي:- اي بابا ..

لزمني من وجهي وبوسني من خدودي :- الله يرضى عليج بابا

كمت وكفت:- محتاج مني شي بابا لو اروح.

— لا حبيبتي اخذي راحتج ……….

طلعت من الغرفه وسديت الباب وكفت مستندة عليه ونفسي صار يتقطع وبلكوة اتنفس حطيت ايدي على صدري احس كلبي حيطلع من مكانه والصاله بدت تفتر بيه فركت وجهي وتمشيت للمطبخ غسلت وجهي عالسنك ظليت اضرب بالمي على وجهي حتى هدومي نكعت

اسمع صوت المكناسه الكهربائيه من الصاله زهراء تنظف وهاجر بصحيات تنظف طلعت حرگتي بالمطبخ ظليت اجلف اي شي اشوفه كدامي لحد ما اديه صارت تحركني من المنظفات كملت وصعدت لغرفتي

وقبل الغده وصلوا بيت عمتي وجانت سعيده وكل شويه تلزمني تبوسني وتحضني ورا الغده اجوي كل عمامي وعمام سيف الي هم بالاساس ولد عم بابا مو غربه وصارت كعده كرار وحيدر جانو رافضين

وكرار يريد يحجي بموقف الجامعه وابويه يسكته ميريد احد يعرف

دخلو كرار وحيدر من باب الصاله الداخلي واثنينهم وجوهم مگلوبه

اخذني من ايدي حيدر وكرار يمشي كدامي يصعد الدرج وصعدوني وياهم

دخلنا بغرفه حيدر باوعلي بتفحص:- ياقوت ادري الضغط عليج صار بفلس بس ترا ما مجبورة توافقين

كرار يصفك ايد بيد بعصبيه:- لج نسيتي عملته الجايفه شلون تقبلين …

فركت ايديه وبلعت ريكي متهربه من نظراتهم:- يمكن هاي قسمتي ونصيبي ويجوز انسعد ويا ….

عاط بيه كرار:- ولج انتي ماتردي . ماتردي شغيرج

انفتح الباب ودخل ابوي وجهه احمر من العصبيه:- ولك كرير ادبسزز تتصايح كدامي

كرار :- بويه احنه مو اتفقنه ماله مره عدنه شرجع فتح الموضوع انوب اني ماقابل كوة ما قابل ما اجرعه لسيف مو انوب اطي اختي واسوي نفسي ولا چن مسويله سالفه هالكبرها …. هز راسه حيدر يوافقه الرأي

صاح بي ابوي وهو يفتح دكم دشداشته:- تعارضني وتعلي حسك كدامي ولك… تهاوى كعده عالسرير عرفت ضغطه صعد ..

ركضتله الزم ايده :- لا بابا مو قصده والله مو قصده اني موافقه والله عباله احد ضاغط عليه …

بيومها ابن عم بابا عقدلنه بوكاله بابا وعمتي تهلهل وفرحانه واني فاصله بغير عالم حتى احساس احس ماعندي بدون تحضيرات ولا شي

سيف جان راضي نعقد بأي طريقه مهم تصير

رجعت لواقعي زهراء تهز بيه :- ياقوت كومي وصلنه

رفعت راسي اباوع واكفين كدام بيتنا إلي بكربلاء نزلت بوجهي لغرفتي نظفتها من التراب وحطيت راسي ونمت بدون ما انزل

—-زهراء——-

كل سنه اتحمس من نروح نبقى بكربلاء اسبوع الا هالسنه لان الغثه ويانه ماعرف ليش يستمتع من يشوفني افور اول ما وصلنه ياقوت صعدت تنام اعرف بيها تعبانه هواي بچت بالطريق حيرني امرها

كاعدين كل الولد يلعبون دومنه بالحديقه ومحمد منفعل من يخسر يظل يصيح عليهم ومصطفى ومجتبى يضحكون وهو يفور بزايد واحنه بصاله نباوعلهم من الشباك ونضحك حاطين فواكه وتعلوله بعد العشه

اجه هاشم :- عمه زهراء بابا يكول خل زهراء اسوي چاي ثخين

ذبيت البرتقاله من ايدي :- اشتعلت لشه زهراء ابتلت تعرف تسوي چاي

كمت للمطبخ وخدرت باكبر قوري عددهم ما شالله وكلمن يدور كلاص ما يقتنعون بالاستكاين… حضرت الكلاصات والشكر وانتظر الچاي يخدر اجيت اروح للصاله شفت باب المنور مفتوح والحديقه الورا كاعد بيها حر يدخن … اعوفه واروح انچب لا مستحيل تمشيت ناحيته وانتجيت على حافه الباب احاجي

:- ها شبيك متكعد ويه الولد لو بيك توحد ..

رفع راسه باوعلي بنظره ماعرفت أفسرها وصاح بيه:- اوكفي عدل لج ..

وكفت عدل ونزلت ردني :- شبييك جفلتني ؟

سحب نفس من جكارته:- طبج طوب .اكو وحدة محترمه تتماوع بوكفتها هيج بعدين شعليج بيه توحد بيه جرب بيه نعل ولي من خلقتي

— انت ليش ماعندك اسلوب ويايه من دون البنات عود انقهرت عليك عبالي بيك شي هزيت ايدي معاجبني وانداريت اروح صاح يستوقفني

— اوكفي تعاي هنا

— انداريت عليه:- شكو ترا مالي خلكك الچاي راح يحترك .

جر حسره وهمس:- والله محد محترك غيري بس منين اجيب احساس للماعنده حس..

