رواية قانون القلب اقوي الفصل السابع 7 بقلم رسل احمد
قبل كلشي فرحوني بالتصويت والمتابعه والتعليقات
صدگ ما الومك يالبعت ودك
ولا اريدن دمعتك تنزل لخدك
نهتني الناس عنك من خذاني الشوگ
بس روحي عنيدة ما انتهت منك
احبك ما انكرك حبك غريب الطور
بس حبي انتهى ودمي انفطم منك
و گصه بروحي الجفه وكل يوم الك راي وانه الماني ويه صبري ولا انته وياي
لون تدري بحياتي اشسوه الفراگ
شمس مغرب حياتي وباكها الماي.
_عريان السيد خلف
(اني اعلمج ام المراكز يصير خير)
ضحكت مغطيه حلكي بيدي …تذكرته من عض اصبعه عليه بباب المركز
وگلبي احسه صار يدك ببلعومي هلكد ما يدك سريع.بعدني بنص ضحكتي ودك . لگت روحي مسلوبه الاراده وجاوبته…
—الووو..
همهم وصوته اجه خافت:- كون اضمج بقاصه واقفل عليج…
– ليش؟؟
فارس:- حتى محد يشوفج غيري…
التمست العتاب بصوته وهو يكول:- شلون تدعمين الزلمه اذا متعرفين تسوقين المن تسوقين . مراكز ياقوت؟؟
بنصاص الليالي شطلعاكم من البيت…
ولج اجيت اتخبل واني اشوفج كاعده هناك .عقل ماظل براسي صايره فرجه للرايح والجاي يفوت من يمج ياخذله شوفه بوجهج.
جاوبته بارتباك :- والله مجنت اقصد والشارع جان فارغ هو فجاة اجه كبالي وصار الصار…
تنهد يسألني:-خما حاجاج حيدر؟؟؟
– لا خطيه صح رزلني من اجه للمركز بس الرزاله الصدك صارت بكروري…
– ممم كروري كلتي.الله يثخن لبنكم انتي وكروري .وشدد على كلمته الاخيرة…
– طبعا هذا توأمي الحبيب روح الروح.
– اي
– ماعرف ليش حسيته انزعج وحبيت استفزه..شعندي غيره هو اقرب واحد الي يفهمني بدون كلام…
نتر بيه:- اكلج افتهمته كافي.
– غير داحجيلك عن اخوي.
– احجيلي عنج وعني عوفي اخوج ابو المصايب
– شحجي؟؟
– الي بگلبج يا لّبَ گلبي
تلعثمت من كلامه:- هاي اني.
– ما سامعه الي يكول يالبكلبي ويا لب گلبي.انت لبة گلبي .
– ليش
– اذا اكو ليش ماله معنى . حلات الحب بدون اسباب..
-حست روحي صخنت من الخجل :- فاارس!!!!
– عله گلبه لفارس.
– وتاليتها؟؟؟
– تاليتها انتي ام بيتي . ياقوت انه ما العب واظن تأكدتي من اجيت خطبت.
– منرهم..
– ليش منرهم يابعد عيوني.
– هواي اسباب؟؟
-كلهن ما يهمن اذا انتي ترديني مثلما اريدج.
سكتت وهو سكت
-ياقوت؟؟؟؟
-مممم
– عيونج الحجن من جنتي بالسياره حقيقه لو خيالي يصورلي شفت روحي بيهن؟؟؟؟
ارتبكت وريكي نشف ظليت افكر بجواب مناسب مالكيت.
– جاوبيني مرة وريحي گلبي.ليش تتونسين بلوعتي.
استنكرت:-مستحيل اتونس بلوعتك
-چا ريحي گلبي.
ردت احجي واستصعبت ابوح الي بكلبي اله.خجلت احجي واعبر ماعندي فراسته بالكلام .
-احبج.من وكعت عيني عليج .احبج.مريتي من كدامي وشلعتي كلبي وعيوني واخذتيهن وياج .ضيعتيني امشي بلا شوف ولا گلب….
كلبها تحسه راح يوكف وفرحتها متنطيها لاحد.ولشتها صارت ترجف من كلامه . وفلتت تنهيده وصلت مسامعه من بين شفايفها
– ليش هالتنهيده بويه .لهلدرجه صعبه عليج… سكت ثواني وكال بخيبه
يلا يمكن نعسانه تأخر الوقت …
هتفت:- لااا منعسانه .لا تروح….
تهللت اساريره:- تردين ابقى…
جاوبته بأستحياء:- اي…
قهقه بخفوت وسكت بعدين كال:- يأم عيون چتاله كولي شوكت نتلاكه.
– مو شفتني اليوم؟؟
– ما رويت عيوني منج . حاسبتهه علي شوفه رحم الله والديج .
– لعد انتظر الدوام .
– بعد شهر واسبوع شيجيب الدوام.
وهيج صرنه نتواصل شكد احاول ابعده عني ماكدرت يقربني منه بأسلوبه وكلامه ونبره صوته المليانه حب ويوم عن يوم الگه روحي اتعلق بي وحبه يتشرب بيه اكثر واكثر انام على احبج واكعد على احبج صح ماكدرت اكولها اله بس جنت احسها بكل ذرة بيه نسيت روحي نسيت سيف نسيت اهلي وصرت اذا يتأخر وينشغل اظل الوب انتظره يتصل واذا انام يلازم احلامي وقبل الدوام بأسبوعين لح هوايه عليه يجي يخطب وماكدر اكله تعال صعب . سيف يدمرني اذا عرف اتجادلنه وهاي جانت اول مرة نتجادل ورفع صوته وانفعل
– ياقوت خلي اجيب اهلي واجي ونفضها يعني مترهم اني حجي وياج بالبوكه چني مراهق…
– بس اصبر
– على شنو اصبر شمنتظره لخاطر الله . يا ناري ويا برودج.لج بابا اريد احجي وياج براحتي اشوفج .وتبطلين هالخوف هذا عليتي كلبي
– فارس ليش دتضغط عليه حباب.أنطيني مجال من احس يتقبلون اكلك تعال
تعصب وانفعل:- لج بابا ليش ميوافقون فهميني اذا انتي موافقه ليش ميوافقون…
—علمود سيف ميقبلون
تخبل من جبت طاري:- لا تذكرين اسم هالحيوان ياقوت لا تخليني اجيج بهالليل نعلان شعلي … مو خطبج ورفضتي ؟؟؟
— حتى لو يبقى ابن عمتي وامره يهم اهلي وبينه وبينك مواقف مو حلوة
— هاا هيج صارت.. سكت واني سكتت شافته ضاج .. يلا اروح اني بالدوام وعندي شغل روحي نامي
— فارس اوكف
— روحي نامي يابه روحي ماريد ازعلج بالحجي ….وسده
بعد ما اتصل ولا اني اتصلت بي لحد ما صار الي صار ورقمي تغير
واجه يوم الدوام محمل هموم .وياقوت سانده نفسها على باب السياره متوجهه لدوام صار اسبوع من بلش بس ما كدرت تتجرأ وتداوم بعد الصار .. خايفه.. خايفه من المواجهه ..
