رواية عروس الجبايش الفصل الثاني والاربعون 42 بقلم ياسة – تحميل الرواية pdf

femxdomمنذ 6 ساعات

0 19 دقائق

رواية عروس الجبايش الفصل الثاني والاربعون 42 بقلم ياسة

لم يكن اختياري أن أكون مجرد ظل يتبع نورها، ولا أن يكون حبي لها همسًا أبديًا لا يسمعه أحد سواها. لكن عندما أطبقت الظروف، وضاقت بها الأرض بما رحبت، لم يكن أمامي خيار سوى أن أُعلن عن وجودي كـجدار صلب يحميها، حتى لو كان ثمن ذلك هو أن أحتفظ بها إلى جانبي بعقد، لا بقلب التضحية الكبرى ليست أن تمنحها ما تريد بل أن تمنحها الأمان الذي تحتاجه

حتى لو كان هذا الأمان يعني أن تبقى حبيسة حدود المصلحة، بينما يبقى قلبي خارج هذه الحدود، يحرسها بصمت.”

…………………….

يُـمن :- عمي من سمع تميم يگول اعقد عليها بسرعة ردله

— مو وكت سولفك الطايح حظها بيا حال احنه

— ما جاي اشاقة ما عندك حل ثالث لو تروح وياهم لو تعقد على واحد من عدنا

عمي باوع عليه حاير وانا من الدموع ما گمت اگدر افتح عيوني رجع مـراد گال

— كول الهم عاقدة عليها ابني وراح ازفها باچر بدون عرس

هاشم :- شلون هيج يمعودي هاي السالفه جبيرة هذول عمامها مو لعب الموضوع

تميم :- انعل الجابهم يابة لا تخبلني خليني اتصرف وياهممم

— صوتك بسسس ما اسمع صوتك اسكت

حچى هيج واجى عليه لزم ايدي وگعدني على القنفه وگعد يمي و گال

— شوفي عمو حبيبتي راح اروح اكلهم الأبنية مقرية فاتحتها واخليج ترحين وياهم اليوم وباجر اجي اخذج منهم بحجه زواج ماشي

— لا فدوة عمي يموتوني والله

تميم :- خررررب الگ…. يابةةة

— وقز القرط انطينااا مجال نحچي

حچى هيج ورجع باوعلي وگال

— ما اگدر عمو حبيبتي إذا بقيتي هنا يأذونج اكثر واني مالي حق اطالب بيج حتى القانون ما يمشي ويا العشاير عدنا

تميم :- گتلك اعقد عليها وانعل ابو الجابهم

يُـمن :- لا ما يصير شلون اتزوجك انتَ اخوية

تميم :- دانجبي لا اللزكج بالحايط

رجعت ابچي بصوت عالي وهمَ حايرين رجع عمي گـال

— روحي وياهم وباجر اجيب مشيه واجي اخذج منهم التميم

متت من البچي و خالتي تبچي وياي رجع گال

— والله العظيم وداعتج وداعت امج بس الليلة تنامين يمهم بس اسكتهم اليوم وباچر احلها وياهم لو اعرف على جثتي ارجعج

ام تميم :- وإذا ما خلوها ترجع شلون

— مو بكيفهم اني اعرف اتصرف وياهم بس اليوم اريد امشي على مايهم حتى لا يلزمون لزمه علينا

تميم :- يابة ما تروح وياهم لو اعرف اموت

هاشم :- بس اسكت انتَ بس لا تتدخل مللتني ترى كافييي

— يابة يموتونها

— اتفق وياهم وابصمهم يلا انطيها

رجع باوع عليه و گال

— روحي جهزي غراضج حبيبتي عمو وانتَ مراد جيب الختم و قلم ورقة بيضه

هوَ گال هيج وانا نطيت من البچي رجع باسني براسي ويسكت بيه ويحلف محد يحاچيني وبس اليوم اروح وياهم وراها گام ومراد وياه وانا طبيت للغرفه وخالتي وياي

انا ابچي وهيَ تبچي عليه طب ورانا تميم

وگال

— تليفونج اخذية وياج وضميه بدون مايشوفونه راح اشدلج رصيد وافعلج نت منا الباجر انشوف شراح يسوي ابوي

— والله يموتني والله

— والله العظيم اللي يمد ايده عليج اكتب بيه اربعة ارهاب وداعت امج بس اليوم خلينا نمشي وراه ابوي هوَ اعرف بسوالف العشاير اتحملي بس اليوم وباچر لو اعرف اطب اشيلهم كلهم ارجعج

ما جاوبت بس انتهيت من البچي رجع گال

— جيبي تليفونج

شلت النقال انطيته اله اخذه وطلع بيه

وانا ضميت جم قطعه بالجنطة و ميته من البچي عيوني عمت وخالتي وياي انتهت وحتى زهراء واگفه يمنا دقايق بسيطة ورجع طب تميم علينا وگال

