رواية قانون القلب اقوي الفصل الثالث 3 بقلم رسل احمد
ساعة ٣ الفجر الألم ينهش بكل خلية بجسمها متعرف كم ساعة صارلها نايمة بنفس الوضعية انفتحت باب الغرفة كزبر جسمها وتكورت على نفسها اكثر من الخوف غمضت عيونها حيل صارلها يومين شافت كل أنواع التعنيف انمدت أيد على ظهرها خلاهه تنز
بصوت هامس خايفه لا احد يسمعها:- ليالي ….ليالي كومي عالسريع …جبتلچ تيلفون أمي خابري حيدر دزيله رسالة إذا يحبج يطلعج من هالورطة ويجي يخطبج
فتحت عيونها بخوف تهز رأسها :- لا ….لا…يعذبوني …يموتوني …. غفران روحي …روحي لا يلگفوج هنا والله يموتوج
كزّت سنونها:- كتبي رقمة بسرعه لعد حالتج هاي يرضى عليها كتبي والقران ترا اروح لبيتهم خلي يصير عنده علم بحالتج انتي صار بيج هيج علموده ……أخذت التليفون بأيد ترجف وكتبته باستهه غفران وطلعت عالسريع ……..
خايفة من مصيرها اخوانها تخبلوا عليها كسروها تكسير خايفه حيدر ينكرها بس لا مستحيل حيدر الي تعرفه ميعوفها للموت الرعب الي عاشته خلاهه تشك بكلشي معقوله حيدر يعوفني لا مستحيل يلوي ذراعي ويكسرها زاد بچيها …تحس بهضيمة واتمنت أبوها عايش يحضنها ويمسد شعرها … اكيد حيدر عرف بيها شي صارلها يومين ما مداومه …..
رجع الباب انفتح وغفران بيدها التليفون ؛-هاج احجي ويا بسرعه ودفعت التليفون على أذن ليالي وعينها عالباب
بچت :-حيدر …حيدر راح يموتوني ……..
صوته يرجف خوف وعصبية:- ليالي لا تبجين اليوم والله اليوم اجيب اهلي واجي لج ليالي كلبي وكف عليج بهاليومين اذوج.
زاد بچيها :-دمروني …حيدر لا تعوفني
صاح بصوت ملهوف:- بس موتي يبعدني عنج ارتاحي احارب الدنيا لعيونج …….
جرت غفران التليفون تحجي بصوت هامس:- سمعت صوتها واتأكدت هي بخير بداعت أمك لا تتصل إذا صار شي إني اتصل هذا تليفون أمي اخواني إذا عرفو يخلصون علينا
جاوبها بكلام ليالي ماسمعته وسدته طلعت دقيقه ورجعت بيدها بطل مي ولفه جبن حضنت اختها واثنينهن يبجن ..لتخافين حيدر يحلها …………راح اروح كلما تصح فرصه أجيج وطلعت
ياقوت:-ظليت فاكه حلكي مصدومه..حيدر يسوي كل هذا…. واجت ببالي البنيه هسه شنو حالها اكيد اهلها اذوها…
زهراء البنيه شلون عزا والحسين اهلها يموتوها اكيد…
زهراء:- اخوج محترك عليها وابويه طلع مدري وين.. وامي تلوم بي اشو انقهرت عليه خطيه مبين حيدر يحبها …. بس كولي اذا اهلها سووها عشاير شلون يبوو انفضحنه …. بعدهن يحجن وسمعن هوسه جوا نزلن لنص الدرج وكعدن اثنينهن .. يسمعن حيدر يحجي منفعل وصوته يرجف
حيدر:- يابه ماصار غلط بينا والله لا بكلام ولا بنظره بس اريدها وتريديني
صفك ابو محمد ايديه :- وانت من ردتها ليش ماحجيت ونروح نخطبها…
حيدر بتردد:- يابه … ابن.. ابن عمها ناهي عليها من زمان…. هو كال هيج وابو محمد اعصابه وجت نار اول مرة يسمعو يصيح بهالطريقه
ابو محمد:- ولك حويدر… انت طول عمرك ساكت ومن فكيت حلكك ذبيتنه بمصيبه …. ولك شسوي بيك هسه شسوي
حيدر:- اروح اخطبها …. مو لكفوها تحجي وياي يلا خلي يسترون السالفه ويزوجوها للغلطت ويا……
ابو محمد:- صخم الله وجهك يا حيدر مثل ما صخمت وجهي لك تخلي سيد حسن يخطب بكسره وجه … انه الادخل كعده راسي مرفوع راح تخليني اطب منزل راسي من ورا عملتك السوده….امشي .. روح بدل سلاباتك لا بارك بيك عمامك بالطريق …
انفرجت اسارير حيدر :- يابه راح تخطبها…..
ابو محمد:- چا اكسر ظهر البت جيف ابني مسربت ولو ماظن ينطوها…
ام محمد اتهسترت:- تخطبلي وحده منهيه وتسوي علاقات حسن ما تطب بيتي هالادبسزز….
حيدر بانفعال:- يمه ليالي اشرف من الشرف انه… انه الحفيت وراهه حتى ترضى …..
ام محمد تهز بيدها ما عاجبها:- اي سوده بوجهي اي …….
ابو محمد ينهي الجدال:- هي بت ومشت ورا عاطفتها الا ابنج بكد الثور هو الزلمه والغلط غلطه ودامه رايدها وحتى لو مارايدها غصبا عنه يخطبها الله يعلم هسه اهلها شعاملين بيها … نهله انت مره تعرفين ربج صيري عادله عندج بنيات ……
ياقوت تسمع وتاكل باظافيرها ووجهها اصفر وزهراء تسمع والضحكه شاكه حلكها دارت وجهها لياقوت وشافت حالتها غمتها:- الغسل الي يغسل وجهج المصوفر انتي ياهو اليمج وخارطه العافيه….
