رواية حسناء قلبي الفصل الثالث 3 بقلم جوهرة
احمد
دك موبايله جان يسبح طلع لاف المنشفه على خصره وشعره ينكط مي عكد حاجبه وتأفف فتح خط وبقى ساكت يسمع صوت مخنوك وبجي
_ ليش هيج احمد ليش اطلكني مو تدري شكد احبك واتعلقت بيك تاليها بالموبايل تكلي طالك.
لم شفايفه ورجع فتحهن / دحكي ولج من البداية تدرين بي عقد سيد وكلتلج يومين ثلاث واطلكج ورضيتي وطولت المدة صارلج شهرين عليش تتبجبجين اخذتي حقج وزياده وهذا الرقم لادكين عليه منين جبتي وانا مانطيج هالرقم ؟!!!!
/ اي اي كلت يومين بس عجبتك وبقيتني احمدددد
عاطت بي بحركه ،، شلوووون اهون عليك واني احبك مو جنت مرتاح وياي لو بس تاخذ رغبتك وتشمرني مثل الكلبه حرام عليك
والله
احمد زمخ بيها / وجع اي والله صوتج ادبسزز… انتي برضاج وافقتي على شروطي انا ماعلت وياج من البدايه فهمتج الشغله وانتي ما صدكتي ردتي واحد يصرف عليج
واعتقد ما قصرت بهذا الشي ولا تحجين حب وماحب فاهمج زين اهم شي مصلحتج وانتي استفاديتي ذهب وفلوس شكو تنوحين طرشتيني
بصوت كوه يطلع مخنوك من البجي / الله لايوفقك الله يطلعها بيك ويقهر كلبك مثل ما سويت بيه وقهرتني
عصب احمد من كلامها / ايا الجلبه والله لو الزمج لنسيج حليب امج ساقطه تدعين عليه وانه الغركتج ذهب وفلوس اعتذري هساه لا والله وروح ابوي اجي اطلع روحج وانتي تعرفين شكدر اسوي
خافت من كلامه تعرفه ليش متعرفه هاي الشهرين تتجسس على مكالماته خفيه عبالها عنده نسوان غيرها وتدري بنفوذه بس من قهرها ولان حبته وطلكها تريد تبقى وياه جان مدللها ذهب فلوس ملابس ممقصر وياها
سمعته زمخ بيها / مو وياااااج
/ اعتذر اعتذر ينكص لساني اذا حجيت بعد
سد موبايله وشمره عالفراش وبقى يتأفاف راح عالكنتور طلع ملابسه نشف جسمه ولبس وتعطر
وراه روحه لمعتز مسوي حفله لأبنه ايهم عيد ميلاده مسوي بقاعه / والله عدهم سوالف جاهل طولو شبر وحفله وقاعه وكلاوات وعازمين ناس هه
تأنق بقاط رمادي وقميص ابيض ورباط نفس لون البدله بي تشجيرة ناعمه رش عطره المفضل وجر سبحته لفها على معصمه ويه الساعه واخذ سويجه وموبايله وطلع من بيته.
عايش وحده لان شغله بغداد ودائما متواجد هنا فباقي بهذا البيت هو اصلا بيت ملك لابوه الله يرحمه وسجله باسمه اهله يسكنون الطارمية ومعروفين هناك بس اصلهم من الغربيه ..
يروح لأهله بأستمرار لان يشتاق لامه الحجية جثير متعلق بيها وشكد يتوسل بيها تعيش ويا متقبل تجي ، تزوره تبقى يومين ثلاث وترجع بالبيت الجبير عنده اخوان اثنين الجبير وضاح هو اللازم شغلهم بالاراضي والبستاين والحقول والاصغر منه فهد نقيب طيار .