باوعتله باستغراب صارله فتره مدري شبي يمكن يحب ومضروب بوري وانقهرت عليه اني صح اتناكر ويا لان طبعنه هيج بس اعرفه خوش رجال ومحترم اقتربت منه فاتحه عيوني بفضول واحجي بحماس:- حررر عليك انت انت جاي تحب… ظل صافن متنح بوجهي

شبيك دحجي شنو مضروب بوري؟؟؟

جاوبني بحسرة وصوته ناصي:- اييه شلون بوري من هذا الزين

— ماتحبك؟؟؟

— لا ما تشوفني اصلا مو ما تحبني ما مصارحهه.

— لسانك يمي شطوله وما تعرف تصارح شلون تشوفك اذا انت ما مصارحهه روح كللها يابت العالم اني احبج وتزوجها .

— ها هيج تكولين؟

جاوبته بحماس:- لك شبيك تظل مطفي اي صارحهه هي تلقائيا مشاعرها تتحرك ..تسيح وتسرسح احنا البنات قشامر.

حر:- احبج واريد اتزوجج..

هزيت راسي اوافقه:- اي بس مو هيج ناشفه شويه احجي بمشاعر لمح مو كبل هيج تشرد البنيه يعني صير رومانسي وردة صخام ولو انت ماتطلع منك بس الرزايل…

ذب جكارته زهكان :- زهراء روحي.. روحي لخاطر الله معليج. راسج نايم بي مطي

باوعتله مكشره فوك ما انصحه هو اني هم صوجي عبالي ادمي انداريت امشي ويه ما عبرت الباب انداريتله امداك ابو العلاقات وطكيتها ركضه للصاله حتى مالحك يجاوبني ذبيت صب الچاي براس بنين وظليت كاعده بصف امي

علويه نهله:- كومي كعدي اختج تاكل لكمه ترا لا ريوك ولا غده

ام حر:- يا شجاهه..

تحسرت ماما بصوت عالي :- راح تموتني خيه هالبنيه مدري شجاهه فجاة انگلب حالها قبل ارزل بيها منا تجي تبوسني منا تفتر بالبيت وتضحك للهوا هسه ساكته لا اذن تسمع ولا حلك يحجي ولا اكل لا شرّب وطايحه علينا كل فترة

ام حر:- خيه كطعيلها خاف محسودة شي..

— كطعتلها ومافاد

زهراء:- ماما هذا يسمو اكتئاب ما قبل الزواج

علويه نهله:- لو يتحول الج يزمو ونخلص من هوستج

ام حر:- لااا نهله كلشي ولا زهورة ملح البيت هي ترا ما ارضى عليها

نزلت ياقوت تمشي على كيفها مسطورة من نومه المغرب والليل كعدت بصفي وحطت راسهه بحضني تغمض حيل من الاضويه

صاحت بيها ماما:- كومي حمي اكلج واكلي اكو برياني ودجاج شوي

—ماشتهي ماما مجوعانه رفعت راسهه وكعدت .راح اكل برتقاله وكت متأخر ماريد اثكل معدتي تتخربط وكعدت تكشر برتقاله وتتصفن وتاكل

ثاني يوم طلعنه للامام زرنه وظلينه الليل كله هناك كضتها كاعده بالصحن ودموعها تجري بصمت وتقره بكتاب الزياره

رجعنه للبيت وهي صخنت وتون بالفراش سبحان الله كلما تجي هنا تتمرض

—- ياقوت——

ندك باب الغرفه ودخل حيدر مبين بحلكه حجي اجه مدد بصفي وباسني من راسي حيل

باوعتله :- شبيك حبيبي .

باوعلي وعيونه تلمع بأمل:- ياقوت ليالي راح تصير مرتي ..

كعدت عالسريع وحسيت بفرحه جبيرة غمرتني نستني حتى الصخونه

:- شلون وشصار ..

هو هم كعد فرك وجهه بسعاده:- مو كتلج كرايبهه تدخل ..التقينه وطلع عرف ويمكن اخوانها اقتنعوا صارلهم شهر معندين وكعدات واليوم يرجعلي الاخبر الاكيد…..

– حبيبي والله هواي دعيتلك بالامام الله يجمعكم بحلاله اقرب وقت

من الفرحه كمت اني سويت ريوك وكرار كل شوي يجي يبوسني لو يكفخني

بعدنه نتريك وطب سيف يحجي بالتليفون وعصبي ظل واكف بالحوش ورفع ايده سلم واندار يكمل مكالمته

كم دقيقه وطب ودخل يغسل يم الصحيات وصاح :- ياقوت بلكي خاولي

اعرفها حجه منه بس حتى يختلي بيه ويسمنني بكم حجايه

رحت لغرفه امي طلعت خاولي ورحتله واكف كدام المرايه غاسل وجهه ومنكع شعره ويعدل بي بأصابعه اندار عليه وابتسم:- ها حلو لا؟؟

هزيت ايدي وعلكت الخاولي وانداريت اطلع اجاني صوته:- شكد شفت ناس ماعدهم گلب مثلج ماشفت ابد ما تحنين

انداريت عليه:- كل الي سويته بيه وتريد احن ؟

اقترب رفع وجهي باصبع واحد عيونه تباوعلي بهيام عكس النفور الي بعيوني:-مستعد امسح كلشي صار وكلشي گلتي وادللج دلال مصاير بس انطيني امل تحبيني او تتقبليني

نترت وجهي من ايده مبتعده ما اتحمل قربه:- جاي تطلب المستحيل ارتبطنه وانت تعرف بيا طريقه خليتني ارضى بيك وهذا الي راح تشوفه لا تتوقع اكثر انت ابد ما انطيت فرصه لاي تحسن ممكن يصير بينا..

زم شفايفه بغضب مكتوم:- الوكت يعلمج تحبيني ..

