خلينا نلتم بالچذب مثل الاحلام الصلفه
تدرين احبچ واشتعل لمن اشوفج صدفه
لميني بعيونج وطن كلما يموت نعزفه
كالتلي چا هلبت تمل يوميه مرسالك يهل
بس البرود يتلفه
كالتلي وشفافك كضن عوف الجكاير والتتن
گلتلها وبيمن اطفه
هو انه من اسمج يمر توصل لگلبي الرجفه
ماجنت مستعده لهذا اللقاء سبحان رب الكون شلون شوفته هزت كل ذرة بيه انفاسي انسجنت بصدري مغصوبه وكل انواع المشاعر احتلتني حسيت بؤبؤ عيني صار اكبر من محاجرها ويريد يطك ماعرف شلون سيطرت كلبي يرفرف مثل طير مذبوح ورجفه بدت تستولي عليه وكعت مني العلاكه ولما نزلت راسي حتى اخذها حسيت روحي تريد توكع للارض غمضت حيل اطرد ملامح الدهشه ورفعت نفسي وجاهدت حتى ما اباوعله واشوف ملامحه واكف بصف سيارته شفت الصدمه بوجهه وخيالي خلاني اشوف شوك ولهفه بعيونه ماعرف شلون نورهان صارت قريبه لهلدرجه وحضنتني عيني تعلگت بي كلما اديرها ترجع تباوعله بعطش حتى عيوني صارت تحاربني وتسترق النظر اله اول ما مريت منه لمحته يندار ويبتعد مثل الملدوغ عرفت خيالي غلطان وهذا مو شوك هذا بغض ماعرف شلون وصلت الصاله واستعجلتهم نروح مسطورة واحس نفسي راح اوكع من طولي شهور واني احاول انسى بس شهوري كلهن طاحن كدام ثواني بمواجهته انطيت الهديه لليالي واحس روحي تنطحن عالبطيء حتى ماتذكر شحجيت وشنو جاوبتني اسأل روحي شجابه هنا منين يعرف ليالي واهلها طلعت الباب اني وامي وزهراء وهو جان قريب ما تجرأت اباوع ناحيته رغم عيوني تتوسلني خفت.. خفت اندار وكلشي بيه يشرحله حبه العايش بگلبي خفت يكشف ضعفي كدامه بعد كل هاي الفتره وخفت افضح روحي كدام الكل وتخوني دموعي صعدنه وانطلقت شارده من قربه عيني صارت بعين زهراء بالمرايه رمشتلي وكأنها تگلي اهدي
اباوع لايدي ترعش وحيلي باد ماما دايره وجهها لشارع ترمي تعليقات عشوائيه عن الازدحام والسرعه وحركه السير
طلعت زهراء قطعه كاكاو مغلفه من جنطتها تفتحها :- هاج توته اشو ترجفين هبط عندج السكر . مدت ايدها تحاول تدسها بين شفايفي فتحت شفايفي الترجف واخذتها . تعودت على هاي الحاله وصار اي احد من اهلي يطلع وياي يشيل ويا شي حلو في حال تخربط وضعي
انتبهت امي وصابهه قلق :- يا بسم الله دخيل ابو فاضل وجهج اصفر شجاج توج چنج العافيه
همست بوهن:- مبيه شي عادي هبوط
حثتني بقلق:-اشو طبكي ..طبكي ولج لا تتخربطين ويصيرلنه قدر .
انصاعيت لامرها لان فعلا حسيت الروح تريد تنسحب مني رجعت زهراء انطتني قطعه كاكاو وامي بللت ايدها من بطل المي تمسح وجهي بقيت كاعدة خمس دقايق حسيت وضعي بلش يتحسن حركت السيارة يا من يلزمني باب غرفتي ….
باوعت لعيوني بالمرايه الكحل سايح ومتبدي على خدودي جريت كلينكس من الباكيت الي بصفي امسح واخذتها حجه دموعي نزلت امسح بسرعه وعنف وعيني لطريق اتمنيت اتلاشى مثل الدخان ومحد يشوفني حتى اطلق مشاعري براحتي
اسمع امي تردد ايات بصوت خافت وتلتفت عليه كل شويه
حسيت البيت صار بغير دوله ما عولت اطبك كدام الباب نزلت بسرعه ادخل لاكاني حيدر وبسرعه انرسمت ابتسامه مزيفه على وجهي :- جينا وجبنا ريحه الحبايب
قهقه ولزمني باسني من خدوي :- افيش من الحبابيب وريحتهم والجايبها
شكد افرح من اشوفه فرحان يهون عليه نزف گلبي المحد يشوفه
جاوبته :- بعد عيوني عساني مانحرم هالوجه الحل واشوفك فرحان طول العمر بجاه جدي وجدك
رجع بوسني :- شلونها ؟؟
جاوبت زهراء وهي تنزع حذائها بباب المطبخ:- شلونها نفس ماعفتها البارحه محسسني صارلك شهور مشايفهه مو خمس ايام بالاسبوع مكابلها ..
حيدر:- تفگه مو لسان بويه الله يساعده الياخذج اسبوع ويردج وفوكاج حبه مسك
زهراء:- امه داعيتله بليله القدر والعيدين ومولد النبي وعيد الغدير وفرحه الزهرة حتى براس السنه ..
ضحكنه على سوالفهه وحيدر يهز راسه
باوعتله:- خليني ابدل واصلي وانزل نسولف ابتعدت عنه كم خطوة ورجعت لزمته من خده وبسته بالثاني اشاوره:- هاي من ليالي …
ضحك بصوت عالي وصاح:- احووي..
عفته وصعدت الدرج ووكع القناع السعاده عن وجهي يعلن هزيمتي الشنيعه بمجرد شفته الحمدلله ما صادفت كرار طالع طبيت غرفتي اجر ذيال وجع كلبي وسديت الباب سانده روحي عليه غمضت حيل اتمتم:- ماريد ابجي. ماراح ابجي. ماريد ابجي. ماراح ابجي. وكلما ارددها اكثر كلما تتجمع الدموع وصارت تسيل بغزارة مثل سد على نهر مسدود صارله سنين وانفتح فجاة صرت انزع ملابسي واشمر بالكاع واشهك غيرت هدومي نمت بفراشي وحطيت وجهي بالمخدة اكتم صوتي انفتح الباب وطبت زهراء قفلت الباب وكعدت على حافه السرير تمسد ظهري
— ياقوت والله خفت اكلج وضعج جان ما يسمح تعرفين
درت وجهي عليها مستفهمه:- شنو؟؟
فركت ايديها بتوتر:- شفت نورهان بالعقد جانو موجودين لان بيت اهل ليالي فارس يصير ابن عمتهم وهو القنع اخوان ليالي يوافقون….
فتحت حلكي مامصدكه القدر شيريد يسوي بيه شيريد يشوفني بعد صدمات:- يعني من بين كل الناس يطلع ابن عمه ليالي لييش… لطمت وجهي بقهر ليش ليش حتى اتعذب اكثر اني ماصدكت بلشت اتنفس ليش ديصير بيه هيج
حضنتني زهراء وعيونها دمعت على حالي:- اهدي توته كافي ملختي روحج كافي
جاوبتها بمراره :- اريد اموت اتمنى اموت زهراء ادعيلي اموت وارتاح
نهرتني ودموعها تهل تشاركني حزني:- سكتي لا تحجين هيج ولج ليش تموتين خلص اعتبري ما موجود وين تشوفي بعد قابل عايش يم ليالي لو راح يعيش يمنه من تجي ليالي هنا احتمال بعد ابد متشوفي كافي توته ماصدكنه شويه صحيتي ومبقه شي لدوام ترجعين وكملي كليه
محمد مو كالج تعاي للمكتب اشتغلي يمه تتعلمين وتگضين وكت احسلج.
