رواية قانون القلب اقوي الفصل الرابع 4 بقلم رسل احمد
من تزعل توحشني الدنيا
واتصور غيرت ضنونك
ومن ترضى يظل شوك البيه
يذوبني بنظرات عيونك….عيونك….
قرت الكلمات اكثر من مرة مستغربه … لو ماعدها رقم سيف جان كالت هو بس هي تعرف رقمه ….ورجحت هذا احد غلطان بالرقم.. طلعت من الواتساب ونزلت للمطبخ تتغده…….
لگت امها وهاجر كاعدات بالمطبخ وسكتن من دخلت… وامها تباوعلها بعدم رضا … عرفت هاجر ما مقصره وشاحنتها عليها لانها أستاذه في دس السم في العسل …..صبت اكل لنفسها وكعدت تاكل بدون واهس بس حتى تسكت معدتها الفارغه….
ام محمد:- ياقوت….. عمتج تريد تجي لهنا حتى تحاجيج زعلانه وشايله هواي بخاطرها…..
ياقوت:- ليش شايله بخاطرها ؟؟؟؟
ام محمد:- تغشمين روحج يعني …ابوج خابرها البارحه وگاللهه على قرارج التعبان….. وزعلت ….
هاجر:- والله سيف ماكو مثله ومستعد يسويلج التردي ومن بارحه طالع من البيت مقهور وامي تلوب عليه متعرف ارضه من سماه وين….. هسه غير كون عندج سبب مقنع للرفض وهزت ايدها تباوع بخبث ..مدري شايفتلج شوفه مدري اكو سبب ثاني
رفعت حواجبهه بتعجب من كميه الخبث والحقاره الدفينه بين كلماتها:- يعني الا اكون شايفه شوفه يلا ارفض سيف ليش مو مثلا ماعندي مشاعر اتجاهه واحسه مثل اخويه وما اتقبله كزوج مو سبب كافي ومقنع بالنسبه الج…….
هاجر:- اشو قبل ولا مرة كلتي هيج ؟؟؟
غمضت عيونها بنفاذ صبر ملت من هذا الموضوع:- لان جنت صغيره هاجر … صغيره واستحي .. بس كبرت واعرف اقرر …ومن حقي اقرر الشخص الي اقضي ويا حياتي اني مو يوميه متزوجه …..
ام محمد ماخذة وضعيه المتفرج وهذا الي مخلي غصه تضغط على گلب ياقوت ….الام مفروض تكون هي سد دفاع منيع لبنتها تفهم رغبتها وتحميها بس مدتشوف هالشي بأمها ….
كامت غسلت ماعونها وطلعت للحديقه مددت على المرجوحه وشعرها نازل من الحافه الوضعيه الي تحب تتمرجح بيها دكت على كرار مشتاقتله حصل تعيين بالجيش بوساطه من معارف مجتبى وبلش دوام صارله فتره رغم فرحت اله لان حقق شي يريده بس عدم وجوده وياهه بالبيت تعب نفسيتها من اجو لدنيا هم سوا ما يفترقون الا كم ساعه بس هو صارله عشر ايام ملتحق
اجاهه صوته المتروس حنيه تنزل مثل البلسم على گلبها من يحجي:- حبيبتي توته….
حست نفسها تريد تبجي من اشتياقهه اله وتجمعت دموع بعيونها:- هلا كروري شلونك….
كرار:- الحمدلله بخير شبي صوتج…؟؟؟
ياقوت تمسح عيونها قبل لا تنزل دموعها:- مبيه حبيبي بس مشتاقتلك احس روحي تايهه بدون تكي… البيت مو حلو بدونك
تحمحم بنبره غرور مصطنعه:- شعبالج يبعد چلاي چا انه شويه ….
ياقوت ترضي غروره:- لا يبوي انت الكل بالكل شمعه البيت انت …. شوكت تنزل؟؟؟
كرار:- بعد اربع ايام هو نظام الدوام هيج ١٤ يوم التحاق عشره نزول….
ياقوت :-الله يسهل عليك ويحفظك حبيبي انت ومجتبى بالي يمكم طول اليوم….
كرار:- الله الحافظ لا تخافين انوب شنو ياقوت مجتبى ملازم ولازم اصيحله سيدي وكل شويه اصيحله بأسمه وهذا يخوزر ويعض اصبعه عليه بعدني ما متعود….
ضحكت :- بعد مجتبى كلشي ولا رتبته يمعود…. صارت اصوات يمه
كرار:- يلا يابه عندي شغل بعدين نتخابر …
ياقوت:- بحفظ الرحمن حبيبي سلملي على مجتبى…
سدته منها وظلت بمكانهه تتمرجح على البطيء ..تحس بملل زهراء بغرفتها تقرة وذابه روحها فدمرة حتى تنجح من الدور الاول
دك تليفونها والمتصل سيف اتجاهلت اول مرة بس ظل مستمر يدك ويدز رسائل يطلب منها تجاوب استسلمت وفتحت خط :- شتريد سيف ما كفاك السويته بيه وبنيه من قسمي شافتك وياي الله يعلم منو شافك وشطلع عليه كلام….
سيف:- واذا شافوني خطيبج انه …
ياقوت بنفاذ صبر:- مو خطيبي … مو خطيبي سيف اترجاك انسى هاي السالفه وخلينا اخوان واصدقاء وبدون مشاكل ….
كز على سنونه بغضب :- لج لا تكولين اخوان احنه مو اخوان حرام عليج …. انتظر كل هاي السنوات وتكولين اخوان ياقوت اذبحج واذبح روحي اذا تفكرين تصيرين لغيري … بعدج مشايفه خبالي من اتخبل عبالج رفضتي وتخلصين مني محد يخلصج مني بس الموت…
صارت ترعش وگلبها يدك سريع:- لا الك ولا غيرك وبطل هاي الافكار وبعد بحياتك لا تتصل عليه والله ثم والله اكول لبابا وهو يتصرف وياك …..
سيف بتوعد:- هينه ياقوت هينه…
سدته بوجهه وحظرته من كل التطبيقات مستحيل تنطي فرصه يتواصل وياهه هي كالت قرارها وابوها احترم هالشي سيف بعد ميكدر يسوي شي ……..
اما ليالي فذنبها الوحيد انها حبت .. والحب محرم في شريعه اهلها .. صارت حبيسه غرفتها وكأنو هذة الغرفه بنظرهم راح تنسيها حبها .. قاطع خلوتها امها
عمج بالهول يتاني صار هواي وراح يحجي وياج بالموضوع تجاوبي مثلما وصيتج احنه رايدين مصلحتج وهذا الزين الج
– يمه ماريده والله ماكدرت اتقبله ماريد حرام ..حرام تجبروني على زواج ما رايدته..
– اسكتييي تردين تصخمينه لج عمج من زمان مقرر ….رفضج يسوي مشاكل بين الاهل حتى دوامج تنحرمين منه يكولون ما تريده يجوز عدها علاقه بالدوام لبالج انه فرحانه افرط بيج واجبرج لخاطر اخوتج لا تخليهم يطبون بمشاكل الهه اول ماله تالي ……
لطمت على وجهها وهي تشهك بيأس:- الله ياخذني ..الله ياخذني …. وينك يابه وينك تجي تشوف شصار بيه بعد عينك ..
حضنتها امها تمنعها من ضرب نفسها :- كافي ليالي كافي راح تموتين … عمج مايعرف بالصار لان سراج ما گاله تدرين بعمج شكد يكرهج واذا يعرف مستعد يشهر بيج بالعشيره واخوتج يتمالخون وتصير دم…. اني افكر بيج تتزوجين سراج احسن ما تموتين …
ليالي بگلب مذبوح:- الله ينتقم منك يا سراج اتزوجت وخلفت وما خلصت من حقارتك
توالت الايام بوتيره بطيئه على حيدر يحس نفسه حبيس بسجن انفرادي لا بي يروحلها ولا بي ينسى والهواجس اكلت گلبه مثل الارضه الي تاكل بخشب قديم …. السهم الي نبتته بگلبه من اتصلت بي تطلب منه ينساهه ويعوفها جرحه ما جاي يطيب مستحيل هاي ليالي مستحيل ليالي تكول هيج من كل كلبها …
قاطع هواجسه احد الموظفين يفتح الباب:- حيدر كوم نسلم على ليالي نتحمدلها على السلامه داومت والكل راح لقسمها يسلم عليها ….. يحس گلبه نسى نبضه من نبضاته وكام مشى مثل المغيب باب الغرفه الي بيها مكتبها ويه مكاتب الموظفين مفتوح وموظفين طابين طالعين يسمع سلامهم عليها
لمحها .. واكفه بطولها الحلو ترد السلام بأبتسامه طفيفه فاقده الكثير من وزنها حس رجله داكيها بمسمار بعتبه الباب وانفاسه صارت ثگيلة ومتعبة ….
