رواية حسناء قلبي الفصل الحادي عشر 11 بقلم جوهرة – تحميل الرواية pdf

ـــــــــــــــــ

احمد /

فتح الباب ودخل للبيت راح فتح الاضويه الساعه ٨ المسا افتر بالبيت شافه نظيف يلمع لأن الصبح اتصل بالمراة الجانت تشتغل عنده تفاجات بأتصاله وخبرها يمرلها ينطيها النسخه الثانيه للمفتاح ..ميكدر يجيب غيرها تنظف لان يعرفها من زمان مراة معدله وامينه وشغلها وطبخها نظيف

دخل للمطبخ يشرب مي شاف جداري عالطباخ فتحهن وابتسم خطيه مسويتله اكل باميه بلحم وتمن من عدها الطبخ .. لزم الجدريه دافيه طلع مواعين وصب الاكل وكعد ياكل .بعدها شال مواعين ذبهم بالسنك صفن عليهم وتنهد يحب النظافه بس متعاجز يغسلهن اجى يطلع رجع عالسنك خضهم بالمي والجلافه شلون مجان وعافهم عالسنك يلا احسن مما يبقن ملطخات.

دخل لغرفته طلع ملابسه مرتبات بالكنتور اخذ برمودا وتي شيرت فات للحمام يريد يسبح واتذكر الرجال الجان يتصل عليه ينطي اخبار ناديه توفى بحادث سيارة الله يرحمه قبل اسبوع يلا درا بوفاته اتصل وجاوبه ابنه فأخذ من خاطره وقرر يروح يعزي اهله وهذا السواه اليوم مر عليهم وساعدهم باليكدر عليه..

وكف جوا الدوش والمي البارد ينزل عليه صار سنين مقهور لأن ناديه تزوجت وعافته وهو الحلف متصير لغيره شلون ضيعها من ايده جم مرة يريد يسأل معتز

عنها وشلون تزوجت بس عزة نفسه وكبريائه يمنعه يسأل ولا يوم اجى على باله يسأل معتز من يتصل عليه بين فترة والثانية ابدا ما سأل عليها ولا معتز ذكرها بيوم ،،، خليها ذكرى بحياته عدها ولد ٣ سنوات عمره يعني زواجها جان بعد ما انقل للبصرة زين شلون بهالسرعه تزوجت مجاي يصدك راحت من ايده وهو اللي توعدها متصير لغيره ،، ااااخ اااااخ طعم شفافها لحد هسه بشفافي نظرة عينها الخجلانه متفاركني ،،،، جر حسرة وذبها

سد الدوش وطلع ينشف جسمه وكف كبال مرايه الحمام يراقب نفسه باقي على شبابه وجسمه محافظ عليه بس شوي شيبات براسه تنهد بتهكم على حاله ،،، شكد متحسر

لأن خسر ناديه وبكلبه غصه مجاي تروح اي والله متروح حسرتها بگلبي احس روحي مزوهرة

راح يصلي بعدما كمل اخذ فونه اتصل بمعتز واتفق يشوفه باجر

ــــــــــــــــــــ

نادية /

تحضرت تطلع وحجت وية ام سليم / خاله ام سليم اني اخذ سرمد وياي متفقه ويه تغريد نودي الجهال مول ومناك للالعاب .

ام سليم سالتها / الحجي عنده خبر .

نادية / اي خاله حجيت ويا الصبح ولو ماقبل يكول بس تفرفرين بسرمد خل يكعد بالبيت

ام سليم / يايمه والله كلامه صدك شوفي شلون يكيف تعلم عالطلعه.ط مايحب يكعد بالبيت

نادية / خاله والله انقهر عليه خطيه هو طفل غير يتونس يلا اني اطلع هسه ،،، لك سرمد اوكف ليش تركض.

صاحت بسرمد اللي طلع يركض فرحانه لأن يطلع يتونس

تقابلت بالمول هي وتغريد الجانت لازمه ايد امجد لأن حرك هواي / معتز رزلني من طلع الصبح يكول اجلي روحتج حتى يجي ويانا يدري ما اكدر اسيطر عليهم خاصه جودي من يشوفون ابوهم اقلها يخافون منه

بس قنعته على ناديه وياي وخل يتونسون .

