رواية قانون القلب اقوي الفصل الخامس 5 بقلم رسل احمد
ريض يبو عيون الزرك
شو جنهه وك صارت صدك
فدوة اروح لنظرتك
كل مااصد بيك احترك
حاجيتك ودرت الوجه
امبين اظن مالك خلك
حاجيني سديت الهوه
ساكت ولك راح اختنك
كل ظني مالك بالهوى
وما جربت طعم العشك
هلمرة مو رقم بدون صورة جانت صورته موجودة .. واكف بزيه العسكري وحده من ايديه خلف ظهره ومبتسم ابتسامه هاديه………
شمرت التليفون وكأنه عقرب ولسعها وشهكت حاطه ايدها على حلكها بصدمه عينها رافضه ترمش تريد تستوعب طلع هو فارس اخو صديقتها .. شلون صار كل هذا وشوكت …. كم مرة شافهه ؟.. مو هواي ينعدن عالاصابع… شنو الحديث الدار بينهم… كم كلمه حجو ….. منين هاي المشاعر… وبأرتباك رفعت التليفون ودخلت على صورته تتمعن بيها
سماره الخفيف ضحكته رصعه خده … طوله قيافته …استغربته حست نفسها اول مرة تشوفه…. استغربت مشاعرة.. واستغربت عدم رفضها
كلامه اثر وهز مشاعرها .. بس متعرف شنو تريد… متعرف شتحس بضبط قبول او رفض…. فركت كصتها بتعب .. حيرة اضطراب مشاعر خوف…. نامت وهي تقراهن للمرة الف ….
دوامت ثاني يوم وكلبها دكاته تقره الف تتخيل بأي لحظه فارس يطلع بوجهها… حتى نورهان لاحظت قلقها رفضت تاكل رفضت تتمشى بس كاعده وسارحه… وبلگوة قنعتها تطلع وياهه يشربن شي …. مشت وياهه بغير واهس
نورهان:- كعدي هنا اني اجيب نسكافيه واجي… كعدت بمكانهه تحس بالم يصل بيدها غمضت عينها متألمه تضغط بخفه على زندها البرد يسوي عدها الم…. سمعت شخطه الكرسي وتوقعتها نورهان … فتحت عينها تعدل كعدتها …
حست كلبها وكع بالكاع منتفض ينبض بعنف وهو كاعد كبالها … ظلت تتلفت يمنه ويسره بارتباك
همست:- شدتسوي هنا؟؟؟؟؟؟
ابتسامته راخيه لاحت على وجهه مرجع ظهره ليورا مستريح بكعدته
:-اجيت اشوف نورهان… بس عيونه متفارك وجهها فاضحته بإعجابه الصريح الي ما خفي عليها
التفتت تتهرب من تأثيرة بحجة تدور على نورهان:- جانت هناك وين راحت شالت تليفونها من الطاوله نيتها تدك عليها
رفع ايده ايشرلها :-اتركي لا تدكين عليها هسه تجي …
ظل تليفونها بيدها متعرف شتسوي تكوم.. تظل كاعده كلبها منتفض بصدرها …
اجتها رساله عالواتساب .. فتحتها ورفعت راسهه مباشره تباوعله… لگته مبتسم تليفونه بيده ينتظر رده فعلها
فارس:- خاف عندج شك هذا مو اني … هسه تأكدتي ….
همست وعينها بالتليفون:- شتريد…..
-سلامتج ماريد غير سلامتج… ما اريد منج شي بس ردتج تعرفين البيه…عندي هواي حجي… ياقوت بداعت اعزاز كلبج من احاجيج باعيلي….
— ميصير …
-ليش ميصير..
—لان حرام ..
— الحرام تحرميني شوفتهن….
ياقوت اني زلمه ماحب الف وادور .. اظن نيتي واضحه … والمثلج ما تمر يوميه بحياة الرجل .. اما يصير شجاع وياخذها من حلك السبع اما ياكله الندم طول عمره… وانه مستحيل اخلي الندم يدك بابي
كامت عالسريع تشيل جنطتها تصريحاته اكبر من استيعابهه:- اني لازم لازم اروح .. تركته بدون متنطي مجال يحجي وطلعت من المكان بسرعه
اول مرة تحس بهالضياع.. ماتوقعته يكون جريء ويجي يواجهها بهالسرعه كلشي بيها يرجف حست روحها صخنت وتعبت وتريد تنام…..
دكت على كرار اجاهه صوته المرح:- هاا تكيي….
—كرار تكدر تجي تاخذني…
نبره المرح الي بصوته تحولت لقلق:- شبيج توته…
— مابيه بس احس تعبانه وايدي توجعني وبارده اريد ارجع للبيت عفيه تعال…
— جايج مسافه الطريق….سدته منه ومشت بدون هدف وانزوت بعيد كعدت بغير قسم…… بعد ربع ساعه تليفونها دك .. دكت نورهان هوايه وحست نفسها زعلانه منها لان خلتها بهالموقف وما جاوبت .. دك عليها رقم عرفته رقمه .. مجاوبت ظل يدك بأصرار ودز رسايل:-وين رحتي
صار ساعه ندورج وين رحتي
لا تجاوبيني ميخالف بس جاوبي نورهان…
رجعت نورهان دكت عليها وفتحت الخط بدون متحجي:- ياقوت صدك تحجين گلبنا القسم عليج وينج…..
— نورهان الي سويتي مو حلو.. تعوفيني هيج حتى اخوج يحطني بهذا الموقف… يقبلها هو .. يقبلها عليج اسوي هيج…
نورهان بنبره تبرير:- والله جبرني راد يحاجيج … ياقوت اخوي مايلعب ولا يدور سوالف ماصخه…. اسمعي وقرري…
انجر منها التليفون واجاهه صوته :- يابه اسف وحقج عليه بس ما خليتي الي طريقه رافضه تجاوبين الرسايل وصبري خلص…
— ماعندي كلام وياك … ترا حرام ال حجيته وجبرتني اسمعه حرام..
— حقج .. وانتي ما يلوك الج بس الحلال… بس رجعي لقسمج الدنيا بارده وانتي مريضه مو زين عليج البرد اني راح اروح والله رجعي دخلي لقسمج….
همست :- رايحه للبيت اخوي جاي بالطريق…..سدته قبل لا تسمع رده…
وظلت كاعده بمكانهه تنتظر كرار وبعد ربع ساعه دك عليها كاللها هو بالباب وطلعتله راحت للبيت ونامت .. وثاني يوم ما داومت ولا جاوبت نورهان…….
الايام الي تلتها اتجنبت نورهان قدر الامكان الي حاولت تبرر الهه بكل طريقه بس رفضت تحاجيها وكلامهه وياهه صار مختصر.. ونورهان استسلمت واحترمت رغبتها وما ضغطت عليها وانطتها مساحتها…..
*********
بمكان اخر نزل من شقته يفكر شلون يحل المشكله وبيت خاله كلهم كارهي عقد العزم يروحلهم اليوم وشيصير خل يصير… لگه واحد كاعد على بنيد سيارته… لابس عسكري ويدخن … فتح عينه بغضب وهو يذكره نفسه الي اضارب وياه ذاك اليوم…
تقدم منه شايط وبنفس اللحظه فارس سند نفسه بأيديه على البنيد وكمز من السياره عيونه تتلاطم بغضب عارم تلازم ويه سيف وبحركه دار سيف و لزك وجهه عالبنيد لازمه من ركبته … نزل رأسه بهمس بأذن سيف:- تتسبع على بنات ووولك
سيف يدفع بي يحاول يگوم :- لك انت منين يوميه طافر شتريد شني شعليك انه وخطيبتي انت ياهو الحارك حمامك
فارس بفحيح غاضب :- انه الراح اربيك بدال اهلك الماعرفو يربون زلمه وخلوك تتهجم على البنات.. وولك انت ماعندك غيره تبهذل عرضك بشارع وفوك كل هذا تعوفها متأذيه وتفلت يا جبان …وخر ايده من رگبته وبحركه سريعه لزم ايد سيف ومدها طلع مسدس من صفحته وضرب ايد سيف ضربات سريعه بقبضه مسدسه…. وسيف يتلاوى ويا يريد يخلص ايده
فارس بغضب:- حلفت ..حلفت ايدك الي انمدت اكسرها واجرعك نفس الالم …
نفضه من ايده كأنه شي قذر وتركه ومشى
.. وكع بالكاع يريد يستوعب الصار انحنى بتعب ونفس مكتوم… رفع راسه لفارس الي دار ظهره يمشي لسيارته صعدها وراح …..