تلاگت عيونهم عيونه تحجي شوگ وعيونها تشكي الم كل الاصوات الي حواليهم ماجاي يسمعها ميعرف هذا حلم لو واقع فقد الشعور ….
سمع احد الموظفات تهتف:- يابه هسه نور المصرف …. والف الف الحمدلله عالسلامه ومليون مبروك الخطوبه …..
رمشت عينها بتوتر وهي تباوع لحيدر الي انطعنت ملامح وجهه بين الم وصدمه وعينه تتجول على اصابعها يبحث بيها عن حلقه …. توسع بؤبؤ عينه وهو يشوف الحلقه تلمع بيدها …
ضمت حلقتها بيدها الثانيه تفركها شافته يتراجع للخلف هارب لمكتبه حتى لا يفضح نفسه ومشاعره…….
اما فارس جان منهك نفسيا مبتعد تماما وكل فتره يوصل نورهان عسى ولعل يلمح النجمة البعيده عنه ..لمحها من بعيد كم مرة بس كانت تتحاشى الاقتراب وتدخل لدوامها مباشر العفه والحياء الي مغلفها يجذبه اكثر … وصدها الغير مباشره تأثيره عكسي بدل ما يبعده يلكاهه معشعشه بتفكيره وتسرح وتمرح بباله اكثر واكثر… يسرق اخبارهه من نورهان سرقه مثل جوعان يبوك كسره الخبز اي شي عنها يسد جوع گلبه الهه…. اخر لقاء كان من اسابيع وحس بعد هذا حده لازم يصبر روحه ولو بكلمه منها وعقد العزم اليوم لازم يشوفها ……
وبنهايه الدوام جان واكف قريب الباب وتعمد يجي من وكت ويوكف قريب حتى تضطر تفوت من يمه ترك دوامه وشغله واجه جايبه الشوك يشحذ منها نظرة وحده….
جانت مبتسمه وهي تودع نورهان عند الباب بس الابتسامه غابت وحل محلها الصدمه … وبدل ما تودع نورهان چلبت بيها اكثر:- نورهان اوكفي … هذا سيف هنا …. والله خايفه منه مجان طبيعي من اخر مرة راسلني خوفني….
لزمت نورهان ايدها تتلفت تريد تشوفه :- لتخافين وينها سياره خطج ….
ياقوت بمراره:- على حظي اليوم طابك على السايد الثاني …..
سيف جان واكف يدخن بشراهه وعينه صارت عليها شمر جكارته بالكاع وداسهه بعنف واتوجه الها ملامحه جانت تشرح كميه الغضب الي يحس بي وشكله ناوي على مصيبه… وبلا شعور ارتدت للخلف بسرعه
صاحلها بصوت عالي نسبيا:- ياااااقوت … امشي وياي….
هزت راسهه رافضه واللون انسحب من وجهها:- ما اجي وياك لاي مكان تريد تحجي روح للبيت وهناك كدام اهلي احجي ….
اقترب منها يريد يجرها واجاه صوت فارس …..
الي يقترب منه عالسريع :- انت هيييي ….عوووف البنيه…
اندار عالصوت معلك حواجبه صار بمواجهه فارس :- روح منا ولا تدخل …
صار قريب من سيف كلش لدرجه طبطب على كتفه بحده :- واضح جاي تزعجها وخر منا ابني وروح…..
استدار سيف متجاهل فارس مشى خطوتين باتجاهها ولزم ياقوت من زندها ضاغط عليه وهي دموعها صارت تجري وتجر بروحها منه ونورهان مچلبه بيدها الاخرى الناس بدت تتلفت عليهم …. سحبه فارس حيل من ياخته وهذا رافض يترك ايدها
يحس صعد الخبال براسه وبدا يفقد اعصابه:- عوف البنيه لا اكسر ايدك واسكطك ….
سيف:- لك انت منو وشعليك … اني وخطيبتي انت يا قن…ة….
فارس وهو يلزمه من ياخته وركعه كله خلاه يدوخ :- هسه ااكلك منو اني يا غيره سزز…. ونتيجه لضربه فارس لسيف ياقوت اندفعت ووكعت على حافه الرصيف بكل وزنها على ايدها صرخت بألم … نورهان تماسكت والا چان وكعت فوكاهه ولزمتها تريد تكومها وهي صارت تشهك من الوجع ولازمه ايدها اليسار ….
تدخلو الطلاب وحتى الامن مال باب الجامعه يريدون يفاككون بين فارس وسيف الي صارو ينقاذفون الشتايم والضربات… بعدو سيف الي بعده دايخ ومع ذلك يفشر ويهدد ويه كل غلطه منه فارس يريد يهجم عليه والناس تلزمه ….
اندار سيف على ياقوت كدمه حمرة على فكه وحاجبه ينزف رافع اصبعه بتهديد:- اذا ما اندمج يا ياقوت فلا اسمي سيف …
رجع فارس يريد يهجم عليه بس لازمي :- دتعال يمي.. لك تعال اعلمك شلون تهدد… هدد انوب بعلي اسويك نصين…
جالت نظراته الحاقده بين فارس الي بلكوة لازمي وبين ياقوت الي تبجي وهمس:- بسيطه وصعد سيارته وانطلق بسرعه….
صاح فارس بالطلاب المتجمعين يصفك ايد بيد وهو يلهث :- كلمن يروح يشوف شغله يلا خلص العرض … وبلمح البصر كلها تطشرت عدل بدلته يندار على ياقوت شافهه مندارة عالرصيف تتقيأ ونورهان لازمه كلينكس تمسح وجهها ……..
فرك وجهه بعصبيه على حالتها … اندارت نورهان عليه:- فارس عفيه مي .. مي…
مشى سريع لسيارته القريبه وجاب بطل مي انطاهه وظل واكف وراهه مجنح ايديه على خصره دمه يغلي .. ملابسهه متربه ولازمه ايدها حيل وترجف .. غسلت نورهان وجهها وتريد تلزم ايدها وهي فرفحت كاتمه نفسها وتبجي……
فارس :-بس شوفي ايدها شبيها لازمتها …..
نورهان:- بس انطيني ايدج ياقوت اشوفها وهي تجر بيها متقبل تطخها من الالم
لزمتها نورهان غصب ترفع ردنها وياقوت صارت تشهك وتبجي بالم وتحاول تبعد ايدها
نورهان بشهكه خوف:- لج ياقوت ايدج يمكن مكسورة صايره عوجه وكدمات زركة ..امشي .. امشي نوديج المستشفى الله لا يوفقه الحقير….
هزت راسهه دموعها تجري وبلكوة يطلع منها الكلام:- بس طلعي تليفوني دكي على اهلي كلبي راح يوكف ….
فارس :-بس امشي نوديج للمستشفى وبالطريق نخابرهم دخيل الله ليش تعاندين …. فدوا لعينج امشي
اختل توازنهه ونورهان ساندتها وتمشي بيها :- امشي ولج راح تتخربطين بنص الشارع امشييي… سندتها تمشيها وهي انصاعت للامر لان الالم موتها صارت ترجف مثل السعفه وكأنو بردانه حيل لدرجه شفايفها بيضت و اسنانها صارت تصطك ببعض فارس يمشي وراهن ويدردم بعصبيه بلكوة صعدتها
نورهان وصعدت بصفها وصارت تكح وتشهك تعرف اجتها نوبه ربو من الخوف والتوتر ….. صعد فارس وحرك السياره بسرعه مد ايده وهو يسوق همش جنطه نورهان من حضنها يدور على البخاخ مالتها عين بالجنطه وعين عالشارع ويشتم بسيف
طلع البخاخ ومده الها استخدمته وبلشت تهدأ ورجعت راسهه ليورا مغمضه بتعب
ضرب الستيرن بغضب حاله ياقوت وانوب اخته وخرعتها :- اذا ما اطيح حظه هذا شاربي مو علي الغيرة سزز بسيطه …..
ياقوت بصوت متقطع :- ن.. نورهان. … دايخه احس راح اموت
نورهان بخوف:- فارس استعجل گلبها راح يوكف ترجف حيل
باوعلها فارس بالمرايه حلكها يرعش وترمش بسرعه وبدت تميل وتتهاوى على نورهان……
فارس:- لااا يالله…….