اجاهه صوته الي صارت تمقته:- شعندج لازكه بالباب كعدي عدل…
غمضت عيونها كارهه صوته بدون متجاوب
سألها بنفاذ صبر:- مو احاجيج؟؟؟؟
درات عليه بعيون لاهبه :- لا تحاجيني.. لا تحاجيني دخيل الله شنو من بشر انت . ما كفاك السويته بيه …
ابتسم بخبث :- احجي عدل ويه رجلج مدام.مد ايده يريد يلزم كف ايدها .
انتفضت مثل الملدوغه ولزكت روحها بالباب اكثر :- لا تطخني لااا تلمسني سيف احرك روحي .احرك روحي وابليك .بعدنه ما تزوجنه من نتزوج الزم ايدي …
صار ينقر بغضب على الستيرن عرفت اعصابه ورثت :- يابه يا ياقوت شراح اسوي بيج .بختج راح تطبين لدوام ووراي طريق والا چان ملختج على رعونيتج
وكف كدام الجامعه وباوعلها:- اذا ما اكسر عينج .بكد حبي الج راح اذيج .
مجاوبته ورادت تنزل نتر بيها :- اووكفي
اندرات عليه بملامح جامدة:- خير
وصار يلقي كليشته الي عادهه للمرة الالف من طلعو من بيت اهلها لباب الجامعه – حلقتج ما تنزع اذا نزعتيها اكسر اصابعيج مجربتني بالتكسير واذا حسيت بيج تحاجين اخته لهذا الگو….د
باجر اتمم زواجي بيج ولا انتظر تخرج ولا اكلان تبن
نزلت بدون متجاوبه .. بلعت ريكها ورعشه خفيفه سرت بجسمها .. فتحت جنطتها وطلعت قطعه كاكاو صغيره دستها بحلكها حست سكرها بلش يهبط مثلما ديصير وياهه بالفتره الاخيرة…
دخلت للقسم وكبل بوجهها للمحاضره .دخلت وراهه نورهان كعدت بعيد عنها خلصو اول محاضره وبدون بريك دخل عليهم دكتور المحاظره الثانيه وهالشي ريحها من مواجهه نورهان بس ليمتى اول وتالي يتواجهن
صار البريك ونورهان كبل اجت عليها.
سلمت عليها صح مو مثل لهفه قبل بس ماتكدر تلومها تعرف نفسها اذت فارس وهي اخته حقها تنقهر عليه
كعدت بصفها :- صارلج اسبوع ليش مداومتي ليش رقمج خارج التغطيه ترا فارس انجن يدك عليج واني ادك ماكو وزهراء متجاوب؟؟
– ظروف نورهان..
– فارس ينتظرج تداومين حتى يشوفج ويحجي وياج كال زعلتها وظل ياكل بروحه
حست بدوخه مجرد ذكرت اسمه رفعت ايدها تفرك كصتها …
سمعت شهكه نورهان وجرت ايدها تتأكد من الجاي تشوفه همست مصدومه:- هاي شنو ياقوت؟؟؟؟؟؟
ضغطت شفايفها بقهر والغصه تعلكت بلعومها اذا تحجي تبجي
نورهان تهز ايدها البيها حلقه:- هااااي شنووو احجيي…
طلع صوتها ضعيف محمل ذنب :- حلقه..
نترت ايد ياقوت:- لج ادري حلقه . ليش لابسه حلقه . انخطبتي ؟؟؟؟؟؟
هزت راسهه ب(اي) ولا اراديا لطمت نورهان بخفه على حلكها مبهوته وعيونها الكبار مفتوحات على وسعهن وغوركن بالدموع همست:- وفارس ياقوت وفارس ؟؟؟
ولج فارس ياقوت ليش لييش ليش انطيتي امل وطول العطله تحاجي وانتي ناويه تنخطبين لغيره …
نزلت راسهه ودموعها صارت تجري بدون جواب
نورهان:- ردتي منه خطوبه وما خطب؟؟ لج مو اجه خطب ورفضتو ومستعد يخطب الف مرة شراح اگله اني هسه …. وهو يوميه يسالني دوامتي
مسحت دموعها وهمست بصوت باكي:- ماكو نصيب الله يوفقه ويبعثله بنت الحلال الي يتمناهه كلبه
نورهان:- ولج گلبه يتمناج… يريدج … تعرفين بي شكد يحبج ليش .. فهميني شنو عذرج….
— ماعندي عذر غير القسمه والنصيب….
نورهان بأسف:- يا ريتني ماعرفتج .. ماعرفتج ولا اخوي شافج وتعلق بيج .. ساعه السوده العرفناج بيها .. دمرتي وكسرتي گلبه…..كامت من يمها وطلعت من القسم مقهورة
مازعلت منها حقها الف مرة بس الصار مو بيدها
وياريت يعرفون الصار بيها بس شيفيد عرفو او ماعرفو النتيجه وحده شرعا هي زوجه سيف هسه عقد عليها عقد موت مو عقد زواج….
نهايه الدوام اجاهه حيدر لان سيف رجع لكربلاء مايكدر يعوف شغله وهالشي ازاح عن كاهلها الكثير من القلق والتوتر كعدت بصمت شارده صفنه تجيبها وصفنه توديها قطع شرودها صوت حيدر:- توته جبتلج نستله اكليها شو وجهج اصفر خاف هم هبط عندج السكر…
هزت راسها نافيه:- لا مبيه شي بس تعبانه من دوخه المحاظرات…
باغتها حيدر بسوؤال ما متوقعته:- ليش وافقتي على سيف توته؟؟؟
– تنهدت:- وافقت وخلص بعد …. مشفت شصار.. ما مستعده اخسر احد … هالزواج يرضي هواي خلي يصير واخلص تعبت اتحمل ملامه ….
حيدر:- كتلج لا توافقين وانه وياج…
سندت راسهه صفح مغمضه:- صارت بعد…
شاف الموضوع مأذيها غيره:- باجر انتي تعاي وحدج بسيارتج.. زهراء شوكت تبلش دوام وياج….