…………..
اما ليالي مجانت متوقعه حيدر هيج يقسي عليها يعاملها كأنها شفافه مو موجودة خلت اعصابها تنهار وكلبها يبجي جانت منتظره يسألها يعاتبها وتبوحله كلشي بس ما سواهه ..دگت باب مكتبه بلگوة مسيطره على نفسها اخذت نفس عميق وفتحت الباب بعد ما سمعت صوته يأذنلها بالدخول..
شايله بيدها اوراق متحججه بيهن….
جان منكب ومنغمس بشغله رفع راسه لثانيه لمحها ورجع يشتغل .. اسابيع صارله متجاهلها..شوكت يحن ….
وكفت كدامه لثواني … رفع راسه ببطء ينظرلها :- محتاجه شي اخت ليالي…..
حست بمغص بمعدتها وتجمعت الدموع بعيونها:- احم.. محتاجه ختم على هذا الملف … استاذ حسام مستعجل عليه …
مد ايده طالب الملف بس هي ظلت صافنه عليه همس:- ليالي الملف…
ناولته الاوراق … ودموعها نزلت غصب… مسحتهن بسرعه.. ختم عالسريع ورفعه ينطي الها بدون ما يباوع لوجهها….
انتزعته بقوة من ايده واندارت تطلع …
استوقفها صوته :- ليالي….
اندارت عليه … ذاب الجليد الي بنظراته وتحولت لعتاب وبصوت خفيض:- ليشش؟؟؟؟فهميني ليش….
اطلقت عنان دموعها واقتربت من مكتبه:- تعرف شصار بيه حيدر… اني اجيت اموت بيدهم… شفت موتي بعيني… جبروني… والله جبروني…..
وكف واستدار حوالين المكتب وصار مقابيلها وبصوت متعذب :- ولج شسوي… شسوي گليلي… جنت مستعد اخطبج الف مرة بس هسه شسوي اروح اگل لابوي تعال اخطبلي وحدة مخطوبه … لو اروح اگل لاهلج جاي اخطب بتكم المخطوبه… استدار يفرك بوجهه بنفاذ صبر:- لو انهبج واخلي العار يركبنا لولد الولد…. اسوي شي عكس تربيتي وانه رجال عندي خوات اخاف الي اسوي يطلع بعرضي….
اندفع ناحيتها وهي تراجعت ليورا انحصرت بينه وبين طاوله المكتب … جان قريب .. بدون ما يلمسها وحط عينه بعينها … واول مرة تشوف الدمع تارس عينه… دمع متروس كبرياء رافض يهل
همست بدون ما ترمش :- مو مخطوبه……..
توسعت عيونه وزاد الحمار البيهن:- لا تختبرين صبري ليالي بلگوة لازم روحي عنج……
هزت راسها:- والله … والله مو مخطوبه….بس هذا شرط اخوتي.. اسوي نفسي مخطوبه كدامك وكدام الناس بالدوام….
ضغط على عيونه حيل :-لعبه هي وتسوين روحج مخطوبه كدام الناس….
تهاوت على كرسي جانبي وصارت تسردله:- بيوم الي اجه عمي حاجاني.. كلتله ماريد ابنك.. ماردته وهو اعزب مو عاد من اتزوج وخلف.. وعمي تصرف بقله مروءة وكال تتزوجي غصبا عنج… انهاريت وصرت اتوسل بي مافاد… وخابرتني مرته للحقير تبجي وتتوسلني اسوي اي شي امنع بي هالزواج.. تعبت انهارت اعصابي وانهار ايماني وبلحظه ضعف…. سكتت مترددة… رفعت ايدها وطلعت معصم ايدها وبرزت كدامه ندبه عميقه لونها وردي دليل على حداثه الجرح ممتدد على معصمها….. وكعت دموعها بحضنها وبصوت راجف.. ردت اموت نفسي واخلص… واخلص الكل من الصار… ردت اغضب ربي بس في سبيل انقذ نفسي من بطش هالزواج بس القدر كال كلمته وطلعت منها ….. اياد اشفق عليه وبلكوة قنع مهند وايمن بهالحل هددتهم اعيدها وابليهم…..
فتح عيونه وحط ايده على راسه نتيجه صدمته:- ردتي تموتين روحج ليالي… مافكرتي بيه اموتن وراج… مافكرتي بغضب ربج تموتين كافرة…
وكفت بسرعه تحاول تكتم غضبها وتعبها:- لعد اصير لغيرك.. اتزوج رجال يكرهني همه ينتقم مني واكسر كلب مرته .. اموت روحي احسن ادمر روحي وحدي احسن مادمر كل هذول الناس
واعيدها والله أعيدها اذا رجعو يفكرون يزوجوني ….خلص اني تعبت الي شفته وصار بيه مو قليل واني بشر دم ولحم مو حديد….شكد لازم اتحمل
مسحت وجهها وطلعت من المكتب خلته صافن باثرها العافته
وتجدد الامل بگلبه والعذاب العاشه الاسابيع الراحت وهو يشوفها مخطوبه تبدد….
***************
وبيوم شتوي مغيم بس دافي راجعين من الدوام هي وحيدر الحيرة الي عاشتهه الايام الفاتت ارهقتها كلما تحاول تبعده عن افكارهه تلكه روحها تفكر بي وبكلامه ورسايله …اول ما طبو البيت اجتهم اصوات عاليه من صاله الضيوف…
تبادلو هي وحيدر نظرات الاستغراب …
وبنفس اللحظه انفتح باب الصاله الخارجي وبرز منه سيف… مضروب ملابسه مبهذله وصدره يرتفع ويهبط بتنفس غير منتظم… وايده مجبرة مكسورة …
شهكت حاطه ايدها على حلكها من منظره وتراجعت ليورا بخوف ۚ بنفس اللحظه هجم عليه حيدر نام فوكاه يضربه اقوى ماعنده وهو مستسلم ابد ما قاوم ولا دافع عن نفسه طلعو الولد وابوها من الصاله يحاولون يفكون سيف منه ….
وهي تسمرت بمكانهه مثل التمثال….
والمشهد الي بباب الجامعه صار ينعاد ويتكرر كدام عيونها … شالت ايدها السليمه ومررتها على ايدها الي صارلها اكثر من شهر معلكه على كتفها …
ودموعها صارت تهل بسخاء…
محمد صار حاجوز بين سيف وحيدر ومجتبى وكرار لازمين حيدر ومصطفى ماخذ وضعيه المتفرج بباب الصاله …
كام وكف يمسح انفه النازف بظهر كفه… باوع حواليه وكأنه يبحث عن شي معين ….. باوع لياقوت … عينه رخت بحزن ونظراته تنزل على ايدها …. عيونه محمله اطنان من الذنب والاعتذار..
اقترب كرار من ياقوت يحاوطها بذراعه:- امشي يبعد چلاي فوتي جوة…. طيحنه حظه وماخلص حسابه .. شاورهه .. شبع طن كتل …..
اتعدت سيف ودخلت من باب المطبخ …. وانهارت بالبجي .. صارت تبجي بصوت وزهراء حضنتها …
باوعت لامها بعيون متعذبه تشكيلها نارهه واذيتها..