ضربتها على ظهرها:- انجبي زهراء شبيج مدتشوفين اكو بنيه مصيرها مجهول متعرفين اهلها شمسوين بيها … كولي وافقو علويه نهله راح تطيح حظها …. لو نسيتي تريد تخطب منتهى لحيدر….
ضربت زهراء كصتها متذكرة:- ياا شلون نسيت منتهى .. ابتسمت ابتسامه عريضه.. الله لج ياقوت اكشن اكشن ….. راح نشوف ايام اكشن واو ….
باوعتلها صفح تهز بيدها:- ناس من ناس باع هاي …. لج انتي شوكت تعقلين وتاخذين الامور بجديه…..
زهراء :- خليت العقل الج يالخوثه يالجبانه الراح يزوجوها سيف وهي ساده بوزها لان تخاف….
انفعلت وعيونها غوركت دموع وكفت عالسريع:- كلت لبابا ماريده واني مو جبانه اني ماحب اغضب اهلي وانتي ولي من يمي وراحت لغرفتها تمشي سريع….
زهراء:- يااا ولج ياقوت اشاقيج شبيج زعلتي …. راحت وراهه بس ياقوت قافله الباب ومتقبل تحاجيها ….
بعد ساعتين اخوان ابو محمد وولد عمامه جانو كاعدين بالصاله يتفقون على كلامهم وبنص الكلام دخل مجتبى نازل من الدوام وكلشي ميدري
كرار كل شويه يدخل للبنات يشبع فضولهن ويسولفلهن على الي يدور بصاله … وخربان ضحك هو وزهراء وياقوت تليفونها على اذنها تحجي ويه نورهان
نورهان باستغراب:- شبيج ياقوت مو على بعضج وهوسه يمج
كامت من مكانهه تصعد الدرج وشافتهه هاجر هزت ايدها ماعاجبها وراحت للمطبخ وهي دخلت غرفتها:- والله ماعرف شگلج بس اخوي يريد يخطب وهوسه …
نورهان:- ليش هوسه غير مفروض عدكم فرح….
تنهدت بتعب:- لا نورهان البنيه الظاهر عدها تواصل ويه اخوي واهلها عارفين ومأذيها وهذا اخوي متخبل وكاعد.. وهسه رايحين مشيه زلم بلكي ينطوها….
نورهان:- يبوو شلون سالفه عويصه…خطيه ان شاءالله يوافقون وينجمعون بالحلال .. وانتي؟؟؟
ياقوت:- شنو؟؟؟؟
نورهان:- اكو زواج ببالج لو لا معقوله ماعندج ولد عمام خوال..؟؟؟؟ مستحيل يشوفون هالگيمر وميخطبون … ياقوت اني انتبهت انتي كلشي ما حاجيتلي عن نفسج رغم بالدوام ما نتفارك…..
ابتسمت بخفوت:- ماعرف شگلج اي خطبوني بس جنت صغيره وبابا ميزوج بنيه صغيره… ورفض بوديه حتى زهراء واحد من ولد عمي رادها بس بابا تخبل مقبل لان بعدها صغيره …
نورهان:- يعني كلبج مارف على احد منهم….
ياقوت:- مادري ماحس بهالشي اتجاه احد …حتى سيف … عضت شفتها وغمضت حست روحها جفصت هواي…. بس مستحيل تعبر على نورهان
نورهان بفضول:- سيف منو؟؟؟؟
تنهدت وهي تكشفلها بعض المعلومات:- ابن عمتي … بس ماكو شي خطبني من جنه بكربلاء اخر مره ورفضته وفضت راحت……
نورهان:- شوف شوف شوف السكوتيه .. تشاوفنه ولا جبتي طاري دروحي بعد فلا اسولفلج….
ياقوت تبرر الها:- نورهان والله مو قصدي بس اني سالفه مو هامتني ما احجي بيها يعني ماحسها فد موضوع لان مايهمني …..
نورهان:- مابقه شي لدوام الا اكعدلج كلب … ام الضمايم….بعد شهر الا اسحلج من صايتج بالقسم…. كامن يضحكن سولفن شي عن حيدر والبنيه شي عالدوام وتحضيرات وسدته منها كامت تريد تطلع من الغرفه لمحت هاجر تركض عالدرج تنزل…..
ليالي….
انفتح الباب بقوة ودخلو عليها اخوتها ال٣ نزل عليها اخوها الصغير ايمن وجرها من فروة راسهه يكفخ بيها :- لج انتي شنو فهميني … شنو ….
منين حاجيتي احجييي شلون عرف وجايب اهله وجاي ادبسزز…. نحط كرون ونزوجج لصاحبج …..
دفعه الوسطاني منها وكعدها عالجربايه وهي ملخت روحها من البچي
اياد:- ليالي…. تواصلتي ويا؟؟؟؟؟ احجيييي
هزت راسهه :- لا … لا … لا بس عوفوني ما اقبل والله اني رافضه بس عوفوني تعبت من الضرب كافي ابوس ايدكم ….
مسح اياد وجهه يستغفر ربه:- شمعنى هسه اجه يخطب فهميني ولج طلعو ساده وعشيرته تطم عين الشمس جايب شيوخ وساده ويا خلانه نصير كل واحد بكد النمله ولج كل اهله يعرفون انتي مفينه الحظ وعندج علاقه بي …
شاط اخوها الجبير من الكلام وكام عليها لزمها من راسها رفعها وركعه بحافه الجربايه بكل قوته ومن قوة الضربع نضرب جسمها بالكاع وماتحركت
كمز اياد عليها ويشوف الدم ينزل بغزاره من راسهه وهي ما تتحرك كام يصيح:- ولك مهند شسويت …. شسويت ولك موتتها ….
