رواية قانون القلب اقوي الفصل الثاني 2 بقلم رسل احمد
ومثل فزّة طفل روحي
تفز لو سمعت بطرواك
ومثل وردة وشحيحة ماي
مِزنة مطر تتنخاك
تصويت
تعليق على الفقرات
*******************************************
بعد ما كعدت بالحمام ساعه تحاول تأخر اللقاء المحتوم مع بيت عمتها استسلمت وطلعت لشوكت تبقى خاتله دخلت غرفتها المشتركه هي وزهراء بهذا البيت مالگتها عرفتها نازله عضت شفتها وهي تزفر نفس عميق وهي تمشط شعرها كدام المرايه لفته شلون مجان افترت كدام المرايه تتاكد ثوبها مناسب ومبي شي جرت ربطتها ولبستها نازله على نص ظهرها ومن كدام واصله لحد بطنها شالت تليفونها اخذت نفس عميق ونزلت بخطوات بطيئه تحس الكاع ثگيله جوا رجليها وتتمنى لو تبلعها رسمت ابتسامه مجامله وهي تتوجه للصاله تسمع اصواتهم بيها تحاول تخفي الصراع الي بداخلها .. بين قلب رافض وعقل راضخ لرغبه اهلها..
وبصوتها الهادئ كالعاده القت التحية:- السلام عليكم … توجهت الانظار نحوها الي رجع كمل سالفته والي رد السلام كامت عمتها زينب وهي تفتح ايديها بابتسامة :- هلا … هلا بالطش والرش حبيبه عمتها …
ابتسمت وهي تحضن عمتها الي لزمت وجهها وباستها من خدودها:- فدوا اروحن لهالوجه الحلو.. صلوات عيني بارده عليج عميمه…
جاوبتها باستحياء:- حبيبتي عمه فدوا لكلبج…. كعدت بصفها متجنبه نظراته الثاقبه مارفعت راسهه ولا باوعت اتجاهه مأجله التقاء عيونهم اكبر قدر ممكن … وبنص السوالف صاحتها هاجر من المطبخ . حستها فرصه حتى تهرب وكامت عالسريع …
لكت هاجر شايله صينيه استكاين چاي محضرتها :- توته بشرفج اخذيهن انه اريد ابلش بالعشه….
جاوبتها وهي تتلفت تدور على اختها:- زهراء وين خليها تودي…
هاجر وهي تحط الصينيه بايدها تجبرها تشيلها:- مدري وين راحت دهاج .. هاج…. اخذتها مستسلمه تعرف هاجر تتعمد تسوي هيج مثل كل مرة ينجمعون هم وبيت عمتها تتصيد الفرص حتى تخليها تتواجه ويه اخوها … هاجر تصير بنت عمتهم زينب وهي اكثر وحده خلت فكره زواج ياقوت من اخوها مترسخه بعقل محمد …
باوعت للصينيه تتمنى تركعها بالكاع وتصعد لغرفتها تقفل لباب لحد ما يروحون… دخلت الصاله … واول ما لمحها غير مكانه وراح كعد بنهايه وحده يسوي نفسه يحجي مكالمه بس تعرفه اكبر كذاب .. تعرفه سوا هيج بس حتى يذب كم حجايه الهه بعيد عن مسامع الكاعدين…. وزعت الچاي وتوجهت اله ابتسامته المائله تخلي معدتها تغلي رفض.. خفضت الصينيه كدامه بدون ما تباوعله عينها عالاستكان همسلها وهو ياخذه ببطئ
سيف:- هلا بهالطير….. لهبت عيونها بغضب وهي تباوع بعيونه الجريئه
همست:- دير بالك لا يوكع عليك الچاي ويحركك…. افتهم تحذيرها زين بس استمر بالابتسامه الخبيثه
سيف :-انه احب احترك بالحار خصوصي اذا من ايدج… اندارت تروح وهو مستمر بكلماته المليانه جرائه:- غزال والحسين غزال وانه صياده….
انهزمت للمطبخ تشغل روحها تحضر ويه البنات ام سيف وامها اجن يمهن ماعدهن هواي تحضيرات لان مشاوي والزلم طلعو للحديقه يحضرون الفحم وعده الشوي ابوها يرش بالحديقه وكرار لازم الماسحه ويخرط بالحوش حيدر ضارب زاويه وصافن بتلفونه وملامحه متوتره ومصطفى يسولف هو وسيف لان صديقه المقرب … اما محمد فاتليفونه مستحيل يسكت ودايما مشغول ويه موكلي …. اما مجتبى خطيه ملتحق بالدوام وبسبب دوامه محروم من هواي جمعات حتى بالاعياد والمناسبات اغلبها ما يحظرها بسبب دوامه
منطيتهن ظهرها يم الكاونتر صارت تعجن لحم الكباب وهي شارده حست على ايد زهراء الي تلزمها من ساعد أيدها تهمس بصفها :- على كيفج شبيج تركعين بالنعمه تركع ترا هذا مو وجه سيف وجاي تكفخين بي …
ضحكت لا ارادي وهي تنزع الجفوف من ايدها:- تصدكين راحت من بالي مرة الجايه اسويها وافرغ طاقتي والماكدر اسوي بالحقيقه اسوي بالخيال…
زهراء وهي تلومها:- انتي خوثه كولي ماريد لبابا وطلعي منها …
ياقوت بحزن:- ماما ومحمد شلون بيهم وانتي تعرفين محمد هاجر من جوا لجوا تدفعه عليه احتمال حتى كليه يبطلني منها ….