مسحت وجهي مدري اضحك على روحي لو اقنعها :- اي صح اي اني شكو عادي واذا شفته قابل شكو اي ادرس واشتغل الهي روحي احسلي من هالسوالف
هزت راسهه زهراء تبتسم على كلامي:- اي عفيه انتي سباعيه هسه تشوفين شلون تنسين كلشي صار ولا كأن صار من الاساس
هزيت راسي وكمت بسرعه رحت للحمام غسلت وتوضيت ورجعت اصلي المغرب وزهراء هم راحت تصلي وبلا شعور شفت نفسي ادعيله وادعي لنفسي ننسى كل الصار ونرجع غربه منعرف بعض…
وهيج بلشت اروح ورا الظهر لمكتب محمد ماعندي شغل ثابت بس حتى اتعلم اتابع ويا واسجل ملاحظات ويا محاميين اثنين وعدهم مساعدين حسيت نفسي نفر زايد محمد حشكني بس حتى اطلع عنده اصرار عظيم اشتغل بالمحاماه ويعلمني بشغف واكتشفت شكد هو محامي شاطر وحازم وكل اليشتغلون ويا يستشيروا بكل شارده ووارده وبكل القضايا
وبمرة جنه راجعين للبيت اني ويا والدنيا غروب واكفين باحد الازدحامات
تجرأت وسألته:- محمد شوكت ترجع هاجر؟؟؟
باوعلي من فوك ايده الي لازمه الستيرن صفح ومعاجبه السوال:- ماعتقد ترجع بعد الصار..
— محمد عندك ورود اثنين منها ليش تخليهم يتشتتون مالهم ذنب .
— راح ابلش بسالفه الحضانه ارجع الجهال يمي ما ابقيهم يمها اصلا مستحيل انطي فرصه لهاجر تربيهم على اخلاقها وتخربهم
— طلاق صعب ومستحيل بابا يقبل خليها تعرف غلطها ورجعها مهما يكون هم يحتاجون امهم فكر زين يا اخي انت رجل قانون ودتشوف المحاكم شلون الاطفال متبهذلين ومتروسين عقد نفسيه بسبب انفصال اهلهم .
جاوبتي ونظره للشارع :- مرات الانفصال رحمه للجهال احسن ما يعيشون ويشوفون ابوهم مو طايق امهم وعايش وياهه بدون مشاعر
سكتت شرد اجاوبه ماحبيت اضغط عليه ويتعصب رجعت للبيت جوعانه وبيه رجفه سبحت ونزلت امي وزهراء يسون عشه اكلت بشهيه مفتقدتها من زمان
باوعت لفتي وضجت كرار يحب الكبه طلعت تليفوني ادك عليه ما جاوبني ورا عشر دقايق هو رجع دك
— الو ها يبعد چلاي.
—ها كروري شلونك؟
—زين حبيبتي انتي شلونج شعندج داكه هيج وكت جماعتي يمي وما جاوبت
—هيج بس مشتاقتلك مسوين كبه ووكفتلي عليك .
— مم شهيتيني وعلي من اجي اول اكله تسوينها الي.
سولفنه شوي وحچه ويه ماما وبابا وسديته منه وكفت زهراء تحط القوري عالطباخ:- بابا هسه على اتفاقنه اني وياقوت نروح ونجي سوة.
ابو محمد:- اي بابا احسن وارحم ما امن عليجن ويه سايق
زهراء:-بعد احسن وباوعتلي تركص حواجبهه منو كدج علويه ياقوت سيارات وكذا بعد شيخلصنه من ذلتج
غميتها:- عينج عوذة
حجه بابا موجه كلامه الي:- توته بابا اريدج تشدين حيلج تعوضين السنه الراحت عليج احنه ولد اليوم حطي الراح كله ورا ظهرج
حركت راسي اوافقه الكلام بدون ما احجي الاسبوع الجاي دوام وكلما اتذكر بطني تمغصني واستذكر احداث السنه الراحت جريت نفس عميق احاجي نفسي لا ياقوت السنه حياة جديده الراح راح انطوت هذيج الصفحه..
طلعنه لسواك اني وامي وزهراء تحضرنه لدوام وزهراء مكيفه تريد تشوف صديقاتهه ومشتاقه لاكل الكافتيريا لا ببالها دراسه ولا شهادة وبصباحيه الدوام حسيت معدتي توجعني من التوتر صرت اطرد الافكار الي تجي براسي واحس الشيطان ديلعب بعقلي يصورلي شغلات ماراح تصير..
—ليالي—
جاي اعيش احلى ايام عمري وگلبي من السعاده احسه ينفجر ماكو خوف ولا قلق واحجي ويه حيدر بقلب مرتاح وكدام الكل صارلنه فتره من انخطبنه بس مالتقينه وحدنه ابد حتى بالدوام استحيت انفرد ويا والموظفين ياخذون نظرة
بس حبيت اكعد ويا اشتاقيتله اخذت كلاصين سفري چاي ودخلت عليه بدون ما ادك الباب جان منغمس بالشغل رفع راسه مخنزر بس كبل اختفت عقده جبينه وانفرجت ملامحه وابتسامته اتسعت ترك الي بيده ووكف يقترب مني واني احس روحي اتخردلت مدري شصار بيه اخذ الكلاصات مني واندار حطهن عالمكتب واندار لزمني من اديه اثنينهن هامس بنبره عتاب:- همزين حنيتي لو ادري ما عاقدين قبل جنتي تتحججين بأي حجه وتجيني هسه كلش شحيتي وياي ..
بلعت ريكي احس بخجل فضيع من التلامس الصار عادي وحلال بينا احس روحي احتريت وارتبكت:- مو شسمه. احس عيب من الموظفين خاف يجي ببالهم شي ؟
قربني منه اكثر وهمس بنبره خدرانه :- ويجي ببالهم الي يجي محد اله عدنه شي مرتي. وحلالي.
عضيت شفتي وابتسمت اردد بداخلي:- صرت مرته وحلاله يربي اني بحلم لو علم .
نزلت عينه على شفتي ولون عيونه صار اغمق وقبل لا استوعب شي لزمني من خصري ورص ايده عليه مقربني منه ولثم شفايفي كلبي صار يركض بدكاته وحسيت بوهن برجليه سندني اكثر ولصقني بجسمه قشعرت من القرب الي ما متعودة عليه ما جاريته بس ما منعته . ابتعدت عني وسبابته تمسح على شفايفي وانفاسنه اثنينه مرتبكه
همسلي بصوت خفيض ذوبني:- اربع سنوات انه منتظر هاللحظه
ترجيته:- حيدر عفيه وخر؟
ابتسم بخبث على الحمرة المكتسحه وجهي:- ما وخرتيني من الاول وغمز لو عجبتج الوضعيه اذا عجبتج اعيد ما ورانه شي
شهكت وضربته على صدره:- عزا شكد متستحي سيد ترا حبيتك على اخلاقك وينهن؟
قهقه بخفه وتراجع يكعد على احد الكراسي الكدام المكتب:- ذاك سيد حيدر وهذا حيدر ثاني الي منتظرج تصيرين اله من سنين خلي يعبر عن شوگه براحته ..
صوت القرآن ناصي وزهراء بلكوة مفتحه نعسانه كاعده بصفي واني عيني عالطريق اردد الايات الحافظتهن ويه القارئ
طبكت بكراج واتفقت ويه الرجال الواكف يكص وصولات يحجزلي مكان ثابت وادفعله كل شهر حتى ما اتورط يوميه بمكان طابكه انطاني وصل بي ختم وتواريخ ودفعتله وطلعت للجامعه دخلت واني كلبي يركع وكل الذكريات الي داهمتني جان بطلها واحد فارس وجياته
اخذتلي فره علمود المباشره واحس غصه بگلبي المفروض السنه اتخرج ويه جماعتي بس رجعت عدت الثالث راحت زهراء لشعبتها ماطولت ورجعت عليه ماكو محاظرات حطت ايديها بيدي :- امشي نروح نتريك عازمتج بمناسبه رجعتج ..
ابتسمت:- يلا داده اقبل العزيمه دخلنه الكافتيريا وشفت اغلب طلاب شعبتي القديمه طابكين اكثر من طاوله وكاعدين سوا يضحكون ويسولفون مدري ليش حسيت روحي اريد ابچي
سلمت عليهم وكلهم تفاجئوا بشوفتي واصروا نكعد وياهم كعدت محرجه احس فشله اني عايده سنه وكاعده وياهم كلهم يحجون بحماس عالسنه شلون يتخرجون واني اخوط بكوب الچاي السفري
قاطع شرودي صوت نورهان الي واكفه بصف الكراسي:- ها بذاتين ريوك وعزايم خلفله على سرى دزتلي رساله ..