مجاوبته ورحت للمطبخ حلفت ما يعكر مزاجي فرحانه لحيدر

——ليالي——

لزمت تليفوني اصابيعي ترعش بتوتر ماعندي غير هالحل صار سنه وحيدر بعد ميصبر خاصه بعد ما اعلنت فسخ خطوبتي الچذابيه بالدوام

ماعندي غيره بس هو يأثر على اخوتي لان يحبو ويحترمو توكلت ودكيت

– يابه اليوم ست ليالي ذاكرتنه

– عيشتي اذكرك صديقي الصدوق بس انت متغير..

– تنهد بصوت عالي:- والله يابه حقج مهم شعندج داكه هالوكت انتي مو بالدوام؟؟؟

توترت ماعرف شلون اكله:- اريد احجي وياك بموضوع مهم تكدر تجيني لدوام

صوته تحول لنبره جديه وقلقه:- شبيج ليالي خما اكو شي احد وياج؟

– فارس انخاك لو انخى الذيب؟

– افا يخسى الذيب كولي عين اخيج..

– تعال واكلك

– جاي يابه جاي

انتظرته على جمر اطكطك بصابيعي ماعرف شلون افاتحه بالموضوع واقنع روحي هو متفهم وعلاقتي بي صداقه وخوه قويه مراح يتصرف بهمجيه حتى مگلت لحيدر اليوم احاجي حتى ميخبصني ،نص ساعه ودك عليه كالي اني برا ضبطت اموري ويه صديقتي حتى تغطي عني وطلعتله لكيته طابك كدام الدائرة صعدت يمه حجيتله كلشي صار حتى محاوله انتحاري تفاجأ لان ميعرف كل هاي الامور الصارت حجيتله عن حيدر وشكد متمسك بيه وظل يسألني عنه

—منين هذا من يا عمام ليالي خاتون..

ضحكت خجلت منه :- سيد من سادة ال…….

عكد حواجبه :- لحظه اسمه حيدر وسيد ومن ساده ال….. فتح عينه عبالك عرف شي . لج ليالي سيد حيدر ابن سيد حسن..

صفنت عليه مستغربه :- منين تعرف ابو؟؟

ابتسم صفح وحسيت ابتسامته بيها مرارة وهز راسه:- اعرفهم شلون ماعرفهم شكد الدنيا صغيره ..

—عزا يعني صدك تعرفه لحيدر..

هز راسه ودار وجهه للجامه البصفه فرك وجهه وعيونه بتعب

– شبيك فارس شو تغير حالك تعرف شي عن حيدر ماعرفه؟

– مابيه . لا حيدر خوش حيدر وان شالله خير

التقى هو وحيدر وحجو وحاجه اخوتي اول مرة تخبلوا وصارو نار رجعو للبيت رادو يكطعوني لوما فارس متحلف بيهم محد يطخني واني مالي علاقه حيدر هو متواصل ويا توتر الجو بالبيت وكل شويه تگب عركه الرزايل عليه مطر

واليوم فارس دز علينا كلنه عازمنه عالعشه عرفته يريد يفتح الموضوع كدامي وگلي ليالي هاي اخر مرة تعبت منهم

دز على سراج وكلهم كاعدين يسولفون ويضحكون طبت نورهان تودي چاي وصيتها تعوف الباب مردود حتى نسمع وهي ماقصرت تموت على العلوم والاكشن

بلش يحجي وياهم ويحجيلهم شلون حيدر خوش رجال ويعرفه وسراج تخبل شويه ويلطم وظل يصيح

— انه مو ناهي عليها شني زواج شني خطبه

طفه فارس جكارته بعنف بالنفاظه رجع ظهره ليورا مرتاح بكعدته واشرله يكعد:- صياح لا تصيح سريج عبالك تاخذنه بصوتك العالي اكعد

كعد ينافخ ويوجه كلامه لمهند:- عاجبك هذا الحجي.

استغفر مهند ربه ودار وجهه بعصبيه وايمن نط من يمه لا معاجبنه ومراضين

فارس بنتره:- ايمن اكوم اخش بخطيتك هسه انت ليش باطل ابني خليني محترمك واندار لسراج

باوع لك ترا مالي خلك والحسين احطك هنا وادكك اطلع ظيم گلبي بيك عندي طاقه كتل مكبوته من زمان افرغها بيك هسه نهوة ما نهوة سوالف الهمج ما تمشي يمنه ستين الف مرة ليالي كالت ماريدة صير زلمه ولم كرامتك تزوجت وخلفت شتريد طلابه ؟؟

سراج:- بت عمي واني اولى من الغريب..

كشر فارس بوجهه:- بت عمه واولى من الغريب ابو حلك اكوم افرك حلكك شني هي بيت كاع سياره لو ورث وانت اولى بيها .زواج هذا زواج تاخذلك وحدة ما تهواك عيب على شواربك المن مربيهن…

كام وكف روحه طافرة :- باعو ولكم الناس خوش ناس والولد اني اعرفه من زمان لو رايد اختي انطيها بدون مهر سيد جدة رسول الله شهاده ووظيفه وماديا فوك المرتاح وشاري بتكم وانت سراج استر على بيتك وجهالك وحتى ان مصارت هالخطبه اني بوجهك ليالي تحلم تاخذها ..

وكف سراج مورث ووجهه احمر من العصبيه:- هيج صارت توكف ويه الغريب على ابن خالك

جاوبه بنفاذ صبر :- لا ابن خالي ولا ابن جدي انه ويه الحق خلو البنت تمشي بفالها حرام عليكم كبرت تردوها تحمض على كلوبكم وعمي انه كفيله بعد شتريدون اذا بيوم اذاهه بحجايه تعالو عليه وفضوها ترا صارلكم اسابيع وكعتو وذرة من لساني…

الكل سكت وسراج طلع زعلان ومهند حجه من ورا خشمه:- فارس لخاطرك والله والله ولوما انت يحلم يشوف من عدنه مرة بس خلي ينتظر عالشحن فتره نشلع كلبه يلا تنطي خبر يجيب اهله ويجي

ابتسم فارس وراح على مهند حضنه:- اعرفك كفو ولك صير ظهر لاختك لا تكسرها كدام الخاطبها أخيتك هاي يتيمه لا تكسر كلبها كافي السويتو بيها مهند وانت تعرف سراج اذا اخذها يشوفها نجوم الظهر

هز راسه مهند بأسى يعرف نفسه شكد دمرها لاخته وشكد حاربوها نفسيا وجسديا بس شيسوي غيرته على عرضه عمته وفوك كلشي …..

