رواية وجمعتنا الغربة الفصل الثامن 8 بقلم اماني عمر
لم تستطع مناراكمال جملتها فقد سحب شخص ما يبدو من هيئته أنه من دول شرق اسيا الهاتف من يدها ثم صفعها بقوة على وجهها فوقعت على الأرض
ثم أخرج شريحة الهاتف والقاها فى سلة القمامة وصرخ بصوت عالى
هاري
دخل هاري الغرفة وهو يركض ورد بلهجة غريبة
فى ايه يا جاكي؟
أجابه بنفس اللهجة
البنت دى جابت التليفون ده منين وأنت كنت فين وأزاي جت لغاية هنا من غير ما حد يشوفها
أنا كنت بالحمام ومايكل البيج بوس طلبه ثم التفت الى منار وركلها بقدمه وهى مازالت مستلقية على الأرض ومنهارة من البكاء وقال بلهجة مصرية ركيكة
انطقى جبتى التليفون ده منين؟
أجابته من خلال دموعها
سرقته من واحد من الزبائن
وكمان حرامية
أمره جاكي بلهجته الغريبة
ضعها بالانفرادي ومحدش يودلها أكل النها ردة خالص
مسكها هاري من شعرها حتى تنهض ثم دفعها الى خارج الغرفة ووضعها فى غرفة أخرى لايوجد بها شئ من الأثاث وقبل أن يغلق عليها الباب
على فكرة أنا قلبى مش قاسي زي جاكي ولو قدرتي تروقيني وانبسط منك هجبلك أكل وكل اللي أنتى عوزاه ومش هخليكى تقعدي لوحدك هسيبك دلوقتى تفكري وهجيلك بعد شوية
أجهشت منار بالبكاء فور أن خرج من الغرفة وهى تندب حظها الذى أوقعها فى مثل هؤلاء الوحوش الادمية
حاولت عايدة الاتصال بمنار أكثر من مرة على نفس الرقم ولكن باءت جميع محاولاتها بالفشل فحاول عادل مواساتها على قدر الامكان
خلاص يا عمتي احمدي ربنا انك عرفتي انها لسة عايشه والباقي مش مهم
بلعت عايدة ريقها وتنفست الصعداء
معاك حق يا عادل صحيح مطمنتش عليها على الاخر بس دلوقتى على الاقل هقدر انام وانا عارفة انها عايشه
أشفق عادل كثيرا على عمته فكلتا ابنتيها بعيدتين عنها احداهن ذهبت ولا تعلم عنها شئ والأخرى ذهبت خلفها ولم تعد
*8***********************
استيقظت مريم فى وقت متأخر كالعادة على صوت ضجيج وصخب وتذكرت ان محمد أخبرها انه واياد يقضيان أجازتهم عادة فى لعب كرة السلة وتناول المشاوي في الحديقة الخلفية للمنزل
كانا محمد واياد ومعهم جاك منهمكان باللعب اما كاترين فقد تبلت اللحم بالطريقة التى أخبرها بها محمد وتركته لبعض الوقت ثم وضعته على الشواية
انضمت لهم مريم
صباح الخير يا شباب
اياد- صباح النور
محمد- بتعرفي تلعبى
ردت مريم بفخر
دى لعبتى
انضمت اليهم مريم فى اللعب وحاولت مجاراتهم ولكن لم يعطيها أحدهم فرصة للاستحواذ على الكرة
فصرخت عليهم مريم وهى تضرب بقدمها على الأرض فى تصرف طفولى بحت
والله مانا لعبا معاكم دنتم بايخين بجد
انفجر محمد واياد بالضحك عليها
اياد – روحي العبى مع اللي قدك
محمد بسخرية– طب تعالى متزعليش هديكى الكورة تنطقيها شوية
جاك – وأنا ايضا لن العب معكم لأنكم أغضبتم صديقتي ثم ذهب خلف مريم
هتف محمد – انتى لحقتى جمعتي معجبين حواليكى
نظرت اليه مريم من بعيد وأخرجت له طرف لسانها لأغاظته
همس لنفسه
هتموتينى ببراءتك دي
صاح اياد – معدتش فى غيرنا يا معلم تفتكر مين الى هيكسب فينا
اجابه محمد بغرور
طبعا أنا
حبيبى متتغرش اوى كده لسه الكرة فى الملعب
اخذ محمد منه الكورة وأحرز هدف
يابنى انا قديم فى اللعبة دى من قبلك بكتير
أخذ اياد منه الكرة مرة أخرى واحرز هدف ثلاثى
مش مهم المدة المهم المهارة والشاطر اللى يضحك فى الأخر
**************************
اتصلت عايدة وأخبرت مريم باتصال منار فركضت مريم بدون وعى منها الى محمد واحتضنته من الخلف وسط دهشة اياد الذى فغر فاه من الصدمة والغيظ
اندهش محمد من تصرفها ولكن قربها منه الى هذه الدرجة أحيا به مشاعر كثيرة فأبعدها عنه ببطء وقد أدركت هى انها لم تستطع كبح جماح قلبها فخجلت من نفسها
اسفه جدا معرفش عملت كده ازاى ثم اردفت
بس لما ماما فالتلى ان منار اتصلت بيها وعرفت انى اختى لسة عايشة محستش بنفسى
ابتسم لها محمد
ده خبر حلو اوى
ردت مريم بحماس
صحيح معرفناش هى فين بس على الأقل طلعت عايشة
سر محمد كثيرا لسماع هذا الخبر
وليه معرفتوش هى فين؟