بقت على نفس وضعيتها وجاوبته:- فد اسبوعين لو٣ تدري مرحله اولى يتاخرون شوي بالدوام…..
وهيج مر اسبوع بسلام .. او هذا الي جانت متخيلته مشافت فارس ولا اجه متعرف شنو كانت رده فعله اكيد نورهان كلتله … صفنت على روحها اني شداسوي … حتى التفكير بي صار حرام .قابل شيسوي يعني يموتها قابل خلص كلشي ميفيد هي عقدت وخلص….مركزة بطريق شوي ازدحام متوجهه لدوامها تحاول تقنع روحها تنسى
اما نورهان جانت تتريك بالمطبخ وهي واكفه نهرتها امها :- احترمي النعمه واكعدي واكلي…
شربت اخر رشفه چاي بكوبها:- خلصت حجيه ….خاف الخط يجي واتأخر هذا يضوج ينتظرني ….
ام فارس:- اخيج كعد شو ماشفته ولا نزل يتريك…
تنهدت نورهان:- لكيته كاعد يمه ومبدل بس كال ميشتهي وماله نفس…
تحسرت ام فارس بصوت عالي:- كله من ورا صاحبتج عافسه حاله …
نورهان:- يمه كافي سدي هالسالفه البنيه انخطبت اصلا وماعرف شلون اگله….
فات فارس من باب المطبخ وجهه مبهوت عرفت سمع … دنك يلبس حذائه وحجه بدون ميباوع لنورهان:- انه اوصلج …
شالت جنطتها متهربه:- لا حبيبي ميحتاج اصلا ابو الخط وصل
هب واكف وتكدر تشوف رجفته ووجهه المطعون :- كتلج انه اوصلج صعدي السياره….
باوعت لامها وخرطت خدها بخوف وصعدت … انطلقو واول ما طلعو بيتهم حجت تبرر:- فارس.. والله كلبي منطاني اكلك…
مباوعلها ونبره صوته هدوء الي يسبق العاصفه:- شوكت ؟؟؟
نورهان بتلعثم:- صار اسبوع من دوامت وعرفت وخفت اكلك والله …
هز راسه بتوعد وساكت شعل جكاره وصار يشهك بيها شهكه الغرگان
كل ملامح الخذلان والخيانه تجسدت بي . يحاول يستوعب الخبر الي نزل على راسه مثل ضربة الغدر
نورهان:-فارس شتريد تسوي ليش ساكت …
— اششش… اششش ماريد اسمع حسج ….
وصلو الجامعه ونورهان مخلت دعاء تعرفه ما رددته وكف واندار عليها :- خابريها شوفيها وين؟؟؟
هزت راسهه:-ماعندي رقمها مغيرته .. ماعرفه…..
هز راسه:- خير ان شاءالله.. نزلي نطب ندورها …
فركت ايديها:- ابوس ايدك فارس مو مال فضايح … داخل الجامعه…
– شفتيني مخبل واشكك هدومي بنص الجامعه على شنو الفضايح عندي حجايتين بصدري احجيهن واروح.نزلي شوفيها وين
نورهان بتردد:- باوع هي كامت تجي بسيارتهه وتطبك بذاك الكراج .. خل نشوف اذا سيارتها موجودة معناته جوا … هز راسه وحرك سيارته للكراج .. دخل بي يفتر وقبل لا تشوفها نورهان شافهه تقفل سيارتهه … وكف سيارته ورا سيارتهه كاطع عليها الطريق .. شاف اللون ينسحب من وجهها وعيونها تتوسع …
ابتسم بشر ونزل عليها شايط.رادت تتعداه بس ماكدرت منا سيارته ومنا هو فتح الباب الخلفي واشرلها براسه تصعد بدون ما يحجي ..
هزت راسهه بعنف رافضه:- اكيد تخبلت مستحيل اصعد وياك… وخر من طريقي خليني افوت لدوامي…
ميل راسه صفح :- تصعدين لو شلون…
انفعلت:- مااا اصعد وشتريد تسوي سوي…
دار جسمه صفح يتفقد الكراج اذا بي احد غيرهم واندار عليها .. اتجرأ ودفعها داخل سيارته بعنف وسد الباب … وهي انهارت صارت تصرخ وتدفع بالباب وتضرب تريده ينفتح … صعد بسرعه وشخط سيارته طالع من الكراج .. نورهان كامت تلطم على رجليها عينها تنتقل بين اخوها الساكت وسكوته يخوف وبين ياقوت الي صارت بين ارضيه السياره والمقاعد وتجاهد حتى ترفع نفسها وتطلع
— رجعني… رجعني انت مخبل… شدتسوي.. وين ماخذني رجعني والله اشتكي عليك .. وصارت تصرخ
نورهان كامت تبجي وهي تشوف حجم المصيبه الي هم بيها وبلشت تجيها نوبه ربو .. طلعت البخاخ مالتها وشهكت منه مرتين ..
اندار عليها فارس:- انتي انوب شبيج ترا ما ذبحتها ..
نورهان وهي تلهث:- تسالني شبيه بس خاطفين بنيه… وين مودينه
جاوبها بدون ميباوع وصراخ ياقوت طرش اذانه:- لبيتي…
مدت ايدها وظلت تضرب كتفه متهستره:- رجعني.. رجعني الله لا يوفقك …
طبك على صفحه الشارع بسرعه رجتهن رج واندار عليها تراجعت ليورا تبتعد عنه منكمشه على روحها انحنى فوكاهه وصوته يرجف من الحقد:- اكتمي نفسج لا افعل بيج فعله توگف گلبج اتفاهم وياج على هاي اللعبه الجديدة
وهن حجايتين احجيهن وراهه ولي وين ما تردين تولين.. بلعت ريكها وصدرها صار يعلى ويهبط بعنف شافت وجه مشايفته وجه متروس حقد … عينه لاهبه مثل الجمر .رجع لمكانه وكمل الطريق.
هي خنست بمكانهه ترجف اذا اهلها عرفو.اذا سيف دره يذبحها حضنت نفسها حيل ودموعها صارت تجري.والشهكات تطلع منها لا ارادي.
همست بين شهكاتهه:- عليك الله رجعني والله يذبحوني ويذبحوك حرام عليك.
باوعلهه بالمرايه يريدها تجذب السمعه:- يعني ازعلج شويه تسوين هاي السالفه ادك عليج مغلق كلت يلا تدلل عليه صيحت عليها يلوكللها الدلال متداومين وراهه تجين بهاي السالفه جاي تختبرين صبري لو شنو لو ناصبه عليه
همست:- مجاي اختبر صبرك ولا شي انخطبت وخلص….