نادية / ديلا خل نفتر شوي بالمول بعدين نوديهم العاب اصلا هذا المول العابه حلوة

افتروا بعدها وصوا لفات للجهال كعدوا ياكلون بعدين ودوهم العاب فرحوا هواي بقوا من لعبه للثانية وسرمد كل شوي كامز اللعبه جربهن كلهن

ناديه وتغريد راحو كعدوا بس عينهن عليهم كل شوي

ونادية تحجيلها شراح تسوي للجمعيه من تغييرات

ناديه عينها عليهم بس شافت امجد وسرمد ماكو راحت عالسريع صاحت امجد اجاها سألته بقلق / حبيبي وين سرمد ؟!!!

جانت مدنكه عليه وتحجي وكلبها يدك سريع.

امجد ميعرف وين كاللها /؛ما ادلى عمه سوفي لعبه الوح عمه الوح (ما ادري عمة شوفي اللعبة اروح عمه العب قصده)

فهمت كلامه ميدري سرمد وين / يربي توني شفته هنا !!!!!!

ايدها على خدها وتفر براسها تريد تشوفه انوب المول انكلب ناس وهوسه على حظها

انتبهت لتغريد /؛ ولج سرمد ماكو عفيه تغريد تعاي ندوره

تغريد تخبلت / عززا ولج وين راح ؟؟!!! امشي ندوره ونسأل عليه

هذا الحجي وهي كل شوي تسأل امجد شي وامجد يعيد نفس السالفه لأن ملتهي باللعب.

بقن يسألن بالناس وينطن مواصفاته وناديه فاتحه فونها تشوفهم بصورة سرمد

اخر شي كالتلها تغريد / امشي خل نسأل الامن اكيد راح يدورون ويانه

الامن ماقصروا بس مجاي يلكوه الولد اختفى

ناديه تخبلت بقت تبجي صار ساعه يدورون ماكو ،،، كعدت بغرفه الامن ودموعها تجري على خدها انهارت متعرف شتسوي

تغريد طخت عدها اتصلت على معتز وحجتله الصار

وخبرها ما يتحركن من مكانهن وهسه جايين بسرعة

راحت طمنت ناديه / لج عيوني كافي بجي شوفي الصار بيج ،،، هسه معتز خابرته كال ابقوا جاييكم يمكن راح يجيب ويا من جماعته الامن .

ناديه بعد قطرة دم ماظلت بيها صابتها رجفه وافكار سودة اجت على بالها ابد ما اتصلت على ابوها تخاف شتحجي شتكول ؟!!!!! بقت تبجي وتدعي الله يحفظه الها وتلكاه ..الامن يطمنوها بس بعد فصلت وكل اللي على بالها سرمد انخطف

نص ساعه ومعتز فوك راسهن ولده راحو يركضون عليه حاوطو رجليه ،،، سلم عالامن وحجى وياهم

التفت لناديه تفاجأ بيها منهارة / كولي ياالله هسه نلكاه قابل وين يروح

تبجي وتشهك / ابو ايهم ابني ضاع ما جاي الكاه يربي شراح اكول شراح احجي

تغريد من شافت الواكف ورا معتز وجهه جامد وعيونه فاكهن بعصبيه على ناديه حتى ما سلم صافن على ناديه ،،، راحت عليها تهدي بيها / كافي بجي ياعيني امشي للحمامات غسلي هسه يلكونه والله

كامت ناديه وصارت بوجه احمد العكد حاجبه وخزرها ،،، هي رغم الهبطه والبجي ظلت صافنه عليه متكدر تتحرك بعد الى ان جرتها تغريد للحمامات.