فتحت عيونها:- شكد جبانه كل عقلج بابا يخيلهم شبيج بنتي ضبي روحج شويه وصيري قويه …
سكتت ثواني تفكر :- زين عندي اقتراح… احجي ويه سيف.. صارحي كوليله ماريدك هو رجال اكيد ميقبل على نفسه يتزوج وحدة متريده ….
صفنت تفكر بكلام اختها وحست بي نوع من الصحه. هي ابد ما واجهت سيف بالرفض الصريح جانت دائما تتجنبه وهو كان يفهم هذا الشي حياء ودلع بنات …. ميدري هي رافضه فكره الارتباط بي ونفسيتها مجاي تتقبله رغم حاولت تضغط على نفسها…
راحت تغسل ايديها يم الصحيات واجت عمتها وراهه سوت نفسها تغسل بصفها :- توته حبيبتي ما سولفتي اليوم بس ساكته…
رفعت اكتافهه بحركه جهل:- مادري مصار حديث مهم …
ابتسمت عمتها ابتسامه عرفت معناهه وهي تكول:- اليوم ان شاءالله كل المواضيع الحلوة تنفتح كافي بعد انتظرنا هواي خل نفرح وانتي خلصتي السادس….
حست بضربه بنص معدتها وكلبها صار ينبض بسرعه عاليه لدرجه تسمع النبض عالي باذنها … التزمت السكوت ماعرفت تحجي عمتها تحبها هوايه ومجاي تكدر تواجهها بالرفض…..
فرشو سفرة طويله والشباب يشوون وينقلون للسفره الكل يسولف ويضحك وياكلون
اجه كرار شايل شيش تكه لحم متوجه لياقوت:- شلون تكه تكول حلقوم اشتهيتها الج وحط الشيش بماعونها … فكت ملامحها ببسمه واسعه وهي تبوس خده الي قدمه كدامهه :- فدوا لوجهك حبيبي …. كعد بينها وبين زهراء الي تباوعله صفح غيرانه … اخذ خبزه وسوا بيها لفه من نفس الشيش الجابه لياقوت وقدمها لزهراء:- احلى لفه لاحلى ام الزوز عمي انه ماجيبلج شيش واتعبج اسويلج لفات يبعد چلاي…. ضحكت وهي تخمطها من ايده:- ادري بيك جذاب بس راح اعديها ….
رجع التفت لياقوت يشاورها:- شبيج …
عكدت حواجبها باستغراب:- شبيه؟؟؟؟
كرار:_ ضايجه ما سولفتي وتجيبين الاكل منا تودي منا بالماعون منو وياج تكي….
تشكلت دمعه بعينها .كرار يعرفها من نظره مايحتاج تحجي ولا تعبر :- هزت راسهه نافيه:- مبيه شي بس تعبانه وراسي يوجعني…
ماقتنع بكلامهه ووجه نظراته لسيف الي اشاح نظره عنهم بنفس اللحظه:-
ياقوت الشي الماتريدي مايصير… اعرف امي واخوتي وحتى ابوي يضغطون عليج .. بس انه وياج صح اني مو الجبير بس اوكف وياج ..
حطت لكمه بحلكه تسكته:- لا يظل بالك ماكو شي وداعتك بس تعبانه طريق انوب علويه نهله خبصتنه بالتنظيف .هسه اكل وانام واكعد الصبح كلشي مابيه …
بعد ما كفو هوسه العشه دك تليفونها الي بجيبها صعدت لغرفتها وهي تشوف نورهان تدك عليها جاوبتها وهي تسد باب الغرفه:- الووو…
نورهان:- هلاوو ياقوت شلونج وينج من الصبح ادزلج وماكو …
ضحكت وهي تجاوبها:- يواشج يمعودة كتيتيهن كلهن فدمرة.. اسفه حبي والله اليوم اجينه لكربلاء والتهيت بيتنا هنا متروك متروس تراب كضيناهه ننظف واجوي بيت عمتي والتهينه بالعشه …
نورهان:- مممم اي خاتون من الكه احبابه نسى اصحابه …
همست :- يا احباب يمعودة خليها بالكلب تجرح ….
نورهان بتعجب:- اوف اوف اوف صارت بيها گلوب وجروح شكو يمعودة..
حاولت تغير الموضوع:- لا يمعودة بس ودي چاي جيبي ماي هوسه حتى بعدنه مازايرين بابا كال باجر نروح نبات بالامام للفجر نبقى ونرجع …
نورهان:- الله شكد حلو الصبح اخوي ينزل بلكي الله يهدي يودينا لزياره واشوفج ….
ظلن يسولفن شوية وسدته منها بقت متمددة تباوع للسگف تسأل روحها اتجرأ واحجي وياه أصارحه بعدم رغبتي بهذا الارتباط على أمل يتصرف بمروهء وتطلع منه ويلغي هاي الخطبه الي بدت تحاصرها بالسنوات السابقة كلما ينفتح الموضوع والدها كان يأجله بسبب الدراسة وياقوت بعدها طفلة بس هالمره إحساسها يكول والدها راح يقبل والجامعة مو عائق داهم خلوتها صوت أمها وهي تفتح باب الغرفة بعنف رفعت رأسه مفزوعه :-ماما شكو خوفتيني؟
أم محمد وهي تقترب منها تكرصها من زندها وتجرها حتى تگوم :- ماتستحين لابده هنا وبيت عمتج جوا شعندج هنا ادبسزز كومي انجري كدامي ……
فركت زندها بألم والدموع تجمعت بعيونها:-تعبانه ونعسانه ماما والله مبية حيل وهم راح يظلون يومية يجون مو غربة …..
