رواية حسناء قلبي الفصل الثالث عشر 13 بقلم جوهرة
ــــــــــــــــــــــــ
ام وضاح /
الطريق كله تحجي بعصبيه وأحمد ساكت يسمعلها مو قصده يضم عليها مجاي على باله هذا الشي وشنو يعني واذا عدها هالولد هذا هي مربيتو تعتبره ابنها ،، مستغرب رفض امه !!!!!!
احمد / يبعد گليبي ليش هيج تسوين ناديه وشفتيها شلونها واكيد عجبتج شبيها بعد من قصور.
ام وضاح / ما جنت رايدتلك اتزوج وحده عدها ظنا كون هاي مطلكه لو ارمله وعدها هالصبي
ضحك بصوت / ههههههه قصدج ههههه فدوة لعمرج ييمه شلون رهمتيها .
ام وضاح / اي انت تتضحج وانه گلبي واجه بي نار البنية الله يسترها حلوة ماكلنا شي ييمه بس انت شناقصك وتاخذ هيج اخذه هاي بنيات عمك سبع شلونهن لو بس فاتح حلكك يكبعها ويجيبها الك صارلهن يومين خلقهن مكلبه هن وامهن ليش ما ياخذ من عدنا مرة ،،، يروح للغربة ،، كرعت راسي امهن متشوفها ماجت ويانه خل يتشمتن بيج ينوفه
جر ايدها وباسها وهو كوة كاتم الضحكة هاي الحجية وين شمرت يا الله / افااا افااا ما عاش اليتشمت بنوف گلبي
بقى ايدها بيده / وعيونج ييمه بعدها بالباكيت مسلفنه محدن جايسها وهذا الولد ابن اخوها هي المربيتو خطيه امو متوفيه
وعمره شهر ناديه اخذتو
1 ت
احمد / اي والله حقج واعذريني يالغاليه
ام وضاح / وشلون بالوليد انا شفتو متعلق بيها وهي تفرفح عليه من تشوفو هذا راح يبقى عدها عكب الزواج.
احمد / يمه الولد فطن عليها امو الربتو ما يعرف غيرها شلون ترديها تعوفو.
ام وضاح / لاه ييمه شلون اشيل خطيتو بس جاي اسألك.
احمد / اي يبقى عدها.
ام وضاح / عجل ابو وينو
تنهد احمد ميريد يدوخ امه بسالفة سامي العرفها قبل ثلاث سنين / عايش بأمريكا عندو شغل
ام وضاح / عوذااا من ابهات هالوكت مايسأل على ظناه ملتهي بروحو.
احمد / هساع كولي شرايج بيها .
ام وضاح / والله يوليدي تبين هيبه وشوفتها تترس العين بس تبين وحيدة ماعدها احد بس هاي المرة التشتغل عدهم وصديقتها واكو مرة جتي بعدين يكولون مرة صديق ابوها… ماشفت عمامها ابد !!!!!!
احمد / اي ولد عم ابوها جانو موجودين الحجي ماعنده خوان بس اخت عايشه بالشمال .
ام وضاح / ول ول ييمه حافظ تاريخ العايله .
احمد / ههههه ايييي عجل شلون ابنج ماتخفي عليه خافيه.
ام وضاح بحب / كفووو يالذيب بعد هذي شغلتك استاد بيها .
ـــــــــــــــــــ
تغريد /
شفتي شلون عينه ماشالها منج يبووو شلون هيبه يسطر والنبي ،، يربي شكد فرحانتلج ،،اسكتي سمر خابرت صايره نار الخبله تكول شلون متعزموني اجي على اول طيارة ههههه كلتلها صارت عالسريع عود بالحنه انتي اول وحده
نادية / ههههه اي والله اول وحدة فديتها هسه اسبح وراها اخابرها فديو .
تغريد / هسه يتصل عليج عود ما وصيج بيعي ثكل والنبي انفش شعراتج ،، ضخي حب ضخي احساس ولج الرجال عايش جفاف عاطفي صارله سنين.
نادية / اكول تغريد انت شمدريج هااا
تغريد / مثل ما كلتلج والله مجاي اشاقى جان تحت تأثير صدمتج من رفضتي ههههه.
