رواية وجمعتنا الغربة الفصل الحادي عشر 11 بقلم اماني عمر
جلسا محمد ومريم بالسيارة فى طريقهم الى ايمان ومروان ولم يتفوه آيا منهما بكلمة مع انهما كانا يسترقا النظر احيانا الى بعضهم البعض حتى أوقف محمد السيارة فجأة
ونظراليها بتجهم
مين اللي كان بيكلمك امبارح وعايز منك ايه؟
وأنت عايز تعرف ليه؟ أنت مش مخاصمنى؟
ضرب على المقود بيده وقال بحدة
متجاوبيش على سؤالي بسؤال
هو فيه ايه يا محمد على طول متعصب عليا كده ومش طايقنى؟
امسك ذراعها بقوة وجذبها اليه
لأنى مش قادر افهمك وكل ما أحس اننا خلاص بقينا قريبين من بعض ترجعينا لنقطة الصفر تانى ثم استطرد بعد ان احكم قبضته على ذراعها اكثر
وعلى فكرة أنتى لسة لغاية دلوقتى ما شوفتيش عصبيتي
بدأت الدموع تتجمع بمقلتيها
وأنا مش مطالبة أفسرلك أي حاجة
شد على ذراعها اكثر حتى تأوهت
طول ما أنتى قاعدة في بيتي وفى حمايتي هتسمعى كلامي ثم أردف وهو يصرخ عليها
انطقى بقى مين ده وعايز منك ايه؟
اطلقت مريم العنان لدموعها وهى تجيبه
– ده ابن خالي وعايز يتجوزني ارتحت دلوقتى ولا فى أي أسئلة تانية
غضب محمد كثيرا من نفسه وهو يرى دموعها ولكنه لم يظهر لها ذلك فقد كان وجع قلبه أكبر
وهتتجوزيه؟
ردت محاولة أغاظته
يمكن
بعد قليل وصلا لوجهتهم
يله انزلى
ترجلت مريم من السيارة وهى تنظر اليه بغضب ثم قالت بهمس
ماشي استني عليا والله لهوريك
استقبلهم مروان ببهو الفندق وهو فى أبهة حلة ثم سألته مريم عن ايمان
لسه يا ستى مجهزتش ما أنتى عارفة بقى شغل الستات ثم أردف يا ريت تروحيلها وتستعجليها
تطلع محمد عليها بنظرات حب وهى ذاهبة فلاحظ مروان ذلك
شكلك واقع فيها لشوشتك
رد عليه محمد بدون وعى
بحبها اوى ثم انتبه على نفسه
لا مفيش حاجة من الكلام ده احنا مجرد اصدقاء
رد عليه مروان بسخريه
على بابا برده يابنى ده انا دكتور نفساني يعنى بفهم الناس من نظرة عيونهم
صدقني مفيش حاجة
اجابه مروان بإصرار
هتحكيلى بمزاجك ولا اسيح
استسلم محمد
ماشي ياعم ده انت شبطة
**********************
صرخت ايمان بفرح عندما رات مريم واخذتها بالأحضان
وحشتينى اوى يا بنت اللذينا
ردت عليها مريم بعتاب
قال يعنى انا اللى بعدت عنك بمزاجي
اسفة اوى يا مريم بس لو شوفتي حالة محمد بعد الليلة اياها كنت عذرتينى ده حتى ساب البيت ومعرفنلوش طريق جرة الا بعد كام شهر لما اتصل يطمنا عليه ويقول انه فرنسا
احتضنتها مريم مرة اخرى
على العموم اللى فات مات وانا عمرى ما زعلت منك
نظرت اليها ايمان باسى
محمد حكالى على اللي حصل مع اختك وزعلت جدا 0 هي أزاي اتجوزت الحيوان ده
روت لها ما حدث من البداية حتى اليوم
وناوية على ايه دلوقتى؟
هرجع مصر طبعا قعدتي هنا مبقاش لها لزمة وكمان الفيزا بتاعتى فاضلها وقت قليل وتخلص
يعنى هتنسي موضوع أختك ؟
يعنى أعمل ايه ده أنا كنت قربت اضيع هنا في فرنسا لولا محمد وهى مدينة تعتبر صغيرة امال هعمل ايه فى بلد كبيرة اوى زي امريكا