حست ببرودة تجتاح جسمها وروحها عبالك تنسحب منها والصوت بعييدد ومو مفهوم جفونها ثگلت رغم حاولت تقاوم بس ماكدرت اكثر وبعد ما حست بشي………
كاعد بالطوارئ يعصر بيديه نورهان بصفه وبيدها كانيولا ومعلكيلها مغذي وحاطه راسهه على چتفه … وياقوت ورا احد البردات مال أسره الطوارئ ميعرفون بعد شنو وضعها بس يسمعها تبچي من الالم …. دقايق وصوتها اختفى وهدأت
وانفتحت البرده لمحها نايمه والدكتور يتفحص ايدها يمنه ويسره من كم متر ديشوف كف ايدها صار ازرك طوخ ومتورم
نورهان بتعب :- فارس عفيه خلي نخابر اهلها ترا تليفونها ما سكت ومن الخبصه مارديت…. فتحت جنطه ياقوت الي بصفها طلعت تليفونها ودخلت على الارقام
اتصلت وانطت التلفون لفارس اخذها منها وشاف الاسم
( بابا حبيبي)
اجاه صوت ابوها:- لج بابا ووووينج ياقوووت… السايق خابرني يگلي بتك ماهيه….
فارس:- سيد حسن السلام عليكم….
انفزع ابو محمد:- منو انت بنتي وين …
فارس :- اهدأ سيد اني اخو صديقتها للعلويه وصارلها حادث كدام الجامعه واضطرينا ننقلها للمستشفى …
ابو محمد:- شلوون … … وين انتو … يا مستشفى شبيها بنتي …..صاح بصوت محمددد… ولكم وينكم يولد اختكم بالمستشفى…. رجع لفارس بس گلي يا مستشفى واليرحم والديك
فارس يحاول يطمنه:- سيد مابيها شي بس ايدها متأذاية وانطاه العنوان وسده منه ….
اجاهم الدكتور كام عالسريع يحاجي:- بشر دكتور؟؟؟
الدكتور:- واضح ايدها مكسورة بس لازم اشعه حتى نعرف طبيعه الكسر ونحدد المعالجه انطيناهه ابره مورفين بس لازم تاخذوها لقسم الاشعه حتى ناخذ اشعه لايدها….
تردد الدكتور وكال بحرج بس لازم تروح تحاسب اول شي تعرف مستشفى خاص مايسوون شي قبل الدفع …
فارس:- تمام دكتور ثواني….
اندار على نورهان يعض اصبعه:- والحسين اذا الكفه هالگ…د الا انعنع عظامه هالسگط …جاي يتسبع عليها بالدوام …. راح دفع وكمل الاجراءات ورجع بصف نورهان يفتر يمنه ويسره ويفرك بيده بغضب ويسترجع الصار براسه مرة ورا مرة
نورهان:- فارس عليك الله هدي من يجون اهلها واتحكم بنفسك شويه …. …
اجاه الممرض:- بلا زحمه انتو اهل المريضه المكسورة ايدها لازم احد يجي ويانه للاشعه المريضه نايمه…
اشر لنورهان تكعد :- ابقي هنا انتي دايخه امشي وياهم وارجعلج لا تتحركين منا…..
دفع الممرض السديه الي متوسدتها ياقوت وهو يمشي بصفها قريب يم راسهه باوعلها وحس كلبه يوجعه نايمه بس وجهها معقوج بألم وراسهه مايل صفح رموشها شگر وطوال ومبلله بدموعها ورغم وضعها والموقف الصار حس على روحه يبتسم وهو يتمعن بملامحها بهالقرب لاول مرة.. وجهها مابي قطره مكياج بس احلى وجه شافه بحياته ميعرف هي هيج حلوة لو الحب خلاه يشوفها هيج…. اول مرة يعترف بقرارة نفسه يحاجي روحه:- فارس انت عاشكها مو بس تحبها
كلشي يمشي بسلاسه وسرعه مدام ياخذون منك فلوس.. اجاه الدكتور ورفع الاشعه عالضوة يشرحله … للاسف عدها كسر مضاعف بالساعد وخلي اشرحلك بالعاميه لان حسب شرحك وكعت بكل وزنها على ايدها مكان الكسر مثل الي تفتت العظم
ما نكدر نسويلها جبيرة احتمال العظم يلحم اعوج وتسبب مشكله
فرك وجهه يتخيل نفسه يكسر ايدين سيف اثنينهن:- والحل …
الدكتور:- لازم عمليه وفورا….
ظل واكف حاير اهلها بعدهم ما واصلين:- دكتور اهلها بطريق حتى يوقعون موافقه العمليه انه بعدني مو ولي امرها… بس عالاقل نقلوها لغرفه خوما تظل هنا بنص الطوارئ…
الدكتور:- اكيد هسه ننقلها .. بس احب انطيك علم بتكاليف العمليه
قاطعه فارس بنفاذ صبر:- دكتور شسالفه ادري مستشفى لو بنك حجيكم بالفلوس والمريض متعلعل بس لا تخاف الخير موجود وندفع قبل لا بنيتنه تطب العمليات …
صعدوها بغرفه وهي بلشت تصحى لان انطوها مهديء بسيط تفتح وتغمض بدوخه وصارت تون وتبجي بصوت تعبان …. تصيح بأسم كرار كاعد بالباب برا ونورهان يمها تحاول تهون عليها ..
ياقوت :- كررراررر تعال … تعال راح اموت ،… باباااااا
نورهان صارت تبجي على بجيها:- بس اهدي والله مو زين على ايدج لا تتحركين جايين والله خابرناهم ….
رفع راسه شاف اربع زلم ونسوان اثنين يركضون باتجاهه عرفهم اهلها…..
ابو محمد:- وينها … وين بنتي وينها…..
وكف فارس :- السلام عليكم سيد تسالم وصافح الولد والنسوان طبن للغرفه بسرعه…..
دخلو ورا النسوان دقيقتين وطلعوا كلهم كدامه يريدون يعرفون الصار…..
ابو محمد:- ابني شنو الحادث
بدا ينفعل وهو يستذكر الصار:- سيد اني جنت انتظر اختي تطلع الي هي صديقه العلويه الكاعده يمها جوة طلعن من الباب وابنكم المحترم هجم عليها يجرجر بيها كدام العالم واختي وياهه … اني رجال دمي حار شالتني الغيره ولزمته انطيته لازم وطفر بس بنص الهوسه ماعرف شلون يضبط بس مصونتكم وكعت على ايدها وصار الصار…
هو منا كاره سيف قبل لا يشوفه ومنا سوايته اليوم صار يجيب ويحط بالكلام حس روحه يريد يدفعهم اكثر حتى يحقدون بزايد…..
ظلو صافنين عليه
ابو محمد مستغرب :- ابنا منوو … ياهو هذا ….
فارس:- اسمه سيف ….
محمد بصدمه:- سييييفف….. سييييف ماغيره….وصفك ايد بأيد يدير وجهه للحايط
فارس بعصبيه:- حك بتكم انتو التاخذو بقت يمكم بس اني مستحيل اسكت على حك اختي الي انسحلت بشارع جيف دافعت عن صديقتها ابنكم ما محترم خلة العلويه واختي فرجه لليسوة والمايسوة … وين ما اشوفه احطه واكسره وحق الله …..
ظلو كلهم مبهوتين مايعرفون يحجون ابو محمد تهاوى على كرسي ولزم راسه بين ايديه….
مصطفى طلع يركض من المستشفى شايط ومحمد يدك على سيف ما يجاوب اما حيدر فأقترب وكعد بصف فارس وطبطب على رجله:- انه اشكرك على فزعتك سيادة النقيب واعتذر عالصار ويه الاخت الف رحمه على البطن الشالتك لولاك الله يعلم هسه شجان صار …
فارس :- لا تشكرني سيد حيدر هذا واجبي اي واحد بمكاني يسوي الاكثر…
اجه الدكتور محضر اوراق العمليه
الدكتور:- بس محتاجين توقيع والدها او اخوها علمود العمليه ….
كام محمد يوقع وهو يحجي:- بلا زحمه نريد الفاتورة
الدكتور:- كلشي مدفوع بس جنه محتاجين الموافقه ….
عكد حواجبه بأستغراب:- تونه دخلنه محد بينا دفع….
اشر الدكتور ناحيه فارس الي كاعد يسولف ويه حيدر:- سياده النقيب دفع كلشي…..
رفع حاجبه وهو يتفحص بفارس …
اقترب منه يحجي بهدوء:- حضرتك دافع التكاليف؟؟؟؟؟
رفع راسه فارس يباوعله واستقام صار مقابيله:- مو مهم التكاليف المهم مصونتكم بخير ….