— يمه بس عوفنا وحدنا شوية

خالتي گامت طلعت وزهراء طلعت وياها سد الباب وراهن و اجى يمي قريب وگال

— شديتلج رصيد وفعلتلج نت و لگيت بُـرهـان مراسلج، شنو بعده يتواصل وياج ويريدج

سكتت ما حچيت رجع گال

— لججج ردي خرب اهلج ردي

— اي

— يريدج الهسه

— اي

— دگي عليه بسرعة

— ليش

— دگي على النت وانطينااه بدون اسئلة

دگيت على النت وانطيتاه اله اخذ النقال وطلع برى ما ادري شراح يسوي وياه رجعت خالتي طبت يمي وعمي ومراد يم عمامي بالديوانية

قرابة النص ساعة عمي ومراد بعدهم ويا عمامي وتميم برى والنقال عنده وانا ما خليت لا دعاء ولا امام ولا اية تعتب عليه رجع طب تميم وسد الباب ما يريد زهراء تسمع گعد يمي وگال

— اليوم روحي وياهم و باجر من الصبح راح يجي ابو بُـرهـان يخطبج منهم

ما حچيت شي بس دموعي تنزل

ام تميم :- يا بُـرهـان هذا

— سالفه طويلة بعدين احچيلج يُـمن بُـرهـان يگول يعرفهم زين و يگول الحل والربط بـ ايد جدتها صدگ هذا الحچي

— اي صدگ

— خوش باچر امه وابو يجون وهوَ يحچي ويا جدتج يگول اني اقنعها

— يعني راح يتزوجني

— اي يالططوه ما تعرسين غير بمصيبة خرب حظج

سكتت ما حچيت بس دموعي تجري رجع گال

— ما عندج غير حل لو اني لو بُـرهـان نعقد عليج منا لمن تگوم امج بسلامة

نفس الشي ساكته ما ادري شگول و شـرد

و شـحچي رجع گال

— حتى لو ما تردينة الخاطر مصلحتج اقبلي وسكتي ابوي راح يتفق وياهم محد يأذيج وباچر راح نجي نخطبج وننهي سالفة عمامج

ما جنت اجاوب ولا احچي لان اصلاً ماكو شي ينحچي وانا انتهيت رجع باوع الامه

و گالها

— لا تفتحين هذا الموضوع گدام زهراء ما اريد اخوها يعرف لان إذا عرف راح ياخذها من عمامها غصباً عليهم ونرجع النفس الخ… من جده وجديد

خالتي سكتت وتباوع عليه و ميته من القهر رجع عمي فتح الباب وطب علينا اول ما طب تميم سأله

— ها شگلت الهم

— گلت الهم الابنية مقرية فاتحتها وباجر نجي عقد الها شيخ واخذت منهم تعهد محد يوصل يمها ولا احد يمد ايده عليها

— حددت المن قارين الفاتحة

— لا ما حددت

— خوش حچي باچر الصبح يجي محمد

ابو بُـرهـان علينا ونروح نخطبها

— وشعنده محمد جاي

— يخطبها

— المن يخطبها

عمي حچى هيج متفاجئ رجع تميم ردله

— البُـرهـان

— شنو البُـرهـان شتحچي انتَ

— يابة سالفه طويلة عود اني احچيلك بس اصبر عليه هسه و خلينا نفصها وياهم

و المهم يصير عدهم علم الابنية مقرية فاتحتها وهذا هوَ

خطيه عمي صفن صفنه داخ بزمانه طب مراد علينا و تميم بسرعة گام ويگوله

— ابو رضاوي حبيبي بس احچي ويا زوجتك لا تنطي خبر الاخوها بموضوع عمام يُـمن لان مناف اذا يسمع معناها اجته على طبق من ذهب و هذول جبانا و يخافون منه واكيد راح يهددهم وميه بالمية يشتريهن بفلوسة و بمنصبه وهاي المسكينة تروح تصير ضحية من جديد وتطلع من مصيبة وتفوت بمصيبة اكبر منها

مراد سكت ما رد و انا گمت لبست جبتي وعبالك وجن ماتو اهلي اليوم وراح اروح ادفنهم، الحيطان تبچي على حالي انتهيت لحد ما طلعنا من الغرفه عمي گال

— من تشوفينهم سلمي عليهم وبوسيهم سايريهم بابا منا الباچر

ودعت خالتي وزهراء وطلعت لگيتهم واگفين بالباب كلهم والدنيا لليل و جايين بسيارة بيكم بس شفتهم انرعبت وجوهم ما يگصها السيف حاقدين عليه وكارهيني كلش ، اجيت عليهم سلمت محد بيهم باسني بس هيج سلام من وره خشومهم ردوا

صعدت وره بالبيكم والهوه يلعب بيه والدنيا لليل وبداية برد اثنين منهم صعدوا يمي وغازي بالصدر گاعد

مشت السيارة و طلعت من الفرع وعمي والولد وخالتي واگفين بالباب و يباوعون عليه

وره ما مشينا شفت عمي شلون واگف متت عليه يمكن راح ينجلط من گد ما صعد ضغطه وانقهر بس ما بـ ايده شي الرجال

مشيت وياهم وانا منتضره مصير مجهول الله وحده يعلم بيه ، عمامي الاثنين جانوا گاعدين يمي و يسولفون على بيت عمي هاشم وعلى الاثاث والخير و يتحسدون امي وين لگته وين شافته ويرجعون يحچون عليه شلون طالعة على امي