ومهند يصيح متهستر:- خليها تموت هاي الك..ة ولك صخمت وجوهنه عشيره كامله تعرف بتنه مصادقه ابنهم …
طبت امهم تركض وراهه غفران شافت بتها جثه بالكاع وغركانه بدمها كامت تدكّ وتلطم وتصرخ … موتوها موتوها لزمت دشداشتها وشكتها لزمها اياد يحاجي غفران جيبي عبايه عالسريع نودي ليالي للمستشفى كووومي دمها خلص….
كامت من راس ليالي ركض لغرفه امها وجابت عبايه لفها بيها شلون مجان وطلع يركض بيها
مهند كاعد عالجربايه لازم راسه بيده وجسمه ينخض يبجي بصمت وايمن يحجي بعصبيه:- طبها مرض ان شاءالله تموت هالعار……
ركضت غفران ورا اخوها تلف بالشال وامها لابسه عبايه راس فوك دشداشتها المشكوكه غفران اتهسترت بجي تشوف الدم ينكط من ورا العبايه من راس ليالي الي جنها غصن ميت طاير بالهوا عبالك مابيها روح….
انخبصن بالمطبخ عدد الزلم هواي لازم يعشوهم من وكت لان يريدون يروحون لبيوتهم نهله حاطه بريمز وعليه جدر جبير تطبخ التشريب وهاجر حاطه جدر تمن على عيون اثنين من الطباخ ياقوت تثرم زلاطه وزهراء تنظف خضروات
كاعدة على ميز الطعام مقابيل باب المطبخ الخارجي وتشوف حيدر يلوب بالطرمه والجكاره ما وكعت من ايده … جنه طير مذبوح ويرافس حتى يحصل هوا… يباوع لشاشه تليفونه منتظر مرسال يريح كلبه بعد ما اخوتها رفضو مشيتهم رفض قاطع ….فتح البوري الموجود بالحوش وظل يصفك بالمي بقوة على وجهه ونگع هدومه … تريد تروحله بس تخاف احد يطلع من باب الصاله من الزلم وتستحي … طلعت تليفونها من جيب نفنوفها ودزت رساله لكرار
كرار اطلع لحيدر راح يموت بالحوش احجي ويا خل يهدأ ….شاف الرساله وما طول ثواني شافته يطلع من باب الصاله وراح لاخو يطبطب على ظهره ويسولف ويا وتحاضنو … ظهر حيدر عليها ماتشوف وجهه بس هيئته تشرح الي يحس بي ويعاني ……. اخذ كرار ايده ودخله لصاله ……
دنكت تكمل الي بيدها وسمعت صوته يسلم وهو يوكف بباب المطبخ نست هو جاي ويه العمام
سيف:- السلام عليكم شلونج عمه …. شلونجن بنات… ردن عليه كلهن عداها اتجاهلت وجوده … وهاجر اجت يمه سلمت عليه بوسته وحضنته
وهو عينه عليها:- شلونج ياقوت ….
جاوبته بدون ما تباوعله:-زينه…. وكف دقايق يسولف هو واخته وعلويه نهله شاف ياقوت متجاهلته وهالشي خله الدم يفور بعروكه ورجع لصاله ….
اجت هاجر بصفها تحجي بهمس وهي تاخذ سفطه مواعين من الكاونتر:- شدعوة عليج ماتنطي ريج طيب والحسين يحبج ومتخبل عليج وشتردين مستعد يسوي …فكيها ياقوت..
تنهدت بنفاذ صبر مكتوم:- الله يسعده ويه الي تحبه وتريح باله .. كلشي قسمه ونصيب….
هزت ايدها معاجبها:- هي هم حظوظ بنات مالاكيات زواج وبنات يتعززن للخطيب الشاريهن….
تركت الثرم وباوعتلها وبهدوء تام:- وهاي العشيره كلها ما بيها بنات حتى ياخذ وحده متريده ؟
عوجت حلكها:- والله يعيوني باشاره من اصبعه نص اهالينه ينطو بناتهم بدون مهر ويتمنون اخوي نسيب الهم بس اخخ اخخ يالقهر هو مايرضى
تركتها بدون متجاوبها وكامت توزع الزلاطه بكاسات وهي ساكته…..
صبو العشه والخطار مشه ونظفن صارت بالدعش بالليل صعدت سبحت وطبت بغرفتها تصلي صلاه الليل مثل كل يوم توها حطت المصلايه واندك باب غرفتها
ياقوت:- تفضل….
طب حيدر عيونه دم مبين باچي وحالته حاله :- ياقوت ساعديني .. مالي غيرج يروح وياي والحسين كلبي راح يوكف ….
تقربت منه لزمت ايدي:- اسم الله الرحمن سوده عليه حبيبي شبيدي عليك
لزمها من اكتافها قابض عليهن بقوة:- تعاي وياي للمستشفى بس شوفيها ولج اخوها ضاربها ضربه موت ورا ماطلعنه منهم وهسه بالمستشفى اختها راسلتني اذا اطب عرفوني بعد واخاف يأذوها بالاكثر .. انه متاكد اذوها جيف رحت خطبت … ابوس راسج لبسي وتعاي وياي بس طبي شوفيها وطلعي ريحي كلبي ….
ياقوت:- واهلنه شلون يقبلون؟؟؟؟
حيدر بلهفه ونبره توسل :- كلهم بغرفهم طفي ضوة غرفتج ونقفلها عبالهم نايمه اذا احد اجه عليج مانطول بس شوفيها ياقوت اول مرة اطلب منج زهراء خبله ولسان خاف تجفص انتي عاقله وتعرفين تحجين سوي نفسج بالغلط طبيتي عليهم اي حجه …..