نادية / ااي عيني مرة معتز باشا كولشي تعرف ،، عن جد والله ممعقوله هاي السنين صايم يمعودة الضباط شيكدرلهم عينهم زايغه والله ،، شوف شلون خلتلي واهس راح اسأله اذا اتصل حتى اعرف بحياته نسوان لو لا ؟!!!
تغريد صاحت / خب حظي ولج شراح تسألينه جنت مصادق لو متزوج متعه نادية عوفي سوالفج ترحين تخربين الاول والتالي خليج هادية وحبابه بعدين ما اسمحلج تحجين عالضباط يمممه فديته لحبيبي ابو ايهم
ضربتها ناديه على جتفها / شوف هاي ماعت روحها هو منو تحرش بأبو ايهم حبيبي قلدت صوتها ودفعتها ،،دروحي كاتله روحج عليه ابو كرش ههههه
تغريد فكت عينها وكفت كبالها متخوصرة /ترى اوصله الحجي وينها كرشه شايلها بطوله وضخامته ولا مببن عليه عابت عابت راح اخلي يدخل جم من وراج انوب تقارنينه ويه حموشتي ههههههههه.
نادية / هههههه ايا عوبه صدكت ،، والله معتز وردة فدوة لعينه الله يحفظه الج.
ضحكت تغريد / يسلملي المزيون ولج فدوة راح احسدج اجننين ،، مو تنسين احجي وياه وشويه حب واحساس الرجال ميت عليج..اني اروح شوفي معتز دزلي رساله يكول طلعت بالباب.
نادية / سلميلي عليه لاتنسين.
تغريد / يوصل حبيبتي ديلا فوتي للحمام اسبحي هسه يتصل عليج.
كاعدين بالهول يشربون جاي بعد العشا ويحجون بأمور العرس وضاح اقترح عليه شهر ويتزوج عليش مطولها بس احمد جان يريد يحجي ويه ناديه حتى يعرف ظروفها اذا تكدر خلال الشهر تكمل حاجاتها
سكت ما حجى
فهد اعترض / عليش مستعجل خل يرتب امورو
ام وضاح / اكول يمه غرفتك يراد تغير بيها تعيد صبغها وشوفلك اخشاب زينه
وضاح يدري بأخو باقي ابيته البغداد لأن أحمد خبره بكلشي حتى وصى على غرفه موديل تركي شاف احمد ساكت عرف ميريد يضوج امه عكد حاجبه
وضاح / يمه خلو على راحتو بيتو موجود ابغداد وشغلو كلو هناك عود بالاجازات ينزل هينة
فكت ام وضاح عينها / شلون شلون انه ناطرة يتزوج ويستقر هينة تكلي يبقى ابيت بغداد ..
احمد يدري امه راح تزعل وهو ميريد يزعلها / يمه بعد گلبي انتي مو تدرين بشغلي ومثل ما كلتي غرفتي راح اوصي يسونها تغليف واشتري اخشاب وانتي وخواتي رتبنها على ذوقجن.
ردتله مريم / ادلل بعد اخيتك وشايف الخير كله.
احمد / يحفظج الله تاج ومعدله ام محمد.
ام وضاح / هاي هي انا اهم شي اريدك هينه انت ومريتك لو ما يعجبها بت ابغداد ؟!!!
احمد / هههههه لا يعجبها البنت حبابه ومتواضعه.
ام وضاح / ايييه شريد انه غير راحتك ييمه.
وضاح عينه على زوزة راحت على عمها أحمد جرت موبايله ……..
شالها وخلاها بحضنه يبوس بخدودها / شنو هالتفاحه هاي
زوزة خربت ضحك كام يدغدغها .