صارت تتسالم ويه الكل بسره لحد ما وكعت عينها علينه اني وزهراء تفاجأت بشوفتي تبادلنه النظرات وابتسمت الهه وهي بادلتني نفس الابتسامه حسيت لازم اكوم وجودنه على نفس الطاوله يسببلي توتر وكفت احث زهراء واستأذنه منهم وطلعت من الكافتيريا سمعت صوتها يناديني من ورايه عرفتها لحكتنه غمضت حيل وانداريت عليها
نورهان:- شلونج ياقوت..
-الحمدلله وانتي.
هزت راسهه :- بخير على الله.
-محتاجه شي حبيبتي.
ابتسمت:- لا والله هيج بس حبيت اسلم عليج عالخير رجعتج لدوام ..
-خير الي يصيبج.
– سمعت فسختي من ليالي الله يعوضج لا تنقهرين.
ابتسمت بمراره :- لا عادي ما مقهورة كلشي قسمه ..
سكتنه اثنينه للحظات وقطعت اني الصمت:- عن اذنج حبيبتي
— الله وياج
اندارت تمشي وآني وزهراء كملنه طريقنه
من يومها ابد ما احتكينه اني نورهان ببعض نشوف بعض من بعيد ونسلم على بعض بس مادار بيني وبينها اي حديث كلبي ينعصر كلما اتذكر شلون چنه منفترك طول الدوام واشتاقلها هواي بس صعب نرجع مثل قبل
بلشت المحاضرات وركزت كلش بالدراسه جنت اقرا بواهس وحماس دخلت بجو الدراسه مشتاقه حتى للقرايه
وبيوم لازمه الملزمه وقلم ماركر اصفر اقرأ واحدد المهمات علما زهراء تطلع من محاضرتها الاخيرة حتى نروح للبيت
رفعت عيني واشوف فارس واكف بباب الكافتيريا مجنح ايد وحدة على خصرة وعينه تدور تفتر بالمكان لابس بنطلون جينز وتيشرت نيلي نص ردن رغم الجو بلش يبرد ضاب عليه مبين عرض اكتافه سرحت ثواني بوسامته بشوق عارم ولگيت روحي مبتسمه رفعت الملزمه على وجهي عالسريع مغطيته مغمضه عيني انهر روحي عن شعوري ورجعت نزلتها حيل وكمت واكفه اسأل نفسي على شنو خايفه وحالتي حاله اول وتالي نتواجه شلت جنطتي وتوجهت ناحيته وجهي جامد باوعلي ودار راسه ورجع التفت بسرعه من استوعب هاي اني كلما اقترب منه احس كلبي تزيد سرعه دكاته ظل واكف بمكانه صافن بيه واني فتت من يمه تجاوزته وطلعت صرت اتسارع بخطواتي
كعدت بحديقه القسم احس راسي كبل شكل بي صداع
فركت كصتي حيل حسيت احد كعد بصفي على نفس المصطبه بس بينا مسافه عطره انتشر بريتي مستحيل انسى عطره ثگلت انفاسي ودرت وجهي ناحيته كاعد مثبت نظره ليكدام واني سويت نفسه ماعرف شكد ظلينه ساكتين عشر دقايق ربع ساعه
ردت اكوم وهمس
– ظليت واكفه درت وجهي لناحيه الثانيه:- اريد اروح
غمضت بنفاذ صبر:- ماريد .
درت وجهي ناحيته بعده نفس كعدته ونفس نظراته ليكدام حجيت من بين اسناني :- گلتلك ماريد..
قاطعته بغضب مكتوم منصيه صوتي ماريد احد ينتبه:- لو شنو ها ؟ لو شنو؟ تخطفني جبر وتاخذني لبيت حتى تضربني وتسم روحي بالكلام اليذبح وابطل من الكليه حتى ترتاح
دار راسه ناحيتي وحط عينه بعيني اهتزت نظرتي بس ثبتتها :- ما ضربتج وبالنسبه للكليه محد كلج بطلي
رفعت حواجبي:- والله منو الي لطش راسي بالكاع خيالك منو الكرهني بالدوام غيرك؟
بلع ريگه وتفاحه ادم تتحرك ببطيء عيونه تتفرس بوجهي وبكل ملامحي:- مو طبعي اضرب مره وانه لو ضاربج بيومها جان جرمت بيج لا تعتبريها ضربه اعتبريها حركه كضمت بيها شري عنج . والدوام انتي اختاريتي تتركي
كتفت ايديه لصدري:- وهسه شتريد؟
اشرلي بيده على المكان الجنت كاعده بي :- بس اكعدي شوي ماريد شي منج غير عشر دقايق علويه
نبرته تذوب گلبي عبالك يتوسلني ذبيت نفسي عالمصطبه كعدت بيني وبينه مسافه شخص ثالث يكدر يكعد بينا
رجع ظهره ليورا وورث جكاره احس ريكي ناشف من قربه سويت مثله ورجعت ظهري انتچيت ليورا واثنينا ساكتين سكوتنا جان يحمل هواي كلام ماعرفنه نحجي
صوت طكه الجداحه صدح مرة اخرى وهو يورث جكارة ثانيه حجه وهو يزفر دخان جكارته اتجاهي :- صارلج ٣ اسابيع تداومين تدرين شكد كابدت وحاملت على نفسي حتى ما اجي ؟؟ ضحكه قصيرة جدا ضحكها بأستهزاء واردف. لا يبوي انتي شيهمج. شكد هامج انه عساس .
ما باوعتله وصوتي غصب عني طلع همس:-شلونك؟
سألني بمراره:- شلونيي؟
درت وجهي عليه تنهدت بتعب:- فارس گلي شسوي وشتريد حتى ترتاح واني هم ارتاح وتكف شرك عني؟
جاوبني بأندفاع:- اريدج. اريد ياقوت القديمه الحبيتها. ياقوت الي ماغدرتني ولا خانتني ولا استغفلتني وراحت لرجال ثاني . تكدرين تمسحين كل هذا من راسي؟
عضيت شفتي احاول اسيطر وما ابچي بس فشلت محاولاتي كلها عيوني غركت بدموعها وصوتي رجف:- لا ما اكدر لو اكدر اني جان نسيت روحي كلشي.
نظراته تنزل ويه دموعي الي صارت تنكط من فكي دار وجهه عني وهمس:- لا تبچين بس احجيلي ليش ..
مسحت وجهي بظهر ايدي ودار عينه بنفس اللحظه تركزت نظراته على بطن ايدي الي بي جروح ورديه واضحه وسألني بأهتمام :- شبيها ايدج .
باوعت لبطن ايدي اتذكر شلون انجرحت حجيت بشرود:- مو مهم .
سكتت ثواني . اني اسفه . اسفه لان اذيتك وجرحتك اسفه لان غدرتك وخنتك واتمنى تسامحني
رفع حواجبه وشفايفه تفرقت بتعجب:- هيج تعتذرين بدون توضيح بدون اجابه للمليون ليش الكلتها الج طول هاي الفتره الراحت
هزيت راسي :- ماعندي توضيح صارت بعد .التوضيح ميفيد بشي
بس اعتذر عن البدر مني.
صفك ايد بيد بعصبيه :- لا تعتذرين ميحتاج اني الي لازم اعتذر لروحي وكلبي لان حبيتج اعتذر لگلبي شلون اندفعت بكل ذرة مشاعر بيه وتحولت مراهق علمود وحدة بكد زري
على شنو تعتذرين لج انه صارلي سنه ما نايم افكر . عدوي صار الليل والنوم .يلتمن علي كل الهواجيس اتخيلج تحاجي ويغازلج اتخيل يباوع بعيونج الاحبهن اتخيله شلون يلزم ايدج الي اتمنى الزمها لو يفل شعرج بحضنه لو تخيلته تزوجح اصلا ووصل وياج لاعمق رغبه رغبتها بيج اجيت انجن انه وافكاري كل يوم موت بطيء يوميه اجرعه ليل ونهار وفوك ذني كلهن ال(ليش) الي اسألها بالدقيقه الف مرة . ليش مو جانت حبيبتي
ليش مو جانت تنام وتكعد على صوتي . ليش مو عيونها تحبني طلع كلشي بيج جذب عيونج تمثل الحب بس كلشي بيج غدر . واليقهر اكثر ويه واحد ما يستاهل رمش من رموشج.