اقتربت منها وذبت نفسها بحضنها .. طبطبت علويه نهله على ظهر بنتها بدون ولا كلمه… دخلت عمتها للمطبخ عيونها مدمعه ووكفت بباب المطبخ الخارجي:- كافي عليكم الحسين ماخليتو بي عظم صاحي ما كفاكم ايده الانمدت عليها انكسرت.. اجاكم برجله يريد يحجيلكم الصار .. ويبرر
ابو محمد:- ماكو مبرر.. الي يضرب مرة مو رجال… الي يتهجم على بنيه بنص الشارع مو رجال.. ….
سيف انفعل وصرخ :- ماضربتها.. والله ما ضربتها…. حتى اسألها … كليلهم ياقوت .. انه ما ضربتج…
لو ما ذاك الخسيس يضربني چا ما وكعتي…
احجيلهم الصار اجيت احاجيج اسألج ليش رافضه….
بس هذاك الكلب ابن الكلب تهجم عليه مثل الكلب المسعور…
اندار للولد يبرر الهم:- هذا الزلمه مو خالي… حاط عينه على اختكم .. والا ليش تهجم عليه وهو كلشي مايعرف… ليش دفع تكاليف المستشفى ليش صادق حيدر بهالفترة بسرعه… ليش دخل بيتكم… ليش كسر ايدي ويكلي اكسر ايدك الي انمدت واجرعك نفس الالم ..لانه حاط عينه عليها وحب يبيع مراجل كدامها ……
حيدر :- سكتو… سكتووو لا اجرم بي…..
مصطفى:- ليش لان كال الصدك….
حيدر بزهگة:- يا صدك… يا صدك فهمني… شنو الشفتو من الزلمه… وهو گاللكم وين ما اشوفه اذي لو نسيتو اخته جانت ويه ياقوت…..
رجال محترم … محترم استاذ سيف لو صعب عليك تعرف الاحترام… بعدين بنيه ورفضتك قسمه وماكو … تريد تسال ليش رفضتك تجي هنا كدام اخوتها واهلها … مو تروحلها لدوامها .. يا ابن الاصول يابن سيد قاسم…. ابوك لو عدل جان فر راسك بطراك ينزل ماي العمى بعيونك…
اندار محمد لياقوت اقترب من باب المطبخ حجه بهدوء:- سالفه الرجال سهله … اذا كلام سيف صدك وفكر يجي يخطب ماله مرة عدنه ونرفضه ويا دار مادخلك شر مو علويه ياقوت لو شتكولين؟؟؟؟؟؟؟
بلعت ريكها تتذكر اعترافه الي اعلن عنه وجيته للكليه قبل ايام وگلبها وجعها تعلكت عيونها المغوركه بعيون محمد تباوعله وهزت راسهه موافقه على كلامه….
اندار على اخوته حاط ايده بجيبه… مو احنه الي ندخل زلمه بيتنا لان عينه على عرضنا … وان سواهه يحلم ننطي مرة…
حيدر:- جا سيف لازم يطلع وبعد بحياته ما تخطي رجله عتبه بيتنا .. مو هو الرايد عرضك من سنين لو انه حلمان….
محمد:- سيف ابن عمتك يعني عرضك وعرضه واحد .. بس اجي وياك … باوع لسيف… مالك مرة عدنه بعد الصار وهذا البيت يتعذرك خلينا اخوان واهل وسدو سالفه هذا الزواج ..
اندار سيف لخاله يستنجد بي:- خااالي.. احجي شي…وينه وعدك لابوي… وين كلمتك سيد حسن….
ابو محمد بغضب مكتوم:- ماكو وعد ولا كلمه فوك بنيتي .. دامها رافضه والصار بيها حافر بگلبي ولك سيف لوما انت ابن اختي اخلي اخوتها ينهشون لحمك…
بنيتي هاي بزرة الدلال … المايوم رفعت صوت ولا ايد بوجهها هي واختها … يخابرني الغريب يكلي بنيتك مكسره وبالمستشفى…الغررريب ولك سيف
دموعها والالم والونين الي ونته وهي بفراش المستشفى ماكو كلمه ولا وعد تنسينياهن……مالك مرة عندي يبن اختي
اقترب من خاله يبوس ايده:- شسوي وتسامحني كلي.. ما جنت بوعيي جنت معمي.. مقهور وكلبي مكسور والله خالي رايدها .. اموت.. والحسين اموت …
كرار بزهكه:- الزم لسانك واحجي عدل .. كدامنه تحجيها.. مو اكوم هسه ابيس بيك وانه كلبي محمل عليك….
مجتبى:- كاافي سيف كافي واتچفى الشر وروح يا اخي كافي طلعتها من ماعونها …..
لبست عمتهم زينب عبايتها وصاحت ابنها :- امشي نروح .. احفظ الباقي من ماي وجهك وليدي… انعل ابو العشك الي يذل صاحبه .. كوم الف وحدة تتمناك والله لازوجك تاج راسها…
حيدر بأنفعال:- تاج راس منو عمه… ياقوت.. تاج راس ياقوت …اختي ال…..
قاطعه ابو محمد بحده:- اسكتتت حيدر….وانتي خويه فوتي جوة وعوفي سوالف الزلم …
ام سيف:- لا والله اطلع ورجلي على رجل وليدي البيت اليتعذر ابني يتعذرني..
ابو محمد:- ياخويه ليش تخربين خوتنه والغلط راكب ابنج من ساسه لراسه….
كتلج انه زينب كتلج من زمان.. اتركي هالزواج ترا خوتنه تخرب.. بس ركبتي راسج…
ام سيف:- ردت بنيت اخوي اولى من الغربية احبها واريدها لابني وابني رايدها.. ردت دمنه يظل لولد الولد مايطب دم غريب بينا بس الظاهر ماكو تقدير… طلعت وجرت سيف من ايده … صعدو سيارتهم وانطلقوا…….
صعدت لغرفتها تجر بروحها جر كرهت نفسها .. اتمنت لو رب العالمين ما خالقها… مددت بفراشهه بملابسهه حتى حجابهه ما نزعته ….
انفتح باب غرفتها بعنف ودخلت هاجر عيونها متروسه دموع صوتها يرجف غل:- ارتاحيتي… ارتاحيتي هسه كله من وراج
حتى اهلي انحرمت من جيتهم بعد ما يجون عليه.. ولج منو واكعلها يعشكها واحد عشك جنون …ذل روحه علمودج وانتي شايله خشمج الصفيره ….
غمضت عينها متجاهله كلامها
اقتربت منها اكثر تكمل بث سمها:- ساكته .. ساكته ام الفواين… اكص ايدي اذا ماعندج شي ويه هذا الزلمه … والايام تثبت….ولج شعنده متربص لسيف وكسر ايده هاا ….ساعتها يا ياقوت كتلتج تصير عمل شعبي……. فلك الي يفلكج فلكتي بينا مسويه روحج فقيره وانتي كل مصايبنه من ورا راسج
طبت زهراء مكتفه ايديها:- عوفيها وطلعي لو مشتاقه لراشدي محمد حابه تجربي مرة ثانيه….
اندارت عليها هاجر :- زمو العرمه .. انتي صبريلي والله الا اطيح حظج محد قره براسهه وفرها على سيف غيرج…
اشرتلها زهراء تطلع:- دروحي روحي بلطي البحر شلون اخاف منج اني …اذا ياقوت تسكت اني اغسلج واشرج عالحبل ….
طلعت هاجر تغلي وطبت لغرفتها راكعه الباب بكل قوتها…
سدت الباب زهراء وكعدت بصفها :- مو كافي دموع وبجي…
ياقوت بصوت باكي وخافت:- اعترفلي زهراء دزلي رسايل يعترفلي بمشاعره.. واجه للدوام ماخليته يحجي وخفت .. والخفت منه صار…
زهراء:- شدزلج….؟؟؟؟
مدت تليفونها لزهراء.:- فتحي الواتساب…..