ضيقت عيونها تباوع بعيون ياقوت كاشفتها:-سوالفج اعرفها كلش زين ما يعبرن عليه يبت بطني لج بس فهميني شنو الماعجبج بالولد شهادة عنده فلوس وعندة نسبه نفس نسبج حلو ويحبج ..يحبج يدغمة …….وامة تحبج وشاريتج شراية ……
جاوبتها بصوت مهزوز ودموع تجري:- واني ….اني وين من كل هذا الكلام ماما ليش ماحيه وجودي ليش متجاهلة رفضي ليش مايهمج رأيي ………
أم محمد :- أنتي لوما تهميني مجان وافقت لان خوش قسمة عوفي سوالف الحب والمشاعر ياقوت ماتفيد هذا مستقبل وعيلة وأطفال
ياقوت وهي تگعد على حافة سريرها بحيل مهدود:-مرات احس إني مو بنتج احس نفسي لعبة أنتي تختارين كلشي يخصها …
تجاهلت كلمات بنتها تجاهلت ألمها تمشت بأتجاه الباب تحجي بدون متباوعلها:- گومي غسلي وجهج ونزلي دام النفس طيبة عليج وبطلي دراما صحلها رجل وكالت اعور ياقوت خانم ……
ظلت جامدة بمكانهه عدة دقايق ودموعها جمدت داخل عينها شهكه فلتت من بين شفايفها وهي تكوم مسحت وجهها وتوجهت للحمام غسلت وتوضت على أمل الوضوء يهدي الحرب الي بداخلها لبست حجابها ونزلت الدرج استوقفها صوت عمتها الي تحجي بصوت واضح موجهه كلامها لأبو محمد
أم سيف:- سهلها خوية البنيه وكملت الإعدادية خلينها نعقدلهم مؤمن ونفرح بيهم وهم بينهم يتفقون عالعرس ……. رجعت صعدت راكضه قبل لا تسمع كلام أبوها سدت باب الغرفه عليها مو مهتمه إذا أمها تجي تفلش الغرفة على رأسها وبيومها نامت والدمعه بعينها…..
حست الفجر ببرودة على كصتها وهمسات رادت تحجي بس ماطلع من حلكها غير انين عيونها تحس بيهن جمر وصوت زهراء بلش يصير واضح وهي تحجي يم راسهه:- كرار كوم كعد بابا هاي راح تموت صار كم ساعه نسوي كمادات صايره جمر كوم عفيه…
تقدم منها كرار يضغط على كصتها :- شجاهه وهيج صخنت ..سكت ثواني ورجع يسال زهراء.. زهورة كليلي ياقوت مقهورة من هالخطبه بارحه جانت تسولف وتضحك لحد ما اجو بيت عمتي وهي تبدلت احوالها…
فتحت عينها جبر قبل لا زهراء تجاوبه وهمست بصوت واهن:- مي …اريد مي عفيه…
دفعت الخاولي الي على كصتها ورفعت راسهه .. داهمها الم فضيع ودوار قوي رجعت شمرت راسهه عالمخده بتعب لزمها كرار من ايديها يسندها حتى تكعد وزهراء تعدل المخدة ورا ظهرها وتنطيها مي
شربت وريكها ناشف لدرجه يجكجك بيها وهي تشرب المي
زهراء:- راج اجيبلج لفه اكليها حتى انطيج براسيتول وترتاحين
هزت راسهه رافضه :- بس اريد اروح لتواليت ….
حطت رجلها بالكاع وتحس كل عظمه بجسمها تون عليها ويه اول خطوتين مشتهن تهاوت ووكعت بالكاع لا من ايدها ولا من رجلها فاقده .. عاطت زهراء بخوف وهي تكعد بالكاع تضربها على وجهها وكرار نزل ركض على غرفه امه وابو …. ثواني وهم فوك راسهه شالهه كرار رجعها لفراشهه
ابو محمد بقلق وهو يلزم ايدها:- شجاهه هيج صارت بارحه جنها البخت
زهراء باوعت لامها بنظره خاطفه وهي مقهورة تعرف مرضه ياقوت بسبب امها :- بابا خلي نوديها عفيه للمستشفى ..
هز راسه موافقها :- كومي لبسيها كومي … اشر لكرار يطلع واندار .. نهله لبسيها صايتها انتي وزهراء خل نوديها…
توجهت نهله لياقوت تفحص حرارتها وهي تكول:- ما يحتاج هسه انسبحها بمي بارد وننطيها علاج ميستوجب مستشفى علمود شويه حرارة…
فكت عيونها زهراء :- ماما يا شويه الليل كله تون ونسوي كمادات مداشوفيها فاقده..
انطتها خزرة تسكتها … كرار تعال شيل اختك للحمام …
وداهه للحمام وهي تون من المرض كعدتها امها جوا الدوش بهدومها وفتحت عليها المي البارد زهراء حاضنتها تثبتها … صارت تشهك من برودة المي والشهكات تحولت الى بجي … ظلت على هاي الحاله اكثر من ربع ساعه راحت زهراء جابتلها هدوم وهمست لامها:- روحي ماما اني ابدل الهه
عافتهن وطلعت بدون كلام ساعدت ياقوت ونشفتها وخلتهه تبدل ملابسها طلعت لكت ابوها كاعد بالحولي طمنته عن اختها وطلبت منه يروح ينام صارت زينه ورجعتها للغرفه لكت كرار كاعد ينتظر ….