كور ايده وضرب گلبه ضربات متتاليه:- ورغم كلشي سويتي هذا ما يقنع مايقنع ويريدج ويحبج ومتخبل عليج چن ماكو مرة غيرج بهالدنيا حاولت اقنعه بغيرج وماقنع اندارعني يفرك وجهه ويتنفس بصوت عالي عبالك اتندم عن بوح گلبه لمشاعره البعدها حيه بگلبه وما ماتت وهالشي خله رفرفه الم حلو يصيب معدتي
رجع اندار عليه يسألني:- شلون طلگج ؟
– طلگني وخلص ميحقلك تدخل بحياتي.
رددت بعصبيه:- بحقلي. يحقلي ونص.
هزيت راسي بعنف:- محد بيكم يحقله بعد بحياتي خلص اعتقوني وخلوني اعيش بسلام
كمت وكفت طفح عندي الكيل وقررت ابوح جزء من الصار بيه :- بعد لا تجي. اعتذار واعتذرت منك. خلص كافي ترا تعبت اني .خاف عبالك جنت عايشه بعالم وردي وانت المظلوم والمتعذب كافي اني انجبرت وتأذيت وانلعب بحالي
فك عيونه يباوعلي وبوجهه الف علامه استفهام وكف كدامي :- شجاي تكولين؟
ابتسمت بمرارة من بين دموعي :- تريد تعرف ليش ؟ اني اگلك ليش لان انجبرت.
برأيك سيف الي ماقبلت اصعد ويا سياره وكسر ايدي راح اقبل بي بأرادتي ؟ انت لو كلفت نفسك تفكر انت لو حبيتني صدك
قاطعني بحدة:- محد يحبج بكدي دير بالج تشككين بحبي
ضحكت بأستهزاء ودموعي تجري:-جان عرفتني من الفتره الچنت بيها وياك وتعرف اني مجبورة وماكدرت اشاركك اجباري خفت من العواقب
انت جرحك عفتك وختنك تعرف اني شنو جرحي ؟
اني عفت الانسان الي حبيته وانجبرت ارتبط بأنسان ما اتحمل اتنفس نفس الهوا الي يتنفسه هسه ارتاحيت ؟
وانت عاقبتني خوش عقاب ماقصرت سحلتني مثل البهيمه وغرست بيه سهام جروحهن ما يطيبن للموت
فلت وجهه يدور الحقيقه ونظراته تنتقل بين عيوني بتساؤل:- شلون انجبرتي لج شلون ادري اشم گفه ايدي ؟
درت وجهي عنه اباوع للفراغ:- انجبرت وخلص والصار صار ومحد اتأذة بگدي. اني ما اذيتك عن قصد ولا بمزاجي بس انت اذيتني بقصد تقصدت تهيني وتعيشني خوفه وشعور مقرف
همس يبرر وكل انفعاله اختفى :- جنت محترك بنار وماشوف كدامي.
ضحكت بأستهزاء:- اي وكلت لا ميصير احترك وحدي خلي احركها وياي
تعرف انت ماجان الك حق تسوي بيه هيج حتى لو جنت خاينه وغدارة صدك ماكو شي ينطيك حق تخطفني مثل المجرمين كلبي راد يوكف واني اتخيل اهلي يعرفون اني مو بالدوام
رفعت حواجبي :- ابالغ؟ يعني اذا صار نفس الشي ويه نورهان عادي؟
نتر بعصبيه:- لا تخلطين الاوراق .
بنفاذ صبر سألته:- هسه شتريد ؟ خلص صفكت ايد بيد ترا ماكو شي يربطنه ردت تعرف شي وعرفته روح توكل الله وياك
عفته ومشيت بدون ما انطي فرصه يجاوبني وطلعت من الجامعه متوجهه لسيارتي شغلتها وكعدت ابجي من كل كلبي دزيت رساله لزهراء تلحكني لسياره من تطلع
فتحت جنطتي وطلعت نستله واكلتها غصب حسيت نفسي اريد اتقيأهه بس جبرت نفسي.
وهيج توالت الايام لا شفته ولا شافني ماكدر انكر اشتياقي اله بس احس نفسي خلص حياتي هاديه خلصت من المشاكل خلصت من التهديدات والخوف بلشنا نحضر لعرس حيدر الي موعده بعطله نص السنه رغم عندي امتحانات بس جنه كل نهايه اسبوع نطلع اني وزهراء وليالي واختها نتسوك ونحضر الحنه بيت اهل ليالي والعرس بقاعه ونسائي ماعدنه اختلاط بأعراسنه
محمد جاب الجهال من بدايه الدوام وكل البيت مهتم بيهم واكثر شي امي اما بابا ما حجه ولا علق بس اعرفه مستحيل يقبل يطلك هاجر خاصه عدهم اطفال اثنين
قبل العرس بثلاث ايام اتصلت ليالي وطلبت نلحكها لمركز التجميل ترتيبات قبل العرس اخذت زهراء ورحنا هي سبقتنه وعند وصولنه تفاجئت بوجود نورهان بالبدايه بس بعدين كلت ليش اتفاجأ غير هي بنت عمتهم ومقربه منهم قضينا وقت ممتع. رتبت اطراف شعري وسويت تنظيف بشره وليالي هم سوت كل متطلبات العروس زهراء لازمه تليفونها والكوافيرة تكص شعرها وملامحها معقوجه بانزعاج سالتها شبيج
– هذا ابن عمج لو اذبحه لو يذبحني
– اكو غيره هالعله . كلما زانت الصفنه عنده يدزلي رساله يغثني .
ضحكت جنهم رويسيه:- شبي وياج؟
– من شافنه طلعنه ليهسه يدزلي :- لو تروحين الف مركز جهرتج ما تتغير لو يكلي كلليهم يعدلون اخلاقج لو كاتبلي لا تكصين شعرج خليهم يكصون لسانج ونخلص منه
ضحكت من كلبي- وانتي عساس تسكتين اكيد ما مقصره؟
– لو يموت ما اسكتله الازرك .
– حرام عليج حر ازرك؟
– خلي يطيرچنة طنطل ……
كمت الم شعري والبس حجابي شكد وجهي تغير على تنظيف البشره حطيت كحله وتنت واجت زهراء خمطتهن من ايدي تحط لو بيدها تحط مكياج الدنيا كله بوجهها بس علويه نهله صاكرتها.
انداريت على ليالي:- ليالي لازم نروح ترا امي راح تجيني بالمكناسه الدنيا راح تغورب اني ماسوق بالليل
– عادي حبي اصلا خلصت اظافري الولد جايين بطريق ياخذونه
تسالمنه ونزلت اني وزهراء طلعنه من المركز طابكه كدامه
همستلي زهراء تشاورني وهي تمشي بصفي:- ياقوت هذا فارس..
گلبي خفق بعنف وباوعت لناحيه الي تباوعلها تلاگت عيوننا خزرته وهو ابتسم ابتسامه تذوب الگلب ودرت وجهي صعدت السياره وجاي اشد حزام الامان جان تدك الجامه الي بصفي
تنفست بنفاذ صبر ونزلتها
انحنى راسه لمستوايه باوع لزهراء خطف ورجع باوعلي وعيونه صلفه تباوع بجرائه:- السلام عليكم
قلبت عيني بضجر:- وعليكم . نعم؟؟ خير؟؟؟ مضيع شي
-همس بهيام:- مضيع گلبي يمك..
– ادعيت اللامبالاه واني كلبي يريد يطلع من صدري و يختل بصدره:- غلطان ما نلفي گلوب سود بعدين انت شكو يوميه طالعلي بمكان بقه بس بالمركه الگاك .. ضحك بصوت عالي
– على كيفك يا ضوة ترا جاي اخذ اختي وبت خالي؟
عكدت حواجبي مستفهمه:-ضوة؟
ابتسم وعيونه تنتقل بين عيوني:- غير انت تضوي ضوي بعدين
انتي اهلج ما يخافون عليج تفترين بسياره بهالوكت؟
رفعت حواجبي وشددت على كل حرف احاول اخفي تأثري بكلامه المعسول:- وانت شعليك.