باوعلها مثل الي مو مصدك وسكت يهز براسه
دخلو منطقه سكنيه هادئه ظلت تتلفت وعيونها تدور من الصفحتين وكف كدام باب نزل حتى يفتح الباب وهي استغلتها السياره مفتوحه.وفتحت الباب تركض شافهه بنفس اللحظه ولحكها مابتعدت غير بيتين ولزمها من زندها يجرجر بيها ناحيه البيت ضاغط على سنونه ويحجي:- اركدي لا اموتج.تجر بروحها للكاع حتى يعوفها وهو ما يتزحزح
نزلت نورهان متعرف شتسوي اخوها متخبل.دخلهن للكراج وعاف السياره برا مشتغله فتح باب الصاله ودفعها ودخل نورهان وقفله عليهن.
انهارت تلطم على وجهها ونورهان طلعت تليفونها تدك على امجد
امجد:- الوو يابه الشمس اليوم منين.قطع جملته يسمع صريخ ونورهان تبجي نورهان ولج هاي شكو شصاير
نورهان ببكاء:- تعال امجد تعال مصيبه مصيبة . فارس تخبل راح يموت البنيه وتصير كارثه ونبتلي
— ولج بس فهميني شكو …
— فارس غصب ياقوت تجي ويانه خطفها امجد تخبل وخطفها واحنه هسه ببيته القديم والبنيه ملخت روحها تعال بسرعه لا تصير كارثه.
— جاي جاي خرب بروح اهلك فارس
فتح الباب وطب شمر روحه على كرسي التخم يباوع لياقوت الكاعده بالكاع وموتت روحها من البچي
كامت وكفت تأشر بيدها وتحجي:- انت شدتسوي تريدهم يموتوني رجعني بداعت امك عندك اخت وتعرف البنيه سمعه حرام والله حرام السويته بيه ….
هي تشمر بيديها وهو عينه تروح ويه الحلقه التلمع بيدهاويكرض بشفايفه بقهر
— احجيلي شلون غدرتيني… شلون وهمتيني تحبيني والكاج مخطوبه صرخ بصوت مرتفع لججج احجييي احجيييي شنو هاللعبه
تهاوت على القنفه راسهه نازل دموعها تجري وسانده ايديها من صفحتين بوهن
نورهان مغطيه نص وجهها وتبجي
كام وكف وصار كبالها يروح ويجي يفرك بوجهه بقله صبر انحني عليها واجهها رفعي راسج وجاوبيني المن تكضين الليل سهرانه وياي اذا انتي مدسترتها وناويه الغدرة ياقوت فكي حلكج وسولفي فهميني لا تسكتين وتخبليني زايد عليج
كعد مقابيلها يسال وعيونه حمرر :- شوكت وشلون ومنو
باوعتله بنظره مليانه ذنب بدون ما تحجي بس الدموع الي مو راضيه توكف.
حط عينه بعينها يدور جواب لدقايق بدون ما يحجون نظراته تنتقل بين عيونها يدور جواب فك عيونه متراجع ليورا وهمس مبهوت:- سيييف لج يااقوت سيففف
ضحك بأستهزاء علموده متردين اخطبج علمودة زعلتي ورحتي واني الغبي اني الغبيي
زاد بچيها وغطت وجهها بأيديها الاثنين مختنكه بدموعها …
صار يفتر كدامهه مثل اسد جريح خسران المعركه:- سيف سيف الي اذاج سيف الي علم عليج بكسر سيف الي خلصتج من ايده سيف الكسرت ايده علمودج لج ليشش ليييش صار يباوع يمنه ويسره يدورله شي ولزم وحدة من كوشات التخم اقترب منها وضربها بيها بعنف على جانب راسهه وكعها بالكاع بقوة
ركضت نورهان تلزمه وتجرها من ايده:-فارس كافي تخبلت شدتسوي تريد تضربها كافي ياخي متريدك لا تريدها تولي كافي لا تدخل بخطيتها
طب امجد وعيونه تنتقل بين فارس الي يتنفس بجنون ولازمته نورهان وياقوت الي فحطانه بچي بالكاع ضامه راسهه بيديها الاثنين تحمي نفسها ركض عليه بسرعه وضرب فارس على صدره خلاه يرتد ليورا
امجد بصياح:- ولك انت مخبل وين جايب البنيه شدتسوي عقلك وين
تراجع ليورا وتهاوى على التخم عيونه مغوركه دمع مخذول:- خلوني احجي وراهه اخذوها وطلعو…
هي بقت على نفس وضعيتها مارفعت راسهه مغطيته بايديها وجسمها يهتز بالبجي
استرسل وصووته يشرح خبيته وعذابه
لج حبيتج مثل المخابيل تصرفت تصرفات مو ثوبي خطبتج مرة وجنت مستعد اخطبج عشره وانتي متقبلين بدون سبب وهاي اول اشاره جان لازم افتهم بس عماني حبج . وهمتيني انتي تبادليني ورفعتيني لسابع سمه وبنفس الايد الغدارة دفنتيني بسابع ارض شفتي حبي مفضوح وتگلبتي عليه .ولج انه فارس انه اركض الزلم انتي بكد النمله تسوين بيه هيج تسويني مضحكه.منين طلعتيلي منين مثل السم تسربتي لشرايني اذا انتي تردين هذا النذل المن وهمتيني المننننن لو عاجبج اثنين يردوج وانتي تختارين
لج حياتي كلها راسمها وماشيها بتخطيط الا گلبي ارتجل ارتجال وحبچ وانتي شسويتي دستي عليه بالقندره
سكت يفرك بصدره بتعب وملامحه منكمشه باوع لامجد :- اطلع اريد احجي …
امجد:- ما اطلع تروح تتخبل عالبنيه …
– اطلع اكو كلام ماكدر احجي كدامك ما سويلها شي اطلع الكلام اذا يبقى بگلبي يذبحني صارله سنتين نايم بصدري اطلع امجد
استسلم وطلع للحوش يدخن…
بكل قهر الدنيا سألها :- ليش ياقوت فهميني اشرحيلي اقنعيني
ولج بردي ناري صارلج سنتين تلوعين بيه يوم تضحكيلي وعشره تصديني اكول بنيه خام وتستحي رجع سكت يباوعلها وصوته هدأ ونبرته صارت لينه:- ياقوت شگالج وقنعج احجيلي بشنو قنعج گليلي شلون رضيتي لج سمعيني صوتج كافي بچي
سكت لدقيقه كامله المكان هدوء بس صوت بچيها ينسمع
:- لزم ايديج ؟وكع شالج عن راسج وشاف شعرج؟
شم نحرج وترس ريته منه ؟رفعي راسج وجاوبي سوا كل امنياتي وياج.