ومحمد؟
تهربت مريم من الاجابة
الكلام خدنا ونسينا اللى قاعدين مستنينا تحت يله بقى كفاية لكاعة
*******************
وناوى تفضل كده مقضيها خصام وخناق؟
اعمل ايه بقلق طول الوقت عليها وعايزها ع طول جنبى حتى لو متخاصمين مش مهم بس المهم تفضل جنبي
طب وناوى امتى تصارحها بمشاعرك
بصراحة خايف ترفضنى مرة تانية ساعتها الأمل اللي جوايا هيختفى للأبد
بس كمان لو فضلت مستنى كده ممكن حد تانى يخدها منك
تذكر محمد المكالمة التى وردتها من ابن خالها وتجمدت ملامحه بمزيج من الخوف والغضب
معاك حق بس كمان مش عايزها تفتكر انى بستغل انها عايشه في بيتي و
لم يكمل جملته عندما رأى ايمان تشير لهم من بعيد فنهضا استعدادا للرحيل
سألته ايمان
حابب تودينا فين الأول يا محمد؟
النهاردة هنخليها رحلة ثقافية وتاريخية وبكرة ترفيهية وأول حاجة هخدكم على برج ايفل اهم معالم فرنسا وبعدين متحف اللوفر وبعد كده هنروح قصر لويس الرابع عشر المذهب
نظرت اليه ايمان فى حماس
شكلها هتبقى رحلة حلوة اوى
*****************
احضر اياد البيتزا للجميع ولكنه عنما دخل الشقة لم يجد أحد
راحوا فين دول
ثم اصابه بعض القلق
0معقول تصالحوا ونزلوا مع بعض
فكر ان يتصل بمريم ويسألها ولكنه قرر ان يتصل بمحمد أفضل
ولكنه وجد تليفونه مغلقا ثم اتصل بمريم ووجد تليفونها خارج الخدمة فأصابه القلق اكثر
انا لازم اتصرف بسرعة ماينفعش اسيبهم يقربوا من بعض اكترمن كده
*********
ترجلا من السيارة بمكان قريب من برج ايفل ليستمتعوا بالسير فى الطرقات فلمحت ايمان أحد الاشخاص يعزف على الجيتار ويغنى ويتجمع حوله الناس فركضت عليه واستأذنته ان تأخذ منه الجيتار لبعض الوقت ثم اعطته لمحمد
عشان خاطرى اعزفلناٍ حاجة اشتقت اوى اسمع عزفك وصوتك
أخذ محمد منها الجيتار وبدأ بالعزف وقد زاد عدد المتفرجين عندما سمعوا لحن شرقى وبدأ ينشد اغنية
حياتى وهو مش فيها سنين عدت رضيت بيها
وفاكر لو قابلت عينيه عادى جدا هعديها
وديك ياللى افتكرت نسيكى قابلته الليلة واتهزيت
طب ازاى في حاجات بتموت وتيجى الصدفة تحييها
وافتكرت لما جت عينى في عينه سينينى معاه
كان يغنى بكل احاسيسه ويتطلع طوال الوقت بمريم كأنه لا يرى سواها اما هى فقد أغمضت عينيها ليخترق صوته واحساسه كل خلجاتها
وكانا مروان ومريم يتطلعان بهما ويبتسما
بعد ان انتهى صفق له الجميع بحرارة وأخذت ايمان قبعة المغنى الأصلي وجمعت النقود من الحشد الغفير الذى تجمع ثم أعطتها له وشكرته
8**********************
سوهاج
ايه يا حيلة كلمت السنيورة؟
رد عليها بنفاذ صبر
ايوة ياما كلمتها
وجالتلك ايه على طلبك؟
جالت لما ترجع هتبجى ترد عليا
جالك كلامي لو كانت عايزاك كانت هتوافج على طول بس المماطلة دي معناها انها مش موافجة
رد عليها عادل بغضب
وبعدين معاكي ياما انتى لى بتحببي كل شوية تجلجيني وتشككينني فيها