فتحت الواتساب وقرت وحجتلها موقف السياره وجيته للكليه…
ابتسمت بفرح وهتفت:- عزا ياقوت شلون كلام حلو.. غركان للهامه سياده النقيب … ولج مدور سيف ورايح كاسر ايدة علمودج
هتفت بتعب :- وانتي عبالج السواه صح… زيد الطين بله وفتح عيون الكل عليه ..تصرفه متهور وصارت تبجي اكثر
اخذت التليفون من ايد زهراء وبتهور دكت عليه… من اول رنه فتح الخط عبالك ينتظر اتصالها جاوبها بلهفه:- اني بحلم لو علم
— ليش هيج سويت ليش؟؟؟؟
جاوبها مستفهم:- شسويت؟؟؟؟
— ليش مسوي هيج بسيف ليش هالاسلوب؟؟؟
نبره صوته احتدت:- حمدي ربج رأفت بحاله وبقيتله الثانيه بعدين شني مقهورة عليه ؟؟؟؟
— طبعا انقهر مهما يكون ابن عمتي والي سويته جابلي شبهه يخلي المقابل يفكر عندي شي وياك واني الي اتحمل عواقب فعلتك …عوفني بحالي…
انخفضت نبره صوته :- علويه ماكدرت اجرع السوا بيج… منظرج وروحج الساحت كدامي خلت عقلي يطير ردت اجرم بي وكوة لزمت روحي عنه ….
— معليك .. معليك.. ساعدتني بيومها ما انساهه الك وفضلك فوك راسي طول العمر بس يا اخي اتركني بحالي دتسويلي مشاكل واتحمل ملامه اني في غنى عنها.. ..
سألها :- منو لامج… منو زعلج؟؟؟؟
— بعده يسألني .. اتصلت بيك بس حتى اكلك .. انت مو تريد جواب لمشاعرك… اني رافضه .. وما ابادلك شعورك .. وارجوك ارجووك ابتعد عن طريقي .. خليتني اطلع عن اخلاقي واتصل
الخيبه جانت واضحه بصوته:- يجرالج علويه اهدي….
همست متعذبه من اسلوبها اكثر منه:- مع السلامه……
عصرت موبايلها حيل ودخلت بنوبه بكاء ماعرفت تبررها
زهراء تباوعلها تقره مشاعرها الي هي عجزت تفسرها لنفسها وتخاف تعترف بيها :- لشوكت تظلين هاربه لشوكت تكبتين مشاعرج حتى عن نفسج ليش تخافين تحبين ياقوت الحب مو حرام والرجال مبين رايدج …..
— لج زهراء ليش تخليني اموت نفسي هسه ما سمعتي اخوج جوا دتشوفين الوضع يسمحلي افكر بشي مو عاد اتجرأ واحس .. ليش ادخل روحي بشي مرفوض مو كافي الملامه بسبب رفضي لسيف انوب اثبت كلامه عليه..
لزمت تليفونها وبقلب رافض فعلتها بس مسحت رسايله وحضرته ………..
انغمست بالامتحانات ابتعدت حتى عن نورهان وفارس ابد ما حاول يتواصل وياهه عمتها زعلانه على زعله ابنها وهي بنص تحس روحها طوبه ويشمرون بيها بينهم… يحملوها مسوولية رغباتهم الي يريدون يفرضوها عليها .. حست روحها طير بري بس محبوس بقفص وهذا القفص هو نهايتها ….. خلصت الامتحانات ورجعت لعذاب افكارهه
والدوامه الي هي بيها تتفقد تليفونها كل شويه بلا شعور منتظره منه رساله… سألت نفسها ليش دتنتظر منه رساله بأي حق وبأي صفه .. هي رفضته وهو تقبل هالشي… بعدين منين يراسلها وهي حضرته …… وبأصابع ترعش اتصلت بنورهان بعد ما جافتهه وخشنت خاطرها ….
نورهان:- همزين حن گلبج يام گلب الحجار….
—ابتسمت بحزن:- اني گلبي حجر؟؟؟ رحم الله والديج ….
نورهان:- اييي حجارة مصلبخه هم …..
— نورهان ممكن نسد كل المواضيع الصارت ونحجي عادي…
نورهان:- براحتج حبيبه براحتج … شلونج…
— تعبانه وضايجه صارلنه اربع ايام معطلين ومليت ..
نورهان:- اني هم مليت بس ملتهيه ويه زيون شويه.. اختي يمنه…
— ترددت تشكي الهه بس تحس تريد تفضفص:- نورهان…
نورهان:- ها عيني…
— تسلم عينج.. ترددت لا هيج ماكو شي.. بس حبيت اسلم عليج …
نورهان:- تعاي تعاي احجي شبيج…
تنهدت بتعب:- بابا يريدنه نروح لكربلاء.. لبيتنه هناك..ويريد يصالح عمتي لان زعلانه صارلهه فتره ومقهور من يومها لا تخابره ولا تجاوبه …
نورهان:- خطيه حقه بعد اخته الوحيدة …
—بسببي نورهان بحياتهم ما اختلفوا او تزاعلوا.. احس روحي سبب كلشي صار الفتره الراحت …
سكتت نورهان ثواني :- لا حبيبتي انتي شعليج المفروض هم يفتهمون قرارج ويحترمو ويعرفون الزواج مبي خاطر حتى لخاطر فلان وعلان توافقين…..
جاوبتهه بحيرة:- دافكر اوافق خلص ارضى بنصيبي سيف مو سيء ويحبني يجوز فعلا مثلما كال ورا الزواج تتغير مشاعري..
هتفت نورهان بتفاجئ:- دير بالج ياقوت شبيج تخبلتي .. ابوج واهلج قبلو وسكتو انتي شبيج تردين توافقين …..
— جاوبتهه بحسرة:- تعبت اشوف الملامه وعدم الرضا بعيونهم امي ساكته بس نظرتها تحجي محمد ومصطفى معاجبهم حتى يطلون بوجهي هاجر محملتني ذنب اهلها ما يجوها ابويه اشوفه يضغط على نفسه حتى ما يجبرني ومقهور لزعل اخته …
نورهان:- فتره وينسون وترجع الامور طبيعيه بس دير بالج تسويها ياقوت سيف مخبل نسيتي شسوة وشكد هدد هذا ما متزوجج وهيج لعد اذا تتزوجين وصار بينكم خلاف شيسوي مبين ميعرف يتحكم بنفسه ….
زفرت بيأس:- خلص سدي الموضوع بس حبيت افضفص الج ..
نورهان بتردد:- ياقوت … ترا فارس… زعلان كلش .. حتى للبيت قليل يجي… ليش رفضتي….
— نورهان عليج الله سدي هذا الموضوع يعني انتي تعرفين وضعي وتسألين …الله يدزله بنت الحلال الي تسعده اني ما اوالمه ……
نورهان:- براحتج بس والله….
قاطعتها بحدة :- بدون بس وتلوميني من ابتعد عنج خلص نورهان ارحميني والله تعبانه ليش محد يفكر بيه ….خلي اروح
نورهان:- خلص هاهيه يمعودة سكتت….تعاي متروحين
كملت سوالف مو مهمه وياهه وسدته منها ونامت مجانت متوقعه الي منتظرها ثاني يوم…..
جان يوم عادي كعدوا صبح تريكوا نظفوا تغدوا كلهم سوا اليوم جمعه والكل بالبيت صعدت لغرفتها تنام الظهر ….حست على صوت زهراء الي تهز بيها :- تووته .. ياقووت لج دكومي… كومي شوفي شصاير…..
فتحت عينها بملل تحط راسهه جوا المخدة:- دعوفيني اناام ..
زهراء:- لج كوومي فارس جوا هو وعشيرته…..