سوة نفس حركتي:-كرايبنه صرتو شلون شعليه
ضحكت بأستهزاء:- انوب صرنه كرايب والله يالله .
ضحك عاض شفته هاز راسه :- صايرة صلفه علوية ماعرفتج
– اي انت متعرفني اني صلفه من زمان هيج يلا ترهم.
– اموت عالصلافه
وزهراء الفطيره شهكت ودارت وجهها تضحك انداريت عليها :- ضحكينا وياج ؟
رجعت درت وجهي عليه ادعي العصبيه:- ممكن توخر نريد نروح..
– ديري بالج من الطريق وبوجهج للبيت ..ابتعد خطوتين ورجعت سيارتي ليورا وطلعت راسي شوي من الجامه :- معليك ..
ما انطيته مجال كبل حركت وابتعدنه عنه مسافه وزهراء تباوعلي تريد تحجي
-زهراء ولا حرف.
– عزا ياقوت واني اكول ليش هلكد تحبي .شلون يباوعلج وشلون يحجي يباااو اريد احب
ضحكت تهز بيدها:- الجذابه مسويه نفسها عود شخصيه وهي ترجف عليه والوجه غادي طماطه
حطيت ايدي على وجهي وصحت بيها:- زهراء انلصمي عاد.
رددت بخبث :- على كيفك يا ضوة .
عطت بيها:- زهراااااء
حطت ايدها على حلكها:- سكتنه عمي سكتنه
كضيت الطريق سكته وكلامه يتكرر براسي مرة يلوم ويعاتب ومرة يغازل ديصعب الامور عليه فوك ما هي صعبه ومعقده
طبينه البيت واسمع هوسه والصوت البارز صوت محمد تبادلنه اني وزهراء نظرات الاستغراب
وتسألت زهراء:- هاي شكو
رفعت اكتافي مستغربه مثلها:- طبي ونعرف..
دخلنه من باب المطبخ واسمع محمد يحجي بانفعال :- يابه انه مو طفل تفرضها عليه ماريد ارجعها
ابو محمد :- ابني مرتك طلعت حامل حرام والله حرام .
ادارينه اني وزهراء لبعض متفاجئين وهمست زهراء عاوجه حلكها:- يا سوووبهااان الله
محمد:- ما اختلفنه تبقى يم امها مصرفها يوصلها تجيبه اخذه واربي ويه اخوانه هاجر متصيرلي مرة بعد نفسي طابت منها.
صاح بي ابو بعصبيه:- محمدددد اهجع عاد ترا مصختها لا تشيلها اثم اخوها .
محمد:- انه ما مشيل احد اثم غيره لوما هي اتفقت ويا.
ابو محمد بحزم:- بعد رجعت وخلص وخليني راضي عنك جهالك مالهم ذنب ينحرمون امهم
ضحك محمد بأستهزاء:- مافكرت بيهم امهم ؟
ظليت حايرة اعبرهم واصعد اظل واكفه شسوي . سلمنه اني وزهراء ورحت ناحيه الدرج تفاجأت من طلعت هاجر من غرفه امي وجهها محتقن من البجي واجت عليه تركض حضنتني وتحجي:- ياقوت عليج الله گليلهم انه مالي صوج بالصار ياقوت اني حامل حرام ينهجم بيتي احجيلهم .
بلعت ريكي بقهر وبعدت ايدها عني افك الحضن وعيني صارت بعينها
واثنينه اتذكرنه هذاك اليوم الي صار قبل كم اسبوع
— قبل عده اسابيع—-
ظليت بغرفتي سويت ماسك لوجهي ورتبت حواجبي وكعدت ابرد اظافري صعدت هاجر بعد ما نومت ابنها ورتبت حواجبها بدون منحجي ونزلت
توضيت وصليت المغرب والعشه وطلعت فستاني وفستان زهراء علكتهن اكويهن بالاوتي البخاري لان اعرف بيوم العقد راح ننخبص ومنلحك نكوي
علكتهن بتعلاكه وبباب الكنتور وحضرت ملابسي ودخلت للحمام سبحت مقررة اصلي صلاه الليل صارلي هوايه تاركتها كملت ولبست دشداشه قصيرة ونص ردن احب البسها من انام لبست الچادر وبلشت اصلي
حسيت باب غرفتي انفتح وانسد واندار بي القفل وصوت حركه ورايه كأنو احد شمر روحه على سريري من الخوف والخرعه قطعت صلاتي وانداريت بسرعه
شهكت متراجعه للخلف واني اشوف سيف متمدد على سريري صفح ساند راسه على ايده ومبتسم
جف ريگي وانتفض جسمي برعب صوتي خرج مهزوز والخوف مبين عليه:- انت شعندك هنا شتسوي بغرفتي؟
جالت عينه بغرفتي يجاوبني :- تدرين اول مرة ادخل غرفتج .
حسيت الغضب بدأ يتصاعد عندي :- جاوبني على سؤالي شعندك هنا ترا اهلي مو هنا اذا عرفو تصير سالفه امشي اطلع منا
ابتسم بخبث وبريق غريب مر بعيونه:- هو انه اجيت لان اعرف اهلج مو هنا
لزمت چادر الصلاه بقوة متوجهه للباب افتح بي دون فايده:- جيب المفتاح وافتح الباب وصرت اصيح هاجر وادك بالباب
صار ورايه كلش قريب وهمس يم أذاني:- هاجر جوا يم ابنها مريض ومتسمع خطيه
انداريت ادفعه وابتعد عنه واني اذا انذبح هسه قطرة دم ماينلكه بيه نظراته ونيته واضحه
رجع اقترب مني لزم الچادر وبحركه سريعه رفعه وخلعه مني واني هنا انهاريت صرخت بي وصرت ابچي :- ادبسزز وخر مني وخررر..
لفه على ايده كوره وشمرة صفح وعيونه تنتقل برغبه قذرة على جسمي ايديه ورجليه المكشوفات وشعري وهمس بصوت خدران:- احلى من خيالي غزال اشگر
بعدين ليش الخوف ترا انه رجلج حلالج واحنه مخطوبين والخطوبه هاي احلى مرحله عادي اذا تصير بينا رومانسيات
دموعي صارت تنزل واني اتوجه للكنتور اريد استر الطالع مني اجه ورايه ولزمني من اكتافي دارني عليه :- ياقوت صبرت هواي هواي عليج خلينا تنقرب من بعض اكثر راح تحبيني صدكي .. مد ايده ومررها بشعري المبلل واني جسمي كله كزبر وكش منه دفعته بعنف خلاه يتراجع ليورا كم خطوة وضربته كف :- انت واحد ماعندك اخلاق ولا شرف تدخل عليه بهالطريقه واني وحدي انت واختك الادبسزز متفقين عليه
فرك خده وباوعلي بعيون لاهبه لزمني من صدر دشداشتي رفع ايده بسرعه ووجهلي كفين ورا بعض وتركني انطرحت بالكاع دخت وصفرت اذاني من قوته حسيت نفسي راح افقد وعيي ومكدرت اتحرك بسرعه دنك لمستوايه وما سمعت كل الكلام الي حجاه جان صوته يجيني مثل ذبذبات مشوشه بس اذكر من ضمنها گلي:- باعي لج خاف انتي عبالج مثل المسلسلات تضربيني واسكتلج اكسرج تكسر بت الكلب انه بلگوة لازم نفسي عن سقوطج وانتي تكولين احبه وما ذبحتج خاف عبالچ ناسي.
رفعت راسي وعيوني زايغه لازمه خدي المشتعل وحرارة انسابت من خشمي عرفت خشمي طك دم من ورا ضرباته رخت نظراته من شاف وضعي ودس ايده جوا راسي يرفعه اكثر سألني بغضب:- شبيج تسمعيني؟ ترا هو راشدي شبيج ماعت روحج گبل؟؟
همست بوهن:- بداعت امك اطلع وعوفني .. راد يشيلني واني عبالك كل الحيل صار بيه دفرته وصرت اضرب لا على التعيين بس مهم ميطخني واصرخ بصوت زحفت ليورا ادفر بي وهو يحاول يسكتني
– كافي لج لا تصيرين عايقه ماسويتلج شي ترا ..