حسوني من يشوفها يغار يروح يركض يضرب بيها
صاحه وضاح من شافه عصبي والغيرة بدت بتصرفاته وكام يضرب بأخته
وضاح / تعال بابا هاك شوف هاي،، مدله جهازه فتحله اغاني اطفال راح لأبوه شاله خلاه يمه عالقنفه وباس راسه
وضاح بحب وحنية / حسوني بابا خطيه زوزة دادا ليش تضربها
عكد حاجبه ومبرطم ،، ضحكله وضاح ، يموت عليه من يبوز شاله خلاه بحضنه يبوس بخدوده من شافته زوزة نزلت وجتي تركض عليهم اجر بدشداشه ابوها
تريده يشيلها جان تكب العيطه بينهم حسوني يدفع بيها وهي فتحت الصفارة. تعيط
فهد كام وهو يكول / ديلا هذا القابضينو من التوأم خاصه زوزة اويلي يابه تسطرني من تعيط.
/ يول اكعد نتعلل وين رايح
حجى وضاح وهو حاير بيهم ، بنته تصرخ وابنه يضرب بيها
مريم متعمده مراحت عليهم لأن كولش مدللهم عمرهم سنتين وهيج لو يكبرون شلون
صاح وضاح لأن سطرته زوزة بصريخها / يولووو محمد كوم شيل حسن هاي موتت روحها
مريم ضاجت من تصرفه يعني كاعد يخلي حسوني يغار وهذا الشي جم مرة حجت وياه وهو يكللها ضعيف جدام بنيتي شسوي
نترت بأبنها / محمد اخذهم اثنينهم يلا
راحت جرت زوزة الجانت تبجي نترت بيها / بسسس
شالتها ومحمد شال حسن طلعو من الهول
وضاح بقى عاكد حاجبه عليها بس ما حجى ،،
دخلت بغرفه الولد صار سنه من سوتها لمحمد وابراهيم لأن كبروا عزلتهم من خوانهم ناصر ومصطفى ..كعدت عالجربايه مالت محمد وخلت زوزة بحضنها طبطبتلها حتى تنام قبل العشا انطتها ممه رضعتها ،، حسوني سكت وبقى يلعب هو وخوانه
دخل صوفي يركض وكامو يلعبون الحلو بيهم عينهم على بعض واحد يداري الثاني رغم عركاتهم بس بينهم حنية ،،، زوزة وكحه بقت تشاهك وتصيح بابا
نترت بيها ويه دخلت وضاح / تعاي بعد ابوج
شالها وطلع بيها من الغرفه واشر لمريم تطلع وراه ،، صعد لغرفته ومريم دخلت شافته خلا زوزة بحضنه ويحجي وياها بصوت خفيف والحياله ساكته تباوع عليه
تنهدت وراحت كعدت بصفهم / وضاح ميصير هيج دلال والله راح اتعبنه هالبنت شفت شلون حسوني كام يغار منهاويضرب بيها
وضاح بحب / ولج هاي حبيبة ابوها خوانها سباع ماعليهم شي هي هالوردة بنص هالخمسه الله يحفظهم
ــــــــــــــــــــ
الساعه ١١ ورن فونها جان عالشحن انتظرت يخابر مثل ماكالت تغريد ضاجت وتوها تريد تنام بفراشها بعد ما اطمنت على سرمد نايم بقريولته وخلت الباب مفتوحه شوي حتى تسمعه اذا كعد ..
دحكت بالرقم متعرفه يجوز مو هو لأن منطاها رقمه ،، شوي وصلت رساله ينبهها ترد عليه .
نادية بصوت ناصي / الوو
احمد / هلااا وغلاا هلا بهالصوت شلونج غلاي
دكات گلبها زادت وهي تسمعه يربي نبرته تخبل وهو يحجي بهدوء .
نادية / تمام انت شلونك .
احمد / اذا انتي بخير انه بخير شجاي تسوين هساع ؟!!
نادية / بالفراش توني دا انام .
احمد / مشتاقلج غلاي
ساحت روحها وهي تسمع همسه بأذنها .
احمد / ليش متردين ؟!!! ناديه مو وياج خلص لا تحجين حضري روحج باجر امرلج الساعه ٩ الصبح اخذج تشوفين البيت ونطلع سوك .
نادية / عليش الاستعجال..
احمد / ها اشوفج رديتي على هاي السالفه حيل ممنون منج لأن سولفتي وياي ونستيني يلا تصبحين على خير ،،، سده قبل متردله غمضت عينها يربي زعل ميتفاهم اوووف اني هم صوجي اخرسيت زين اتصل
عليه اكيد اخذ على خاطره .