محمد محامي والشك لعبته ربت على رتبه فارس وكأنو جاي ينظفها من تراب ما موجود:-ميحتاج حبيبي فلوسك توصلك اهلها موجودين….وبما ان احنه اجينه تسلم وسعيك ومجهودك يشكر تكدر تتفضل…..
باوعله فارس ببرود وبأبتسامه:- اكيد بس اختي جوه ياريت لو تخلي الاهل يصيحوها …. ورجع كعد ….
دك محمد باب الغرفه فتحتها زهراء:- صيحي البنيه اخوها يريدها…
واتنحى على صفحه بصف الباب….
طلعت نورهان منزله راسهه وكالت السلام عليكم بخفوت… رفع محمد عينه خطف يباوعلها ورجع عينه لتليفونه ….. كام فارس يترخص سلم على حيدر وابو محمد وحرك راسه بحركه سلام لمحمد الي يباوعله بطرف عينه وردله التحيه بنفس الحركه….. واخذ نورهان ومشى…..
كضو الطريق سكته لا نورهان حجت ولا فارس نطق بحرف … تعرفه اعصابه ما هدأت من لزمه ايده للستيرن ….استقبلتهم امهم بالتحقيق وشصار وشلون وشكو رغم انطاهه موجز للصار بالتليفون من جانو بالمستشفى بس رجعت تسأل….
انطت كلاص مي لفارس وهي تحجي موجهه كلامها لنورهان :- وهي شهالعياره ابن عمتها وجاي عليها راح يشلع وصله منها ما تروح ويا…
حط كلاص المي بقوة عالميز والمي يتلطلط منه :- يييمههه….
نورهان:- يمه ماعدهم هيج شي ماعدهم بنيه تصعد ويه ابن عمتها مو انوب رايدها وهي رافضته ولا هو جاي بعلم اهل البنيه ومن صيحته بيها بنص الشارع جاي وناوي شرر….
ام فارس:- وهسه شستفادت مكسره وبالمستشفى …..
كام فارس فاير يستغفر و سوا الدرج شبختين وركع باب غرفته حيل…. باوعت ورا تهز بيدها:- واخوج شبي حامي حمّامه عليها ويتراجف…. لو شافهه ملونه وعجبته…..
نورهان :- يمه شسالفه شبيج عالبنيه ….
ام فارس:- ما تعجبني من شفتها وياج بالمستشفى ماعجبتني وگلبي لعب…..
نورهان:- عشتو يمه تخبل شنو الماعجبج بيها ادب واخلاق وجمال…
كعدت ام فارس فاتحه شيلتها وضربت على رجلها بحرگه گلب:- چا انه هذا الما عاجبني بيها .. حلوة وبت ساده وثكيله مثلما اي زلمه يحب واخوج عيونه تتلاكط عليها حسبالج مادري … ابن بطني واعرف الي جوا افاده من النظره… نورهان اعرف الجاي تحوكي انتي واخوج سدي السالفه من يمج وكطعي ويه البت وستري عليها وعلينا….
كامت نورهان عرفت امها تتسمع عليهم هي وفارس من يحجون:- اهوو يمه شكد تبالغين اروح انام ميته تعب……
ظل يلوب يحس عاف گلبه هناك يمها واجه ماكدر يبقى وشنو حجته حتى يبقى … صوت بچيها وونه الالم الجانت تطلع منها تنهش بگلبة ….غرفته غيمت من دخان الجكاير الما نزلت من ايده …. دخلت عليه نورهان بدون ما تدك الباب وهي تأشرله باصبعه على حلكها بمعنى اش أسكت وتليفونها بيدها….مفتوح على السبيكر
نورهان:- زهراء يعني هسه شلون….
صوت ونين ياقوت ويه صوت زهراء الي تبجي على اختها:- ماعرف ماعرف دخلوها للصاله وطلعوها الدكتور يكول هبوط بضغطها وحرارتها مرتفعه مايكدر يسويلها عمليه مايصير تتبنج وهي ضغطها حيل نازل …. بلكي باجر … انوب لا يفيد بيها مسكن ولا شي تشيل روحها وتركعها من وجع ايدها اخخخ يا سيف كون الله يكسر ايدك مثلما اذيتها تلوب جنها طير مذبوح فرفح گلبها كون الله يفرفح گلبه….
نورهان:- وهو وينه هذا الكلب ما بين….
زهراء بگلب محروك:- ماكو الچلب ماكو حتى مصطفى الي هو صديقه الروح بالروح ويندل الاماكن الي يروحلهن ما لگاه … ولج نورهان الولد متحلفين بي حتى محمد الي كتل روحه على خطبه ياقوت وسيف متخبل….
نورهان:- طبعا الادبسزز الغيره سزز شسوة بيها هو لو زلمه مو عافهه بشارع متخربطه وراح عود يحبها حبته حيه ام راسين…
صوت ياقوت صار اعلى ولسانهه يلهج بأسم كرار:-كرراااارررر تعال راح اموووت …. كررارر … ماما راح اموت …..
زهراء بأسىء:- دتسمعين تريد كرار وكرار ملتحق وما أنطيناه خبر معناته يتخبل ويعوف الدوام ويجي حتى مجتبى ابوي ما رضى نگللهم ……
نورهان بحزن:- حبيبتي سوده عليه والله چان بودي ابقى يمها راح يظل بالي…. باوعت لفارس وكملت ….زهراء وافيني باخبارهه باجر اجي اشوفها واذا حددو عمليه انطيني خبر….
زهراء:- اكيد اكيد حبيبتي والله وكفتكم ما تنسي…
نورهان:- لا يابه شسالفه هاي ياقوته الغاليه شلون نعوفها ……
سدته من زهراء تباوع لاخوها الي مو طايق روحه
فرك كصته وعيونه:- منو كرار انوب ….
نورهان:- اخوها توأمها كم مرة سألت عنه وجاوبتك….
تنهد متمدد على سريره بملابس الدوام ما بدل :- اي گلتيلي راح من بالي….
نورهان بمرح:- سلامه بالك والي ببالك عيوني … تدري اخوتها خمسه ماشالله…
فارس :-چا خيعوني خمس اسود شيفكها ويطلعها منهم……
ضحكت وهي تطلع لزمت يده الباب ووكفت اندارت وسالته بصوت خافت وعيونها تلمع فضول:- تحبها؟؟؟؟؟؟
تنهد بصوت عالي:- جنت اكول عاجبتني بس من شفت هذا الكلب يحط ايده عليها ثارت غيرتي چن هي عرضي … وعقلي طار والوجعه الصارت بيه تدك بگلبي ……
هزت راسهه بتفهم وابتسمت وطلعت من الغرفه
ياقوت….
احس المريت بي مثل الحلم … جيه سيف .. ظهور فارس من العدم وتصادمهم وكعتي .. والالم احس فاقده ذاكرتي اذكر لقطه وناسيه الثانيه .. ماتذكر شلون صعدت السياره حلقه مفقودة… بس اذكر شلون انسلت روحي مني ووكعت على نورهان.. ظنيت نفسي متت … مو من الالم الي ينهش بيدي من صدمتي بسيف وخوفي من الراح يصير واهلي اخوتي
حسيت گلبي طلع من جسمي…..ماكدر افكر بشي غير الوجع بحياتي ما جربت الم مثل الي بيه هسه احس گلبي يدك بيدي اتمنى اقلعها من مكانهه حتى اخلص … ومحتاجه كرار .. اريده يمي .. ليش ما اجاني…. اعصابي من الوجع ضعيفه واحس مقهورة وزعلانه منه اسمه ما وكع من لساني
تأجلت عمليه ايدي لثاني يوم حقدت على سيف وتمنيت الوجع البيه يتحول بي … ماكدرت انام الليل والالم والسهر والمرض خله كل قواي تخور حتى الانين صار يطلع خافت من شفايفي اليابسه…..
بابا كاعد يم راسي يمسد بشعري ويقره ايات عيونه متروسه دمع على حالي .. يحاجيني بصوت متألم:- ياقوت بابا ست الحلوات انتي قويه يلا شدي حيلج وكولي يالله … رددي بابا رددي
ناد عليا مظهر العجائب تجده عونا لك في النوائب .. صرا اردد ويا والغصه والبجيه محشورة بزردومي .. دموعي تنساب واردد ويا …كل هم وغم سينجلي بولايتك يا علي ياعلي ياعلي …. همست بصوت خافت يا جدي يا علي راح اموت من الوجع
شفت الخوف والقهر بعيون ماما لاول مرة يمكن.. بس التزمت الصمت الظاهر تفكر شلون راح تنحل ويه سيف….