للأسف ملحقناش نعرف الخط اتقطع على طول ومعرفناش نتصل بيها تانى
ربت محمد على كتفها
معرفة انها عايشة ده خبر رائع فى حد ذاته احنا كنا فين وبقينا فين وبعدين ممكن بسهوله نعرف هى فى اى دولة فى العالم من رقم التليفون اللى اتصلت منه
بجد الحمد لله ماما هتفرح اوى لما تعرف ثم استطردت
ياترى مين اللى فاز فيكم بالماتش؟
نظر اليها اياد باستياء
لغاية دلوقتى محمد بس أنا مش من النوع اللى بيستسلم بسهولة
رن جرس هاتف محمد
اهلا ياروحى
تسمرت مريم بمكانها عندما سمعت كلمة روحى يا ترى محمد بيكلم مين ممكن تكون زوجته السابقة التى لم يخلع دبلتها من أصبعه حتى الأن يبدو انه يود الرجوع اليها مرة أخرى اخذت الهواجس تراود رأسها بقوة حتى انها لم تنتبه لمحمد حين انهى المكالمة والتفت ليها يحدثها
مريم000مريم
ها كنت بتكلمنى يا محمد؟
اجابها بسخرية
لأ كنت بكلم نفسى ايه يا بنتى روحتي فين؟ثم استطرد
باين كدا ان النهاردة يوم الأخبار السارة
نظرت اليه مريم باستغراب
صرخ محمد بفرح
اختى ايمان هتكون فى فرنسا الأسبوع الجاى
شهقت مريم من الفرح
بجد ؟
أومأ محمد راسه بالإيجاب
اتفقت هى وجوزها يوفروا فلوس الفرح و يعملوا شهر عسلهم فى أكثر من دولة وهما دلوقتى فى ايطاليا والأسبوع الجاى او اللى بعده بالكتير هيكونوا هنا
فرحت مريم بسماع هذه الأخبار
اجوزت مين حد نعرفه؟
دكتور مروان صاحبى دكتور امراض نفسية وعصبية
ابتسمت مريم
هينفعنا كتير الأيام اللي جايه
هتفت كاترين اليهم
تفضلوا لقد اصبح الغداء جاهزا
******************************
بعد عدة ايام
اتصل شيخ العرب بالشخص المدعو الكوماندا
شيخ العرب- كل اللى حضرتك طلبته اتنفذ بحاذفيره
الكوماندا————-
شيخ العرب- مظنش هيقدر يقوم منها
الكوماندا——————-
شيخ العرب – طبعا يا كوماندا هو احنا بنلعب
الكوماندا———–
شيخ العرب –طب ليه حضرتك مش عايزنا نقربلها
الكوماندا———-
شيخ العرب – تمام هنوقف الشغل شوية لغاية ما تجيلنا اوامر تانية
********************
** دفع احد الأشخاص منار الى داخل غرفة تشبه الزنزانة وبها العديد من الاسرة ذواتى الدورين والعديد من الفتيات ويبدو من أشكالهن انهن من دول مختلفة من العالم وفور ان دخلت منار الغرفة ألقت بنفسها على فراشها وأجهشت بالبكاء فاقتربت منها فتاة أخرى وربتت على كتفها
ما أنا حذرتك ومسمعتيش كلامى0 أحمدي ربنا انها عدت على خير المرادي ومخلصوش عليكى
اجابتها منار من خلال دموعها
ياريتهم كانوا خلصوا عليا أحسن من العيشة اللى أنا عايشاها دى
********************
******************
كان محمد يجلس فى الشرفة يحتسى الشاى حين دخل عليه اياد
مساء الخير يا محمد
مساء النور
مالك يا محمد اليومين دول يا اما قافل عليك اوضتك يا اما قاعد سرحان
مفيش بس شوية ارهاق من قلة النوم مش اكتر
نظر اليه اياد مشككا
الكلام ده تقوله لحد مش عارفك كويس وانا متأكد ان في حاجة مضايقاك
تنهد محمد تنهيدة عميقة ثم قال
سبت الشغل فى المستشفى
ليه؟
فاكر دكتور كامل اللى كلمتك عنه ؟
اللى كان مديرك فى المستشفى السابقة وحصل بينكم مشاكل كتير
اوما محمد راسه بالايجاب ثم قال
مش مشاكل قول كوارث ومصايب
طب وايه يعنى بكرة تلاقى شغل فى مستشفى تانى
ظفر محمد بضيق
ما أنا بقالي كام يوم بدور ومش لاقى مفيش بقى غير انى اشتغل في مستشفى حكومي ودى مرتبها مش هيكفى حتى نصف ايجار الشقة
ولا يهمك بكرة تفرج وانا الحمد لله دلوقتى بشتغل خلينى بقى اشيلك شوية ده انت يا اما شلتنى
نظر اليه محمد نظرة امتنان
متشكر يا اياد بس انا متعود طول عمرى اعتمد على نفسي واحل مشاكلى بنفسي
دخلت عليهم مريم فغمز محمد الى اياد لكى يغير الموضوع
انا زهقانة جدا يا جماعة 0من القاعدة فى البيت طول الوقت ايه رايكم نخرج نتهور شوية
نظر اليها محمد بعدم استيعاب
تقصدى ايه بنتهور؟
يعنى نعمل حاجة معملنهاش قبل كده احنا التلاتة او بنخاف نعملها
*****************
يا ترى ايه الى حصل مع منار ووصلها للناس دول؟ وايه اللى مخبياه الاحداث لأبطالنا ؟