ـــــــــــــــــ
بيت نادية
حجي علي العايد يحس ناديه عصبيه اكثر من قبل يراقبها وكلبه مليان حزن عليها مستعد يسوي اي شي حتى ترجع ناديه الجانت كلها مرح وسعاده يعرف المرت بي مو سهل لان تحجيله متضم شي عليه
لأن هو الشخص الوحيد عدها ثقه بي معتبرته صديق واب يفهمها حيل..ظروف مرضها جانت صعبه ومرحلة العلاج الحمدلله تعدت ذيج الفترة وساندها بيها بس اليكسر خاطره شوفتها منطويه على نفسها ونظرة الحزن ماليه عينها
جان العصر والجو حلو ربيع شافها كاعده بالحديقه طلع من باب المطبخ تقرب عليها وايديه ورا ظهره
حجي علي / ها بابا ليش وحدج هنا ؟! ام سليم وين ؟
انتبهت لصوته ومن شافته كامت وحظنته باست خده ورسمت ابتسامه باهته حس بيها ابوها / حبيبي بابا
مسح على راسها وبقى ايده على جتفها وبكل حنيه / ليش بابا الحزن بعيونج الحلوة
رفعت ايدها ورتبت شعره الابيض اليخالطه سواد قليل / يعمري لا تشغل روحك بيه اني بخير
باوع بعيونها السودا الوسيعه وحجى بصوت كله رقه وحنيه / ورثتي هالعيون الحلوة من امج الله يرحمها من جانت تحزن وتنقهر يبين بعيونها ، شبيج باباتي من رجعنا من لندن واحسج متغيرة
كعدت ناديه وابوها كعد كبالها عالكرسي وبلعت ريكها وبكل غصه / احمد الفهد شفته بالمطار وجان ويانه بالطيارة وقبل ايام شفته بالمطعم هو ومعتز زوج تغريد طلع صاحبه.
ليش جاي يطلع كدامي ليش هاي الفترة ؟!!!! وين جان قبل ؟!! شوفته فتحت جرحي بابا اتمنى اردله السواه بية واجرحه مثل ماجرحني
جانت عينها مدمعه وتحجي بعصبيه خلت ابوها صافن وبداخله ميت قهر عليها ليش شناقصها جمال وشهاده وشخصيه الكل يحترمها ليش هيج حظها.
حجي علي/ بابا نداوي مو كلتلج انسي يطبه مرض هو الخسرج انتي ماخسرتي بنيتي
مسحت وجها متريد ابوها يتأثر بيها
ابتسمت / بابا لا تخاف بنتك ذيبه محد يكدر يهزها
هز راسه موافقها بس داخله يغلي / ناديه احجيلي الصدك بعدج تحبينه
فكت عينها وهزت راسها تريد تطرد اي تفكير بي / لااااا لاااا مراح اوكع بنفس الخطأ مرتين.
ابتسم ابوها يشجعها / عفيه بنيتي
ام سليم صاحتها / لكيت الساعه الجنتي ادورين عليها واكعه ورا الميز .
نادية بحب / تسلمين خاله هسه اجي وراج ، دحكت بساعة الموبايل وكالت
/ بابا اني اروح اسبح احضر روحي تدري بتغريد اذا ما اروح تزعل .
حجي علي / اي بابا شكو بيها اطلعي تونسي .
اخذتي هديه لو بعدج
نادية / موجودة بالسيارة قاط اطفال كولش حلو ولعبة ويا ، خل اجيبهم حتى اشوفهم
راحت طلعتهم من السيارة بالكراج مركونه ابوها راقبها شلون مبتسمه وهي تشوفه الهدايا ورجعت عادت تغليفهم وخلتهم بالعلاليك.
حجي علي / شعجب مسوين اول عيد ميلاد بقاعه .
نادية / هاي سوالف تغريد تكول معتز مقبل يكلها تردين يحسدون ايهم بس هي ذبحت روحها على اول ولد واول فرحه هههه بعدين بابا ترى هسه اغلبها هيج الناس.
حجي علي / والله بابا اشكال اشكال تخترعون ، المهم ونسي روحج لاتبقين كالبه الوجه هذا الحلو ،، باس خدها ، يلا اني اطلع عندي شغله يم المحامي
ودعته وراحت رجعت الهدايا بالسيارةوبوجها للبيت دخلت وصعدت كبل لغرفتها تسبح وتحضر نفسها.