غطت نورهان وجهها ىصارت تبجي بصوت… بحياتهه ما شافت فارس بهالحاله
اما ياقوت جانت تنذبح ويه كل كلمه وكل حرف ما جانت تسمع جانت تصارع حتى تعيش تصارع حتى تكدر تعيش بعد الصار
حست الهوا انحصر بريتها رفعت راسهه من بين ايديها تباوعله .. عينه دم ودمع وهي وجهها خريطه من الدموع….
همس بمرارة :- جاوبي
هزت راسهه تنفي وصوتها خرج متقطع من شفايفها:- ما صار ما صار ررجعني الله يخليك
ظلت عينه بعينها وهو يطعنها بكلامه:-ما الچ مكان بكلبي بعد صرتي حالج حال المستطرق الما نهتم لامره صرتي هامش لاحتى الهامش هواي عليج بكتاب حياتي بعد ما چنت اريدج وطن
جنت اظن الي معزه بگليبج الحبيته بس الظنون اغلبها غلط وطلعت مالي كلشي عندج طلعت صفر عندج واتذكري اي قيمه تنضرب بصفر تصير صفر مثلما سوايتيني ويه الصفر انتي والماكو سوة خدعتيني بهاي عيونج البريئه مثلتي عليه البراءه عينج متحطيها بعيني مثلتي عليه الخجل والحياء وانتي تلعبين عالحبلين
جانت تتمنى تموت قبل لا تواجهه وتسمع كلامه الي جاي يذبحها بي باوعتله بقهر ورجعت باوعت لنورهان ورفعت ايدها الهه تستنجد بيها اقتربت منها كعدت بالكاع بصفها وحضنتها حضنت نورهان وكأنها سترة نجاة لكتها بنص بحر وهي جاي تغرك:- عليج الله رجعيني راح اموت كومتها نورهان تمشيها ناحيه الباب تطلعها وهو بقه على نفس كعدته يباوع لمكانهه الجانت كاعده بي بدون ما يرمش
… ونفس المشهد تكرر براسهه من حاصرها سيف يهددها يفضح حبها ارتعدت لشتها وكلبها صار يجاهد بنبض سريع وراسهه ثكل غمضت مستسلمه وراح منها الوعي.
ورا ساعه جان كاعد بسيارته ينتظرهم برا المستشفى شاف امجد يتمشى لناحيته ويباوعله بخزرة صعد بصفه وسد باب السياره بعنف بدون ميحجي
– شلونها؟؟؟؟
اندار عليه امجد يحجي بنتر:- خليت بيها شلونها البنيه عدها انهيار عصبي وسكرها مصفر رادت تموت شبيك فارس هذا تصرف مال رجال بكد الحايط السويته عيب عيب وحرام
فارس:- تستاهل
-يجوز مجبورة يا اخي انهيارهه مو مال وحدة راضيه
-ابوها ما يجبر يعارض اي بس مايجبر انهيارها من ذنبها وغدرتها وخيانتها
امجد:- كافي كافي سد الموضوع خلص عوف البنيه لحالهه راحت لحال سبيلها انسى السالفه وبعد دير بالك تعيدها اكعد هنا خل اهلها يجون اجيب نورهان واجي
دار وجهه عن امجد ساكت….
اما نورهان جانت كاعده بصف ياقوت الي رايحه بغير عالم بعد ما انطوها مهدىء تحس الهوا مكطوع عنها من الخوف خابرتها زهراء وكلتلها محمد راح يجي بس هو متواجد وهي تعرف محمد شكد صعب وشكوكي وخايفه يعرف الصار. ظلت تاكل بأظافيرها وحاضنه جنطتها بحضنها… ..
انفتحت البرده ودخل بطوله مبين قلق على اخته اقترب من ياقوت يتلمس كصتها ولزم ايدها دار نظره لنورهان بجمود:- شصاير وياهه…
تحمحمت تطرد كحه داهمتها:- احم فجاه تخربط وضعها ووكعت من طولها
عينه على ياقوت ووجه سوأله الها:- غريبه ثاني مرة اختي بالمستشفى وانتي وياهه…
كتفت ايديها لصدرها وهي ترجف تتخيل يعرف الصار :- يمكن لان اني صديقتها الوحيدة الي كدرت تطلع وياهه للمستشفى
-وان شاءالله اخوج هم هنا؟؟؟؟
فتحت عينها بخوف معقوله شاف فارس… نفسها بلش يثكل عرفت راح تجيها نوبه ربو … ايدها ترجف تريد تفتح الجنطه … شريط الصار كله مر كدام عينها … وكعت البخاخ وموبايلها بالكاع…
اندار محمد من يمها ودنك شالهن وانطاهه البخاخ :- تنفسي بويه تنفسي هاج استخدمته مرتين تشهك النفس عينه صارت بعينها المفتوحه حيل
لحظه اجيبلج مي.
طلع دقيقه واجاهه بكلاص مي
شربي اخذته منه وشربته كله وايدها على صدرها …
همست:- شكرا حرك راسه بدون كلام وصفن بياقوت وكال
– اني اطلع برا انتي هم ارتاحي الظاهر تعبتي بس تكعد صيحيني
هزت راسهه موافقه وطلع بعد اقل من نص ساعة فتحت ياقوت وبلشت تبجي انقهرت عليها وحضنتها
– ياقوت والله اسفه عالصار ماكو مبرر للسواه الله يخليج اهدي اخوج محمد هنا كتله تخربطتي بالدوام وجبتج…
ياقوت:- الرعب العيشيناه اخذ نص عمري كليله بحياته لا يشوفني وجهه ما اسامحه ما اسامحه طول عمري
نورهان:- عذري مجروح ياقوت انتي غدرتي
مسحت دموعها بعنف واجت تكوم وهي تهمس:- محد انغدر غيري..
نورهان:- ابقي اصيح اخوج
طلعت اشرت لمحمد يقترب
– ياقوت كعدت الدكتور كال تكدرون تطلعوها بس لو تساعدها دايخه.. اني اهلي ينتظروني برا اروح….
– شكرا تعبناج وياهه
– لا بالعكس …
استأذنت منه ومشت لاگاهه امجد بباب المستشفى
-اجو اهلها
-اي
امشي للبيت امشي وهذا اخوج اني اله …
– امجد واسي مو تزيدها عليه ادري غلط وجان ممكن تصير كارثه بس من قهره يحبها مجان متوقع محد متوقع هيج تسوي.