فارس:- انه اكول لو تكعدون انتو والرجال وابوه واخوته تتفقون بينكم عازمكم كلكم يمي عالغده حتى ما تصير هوسه بالمشيه وتصفى النفوس

صاح ايمن من يمه:- فارس شسالفه نروح نخطبه بعد..

باوعله صفح:- اسكت انت اسكت حسابك عندي بعدين ابو الغيابات

-نتفق على يوم و غداكم عندي وكلمن يحجي العنده واحجو شروطكم حتى مو بعدين بالمشيه ناس تفاجى ناس بالحجي فضوها خل تمشي هسه المن مطوليها ومعرضيها بتكم انجلينا جولي

الكل سكت وغيرو الموضوع ولا چن صارلهم ساعه يتمالخون كامو يلعبون دومنه ويحششون لو ادري من زمان محاجيه فارس واني احس روحي فراشه وطايره من الفرح ما مصدكه معقوله سهلت خطوبتنه اني وحيدر بعد كل هالضيم

ضربتني غفران على ظهري خلتني اكح:- ايي مبروك ست ليالي همزين الكتل والنتل ماراحن ببلاش

—وجع مو ايد توثيه شبيج .

ضحكت نورهان وكامت تطك اصابيعها:- يعني راح يصير عدنه عرس هلا هلا هلا…

ليالي:- محضرة المعلف كبل الحصان اذا ما اردد نعم انت وكيلي بالعباس ماصدك هذوله اخوتي ما يتأمون اخر لحظه يگلبون علينه يخلوني ابجي طين.

نورهان نفخت روحها:- لا حبي لا ابو الفوارس لديكم لا خوف عليكم بعد انطو حجايه شني مايزعلوا…..

غفران:- فارس شوكت يتزوج.

رفعت نورهان اكتافهه بعدم درايه:- مدري من الله يهدي..

—- ياقوت——

اليوم حيدر غير شكل من الفرحه رايح هو وابويه واخوتي يتفقون ويه اخوان ليالي كويتله قميصه وكشخ عبالك اليوم عرسه

— يابه شبقيت للعرس اذا كاشخ كل هاي الكشخه اليوم

حظن راسي حيل وجعص خدي ببوسه متأكدة مكانهه صار احمر فات كرار يباوع صفح معاجبه

– صايرين دهن ودبس صلوات…

باوعله حيدر يضحك:- لا تصير زعطوط وتغار ترا اختي مثلما اختك

نفخ روحه كرار هو يحاوط كتفي:- لا حبي غلطان خوتنه اني وتوته اطوخ اجينه سوا لدنيا ..

گلب عيونه حيدر بملل منه:- طركاعه السودة يحس روحه مسوي انجاز ترا مو بيدك صرتوا توم

كرار عنده استعداد يكعد ساعه يدردم ويرادد لزمت ايده الي على كتفي انهي الجدل:- معليك حبيبي اصلا انت احلى واحسن كل الاخوة معليك بحيدر عريس وفرحان…

دخل مصطفى علينا يدكم قميصه:- ها متجمعين..

باوعتله :- وانت مصطفى شوكت ناوي تفرحنه …

تغيرت معالم وجهه وتحولت للبرود :- انه ماتزوج خليني طير الطاير يلا انه نازل ترا راح نتاخر …

اخ يا مصطفى شوكت ينسى ماعرف .هو اصغر من محمد بسنتين والي بكدة كلهم متزوجين ومخلفين الا هو كلبه ملچوم وكاره طاري الزواج

——نورهان——

كاعدة كدام فارس وفاتحه حلكي بصدمه احآول استوعب الكلام الجاي يگوله

— شبيج فاكه حلكج مثل الهبله؟؟؟

— يعني هسه انت تريد تفهمني الخاطب ليالي بنت خالي هو سيد حيدر نفسه اخو…..وسكتت ماريد اذكر اسمها واقهره عساس اذا ما گلته راح ينسى

ضغط عيونه حيل باصابيعه وكرمش وجهه بألم ورجع باوعلي :- اي هو باعي نورهان راح احجيها مرة وما اعيدها دير بالج تجيبين طاري كدام ليالي وغفران واي احد خلي البنيه تمشي بفالها بدون حزازيات

داهمت امي الغرفه ومن دخلتها عرفتها واكفه تتسمع علينا:- واحنه شني ننطيهم مرة وهم قبل ردوك

تبادلنه النظرات اني وفارس وهو ضرب كصته بنفاذ صبر:- يمه هاي شعليها بهاي الرجال من زمان يريدها صارله سنين بعدين شنو انه زعطوط اربط هاي بهاي خير شني كصه بكصه قسمه وماصارت وانتي يمه ماوصيج لا تحجين ولا تعرفين

هزت ايدها امي وعوجت حلكها معاجبهه وتدردم بخفوت :- صارله سنه يتصفن وهسه ينطي لاخوها مرة

فتح عينه بعصبيه:- يممممه. هذا الموضوع ينسد اعتبري نفسج ماتعرفينها اذا انفتح ميصير خير