كمزت من مكانهه مخترعه:- ش..شنو .. شعنده …شكو؟؟
زهراء:- توهم طبو ولج بدون موعد بدون كلام چفتونه چفت بحيث بابا بسرعه يادوب لحك يبدل ويستقبلهم جان نايم….
— غير افتهم شيريدون؟؟؟
زهراء:- توته شبيج يعني شيريد مبين جاي يخطبج يالعوبه…
صارت ترجف توتر وخوف وصابهه مغص :- ليش سوة هيج اني كتله ماريده ليشش……
زهراء:- الظاهر حب يجرب حظه….
— نزلي شوفي شنو الصار اني ما انزل علويه نهله وعلويه هاجر يحطني بنص ويدكني …
نزلت زهراء جوة وهي ظلت تفتر بالغرفه تاكل بأظافرها وكل شويه تحس بخبطه بمعدتها من التوتر….
مرت اكثر من ساعه وسمعت اصوات تجي من البلكونه مالتها فتحت الباب بدون ما تفتح البردة تسمع ناس تسلم على ناس .. اخذت نظره خاطفه سيارات هوايه بشارعهم شافته يمشي على كيف لابس قاط اسود… وحيدر يمشي بصفه ايده على كتفه ملامحهم جامدة بدون تعبير ….
سدت الباب وطبت بفراشهه .. وبعد اقل من ربع ساعه سمعت صوت محمد هز البيت :- لج يااااااااقوووووت….. ارتجفت اوصالها رعب من نبرته المخيفه وصابتها قشعريرة وكلبها تحسه راح يطلع من بين ضلوعها كرر صيحته الغاضبه:- يااااااقوووووت انزززلي انزرعي كدامي…
كامت بخطوات خايفه طلعت من غرفتها ونزلت الدرج ببطىء تحاول تأجل المواجهه قدر الامكان.. لكت كل اهلها متسطرين وكاعدين بالوسطاني اتجنبت النظر بعيونهم وهم وعينهم عليها ..اقترب محمد منها مكتف ايديه خلف ظهره وكأنه يمنع ايده من فعل مؤذي انحني لمستوى وجهها ونبض بارز بفكه
:- اليوم اجه النقيب اخو صديقتج جايب مشيه وخطبج علويه..
نزلت راسهه ورفعت ايدها تحط شعرها خلف اذانها الكل ساكت حتى ابوها كاعد على القنفه يتابع بصمت اردف محمد:- حضرتج عندج علم ؟؟؟؟
هزت راسهه بسرعه تنفي:- مادري والله مادري….شلون ادري اصلا
ضيق عينه بشك:- صاحبتج ما كالتلج؟؟
هزت راسهه بعنف:- والله لا …
فرق شفايفه يريد يحجي بس ابو سبقه:- كلمن لغرفته وياقوت تعاي وياي لصاله الضيوف عندي حجي وياج…..
اخذها من ايدها ودخلو الصاله سد الباب واشرلها تكعد كعدت مقابيله شابكه ايديها وتعصرهن بتوتر….
ابو محمد:- بابا رفعي راسج وباوعيلي….
بلعت ريكها وباوعت لابوها حجه بصوت هادي:- بابا اليوم اخو صديقتج اجه خطبج… بغض النظر عن دخلتهم المفاجئه الي ماعجبتني بس لازم انطيج علم … حقج تعرفين الصار….
هزت راسهه تماشي كلامه
اردف:- بنتي الولد امانه الله خوش ولد مرتب بس اكو هواي شغلات لازم تعرفيها… فرق العمر يا بابا مو قليل… بعدج ما تناوشتي العشرين وهو عمره فوك الثلاثين سنه.. والموقف الصار بينه وبين سيف …
ما اكلج سيف ماغلطان بس يعز عليه انطيج لزلمه فزعلج ضد ابن عمتج .. اخاف تتعيرين بي بيوم …. وهو محسوب عليج كدامهم .. …
ابوها يعددلها الاسباب وحست برغبه مريرة بالبكاء…
ختم كلامه ابوها :- انه مستحيل احجي كدام محمد واخلي يشيخ عليج بس اخوج ما راضي وانه ما احب انطيج واخوتج ما راضيين ومحمد چبيري يعز عليه اتعداه…
ومع ذلك فكري انطيج منا لنهايه عطلتج فكري ورديلي خبر….
مجانت محتاجه تفكر ابوها وصل الها المعلومه كلش زين ابوها رافض بس مايريد يكولها بصريح العباره وخله كدامهه الاسباب حجه .. تعرفه ما يفوت بشي بي عرضه خاصه اذا محمد معارض….
ياقوت:- بابا ميحتاج افكر اني ما موافقه… ماريد اتزوج .. اريد اكمل كليه وابقى يمك….. شافت شلون ملامحه انفرجت الراحه بانت على وجه …
حط سبحته يفركها بين ايديه :- اخذي راحتج بابا ويصير خير ان شاءالله…
فتحت باب الصاله وطلعت كلهم جانو مركزين ناحيه الباب تمنت لو تنعدم المسافه بينها وبين غرفتها وتنام بفراشهه بدون متشوف احد … تمشت ناحيه الدرج تصعد واول ما سدت باب غرفتها تساقطت دموعها مثل المطر
تحس بغصه بگلبها ….
ظلت حابسه نفسها تتصفن ومرت ببالها من كاللها (الحرام تحرميني شوفتهن) ابتسمت وبنفس الوقت بچت … بقت بغرفتها لحد الليل لا طلعت ولا احد اجاهه تركوها براحتها تخوض الصراع بين گلبها وعقلها
اندك باب غرفتها وانفتح شافت كرار يمد راسه مبتسم .. عدلت كعدتها تمسح وجهها وتبتسم ابتسامه چذابيه …. فات كعد بصفها … تنهد بصوت عالي وضربها بوكس خفيف على زندها:- عود صايره مرة والناس يتخطبوها ام عطوب الصفر…..
ضحكت:- اي سوده عليه …..
اتبددت ابتسامته وتحولت ملامحه لجديه:- ياقوت انتي موافقه؟؟؟؟؟
خافت يكشف جذبها .. خافت وهو مشاطرها الروح ويعرف بيها وحافظها مثل چف ايده…
باوعت ليكدام متجنبه النظر بعينه:- كلت لبابا ما موافقه….
كرار:- تدرين انه الزلمه عاجبني…. اشوفه مناسب… اكول لو تفكرين زين
سكتت ما تعرف شنو المفروض تجاوبه …..
كرار:- شو ساكته توته شبيج يبعد چلاي….. عبالك انطاهه الاذن تطلق العنان لدموعها …. حضنها يمسد على شعرها بدون كلام….بچت لحدما جفت دموعها ..
رفعت راسهه تحجيله:- اني تعبت كرار تعبت من الضغط الي صار عليه تعبت اتحمل تصرفات غيري تعبت اتحمل ملامه هاجر وعمتي وامي ومحمد ومصطفى علمود سيف… والراح اتحمله لان اجه انسان خطبني … ماريد اتزوج بس اريد ارتاح من المشاكل……
هز راسه بتفهم :- حقج … يلا ينسون وهاجر تدرين بيها هي تس .. شبيج مسويه اجواء والا احنه شعدنه بالبيت لا عركه لا هوسه لوما هي اعتبريها ملح البيت …
خلاهه تضحك غصب
ضربها على رجلها وكام .. كومي خل ننزل جوا ونسوي تعلوله ونلعب بلي شتكولين جبتلج طن حلويات إلي تحبيهن كلهن….
هزت راسهه موافقه ونزلت ويا للمطبخ سوت فواكه وكرزات وچبس وحطتهن بالصاله الوسطانيه مطفين الضوة وكرار جاب البلي من غرفته وشكله عالتلفزيون نزلت زهراء كعدت ومجتبى وحيدر ومصطفى عمرله نرگيله مدام الوالد نايم وهو وكرار متگابلين عليها …… ياكلون ويلعبون بلي وكرار يدردم من يخسر…. نزل محمد لازم تليفونه ويكتب اجت عينه بعين ياقوت وابتسم عرفت ابوها مبلغه برفضها … شاركهم الكعده وصار بصفها …. حط ايده على اكتافهه محاوطها وشاورهه:- عرفتج ما تفشلين اخوج …. ابتسمت ابتسامه واهنه… وكملو سهرتهم ….