-حتى لو هي غلطانه السواه غلط تخيلي بس اهلها يدرون يلتمون على اخوج ياكلوا وهو عايش بعدين البنيه مبينه فقيره وكضتها تبجي ومقهورة صديقتج هاي نورهان مفروض تعرفين اخلاقها هي تسوي هيج بأرادتها؟؟؟
– مادري امجد ياقوت والله حبابه تستحي تباوع بوجه الواحد اذا يحجي وياهه هي اصلا بلگوة تجاوبت ويه فارس فجاه تنخطب ليش مكلتلي اذا مجبوره من حجينه اذا فعلا مجبورة اني استغربت هي تضوج من سيف…
– وهذا يأكد شكوكي والقران البنيه مجبورة انتو شبيكم ليش متشغلون عقلكم ليش تحجي ويه فارس اذا ناويه توافق على غيره الا اذا مجبورة
– بعد ميفيد الكلام كاطعه مهر يعني شرعا متزوجه مجبورة او لا هالشي ميغير الصار وانت لا تحط هاي الشغله بباله خلي ينساهه بعد
طلعت ويه محمد ساندهه رافع بطل المغذي ويحجي بالتليفون ويه امه
– يمه مبيها شي هاي وياي وجايين للبيت سكت يسمع امه وكمل
كلتكم چم مرة ودوها دكتور كل يوم طايحه علينا خل نطيح على علتها لا هذا هو انه العصر اخذها حجزتلها توني صعدها السياره وفتح باب الورا طلع سترته من التعلاكه شمرها بأهمال وحط المغذي بيها علكها بصف ياقوت..
ظلت مغمضه ودموعها تجري متعرف على شنو تبجي حبها الضاع .. كلامه وظنونه بيها لو الخطوبه الكارهتها وتورطت بيها كلهن يدگن بگلبها بس اقواهن واعمقهن كلامه زاد بجيها والشهكات تطلع مخنوكه منها
باوعلها محمد :- ليش تبجين يابه شجاج ياقوت جنتي وردة مفتحه ليش هيج ذبلانه ويوميه مريضه
اندارت عليه بعيون كلها حزن ودموع تمنت تحجيله بس متكدر اذا حجتله البيها هو اكثر المتضررين.. يأذيها ويأذي نفسه وعيلته
همست بتعب :- بس تعبانه راسي
-ماقتنع بكلامها :- سيف مزعلج كليلي اطك ظهره والله
هزت راسهه نافيه:- معلي سيف اني حسيت روحي مريضه وما تريكت هبط سكري
-حجزتلج يم دكتورصديقي اليوم نروح نشوف ليش هيج يصير بيج
احس ضاقت الدنيا بيه حتى الهوا احس شح والنفس الي اجره ثگيل ويوجع صدري صافنه كل وقتي هيج بلا هدف للفراغ كلشي صعب عليه حتى الكلام واعتزلته جسمي بلش يتعب يوميه اعراض شكل يوم مغص يخليني الوب بالكاع مثل السمجه المتزوهره. ويوم دوخه تخليني اوكع من طولي ودوني اكثر من طبيب وكلهم نفس الكلام
شويه نقص فيتامينات وفقر دم ما يستوجب هاي الاعراض الدتصير بيه
احس روحي معايشه امشي واكعد وامثل الحياة ماعرف على شنو انقهر واطحن روحي على خطوبتي من سيف الي صارت باحقر الطرق لو على حبي الضاع وفارس وكسره كلبي وكلبه لو على الكلام والسواه بيه باخر لقاء ذني كلهن اتجمعن على گلبي مثل ضربه الرجل الواحد حتى ينهدر حق گلبي بينهن كل جرح يكول اني معليه مو اني الموتتها
القهر مثل نار ومشتعله بصدري جبت عمري مسيره بحياتي كلشي اهلي يختارو الي ومرة وحدة بس مرة وحدة ردت اختار بأهم شي بحياتي هم غيري اختارلي
سيف اختار يعيشني رعب وابتزاز وتهديد
وفارس اختار يأذيني لان ما اختاريته الي يقهرني زعل على نفسه وما شاف زعل عيوني . ماشاف كسرتي وقهري شاف خسارته بس .
مفروض عرفني بأخر فتره تواصل ويعرف لا طبعي غدر ولا خيانه ولا اني الي العب على الحبلين
مو الحبيب المفروض يحس بحبيبه ليش ماحس بجبرتي . واختار يعاقبني بسوط كلماته الي جلداته علمن بروحي وگلبي واثاره متروح…
مرات يصيبني انهيار وابچي بحرگه ومرات اظل صافنه
ومثل كل يوم جنت معتكفه واعيش حزني اندك باب غرفتي وبرز من خلفه بابا بأبتسامته الحنينه
كمت لميت شعري صفح وكعدت وكعد بصفي على حافه السرير لزم وجهي بأيديه وبوس خدودي بخفه وحضني يمسح على ظهري وشعري وظل يحجي ويايه
– ياقوت بابا شجرالج ليش هيج بابا احد مزعجلج. احد غاثج ليش هيج جاي تذبلين عيونج مغيمه ولونج رايح
باوعت لاصابيعها الي تعصر بيهن:- مالي خلك بابا …
حاوط كتفها وهي حضنت خصره وحطت راسهه على صدره ويحجي وياهه:- دوامج بابا راح يفصلوج. صارلج عشر ايام غايبه
-ماريد اداوم بابا اريد ابطل
وخرها عنه مصدوم :- لج بابا شني ابطل انتي ثالث السنه والسنه الجايه تتخرجين منين طلعتي بسالفه ابطل ياقوت شهادتج ومستقبلج بنتي
جاوبته بترجي وعيونها بلشت تغرغر بالدموع:- ماكدر والله ماكدر الدراسه رادلها تركيز واني تعبانه
-لج بنتي ليش.. ليش فهميني شصاير وياج .. سيف مزعلج غاثج؟؟
ماجبرتج وكعدت وياج الف مرة وانتي وافقتي
نزلت راسهه بحزن:- لا مو سيف بس تعبانه ادوخ واتخربط خليني اكعد السنه والسنه الجايه الله كريم
هز راسه بدون مينطق حرف وعلامات الانزعاج واضحه عليه بس ماحب يضغط عليه استمرت الغيابات ويوم يجر يوم بلكوة محمد اقتنع يروح يأجلي سنه بتقرير طبي قبل لا يفصلوني واضيع الركصتين……
وبيوم من الايام دخلو عمه زينب وسيف علينه العصريه وعمه زينب جانت سعيده اكثر من اللازم كأنها سامعه خبر لو رابحه اليانصيب وهالشي قبض گلبي وخلاني اهوجس بدون توقف …
صبو العشه وكعدت وياهم بألحاح الجميع .. كصت زهراء صمونه حجريه بنص وترستها كباب وزلاطه وحطتها بيدي تحثني اكل …
— اكلي لخاطر الله صايره وجه الموته من الضعف….