كمت وكفت وجسمي يترنح شلت التحفيه الي عالكومدي بصف السرير شمرتها ناحيته بس هو تفادهه ووكعت بالمرايه وتكسرت اقترب مني بغضب لزم ايديه اثنينهم حطن ورا جسمي ويحجي بفحيح:- شكد يبين عليج بريئه بس انتي اكبر بربوك .. صرت اتلاوة ويا حتى يعوفني رفعت رجلي وضربته بركبتي بين رجليه هدني ونزل جسمه ليكدام بألم وهو يسب بيه :- يا بنت الكلب يا ساقطه.. رحت ناحيه الباب واني اركع بي اغلط على هاجر وعليه جرني من شعري من ورا وحط راسه بركبتي :- اذا ما اكسر عينح .. باسني من رقبتي واني تهسترت شمرت روحي للكاع وشلت قطعه من المرايه وازحف ليورا موجهتها ناحيته :- لا تقترب مني والله اذبحك .
ضحك وميل راسه صفح يباوع لايدي :- بهاي تموتيني ياقوت بويه كمت ارجف
شفته مو خايف ولا رفله جفن ضغطت عالكزازه حيل وحسيت بيها تدخل بيدي ورجعت وجهتها وحطيتها على رقبتي. ضغطتها خفيف واني اشوف ملامحه شلون بهتت وتحولت لخوف:- ذبيها من ايدج بلا خبال ..
صرخت بهستيريه :- ماذبها اذبح روحي وابليك . لك كافي ولا مرة اشفقت عليه تهديدات وابتزاز واجبار عيشتني برعب صارلك سنه كرهتني نفسي اموت واخلص منك احسن اي احسن
اشرلي بيده اهدأ:- باعي حبيبي والله جنت اريد بس اكون وياج نقضي وقت سوة بلكي يذوب الجليد البيني وبينج ذبييي ياقوت ذبيها من ايدج
ذيج اللحظه عقلي تبنج لو اخلص منه لو اموت نفسي :- لا تقترب والله اموت روحي دفعت الكزازة برقبتي اكثر وحسيت بالجرح يحرگني .
تراجع للخلف مذعور :- ما اقترب والله شتردين اسويلج بس اتركي ولا تتخبلين .
تمتمتت بصوت راجف:- تطلكني وتعوفني بحالي؟ تعوفني بحالي وبحياتي ماشوف وجهك اكرهك. اكثر شي كرهته بحياتي انت اذا متطلكني اموت نفسي قبل لا اتزوجك واخليك تلمسني سيف احرك روحي اهون من لمساتك
ردد يقنعني بصوت توسل:- اطلكج والله اطلكج خرب بيج ذبيها.
احس بدمي دافي ينساب من ايدي بس ما باوعت لان اعرف تموع روحي ويستغلها فرصه صرت اعيط بصوت اول مرة اعيط هيج:- طلكني يلا
ضرب كصته حيل:- ولج والله اطلكج بس هسه مايفيد باطل . لازم شهود وكدام اهلج..
فجأة سمعت الباب يتركع وصوت كرار حسيت اجاني الفرج .
دكيت كذا مرة على ياقوت مجاوبتني باوعت ساعه عشره اكيد ما نامت دكيت على هاجر هم مجاوبت شسالفه رحت لكرار لكيته واكف بالمطبخ وعمه ام حر تحطله لفات بعلاكه
كرار:- انه اكلت التكه وگلت بويه شلون تكي ما ياكل منها وهي تحبها
ام حر :- تدلل حبيبي فدوات الحنين ..
خزرت حر الواكف بباب المطبخ يدخن وحاجيت كرار:- اكلك تاخذني وياك اشو ادك عليها وعلى هاجر اثنينهن ما يجاوبن
طلع تليفونه من جيبه ودك عليها عكد حواجبه:- شبيها ماترد؟؟
حجه حر من يمه واول مرة يحجي شي بي خير:- امشي اوديكم بسيارتي بما ان انتو كلكم جايين بسياره محمد..
كلت لامي وصعدنه كم فرع عن بيتنا نزلنه بباب البيت باوعت لغرفه ياقوت ضواهه معلوك يعني كاعده … طبينا المطبخ وهاجر نزت وجهها صار ابيض وبنفس اللحظه سمعت صرخه ياقوت .. صارت تركض قبلي ناحيه الدرج وكرار شمر علاكه اللفات وطار ناحيه الدرج وحر ورا
صعدنه فوك ونسمع صوت سيف شهكت فاتحه عيوني ناحيه هاجر وهمست:- يا كلبه…
اقترب كرار من الباب ماينفتح صار يركع بي :- لك سيف اليوم اموتك
افتح الباب گو..د
لزمت هاجر من زندها احاجيها من بين سنوني:- دسترتيها ويه اخوج حتى تگو..ن اله انه الج والله اذا مسويلها شي اكلج بسنوني..
سحبت روحها مني ونزلت تركض
جر حر كرار عن الباب هو اضخم من كرار وجثيث نسمع صوت ياقوت تبچي بهستيريه تصيح بي يفتح الباب . ظل يدفر الباب اكثر من مرة لحد ما كسره …
راد يطب بس تراجع ليورا داير وجهه وكرار هجم على سيف وتلازمو ..
سحبه خارج الغرفه يدفع ىيضرب ويسب بي وكعه بالكاع صارو يتمالخون:- لك انت تسوي هيج تخبلت انت تخبلت اليوم اشرب من دمك
عفتهم بهوستهم وطبيت للغرفه ركض منظر ياقوت يخوف ترعش بطريقه مخيفه وعيونها مفتوحه حيل شعرها منثور صفحه خدها زركه وخشمها دم ولازمه بيدها قطعه كزاز جبيرة رقبتها وايدها وملابسها دم ودشداشتهه مرفوعه لحد فخذها لزمتها افتح ايدها عن الكزازه لازكه بيدها من الدم صرت ابچي على حالها ماعرف شمسوي بيها
صرخت بألم واني اجر الكزازة من ايدها والدم صار يندفع اكثر بطن ايدها متملخ باوعتلي وصارت تبجي بصوت عالي :- زهرااااء. زهراااااء
وتحجي كلام ما مفهوم
باوعت لنفسها والدم شهكت وعيونها انگلبت ليفوك ووكعت بحضني. صرت اصرخ الحكوني . الحكوني اسمع كرار متهستر ويشتم بسيف
وحر يجر بي ويصيح:- خابرت محمد جايين بس طب لاختك شوفها …
دخل كرار حالته حاله وقميصه مشكوك جر اللحاف من السرير ذبه فوك ياقوت وكعد اخذها مني حط ايده على رقبتها يشوف نبضها وفتح كف ايدها ودموعه صارت تجري همس يبوس راسهه:- هسه هسه جايين وناخذج لتخافين حبيبتي نعلت والديه ..
اني من منظرها كمت الطم على وجهي واصيح ماتت ماتت موتها
صاح بيه كرار:- كومي جيبي خاولي قطعه قماش اي شي لايدها ما ماتت كومي
كلبي احسه يدك بزردومي ورجليه مجاي تعييني طلعت من الغرفه اركض من خبصتي مافكرت اجر شي من كنتورها وانطي ماعرف وين اروح طلعت شفت حر ينفث سيف الفاقد ووجهه مدمي من ايده وباوعلي
اول مرة اشوف هيج منظر مخيف وكفت بنص الصاله الفوك تصنمت اجه وكف كدامي يباوعلي بقلق:- شبيج زهورة .. زهراء…
ترنحت وحسيت نفسي ماعت روحي واني اباوع لدم ياقوت الي ملوث ايدي بس لزمني وكعدني بالكاع ضربني بخفه على وجهي:- ولج زهراء مو وكتها مو وكتها خرب بيج الجبانه …
همست:- مابيه شي ما بيه شي بس ياقوت تنزف تنزف ايدها
طب لغرفه ياقوت يباوع يمنه يسرة اخذ خاولي وانطاه لكرارة الي ضغطه بيدها حيل سمعت صوت وهوسه جوا عرفت اجو اهلي اشوف امي صعدت تركض والعبايه وكعت من راسهه عالدرج وراهه ابوي كمت عالسريع
شهكت من شافت سيف:-ولج شكو . شكو وين اختج
– بالغرفه ماما بالغرفه .. الولد وبابا كلهم صعدو طبو للغرفه امي شافت ياقوت صرخت ولطمت على وجهها:- يمه بنتي. بنتي . ميته كرار ميته ؟
بابا شافهه وكع من طوله ومصطفى حار بي
صرخ بيه محمد :- جيبي صايه لاختج خل ناخذها كوم كرار كومو ..