هزت راسهه موافقته ماكدرت ترفض حيدر العاقل الثكيل هيج منهار وحالته حاله على محبوبته شلون ما تساعده ظل واكف يمها يفتر بالغرفه وهي لبست جبتها فوك نفنوفها ولفت حجاب وطلعت ويا …. سيارته برا لان سياره ابوها ومحمد طابكات بالحوش وبعد ماكو مجال صعدت ويا …. تباوعله عينه متروسه دمع بس رجولته ما تسمحله يفيضه كدام اخته لزمته من زنده باوعلها ورمش وطاحت دموعه ويه رمشته رجع اندار يباوع لطريقه ومسحهن بسرعه
وبصوت خفيض ومستحي سألته:-هلكد تحبها حيدر….
جر نفس متعوب ؛- كلبي ينبض بحبها … تعينت يمنه قبل ٣ سنوات … اول سنه جانت تتجنبني رغم شكد حاولت وياهه بس مودبه وثكيله …عجبتني شفتها ما تختلط بالموظفين زايد عن شغلها وحلوة لونهه الخمري وعيونها الي سحلن كلبي سحل كلت هي هاي يحيدر الي تكضي العمر وياهه … بعد ما اصريت احجي وياهه وبسبب الملحه الزايده وافقت تسمعني … ومن صارحتها بأعجابي صدمتني وكالت ابن عمها ناهي عليها وواكف بوجه اي قسمه تجيها…. بس الگلب من يقرر بعد لا انه ولا هي كدرنه نبعد وبدت تميل الي نسيت كلشي النهوة وروحي …..
جان يحجي بصوت يرجف متروس حب .. خلت دموعها تجري .. مسحتهن وهي تطمنه:- يارب تكون من نصيبك وتنجمعون باقرب وقت
باوعلها حزين:- ادعيلي ياقوت ادعيلي انتي كلبج نظيف ادعيلي …..
وگف سيارته گدام المستشفى شرح لياقوت وين تطب وقبل لا تنزل فتح الچكمچة المقابيلها طلع منه تليفون صغير قديم صرصور
حيدر وهو يحط التليفون بيدها ويعصرها حيل :- أنطي لاختها بلكي تكدر تاخذه …….
نهرته بعتاب:-حيدر صدك تحچي هسه مراقبينهن بزايد …….
حيدر:- غفران قويه وذكيه مثلما كدرت توصلي بهالوضع تكدر تضمه …..
نزلت ومثلما كاللهه مشت ودخلت لردهه النسائيه هادئه وماكو هوايه مرضى عيونها تتلاكط تدور على بنيه شابه رأسهه ملفوف لان حيدر كاللهه الضربه براسهه تتمشى بنص الممر وتباوع لجهتين عالاسره لحد ما شافتهه فلتت منها شهكه وهي تشوف بنيه راسهه ملفوف وزراك محتل كصتها وعيونها المغمضه بنيه شابه كاعده عالكرسي مغمضه بنص بينها وبين مره چبيرة نايمه عالسرير الثاني هم مريضه وشاديلها مغذي ………… ظلت مترددة متعرف شتسوي اتقربت من حافه السرير تباوعلها بقهر تحچي بسرها دخيلك ربي شمسوين بيها رفعت اختها راسهه ووكفت عالسريع تباوع لياقوت تهمس وهي. تباوع للمره الچبيرة النايمة ؛- منو أنتي شعندج هنا …….
جرتها ياقوت بخفه من أيدها على صفحه تهمس:- إني ياقوت أخت حيدر اجيت أطمن على ليالي بشري شلونها……..
غوركت عيونها وصوتها يرجف:- شلونها حالها يصعب عالكافر اجت تموت ودمها وشل …حطولها بطلين دم وفاقدة لزمت أيد ياقوت بتوسل عليچ الله كولي لاخوج يعوف اختي والله اخوتي شرانين ودمهم حار والله هالمره طلعت منها المره الجايه ضربه توسدها الگبر……….باعي حتى أمي ضغطها ارتفع واجت تنجلط
هزت ياقوت راسهه وعيونها تدمع بغزاره :- صدكي حيدر جاي يموت چن الضربه بي ومستحيل يتخلى عنها مستعد يخطبها ألف مره …….. لتخافين يقنعهم والله ..
تلفتت يمنه ويسره. وعلى أمهن النايمة وطلعت التليفون من جنطتها أخذي وضمي زين وافيني بالأخبار رفضت تاخذة تخاف كالتلها احسن مما تراسلين من تلفون أمج وقنعتها أخذته
بچت غفران :- أنتي مو علوية وجدچ رسول الله ادعيلها الله يشافيها وتكعد دخيل بختچ …………
ابتسمت بحزن :- راح ادعيلهم هي وحيدر بصلاتي يومية …..حضنتها غفران حيل وكأنها التمست الأمل والراحه بجيه ياقوت ودعتها وطلعت من الردهة منظر ليالي وحالها خله دموعها الصامته تزيد ….. صارت تتمشى بممرات المستشفى تريد تطلع وسمعت صوت يصيح بأسمها كل ظنها متوهمه ….. بس تكرر النداء بأسمها اندارت تشوف منو يصيحها وتفأجات بأخو نورهان فارس الي يتمشى ناحيتها :- علويه ياقوت……..
كفكفت دموعها وهي تحاول تستوعب هالصدفه الغريبه صار مقابيلها بطوله الفارع لابس عسكري وعلى جتفه ٣ نجمات :- مرحبا شلونج علويه سلامات شعندج بالمستشفى
لزمت سير جنطتها بتوتر تحس لسانهه انبلع من التوتر ومنزله راسهه:- اهلا بيك إني ….. أقاربي مريضه هنا جنت يمها ………
صوته عميق ورزن ويحجي ببطئ :- ألف سلامه ان شاءالله
بلعت ريگها تحس وجهها يشع حراره:- الله يسلمك …عن أذنك اخويه برا ينتظرني واندارت تمشي قبل لا يجاوبها ….