كعدتها على الجربايه وتعصر شعرها بالمنشفه نهض من مكانه :- انتي هم بدلي هدومج ناگعات وانه نازل احميلها كلاص حليب دافي ….
طلع من دوامه راسه ينبض ما نايم غير ساعتين واليوم جان خفاره واكف بازحام ودك تليفونه
فارس:- هلا…
امجد:- احلف عليك ماعندك عقل ولك مو كتلك نطلع سوا .صارلك شهر متخربطه علومك وتتصفن هواي وتطلع بدون ما تكول
فارس:- نسيت يمعود ماكو شي لا تسويها سالفه يعني واحد ما يصفن وتعبان من الدوام
ضيق عيونه بشك يباوعله:- تضم على امجد ابن عمك انه ولك
فارس :-امجد بالعباس راح اسده بوجهك كلتلك مابيه ..مابيه…
امجد:-عصبيتك تاكد بيك شي بس على راحتك .. سكت ثواني يلا اترخص اخذ راحتك…
فارس بنبره استسلام:- تعال .. تعال.. اللوتي عود يتعزز اعرفك ما تجوز مني الا تخليني اقر خل اوفر على روحي وعليك وتعال للبيت نتريك سوا
ضحك :- اي هيج من الاول ماتجي الا بالعين الحمرة
تنهد تنهيده طويله بتعب خله امجد بحيرة:- افا شبيك تجر حسرات وتتنهد ؟؟؟
فارس:- تعال ونسولف….
وصل بيتهم لكه امه تنتظره مثل كل مرة عنده واجب ويبات بالدوام محضره الريوك وملابسه ورا نص ساعه جان ينشف بشعره وكاعد بالمطبخ يم امه
ام فارس:- شوكت تعرس فارس…
غص بالچاي يضحك:- شسالفه يمه هيج كبل بدون تلميحات …بعد وكت يمه شورانه
هزت ايدها:- تهي بهي ربحنه يمه وانت بالك مو يم العرس صار هواي كافي … العالم تحجي ..
انقذه عن جوابهه باب المطبخ يندك وينفتح وامجد ماد راسه :- حجيه عندج ريوك النه لو نروح لاهلنه
ام فارس:- هلا هلا يمه فوت فوت …
فات باس راسهه وضرب فارس على جتفه بقوه:- ها الدايخ ومضيع علومه..
خزرة بدون ميجاوبه وياشرله على امه الي واكفه تصب جاي لامجد
دخلت نورهان هي وهوستها:- هلا بالفوارس هلا توه نور البيت … شافت امجد ..هاي شنو اليوم ابن العم هنا …
ابتسم وهو يجاوب:- هلا بنوني…
باوعتله مكشره:- بشرفك امجد كول نور .. نورهان .. لا تكول نوني شكلك ميتوالم ويه التكوله….
رفع حواجبه وباوع لفارس:- محد بيكم صاحي انوب اختك تقيس اسماء الدلع عالاشكال شافطه مثلك…
فارس:- انجب ولا تحجي على بزر الكعده…
باسته من خده:- بعد روحي هذا الاخو الزين وكعدت بصفه… فارس نروح لزياره…
عكد حاجبه :- نورهان توني ادافعلج تعبان بويه يازياره …
ام فارس :- يمه شبيج حلمانه…
نورهان:- لا هيج بس صديقتي هناك كلت هم نزور وهم اشوفها ….
ام فارس:- ياهي هاي…
نورهان وهي تحط لكمه بحلكها:- ياقوت يمه
كح غاص يندار لنورهان وامه تحجي:- هاي الشكره الاجت وياج للمستشفى
فارس:- يممممه… لا تحجين بشكل البنيه…
ام فارس:- يبوو شگلت انه…
نورهان:- اي هي يمه ….
ام فارس:- خليها غير مرة اخوج تعبان اول ما طب استلمتي طلبات وانه اريدن اروح لاختج مريضه
كملو ريوك وصعد هو وامجد لغرفته
مددو اثنينهم عالسرير وظلو ساكتين لدقايق لحدما كسر امجد الصمت
:- تحجي لو شلوون….
تنهد يجاوبه:- امجد راح اكلك بس ماريد ملامه … اكو بنيه…. وسكت.. مستصعب يحجي بيها كدام صاحبه….
امجد بزهكه:- لك دحجي شبيها البنيه شلعت كلبي تحجي اقساط…
فارس:- مادري ما تروح من بالي … شفتها مرتين مرة من زمان قبل كم شهر وجانت طريقه تفشل ….
عكد حاجبه باستغراب:- تفشل.. ليش؟؟
عض شفته وابتسم :- تحرشت بيها…..
فك عيونه مصدوم:- تجذب .. ولك فارس .. انت تتحرش ببنيه .. اخلاقك الخابصنه بيها وين….
ضحك بقهقه:- ولك مدري شلون طلعت من حلكي وذبيت الحجايه ويمكن ما سمعتني لان من شافتني المرة الثانيه مجان مبين عليها تتذكرني ….
امجد وهو يكتف ايديه لصدره:- ها حلو يعني لابستك….
جر المخده من جوا راسه وضربه بيها مو توازيني افين حضك… كوم ..كوم روح لبيتك لا بارك الله باليحجي الك…..
امجد:- يخوي چا چذب لابستك ….