جانت دقايق مرعبه كلها تتصايح مايعرفون يحيرون ببابا لو ياقوت الي تشبه الموتى لبسناهه شلون ما جان شالهه محمد من كرار الي رجليه ما تعينه من خوفه عليها ونزل ركض وحر ومجتبى سندو بابا حيدر ومصطفى راحو لسيف سحلو لغرفه حيدر وقفلو عليه الباب
وبيومها كضيناهه بالمستشفى بين بابا وياقوت انطوها ابر كزاز حتى لا تتسمم من الجروح وخيطوا جروح ايدها وعقمو الي برقبتها مجان يحتاج خياط و بابا ضغطه معلك بينه وبين الجلطه شعره
الكل مصدوم حتى حجي محد حجه الصبح طلعنا ياقوت الي صافنه وفجاة تكوم تصرخ وبابا عيونه دم من ضغطه ..
للعصر اتجمعو عمامي نزلو سيف وخلو يطلك ياقوت ومحمد لزم هاجر ملخها تملخ اخذت جهالها وراحت ويه سيف….
بيومها حيدر راد يخابر على اهل ليالي ويأجل بس ياقوت توسلت بي يروحون لان اخوانها يدورون حجه حتى يبطلون واحنه مصدكنه قبلوا
رجعت بذاكرتي واني اباوع لوجه هاجر همستلها:- منج لمحمد لو تموتين ما ادافع عنج عساج بالضيم عالسويتو بيه انتي واخوج العار اذا احجي سوالفج هنا يذبحج ياقوت القديمه ماتت انتو موتوها …عفتها وصعدت لغرفتي دموعي صارت تتسابق واني اتذكر شلون يتلمس بيه وجسمي كش وظليت اتحسب عليه
بيوم الحنة كعدنه متحمسين اسمع كرار يدك على باب غرفه حيدر ويغني :- جان صاحبها وخذاها وجان صاحبهه وخذاها
حلكي احسه انشك هلكد ما مشرعته مبتسمه
سوينه ريوك للكل وللخطار جان عندي نشاط فضيع حضرنه جنطنه نروح لصالون ويه ليالي وصلنه كرار واخذو سيارتي يحتاجوها يكضون مشاوير
ليالي طلعت تجنن لابسه بدله نازكه لونها ماروني واحنه البنات كلنه فساتين احمر حسب طلبها
فستاني طويل وعالجسم بدون ردن شعري عفته مفتوح بس برمت اطرافه مكياج اكتفيت بلاينر رفيع ومجرور وحمرة لونها احمر طلعت غير شكل ظلينه ناخذ صور علما يكملن نورهان وغفران
اجه حيدر اخذنه والطريق كله نصفك ونغني وزهراء تحلفني ياقوت هلهلوله لان اني اعرف اهلهل وهي ماتعرف
نزلنه ببيت العروس هواي نسوان وكدام الباب لخه وحيدر يوصي غطن وجوهجن لا ترفعن روسجن
غشيت وجهي بشالي وطبيت اركض لكيت امي وكرايبنه موجودين والملايه بدت تقرة البنات ذبن لحم واني وزهراء بس شويه نتمايل علويه نهله تخوزر بينه دخل حيدر حناهه وطلع مستحي من كميه النسوان ولان حنه الولد ببيتنا وامي كامت وكرايبنه كلهن كامن وياهه
زهراء ظلت تتوسل ماما خلينه تالي حيدر كال خليهن يتونسن يدزلنه كرار ياخذنه من تخلص حنه ليالي. هي طلعت ماما واني وزهراء انطلقنه الردح صار بفلس الملايه علكتها وتقره للساده واهل البيت
السيد وابن السيد شكو گلبي ونامو بي .. بعدين صاحت خوات العريس واخوات العروس
راحت زهراء جابت خمسه وعشرين رافعتها بالهوا وتركص اجت شاورتني: – اليوم احرك گلب ناس واخليهم الليل ما ينامو
عكدت حواجبي :- يا ناس؟
باوعتلي وابتسمت بخبث وراحت للملايه تشاورهه .. كامت تقرة الملايه
يلا ردن وراي هاي لاخت العريس . وين اخت العريس وينج علويه ياقوت هاي الج
فتحت عيني مصدومه واحس وجهي صار نار من الخجل انوب كلها كامت تباوعلي حسيت روحي اريد اختفي
والملايه تردد
يمحلاها ويمحلاها ياقوته هاي الليله محلاها علويه هاي الليله يمحلاها
ويمحلاها ويمحلاها بالاحمر هاي الليله يمحلاها وياقوته يا محلاها
وسوي درب لاخت الولد خلوها تلعب جوله ياقوته تلعب جوله
ووحدة وحدة وحدة ياقوته احلى وحده
ظلت تردد بيهن والبنات يركصني بعدين البنات صارلهن واهس كلهن ينطنها فلوس حتى تهوس الهن
غصت بهدومي اخزر بزهراء الواكفه يم الملايه تركص وتهزلي رگبتها استخفت فدنوب من راحت ماما . وليالي جرتني تركصني وياهه .. اندمجت وياهه حبيبتي عيونها تلمع وفرحانه مكعدت بس تركص
الفرحه چانت صافيه عالاقل من الناس الي اعرفهم فعلا فرحانين
ويمكن اني أكثرهم لمعرفتي شكد ليالي وحيدر يحبون بعض واعرف شكد تأذت وتحملت علمود اخوي شكرت فارس هواي بگلبي لانه سبب جمعتهم وزواجهم عرفت شكد سعى حتى يوافقون اخوانها حجتلي ليالي بوقت سابق مانكر گلبي حس بشي مميز وكانوا الي جمعهم هو شخص عايد الي عايد لگلبي الميعرف يكرهه ولا ينساه ولا يحب غيره
خلصت الحفله قبل اذان المغرب تعبنا من الركص ولو لو مستمرة چان استمرينه بينا طاقه عجيبه دكيت على ماما وكالت راح يجوكم واحد من الولد وفعلا بعد نص ساعه اتصل عليه حر ابتسمت عرفت طريق الرجعه راح يصير اكشن
اجيت اريد افتح باب المطبخ مقفول رحت لباب الصاله هم مقفول صحت غفران:- غفران شنو الابواب كلها مقفله .
ضحكت نورهان بتوتر وجاوبت قبل غفران:- ههههه مو شسمه الجهال ظلو طابين طالعين وفارس قفل علينه من برا..
رفعت حواجبي بأنزعاج:- ترا اهلي برا شنو نريد نطلع شهالتصرفاات
طلعت تليفونها ودزت رسايل وهي تحجي:-هسه يجون يفتحون الباب اعصابج مصار شي. بس ما حبو احد من الولد يفوت وكل البنات ماخذات راحتهن باللبس..
طلعت زهراء من الحمام تنكت ايدها من المي وكعدت بصفي تشاورني:- ها منو يجينه
استنكرت بتذمر:- اهوووو
– اكلج اسكتي الولد كلهم ملتهين يجيب بنين ويا لتخافين مراح ياكلج بس لزمي لسانج..ومسحي حمرتج قبل لا نطلع مابينه تجينا حجايه
دك حر كال طلعن راح اوصل لباب .
كمنه اني وياهه والباب بعده مقفول انداريت للبنات بانزعاج:- شنو رهائن فتحو الباب عاد الرجال برا ينتظرنه
بعدني احجي واسمع الباب ينفتح وخرخشه مفاتيح .. انداريت متعصبه وهو گالب وجهه مدري شبي
فتحه وتراجع ليورا شوي طلعت من يمه مورثه اعصابي سمعته يكول من ورا خشمه:- اعصابج ام الاحمر ..