اباوعله متنرفز وايده ترجف وهو يطلع الجكارة من الباكيت اخوي واعرفه والله مانسى وبعده يحبها رغم راح يصير بالعشر بالتسع اشهرمن السالفه الصارت بس اشوف لوعته بعيونه حتى لو ما يحجي

كام نزل ينتظرهم يجون واني وامي كملنه الغده وحضرت كلشي

ظليت كاعده بالمطبخ اسمع صوت ايمن يهوبز وفارس يرزل بي بعدهم ما اجو الولد واهله وهذا يهوبز طبت ريم ست الحسن والدلال عود كالت اجي من وكت اساعدكم وتالي عالحاظر اجت عالغده تاكل اخذت منها زيون ابو لسان صاير سمين ومايسكت يدردم عمره سنتين ونص بس لسانه لسان عجوز اموت عليه الادبسزز وهو يبوس بيه ويضحك عليه بسوالفه

عدنه بزونه بصفحه البيت مخلفه بزازين صغار وهذا كل شويه طافر يروح يمهن ونرجعه ولا يخاف منهن واني تكش روحي اخاف منهن

اخذته لغرفتي العب ويا واجت ريم فتحت الباب متخصره:- ترا اجو خطابه ليالي امي تريدج تصبن الغده

كشرت بوجهها:- شو اشوف ايديج مديهن .. وهي مثل الثوله مدتهن كدامي شني عليهن نقش الحنه متساعديها انتي شبيج

— ماريد تصير بيه ريحه طبخ سجاد يضوج

عوجت حلكي:- اي انهجم بيت الازرك شلونه هو عاد وجه البريج وريحته مسك وعنبر

شمرت عليه دبدوب من الرف:- ترحيله فدوا اسمراني ويخبل عود انتي اخذيلج واحد عيونه زرك خضر ..

-اي والله ياريت كون حلو وشخصيه وعيونه ملونه نحسن النسل العاوي ..

— دنزلي نزلي اني انوم زيون مينام يمج الا يمي نزلي لا امي تعيط

استسلمت ونزلت ادري بيها ميطلع منها شغل صبينه الغده وحظرت الچاي علما يكملون واذاني يمهم اخاف تگب الصيحه بينهم بس الحمدلله جانت اصوات كلام وسوالف بدون صياح كعدت اگلب بتليفوني اشو هذا زيوني نزل يفتر سألته امك وين يسولي بيده نايمه ويغمض كعدته وانطيته نص موزه ياكلها ورحت للحمام امي تصلي

رجعت للمطبخ هذا الادبسزز طالع اكيد راح للبزازين طلعت ورا اصيح بي على كيف اخاف احد يطلع من الصاله فارس يملص اذاناتي

شلته بلكوة وهو تولاني يعض بيه ويكفخني ويبجي مايقبل يعوف البزازين طلعت من صفحه البيت وصرت وجه بوجه ويه اخو ياقوت الجبير يطب من باب الحوش وتليفونه بيده وكف صافن بوجهي واني احس خرطت العافيه

انخبصت ماعرف شسوي ارجع لترك اچفت للمطبخ وهذا بيدي يصرخ انچلب ركضت بي للمطبخ وسديت الباب بوخت من الفشله كفخت زين ادردم عليه كله من وراك هذا الانسان شكد يوترني اربعه وعشرين ساعه وجهه مكلوب اتذكرت من شفته بالجامعه العام من اجه يأجل لياقوت

— قبل مدة—

واكفه بباب القسم اني والبنات اجانه ممثل الشعبه يوزع علينا الملازم المستنسخهن النه ووكف يسولف ويه سرى معجب بيها ويدور حجه حتى يخلق حديث وياهه وهي مسويه روحها ماكو هيج من الثكل وهي ميته عليه عفتهم وطلعت من القسم وصار ويايه وجه بوجه ردت اغلس بس هو سلم عليه واضطريت اوكف

— السلام عليكم شلونج يابه…

— وعليكم السلام الحمدلله تمام ياقوت شلونها

هز راسه :- زينه مراح تداوم السنه شويه مريضه اجيت اسويلها تأجيل

انقهرت عليها بداخلي تروح عليها سنه حرامات

— الف سلامه عليها عن اذنك استاذ

استوقفني:- وين؟؟

رفعت حواجبي :- نعممم!!!!

مسح كصته :- وين رئاسه القسم؟؟

—ممم تدخل هذا الباب يلاكيك درج على ايدك اليمنه فوك راح تندل ..

— تعيشين يلا مع السلامه …. عافني ودخل للقسم مشيت واجتني لحظه ادراك هو مو محامي يعني مداوم هنا شنو ميندل ؟؟؟

رجعت بذاكرتي على كفخه زيوني شلته وصعدته شمرته على امه ونزلت اتغده كملت الهوسه وهل سيد حيدر راحو ودخل فارس

الحمدلله تم الاتفاق بس ما انطو موعد كالوله نحدد وقت مناسب وننطيك خبر مستعدين يشلعون كلبه لاخر لحظه

اخر شي بعد شهر يلا حددو موعد

———زهراء—-

اجواء البيت حلوة بسبب خطوبه عكب باجر العقد والمشيه بيوم واحد وفرحانين حتى ياقوت احسها نشنشت وفرحانه رحنا اني وياهه وامي وهاجر والجهال لسوك وهي ساقت صارلها قرن متطلع بسياره اشترينا فساتين وكل التجهيزات رجعنه للبيت رجلينه متكسره من التعب طبيت احوكل بعلاليكي والكه حر عدنه يدخن نرگيله ويه مجتبى وكرار

بالحديقه

سلمت من ورا خشمي وطبيت واسمع ياقوت تضحك باوعت من شباك المطبخ وحر مدري شيحجي ويضحكون غميته وصعدت لغرفتي

اجتني رساله من عنده:- عيونج هاي التخوزر جنهن عيون بزون الا افكسهن والا اكسر ايدج الي تغم …

عزا هذا شمدري غميته الجام مظلل رجع دزلي شافتي ماجاوبت دز ما تجاوبين لو صارت بيج رجفه خفتي..