ام سيف موجهه حديثها لابو محمد:- اكول خويه اني اكول ليش ما نزوج وليداتنه بعطله نص السنه ياقوت واجلت السنه يعني بكل الاحوال ما تداوم السنه نزوجهم ويستقرون ببيتهم عود لا عجبها ترد دوامها وكت الدوام يجيبها …..
علويه نهله:- شسالفه بعد اقل الشهر شتلحك تجهز روحها…
ام سيف:- چا شيرادلها يوميه تنزل السوك باسبوع تخلص بعدين السوك الطاير لا احتاجت شي ورا العرس تشتري على راحتها ….
هم يحجون واني احس بلشت افصل عنهم عمتي فرحانه تريد تزوج ابنها متعرف جاي تقرب موتي اليه خاف قبل جنت رافضه سيف بس لاني ماعندي مشاعر اتجاهه حاليا اكرهه عالسواه بيه
اللكمه الوحيده الي اكلتها وكفت بزردومي مثل الحجاره وبلكوة تجرعت ابلعها ذبيت اللفه من ايدي عالسفره
وهزيت راسي اطرد الدوخه كرهت نفسي وضعفي صابني الخفقان والم بصدري … تراجعت بكعدتي ليورا افرك بصدري عسى يخف الالم والدوار داهمني وراسي ثكل احسه بلش يوكع ليورا…..
اخر شي سمعته صرخه ماما بأسمي وماحسيت بعد بنفسي…….
ماعرف شوكت بس حسيت على ضربات ورطوبه على وجهي فتحت لكيت روحي على التخم والكل حواليه وماما تفرك بيدي وتبجي وزهراء تمسح وجهي بالماي رجعت غمضت متجنبه نظراتهم واسمع ماما تحجي
علويه نهله:- ولكم اختكم راح تموت رجم مرة وكعت محد عرف علتها بنتي بيها شي والله بيها شي …
ابو محمد:- نهله.. على كيفج لا تخوفين البنيه …..
هاجر:- يابه كم مرة وديناهه لطبيب كلشي ما بيها تدلل علينا …
سيف:- ياقوت كومي خل ناخذج للمستشفى.. ساعدنها بنات
هزيت راسي بعنف بدون ما افتح عيني يصيبني غثيان بمعدتي اذا شفت وجهه.:- ماريد مستشفى بس اريد انام….
زهراء:- اني اوديج كومي كومتها تسندها وصعدتها لغرفتها نومتها على سريرها وغطتها وراحت للباب تقفله
رجعت كعدت كدام ياقوت ضربت على فخذها بمرارة:- ياقوت احجيلي ولج احجيلي مو موتيني ليش عفتي فارس وقبلتي بسيف فجاة بس تتخبلين من يجي للبيت مدام مو طايقته ليش قبلتي مو بابا انطاج حريه القرار ..
—نصيب..
— ولج عليتي گلبي احجي ولا تكذبين…
— نزلت دموعها تتذكر فارس من يكللها عليتي گلبي لو من يكول عله گلبه لفارس غطت وجهها وتشهك بقهر
-راح تظلين تبجين بدون كلام … انكسر خاطرها على اختها اجت بصفها وحضنتها
كافي توته بداعتي والله كلبي محروك عليج عفتي حتى دوامج هسه الدوام شعلي والكليه شعليها
— زهراء اذا تحبيني وتردين ارتاح سدي المواضيع هاي كلها والله مبيه حيل تعبانه والحجي يتعبني اكثر واحلفج اذا شفتي نورهان كلشي ما تحجين وياهه لا عني ولا عنه ولا تحجين ابد
وهيج كضتها ياقوت نوم ومتقوقعه على نفسها ابوها حجه وياهه علمود الزواج ومقبلت تتزوج بهالسرعه وطلبت منه عالاقل يخلوها للعطله الصيفيه تحاول تأجل هالشي قدر الامكان لانها قربت تتخبل مو كادرة تتقبل سيف ابدا حتى من يجي يشوفها متقبل تكعد ويا وحدهم وهالشي خلاه يتخبل اكثر عليها
جانت لازمه كتاب تقراه بملل وكاعده بالكاع بباب البلكونه مالتها
دخلت عليها هاجر كالعاده بدون احم ودستور وجهها ما يكصه السيف
وكفت فوك راس ياقوت متخصره:- فتحي تليفونج سيف يريد يحاجيج
— ماريد احجي مالي خلك…
— ياقوت احترمي نفسج وانطي ريك طيب لسيف ترا هواي تحمل صارلكم ٣ اشهر مخطوبين كعده ما تقبلين تكعدين ويا
طبكت الكتاب بعنف ووكفت بمواجهتها:- اعتقد هاي جانت شروطي لا تواصل ولا لقاءات خاف مصدك احنه مثل باقي المخطوبين
– وين اكو مخطوبين هيج بابا شغلي عقلج باجر عكبه تتزوجون تصيرين يمه منو يخلصج من ايده وانتي تعرفي مخبل اذا تظلين كالبه خلقتج الصفره بوجهه يطيح حظج.
— هاجر تعرفين شي اشفق عليج لان شايله كميه حقاره بيج مو طبيعيه وان شاءالله هالعدوى ما تنتقل لجهال اخويه .
—احترمي نفسج وجري عدل مدام خايفه على جهال اخوج حتى ميصيبهم شي ويتأذون .
فتحت عيونها على سواد گلبها:- سهله عندج تكوليها حسبي الله ونعم الوكيل بيج وباخوج يارب اشوف بيج يوم يا هاجر كون يحترك كلبج مثلما حاركه كلبي
— گلبت عيونها بملل :- بطلي دراما بطلي وستري على روحج
دك تليفونها باوعتله ودراته بوجه ياقوت سيف يتصل
هاج جاوبي لا يتخبل ويجي هسه
اخذته منها وجاوبته من ورا خشمها:- نعممم!!!
سيف:- مو اجي افركه لحلكج الحلو
-شتريد؟؟؟
سيف:- رايد مرتي شرايد
دمها صار يغلي ومعدتها مغصتها قهر:- مو مرتك اني خطيبتك
ضحك بحقاره:- مرتي حبي مرتي لو نسيتي ابن عم ابوج العقدلنه..