نورهان
ما داومت ثاني يوم من قهري على ياقوت وفارس هم ينتظرني بس اكله كوم وديني حتى يروح للمستشفى
ما توقعت عنده مشاعر عميقه لهلدرجه اتجاه ياقوت اول مرة اشوف حالته هيج على وحدة….
دكيت باب غرفته لكيته مبدل لابس بنطرون جينز وقميص ابيض حبيت اشاقيه واغيرله جو:- اييي عمي الكشخه والعطر الي يهفهف يابه هنيالج يلي ببالي شلون زلمه يخبل…..
ابتسم بخمول هاز راسه على سوالفي :- كوم نروح للمستشفى بالاربعه ونص عمليتها….
فز من مكانه يتناوش سويجه ومحفضته واشرلي حتى اطلع كدامه….
نزلت قبله لكيت امي وريم بالمطبخ .. حاطه زين ابن ريم بحضنها توكل بي … نزلت عليه بوسته حيل من خدوده واكرص بي عالخفيف :- فدوا اروح لهلخدود وهو يضحك الفطير….
ريم:- ها مبدله وين….
جاوبتها بدون ما اباوعلها ولا باوعت لامي:- اروح لصديقتي للمستشفى راح تدخل العمليات شوي انوب……
رفعت حواجبهه :- من شوكت تروحين للمستشفى على صديقاتج….
باوعتلها وابتسمت :- من اليوم وجاي… وشددت على كلامي ببطيء متعمد.. فارس راح يوديني ويبقى وياي ويرجعني …
ملامحها انعفست معاجبهه:- نورهان كعدي راحه …. لا تظلين تقرين براس فارس ….
دخل فارس المطبخ ويه حجايتها يلبس بساعته:- زعطوط اني وتقره براسي ررريمم….
توترت وبلعت ريكها تبرر:- لا حبيبي محشوم بس والله افكر بيك وعلمودك
فارس:- الله يسلم مودج حبيبتي اني اعرف مصلحتي انتبهي لبيتج وابنج …
التفت لنورهان :- لحگيني يلا اودعناكم…….. تبعته بسرعه مالهه خلك تسمع حجايه
دارت ريم وجهها لامها :- هاي بنتج فد وحدة ملعبه …. اعرف الي بالها اعرف …..
ام فارس:- اسكتي هسه……
داس دكمه المصعد وهو يحك حاجبه ينتظرون المصعد ينزل الهم …..
انفتح الباب وصار محمد مقابيلهم برز من المصعد….
استشعر النفور من محمد اتجاهه بس قرر يكبر عقله وما يتصادم ويا … تسالمو برسميه حاده وطلع من المصعد وهو ونورهان صعدو…….
كعد على كرسي انتظار مقابيل باب الغرفه ونورهان دكت الباب انفتح الباب وطلع منه حيدر دنك راسه بسرعه يسوي مجال :- فوتي خويه فوتي…. وطلع سلم على فارس…. كعد بصفه واندمجو بسرعه صارت بينهم مواضيع من اول لقاء بينهم البارحه…..
حيدر:- يابه تعبناكم واشغلناكم والبارحه طلعت بدون ما تاخذ الفلوس زحمه والله…….
فارس:- يابه تونه نسولف خوش سوالف ليش تخربها مابينا فلوس ان شاءالله واعتبرها هديه لسلامتكم…..
حيدر :- مايصير والله ما يصير…
فارس:- يصير ونص لو صار العكس والطاحت اختي ماراح تسوون هيج..
حيدر :- افا الرگبه سداده ….
ابتسم فارس :- حبيبي سيد تعرفت عليك هاي تسوة ابو الفلوس … واذا هيج مصر يجوز بيوم احتاجك وتوكفلي خليهن سيد انه طمعان بصداقتك…..
ضحك حيدر يطبطب على كتف فارس:- هاهيه صايرين يابه……
بعدهم يسولفون وشافو اثنين اجو مستعجلين واحد منهم فتح الباب وداهم الغرفه
وكف حيدر بسرعه يتعذر من فارس:- اعذرني خويه مايدري الاهل جوا گلبه محروك على اخيته….
هز راسه بتفهم ونورهان طلعت بسرعه كعدت بصفه تهمس…
ذوله اخوانها … خطيه ممرودين عليها….
باوعلها بعيون تسأل :- شلونها…..
نورهان :- زينه خطيه تعبانه من بارحه تبجي …..ايدها تخوف من الورم المسكينه …..
هز راسه يباوع لباب الغرفه المردود يسمع اخوها يحجي ىصوته يرجف…
دخل كرار مايشوف كدامه عيونه مغوشه من الدموع …. انخمش كلبه عليها متمدده وايدها على مخدة ملفوفه اصابعها مبينه مورمه وزرك نزل عليها حاضنها :- ولج توته شلعتي كلبي يبعد چلاي بيه ولا بيج… باسها من شعرها اندار لامه :- شفتي … شفتي الچلب والله اذا ما اشرب من دمه بس خل الكفه … ما جاوبته وباوعت لزهراء بتوعد تعرفها هي خابرتهم وزهراء متجنبه نظراتها تسوي نفسها متعرف
مجتبى جر كرسي وكعد بصف ياقوت شال ايدها السليمه وباسهه:- ازمه وتعدي بعد اخوج وحگج يطلع من خشمه …..
صفن كرار على اخته لثواني وكام طلع شايط طلع ورا حيدر يلزمه
وكفو بالباب وحيدر يحجي ويا:- وين مولي متشوف اختك من البارحه تصيح بأسمك وين عايفها شويه انوب تدخل العمليات….
كرار :- خليني اروح ادورة واشرب من دمه … هذا زايع الحيا حذرته وكتله لا تقترب وسواهه مو اول مرة يسويها وهلمرة متعدي …
حيدر بأستغراب:- شني مو اول مرة
صوته صار عالي و استحي من فارس ونورهان الي يباوعون عليهم بصمت … جره عنهم مسافه يكز على سنونه:- مو وكته كلنا متحلفين بي بس خل تطلع اختك سلامات وايدها سليمه ونزوعه العافيه عيب منا العالم …
كرار:- كون هاجر فاخت ….
نطت عيون حيدر يحط ايده على حلك كرار يرصها حتى يسكت:- ولك كرار اشو ما تستحي سد حلكك لا اسطرك … مرت اخوك شعليها….
وخر ايده كرار :- منها .. كل الي بياقوت منها … منو الحط السالفه براس الكل .. منها السوسه الحيه…
ضربه حيدر على صدره باصابعه :- ولك اسكت .. اسكت لا تجفص ادري كلبك محروك بس لا تجفص دير بالك تحجي كدام ابوي ومحمد هيج …
جرة من ايده..امشييي امشيي اكعد وسلم عالزلمه فضحتنه كدامه فوك فضيحه ابن عمتك الناقص ويا… واكعد واستچن…. دفعه وراح لباب الغرفه يطلع مجتبى حتى نورهان تدخل …
طلع مجتبى وحيدر يحجي ويه فارس:- خلي الاهل يدخلون جوا ويلا يولد ننزل نشرب چاي …..
دخلوها العمليات البنات بقن بالغرفه ينتظرن وابوها وامها مقابيل صاله العمليات وهو نزل ويه الولد للكافتيريا يشربون چاي … يسولف وياهم بس باله فوك هناك يخايله شلون نايمه وملامحها معقوجه بألم….
صار حديث مشترك بينه وبين مجتبى وكرار عن الامور العكسريه كون اكو تشابه بين عملهم …. اجوي مصطفى ومحمد واخذو ركن وكعدو متجنبين الحديث ويه فارس ….
وبعد ساعتين انتظار ابو محمد دك عليهم يبشرهم طلعت.. كمز كرار من مكانه بدون ما يباوعلهم يركض للمصعد وحيدر يهز بيده عليه :- شوكت تكبر مادري يالزعطوط…
ضحك فارس وهو يكوم ويا:- لا مبين زلمه معدل بس حنيته تغلبه الاخت عزيزه …..
حيدر:- ايي كرار حنين هواي خاصه وياهه توأم وروحهم معلگه ببعض …
بقت يومين بالمستشفى بعد العمليه وطلعوها للبيت رغم المسكنات بس الالم قوي اكلها صار قليل وحرارتها ترتفع حتى زهراء تركت قرايتهه وگابلتها تنام يمها بالغرفه تداريها وتهتم بعلاجها… محد فتح موضوع سيف كدامهه ولا تعرف شنو الصار ويا حتى عمتها ما اجت وهاجر والجهال مو بالبيت رايحه لاهلها…..ماسألت عنها تعبها جان اكبر من كلشي
تليفونها عالشحن على مكتبتها وصوت رساله عالواتساب صدح زهراء متمددة بالكاع تقره يمها
صاحتها :- زهراء .. شو جيبي تليفوني …..