راحت للدكتور وخففلها الضماد الي بيدها ونزلها من الحامله الي على كتفها واكتفى بباندج بس وصاهه ممنوع تشيل بيها ثكل حتى لو تليفونها منا لكم شهر …ارتاحت شوي وحست نفسها تحررت جانت متقيدة… حاولت تتجاهل الالم الي بكلبها اتجاه فارس والخطوبه ومتعرف اذا ابوها رجعلهم جواب الرفض لو لا ومستحيل تسأل…
راحو لكربلاء وعمتهم مامرت عليهم وهالشي قهر ابو محمد .. راحلها للبيت واجه جايبها ويا .. هاجر فرحت ومكيفه بأمها.. سلمت عليها ياقوت وماجانت عمتها الي تعرفها.. والزعل جان مبين عليها … حاولت تغلس ومتنطي للموضوع اهميه وبمرور الوقت تنسى وترجع علاقتها مثل قبل.. سيف ما شافو ولا بين وهالشي جان بتحذير من الولد….
كملو عشه وصعدت هي وزهراء لغرفتهن زهراء جايبه كتبها وتقره وياقوت حاطه سماعات بأذانهه وتكلب بالانستغرام…. طلعت من الانستغرام وفتحت اليوتيوب رغم هي نادرا تسمع اغاني بس كتبت بخانه البحث سلامات…ابعث سلامات
مددت مغمضه وهي تتمعن بكل كلمه …. وشهكه بچي طلعت منها…حطت ايدها على حلكها تحاول تكتم قهرها .. .. اقتربت منها زهراء.. طلعت وحده من السماعات من اذن ياقوت وحطتها بأذنها تريد تعرف شنو تسمع وخرتها وحضنتها بدون كلام .. وهي انهارت تبجي
مسدت زهراء على ظهرها ودمعتها نزلت ويه اختها:- ياقوت احجي ليش تضمين بكلبج.. كوليها … عالاقل اعترفي لنفسج مو لاحد ثاني….
طلع صوتها متقطع من بين شهكاتهه:- اح.. احبه…. ماعرف شوكت وشلون بس احبه …..ورجعت غاصت بنوبه بچي بدون ما تنطق كلمه اخرى..
ظلت بحضن زهراء والاغنيه تنعاد باذانها لحد ما نامت ودمعتها بخدها ….
حست على صوت تليفونها يدك باذانهه .. ومن صحت انتبهت السماعات بعدهن باذانها وموبايلها يدك .. الغرفه غركانه بالظلام وزهراء نايمه … رفعت الموبايل نورهان تتصل والساعه بالاربعه الفجر انفزعت شبيها تدك هسه…..
فتحت الخط علامات النوم بصوتها:- الوو..
اجاهه صوته:- احلفج لا تسدي….
رفعت نفسها تكعد فاتحه عيونها على وسعهن وكل لشتهه صارت ترجف :- ف .. فارس!!!!!!
زفر بصوت عالي:- شحلات اسمي بحلكج…..
— شتريد عفيه….
فارس:- اريدج….
— صعب …
فارس:- احب الصعب.. ما يستهويني السهل …. ليش رفضتي؟؟؟
— ماحب ازعل اهلي واهلي مو راضين…
فارس:- يعني انتي راضيه؟؟؟؟
سكتت
صوته يتوسلها :- ياقوت ليلي ما جاي انامه… من حيدر كالي رافضه حسيت روحي تايه…ماريد اضيعج مني
ظلت ساكته
فارس:- ياقوت انة حياتي ما جانت ورديه … ولا سهله … حملت مسوولية امي وخواتي بعمر صغير… ابوي مات وعافلي ام… واخوات صغار… وجبت سنين عمري فاني الهم… صرت ووصلت حتى اسندهن .. ماعشت مثل المراهقين ولا الشباب… الجانو يطلعون يلعبون وعدهم شله … ويسهرون… جنت اشتغل وادرس … ماردت شي لنفسي طول عمري .. لحد ما اجيتي انتي كلت اييه يفارس ضحكتلك الدنيا .. راح تعيش لنفسك بيها … راح تاخذ شي لنفسك واخيرا …
قاطعته :- فارس الله يخليك لا…..
رجع هو قاطعها :- لا تحجين شي بس اسمعيني وراهه احجي التردي…
انه عطشان ياقوت صارلي سنين عطشان…انه عطشانج ارويني من بحر عيونج حتى اصبر روحي عالجاي … گطره منج تروي سنين العطش المرن بيه …
جاوبته:- انه بحر مالح ما يروي عطش ولا يفيدك مايي شوفلك نهر عذب يرويك
اهلي ما راضيين وصعب اسوي شي هم ميريدو
فارس:- ماييج عذب چن نهر وجاي من الجنه كل ملوحه مابي گليلي ماريدك…. گليلي گلبي ما دك الك واوعدج ما اضايقج طول العمر ولا تسمعين مني بعد حرف….
سكتت.. تفكر… بأهلها الرافضين ….بگلبها الراضي…
اجاهه صوته متعذب:- لا تسكتين احجي ..
ياقوت:- ماكدر اتجاوز اهلي افهمني….
فارس بنفاد صبر:- ما جاي اسألج عن اهلج جاي اسألج عنج عوفي اهلج … اهلج مشكلتي اني اقنعهم… اريد اعرف ورا هاي العيون التخجل من تشوفني اكو شي لو لا ولج شلعتي افادي يلگلبج حجر جلمود ما حن عليه…..
هتفت تنفي ادعائه:- كلبي مو حجر ليش انت واختك تكولون هيج عليه …
ضحك:- على كيفج علويه .. اعرف كلبج رهيف ما مرة عشك وتخافين ….. بس بخيل گلبج بخيل علويه…
ياقوت:- لا تصيحلي علويه ….
فارس:- افا اكو احلى من هاللقب ياهي الواكعلها تكون علويه بت ساده….
بلعت ريكها بخجل:- اي بس لا تصيحلي هيج …
فارس بأصرار يلاشيها:- علويه ياقوت بت سيد حسن… ولج بت الساده شسويتي بيه … گلبي رچيچ ما يحمل دلالج
حست الفراشات تطير بمعدتها ولكت روحها مبتسمه مثل الخبله صوتها مختفي من الخجل:- شسويت….
طلع منه صوت دلاله على عضه لاصابعه:- اخخ يا بويه ام گلب البارد … كولي شنو الما سويتي … لج طيرتي عقلي ذاك اليوم تكولين لنورهان تردين تقبلين بهذا الطرن … خليتني اهومش بالرايح والجاي مثل المخبل بالدوام صاحو الغوث مني ….
غصب عنها ضحكت
وبهيام كال:- دخيل جدج اضحكي .. اضحكي واني المشتعل…
مشتعل بنارج وفرحان واصيح هل من مزيد ….
جاوبته بأحراج:- عليك الله كافي .. لا تحجي هيج….
فارس:- والعباس ما اسكت صارلي شهور كاتمهن بگلبي .. والله هاديج عليه وجاي تسمعين…..فاض الكاس يبت الناس خليني ابوح التارس كلبي…..
حست روحها طايره بالسمه بدون جناح وبدون متحس طلعت عليها الشمس وهي تسمعله…
سمعت المنبه يدك يمه تحمحم يكول:- انه غلام ابوي ساعه سبعه …٣ ساعات احسهن ٣ دقايق….
ياقوت بنعاس:- مممم…
ضحك :- روحي نامي علويه روحي وخليني اندل دربي وراي دوام ….