و لگيتلي واحد عنده فلوس الهسه

ما يدون منو هذا بس لان عمي گالهم قارين فاتحتها توقعوا واحد من ولد عمي

الطريق صار شطوله عليه والبرد احسه بعظامي حطيت راسي بين رجليه ودموعي تصب على حالي وحال امي

ساعة ساعتين ثلاث ساعات واحنه بالطريق

لحد ما وصلنا البيت جدي الدنيا ظلمة والناس نايمة ولا بشر طالع ولا مخلوق گاعد

نزلت و جنطتي بـ ايدي وجسمي يرجف من الخوف والبرد اول ما طبيت على غرفتنا القديمة ما بيها احد و لا بيها فراش وكلها تراب وحتى فارغة شايلين الغراض منها

عمي غازي طب وري وباوع عليه وگال

— خوش ماخذات الجيش والشرطة بصفجن ويحطون شروط علينا ويبصمونا وياخذون تعهدات منه اي موش سهلة يبنت اخوي يصير خير مكيفه تردين تاخذ مثل امج وترد لغاد موش من عيوني بس خل الليلة تعدي يبنت اخوي والصباح رباح

حچى هيج دفرني بطني طحت بالگاع وبعد ما گمت ضليت بس دموعي تصب رجع طلع من الغرفة وانا ضليت طايحة بالگاع

وللصبح لا نمت ولا غمضت گاعدة فوك الترابة و عيوني الما بطلت دمع

من تأكدت منهم ناموا گمت شلت البردة وباوعت عليهم من وره ماكو احد كلهم طبوا بغرفهم

رجعت للجنطة طلعت النقال وفتحته همزين ربي متروس شحن فتحته لگيت تميم دازلي من توصلين دزيلي بسرعة كتبتله وصلت بس وصلته بسرعة قرأها رجع كتبلي

— خو ما حاچوج

— لا

— شلونج زينه

— لا مو زينه

— بس يطلع الضوه نجيكم اتحملي

— امي شلونها ماكو خبر منها

— ان شاءالله تصير زينه لا تفكرين المهم هسه صيري قوية

— اذا ما خلوني ارجع شلون

— انعل والديهم والله باعي نامي ساعة ارتاحي والله يسهل الصبح

— عمي زين

— لا مو زين همَ انتِ وهم امج شلون يصير زين بعد

— سودة عليه

— ديري بالج على نفسج وخليج نبها اي شي يصير دزيلي ماشي

— ان شاء الله

بعدني احچي وياه واجتني رساله من بُـرهـان يمكن شافني متصله كتبلي بيها بس نقطه

من شفت رسالته عرفت يريد يتأكد إذا انا لو غيري فاتح الحساب بسرعة رديتله

— انا بيت جدي

— زينه

— لا

— الصبح ابوي يمكم ماشي

ما جاوبت رجع كتبلي

— يُـمن حتى لو كارهتني وما ترديني بس وافقي الخاطر نفسج والله العظيم وداعت عيونج بس تگوم امج بالسلام اعوفج الحال سبيلج وابد ما اجبرج عليه المهم هسه بس اخلصج منهم باعي حسبيني هسه طوق نجاة بس اعبري بيه البر الآمان وراها شوفي حياتج ماشي

— وإذا ما قبلوا

— شوفي مو جدتج يمها الحل كله وعمامج بـ ايدها

— اي

— صادقيها قشمريها اغريها خليها تصف بصفج والباقي سهل

— شلون وهيَ ما تحبني

— قشمريها بكل الطرق مو تحب الفلوس اشتريها بالفلوس لحد ما ارجع

— ما جبت وياي فلوس شلون

— يا بابا يا حبيبتي گوليلها خطيبي ينطيج ويشبعج بس وافقي عمري انتِ بس انتبهي وشغل عقلج صح وخليها بصفج لا تشغلين بالي حبابة

— ان شاءالله

— إذا تگدرين تخليني احچي وياها

— اخاف يكتلوني إذا درو عندي نقال

— لا تحچين على التليفون اختبريها بالاول يلا

— اخاف

طلع عندي جار الكتابة وانوب وگف وراها طلع جار الكتابة و نفس الشي وگف يمكن حاير شـ يكتب وراها بشوية كتبلي

— لا تگولين اخاف اني وياج صح بعيد عليج بس ما اعوفج لا تخافين من شي ما اريد اسمع هاي الكلمة مره ثانية مفهوم

ما جاوبته رجع دزلي

— يُـمن لا تقلقيني فوك هذا القلق صيري قوية لا تخلين بالي يمج حبابة مره وحده صيري شجاعة و فكري عدل شغلي عقل وفكري حبابة حبيبتي

— زين وإذا قبلوا وانخطبنا شلون بعدين

— عود نفصخ لا تفكرين بهذا الموضوع مستحيل اجبرج عليه مستحيل أأذيج

— شوكت يجي ابوك

— باجر الصبح يمكم

— شلون قبلوا هوَ وامك

— شلون قبلوا هذا مو مهم المهم هسه انتِ وهذا هو

— رحم الله والديك وگفتك هاي ما انساها طول العمر الله يستر على اختك ان شاءالله

— ويستر عليج ويحفظج من شرهم حبيبتي انتِ و هسه طفي التليفون ونامي وارتاحي حتى لو ساعة وحده تنامين بس المهم ريحي دماغج و اعصابج يلا عمري البطلة الحلوة سمعي الكلام و ريحي نفسج ساعة