دزيتله:- اي كلش كمت ارجف ماتخوف جلبي والله يالله

رجع دزلي :- بسيطه زهيرة بسيطه واني ولا جاوبته لان اجفص اكثر وهو مخبل

طبيت لياقوت لغرفتها :- توته تعدليلي حواجبي

— اي اني هم اريد اعدل حواجبي صايرات طوال اكصرهن جيبي العده وتعاي

موهبه ياقوت السريه تعرف ترسم الحواجب رسم بالحفافه حتى هاجر المسمومه بس ياقوت ترتب حواجبها

عدلت حواجبي وحواجب ماما هاجر كالت خليني لليل هاشم مصخن ومكابلته

علويه نهله:- ترا حر جاي يعزمنه عالعشه حضرن رواحجن نروح بيت عمجن

ياقوت:- ماما اني ماروح باعي جهرتي اريد ارتب وجهي ومالي خلك

زهراء:- اني هم…

عاطت بينا:- شني اثنينجن تبقن ويامن اخوتجن كلهم يرحون

طبت هاجر:- عمه انه گلت لمحمد ماروح هاشم مصخن عادي شكو علينا بس اخذي رقيه وياج تظل تبجي مالي خلكها احير بيها لو باخوها

علويه نهله:- ولجن شبيجن عيب اروح بطرك روحي كومي انتي زهيرة بنين مو صديقتج تروحين يلا بدون اعتراض

استسلمت وكمت ماما معاملتها ويه ياقوت تغيرت هواي من تمرضت صارت تخاف تقهرها وتتخربط صح ما تبين خوفها ومشاعرها بس المعامله تغيرت صارت ما تضغط عليها بدلت وطلعنه بقن بس ياقوت وهاجر بالبيت وياريتني ماعفتها ورحت مافكرت ولا اجه ببالي يصير الي يصير

—-نورهان——

باوع لفارس من شباك كاعد بالحديقه يدخن مغمض ورافع وجهه لسمه وحاط رجله عالكرسي الكدامه حسبه تجيبه وحسبه تودي باجر خطوبه ليالي وهو كلما يقترب الموعد ينگلب حاله وعصبي يتعارك ويه روحه ادري بي خايف يشوفها لو يشوف رجلها واعصابه تنهار اول وتالي هي اخت العريس اكيد تحضر تغير هواي من يوم الي اخذ ياقوت لبيته وصار الي صار مايسولف بس ماحسه اتخطى ابد اخذت بطل مي وصعدت لغرفتي

حطيت راسي ونمت ماحسيت الا بالعشرة الصبح

كمت عالسريع سبحت وحضرت جنطتي نروح لبيت خالي هناك اتحضر على واهس البنات اكيد الكل منجمع نزلت لكيت فارس متمدد بالمطبخ وايده على عينه

– هاي شنو هنا نايم رفع ايده وعيونه حمر دم مال واحد منايم ابد عرفته ماكدر ينام الليل وباقي كاعد كلبي كطعني على حالته كام فرك وجهه واشرلي :- نورهان كلاص چاي راسي راح يطير

سويتله چاي مقبل يتريك واستعجلنه حتى يذبنه ببيت خالي امي راحت جابت ريم وابنها لكتني متحضره ورحنا

الاجواء حلوة ليالي بصالون هي وغفران مرت مهند والجهال وباقي خوالي وخالاتي كلهم موجودين الولد مبوزين الخطوبه على عمى عيونهم

وفارس اخ يافارس كضاهه يطب ويطلع بالباب ويحش بهالجكاير حالته حاله اجت ليالي من الصالون موعد المشيه بالاربعه العصر واجوي

نباوع من غرفه ايمن مشيه كلش جبيرة ليالي مشرعه حلكها عگل وقوط وساده معممين والشارع انسد منظر كلش حلو وكل بنيه تتمناه نسوانهم طبن كلهن مبوشات بس البنات الصغار وجوههن مبينه فارس مشفته الظاهر دخل ماتجرأ يبقى واكف

كلشي مر بسرعه نزلنه ليالي جانت طالعه تجنن لابسه فستان ابيض طويل وشعرها اسود وطويل مفتوح بس من كدام شايلي الهه بكرستالات ناعمه صدك جانت عروس السعاده الي تشع من وجهها والفرحه جانت مزيده جمالها الي استغربته عدم وجود ياقوت وهي اخت العريس تسالمنه اني وزهراء بطريقه جدا رسميه الي تفأجأت من وجودي وشرحتلها قرابتنه من ليالي وجانت مو على بعضها ما تجرأت حتى اسألها عنها ولا دار بينا اي حديث

بلش السيد يعقدلهم والعادات والتقاليد العراقيه جانت حاظره وبقوة صينيه المهر البياضات القران بحضن ليالي وبين اصابعها حبات الهيل ورجليها بمغطس مي وورد وياس رغم مغطين وجهها بس جانت رجفتها واضحه ام العريس جابت مثل الشماغ لونه اخضر وذبته فوك متون ليالي وفركت القند فوك راسهه عادو جمل العقد ١٢ مرة على عدد الائمه الاثني عشر كون العريس سيد هاي من العادات المعروفه عدهم كلش عجبتني بحيث تمنيت اتزوج سيد اتباهى بي صدحت الهلاهل والتبريكات ورا عشر دقايق

لبسنه حجابات ودخل العريس مستحيل انسى نظره ليالي وحيدر لبعض من نزل شال المهر من راسهه عيونهم تلمع وليالي نزلت دموعها وهي تبتسم باسهه من كصتها وطال ببوسته وتمتم كلام بصوت غير مسموع