انفعل فارس بجديه:- ماتعرفني والبنيه ملتزمه ساعتين كبالي ولا مرة رفعت عينها وباوعت ناحيتي …
امجد :- وين شفتها ؟؟
جاوبه بدون ميباوعله:- اول نوبه بباب جامعه نورهان رحت اجيبها وفاتت من يمي وفلتت من حلكي حرشه وثاني مرة ورا فتره من تخربطت نورهان بالجامعه…..
هز ايده:- عفيه ..عفيه .. تسرسر خويه تسرسر وصچم بنات الناس
فرك وجهه مغطي عيونه ويكمل بضحكه:- انوب طلعت علويه
امجد صار يخرط خدوده مثل النسوان:- يباااووو ولك تركعك بدعوة تطيح حظك طول العمر …
فارس:- امجد كافي هسه تريد تفكر وياي بحل لو تصنف ترا بعد مافك حلكي واحجيلك….
امجد:- يعني بعمر نورهان ؟؟
حرك راسه بأيجاب
امجد بعدم تصديق:-فارس صغيره بكد اختك الصغيره صدك تحجي ….
رفع حاجبه ممتعض:- بعد بعد سويني ابوها ابن الخوش ناس….
امجد :- مدري يا صاحبي هسه انت مادري يعني عاجبتك … وشلون ويه وضعك … وداليا …..
باوعله وباله مشوش:- مادري الوضع معقد….بس الاعرفه اريد حجه صدفه اشوفها بيها….. سالت عنها وعن اهلها سمعتهم چفيه بيضه وكل العالم تحمد بيهم وهي محد يعرفها بالمنطقه محد يشوفها واهلها ساده بس مو حوزة ومعممين يعني مثلنه متدينين بس نسبهم ساده ….
صفن امجد يفكر وضرب على رجل فارس:- خويه انت رايح نابش تاريخهم انوب استاذ فارس حط عينه على بت ساده مبين سالفتك داچه فدنوب شني خويه …..
فارس:- شتكول اخذ نورهان واروح لكربلاء…
عكد حواجبه بعدم فهم:- شكو بكربلاء تروح تدعي يم اجدادها تشوفك..
فارس:- استغفر الله شلون اكوم ابيس بيك .. مو توهه نورهان كالت هي بكربلاء شبيك لخاطر الحسن بس تصنف اريد منك حجايه عدله ماكو…
ضيق عيونه :- اهاااا قصدك الشگره..
فارس:- احترم نفسك
امجد:- شكلت عمي وركص حواجبه بخبث يضحك غير امك تكول شگرة….
كام من مكانه خازر امجد وفتح باب الغرفه يصيح نورهان :- نوني… نونو اجته تركض من جوا
نورهان:- اجيت .. اجيت…
حط ايده على كتفها مرتجي عليها .. ساعه ١٢ حسبي ٣ ساعات وكعديني نروح لزياره وكولي لامي
هتفت بحماس:- عليك الله….
كرص خدها:- جم نونو عدنه…
نورهان:- بعد عمري تعال ابوسك … ونزلت تركض ..رجع سد باب الغرفه وطب ذب روحه على فراشه وغمض…
امجد وهو يهز بيده:- اي اي استخف استخف يالمراهق ….
حطت العبايه على راسهه وهي تنزل من السياره بصفها زهراء وامها وهاجر وابوهن ينطي توجيهات .. لا تتفاركن علوياتي ماريد وحده منجن تضيع ورا صلاه الفجر بنص ساعه نتلاكه هنا عند السياره … اندار لنهله
خليهن على راحتهن يزورن ويشبعن …. اشرتله براسهه بايجاب جهال محمد وياهم رقيه تسع سنوات وهاشم عمره ست سنوات كايدته ياقوت ورقيه بصف امها تمشي…. جانت تعبانه وبعدها اثار الصخونه بيها بس تفرح وترتاح نفسيتها من تزور ….
صارت دخلتهم ويه صلاه المغرب … توضن وصلن وكعدت تقرة ادعيه من كتاب الزياره كالن لامهن راح نطلع بين الامامين وهذا المكان الوحيد الي تخليهن يفترن بدون ما تعارض بقت هي وهاجر والجهال كاعدين بالصحن وعلويه نهله لازم تظل تصلي هواي وتقرا ادعيه وقران …
راحت للامانات اخذن جنطهن وتلفوناتهن هي وزهراء ظلن ياخذن يصور لبعض وسويه
زهراء:- اكلج خل نروح للمحلات اريد اخذ چادر وازوره لحوراء…..
ياقوت بتردد:- خاف ماما مترضه….
جرتها بملل:- دمشي يمعودة علويه نهله اليوم تصلي مال عشر سنوات ليكدام منا لنص الليل ما تعوف المصلايه والتربه ….
توهن طلعن لجهه السوك ودكّ تليفون ياقوت :- الو نورهان….
نورهان بحماس:- هلو ياقوت اني هنا بكربلاء انتي وين تجين للامام اشوفج
اجتاحتها فرحه وابتسامتها ضوت :- صدك ولج شجابج اي اي اني هنا يم محل ال….. اني واختي تعاي تعاي اعرفج عليها واكفين … لزمت ايد زهراء توكفها اوكفي زهراء نورهان صديقتي هنا خل اشوفها …..