غمضت عيونها حيل من صاحهه مره أخرى يستوقفها
فارس:- علويه ….. اندارت بمواجهته ….ابتسم .. يأبه بالجذب ساليني خاف عندي مريض سالي على صديقتج ترا اني حباب ما اكل بشر بس تريدين تروحين ….
عضت شفتها متفشله
جاوبته خجلانه:- اعتذر بس بالي شويه يم مريضتنا…. ان شاءالله الكل بخير وماكو شي… نورهان زينه؟؟؟
ضحك بصوت منخفض وهو يشوف وجهها صار احمر :- الحمدلله الكل بخير ونورهان زينه بس سوينه حادث اني والسايق بسيط وخطيه اتاذت ايده الضربه من يمه صارت ….
ياقوت:- الحمدلله على سلامتكم دفع الله ما كان اعظم…
فارس :- الله يسلمج يابه ….اخذي راحتج ماريد اعطلج اكثر من هيج … فرحت بشوفتج….
ياقوت:- عن أذنك والحمدلله على سلامتكم مرة ثانيه واندرات تمشي بسرعه تطلع من المستشفى……
اندار الضحكه شاكه حلكه لكه امجد واكف بعد كم متره عنهم ومرتجي عالحايط مجتف ايديه ويباوعله … اتمشى عليه
امجد:- ها فارس افندي….
فارس يثولها:- هاا؟؟؟
امجد يحاول يستفزه:- هاي التموت منو….
انطاه بوكس ببطنه:- انجب واحترم نفسك ….
انحنى امجد ليكدام بسبب البوكس ورجع رفع راسه يباوعله مستغرب:- لك شبيك مردت معدتي …منو هاي؟؟
ذب روحه على كرسي بصفه بالممر مرجع راسه ليورا غمض ويحجي:- كلما اكول اعجاب مؤقت القدر يجيبها كدامي …. يعني ببالي بعلمي اطلع من الباب الكاهه تتمشى كدامي…. بويه احس روحي منتعش اريد اكوم ابوسه لقاسم عالحادث وجابنه للمستشفى …..
امجد :- لا تكولها هاي صديقه نورهان….
مستمر مغمض ويحجي:- هي بجلاله قدرها….
امجد :- وانه اكول الاخو ساحت روحه ومنسم …مكحل عيونه …
ماجاوبه ومستمر على نفسه وضعيته يريد يبقي صورتها مطبوعه بعينه….
هز ايده :- لا انت فدنوب سايح …
تمشي تدردم ويه نفسها :- هذا شبي شنو فرحت بشوفتج الي يسمعه كل فتره نثرد سوه من الميانه والله يا الله…..
صعدت السياره بسرعه وانهال عليها حيدر بالاسئله بصوت ملهوف:- ها شفتيها … شلونها ….. متاذيه هواي… حاجيتيها…
اشرلته بيدها اصبر:- اصبر سيد حيدر شسالفه …. شفتها .. سوت روحها تعدل بحزام الامان واردفت… زينه … زينه ….
حيدر:- ياقوت ما تعرفين تچذبين حطي عينج بعيني وگليلي زينه…؟
اندارت عليه بحزن:- مادري حيدر البنيه تعبانه وفاقده… واختها وامها يمها حالتهن حاله عليها ….
ضرب الستيرن بقوة وحط راسه فوكا يخفي وجهه صوته مهزوز :- كله صوجي انه… رفع راسه يباوع لياقوت … الجاي يصير بيها بسببي ….
:- حبيبي قابل انت متعمد مو هاي حالتك متلوع .. ارجع اخطبها مره وعشره وعشرين جيب كل الساده واضغط عليهم .. وطلعها من بيت اهلها عروس ….
همس يكمل جملتها الي قطعتها:- اطلعها من بيت اهلها عروس قبل لا اخوانهه يطلعونها منه بتابوت …
طبطبت على ايده تحجي بحماس مصطنع:- لا اسم الله حبيبي يلا سيد حيدر انت كدها شوفهم خبال الساده من يعشكون شيسون …
ابتسم بحزن وكرصها من خدها:- شوكت كبرتي وصايره تعرفين تسولفين ..
ضحكت:- من زمان سيد بس انت لاهي عنا….
هز راسه بأسف:- حقج يابه حقج….صدك انه لاهي عنج انتي وزهراء
ياقوت:- ولا يهمك حبيبي هسه لا تفكر بشي فكر شلون ترجعلهم بمشيه تسد حلوكهم تجبرهم ينطوها… بس خل نتنظر فتره البنيه تكوم على حيلها وترجع عافيتها……
حيدر :- عليج الله ياقوت شلونها احجيلي حالتها والله ماسوي شي بس ريحي كلبك
:- شريح گلبك يخوي… الكم الله بعد .. ويلا حرك سيارتك ترا تأخرنه ساعه وحده ونص علويه نهله اذا لكفتني بصايتي بهالليل تلعب بيه طوبه عبالها شارده…..
ضحك بخفوت وهي ضحكت ويا …حرك سيارته متوجه للبيت …………
مشت الايام حيدر كلما يجي من الدوام شايل حزن على اكتافه وصار قريب من ياقوت يبوح الها عن مخاوفه وهواجسه وليالي الي ابد ما تواصلت ويا بالتليفون الدزه ……كل الي بالبيت عبالهم موضوعه نسد ونسى وهو النوم مجافي …..قنعته ياقوت يصبر شهر محرم وصفر الي مابقى شي لقدومه ……..