بدأت مراسيم الحلقات والملايه تقرة اهل العريس فرحانين بس ابدا مو على بعضهم حتى العريس كان يتبادل نظرات غريبه هو وزهراء تسألت بداخلي هل توترهم اله علاقه بغياب ياقوت مدافتهم ليش ماجت وهذا الكاعد برا ينتظر يلمحها بدون ما حاس على نفسه ميدري ماموجودة

خلصت الحفله وراحو اهل العريس بقينا بس الاقارب وفارس كل شويه يدخل للمطبخ ويرجع يطلع وجهه ما يتفسر صحته حتى انطي جواب گلبه واريحه

– فاارس

رجع من الحوش يمشي سريع ماعرف يخفي لهفته رغم لابس قناع الجمود

– ها نورهان.

اشرتله براسي واني احجي:- ما اجت.

شفت وجه شلون احتقن ودمار نبض بخده بلع ريكه بطيء وطلع من البيت كله

التهيت ويه البنات نحضر عشه ليالي بدلت لبست دشداشه بس شعرها ومكياجها بعدهن وفرحانه طايرة طيور …

تعشينه وكملنه دكيت على فارس الي هج ومارجع واجه اخذنه بدون ميحجي

——ياقوت—-

غريب قدر الانسان شيسوي بي يدخله بمتاهات ويطلعه منها بدون ما يحس الي صار ويايه اخر سنتين يسوة كل عمري العشته جانت حياتي هاديه مبيها شي مميز ولا مشاكل سبحان الله شلون نقلبت

قاطعني صوت زهراء الجاي من برا غرفتي:- يااااقوت ترا راح نتأخر يلا .

سديت دفتري وضميته وكفت كدام المرايه اتأكد من كشختي ماتذكر شوكت لبست وكشخت مثل قبل باوعت لنفسي بأعجاب صار هوايه ماحسيت بيه روح صايتي سوده مفتوحه جواهه كيلوت والبدي مالتهن عراض شديت الحزام ولفيت حجابي رجعت طوخت الكحل وابتسمت جريت احمر الخدود طوخته اريد اطلع مرتبه اول مرة افوت لبيت خطيبه حيدر صح ماكدرت احضر خطوبته بسبب الصار وحازة بخاطري بس المهم تمت بخير فرحته تسوة الدنيا شلت حذائي وجنطتي ونزلت سريع ماكدر البسه واركض عالدرج لان كعب عالي …

علويه نهله:- اي صلوات هسه ياقوت النعرفها صار شكد مشايفتج هيج امي عيني بارده عليج..

ابتسمت بفرح امي شكد متغيرة حتى غلست عالمكياج الحاطته رغم هي متقبل الشيء الوحيد الي يواسيني بكل معاناتي هو تغير امي

بستها من خدها وذبيت الحذاء بباب المطبخ البسه

طب كرار للمطبخ يصوفر:- هاي شنو هاي كيك يبعد چلاي . اييي هيج رجعي توته الاوليه

زهراء:- ردت روحها عمي وضحكت .

خزرتها واني اخذ السويج من تعلاكه المفاتيح الورا باب المطبخ :- قبل لا تفتح حلكك سيد كرار كلت لبابا وقبل

كرار:- عمي هسه انه حجيت فكيت حلكي روحي يابه روحي بعد الحكومه انطت موافقه ..شعجب حيدر ما حط روحه وكال اخذكم

ضحكت زهراء وتركص حواجبها:- اخوانها شارطين ماكو طبه وطلعه كالوله مو وياك بدوام هاهيه ممنوع طبه وطلعه ومطاعم

كرار بخبث يعلي صوته:- بعد ايدي كون يشوون على اذانه بصل مثلما ركضنه بخطوبته قيس ابن الملوح..

صاح حيدر من الصاله:- محد فاگرني غيرك ..

بلشت اتمشى ناحيه باب الحوش:- يلاا كافي كرار متشبع سوالف عوفنه نروح طلعن امي وزهراء وراي

شغلت السياره وانطلقنه رايحه اسلم على ليالي لان محضرت وكفنه يم محل ورد اخذتلها باقه حسب طلب سيد حيدر وماما اشترت محبس ذهب قبل كم يىم حتى انطي الهه هديه كدام اهلها خاف عبالهم اكو شي وماحضرت يعرفون القلوب صافيه واحنه مرحبين بيها بعيلتنه

وصلنه واستقبلونه هي وامها واختها ومرت اخوها حيل لطيفين . فرحت من شافتني وحضنتني حيل تجنن جنها غزاله رشيقه وطويله عيونها مجرورات وكبار وبشرتها حنطيه من رحت للمستشفى عليها جانت حالتها حاله وممبين شي منها عرفت ليش هيج حيدر مستقتل عليها تخبل وبيها جذابيه

غفران:- تعاي احضنج علويه تعاي دعائج وصل وخلصنه منهم ..حضنتني حيل تهمس بأذاني. تذكريني؟

جاوبتها:- شلون ما اتذكرج حبيبتي باوعت يمنه ويسرة وهمستلها. اسكتي لا تفضحينه حتى اهلي ميعرفون لا يعلسونه وضحكنه اثنينه

اندمجن زهراء وغفران اثنينهن نفس العمر حتى حسيتهن نفس الشخصيات وظلن يسولفن ويضحكن وماما جانت حيل رسميه بس ابد محجت شي يغث بس طبيعتها مستحيل تاخذ ميانه گبل تاخذ وقت يلا واني كعدتي بصف ليالي

الي سألتني تطمن:- گلي حيدر عالصار شلون صارت ايدج

باوعت لكف ايدي الملفوف من من النص بشاش وابتسمت اعتبرتها جروح انتصار :- لا الحمدلله زينه حتى الخياطات فتحتهن بس لان تصل الفها بعدها توجعني شويه

ابتسمت وعيونها برقن تتذكر:- حجتلي غفران من اجيتي المستشفى وشكد كلتلي عنج حلوة ماتوقعتج هيج عبالي بس حيدر حلو وضحكت

ضحكت ايدي على ايدها:-اي عيني ساحرج بعيونه الخضر وعبالج بس هو حلو لا حبي كلنه حلوين لا يسمعج كرار ينجلط يكوم ويكعد يصيح العيونه خضر مو امان وحسود عيوني احلى.