كامت زهراء جرته من الشحن وانطته الهه ورجعت تكمل قرايه بدون ما تكول شي
فتحت الرساله ونفس الرقم الي راسلها قبل فتره دازلهه
سلامات .. سلامات ريتك سلامات
صبح ومسه يهواي ريتك سلامات…..
رفعت حواجبهه باستغراب وزادت حيرتها وهمست تصيح زهراء:- زهراء تعاي….
زهراء وهي تقره بالها مو يم ياقوت:- همممم…
ياقوت بزهكه:- دتعاي مو احاجيج تعاي شوفي….هذ الرقم هم دزلي رساله غريبه ……
جذبت انتباه زهراء الي كامت بسرعه تكعد بصف ياقوت وتحط راسهه بالشاشه :- منو … شنو … شكو …..
ضربتها على راسها بالتليفون بخفه :- تموتين على طيحان الحظ…..
زهراء بنفاذ صبر تاخذ التليفون من ايد ياقوت :- دجيبي شكد فاهيه وصارت تقره بصوت باوعت لياقوت… چان كلت سيف الخايس بس هذا يهومش ما تطلع منه هالرومانسيات ويدز اغاني جيل الطيبين….
تحولت ملامحها لجديه:- هذا يعرفج ياقوت ….
ياقوت باستفهام:- شلون ….
ضربت كصتها:- من اكول مطفيه وفاهيه تزعلين لج جاي يگلج سلامات… سلامات يا دماغ البشه.. يعني يتحمدلج عالسلامه على ايدج .. اخخ منك سيف لو هاطرها على راسهه بلكي تصحصح ….
هزت راسهه بدوخه:- اششش .. اششش شبيج شكد لغيتي لخاطر الله.. واني اعرف منو ماعرف احد …
صارت تنقر باصبعها على فكها بتفكير ومضيقه عيونها :- مثلا احد من الدوام؟؟؟؟؟
ياقوت نافيه:- ماعندي احتكاك ابد بس نورهان…..
ميلت راسهه زهراء صفنت على ياقوت وفتحت عيونها وحطت ايدها على حلكها مثل الي اكتشف شي:- لج هو … والله هوووو.. اكص ايدي واشمرها لهاجر واخوها الچلاب اذا مو هوً…
ياقوت مفهيه تباوعلها:- منو هو….
خلت زهراء ايديها على اكتاف ياقوت وتباوع بعيونها بحماس:- راح ارحم ثولج ….فااارس…. اخو نورهان ما غيره
انتفضت مستنكرة:- لا مستحيل … شدتخربطين… شعنده يدزلي هيج…
مددت زهراء بصفها صفح :- تذكرين بيوم الطب للجامعه وگلج عيونج ما عيونج ولا تبجيهن … بنفس اليوم اجتج رساله مضمونها انتي زعلانه لان عصبتي منه ……
واليوم يگلج سلامات…. كامت تكمز وتفرقع اصابعها… هلا … هلا… هذا معجب بيج ولج…. انطيج موافقه حلوو … ورتبه… اصلا اني شكيت بي معجب من جنتي بالمستشفى… عيونه تتلاكط على باب الغرفه كلما ينفتح … وهو دفع فلوس المستشفى وماقبل ياخذهن … ويوميه جايب نورهان والسلام عليكم وشلونكم … ودك سوالف ويه حيدر … يريد يضبط اموره سياده النقيب…..
بلعت ريگها متفاجئه:- شنوو دفع فلوس المستشفى ؟؟؟؟
زهراء:- لج اي من اجينه مكمل ودافع فلوس كلشي والعمليه بس جانو ينتظرون توقيع ولي امرج للعمليه وحلف ما ياخذهن وكال لحيدر اعتبرها هديه سلامتكم وغمزت… قصده سلامتج يعيوني ….
همست:- شكد عيب…. وضربتلها صفنه وماحجت ابد….. زهراء شافت اختها مسطورة وصافنه بالفراغ تفكر عافتهه ورجعت تكمل قرايه تعرف ياقوت مو من نوع تعبر عن مشاعرها ماتريد تدوخها فوك مرضتها……
مددت بصمت تباوع لسكف ايدها متلفلفه حاطتها على مخده بصفها رفعت تليفونها وقرت الرسالتين…. مره واثنين وعشره….هو… مو هووو
حست گلبها يدك بتوتر تذكرت شلون لزم سيف ومسح بي الكاع وضحكت بخفوت …رفعت زهراء راسهه تباوع لياقوت :- دخيلج يا ام البنين تخبلت الفرخه يبااااووو .. وتسوي حركات وتصنف….
باوعتلها صفح :- لج بطلي هاي سوالفج جنج عجوز ….
زهراء:- المن تضحكين… اني اشك … لا مو اشك اني متاكده.. شالو دماغج ويه عظامج المتنعنعه…..
ياقوت :- اتذكرت بيوم السالفه….. شسوة بسيف….
كمزت زهراء تربعت كبالها وشمرت الكتاب وعيونها مفتوحه بفضول:- اي
احجيلي بشرفج….
ياقوت:- لزم سيف من خوانيكه ويجيبه منا يودي منا انوب سيف ما يلحك بي يردله الضربه ما يلوحه … واختج صارت ملطشه الحقير مايرضى يهدني سحلني ويا الخسيس…..
زهراء بهدوء:- تدرين توته الصار بي صالح الج… محد يكدر يلومج بعد عالرفض…… حتى ماما ابد ماحجت وساكته ….وهي اكثر وحده تحب سيف وتريدج تتزوجي…..
زارتها نورهان مرتين تطمن عنها تشكيلها ضوجتها من الدوام لان وحدها صارلها عشر ايام ما مداومه …كاعده يمها بغرفتها وتمشط بشعرها تسويلها ذيل حصان عالي
نورهان:- اظفره لو اخلي هيج؟؟؟
ياقوت:- لا هاهيه عاشت ايدج ….
نورهان:- شوكت تداومين طكت روحي ….
ياقوت:- الاحد اداوم تخلص اجازتي…
نورهان بفرحه:- عليج الله؟؟؟؟
ياقوت:-اي والله شبيج خوما اظل نايمه صح ايدي بعدها ماكدر احركها وتوجعني بس لازم ارجع لا انفصل .. فاتتني هواي محاظرات ومابقه شي للامتحانات…. عندي مراجعه باجر لدكتور يچيك هالايد البلوة….
نورهان باوعت للشباك صوت المطر ناعم :- لج اخذتنه السوالف خل ادك على فارس يجيني …..
فزت لطاري وتذكرت الرسايل وتوقع زهراء يكون هو ..حست تفكيرها مفضوح ونورهان تسمع صدى افكارهه بلعت ريگها وكالت بهمس :- خليج بعد وكت نتعشه سوا وروحي ….
اشرتلها نورهان صبري وهي تحجي بالتليفون:- ها ابو الفوارس اسفه حبيبي تأخرت عليك اخذتني السوالف …ها انت واكف برا يلا راح اطلعلك…..
ماتعرف ليش گلبها صار ينبض بعنف مثل طبول الحرب ونفسها صار عالي … كامت حطت شال على راسهه تنزل ويه نورهان تودعها …. نزلن وطلعت من باب المطبخ تلبس بحذائها وهي واكفه بالباب من الداخل تباوع لظهر حيدر الواكف بالباب……
نورهان:- يلا حبيبتي اشوفج الاحد ان شاءالله ووجهت انظارهه لام محمد :- حبيبتي خاله مع السلامه ….
ام محمد:- كل الهلا حبيبتي واشرت لياقوت طبي بارده مو زين على ايدج الدكتور مو وصاج ممنوع برودة انه اطلع ويه البنيه ….
نورهان:- طبي ياقوت بارده .. تسلمين خاله ميحتاج والله اني اطلع .. اندارت تطلع بس باب البيت انفتح على وسعه ودخل حيدر ايده بيد فارس مبين مچلب بي يمشي على كيفه بطوله الفارع قمصلته جلد لازكه على ذراعه تبين تفاصيل اكتافه… اندفعت ليورا لا ارادي خافت لا يشوفها …..