ساعة كلبوا المول تفتيش الامن وعناصر شرطه دز عليهم معتز وياهم يدور هو واحمد يلا شافو بيد مرة دخلت للمول وهو بيدها عاطت ناديه وركضت عليه

كعدت بالكاع وشبكته وتبوس وتبجي الكل يدحك عليها وهذا اليريد يصورها بموبايله وهذا اللي يسال عليها صارت فرجه

احمد من شاف هيج الوضع رغم انقهر عليها وهي حاضنه ابنها وتبجي بس ماحب العالم تتفرج عليها

صاح بالشباب الملتمين وهو يطلع هويته وحجى بتهديد واضح للكل / وياكم مقدم احمد الفهد جهاز المخابرات والعمليات الخاصه قسم بالله اي واحد كاعد يصور اكسر جهازو وقبلها اكسر راسوا يلاا لاتبقون صافنين تحركووووا سلمو اجهزتكم للامن خل يفحصوها .

وبالفعل الشرطه والامن فتشوا موبايلاتهم مالكو شي

بس واحد مسجل فديو لنادية وحذفوا .

ورجعوا اجهزتهم ..

اللي يسال عن شغل احمد الفهد فهو برتبة مقدم بجهاز المخابرات وعمله حساس جدا واضطر يعلن عن هويته ويأخذ أجهزتهم لأن ميريد يعرض نادية لوسائل التواصل وضغطها

وبتعريف أكثر عن مهماته كعنصر ينتمي لهذه الجهة المتنفذة بالدولة وخارج الدولة أيضا ،، هو تابع لمؤسسة الرئاسة بشكل مباشر عملهم جمع كل أنواع المعلومات سواء مدنية أو أمنية أو عسكرية ويجمع المعلومات داخل وخارج الدولة وهو المسؤول عن تأمين الجيش والحكومة والرئاسة وجميع مؤسسات الدول سواء خارج البلاد أو داخلها ومهمته أيضاً جمع المعلومات عن الدول الآخرى وشخصيات سياسية ورئاسية ودبلوماسية وعسكرية ،،،، هذا هو تقريبا عمل هذه المؤسسة اللي مقدم احمد أحد أفرادها ،،،

،،،،

نادية أخذته لسرمد بحضنها وشكرت المره الي شرحتلها شلون جان يلعب ويه بنتها وبقى وياها وممنتبهة الا ورى فترى على طفل وياهم وهم كاعدين مطعم يم المول

فمتغدين وبعدين جابته

نادية ممتنه للمره / تسلمين الله يحفظلج اطفالج.

المرأة / عيني انتبهي على ابنج مبين حرك الله يحفظه

تغريد بوسته لسرمد وكرصت خده خفيف/ لك سنفور شلون هبطه اكلنا من وراك

ناديه شكرت معتز والشرطه بس مكدرت تخلي عينها بعين احمد الجان واكف على جهة خازرها شوي وشافته حجى بهمس ويه معتز وطلع من المول

معتز صاح بجهاله / وين تتراكضون يلا للبيت انتم وامكم ،،، وانت اخيتي امشي اوصلج اكيد من الهبطه مابيج حيل تسوقين.

شكرته عالسواه وخبرته تكدر تسوق اهم شي سرمد رجعلها

رجعت للبيت منهارة وشافت ابوها كاعد بالصاله حجتله كولشي بالبداية ضاج وبقى يغلط على سامي العايف ابنه وناديه مبتليه بي بعدين جر سرمد الجان خاتل بحظنها وبقى يبوس بي ويحجي وياه

رفع راسه / فوتي اسبحي وارتاحي شويه شوفي شكلج شلون صاير اصفر من الهبطه

وصاح على ام سليم اجيبلها عصير …كعدت عالقنفه

منهارة مابيها حيل زين منها ساقت السيارة خوفها على سرمد دمرها وانوب شوفتها لأحمد بعد اربع سنين وبهيج موقف يعني فعلا هذا شي فوك طاقتها

يربي ليش هسه يلا رجع ليش شافني بضعفي وخوفي وحاجتي واني اريد واحد يسندني ويرجعلي سرمد .

ام سليم/ هاج بنيتي اشربي العصير

اخذته من ام سليم وشكرتها شربته بعدها راحت صعدت لغرفتها تسبح وترتاح

ام سليم اخذت سرمد تسبحه وتبدله وجان هادىء وخايف من شاف ناديه تبجي .