عشان هى دى الحجيجة ولا انت بتحب اللى يكدب عليك ويجولك كلام يريحك وخلاص
على العموم هى جاية جريب وياخبر النهاردة بفلوس بكرة يبجى ببلاش
كان على وشك الصعود لغرفته حين شاهد زينب وهى تخرج من المطبخ
ازيك يا سي عادل
أهلا يا زينب عاملة ايه؟
كويسة طول ما أنت كويس وحسك فى الدنيا
بتعملى ايه هنا؟
خالتى طلبت من امى اجعد معاكم يومين اتسلى انا والبنات مع بعض
ماشى
تركها وانصرف وهى لا تزال تنظر اليه
خليكى كده خايبة كل الى تجدري تعمليه تبصى لخياله وهوماشى
يو يا خالتي يعنى عايزانى أعمل ايه
تتنصحي كده وتعملى زي البنات تلبسي هدمة عدلة بدل العبايات السودا دي والقمطة اللي على راسك اللي تطفش بلد
ريحى نفسك يا خالتي أنا مش فى دماغه أصلا حتى لو عملت ايه
ياستى هنجرب يعنى احنا خسرانين ايه مش احسن ما تسبيه للمصراوية السهتانة تاخده منك
ماشى يا خالتي اعتبرينى حتة جماشه وفصليها زي ما أنتى عايزة
طب يله بينا
على فين
هتعرفى بعدين
*******************
متحف اللوفر
ذهبا مروان ومحمد الى المكان المخصص للأعمال الفنية والمنحوتات بينما مريم وايمان ذهبنا الى المكان المخصص للتراث الإسلامي والآثار المصرية لاحظت ايمان ان مريم ومحمد يتحدثان باقتضاب ويتجنبا النظر الى بعضهم البعض فاقتربت منها وهمست فى اذنها
هو فى ايه يا مريم ليه انتى ومحمد بتتعاملوا مع بعض ببرود كده انتوا متخانقين ولا ايه؟
لا أبدا مفيش حاجة من دى
ده اللى انتوا حابين تثبتوه لينا بس للأسف لا أنتى ولا محمد شاطرين فى التمثيل
نظرت مريم بأعجاب لذكاء صديقتها
انتى من امتى يا بت انتى بقيتى ذكية كده
قصرى وهاتى من الأخر ايه اللي حصل بينكم تانى
روت لها مريم ما حدث فردت عليها ايمان بأسي
معلش يامريم محمد بس حساس زيادة عن اللزوم وعنيد حبتين بس والله قلبه مفيش أطيب منه
تنهدت مريم تنهيدة قصيرة
عارفة
وقف مروان مشدوها امام لوحة الموناليزا الشهيرة
ايه الجمال ده كله 0متشكر اوى يا محمد انك جبتنا هنا
هوريك مكان تانى هيعجبك أوى
أخذه محمد الى المكان المخصص للتماثيل الرومانية وتقابلا هما والفتاتان هناك
ثم قالت مريم بحماس
المكان حلو جدا وكبير اوى ومش هنقدر نشوفه كله فى يوم واحد
رد عليها محمد
طبعا ده أكبر متحف فى العالم ومساحته اكتر من 650000قدم وبه أكثر من 35000 تحفة وأثر
نظر اليه مروان بدهشة
وانت امتى يا خويا عرفت كل المعلومات ديا
– انا متعود أى مكان ازوره لازم أقرا واعرف كل حاجة عنه فى الاول
*****************
اتصل الكوماندا بالدكتور كامل
عملت ايه فى الموضوع اللى كلمتك فيه؟
شكلك متضايق اوى 0حصل حاجة جديدة
حاجات كتير ولازم نخلص من محمد النهاردة قبل بكرة
واشمعنى دلوقتى منا طلبت منك قبل كده نصفيه وكل مرة كنت بترفض
كان لسه له عمر ولكن دلوقتى آن آوانه
مقدرش اخد قرار فى الموضوع ده لوحدى وقبل ده كله لازم نقعد مع بعض ونتكلم
