اريج…أثناء العركه ادفعهم ويدفعوني وانهزم منهم ويلحكوني
الحد ما طلعنا من الغرفه للهول لذالك طلع صوت عياطي للشارع
بعد مااجا خالي وشافني هذا الموقف
وابو ضياء بلباب يسمع الحجي والهوسه
عافوني دخلت الغرفتي جسمي كله يرجف
فحطانه وتعبانه هلكد مادافعت عن نفسي
اباوع بلمرايه خشمي كله دم وحلكي مورم لان ضربني عمار على حلكي
البدي الي لابسته انشك من جتفي رفعت البدي بطني
بيها جرح مثل الشخط بس يوجعني
جسمي ارزك وجهي موروم من كل جهه
شعري وكعت منه خصل هلكد ما سحبتني زوجت خالي من شعري
بدلت ملابسي وكعدت على جربايه بيبي اعاتبها و ابجي
اريج…شفتي بيبي شفتي شصار بيه من بعد عينج
شفتي شلون اتكاثرو عليه كلهم
اسمعهم برا يحجون عليه
زوجت خالي…. انت منك السبب انت انطيتها مجال
وحده مامربايه شكو تكبر راسها وتأخذ رائيها بلزواج
تقبل غصبا ماعليها
خالي…اني مااريد مشاكل بعد أربعين امي ماطلعت
اصبري اني اقنعها هي ماعدها مكان تروح علي
لازم تقبل
زوجت خالي.. شوف هسه بهاي اللحظه تدخل عليها لو تقبل تزوج عمار هسه حالا تروح اجيب شيخ
وتعقد الهم بدون مهر بدون كلشي
لو تطلع من البيت اني مااريدها بيتي خليها تروح تعيش وياا امها
امها ازوجت عايشه مرتاحه واني متحمله مسؤليتها
عمار…يمه شوفي عيني اتاذيني هاي الحيوانه خلت اصبعها بعيني
زوجت خالي…الله يفكس عينها انشاء الله دايحه ماعليها عتب
جمانه السعيدي
اريج…دخل خالي عليه لكاني كاعده ابجي
اي ابجي على حظي الاغبر شلون بيه ووين اروح
خالي…هااا تبجين مو حجيت وياج من البدايه
شبي عمار ليش ماتاخذينه ولج غبيه الي تعرفي احسن من الي ما تعرفي شفتي بس طلعت شويه
رادو ياكلونج هو وامه اتكفي الشر واقبلي
واذا ماعجبج طبعه اكيد راح يتغير بس يزوج ويصير عنده اطفال راح يحس بلمسؤليه ويتغير
اريج…عمره ٢٩ سنه وماتغير لا شغل ولا دراسه
ولا شخصيه هسه يتغير وين لكيت هذا الحجي
خالي….مادام انتي هيج تحجبن خلاص عندج خيار من ثنيين لو تزوجين عمار لو اطلعين من هذا البيت
اريج…اعيش بلشارع ولاازوج عمار
كمت من مكاني طلعت جنطنتي لميت ملابسي
وأخذت كل مستمسكاتي وطلعت من بيتهم
خالي….بعد لا ترجعين هنا فهمتي لو لا ممنوع اشوف
وجهج لاترجعين عليه
اني هيج بنيه بلا اخلاق مااتقبلها بيتي
اريج…زوجته طلعت وراي للشارع اتصيح
اي همزين خلصنا منج هم ونزاح روحه بلا رده
عساج لا فرحتي ولا تهنيتي
اريج…اجرت تكسي ورحت الامي
دكيت الباب فتحلي اخوي الزغير بس شافني
انصدم بعدين خاف من شكلي
ركض الامي ركض تعاي شوفي اريج
جمانه السعيدي
اريج دخلت بلبيت وطبكت الباب
طلعت امي شافتني لطمت على وجها
امي…يااا هاي شنوو شبيج
اريج…ماكدرت اتحمل كمت ابجي شمرت الجنطه وحظنت امي
امي…شبيج احجي
اريج……مااكدر ارد عليها ابجي بصوت مجاي اكدر اتخطى الي صار وياي
دخلتني امي جوه بغرفتها
امي…شبيج هذا وجهج ليش مورم
اريج…كتلوني عمار وامه
امي…ليش ليش كتلوج
اريج…يردوني ازوج عمار
امي….يااا كتلوج حتى تزوجين عمار
اريج…لان رفضت استغلو خالي طلع وكتلوني
اتخيلي زوجت خالي تكول العمار اعتدى عليها اكسرها حتى تقبل تاخذك
امي…يايمه عود صدك وصلت الهاي الشغله
رفعت التليفون امي اتصلت على خالي تعاتبه
امي…ليش خويه هيج ليش هيج سويت بلبنيه
خالي…بنتج مامربايه تغلط علينا
احنا ما تعدينا عليها بلعكس ردنا ناخذها العمار