نزل يم جده الي فتحله على قناه طيور الجنه وسرمد يحبها ينسى روحه .

ام سليم راحت بعدما كملت شغلها …دحك الحجي بساعته صارت ال ٥ وناديه نايمه حجى ويه سرمد

حجي علي / جدو سرمد روح صيح ماما

سرمد كمز من القنفه وصعد الدرج صاح الحجي وراه / ولك جدو لاتركض تروح تتعور.

فتح الباب ودخل شافها نايمه صعد يمها / ماما ماما ،، دومي ماما دومي

انتبهت على سرمد فتحت عينها ابتسمت بوجهه واخذته بحظنها تبوس خدوده /حبيب وقلب ماما ,, اوووف شلون ريحه طيبه

بقت تبوس بي

سرمد / جدو يدول ادعدي .

نادية / هههه اي يكول اكعدي وانت كعدتني ديلا حبي اصلي وانزل .

نزلت ناديه وسرمد وياها جانت لابسه تراك اسود وبي قلوب حمرا ورافعه شعرها فوك راسها سلمت على ابوها وباسته بخده ..

رد عليها يسألها / شلونج هسه باباتي

ابتسمت لأبوها / الحمدلله احسن بهواي بس والله اكلت هبطه وخوفه الله لا يعيدها.

حجي علي / الحمدلله بنيتي اني خابرت ابو ايهم تشكرت منه خطيه تعبنا هو والشرطه .

وحجالي على موقف مقدم احمد الفهد شلون اخذ الموبايلات ومسح فديو مصورينه وانتي حاضنه سرمد بالكاع وتبجين

شهكت ناديه لأن متدري بهذا الشي جانت ممنتبهه صح شافته رافع هويته بوجهم بس متدري على شنو ،، شلون فشله الكل يتفرج عليها ،، شلون عالم ميهتمون بس يدورون ورا الناس ميخلون احد بحاله.

حجي علي / الحمدلله على كل حال ..والله اسد هالاحمد الله يحفظه .

بلعت ريك وهي تذكره شلون جان يدحكلها بنظرة بيها الف معنى .

ـــــــــــــــــــــ

احمد /

بالليل اتصل على معتز عصبي نار كلما يريد يبعدها عن دماغه ترجع تتربع بي شلون شلون يبقى يفكر بيها وهي على ذمة رجال غيره اخلاقه متسمحله ولاتربيته راح ينفجر من القهر ….

انفتح الخط جان ينتر / وين رجلهاااا الجلب عايفها وحدها ليش ما اتصلت عليه ؟؟!! احجي معتز انا سنين ساكت ما سألتك عليها جنت اتابع اخبارها من غير مصدر بس اخبار رجلها ماعندي علم بيها بس هساع من شفتها ماجاي اتحمل لخاطر محمد فهمني

معتز انقهر على صاحبه لان فاهم غلط عباله ناديه متزوجه / احمد اهدأ اعصابك يمعود .

احمد بفوران غاضب / لاتكلي اهدأ انت ما حاس بالنار البگلبي ناديه شعلتها شعل .

معتز بهدوء / ترى فاهم غلط والله عمي البنية مامتزوجه وهذا الولد ابن اخوها

عاط بي / عليك الله …يعني ؟؟!!!!!! خررررب…. ول يابه يمعتز يابه تعال ابوسك

ضحك وهو يحس الدنيا غير شك صارت /معتز حبيبي انت .

معتز / احمد شبيك لو سائلني جان جاوبتك من زمان بس انت جنت كالب وجهك وما تتحاجى كل ذيج الفترة ،، المهم على كيفك لاتدخل حامي البنيه الهبطه هدت حيلها .

احمد / افااا لاتوصيني يلا ضلع الله وياك.

سده وتنفس براحه يعني من ختمتها بشفايفها وهددته متصير لغيري صدك بقت الي ناديه الي متصير لغيري وهذا الراح اسوي هساع

راح سبح وبدل وتعطر وطلع لبيت الحجي علي العايد يخطب ناديه……