— ان شاء الله

— تصبحين على خير واول ما تصحين دزيلي ماشي

— ان شاء الله تصبح على خير

— وانتِ الخير اهله

طفيت النقال و ضميته وحطيت راسي على الجنطة و غمضت عيوني بلا فراش وصدگ بس غمضت نمت حتى للصلاة ما فزيت الساعة بالسبعة گعدت على صوت جدتي

تگعد بيه و عوجيتها بـ ايدها فتحت عيوني شفتها فوك راسي بسرعة گمت من مكاني وحظنتها دفعتني و تگول

— ميلي لغاد بنت الناهبة

ما جاوبتها بس احس متت من القهر رجعت گالت

— ياهو هذا القاري فاتحج ولج

سكتت ما ادري شگول اخاف احچي وتموتني لو درت بيه ابن خاله رائف رجعت گالت

— ردي ولج ياهو هذا

— بُـرهـان

— يا بُـرهـان

— يعود البيت عمي حاكم

— شنهي من عمومتنا

— لا بس يعود المرت عمي حاكم

— شصيـر منها

— أبن اختها

هيَ سمعتني گلت ابن اختها وهي بالعوجيه استلمتني ركع على ظهري و راسي و رجلية و مو هاي الگوه تمشي وتتحرك طلع بيها كل الحيل موتتني موت ضليت بس اهامش بـ ايده منها تكتل بيه وتصيح

— يالعايقة يا الدايحة عفتي زلمتج عليه ولج تمعشكتي ويا أبن خالته يا….

— لا والله جده لا هسه هوَ خطبنه هسه ما صار هواي والله

— لا شافج الله يا بنت…. عليمن اطلعين على ميمتج بذمه الزلمة وشردت

طب عمي غازي على صوتها لگاها اطگ بيه وتغلط وتفشر سألها شكو گالتل

— هاي العايقة طلعت عاشكة ابن خالة رجلها

هوَ سمع هيج وهوَ عيد واجى غير موتني غير نهاني خشمي گام يصب دم و گصتي ورمت من گد رگعني بالحايط موتني موت وهذاك الفشار الما يلبس عليه ثواب

وجدتي واگفه يمه وتگله بعد ايدي عدك اياها هاي بنت ال…. ولك تريد تصخم روسنا وين صايرة بيا دين بيا شرع تاخذين ابن خالة زلمتج يا… يا ام الزلم

طحت بالگاع ما اگدر اوگف بعد موتني موت من شافني طحت عافني وطلع وجدتي ضلت واگفه وتگول

— الدهر الدهرج ولج تردين تصخمين وجوهنا جدام الوادم يمه اله اخليهم يدفنونج گبل لا تعملين هاي العملة

لا جاوبتها ولا رديت ضليت طايحة بمكاني لا احرك ايد ولا رجل وهيَ كملت حچيها وغلطها والفشاير وراحت طلعت

لا اگدر اخابرهم واگلهم اخاف اطلع النقال ويجون يشوفوني ولا اگدر احرك روحي موتوني موت

ساعة كاملة انا طايحة بالگاع انوب عدلت روحي بيه ما بيه و ضليت بالغرفة ودموعي تصب عشرة عشرة

ضليت كل شوية واگول هسه يجون هسه يطبون بس ماكو تأخروا خلص الصبح والظهر وهمَ ماكو واحس تعبت وبعد ما اگدر اتحمل جسمي يرجف لا اكل ولا شرب ولا نوم وخوف وقلق وكتل وامي

الما ادري شصار بيها ما صار

لحد ما خلص الظهر و اجوا عمي هاشم وتميم وابـو بُـرهـان واثنين من عمامه سمعتهم گعدوا برى بالحوش وعمي غازي يحچي وياهم

جان صوتهم ناصي ما اسمع كل الحچي وراها سمعت عمي هاشم يگول

— قارين فاتحتها من زمان بس جنه منتظرينها تخلص جامعة يلا نعقد الهم

غـازي :- لا والله ابو تميم الابنية ما ننطيها

— ليش ما تنطيها الولد مشى عليها و إني حچيت وياكم من البارحه بالموضوع

— اي بس ما گلت البُـرهان

محمد :- وشبيها بُـرهـان

غازي :- ما بيه شي بس ما يصير نسيتوا ابن خاله رجلها القديم

— وإذا ابن خالته هاي دنيا وكل واحد ونصيبة وقسمتها بيها و يُـمن و رائف زواجهم صار بدون رضاهم لا هيَ تريده ولا هوَ يريدها و قسمتهم ما دامت وكل واحد راح الحال سبيلة بعد وين المشكلة

— يو عدكم ماكو مشكلة وعادي عدنا عيب وزحمه المراه تاخذ ابن خاله رجلها وهوَ بعده عايش

هاشم :- صار سنين من اطلگوا والسنين اكلت وشربت عليهم و رائف مسافر وماله رجعه للعراق و حتى بُـرهـان مسافر برى العراق وهذا شرع الله بعد ليش تعترضون عليه