يروح ويجي متر غرفته فعلا ضوجته اسلوبها بارد وياه شاتوقع منها راح تشلع گلبي فز على رنة فونه
ابتسم تك خد جاوب بثكل يلوك بي / نعسان وجاي انام محتاجه شي
ويه روحها تندمت لأن فشلها واحرجها خرررب حظي صدوك اني اجيب الاهانه لروحي انجبي واكعدي عليش خابرته
بلعت ريك / شدعوه سيادة المقدم
اسلوبك خشن ترا اني زوجتك
عكد حاجبه / زين تعرفين مكانج وين
يبووو على حظي جاي اخربط اليوم / اا اقصد بايع ثكل عليه.
احمد / ول يابه اليبيع الثكل كاعد يحاجيني .
استحت ناديه من طريقته شلون يتوددلها حبت هالشي منه تريده يظهرلها اهتمامه رغم تدري بروحها راح تقصر وياه لان يحجي بأسلوب حلو وهي متكدر
تردله .
اتفقوا يطلعون باجر انهى اتصاله وراح خلا فونه عالشحن واستعد للنوم وفكره راح يم ناديه.
ـــــــــــــــــ
بيت احمد /
جانت واكفه بالكراج تستحي تفوت وياه للبيت وخاصه لان وحدهم ابوها ماقبل يجي كاللها انتي وزوجج تفاهمو ..حتى سرمد ما اخذته وياها جان نايم وصت ام سليم عليه.
صاحها من المطبخ
احمد / وينج يمعودة ادخلي
دخلت من المطبخ دحكت بي جان مرتب ونظيف وكولشي بي جديد مبين ،، مشت وراه وهو يفتر وياها بالغرف اخر شي وكف التفت عليها / تشوفين الفوك
هزت راسها معترضه .
صفن بيها جان يتقرب عليها مد ايده ورفع خصله من شعرها الاسود الناعم خلاها ورى اذنها تنهد وهو يضمها بحضنه شهكت معترضه سكتها بهدوء / اشششش خلينا هيج
مسد على ظهرها بحنيه حاولت تدفعه وهي تحس بروحها بدت تضعف رفعت راسها وصوتها ضعف حيل / احمممد كافي اار…..
قاطعها من لثم شفايفها وصار يتفنن بيهن جان مقرر ويه نفسه يخليها تفقد اليوم مكدرت تبعده لأن كل دفاعاتها انهارت وبادلته بلهفه هي نفسها استغربتها
لهفة سنين ضاعت منها .
احمد حضنها بحنيه وهو يحس برجفتها بحضنه وبقوا مستندين لبعضهم ونفسهم يصعد وينزل
حاني راسه عليها ويبوس ويشم بشعرها همسلها
احمد / حبيبتي تجين نكعد عالقنفه ترتاحين
خاتله بحضنه تستحي ترفع راسها شارده منه ومحتميه بي محتميه بحضنه بهاي اللحظات لو تبيع الدنيا كلها مراح تتخلى عن احمد وحبه هذا الي اكتشفته جانت ضايعه ولكاها عطشانه ورواها ارض جردا واحياها كل هذا حست بي وهي بحضنه
احمد مجان احسن منها الود وده ياخذها ويطفي شوكه بيها بس غصب روحه انتضر هالسنين ميكدر ينتضر شهر .
اتفقوا الزواج بعد شهر والبيت ناديه حبته لأن حلو واثاثه زين بس تبقى بس غرفه نوم وفهمها الغرفه موصي عليها واسبوع توصل وشوفها صور بالفون كولش عجبتها بعدها اتفق وياها يطلعون للسوك تشتري المحتاجته وفهمته تروح ويه تغريد اذا يقبل
ما اعترض لان ميحب هوسه السواكه وكاللها راح ينطيها الفلوس وهي تتصرف بيهن تشتري جهازها.
حجى وياها على بيتهم بالطارميه وشلون امه تريده يستقر هناك ولازم الاجازة يكضيها يم اهله .
ناديه صفنت عليه وداخلها ممرتاح لهذا الشي لأن شغلها بالجمعيه ومتعودة على بغداد بلعت ريك وردت عليه معترضه .