حيدر يحجي بصوت عالي بدون ميباوع لنورهان:- ردي جوة خويه يم صاحبتج عشاكم يمنه…. وصاح بصوت يوصل لامه:- حجيه عشه معدل من ايدج الطيبه …..
نورهان ما جذبت خبر نزعت الحذاء ورجعت طبت ….
طلعت من المطبخ للصاله تحس وجهها محترك من الحراره تجهل الجاي يصير وياهه ….. لزمتها زهراء تكعدها على القنفه بالصاله الوسطانيه تحط ايدها على كصت ياقوت:- شبيج وجهج غادي طماطه مصخنه؟؟؟؟؟
نورهان:- ياقوت خاف تعبتي تنامين؟؟؟؟
هزت راسهه نافيه:- لا يمكن دخت شويه مكضيتها بس نوم….
نورهان:- زهراء عفيه وين الحمام…. دلتها عالحمام ورجعت لياقوت تباوعلها مصغره عيونها …شاورتها:- شبيج اتخردلتي من شفتي ديري بالج لا يبين عليج علويه نهله تملص راسج…..
دخل محمد للبيت يحجي بتليفونه يحجي :- نقدم طلب استئناف والله كريم ولو اني اعرف ينرفض بس انقهرت على ابو … طب من باب المطبخ يفتح دكم رداناته ويرفعهن والتليفون بين اذانه وركبته ومستمر …. توه يدخل لمجمع الصحيات وفتحت نورهان الباب ورادت تنضرب بي …. شهكت حاطه ايدها حلكها وهو وكع التلفون منه …. نصى شال تليفونه يباوعلها
محمد:- العفو مادري عدنه خطار .. اندار وصعد الدرج….
نورهان بهمس ويه نفسها:- شكد شايف نفسه …..
سوو عشه وصبو للزلم ابوها وحيدر وفارس ومصطفى ومحمد تسمع اصواتهم يسولفون وهن كعدن بالمطبخ على ميز الطعام .. صدحت ضحكه فارس بصوت عالي تبعها ضحكه حيدر… الي ما سمعته يضحك هيج من يوم سالفته هو وليالي…. ابتسمت بحزن حالها خلاهه تنسه تسال عن حال اخوها باوعت لزهراء بعيون مغوركه:- سمعتي حيدر صار شكد مسامعي هيج يضحك…..
شاورتها زهراء:- عوفيج من روميو المضروب بوري دسمعي ضحكه ذاك الرجال خرب بعرضه صوته مال اذاعي بشرفي …
كرصتها من رجلها جوة الميز وخزرتها :- كافي عاد..
كملوا العشه وصبو چاي وفواكه وضيافه وصعدت لغرفتها هي ونورهان وزهراء اتورطت بالمواعين…. وكفت نورهان كدام المرايه تعدل حجابهه وتحط حمرة من ياقوت واجتها رساله قرتها وشالت جنطتها:- يلا بعد نرفع الزحمه … رادت تنزل وياهه مقبلت وحلفتها تبقى بالغرفه ترتاح ….
رادت تروح للبلكونه بس ماتجرأت وومددت على سريرها صدح تليفونها بصوت رساله ……
سلامات … سلامات ابعث سلامات
ويه الرايح ويه الجاي ابعث سلامات
سلامات … سلامات ريتك سلامات
صبح ومسه يهواي ريتك سلامات……….
شهكت وهي تكوم بسرعه تباوع لناحيه الشباك فتحت باب البلكونه وطلعت بتهور تباوع شافت ابوها واخوانها طابين بالحوش وهو يصعد سيارته رفع ايده البيها تليفونه بحركه سلام بدون ما يندار اضويه الشارع خلته يكون واضح …. وصعد سيارته وانطلق…
سرت بجسمها رعشه متعرف من البرودة وحبات المطر الخفيفه لو من حركته … شنو ديكللها هذا هوو الي يدز الرسايل .. لو هاي اوهام زرعتها زهراء براسهه طبت بسرعه تهرب من نفسها لنفسها اخذت دواهه بأيد ترعش وگلب ينبض نبضات ما مرن عليها من قبل ومددت بفراشهه وغطت راسهه ماطولت هواي وغطت بالنوم بسبب العلاج الي يزيد عدها النعاس وبيومها شافت كابوس بي سيف ينظرلها بعين الغضب ويتوعدلها بالعقاب …….
وبيوم الدوام جان الجو مشمس وبرودته حلوة وصلها حيدر وهو يوصيها الف وصيه على نفسها بطلوها من الخط لان اتاخر يلا خابرهم بيوم الحادث وما عجبهم تصرفه …. دخلت للقسم .. كل الطلاب اتحمدولها عالسلامه حتى الي بحياتهه ما محتكه بيهم والدكاترة يا دكتور يفوت عليهم محاضره يسلم عليها …. ورغم حست بالالام وتعب وايدها معلكه بحماله على كتفها بس حست نفسيتها تحسنت عن الايام الراحت ….
طلعن من المحاضرة الاخيرة يتمشن حتى يطلعن من الجامعه
نورهان:- منو يوصلج؟؟؟
ياقوت:- حيدر بعد منا وهيج صبح ياخذني ويا وياخذ زمنيه نهايه دوامه حتى ما يتاخر عليه … وكرار من ينزل هو يتورط بيه بابا قفل ماكو خط على ما امن عليج….
واكف ينتظرها تطلع حتى يشوفها .. من يوم الحادث ما شافهه بعد …. مشتاق .. متلهف.. لكلشي يخصها … دور بعيونه على حيدر بين السيارات بعد ما انطته نورهان علم … لمحه واكف بالجهه الثانيه قريب كلش من باب الجامعه بقه بس يفوت السياره لقاعه المحاضره حتى ياخذها صابته حيرة شلون راح يشوفها .دار راسه لشارع.. شاف ولد صغير يبيع مي بين السيارات… ضحك على نفسه والفكرة الي يريد ينفذها تمشاله يأشرله يتقرب منه .. اجاه يركض عباله يريد يشتري منه مي
:- عموو تريد مي…
انحنى لمستوى طول الولد يطلع عمره عشر سنوات كاله:- اذا اشتري كل المي العندك وانطيك فوكاهن حمرة وتسويلي شغله صغيرونه…
:- شني الشغله الصغيرونه…. ابتسمله فارس وشرحله شيريد… وانطاه الفلوس الوعده بيها طبطب على ظهره يشجعه:- يلا السبع مثلما وصيتك…
:- تدلل عمووو… وراح يركض …
اقترب من سياره حيدر دك جامته نزل حيدر من السياره وتسالمو سلام حار شاف نورهان من بعيد وياهه ياقوت … يشوف بس ظهرها واكفات يدورن استأذن من حيدر متعذر بأخته طلعت …. وراح لسيارته صعدت نورهان بصفه
نورهان:- فارس ميته من الجووع بشرفك استعجل للبيت …
كعد بمكانه يمسد شواربه بظهر اصابيعه :- انتظري….
نورهان:- اكلك شنتظر ميته جوووع ..
رفع ايده بالشقه يريد يكفخها :- داكلج اصبري….
دقيقتين وفات من سياره حيدر الي واكف يم تاير سيارته الخلفي عبره كم متر ووكف… نزل من السياره واتمشى لناحيه حيدر:- ها سيد خيرك….
اندار حيدر يحك راسه:- بنچر تايرات الورا كاعدات ….
فارس:- شلون سالفه تعبانه ….
حيدر:- عندي سبير واحد الثاني شلون مجان امشي عليه بس ارجع اختي للبيت واصلحه ….
فارس:- لا يمعود شسالفه شلون تخاطر .. انوب لا سمح الله تسوون حادث خو ما عايزين كسور اخرى وضحكوا… تعال اوصلكم وارجع ويه واحد من الولد سوي سيارتك…
حيدر :- لا حبيبي ميحتاج هسه ناخذ تكسي …..
فارس بإصرار:- ابد والله سيد ازعل سياره اخوك موجودة وتاخذ تكسي ….
باوع حيدر على ياقوت الكاعده بصدر ورجع باوع لفارس بحيره :- خاف نأخرك؟؟؟؟
فارس:- عساس راح اوديك للبصره امشي سيد امشي شلعت گلبي ….. تمشى يحجي طالع كدامك قفل سيارتك وتعالو ….
مشة سريع يفتح باب نورهان … نزلي بسرعه وكعدي وراي… سياره حيدر بنچر نوصلهم…
باوعتله بمكر تهز راسهه:- يمه منك من تخطط تخوف….
رفع حواجبه :- شمخطط اكلج بنچر شني متفق ويه التايرات ؟؟؟
سوت نفسها مصدكته:- لا يبووي شعليك … تدبير الهي..