— اي صدگ شرع الله بس زحمه جدام العالم شتگول علينا الوادم

تميم :- تگول اللي تگول هسه شعلينا بالناس ما دام الله بعظمته قابل ومحلل الموضوع

— هاي السالفه ما صايرة عدنا ولا راح تصير والبت ما اگدر انطيها اله تعذروني

انا سمعته گال هيج وانا إحس شلوطت تشلوط متت دخيلك يا ربي ساعدني انحكمت بالعدام وبعد ما اخلص منهم للموت

رجعوا عمام بُـرهـان يحچون وياه و ابو وعمي هاشم وتميم بس قافل وما قبل

لا بــ بُـرهـان ولا ارجع وياهم

ساعة ساعتين ثلاثة لحد المغرب وبعدهم

عدنا ويتوسلون ويتوسطون ويقنعون وماكو وانا مثل الطير المذبوح

اخر شي گاموا راحوا سمعت عمي هاشم گالهم اريد اشوفها ، وراها اجى عمي ناهي گال

— تعاي ليهم بس لا تگولين على طگت غازي ويو حچيتي ما تلوين غير روحج

طلعت ويا عمي لگيت ابو بُـرهـان و عمامه طالعين وبس عمي وتميم واگفين بالحوش انا شفتهم وانا نطيت من البچي عمي هاشم حظني و يطبطب على ظهري وانا ابچي بحظنها وهوَ حاظني گال بصوت ناصي

— ما اعوفج والله لا تخافين

— امي شلونها

— اليوم زينه الحمدلله الدكتور يگول اكو استجابة بحالتها

— عليك الله

— اي والله

— الحمدلله الف الحمدلله

تميم باوع عليه وميت من القهر وراها مد ايده بجيبه طلع محفظته و طلع منها ورقة انطانيها ما قبلت اخذها غمزلي بمعنى اخذيها رجعت اخذتها منه و رجعوا يصونهم عليه و يصوني على روحي وراها راحوا

راحت روحي وياهم وانتهيت وراهم عيوني عمت وقبق راسي احسه طار من مكانه

وبس طلعوا اجت جدتي جرت الورقة من ايدي و تباوع عليها وتگول

— يالمجيرة ما عرفتي تكوشين عليه هذا الضابط ابو الفلوس رحتي عشكتي هذاك ابن خالة زلمتج

ضمتها بشليلها و رجعت تگول

— روحي صبيلج زاد وتسممي

رحت للمطبخ طابخات مركة عدس وتمن ما باقي بس الحكاكه صبيت شوية مركة واخذت خبزة وطبيت للغرفه و اكل لگمه وابچي عشرة ميته من الجوع اسمع عمي غازي يحچي عليهم ويسب بيهم ويسب بعمي ويفشر عليه و باقي عمامي نفس الشي بس جدتي ساكته

صفنت بسكوتها شعجب ساكته معقوله على مود الورقة مال تميم گمت رفعت البردة واباوع عليهم اريد اطلع النقال بس اخاف يطبون عليه ويموتوني گلت خليني اتاني ما اجازف لحد ما ينامون

وصدگ لليل كلش من ناموا طلعته وشغلته اول ما اشتغل جنتي الاشعارات

من عمي وتميم ومراد وريام بُـرهـان وحتى ورود صدگ ما تدري بـ اخر الاخبار بس اكيد داگه تسأل عليه

اول ما فتحته دگ عليه بُـرهـان يمكن جان متانيني مدري گلبه علمه بسرعة رديت

بس گال الو رجعت ابچي من جديد رجع گال

— بس لا تبچين الخاطر الله بس بطلي بچي رحمي حالي عاد وبطلي بچي مو راح اموت

— عمي بعد ما يخليني ارجع

— مو بكيفه

— ما قبل بيك

— اعرف بس لا تشيلين هم عگب باجر راجع للعراق و اني اتصرف وياهم

— وإذا ما خلوني ارجع البيت امي شلون

— بس هدي نفسج واني اتصرف ماشي

سكتت رجع گال

— تميم انطاج فلوس مو

— اي

— انطيهن الجدتج

— هيَ اخذتهن اصلاً

— كلش حلو هسه شـ اريد منج باجر الصبح ترحين عليها و تحچيلها بالفلوس والسفر و الذهب وهيج شكو شي تحبه ذكريه گدامها اغريها

— هيَ ما تحچي وياي

— انتِ احچي وياها گوليلها إذا تزوجت اسفرج تزوين وتعمرين واشتريلج ذهب

— انتَ گلت التميم ينطيني فلوس

— اي گتله گدام جدتها انطيها

— شعرفك بيها تحب الفلوس

— اعرف هذا الموضوع نقطة ضعفها

— انتَ وين تعرفها

— بعدين احچيلج المهم هسه بس تقشمرينها لحد ما اوصل

— ان شاء الله

— خو ما ضربوج أذوج

سكتت ما جاوبت رجع گال

— ضربوج ؟

— من درو بيك خاطبني

— لا يا ناقصين الغيرة والشرف ليش ما گلتلي العمج مو ماخذ منهم تعهد

— خفت

— خفتي شنو لج بابا إذا تسكتين يموتونج

— هوَ انا اصلاً ميته

— اسم الله عليج حبيبتي انتِ لا تحچين هيج صيري قوية بس هاليومين وباچر امي وريام راح يجن عليكم