حضرت نفسها لسنه الدراسه الجديده … تسوقت رتبت كنتورها متحمسه لدوام وشوفه نورهان ..هاي العطله جانت مرهقه نفسيا وحستها اطول واثقل من كل العطل سيف وخطوبته الها الي ماتعرف ابوها حجه ويه عمتها يبلغهم رفضها او لا وهي ما سالت من شافت الكل ساكت وما جاب طاري …حيدر ومشكلته ويه اهل البنيه الي يريدها وهذا جان اكثر شي تعبها وخلاهه تكره العطله …من تشوف اخوها متولع بنار الحب وفراك محبوبته تحس شكد الحب متعب ومؤذي للانسان … اعادت ترتيب ديكور غرفتها ورتبت مكتبه الدراسه على امل تبلش السنه الدراسيه الجديده بتفاؤل وطاقه مجانت تعرف هاي السنه هي نقطه تحول بحياتهه…..
فاتحه كنتورها واكفه كدام متخصرة وصافنه باجر اول يوم دوام وحايره شتلبس وطبعا لبسها راح يكون اسود لان محرم بلش وبلش دوامهم بعد عشره محرم …. اندك باب غرفتها
نورهان:- فوت ابو الفوارس ….
اندارت عليه وهو يمد راسه مبتسم ….اقتربت منه وهي تتغزل بي :- يابه اروح فدوا للرصعه ياهو الاجه وكال عندي رصعه … باسته من عدها
ضحك بصوت عالي على سوالف اخته وخربط شعرها وهو يدخل للغرفه ويذب روحه على سريرها:- لسانج هذا لسانج محد يكدرله….
كعدت يم راسه تدلك راسه وغاصت اصابيعها بشعره الاسود:- قابل ما اتغزل باخويه الحلو….
غمض عيونه دليل راحته :- تغزلي يابه تغزلي جم نونو عندي… اكلج باجر الصبح اني اوصلج بدربي من اروح للدوام دزي رساله لسايق لا يمرلج….
وخرت ايدها وضيقت عيونها تباوعله:- خير شعندك موصلني….
رفع راسه واندار صفح مقابيلها وساند راسه على كف ايده وبيده الثانيه لمس خشمها:- اختي وعاجبني اوصلها اول يوم دوام شني غريبه لو غريبه
رفعت حواجبهه مستغربه :- انت اول يوم إلي بالمرحله الاولى ما وصلتني هسه توصلني…….؟؟؟؟
كعد منزل رجليه من السرير:- عمي بطلت سويتي بيها سين وجيم صوجي كلت اوصلها اول يوم مشتاق لسوالفها…..
نورهان:- لا حبيبي اني اصلا اكيف والله بس مادري احس وراك شي
وكف يطلع من غرفتها :-منا وهيج اوصلج كلما اكدر حتى نكضي وكت اكثر ادري الدوام باعدني شوي بس نحاول ……
شالت تليفونها وتراقب رده فعله تريد تتأكد من شكوكها :- خل اخابر ياقوت اشوفها تداوم لو لا … اندرات تسوي نفسها مشغوله بالهدوم تگلب بيهن وتباوع لانعكاسه بمرايه الكنتور وكف وحك خلفيه راسه …
اندرات عالسريع وشمرت التليفون عالسرير وكتفت ايديها على صدرها:-
فارس.. شنو رأيك بياقوت وعوجت حلكها بابتسامه تستذكر كلامه من شافهه بزيارة عدى ان هي حلوة هواي شنو رأيك بيها؟؟؟؟
مسد شواربه وحلكه بحركه بطيئه كأنه يستحضر شي لذاكرته:- شنو قصدح من اي ناحيه… يعني بنيه مبينه بت ناس محترمين وحبابه ومتربيه
نورهان:- ممممم …فارس ترا شفتك شلون متوتر بكربلاء ونظراتك الهه واضحه بالنسبه الي . اني اختك كاشفتك….طلع ياقوت من دماغك ترا حيل فقيرة وماعدها سوالف لعب وتخاف من الحرام…. ولا تنسى داليا……
خزرها واقترب منها حاط ايده بجيوب بجامته:- لج نورهان احجي عدل اخوج الجبير انه … شفتيني مرقمها لو واكف جوا بيتها عمي ابتليت كلت حلوة…. وشجاب طاري داليا هسه……واذا عالتوصيله يا حجايه ردي لمكانج وطلع متعصب ودخل غرفته وركع الباب ورا…..
ظلت صافنه مبهوته لرده فعله وحست على نفسها بالغت يمكن فعلا حاله حال الشباب تعجبهم البنيه الحلوة بس مو شرط ببالهم شي انتظرت كم دقيقه وراحت دكت باب غرفته اذنلها بالدخول ومدت راسهه مثل طفل مسوي ذنب ونظراته تتوسل السماح …. طفة جكارته واشرلها تروحله بدون ما ينطق حرف …
تقربت منه تحجي بدون ما تنطي فرصه هو يبلش يحجي:- اسفه فارس مو قصدي والله قللت ادب وتجاوزت حدي مجان لازم احجي هيج وياك مفروض اني اكثر وحده تعرف اخلاقك …..
ابتسم بخفه وطبطب بصفه يحثها تكعد يمه :- تعالي خل نسولف شوي……………
نزلت من سياره الخط سلمت عالبنات وافترقت عنهن اول يوم دوام بوابه الجامعه شبه فارغه وقليل طلاب مداومين الجو بعده دافي ومبي برودة فتحت تليفونها تخابر نورهان تشوفها اجت بعدها واستوقفها صوت مجانت متوقعه تسمعه هنا …
اندرات عاكده حواجبهه :- سيف؟؟؟؟؟؟؟
اتقرب منها مبتسم :- صباخ الخير يوجه الخير..حبيت اشوفج اول يوم دوام ….
:- شعندك هنا سيف شلون تجي لدوامي ….بدون علم اهلي ….
احتدت ملامحه:- وشبيج كمتي تتراجفين هونج هونج … لو خايفه اشوف احد وياج …..