ظلن يسولفن ويضحكن بقلوب صافيه وفرحانين بانتصار هذا الحب الي واجه هوايه متاعب

وبنص السوالف ضربت ياقوت كصتها بخفه موجهه كلامها لليالي:- نسيت هديتج بسياره عزا بالي مدري وين

ليالي :- يا هديه مو هياتهه الورد شسالفه ..

ياقوت:- لا حبيبتي الورد من حيدر هديه اخرى مني اعتبريها هديه تعارف او خطوبة

ليالي:- حبيبتي المن مكلفه نفسج والله ميستوجب …

ياقوت:- تعاي وياي نجيبها من السياره .. كامن سوا وطلعن بالباب كعدت بمكان السايق ومالت جسمها للجهه الثانيه وفتحت الجكمجه مالكتها عكدت حواجبهه تحاجي نفسها:-شسالفه غير هنا حطيتها البارحه … اندارت ليورا لكتها بالكاع بالمكان الكاعده بي زهراء ناسيتها همست .شكد ثوله لخاطر الله … رجعت اندارت وبنفس اللحظه طبكت سياره كدام سيارتهه نزلت بسرعه تسد باب سيارتهه وجمدت بمكانهه

وهي تشوف نورهان وفارس يباوعون عليها بصدمه .. وكعت العلاكه من ايدها الترجف ونزلت شالتها سريع . تريد تفهم شجابهم هنا

اقتربت نورهان منها تحضنها :-شلونج ياقوت عاش من شافج

صوتها طلع مهزوز وضعيف واخذت ثواني قبل لا تبادلها الحضن:- هلو نورهان اني زينه انتي العايشه حبي.. فصلن الحضن

وهي تحاول تتجنب الواكف بصف باب سيارته عينه مارمشت عنها وشحب وجهه .عيونه تاكل بيها بشوك وهي تتلفت لكل مكان الا عليه متباوع بلع ريگة گلبه مثل الطبل يقرع بصدره وداخل گلبه ساحه معركه بين الاشتياق وبين الغضب الي رجع ينثار داخله من جديد وهو يتذكر الطريقه الي افترقوا بيها ارتبك وهي تمر قريب منه بدون ما تباوعله تدخل جوا اندار يفرك وجهه

ليالي بأستغراب موجهه كلامها لنورهان ونظراتهه تنتقل بين نورهان وفارس الي راح يتمشى بعيد عنهم يفتح قميصه ويفرك بصدره ويتنفس بسرعه:- هاي شكو شنو الصار هنا..

نورهان ظلت حايرة تطب لو تلحك فارس توجهت لليالي:- ياقوت صديقتي من الكليه ..

اشرت ليالي بعيونها لفارس الي وصل لنص الفرع واندار يرجع عليهم:- فارس شبي عبالك شاف شبح ..

لزمتها نورهان ترص ايدها:- بعدين ليالي بعدين خلي ندخل هسه يجي . دخلن جوا لگن ياقوت واهلها بباب المطبخ يتحضرون يروحون

ليالي:- وين ياجماعه نتعشى سوا ..

اقتربت منها ياقوت تسلمها علاكه كارتون صغيره مال محل ذهب وجهها اصفر رغم حاطه مكياج بس ما خفى شحوبها:- حبيبتي هاي هديه بسيطه ماكو شي من قيمتج . وان شاءالله عالجايات الوالد تعبان شويه لازم نروح .. طلعن وفارس بعده بالباب وجهه ما يتفسر سلمن وصعدن وراحن …..

——ليالي——

تحركت سياره ياقوت وراحو وفارس واكف صافن بسيارتهم التبتعد كتفت ايدي احاجي:- ممكن اعرف شكو ؟؟شبيك وضعك تخربط

ذب جكارته ودخل هامس:- بعدين ليالي ماكو شي ….

سوينه عشه وكعدنه كلنه سوا بالمطبخ ماكو غريب ظليت مراقبه فارس ابد مو طبيعي حتى اكل ما اكل

بلشت امي تحجي وهو وجهه احتقن صار احمر حتى اذاناته احمرن

ام مهند :- حموات ليالي بسم الله ماشالله شنو ادب شنو اخلاق شنو جمال يشابهن امهن

غفران:- اي ماما عزا يخبلن

ام مهند:- لج ليالي لو نخطب الجبيرة لاياد والصغيرة لايمن ..

نورهان:- خاله شسالفه غير ياقوت مخطوبه مدري متزوجه

حجيت واني عيني على فارس :- لا غلطانه مصار نصيب وفسخت ..

رفع راسه مبهوت يباوع لنورهان الي صفنت بوجهه رجع باوعلي عيونه مفتوحه شال كلاص مي بأيد ترجف وشربه دفعه وحدة وكام طلع للحديقه

دقايق وكمت غسلت وطلعت ورا لكيته يفتر بالحديقه يلوب والدخانه تفتر وراه

وكفت ورا:- فارس تحجي شكو لو شلون ؟شنو بينك وبين ياقوت ليش اثنينكم اخترعتو من شفتو بعض وهي كبل راحت عبالك تريد تهرب وانت حالتك حاله….