— شوكت يجن

— بالعشرة الصبح هنَ يمكم وريام راح تنطيج البور مالت شحن خليه يمج اخاف يخلص تليفونج شحن شحني بيه

بقى يحچي وياي ويعلمني شلون احچي ويا جدتي وشلون اقنعها جان كلش مركز بجدتي وما يذكر عمامي ابد لحد ما راح وراها راسلت تميم اسأل على امي رد

كلش زينه و رجع يسألني شلوني وطلع عنده خبر بجيه ريام و خالتي لميعة علينا باجر وراها سديت النقال وضميته وطلعت من الغرفه مشيت الغرفه جدتي لگيتها نايمة حرت اريد شي انام عليه الگاع باردة وكلها تراب شلون انام عليها متت من البارحة لليوم حالي حال الحيوان

ما گدرت اخذ فراش رجعت للغرفه طلعت دشداشة من الجنطه فرشتها وحطيت الجنطه مثل المخدة و تمددت عليهن

ما گدر انام و دموعي تطيح منا ومنا وحالتي الله وحده يعلم بيها انوب تعبت من گد البچي والقهر و غفيت فزيت على صوتهم يردون يطلعون للحلال والزرع

تانيتهم طلعوا وگمت غسلت وتوضيت ورجعت صليت و سجدت و ضليت ساجدة وابچي واشكي الربي لحد ما غفيت وانا بين ادين ربي

انوب رجعت فزيت بالسبعة على صوت جدتي تگعد بيه تريدني اطلع اشتغل

گمت غسلت من جديد و نظفت البيت كله غسلته حتى غرف عمامي نظفتهن والمطبخ والحوش ما خليت شي يعتب عليه

ومن كملت جدتي گالت سويلي جاي رحت سويت الها جاي واخذته ورجعت للمطبخ صبيت الروحي و طلعت خبزة من الجدر مال الخبز يابسة گمت انگعها بالجاي واكل بيها على السريع اخاف لا جدتي تجي وتشوفني

لحد ما شبعت بالخبزة اليابسة واستكان الجاي حمدت ربي و شكرته و طلعت اخذت دشداشة وطبيت سبحت انا سبحت لو طاحت عليه طرگاعه من جدتي تسودنت الماي راح يخلص بنت الهيج بنت الهيج ما خلت غلطه ما غلطتها عليها منا لمن طلعت بـ ايدي الشامبو شافتني لازمته گالت

— شنهي هذا

— شامبو

— وين يحطونه

— للشعر مثل صابونة الرگي

— مسعدة بنت مسعدة كله بشانعو تغسل جيفتها

صفنت وگلت اجتني فرصة خليني استغلها

و افتح الموضوع وياها شلت الشامبو ونطيته الها

يُـمن :- تردينه يخبل يسوي الشعر وريحته طيبة

ضحكت وردت

— اي جيبيه انعم الله مال الغمان اكله براحه

غلست على ردها ورجعت گلت الها

— راح اجيبلج صابونه بعد مال وجه

حچيت هيج وركضت للغرفة جبت الصابونه واجيت وراها لگيتها طابة الغرفتها ولازمه الشامبو وتشم بيه ومكيفه طبيت وراها وانطيتها واگول

— هاي صابونه غسلي وجهج بيها تسوي الوجه يخبل

— اصير نفس خلقتج وخلقة اميمتج

— اي وبعد احلى

— طلعتن تحطن وتعدلن وما تعلمن الوادام والله عمي گ…

سكتت ما رديت بس احس بروحي تعبت ما اتحمل هذا الحچي على امي وهيَ هسه بهذا الحال رجعت گالت

— هذا أبن رجل امج عمامج يگولون ضابط وعنده خير من الله صدگ

— اي صدك

— جا ما عشكتيه وخليتنا نستفاد منه

— مزوج وعنده جهال

— ويو متزوج شني مره تاكل مره چا امج موش اخذت ابو

— جده بُـرهـان هم عنده فلوس اكثر من تميم

— ياهو هذا بُـرهـان

— الولد اليريد يخطبني

— چا عمج يگول اسمه محمد موش بُـرهـان

— لا ابو اسمه محمد هوَ اسمه بُـرهـان

— شني هم ضابط

— لا دكتور جامعي يعني جاي يدرس دكتوراة بالبنان

— وين صايرة هاي لبنان هناك بـبغداد

— لا برى العراق

— عايش بالانجليز

— لا دولة عربية مو اوربية جده تدرين شگد عدهم فلوس

— شعدهم بيوت سيارات

— اي عدهم سيارات وبيوت خير من الله

— شيشتغل

— يدرس طلاب

— شگد يحصل

— خير من الله ومو بس التدريس لا ابو عنده معارض مال سيارات

— عشكتيه وانتِ بذمه زلمتج يال…

— لا والله وروح ابوي لا هسه خطبني والله

— عليمن اطلعين ميمتج هم تتمعشكن براس الزلم

سكتت منها و رجعت گمت رجعت للغرفة مشطت شعري و گعدت وايدي على خدي

ساعة ونص و سمعت صوت برى و عمتي كلثوم تصيح على جدتي

گمت شلت البردة شفت خالتي لميعة وريـام طبن الغرفة جدتي رفعت راسي ليفوك ودعيت

— يارب انتَ وحدك مغير الاحوال والقادر والمقتدر لا تعوفني يارب ولا تعوف امي انا وياها اثنينه بشده ومالنا غيرك عون وسند