فتحت عيونها :- تخسى ولك اني ياقوت بت سيد حسن وعلويه نهله مو انت الي تجي تشكك باخلاقي…
اعصابه ثارت:- هاي عليمن تخسى ولج ….
اتقرب منها شايط نيته يلوي ذراعها..بس جانت اسرع منه وتراجعت للخلف رافعه اصبعها بتحذير:- دير بالك والله ثم والله اكسر ايدك واحرك روحي اذا ايدك طختني
كز على سنونه والعصبيه طاغيه على ملامحه وصوته :- لهلدرجه تكرهيني لج انه خطيبج وراح اصيرن زوجج شوكت تفهمين لو راسج الحلو محشى تبن…
– من تصير زوجي عود سوي ليعجبك حاليا مالك سلطه لا عليه ولا على كلبي ولا حتى ذيال ثوبي ..كلشي بيه محظور عليك ..كلمه خطيب ما تحلل الحرام ولا تنطيك سلطه علية ..كلمه انحجت من جنه جهال انه ما اخذ بيها روح منا انت مو خطيبي وبعد لا تجي لمكان دوامي ..كرار اذا يدري يأذيك وانت مجرب اذيته ……… ثاني شي احب ابشرك اذا ما انطوك خبر اني اكلك … كلت لبابا ما اريدك وتفهم الموضوع ومستحيل يجبرني عليك روح يا ابن عمتي واتركني بحالي وعيب عليك واني محسوبه عليك تجي هنا تسويلي سالفه وتنطي فرصه لاي احد يحجي عليه بالموزين ….
صار مقابيلها كلش ورفعت راسهه ترد خزرته ومانزلت عينها رغم رجفه لشتها وكلبها الي يدك خوف ….رخت عيونه وكل الكلام المؤذي الجان ناوي يكوله تلاشى وبصوت متهدج همس:- شسوي وتحنين بس فهميني …
تراجعت ليورا تتلفت :- سيف والله حرام عليك تاذي سمعتي بباب جامعتي روح … روح الله يخليك بعدين نحجي ….مسحت دمعه هاربه نزلت من زوايه عينها واندارت تمشي شبه راكضه تدخل للجامعه……..
ويه وصولهم للجامعه استغربت نورهان وهي تباوع لجهه معينه :- هذا منو الواكف ويه ياقوت؟؟؟؟
دار عينه للاتجاه الي تباوع عليه وشافهه طول بطول ويه واحد شاب طويل وضخم أبيضاني ومن لغه جسدهم بينهم نقاش وكأنهم يعرفون بعض…. حس بنبضات گلبه بدت تتسارع بشعور مخلوط بين غيره وعصبيه ما الهن مبرر فتح الباب عالسريع يريد يطلع ولزمت ايده نورهان بسرعه:- فارس
شبيك وين نازل شايط.. احنه شنو حجينه وشتفقنه؟؟؟؟؟
فارس:- شبيج شمسوي ….وعينه عليها مشت سريع تدخل للجامعه نزلي يلا دخلي جامعتج ادخن جكاره واروح…
دار وجهه باتجاه الرجال الجانت ياقوت واكفه ويا ملامحه محتده ومبين عصبي فات قريب منهم وصعد سيارته وشخطها وراح…
نورهان:- يلا حبيبي اشوفك ان شاءالله اليوم عندك واجب لو تجي للبيت ؟؟؟؟
:- مادري عالاغلب ماعندي بس نشوف اذا طلعلي واجب ….
ودعته ودخلت كدامه الجامعه ظل واكف صافن بباب الجامعه …..
دخلت تدور بعيونها على ياقوت لكتها كاعده منزويه وحدها على مصطبه بعيده عن الانظار ومنزله راسهه ما مبين وجهها اقتربت منها تصيحها فرحانه :- لج ياااقووت …. يااقوت..
رفعت راسهه وجهها احمر والدموع تارسه وجهها … وكفت تمسحهن وهي تحضن نورهان :- هلا حبيبتي مشتاقتلج
نورهان بصدمه:- هاي شبيج مختنكه من البجي منو وياج …
كعدي كعدي… كعدن اثنينهن ونورهان لازمه ايديها
هزت راسهه تنكر حالتهه:- مابيه شي بس مريضه شويه…
نورهان بعتب:- ياقوت انتي ليش ما تأمنين بيه رغم اني اعتبرج اعز صديقه…. يعني حالتج هاي مالهه علاقه بالرجال الجنتي واكفه ويا برا قبل شويه …..
بهتت ملامحهه متفاجئه وصوتها تعثر بغصه بچي :- يعني شفتي … الله لا يوفقك يا سيف الله يعلم اكيد هوايه طلاب شافونه …..
نورهان:- هذا ابن عمتج الخطبج؟؟؟؟
ياقوت :- اي .. اي ساعه السوده ابتليت اني ابتليت لكيته واكف هنا بباب الجامعه الادبسزز لان يعرف مايكدر يحاجيني ببيت اهلي لاحكني هنا عباله يستفرد بيه ويحجي الي يعجبه.. عباله مصادقه واحد وجاي يتأكد….
نورهان:- انتي ليش ما تريدي ….
انفعلت رغم صوتها منخفض:- شسوي .. اجبر روحي من الله الحب من الله وماكدرت احبه صارلي سنين اقنع روحي من اني مراهقه ومشاعري متخربطه ماكدرت احبه مو انوب من كبرت
نورهان:- اني ما ركزت بي زين بس مبين شاب مرتب…
ياقوت:- ادري مرتب وحباب واي بنيه تتمناه بس يا اختي عجزت عجزت احبه ……
نورهان:- احجيلي الصار وبدت تسردلها الحديث الدار بينها وبين سيف …..