صعدت لسيارتها شغلتها وطفت ورجعت تشغل بيها
وميفيد اخر شي قررت تاخذ تكسي لان تأخرت.
بالطريق وكل شوي تغريد داكه عليها اخر شي فتحت خط / والله راح اوصل شبيج ازدحامات.
تغريد / اريدج اول وحده
نادية مبتسمة وبصوت ناصي / يعني كلها وصلت هسه اني الاخيرة.
تغريد بضحكة / ههههه لا بعدهم جاي يوصلون راح تبدي الحفله بعد شوي
نادية / تمام خمس دقايق واني بنص القاعه هههه يلا باي .
نزلت من السيارة وشكرت السايق وبيدها شايله علاكه الهدايه دخلت للقاعه الجانو مأجريها لهاي المناسبه
شافتها تغريد واجت عليها تهلي وترحب بوستها وبعدت خطوتين عنها وهي ادحك عليها بأعجاب
تغريد / فدوه لله طالعه اجننين والنفنوف الاخضر لونه يخبل عليج
ابتسمتلها بخجل / يسلموو كلبي ولج خجلتيني شبيج
تغريد / ههههه تعاي خل اعرفج على جماعتنا انتي تعرفيهم بس اكو مشايفتهم .
نادية / هاج هاي هديه ايهم ومبروووك ميلاده ان شاء الله تفرحين بي بأعلى المراتب
اخذت العلاكه / تسلمين حبي ليش متعبه روحج والله اهم شي حضورج.
نادية / شعندي غير ايهم ربي يحفظه.
تغريد / حبيبيتي متقصرين يلا تعاي.
سلمت على قريبات تغريد ورحت كعدت بجهة معزوله شوي عن المعازيم الترسو القاعه تغريد تفتر بين الطاولات تهلي وترحب بالضيوف
انضمت سمر وزوجها للكعده بعدما سلمو على ناديه
شوي واجى اتصال لزوج سمر وقرر يروح بعدما اعتذر من معتز وتغريد عنده ظرف صار والدته متخربطه وقررت سمر تروح ويا .
تغريد / تعاي يمنا هناك ليش كاعده وحدج نداوي.
نادية / لا لا مرتاحه هنا ماحبيت الهوسه وصوت الديجي سطرني .
تغريد / براحتج عمري ثواني وادزلج ضيافه .
نادية / لاتهتمين روحي على ضيوفج اني مرتاحه هنا.
شوي واجى ولد قدملها عصير وراح.
جانت صافنه على معتز السحبوه اصدقائه حتى يركص لان شغلو جوبي وايهم يكمز بنصهم وكل شويه واحد شايله ويركص بي بعدما خلصت الاغنيه
خلو اغنيه مرينا بيكم حمد …فكت عينها متفاجأة بي
يعني كاعده تشوفه وين متروح سلم على معتز وشال ايهم يبوسه وطلع ظرف من جيبه خلاه بيد
ايهم النزل وراح يركض لتغريد الجانت واكفه يم ميز جبير مخلين عليه كيكه عيد الميلاد .
رجعتلها ذكرياتها مقتحمتها بقوة وهي تشوفه بأناقته وفخامته رافع ايده يلوح بيها ويميلها مسلطن على اغنية مرينا بيكم حمد ..متكدر تنكر احساسها بي مسحت وجها وعدلت تسريحتها تريد
تشغل نفسها شالت كلاص العصير شربت شويه ورجعته جرت حصرة وذبتها وعينها راحت لتغريد الملتهيه بضيوفها.
بدوا يقدمون ضيافه لفات شاورما
وصاج وفواكه وكيك وعصائر ممخلين محاطين
انتبهت لصوت رجال يحجي وياها سلم عليها وردت بدون متلتفت لان جسمها قشعر من سمعت نبرته رفعت راسها بشموخ بدون ما تحط عينها عليه ركزت نظرها
على تغريد الجانت منتبهة عليها وشاورت معتز فالتفت لجهتها ورجع حجى ويا تغريد.