ظلن واكفات بالعشر دقايق وزهراء تتأفف تريد تفتر رجعت نورهان دكت وجاوبتها ياقوت وهي تتلفت:- الو نورهان وينج
نورهان:- وصلت هنا ماشوفج وينج لحظه يمكن شفتج شو انداري لجهه الاخرى اي اي اجيت سدي شفتج……
حس نفسه مراهق وهو يكذب على امه من سالته توك نازل شموديك اتحجج بنورهان خطيه من تخربطت ما طالعه كالتله روحو انتم يمه انه امشي لاختك تعبانه
هوبالاساس رايح علمودها يريد هذا الشعور الي اتولد بگلبه يطفى …. عيونها هدوئها ملامحها كلهن طبعن براسه ويحاصرنه كلما يحط راسه على مخدة….. بحياته ما كان مندفع ولا عديم التحكم بمشاعره بس هلمرة غير …… ظلت نورهان تتواصل وياهه وكلبه مسوي معركه دكات بصدره حس روحه جاهل عنده امتحان وماقاري وخايف من العقاب … عقاب التجاهل الي شافه منها بلقائين بسيطات وحديث معدوم عرفت تسيطر بيهن على افكاره
نورهان:- فارس هناك هناك وهي تأشر باتجاه البنيه….
لمعن عيونه وهو يلمحها من مسافه .. فلك طر عدوج من بعيد وتضوي ضوي … وكف مسافه عنهم يمسح حبات العرق الي تجمعت على جبينه من توتره … مرر اصابيعه بشعره يرجعه للوراء بحركات سريعه ويدير عينه كل شويه اتجاهن شاف نورهان تأشر باتجاهه وهي واختها رمقنه بنظره سريعه…
اشاحت نظرها عنه قبل لا يحط عينه بعينها دار وجهه وغمض حيل… هالبنيه بخيله حتى بنظرتها مو بس كلامهه … طلع تليفونه ودك على نورهان واندار اتجاهن بحجه يحاجيها يحس روحه مفضوح وغايته باينه على وجهه بس تمالك نفسه نورهان تباوعله وهي تحجي ىيا بالتلفون
نورهان:- فارس بسم الله توها دقيقه من وكفت ويه البنات…
فارس:- احم طبن جوا بالامام كعدن وسولفن وكفتجن هنا غلط بنص السوك وكدام المحلات طبن حتى اطب انه هم ازور ….
نورهان:- خوش اصلا ام ياقوت واهلها جوا اروح يمهن من تخلص خابرني اطلعلك……
فارس:- فوتن كدامي يلا …..
تحركن يمشن وهي تلم عبايتها يحسها طايره عن الارض شبر بسبب سلاسه مشيها …..
يمشن سوا ونورهان مجلبه بيها فرحانه :- فارس بس كالي تروحين طرت طيور كتله اييي اروح وبالي اشوفج…
ياقوت:- هاي لو نخططلها شهر ماتصير بس ربج يريد يسويها وتسهل ونتشاوف ….
نورهان:- اي والله انوب مليت من البيت شوكت يجي الدوام ….
زهراء:- دخيلج انتن جامعه والدوام حلو الا اني السنه سادس وراح اكابل ست فوزيه …..
نورهان وهي تشاور ياقوت :- لج ياقوت هاي شني اختج فلك مو بنيه … تخبل مثلج…. روسيات عمي روسيات….
ضحكت على سوالف صديقتها:- هسه تشوفين ماما تكولين يا ياقوت يا زهراء ….
نورهان:- فدواتك ربي صاير عدكم احتكار الجمال شويه منه ربي شويه
ياقوت متفاجئه:- صدك تحجين ترا تخبلين عيونج المكحله توكع عشيره…
قاطع كلامهن فوتته فارس من يمهن سلم وتعداهن يدخل الامام من جهه الرجال
زهراء كرصت ياقوت تهمس :- توته بس لا هذا اخوها الي وصلج ؟؟؟؟
اشرتلها اي
زهراء:-يبووو لج هذا حلو وشخصيه خرب اشو حبيته…
فتحت عيونها:- ادبسزز لزمي لسانج حرام…
زهراء:- شكلت يمعودة ان الله جميل يحب الجمال انوب صوته من كال السلام عليكم مال ذوله الطبقه الأرستقراطية ….
كزت على اسنانها:- عيب زهراء عيب فصلتي الرجال تفصل …
دخلن جوا واعادن الوضوء وعرفنها على امهن وهاجر ماجان اكو مكان صلاه بصف امهن ابتعدن عنها كم متره وكعدن يصلن لزمت ياقوت كتاب الزياره وصارت تقره وبلا وعي دموعها تنزل بغزاره تشكي بكلبها تدعي الله يبعد عنها هالزواج ويحنن كلب امها عليها… كملت نورهان صلاه وكعدت بصفها … ياقوت ليش هالبجي شبيجً.. زهراء رادت تحجي بس ياقوت لزمت ايدها تضغط عليها تمنعها….
ياقوت :- مابيه بس اني من اكعد بالامام دمعتي تظل بعيني ومن اقراء الادعيه ابجي بلا شعور…..
بعد ساعه زهراء مددت تاخذ غفوة ونورهان رادت تكوم :- خلي اطلع اروح هسه فارس ينتظرني .. كامت سلمت على ام ياقوت وهاجر وطلعت وياهه برا افترن شويه كدام الباب نورهان تدور اخوها وهناك شافو واكف تليفونه بيده اقتربن منه وصاحته نورهان تأشرله تعلمه بوصولها …. اتسالمت هي وياقوت تودعها وهو اقترب …
فارس:- شلونج علويه….