لا تعوفنا يا الله

طبن للغرفة وانا لبست ربطتي و ضليت واگفه اباوع اخاف اروح اطب يمهن

و جدتي اطگني گدامهن شفت نسوان عمامي واگفات يم الباب يتصنطن ساعة

و سمعت جدتي تصيح ولج يُـمننن هلاااا ولج هلااا هيوووو

نسوان عمامي ركضن من الباب وانا اجيت عليها طبيت لگيت خالتي و ريـام گاعدات يمها بس طبيت گامن عليه باسني وگعت دمعتي وانا اشوف ريـام بس بسرعة مسحت عيوني و گعدت خالتي گالت

لميعة :- شلونج يمونه اخبارج

— الحمدلله على الله

— متغيرة وكبرانه وحليانه ما شاءالله صايرة وحده ثانية لو اشوفج بالشارع ما اعرف

— رحم الله والديج خاله الله يسلمج

رجعت باوعت الريـام وسكتت بس شكلها ما مقتنعه بالموضوع صح سلمت عليه وحچت وياي بس غصباً عليها يمكن مجبورة و ابنها جابرها وحقها وما اللومها زين منها واجت و قبلت رجعت ريـام گالت

— فدوة بيبي بعدج شباب اني توقعتج كبيرة بالعمر

سعدية :- وين الشباب بعد خلص العمر

— لا عمرج طويل و بعدج بكل صحتج

ان شاء الله

رجعت خالتي تباوع عليه وساكته صافنه وريـام فاتت بجدتي گول دك مدح وغزل وحبيبتي وحياتي وعمري انوب طلعت عطر من الجنطه گالت الها

— هذا العطر جبته مخصوص الج بيبي

— انعم الله عليج والله انا حبيتج مبين عليج بنت خير وعز شنهي انتِ ماخذه يو لا

— لا بعدني

— يااا الهسه ما ماخذه وانتِ بهذا العمر

— ما اريد اتزوج اريد اكمل دراسة

— تناينج زوجن اولادهن شني هالدراسة انوب الاجت من تالي وكت

ريـام ضحكت وباوعت عليه وغمزتلي ما افتهمت شتقصد من الغمزه بس اعتقد

مخططه الشي وهيَ واخوها و مركزين على جدتي فد مره

دگ نقالها طلعته من الجنطة وردت على اخوها و رجعت گالتله

— اي هاي بعدنا يمهم اي صار

شالت النقال وانطته الجدتي حطته على إذنها بالمگلوب وتگول

— علوو ها علوو اسمعك

سمعته يگول الها

— راح ادزلج صورة شوفيها هذا تردينه لو اجيبلج غيره

— معدل بعد جدتك

— إذا ما عجبج ابدله شوفي وخلي ريام تردلي

— يزيد خيرك ويطول بعمرك

— انطيني ريـام بلا زحمه عليج

رجعت انطت النقال الريام وريام سدت المايك و ردت عليه ما حچت شي بس اي تمام بعدين باوعت عليه وگالت

— لا زينه مابيها لا يضل بالك

— تمام الله وياك

سدته و بقت لازمته ثواني ورجعت انطت النقال الجدتي وتگلها

— شوفي هذا بيبي

جدتي اخذت النقال تباوع بيه والضحكة شگت حلگها طارت من الفرح مدري شني بالصورة انوب ردت

سعدية :- اي هذا احسن من هذاك

ريـام :- تمام لعد هذا هذا

رجعت مدري شكتبت وراها ضمت النقال بالجنطة و گالت

— يُـمن اريد اروح للحمام

— اي تعاي

گمنا انا وياها اول ما طلعنا من الغرفة شفنا نسوان عمامي واگفات يم باب الغرفة

بس شافنا وخرن من الباب واحنه مشينا بتجاة الحمام ما طبت للحمام بس من صرنا بعيدات عليهن گالت

— هذا الباور بالجنطة شلون انطجياه

— تعاي بالغرفة

رحنا للغرفة مالتنا اول ما طبت باوعت عليها و رجعت تباوع عليه مقهورة انوب طلعت الباور و انطتنياه

ضميته بسرعة بالجنطة رجعت گالت

— بُـرهـان حچى ويا جدتج وحل الموضوع وياها وباجر ان شاءالله يوصل ويجي عليكم

اتحملي بس اليوم

— الله كريم

رجعنا طلعنا ورحنا الغرفة جدتي وراها گامن راحن السايق واگف بالباب متانيهن

اول ما راحن جدتي صاحت عليه طبيت يمها گالت

— راح اخليهم يرضون بعشيگج بس مهرج الي و كل شهر توديلي مصيرف انا گتله بهاي الشروط بس خليني اگلج هم

— ميخالف اخذيه

— يلا روحي ولا تحچين النسوان عمامج على السالفة انا احچي ويا الولاد

— اي

رحت الغرفتي و گلبي هيج يدگ و ارجف

ومن اجوا عمامي جدتي لمتهم بغرفتها وگعدت وياهم ما دريت شني الحچي وشصار بينهم بس متأكدة السالفه انحلت ما دام صارت يم جدتي