بس هي متعافيه علينا
امي…انت شايف شكلها ووجها كله مورم الله واكبر عليكم
ما تخافون من الله
خالي…عليمن شمسوين بتج محتاجه احد يربيها
طالعه من الطريق
قفلت التليفون امي وهي منزعجه حيل
ضاجت عليه حيل لان شكلي يخوف
اريج…اني اريد اروح اشتكي عليهم هسه الشرطه بس يشوفون شكلي يلزموهم
ثنيبنهم يدخلون السجن عمار وامه
امي…لا يمه زحمه نشتكي عليهم اني ماعندي بس هذا االاخ
تاليتي اشتكي علي
توها امي ماتت الناس شتكول علينا امهم ماتت منا وهي اشتكت على اخوها منا عيب
خالج زين بس زوجته خبيثه
اريج…يعني راح اتسكتين على هذا وضعي
امي…شبيدي الله يجازيهم ذوله ما يخافون من الله
اريج..ابقي انتي اني اروح اشتكي عليهم
امي…اسكتي بس يسمع ابو علي ( تقصد زوجها )
يطلكني من الصبح
بتج تدخل للمركز وتشتكي على خالها
اريج…واني شعليه بزوجج اني اريد اخذ حقي منهم
امي…يمه فدوه اسكتي الخاطري
اريج…يمه شلون اسكت
امي…هسه هذا شلون اقنعه تكعدين يمنا هنا
اريج…يمه اني بنتج وماعندي مكان اروح علي
امي…خاف يصير عصبي ويطردنا ثنيبنه اني وياج
راح اكول تبقى كم يوم وتروح عدها خلاف ويا خالها
انت اسكتي لا تحجين
جمانه السعيدي
اريج…يمه اني هلكد عندج رخيصه تخافين من زوجج
وماتخافين عليه اني قبل ساعه وحده
جان ضعت جان عمار دمر حياتي يمه ليش هيج اسوين بيه
امي…شلون اخرب بيتي علمودج
اريج…اتمسكي بيه شويه كوليله لو اني وبنتي لو اعوفلك البيت
امي.. حتى يفتح الباب ويكول الله وياج حتى ابني ياخذه مني يمه مو هيج تنحل الامور
احنا هاي الغرفه انام اني وياا ببها
وعدنا غرفتين فوك للولد ولده ماخذين كل واحد غرفه
انتي وين تكعدين وين تنامين
يعني بالعقل هيج هذا البيت مابي مكان اللج
اريج…عود صدك تحجين تردين اطرديني ووين اروح
امي…انتي ليش ما تقبلين بعمار اذا هسه موزين بس يزوج يتغير وابن خالج والي تعرفي احسن من الي ماتعرفي
اريج…صحت بصوت عالي وينج بيبي تعاي شوفي مصيبتي الي ما تتسولف
تعاي شوفي امي شتريد تسوي بيه
امي…اس اس لا تعلين صوتج انتي مشكلتك مالها حل غير
تقبلين بعمار وترجعين البيت خالج
قابل تبقين عايشه بلشارع
جمانه السعيدي
اريج…يمه تصدكين بيت خالي مليون مره ارحم منج
يمه ليش هيج تعامليني
ليش تفضلين راحتج عليه اني جاي اضيع محتاجه مساعدتج
امي….يمه اذا وكفت وياج ثنيينه راح نضيع اذا طردني ابو علي ووين نروح اني وياج
ثنيبنه نسوان ومابيدنا شغل ولا عدنا فلوس
انضيع ثنيينه فكري بااخوج هذا بعده زغير شلون يعيش بدوني
ماكو حل غير ترجعين البيت خالج وتقبلين بعمار
روحي اعتذري من خالج أقبلي بعمار
ترا الحياة مو سهله مثل ماانتي تتوقعين هي الحياة هيج ضيم وضلايم
اريج….هذا اخر كلام عندج
راسا قطع كلامنا دخلو زوجها للغرفه
طفرت امي عبالك لازم عليها لزمه
امي…هله هله
باوع عليه نضره غريبه حقه شاف الخارطه الي بوجهي
ملامحي ضايعه
ابو علي…شبيها بتج ليش هيج شكلها
امي..مابيها شي واكعه بيت خالها اجتني حتى اخذها اضمد جروحها
ابو علي…خوما جايه وجايبه وياها مشكله
اذا اكو مشكله احجي من هسه لان اني ما ناقصني مشاكل
امي…الله يستر من المشاكل من رخصتك تبقى عدنا الليله وتروح
ابو علي.. اي ميخالف
امي.. تعاي يمه اضمد جروحج
اريج…جروحي كبرت وبعد ما تضمد بعد الشي الي صار وياي
اليوم
طلعت من الغرفه وامي اجت وراي