باوعتله لثواني بدون ما تصد بعينه وجاوبت بصوت خجلان وخافت:- الحمدلله بخير…
اندارت لنورهان:- يلا حبيبي اني ادخل امي تنتظرني .. رجعت حضنتها فرحت بشوفتج …. رجعت باوعتله بتردد :- مع السلامه … وراحت دخلت جوا……
نورهان اندرات لاخوها الي بعده صافن ورا ياقوت الي دخلت جوا اشرت كدامه بيدها:- نحن هنا ….
باوعلها رافع حاجبه:- شكو…
نورهان:- عيونك اتدعبلن وراحن وراهه شبيك فارس…..
فارس:- حلوة….. هواي….
نورهان:- هااااا؟؟؟؟
فارس:- جذب ؟؟.. شكلت .. كلت البنيه حلوة…..
نورهان:- ادري حلوة بس انت شبيك ….
استغفر ونتر بيها:- انتو شبيكم ياهو الحاجاني وكال شبيك …. امشي امشي كدامي ورانه طريق…..
بعد ما قضو الليل بالزياره رجعو للبيت وعقدت العزم اليوم تحجي ويه سيف وتصارحه بلي يدور بخاطرها عسى ولعل الامر ينتهي من يمه وتخلص من هالشده … رجعت نامت وماكعدت لحد العصر… وكالعاده مدام هم هنا بيت عمتها يوميه يمهم … كاعدة بالمطبخ على كرسي وتليفونها بيدها تفتر بالنت بدون هدف …. كلبها يدك بتوتر متعرف شلون راح تكدر تحجي ويا والكل موجودين بعد ما خلصو العشه طلعت للحديقه الجانبيه من باب المنور كعدت هناك …. تفرك بايديها بتوتر تعرفه شافهه وراح يلحكها
نسمه هوا لا هي بارده ولا حاره تتلاعب بالاشجار والسمه صافيه والنجوم تلمع ….
اجاهه صوته الهادئ :- من شنو هاربه الحوريه وكاعده هنا….
غمضت عيونها حيل دايما مشاعره مفضوحه ويعبر الها عن اعجابه اندرات عليه:- سيف اريد احجي وياك بموضوع وكافي تحجي هيج حرام ….
جاوبها وعيونه تتفرس بملامحها:- گليلي يروح الروح….
تنفست بعمق وكلبها يرجف بين ضلوعها:- اني… اني ماريد هذا الزواج….
فتح عيونه ومن صدمته رجع خطوة ليورا:- شلون يعني ما تردين ….
حجت عالسريع حتى ما تتراجع:- ماريدك …حاولت اقنع نفسي ..حاولت اسكت …حاولت اسوي الشي الي يتمنو اهلي بس والله مجاي اكدر
مجاي اكدر اتخيلك زوج ….وشريك حياتي….
بعده بنفس ملامح الصدمه ولمحت لمعه دموع بعيونه دموع جامده ورافضه تنزل رفع ايده وكأنه يريد يلجم حلكها عن الكلام:- اششش … اششش لا تحجين ….. انتي… انتي تحبين غيري…..
هزت راسها تنفي ادعائه :- ما حبيتك حتى احب غيرك … ماحب احد بس ماريد اتزوجك…….
تقدم منها خطوة صوته منخفض لكن غاضب:- لازم لكيتي واحد بالكليه وسيف صار كخه….
هزت راسهه بعنف:- لا والله لا ماكو هيج شي عيب عليك تكول عليه هيج وانت تعرف اخلاقي وتربيتي…. بس اني ماكدر ماكدر اشوفك مثل اخواني ماكدر اغير هالصورة ببالي … ساعدني كوللهم ماريدها طلعلك حجه انت رجال محد راح يضغط عليك…..
مغطي حلكه بيده بصدمه ومبهوت وعلامات الحزن بانت على صوته وعيونه انصبغن دم من القهر :- لهاي الدرجه ياقوت…. لج سنين انتظرج من واحنا صغار وخالي ياجل علمود دراستج .. وجايه هسه تكولين ما اريدن …..
ياقوت:- راح تكللهم ماريدها لو لا….
سيف:- مو انه الاترك حقي ياقوت وانتي حقي … نتزوح وبمرور الوقت راح تحبيني … لج اني احبج والله احبج باني كل حياتي واحلامي وياج
عيونج احلامي ياقوت ……
ياقوت:- بس اني ماريدك والله مو بيدي ماريدك ….
نتر بيها بعصبيه:- غصبا عنج افتهمتي….
قبل لا تجاوبه اندفع كرار من الباب وهجم على سيف ضربه بوكس وجره وتلازم ويا :- شوف لك خاف عبالك اصغر منك اكسرك تكسر شعندك لاحكها هنا …….
تمالك نفسه سيف وهو يمسح الدم السال من انفه:- لا تظل تهوبز ردت احاچيها بكلمه راس لا تقربت منها ولا تجاوزت وراح اعتبرك اخوي الصغير واتصرف بتهور …وطلع……. اندار كرار عليها ينتر بيها:- شكو واكفه ويا هنا هااا…..
نزلت دموعها :-ماكو شي ماحچه شي اصلا توه اجه…..
كرار دفعها من ظهرها بخفه :-طبي وصعدي لغرفتج يلا…..
بعد كم يوم رجعو لبيتهم وصاحها والدها على انفراد دخلت الصالة وطلب منها تسد الباب رجفة سيطرت عليها وأطرافها صارن ثلج طبطب على القنفه بصفة :- تعاي بابا كعدي بصفي …..