و بالليل من ناموا خابرت على تميم اسأل على أمي گال كلش زينه ولا يضل بالج

و رجعت حچيت ويا عمي من نقال تميم ويا خالتي وانوب من سديته ورها بشوية خابرني بُـرهـان رديت

— الو

— شلونج اليوم

— زينه

— شلون الوضع جدتج حچت وياه عمامج

— اي

— اي وشنو الاخبار

— ما ادري ما سمعتهم

— الله يسهل ما بقى بس هاي الكم ساعة

و الصبح اني يمج ان شاء الله

— جدتي گالت تريد المهر مالي وتريد راتب كل شهر

— هههههه اي تدلل غالي والطلب رخيص

بعز القهر الانا بيه ابتسمت رجع گال

— خو ما حچوا وياج

— لا محد شافني اصلاً

— خير ان شاءالله

— شلون قنعتها

— طلعت كلش سهلة ماكو هيج ما اخذت وياي ربع ساعة

— اكيد اشتريتها

— لا بس حبتني

— ههههه

— اي عاد ضحكي صدقة الهاي الضحكة الحلوة

بسرعة سكتت رجع گال

— ليش ما طلعتي عليها هيج بسرعة تتقشمرين عليمن طالعه هيج راس يابس وتشلعين الگلب

— على امي مو تدري بيها كلش تحبك

— والله عاد امج الله يگومها بالسلامة تموت بيه اني حاير بيها من تگعد وتلگاج زوجتي شلون هههههههه

حچى هيج وضحك بصوت عالي وانا بسرعة تخايلتها شلون تتخبل إذا درت بيه عاقد عليه رجع گال

— نامي ساعة ارتاحي مو زين عليج السهر

— يلا مع السلامة

— الله وياج

قفلته منه و رحت للحمام توضيت وصليت صلاة الليل ورها ضليت اسبح واستغفر وادعي الامي لحد ما إذن الفجر صليت الفجر و نمت

بالسبعة ونص گعدتني جدتي گالت

— گومي تحضري الوادم راح

تجي طفرت من مكاني خايفة يا وادم رجعت گالت

— الزلمة جاي من الدرب البعيد روحي تزهبي وتعدلي

عرفتها تقصد على بُـرهـان بسرعة گمت للحمام غسلت و گعدت ومن السبعة ونص الصبح لحد الاربعه العصر انا ما ضل دم بيه متت لا اكل ولا شرب ولا راحه ارجف من فوك ليجوة والخوف موتني

واخاف اطلع نقالي واشوفهم وينهم لان نهار و خاف يشوفون النقال عندي ويكتلوني وياخذونه مني لحد ما صارت بالاربعة وربع العصر اجوا

عمي هاشم و تميم ومراد و بُـرهـان وابو وعمامه اثنين وياهم اثنين زلم غربة لابسين عگل گعدوا كلهم بالحوش وانا واگفه من وره البردة و جسمي تگول سعفه وگلبي يدك بكل سرعته

ومن بعد الاخذ والعطا والاتفاق والقرارات والشروط والحاضر والغايب صلوا على محمد وآل محمد و قروا الفاتحة وجدتي هلهلت مكيفه باعتني بسوار

انوب اجت عليه گالت لبسي عباتج بساع

خليهم يعقدون عليج لبست جبتي ودموعي هيج تصب على حظي هاي الما عدها اهل هيج تنهان وتنباع وتنشري بـ ارخص ثمن

ويا ما طلعت من الغرفة صارت عيني بعينه باوعلي و نزل راسه اجيت گعدت بصف عمي هاشم باسني بـ راسي و مسح دموعي بـ ايده ويسألني شلوني وانا ما ارد بس ابچي

واحد من الزلم الگاعدين گام يحچي بشروط العقد و يحچي ويانا على الحياة الزوجية وراها صلى على النبي و بدأ يعقد النا

اقل الخمس دقايق كمل كل العقد واخذ الموافقه منه ومن عندي وهسه صرت زوجته بالشرع وگدام الناس وهاي المره الثانية يعقدولي بالچبايش غصباً علية والمره الثانية انهان انظلم من اهلي والناس الغريبة تشتريني وترحم بحالي

–القرار لم يكن سهلاً إما أن أرى من أحب تنهار وحيدة أو أن أتدخل وأحميها بثمن باهظ وهو أن أُجرّد وجودي من أي قيمة رومانسية في حياتها

اخترتُ الخيار المستحيل

خيار البطل المجهول الذي يُنقذ المدينة ثم يغادرها قبل بزوغ الفجر

إنني أعيش معها بقناعة أن الأيام القادمة هي أيام مُستعارة، وأن دوري سينتهي بمجرد أن تعود الشمس لتدفئ حياتها وإلى ذلك الحين، سأظل الظل الحارس

الذي يراقبها وهي تنمو وتزهر

متقبلاً أن هذه الزهرة ستُقطف يوماً بيد أخرى بينما تبقى جذوري مدفونة في عمق التضحية.”

يتبع…..

الثالث والاربعون من هنا

Source link