دخلتني بلاستقبال وكالت لا اطلعين ابد ولا تخلين ابو علي يشوفج
قفلت الباب عليه وطلعت
اريج…كعدت بلكاع ياربي انت جاي تشوفو حالي
اني ما غلطت ولا اتعديت على احد الناس هي الي جاي تتعدى عليه
تقبل امي تريد تشمرني بلنار بيدها
انت اليوم نقذتني من اكبر مصيبه جان دمرت حياتي
وامي امي الي طالعه من بطنها تريد ترجعني للنار مره ثانيه
تمددت بلكاع كلشي يوجعني جسمي كله يوجعني من الضرب
بس اكثر شي يوجعني كلبي
من كلام امي معقوله امي ما تحبني
لان ماكو ام تحب بتها تتصرف هيج وياها
غابت عني امي اكثر من ساعه الاذان اذن واسمعها تطبخ وتحظر وتراضي زوجها وأولاده
واني بعدني بمكاني والباب مسدوده عليه
تخاف تقصر وياا زوجها ويلومها لو يحجي عليها
بس اني عادي تقصر وياي
دخلت جابتلي عشى وماي خلته بصفي وطلعت بسرعه
كعدت على حيلي
اباوع اني موجوعه ولااريد اكل اني اريد احد يفهمني ويقدرني يدافع عني
ليش لانسان ما يختار اهله ليش يطلع للدنيا يلكه
نفسه وسط ناس مجبور يتحملهم
تحت مسمى الاهل ليش اني طلعت للدنيا وياا اب
مايحس بلمسؤليه
وأم انانيه تخاف على نفسها اكثر من بتها
وخال استغلالي وعم جاحد حتى مايسئل
ليش من دون ذوله كلهم الانسانه الحنينه عليه تموت
بيبي تموت وخالي هو وابنه العار يبقون
هسه اني وين اروح احتمال باجر يطرودني من هذا البيت
صدك لو كال حسام الرسام
لا احباب عندي ولا كرايب تعادل ضحكتج يم شعر شايب
وينج بيبي اطلعي وشوفي حالي من بعدج
حتى امي ماتريدني الله كريم
شربت ماي دفعت الصينيه تمددت وخليت ايدي على عيوني حتى عيوني يوجعني
هلكد ماتعبانه وجسمي مورم ماكدرت انام
شويه ورجعت عليه امي جايبه حبايه مسكن
وضماد
امي…ليش مااكلتي
اريج …مااشتهي اخذت حباية المسكن
وامي ضمدت جروحي وجابتلي فراش طفيت الضوه
وغمضت عيوني
امي…يمه لا اطلعين برا الولد بلبيت تقصد ولد زوجها
واحد عمره عشرين سنه وواحد ١٨ سنه
اريج…مارديت عليها كلي الي شفته بحياتي قبل شي
وتصرفات امي وياي اليوم شي ثاني
أخطر واعمق جرح الجرح الي يجيك من اقرب الناس
لان الصدمه تكون اكبر
بقيت شكد اتكلب المخده تبللت بلدموع
كلبت المخده على الجهه الثانيه ونمت
كعدت الصبح على صوتهم يتريكون
تعرفون اني هاي ثاني مره ادخل بيت امي من ازوجت لليوم
اول مره اجيت اني وبيبي بعد زواج امي
وهاي ثاني مره ادخل بيتها
ويمكن راح تكون الاخيره
بقيت بفراشي لمن طلعو كلهم للدوام وبقت بس امي طلعت اغسل ورجعت المكاني
امي شافتني اجت وراي
امي…شلونج اليوم
اريج…شلوني حالي مايسر لا عدو ولا حبيب
احتاج اروح للمستشفى اريد علاج
امي…لا مااروح مستشفى راح يسئلو ن هذا شنووو
ومنو سوو بيج هيج
اخذج العصر للصيدليه واجيبللج علاج
العصر اخذتني امي للصيدليه شافني الصيدلاني وانطاني علاج على معرفته ورجعت وياها للبيت
بس دخلت للبيت كالت بعد لا اطلعين لان ابو علي والولد راح يجون عبالك اني مجرمه حابسيني بلغرفه
نفس الشي بليل جابتلي اكل اكلت شويه وأخذت علاج ونمت
اليوم الثاني من طلعو امي جابتلي ريوك واجت
امي…اني لكيت الحل
اريج…شنو الحل سمعيني
امي….. ترحين يم عمج اكيد مراح يطردج بلشارع
اريج.. عمي صار ثمن سنوات ماشايفته ولا شايفني ولا سئل عني
ولا يذكرني شلون اروح اكله اريد اعيش وباك بيت نساباك
يمه كولي شي معقول
انتظرونا الحماس والتشويق قادم