جر الكرسي وكعد مقابيلها بقت عينه عليها ، ضغط على شفته الجوا ورجع حجى .. مترديني اكعد هينة
بدون ما التفت وبكل برود عكس دواخلي رديت عليه / القاعه مليانه ناس وكراسي اختار وروح اوكعد يمهم
حس بشوي احراج لان تحجي ويا بكل برود ومجاي ادحك نهائيا عليه ابعد الحرج مو احمد الفهد اليخجل من مره
همس بصوت يادوب سمعته / جثير ناس بس ماكو مثل جمالج وشموخج ناديه
متنكر على روحها شلون خفق گلبها لهمسه الها التفتت عليه ورفعت تك حاجب زادها حلاه وبقى احمد عينه على شفايفها / ابقى لعد كاعد وحدك
شالت جنطتها تريد تكوم مد ايده الها يريد يلزمها
سحبت ايدها ونترت بصوت كاتمته بقوة / اياااك تمدها واحترم روحك
فك عينه بقوة عليها ودمار نط بركبته بقوة / لاتخليني اسحبج جدام العالم فلا تستفزيني
فكت عينها الوسيعه خلته صافن بيها وبدا كلبه يدك سريع
تغريد من شافتهم تقربت عليهم تريد تعرف شبيها صديقتها
تغريد / نداوي حبيبتي كولشي ما اكلتي ، تعبانه بيج شي ؟!
كامت وجنطتها بأيدها / اعتذر يعمري اشوي تعبانه لازم اروح
دنكت راسها متريدهم يشوفون لمعه الحزن بعيونها .
معتز من شافهم تقدم عليهم / ها نادية يمعوده ابقي عالعشا ميصير اطلعين
تغريد عينها عليها وبكل اهتمام / شلون وسيارتج مو وياج ابقي حبيبتي ورا الحفله معتز يوصلج
تنهدت بقوة / تغريد اكلج ما اكدر ..التفتت على معتز ،، اسفه ابو ايهم بس فعلا اريد ارجع للبيت
معتز تفهم ظرفها / هاي هي اهم شي تكونين مرتاحه.
تغريد تريد احد يوصل ناديه حجت ويه معتز / شوف واحد من اخوتك لو ولد عمك يوصل نداوي ميصير تروح تكسي وحدها
اعترضت ناديه / لا تخبصين العالم يمعوده هسه اخذ تكسي عالسريع لو اخابر بابا
/ لا يابه عليش معنيته بهالليل …قاطعهم احمد الجانت عينه عليها طول فترة حجيهم / انا اوصلج يلا يابه اترخص منكم
تغريد ارتبكت لان تعرف ناديه متقبل وراح تفشله كدامهم وهذا الصار.
نادية ردت بكل برود / اروح تكسي يلا اسمحولي ،، راحت بدون متلتفت وراها
تنهد احمد ومسح شعره خزر معتز وبين عليه ضاج حيل
احمد / انا اترخص منكم
طلع ومعتز مشى وياه / احمد شعندك ويه البنيه من شافتك حالها انكلب
وكف وعيونه بيهن غضب مكبوت / ناديه هي البنيه اللعبت عليها من جنت ادرس ادارة اعمال وعفتها بدون ما اعرف الصار بيها
رجع معتز خطوه ورا / لاااا بشرفك واني اكول ليش حالها انكلب .
احمد بضيق / معتز رحمه لأهلك خليني هساع اروح بعدين نحجي يلا فيمالله.
طلع من القاعه وجر نفس قوي التفت شافها واكفه تنتظر سيارة هاي كل عقلها الدنيا ليل تريد تصعد وحدها تكسي.
راح صعد سيارته الاحدث موديل وركنها يمها نزل الجامه وحجى بحده واضحه / اصعدي تا اوصلج
خزرته ورجعت التفتت عالشارع. مامهتمة
نزل وهو يحجي / مو وياج اصعدي اوصلج كل عقلج اخليج تصعدين تكسي
نترت بي ورفعت اصبعها تهدد / روح من يمي احسلك لا تخليني استخدم غير اسلوب
جرها من ايدها بقوة وفتح باب السيارة دفعها عالمقعد ولطخ الباب بقوة فززتها …