سدته منه حاضنه التليفون على صدرها وغطت بالنوم…..
حست على صوت طكطكه بالغرفه رفعت راسهه تباوع لزهراء سابحه وتطلع هدومها من الكنتور…
رفعت ايديها تتمغط:- صباح الخير…
باوعتلها زهراء رافعه تك حاجب:- قصدج عصر الخير ساعه ٣ خاتون….
كامت كعدت والابتسامه شاكه حلكها:- ليش مكعدتيني…..
ركصت حواجبها بتلاعب:- اذا انتي لصبح تحجين …انقهرت عليج وخليتج نايمه…. كتفت ايديها تسالها.. شنو هالتطوارات ولج انام واكعد انتي تحجين وما حاسه بالدنيا…
كامت عالسريع حضنتها حيل:- زهراء… يحبني.. دك عليه من نورهان … وصارت تحجيلها كلشي
وزهراء عيونها صايره قلوب:- احييه والله بي البلا هالفارس ..
غابت ابتسامه ياقوت:- زهراء خايفه… خايفه يكلي اخطبج مرة واثنين وعشره لحد ما يوافقون.. اخاف تصير مشاكل…
زهراء:- خليها عليه هو زلمه ويعرف يتصرف يريدج يسعى حتى يحصلج… بس ديري بالج من تواصلكم محمد مركز كل حواسه وياج وهاجر متحزمه عليج….
ياقوت:- لا ما اتواصل ويا بعد خلص….
زهراء:- والله چنه راح تكضوها يوميه سوالف بصلته محروكه مبين.. ربييي ماكو واحد منا منا يحبني ويكتل روحه عليه ويجي يتزوجني واخلص من السادس …
ضحكت عليها تضربها:- شلون تعرفها سادس.. تدور زواج كلما تقترب الامتحانات…
زهراء:- اريد واحد متخلف يكول ماعدنه مرة تدرس ….
ياقوت:- اي ويكعدح بالبيت وتخلفين سته سبعه ….
عقجت وجهها كاشه:- لا بطلت اروح اقرا احسلي…
بقو اربع ايام بكربلاء ورجعو … هاجر جانت مو طبيعيه لازكه بياقوت وكل شويه تفوت عليها بغرفتها بأي حجه ونظراتهه تترقب عبالك تريد تثبت شي ….
خابرتها نورهان فرحانه :- عيني ست منو هاي الذاك اليوم للفجر مكعده اخوي بالحوش …
ياقوت بخجل:- نورهان انجبي وعوفيني بحالي ……
نورهان:- اي عيني الله يثخن لبنكم… نورهان بيش كيلو راح اصير كخه
ياقوت تغير الموضوت:- لا والله مو هيج .. عوفينا من هالسالفه اصلا مشتاقتلج ومشتاقه لدوام وياج…
انفتح باب غرفتها فجاة ولگت محمد فوك راسهه اشرلها تنطي التلفون… نشف دمها بعروكها تخيلت نورهان تحجي وهو يسمع…
اخذ التليفون وفتح سبيكر ومثبت نظراته على ياقوت ونورهان تحجي:- اني هم مشتاقتلج والله ومليت من البيت انوب ريم بحجه العطله ذابه زيون يمي ولاعب بيه طوبه هالفطير.. البارحه بال عليه الادبسزز خلاني ابجي …
ابتسم محمد ساد السبيكر ورجع التليفون الهه واندار يطلع.. شافت هاجر واكفه براس الدرج متكتفه.. عرفتها هي الي الله يعلم شگايله اله وهيج طبّ عليها…..
ياقوت بخوف:- نورهان… محمد طب فجاة وسمع حتى يتاكد ويامن احجي… عزاا لج شاك بيه نورهان…اني شلون وصلت هالمواصيل اهلي يشكون بيه……
نورهان:- شنووو .. شسمع عزا بس لا سمع زيون بال عليه…
ياقوت:- لج اني وين وانتي وين… كولي لاخوج دير باله يفكر يتصل حتى من عندج محمد اذا حس والله يذبحني انتي متعرفي هذا من كثر الشغلات الي يشوفها بالمحاكم ماعنده ثقه حتى بروحه….
نورهان :- هو انتي طاكته حظر مركصته بي منين يخابرج عود اني خابرتج اكلج شيلي الحظر لان عنده واجب يومين ما ينزل بس ميخالف انطي خبر لا تخافين….ترا شلعتو كلب اخوي ما ارضى عليه …
ياقوت:- والله هذا العدنه …
نورهان:- اهووو شافته سايح كامت تتگلب عليه…
ضحكت على سوالفها وسدته منها بعد ما ظلت تلاشي بيها وتصنف….
نزلت وشافت هاجر كاعده تباوع مسلسل…
كعدت تباوع وياهه وهاجر كل شويه تباوعلها صفح.. ماكدرت تسكت اكثر:- عبالج ماعرف عندج شي ويه اخو صاحبتج.. يجي يوم وتنكشفين ومحد يفضحج غيري…
ياقوت:- اوهام براسج… انتي ليش تكرهيني هيج؟؟؟
هاجر بغيض:- لان حاركه گلب اخوي… اخوي الوحيد اشوفه متلوع من وراج وانتي ولا يمج….موكف حياته وانتي حياتج ماشيه … انتظرج سنين الي بكده مخلفين وهو بعده وامي ظاله بحسره زواجه وخلفته…..
ياقوت:- ما املته بشي … الله يوفقه ويدزله البنيه الي تسعده
….
هزت ايدها ماعاجبهه الكلام وكامت من يمها…..
خلصت العطله ورجع الدوام فارس بعد ما حجت ويا ولا تواصلوا خافت لا تصيرلها مصيبه…. رجعت للبيت ويه حيدر لان كرار ملتحق شافت زهراء بهالبرد كاعده برا وبيدها كتاب بس صافنه وبالها ابد مو يم القرايه حتى ما حست عليهم من دخلو الحوش…..
صاح بيها حيدر:- زهووور.. ولج شمكعدج هنا بهالبرد..
نزت من مكانهه تكوم تتصنع الابتسامه:-اختنكت من جوا ودخت من القرايه كلت اطلع اشم هوا بارد .. دماغي جيّم وكمت ما استوعبت
دخلت وياهم جوا وصعدت لغرفتها… ياقوت بدلت ولحكتها
شايله بيدها باندج طبي :- تعاي لفي ايدي زين ما اسيطر الفها بيد وحده…
كعدت زهراء تلف الباندج وساكته على غير عادتها
ضيقت عيونها تباوعلها مو طبيعيه:- ضبي شويه جاي تأذيني…..
زهراء:- مممم..
ياقوت:- شبيج مسطورة….
هزت راسها بدون متحجي…
ياقوت:- شبيج زهراء…
بلعت ريكها تباوع للفراغ:- حُر..
— شبي؟؟؟
زهراء:- رجع البارحه من ايران….
عكدت حواجبهه مستغربه:- وانتي شبيج خايفه سالفه صارت وماتت بيومها … حتى يجوز نسى
هتفت:- لج ما ناسي دزلي رساله الخبيث يگلي رجع صكارج ام العلاقات..
ضحكت ياقوت غصبا عنها:- يمعودة شبيج قابل شيسوي ؟؟
فركت ايديها بخوف:- اخاف يروح يگل لبابا ؟؟؟؟
ياقوت:- تؤ .. ما سواهه بيومها تردين بعد ٤ سنوات يسويها… اخخ منج الخفيفه .. هسه انتي المن ضحكتي بيومها وخبلتي عليج…
زهراء:-هسه كفرت خما كفرت….ترا جنت صغيره …
ياقوت:- صدكي يداهرج كلشي ما يحجي….
فاتت امهن عليهن:- انتن وين صارلي ساعه صوتي راح وانه اصيح عليجن…
ياقوت:- ما سمعنه ماما والله
علويه نهله:- اليوم معزومين ببيت عمجن مسوي عزيمه علمود رجعه حُر…
تبادلن النظرات هي واختها …. وزهراء نطت:- ماروح عندي قرايه اني بنيه طالبه سادس عوفوني….