– سيف تعبانه ومالي خلك شتريد..
– ياقوت كافي اتأقلمي واذا عبالج بهالاسلوب اعوفج غلطانه بس الموت يخلصج مني
– ان شاء الله اموت واخلص منك وسدته بوجهه.
ذبت التليفون عالسرير تحاجي هاجر:- اخذي تليفونج وطلعي برا وبعد لا تدخلين غرفتي هاجر ترا اني فقدت عقلي انجنيت بسببكم وتعرفين لا على المجنون حرج عوفيني وطلعي
اخذت تليفونها وطلعت وهي تنافخ
————فارس———
اندك باب غرفته ومدت راسهه تحجي بحماس
:- ابو الفوارس الضلع الماينشلع… صارلنه ساعه جوا بچذب سلم على بت خالك خفت هالبوز …
طفه جكارته وشمر عليها السويج سدت الباب عالسريع ونضرب بالباب
رجعت فتحته الابتسامه شاكه حلكها:- ولا تعرف تنيشن عدل
فارس:- باعي لج اكوم احوس وجهج طلعي…
– الولد جوا شبيك عمه كالت نايم الصبح راجع من الواجب بس ما صدكت متبقى نايم للمغرب انت…
فارس:-هسه انزل روحي شكد لزگه لخاطر الله…
:-مقبوله منك حوووبي مقبووله كدامك ربع ساعه لو تنزل لو تلكاهم فوك راسك…. بااي سدت الباب ونزلت ..
تنهد يعصر راسه بتعب ونزل لكه امجد موجود وبيت خاله اندمج وياهم يحاول يتناسى الي ديحاول ينساه الشهور الراحت.
وكت التعلوله شاف نورهان وبنات خاله برا كاعدات يسولفن ونورهان جانت منفعله ماعرف ليش فضوله ساقه يروحلهن وحس الموضوع يخصه
طلع بحجه يدخن اقترب منهن ‘احساسه جان صح
نورهان:- وهي من يوم الصارت السالفه بعد ما داومت .
رفع حواجبه مستغرب وصاح بنورهان:- نورهاان..
اندرات عليه متوتره ولونها انخطف:- ها
— وجعا شجاي تسولفين فاتحه قناه الشرقيه
نورهان:- مدنحجي هيج سوالف عامه
اشرلها تكوم تتبعه ودخل المطبخ باوعت للبنات بتوتر ولحكته دخلت ورا واندار عليها :- چم مرة اكولن متحجين بهاي السالفه ليش تطلعيني من طوري
نورهان بأسف:- والله مو قصدي بس تدري بت خالك ظلت تسأل لان انت بعد متحجيلها وبالها يمك والله …
— اذا بعدج سمعتج تحجين اطيح حظج عيب لمي لسانج خصوصيات اخوج
حطت ايدها على حلكها :-توبه والله توبه اسفه
اشرلها تروح واندارت تطلع وقبل لا تعبر باب المطبخ ما تحمل وسألها
:- صدك ما داومت بعد؟؟
اندرات عليه وهزت راسهه:- ابد مداومت واجو اهلها اجلو السنه الهه
هز راسه وتركها ودخل … جرت حسره على اخوها الي صح ماحجه ولا فتح الموضوع بس كلشي بي يحجي شكد متأذي الا لسانه ما نطق ودعت رب العالمين يبرد كلبه وينسي
——-زهراء——-
صارلي شهور اداوم بس من غير واهس كلبي محروك على ياقوت مالي نفس لشي جنت متخيله نروح ونجي سوة ونكضي الحياة الجامعيه سوة بس عجزت واني اتوسل بيها
كرار:- هم صفنت ولج ثوله مو احاجيج نزلي ولي اريد اروح…
باوعتله صفح:- شبييك شبيك توك طبكت عوذة يلا باي ونزلت عالسريع تدردم
دخلت اول محاضرة والثانيه خلصت طلعت للبريك ويه صديقاتهه لكت حر واكف بباب القاعه ويحجي بالتليفون وبيده فايل ويشمر منفعل استغربت وجودة هو تخرج شعنده هنا .. سوت نفسها مشافته وعبرته هي وصديقاتها دك تليفونها هو
– ها حر هااااا هم راح تسمعني كليشه ام العلاقات
– دتعاي رجعي انزرعي كدامي لا اجيج ادبسزز تشوفيني وتغلسين عبالج احجي بالتليفون ما منتبهلج
استغبت:- شنو وين اجيك شبيك ..
– انداري اني وراج لا تثوليها بس من يمي تستغبين
– اندارت شافته يتمشي ومكشر بعصبيه.
سدته منه :- بنات هذا ابن عمي هنا بس اروح احجي ويا انتن سبقني شويه والحكجن
ظلت واكفه بمكانهه تتمنى تهفه على وجهه بجنطتها
حر:- عدلي خلقتج عدليها ..وجه ال……
كتفت ايديها:- وجه الشنو؟؟؟
ابتسم:- حلوة لا تخافين ما اعيب عليج.
باوعتله صفح:- همزين هسه اكدر اتنفس واعيش بفضلك عرفت اني حلوة حبي اني احلى منك ومن عشيرتك وانت وجه الچوب…
حر:- يابه اذا ما اكص لسانج اصبريلي كلما انقهر عليج واريد احجي وياج عدل لسانج يذكرني شكد انتي ادبسزز وام…
قاطعته :- ام العلاقات اكلك انت شنو تهددني تخوفني هذولاك عمك وولد عمك روح گللهم زهراء عدها علاقات من جان عمرها ١٥ سنه .. عيونها غوركت كافي ترا ذليتني واحد صچمني وجنت زعطوطه وضحكت طلعتها من خشمي وسويتني ام العلاقات كافي عيب
بهت وجهه وهو يشوفها تبجي اول مرة يشوفها هيج متعود يلاشيها وترادده يحب عرامتها :- شبيج اتشاقه وياج
همست من بين سنونها:- شكد اكرهك لخاطر الله وعافته تمشي سريع
لحكها وصار بصفها:- يابه نتعذر مو قصدي بس احب اسمع لسانج العرم
مسحت دموعها ووكفت :- واني ماحب احجي وياك كافي…
باوع بعيونها :- شكد احبهن لونهن يحير… لا هن خضر لا هن صفر عيون بزون
فكت عيونها مصدومه:- انت شدتحجي؟؟؟؟ اشو متستحي ترا بنت عمك عيب
ظل صافن بعينها:- زهراء انتي ليش ماعندج احساس؟؟؟؟