انصاعت لطلبه وكعدت بجانبه مسد ظهرها ولزم كصيبتها الي واصلة خصرها وشالها وباسهه مثل كل مرة من يشوفها مسويه كصيبة ….
حركته الي تخلي دموع تتجمع بعيونها تحس بحنان الدنيا كله موجود بابوها :- بابا ياقوت أنتي غلاتج عندي غير أجيتي أنتي وكرار من بعد اخوتج الكبار وجنت أتمنى البنيه واجيتي شلون بنيه جنها كمر ضاوي ومن يومها عرفت انه خطابج راح يصيرون هواي وما راح تظلين جوا جناحي طول العمر فيا حلوة الحلوات أظن عندج علم عمتج تريدچ لسيف من زمان وتدرين بيها تحبج وتعزج والزلمة شاريج كلما يخطبوج ناس مني ويسمعون يخابرني يگلي خالي انه شراي العلويه بعمري كل هذا الكلام أكوله ألج مو حتى اضغط عليج بس حتى تعرفين معزتج عدهم … هذا زواج طول العمر قرارج واختيارج شتكولين بابا؟
همست وراسهه نازل من الخجل :- بابا اني … اني اريد اكمل.. كليه ما مفكره بالزواج هسه….
ابو محمد بتفهم:- طبعا بابا لازم تكملين وهو كالي ذاك اليوم ماعنده مانع تبقون هنا فتره علما تتخرجين وتروحون لكربلاء بعد هناك حلال ابو الله يرحمه وشغله….
ياقوت:- بابا اني اشوف سيف مثل اخويه………
تفاجىء ابو محمد ورفع حواجبه كعلامه تعجب:- جديد الحجي هذا بابا….
هزت راسه :- لا بابا بس اني مايوم شفته غير اخ ماحس اكدر مستقبلا اشوفه زوجي…..
فر سبحته بيده:- فكري يا بابا فتره ورديلي خبر ….لا تنطين جواب بسرعه سيف خوش سيف ….
لزمت طرف كصيبتها تفر بي من التوتر:- بابا اني صارلي فتره افكر وهذا قراري… اني كل السنوات الراحت اشوفه اخ لا غير
مسد ظهرها وملامحه بان عليها الانزعاج :- يصير خير بابا يصير خير روحي بابا اخذي راحتج…….
بعد يومين رجع حاجاهه وجان جوابها نفسه رغم خوفها من ردة فعل امها ومحمد ومصطفى واكيد هاجر راح تزعل بس ولاول مرة قررت ترفض شي هم رايدي لخاطر نفسها …
وبالفعل صار مثلما توقعت كعدت الصبح مثل كل يوم والوجوه ثكيله امها تباوعلها بخزرة محمد ينافخ ومصطفى ما يحجي وياهه وهاجر منفوخه وتذب بسامير عرفت ابوها انطاهم خبر رفضها….كرار وزهراء الوحيدين الفرحانين وابوها مجان اله رده فعل بس تعرفه يتمنى تتزوج سيف بس ماراح يجبرها …….
باوعلها محمد بعين بالغضب :- ست ياقوت… طالع لسانج وصايره ترفضين….
ابو محمد :- محمدددددد… احجي عدل ويه اختك….
محمد بزهكه:- بويه عاجبك … عاجبك تصرفها … ليش ماقابله
ابو محمد:- الزواج ما يصير بالغصب والبنت ما هاويه…
محمد:- شني هاويه وما هاويه واحنه نتنظرها تهوى بويه شهالحجي….
ابو محمد بصوت شبه عالي ينهي الموضوع:- سد الموضوع انه هنا الاقرر بعدني ما متت استاذ محمد ….
محمد:- استغفر الله… عمرك طويل بويه وكام… يلا انه رايح وراي شغل هواي… خزر ياقوت وطلع وهاجر ركضت ورا…
ياقوت ظلت جامده بمكانهه تتبلعم ومتباوع بعين احد .. توهه تريد تكوم ونزل حيدر وجهه مخطوف :- بويه احتاجك بكلمه راس بالصاله…
ابو محمد مستغرب:- تعال تريك ونسولف بعدين ليش ما طالع لدوامك عبالي رايح …
حيدر يلوب يفتر بمكانه:- بويه هسه … هسه موضوع مهم …
اخذه ودخلو الصاله وكلنه صافنين عالباب حيدر شكله ما يطمن ماكو ربع ساعه وارتفع صوت ابو محمد … لا يا طايح الحظ … فتح الباب انركع بالحايط ورافع اصبعه لحيدر الي كاعد وحاط راسه بين ايديه مدنك:- ادبسزز ما تستحي ولك اني هيج ربيتك … تنزل راسي حيدر … ماخفت من الحرام ..
وحيدر ساكت وعلى نفس وضعيته…. ابوي طلع من البيت عصبي وامي فاتت على حيدر وسدت الباب
جرتني زهراء ووكفت يم الباب…حاطه اذنها فوك الخمس دقايق … فتحت عيونها وهي تضرب صدرها
اخذت ايدي وصعدنه ركض
:-شبيج يمعودة شبيج …
زهراء وهي تضرب خدودها بخفه من الجهتين:- مصيبه.. لج مصيبه …. حيدر عنده علاقه بوحده ويا بالدائره وابن عمها لاكفهه تحجي ويا ماخذ تلفونهه وعارف حيدر يحجي وياهه وكايل لاخوانهه وشابعين البنيه كتل ……….