— ماكو تبقين وحدج الكل يروح ومحد يظل بالبيت هن ساعتين لو ٣ ما راح تأثر….
استسلمت وكامن يتحضرن …. يردون يروحون من وكت…
وصلو بيت عمها قريب عليهم شافو سيارات الكل موجودة العمام والكرايب… ياقوت لمحت سياره سيف وانگلب وجهها …
طبن البيت هوسه والجهال يلعبون ويتصايحون بالحوش .. هن طبن من المطبخ وابوهن والولد طبو للصاله يم الزلم…
زهراء كلبها يطكطك تخاف تشوفه وماتكدر تلزم لسانهه ويتعاركون.. كعدت بصفها بنين .. بت عمها واخته لحُر نفس العمر ويداومن نفس المدرسه:- زهراء ولج راح انجلط من الرياضات انوب ست رسميه متحلفه بيه چي طلعت سبعين بنص السنه…
— يمعودة سهل شبيج اني عندي العربي اصعب من الرياضيات….
اجت هاجر على زهراء:- كومي ولج كومي الجهال تمالخو بالحوش روحي جيبي هاشم وكون تكفخ على راسه .. انچلب هو وابن كوثر تمالخو….
زهراء:- روحيله انتي اني شكو….
هاجر :- يخاف منج يالعرمه انه ميخاف مني….
كامت زهراء ترجف ايديها عود خايفه:- انهجم بيت جذبج مرجفه عيله بحالها وماتعرف تضب ابنها …
كامت شالت شحاطه من باب المطبخ.. وركضت عالجهال طشرتهم لزمت هاشم من بلوزة من ظهره ترزل بي وكفخته عالخفيف:- ادبسزز الا اخلي محمد يطيح حظك لازم الولد ترفس بي شبيك مچلوب على امك…لو متوحش على خالك
انفتح باب الصاله الخارجي المطل عليهم واجاهه صوته وهي تفوت باب المطبخ منطيته ظهرها:- ياهي هاي التبسط بالولد عوفيي… عافت هاشم وطبت ركض وبوجهها للصحيات … …..
ياقوت…
گلبي انقبض من شفت سياره سيف مالي خلك ينفتح الموضوع واني ما صدكت انسد.. دخلنه لبيت عمي يروش روش العمام وولدهم وجناينهم والجهال صايرين تشريب من الهوسه … سلمت عالكل وصارت بوجهي عمه زينب سلمت عليها وسلامهه جان بارد ورسمي.. انقهرت لاني متعوده على حنيتها وسلامهه الحار وسوالفهه الحلوة… ماجنت ادري جانن تمثيل علمود اتزوج سيف وراحن كلهن من رفضته عبالي تحبني لأني بت اخوها مو لأجل شي ثاني … دكت عليه نورهان بنص الهوسه ومدري ليش كلبي گلي هذا فارس.. فتحت الخط واجاني صوت نورهان.. حسيت بخيبه بس ما بينت:- هلو نورهان.؟؟
— هلو ياقوت شلونج… ولج شنو هالهوسه يمج كاعده بروضه ..
ضحكت تجاوبها:- لج ابن عمي جاي من السفر جان يدرس برا وكلنه ملتمين عمي مسوي عزيمه وماحجيلج صايره حفله ..
نورهان:- همم يلا اجت عدله..اكلج مدام هوسه ومحد يلاحظ تكدربن تحاجي .. جاي يطلك چنه وحده حامل بتوم…
ضحكت بصوت عالي على غير عادتها والكل باوع عليها قطعت ضحكتها تصفي صوتها:- احم .. ماعرف اشوف…
نورهان:- شتشوفين حطي سماعه بأذانج جوا الحجاب واحجي ويا شوي.. اني ما املته خفت ما تكدرين …..
ياقوت:- ممم اوك.. بس انطيني مجال …. شعور الذنب جبير وتحس الكل كاشفها ويعرف شجاي تسوي كلبها يوجعها هلكد ما يدك سريع وهي تشكل السماعات وتدخلهن جوا الحجاب…
—ها نورهان.. احم حطيت سماعات..
نورهان:- خوش… سمعتها تدك الباب وتحجي ويه فارس.. يابه عندك مكالمه تريدها لو نسده…..ماسمعت منه رد ..
بس اجاهه صوته الملهوف:- ياقوت!!!
ابتسمت بفرح على لهفته الباينه وتخيلت شكله وابتسامته الراخيه:- همممم…
فارس بلوعه:- شني همم حاجبني سمعيني صوتج…
حجت بصوت ناصي:- ماكدر احجي براحتي…
فارس:- دكومي من هاي الهوسه بلكوة اسمعج شوفيلج مكان اهدأ….
انصاعت لامره تحس روحها مغيبه ويا تفقد المنطق والعقل حتى اخلاقها الي مستحيل تسمح الهه تحجي ويه احد غريب تتغيب عنها علموده… صعدت فوك ودخلت غرفه بنين وسدت الباب :- شلونك..
فارس :- شلوني .. شابع بواري وبلوكات..
لمت شفايفها تمنع نفسها تضحك وهو كمل:- يابه ماجنت اعرف الساده هيج بخلاء…
جاوبته ما مفتهمه:- هااا؟؟؟
فارس:- بخيله وياي علويه.. بخيله كلام وبخيله نظر.. بخيله احساس… كلبي محترك وكلبج بارد….
— شنو تريد احجي…
فارس:- اي شي ؟؟؟
— اوك .. اي شي…
صدحت ضحكته العاليه وتذكرت من اجه لبيتهم وضحك وزهراء علقت على ضحكته…وابتسمت ….
فارس:- خيعوني عليج الباردة….
هتفت معترضه تدحض اتهامه:- لا تكول بارده.. شبيك عليه..
نبره صوته انخفضت وصار يحجي ببطيء:- شبيه عليج بيه هواي ياقوت.. ماريد احجيلج البيه واجرح حيائج…خايف تشردين …
ياقوت تحذره:- فارس عفيه احجي بدون هالسوالف ترا اني ما مرتاحه اصلا احجي وياك هالشكل…
رجعت نبره صوته جديه :- راح اخطبج مرة ثانيه.. الاسبوع الجاي اجي لبيت اهلج …
قشعرت خوف:- لا عفيه.. لا…
فارس:- هو شنو لا.. لعد اظل اخابرج مثل المراهق.. ياقوت ترا البكدي ولدهم بالمدراس مو مال مخابرات….
نصت صوتها متذكرة كلام ابوها:- بابا گلي .. گلي فرق العمر هواي وجانت من ضمن الاسباب الي رفض علمودها….
هتف بنبره خبيثه وهو يضحك:- يابه ما يرهملج صغير يرادلج خيال معدل….
عكدت حواجبهه ما مفتهمه:- هو شنو لا تحجي بالالغاز…
فارس:- غير اذا احجي بصريح العباره بحياتي ما اسمع حسج خلينا بالالغاز احسن…. بعدين تعاي هنا شني داخل بالعمرين ومادري هن كلهن جم سنه شايفتني شايب….
حبت تلاطفه:- اي شلي بيك…
ضحك مصدوم :- ووولج منو الشلها بيه….
حطت ايدها على وجهها تحس نفسها مو ياقوت .. متعرف شجاي تسوي وجاي تنجرف ورا مشاعرها:- فارس… اني…
ماكملت حجايتهه وانفتح عليها الباب دخل سيف عيونه حمر ومغوركه ويتنفس سريع خلاهه تتجمد من الخوف وهو يحجي بصوت خفيض لكن ينذر بغضب:- تحجين ويا ولج ياقوت…..
تحاجين زلمه غريب؟؟؟؟؟؟؟؟؟؟؟؟؟