رديته بصوت واضح:- معليك
وطلعنه اني وزهراء صعدنه ويه حر..
زهراء تباوعلي صفح متفاجئه من جرأتي درت وجهي وغلست عنها
اني نفسي ماعرف شلون صايره هيج..
بيوم العرس ما شفته ولگيت روحي ادورة بين الناس بعدين صفنت شكو ادوره شعندي ويا واصلا عرس بنت خاله مستحيل يجي . ظلينه نستقبل النسوان ونسلم هاجر كاعدة منزويه واصلا بلكوة قبل محمد تحضر العرس والحنه ما حضرتها علاقتهم شبه معدودمه واذا كعدو بنفس المكان يظلون يتجادلون
رغم العرس مو مختلط بس لبست حجاب فستاني لونه حبري طويل بي حزام رفيع وحجابي بيجي كلش فاتح وزهراء لبست نفس فستاني بس على اخضر فاتح ونفس الحجاب ماعرف ليش نحب نطقم سوا
شفت نورهان تدخل من باب القاعه وشكلها مزعوجه وراحت كعدت يم امها
مرت اجواء العرس خفيفه ولطيفه وفرحه العرسان جانت طاغيه ومزيده الاجواء استمتعنه حيل رغم امي جانت منزعجه لان بيت خالي محضرو زعلو لان من المفترض منتهى هي العروس بس حيدر فاجئهم برغبه قلبه
انتهى العرس على خير وانزفو العرسان للفندق واحنه رجعنا للبيت صعدت ميته تعب رجليه متكسرة من الكعب كبل بوجهي للحمام سبحت وطلعت البيت يصوصي الكل تعبانين وبغرفهم بيومها نمت نومه عميقه ماحسيت للصبح للضحى اجو العرسان ذبح مصطفى خروف ويه دخلتهم الباب هلهلت الهم من الصاله الوسطانيه وزهراء فشختهم بالجگليت
ماما ماسوت فعاليه ضايجه على زعل خالو باركتلهم والتهت بالغده
طلعت هاجر من الغرفه وباركت لليالي وعوجت حلكها وهي تبوسها
شاورتني زهراء:- هاجر مو هاجر اذا ماتطلع سمها بأي طريقه استلمي توهه تعرفت على ليالي وتسوي حركات ماصخه بوجهها
ثاني يوم سافرو العرسان اسبوعين عسل لتركيا …. اني رجعت اداوم العصر بمكتب محمد وانطاني الخيار اداوم باليوم الي يعجبني حتى دراستي ما تتأثر وهيج خلصت عطله نص السنه حيدر وليالي بعد اربع ايام يرجعون .ما انكر اشتياقي لشوفته گلبي اشتاقله وبنفس الوقت احس مجروحه منه ماعرف شنو اريد بس الاعرفه احنه مو لبعض والحب مو كافي لاستمرار اي علاقه اثنينه غلطنه بحق بعض ومراح ننسى
الدنيا جانت بارده لبست كيلوت كلش عريض وبلوز وترانشكوت بيجي طويل وشديت الحزام طالع جان عندي بريك وحسيت نفسي مهبطه وجوعانه دكيت على زهراء رفضتني ودزتلي رساله عدها محاظره طلعت الكافيتيريا مالكيت مكان ازدحام بس وجبه من شعبتي كاعدين وصاحوني رحت كعدت يمهم وجبت نسكافيه وبسكت وكعدت وياهم صارت سوالف عامه عالمحاظرات والمواد
نبأ:- لج ياقوت راح اتخبل من ورا العقوبات يدوخ..
زيد:- لا تحجين هيج كدام السجاجه تضوج
ضحكت واني اشرب من كوبي:- عزا اني سچاچه الله يسمع منك
زيد:- تطردين عيون بالفصل الاول تصيحين صعبه وتالي مطلعه جيد جدا
ماهر:- عمي اخوها محامي يقريها زلاطه عنده
ياقوت بأستنكار:- لا والله محمد اصلا ماعنده مجال يقريني مشغول بين الدوام والمكتب
زيد :- مو اگللكم تطرد عيون.
نبأ:- شبيكم عالبنيه حطيتو عينكم عليها هسه تتوب ما تكعد يمنه
قهقهت بخفه :- توبه من هالنوبه . ماعرف شلون انداريت صفح ولمحته كاعد هو ونورهان هي تسولف وهو يخوزر بيه اتلاشت ضحكتي وتوترت درت وجهي ارجع اسولف وياهم . دقيقه واجتني نورهان تأشرلي فاتحه عيونها وهي منا عيونها كبار وترتني:- مرحبا با جماعه شلونج ياقوت
– هلاو نورهان..
– عن اذنكم ياجماعه بس محتاجه ياقوت بموضوع وتأشرلي بعيونها حتى اكوم بدون نقاش.. بلعت ريكي وكمت مستأذنه منهم امشي بصفها همستلها:- شكو.
جاوبتني بترجي:- بشرفج ياقوت بس كعدي يمنه وسولفي ويا يريد يحاجيج ترا غادي نار صارلج ساعه تضحكين وهو كاعد خليها تمر على خير.
وكفت وصرت بمواجهتها:- خير يمه هو شكو نورهان كولي لاخوج يعوفني بحالي ترا مصخها.
لزمت ايدي ترصها:- كعدي ويا وانتي كليله ما يسمع مني.
زفرت بأستسلام ورحت وياهه جريت الكرسي اكعد وهو يحجي من بين سنونه:- فتحي الحزام فتحي صارلج فترة تموتين عالاحزمه عود شوفوني خصري صغيرون..وشكد ضحكتي ويه ذوله
باوعت لهدومي وباوعتله وكعدت :-معليك..
-بيج مرض اسمه معليك الا اتوبج منه.
– خفت كمت ارجف..
فك عيونه وباوع لنورهان المصدومه مثله ورجع باوعلي:- لج انتي شكد صايره صلفه شغيرج جنتي تستحين من خيالج؟
– وشفادني طيحتو حظي .
ضيق عيونه عليه:- منو احنه بله الطيحنه حظج.
سكتت عاضه شفتي عينه نزلت بوقاحه ويه حركتي ىباوع لنورهان :- عوفينا شويه حبيبتي..
– اذا نورهان كامت اني هم اروح احجي الي تريده كدامهه اصلا
ماكو بينا شي يحتاج نحجي بي…
– اشو تروح واذا تحركتي من مكانج تشوفين وجه ثاني تعرفيني مخبل وكلشي اسوي
اعترف خفت وتخيلت يسوي بيه مثلما سوة العام وماردت اغامر ظليت كاعده كامت نورهان وتركتنا وحدنه
عيني بحضني ما باوعت ناحيته وهو ساكت..
سألني بصوت هامس:- ليمتى؟
باوعتله وجاوبت سوأله بسوأل:- شنو؟
جر حسره طويله وابتسم بحزن:- ليمتى اظل احبج وانتي تصدين؟ ليمتى ؟ رحتي وشهور انه اقنع روحي راحت طيرة وطارت من ايدي وبيوم وليله اشوفج كدامي حرة طليقه وشب بيه الامل من جديد بعد ماجنت فاكده ورجعت لذاك اليوم الدك گلبي بي الج.اسألج بالله تجاوبيني بصدق على سؤال واحد وراهه جوابج هو الي يحدد مصيرنه
– احلفج بجدج رسول الله تحبيني مثلما كل ذرة بيه تحبج؟
انحشرت غصه بزردومي مثل الحجارة والدموع الي تجمعت بعيني خنكتني حطيت عيني بعينه بس ماجاوبت
ابتسم ابتسامه فكت باب كلبي وهمس:- هاهيه عرفت جوابج بدون كلام..
غمضت مانعه دموعي تنزل وفتحت ابتسمت بأسى همستله:- غلطان مو الجواب الي ببالك نسيت اني شنو .. عيوني جذابه وتمثل وكلشي بيه غدار…
تلاشت ابتسامته وحل محلها ملامح الاعتذار:- بس اليوم كلشي بيج يجذب عدا عيونك الحلوات يا ضوة …..