فتح باب السياره واكف ينتظرهم اجوي… ميباوع عليها زحمه من اخوها بس يحس كلبه كام يخربط بدكاته…. كصته عركت…
ساعدها حيدر وصعدت و حيدر صعد بصفه :- يابه راح نتعبك…
فارس:- عود خوش….
خله حيدر يضحك…. مد ايديه يتفحص جيوبه :- اوكف فارس نسيت محفظتي بسياره اعذرني دايخ هسه اجي ونزل ….
رفع عيونه بالمرايه بنفس اللحظه الي نزل بيها حيدر يروي عطش شوفه الها …. تباوع من الجامه وتذكر من وصلها وظلت تباوع من الجامه بنفس الطريقه
فارس:- الحمدلله على سلامتج يابه…
دارت عينها لداخل السياره بدون متباوع عليه وهمست بصوت خافت :- الله يسلمك… سكتت وكالت بتردد:- شكرا على كلشي سويته بذاك اليوم…
حس كلبه يرفرف :- وانه الممنون ….
لمح ابتسامه بس ما كملتها وعدلت كعدتها …..
اجه حيدر صعد:- يلا يابه امشينا …..
حرك سيارته واندمج ويه حركه الشارع …..
شغل مسجل السياره وصدح صوت المطرب بصوت عذب يغني
سلامات سلامات ابعث سلامات
ويه الرايح ويه الجاي ابعث سلامات
سلامات سلامات ريتك سلامات
صبح ومسى يهواي ريتك سلامات
سلامات سلامات ابعث سلامات
ويه الرايح ويه الجاي ابعث سلامات
سلامات سلامات ريتك سلامات
صبح ومسى يهواي ريتك سلامات
تجينا تجينا ردتك تجينا
راحت واجت الايام راحات واجت الايام ردتك تجينا
وعلينا وعلينا بس مر علينا
اتورد الاحلام اتورد الاحلام من تمر علينا………..
بلعت ريگها تحس كلبها راح ينفجر هلكد ما يدك سريع ودارت وجهها اتجاهه ….. ولاول مرة تحط عينها بعينه متفاجئه بدون ما ترمش ….. كمل المطرب مقطع
الاگيه الاگيه بس كون الاگيه
وبعيني ضم هواي
وبعيني ضم هواي
بس كون الاگيه
تراضي تراضي وعيني تراضي
وارسم بعينه عتاب وارسم بعينه عتاب وعيني تراضي
رمش بعينه رمشه بطيئه وكأنه يگول اي هذا اني … شهكت نفس عميق فاتحه عيونها على وسعهن ولمحت عيونه تبتسم على صدمتها…….هو …هو الرقم الي يدزلها …. دارت وجهها بسرعه اتجاه نورهان الي مندمجه ويه الاغنيه وتباوع ليكدام … رجعت التقت نظراتهه ويا وباوعت لحيدر بالمرايه الجانبيه ساند راسه ليورا مغمض كأن كلمات الاغنيه خلته يستذكر شي …..دارت وجهها بسرعه لشارع … تحس روحها داخت من تصريحه المخفي ….. واتمنت تتبخر بهاي اللحظه من مكانهه …………
اول ما وكفت السياره بباب البيت ودعت نورهان عالسريع ونزلت بسرعه عبالها اذا تفوت البيت راح تنسى الصار.. وسألت نفسها ليش هو شصار… صدفه .. يجوز صدفه طلعت نفس الاغنيه كله بسبب زهراء شتت فكري استغفرت ربها اكثر من مرة تدفع كل الاوهام خارج نطاق تفكيرها ونامت بدون ما تبدل ملابسهه ….
حست على زهراء تكعدها :- توووته … لج ياااقوت دكومي الدنيا مغرب شو نايمه بهدومج شبيج مريضه…
راسهه ثكيل ومسطور وتحس تريد تظل نايمه همست بنعاس:- عوووفيني اناااام نعسانه …..
زهراء:- لج كومي اكلي عندج علاج كومي.. لزمتهه من كتفها تجر بيها تجبرها تكوم تكعد….
اطلقت صوت استنكار :- اهوو دخليني تعبانه ….
زهراء:- ماما كالت اذا ما نزلت واكلت اطيح حظها… تعبير علويه نهله بالاهتمام معوق…..
فركت وجهها بملل وكامت وزهراء خطيه تساعدها بالتبديل ومشطت شعرها ظفرتلها نص والباقي مفتوح غسلت ونزلت
اتفاجئت بوجود هاجر وعمتها ….
كامت عمتها عالسريع اقتربت منها تحضنها وتبوسها:- سوده عليه حبيبتي الحمدلله على سلامتج …..
مجاوبتها وظلت واكفه بباب المطبخ الداخلي …اما هاجر باوعت لياقوت ونزلت عينها على ايدها المعلكه بكتفها ولمحت لمعه ابتسامه خبث ازاحتها وكملت تشرب چايها ….
زهراء ما تحملت وكالت بأبتسامه:- الحمدلله على السلامه هاجر سمعت بيج اخوي كاسر ايدج بنص الشارع وسويتي عمليه…..
وجه هاجر اصفرر من الغيض وام محمد صاحت بزهراء تسكت …
ام سيف:- يمه والله مو قصده .. الصار ….
فتحت ياقوت عيونها تباوع لعمتها والدموع بدت تنساب على وجهها همست :- مو قصده؟؟؟؟؟؟؟؟؟
كامت هاجر تغسل استكانهه عالسنك وترجف وحجت بصوت غاضب:- كله منج… جاي يحاجيج تحشمين الغرب على ابن عمتج وتخلين واحد ساقط يضربه….
ام محمد:- هاجر هذا حدج… محد حشم احد…
اندارت مكتفه ايديها:- چا شنو غايته الدافعلج تعرفي… ليش دمه احترك وتعارك ويه سيف…..
دخل محمد المطبخ شايط الظاهر جان يسمع الحديث وتوجه لهاجر وجه الها صفعه رنانه خلاهه توكع … الكل انصدم بحياته محمد ما سواهه ماعدهم احد يضرب بالبيت… رفعت راسهه مصدومه لازمه خدها :- تضربني محمدددد… تضربني علمود اختك وانت تعرف سوايتهه……
جرها من زندها رافعها عن الكاع يحجي بهدوء :- باعي لج لا تخوطين بالحجي حتى تغطين عمله سيف .. عبالج نسيت السويتي ذاك اليوم… لوما عمتي هي الجابتج جان اجيت اخذت الجهال وعفتج هناك …..
ام سيف:- وحدو الله يمه … الصار صار بعد….
اندار محمد لعمته بأستهزاء:- ها الصار صار… عادي سهله … واذا قابل شسوه لا يابه ماسوة شي …..بس خل يطلع راسه الضامه مدري بيا خيسه .. اعرف كلش زين انتي وبنتج تعرفون بي وين ….
ام محمد:- كافي محمد… سدو الموضوع هسه روح يمه روح اخذ راحتك … كلشي ينحل…..
عافهن وطلع من البيت ….زهراء لزمت ياقوت :- طبي وكعدي اكلي وطبي بعينها هالصلفه
هزت راسهه رافضه :- عوفيني لخاطر الله دعوفيني الله يموتني ويخلصني ….. انتزعت نفسها من قبضه زهراء وصعدت لغرفتها ركض …… قفلت على نفسها الغرفه …. كعدت تتصفح ملازمها وتقره ببال شارد….. اجتها رساله عالواتساب…
كلبها دك عبالك تعرف هويه المرسل ترددت تفتحها وعافتها تحاول تتجاهل ….. جابتلهه زهراء اكل بدون ما تحجي .. اكلت واخذت علاج… ومددت على سريرها تحاول تنام ….
زفرت بأستسلام ترفع تليفونها رجفت ايدها وهي تدخل الواتساب….
الناس تغرك بالبحر بس انه غركان بسما…
قرتها اكثر من مرة و اجتها رساله اخرى وكأنه منتظرها تفتح الرساله خلت القشعريرة تسري بكامل جسدها…..
ريض يبو عيون الزرك
شو جنهه وك صارت صدك
فدوة اروح لنظرتك
كل مااصد بيك احترك
حاجيتك ودرت الوجه
امبين اظن مالك خلك
حاجيني سديت الهوه
ساكت ولك راح اختنك
كل ظني مالك بالهوى
وما جربت طعم العشك
هلمرة مو رقم بدون صورة جانت صورته موجودة .. واكف بزيه العسكري وحده من ايديه خلف ظهره ومبتسم ابتسامه هاديه………