نورهان بشفقه:- اشو انقهرت على الولد خطيه مبين يحبج هوايه…. بس ميعرف يتصرف ومندفع…
فركت وجهها تحس اعصابها تريد تنهار:- حتى انتي.. حتى انتي نورهان كلكم نفس الحجايه ..خطيه وخطيه …واني مو خطيه….
توهه تريد تجاوبها ورفعت راسهه فاكه عيونها تشوف اخوها واكف فوك راسهن …..
نورهان بصدمه:- فااارس؟؟؟
ظلت عينها بالكاع على بسطاله العكسري لثواني بلعت ريكها بخجل تعرف وجهها بي علامات بجي …رفعت أنظارها ببطيء على زيه العسكري قيافته باوعت لوجهه بدون ما تباوع بعينه ….
فارس:- السلام عليكم….
ياقوت نزلت عينها بسرعه وردت السلام بخفوت ….
وكفت نورهان بسرعه :- شدخلك هنا فارس…. طلع فلوس من محفضته وحطهن بيدها:- نسيتي تاخذين مصرفج…
رادت تحجي خزرها حتى تسكت :- اخذي مصرفج ..شلون تنزلين بدون فلوس……
اخذت ايده وابتعدت كم خطوه تهمس:- فارس شبيك شنو اتفقنه
مسد شواربه حتى يحجي بصوت ناصي:- روحي جيبي مي للبنيه وتعاي….
فتحت عيونها وحلكها :- لا والله فدنوب اكعد خلي اجيب چاي…
دفعها من ايدها … هياتهه الكافتيريا روحي جيبي مي ….
هزت راسهه بيأس من تصرفه راحت لياقوت :- ياقوت اجيب مي واجي منا لا تتحركين….
مسد على طول دكم بدلته واقترب منها وكفت بسرعه عيونها تفتر يمنه ويسره بتوتر واندرات تشيل جنطتها … لكته بوجهها
مكتف ايديه ورا ظهره:- هاي ثاني مرة اشوفج بيها تبچين…
حرامات هالعيون تتعبيهن بالبجي…..
باوعتله بصدمه على جرأئته ؛- عفوووااا….
فارس:- لا اعتذر لا تفهميني غلط اسف… تجاوزت حدي…
حطت جنطتها على چتفها بعصبيه بدون متجاوبه ومشت ….
شافت نورهان شايله بطل مي وتمشي بسرعه اتجاهها :- هاج اشربي هاج….
ياقوت :- ماريده خلي لاخوج الوقح … وعافتهه ومشت عالسريع تطب لبنايه القسم….. ظلت صافنه تباوع بين ياقوت وفارس الواكف بمكانه…
راحت عليه متنرفزه:- فارس شبيك شحاجي وياهه فايره منك تكولي اخوج وقح….
ضحك بصوت عالي وهو يتمشى :- يلا رايح تأخرت عالدوام وعافهه وراح ….
كاعد على مكتبه صافن بالحاسبه الكدامه يريد يشتغل وميكدر اعصابه تلفت صارلها شهر ماكو لا اتصلت بالتليفون الي دزه الهه ولا دوامت … شعر بيأس وحس نفسه فقد حب حياته ….
دخل عليه احد زملائه بيده ملف ذبه كدامه عالمكتب:- حيدر شسالفه همزين وكع بيدي بالتدقيق مو بيد هيثم هو منا يحبك وانت مخربط هواي بالحسابات….
فرك كصته بتعب:- اعذرني والله تعبان وشويه مشاكل بالبيت ودايخ….
:- الله يساعدك ادري متطلع منك الا اكو شي فعلا مأذيك ميخليك تركز بشغلك….. عالعموم هذا الملف صححه وارجع نزله للتدقيق …… وطلع من يمه
شال الملف يگلب بي ودك تلفونه يعلن وصول رساله فتحها وعينه بالملف .. رفع عينه بدون اهتمام يباوع لرساله… جحضت عيونه وذب الملف من ايده … دك بسرعه…..انفتح الخط واجا صوتها المشتاقله:- حيدر….
حيدر بلهفه:- روحه وعيونه ولج وينج صارلج شهر انه على نار لا بيه اتصل ولا بيه اجي شسويتي بيه ليالي….
ليالي بحسره:- ماكدرت حيدر ماكدرت هسه صارتلي فرصه راحو لزياره وبقينه بالبيت بس اني وغفران …. تخيل عافونه بدون تليفون وقفلو الباب علينا ….
كام وكف:- اجي اشوفج ؟؟؟؟
صرخت بخوف:- لا … لا يموتونه والله برا اكو كاميرات بالحوش والباب…..
حيدر:- شلون صرتي اذوج هواي … اعوضج والله اعوض شاربي مو علي اذا ما اعوضج على كل الشفتي….
اجاه صوتها متردد:-حيدر اني بعد ما اريدك…انساني …
سدت الخط بدون ما تسمع جوابه حضنت التلفون على صدرها وملخت نفسها بالبجي
غفران بصفها ايدها على خدها حزينه بلي ديصير باختها:- ليش هيج ليالي ليش….
ليالي بدموغ:- لج والله ما اخلص اخوانج مخابيل واني عاذرتهم شالتهم الغيره بس مراح يقبلون بحيدر…..
غفران :- لعد تزوجين سراج الحقير الي فضحج وخله اخوتج يسوون هيج بيج ….
ليالي:- هو سوا هيج حتى يجبرني اتزوجه واسكت….
في مكان اخر الجامعه تحديدآ جانت ياقوت منهكه البال منا سيف وجيته ومنا فارس الماتعرف ليش كل فتره يطلع كدامهه بطريقه مريبة قاطع تفكيرها نورهان الي تتوسل بيها:- كافي عاد ألف مرة اعتذرت بدال فارس راح تظلين كالبه وجهج علية ……
ياقوت:- صدكي مزعلانه منج بس الصار اليوم هوايه على قدرة تحمل أعصابي سيف صاير يخوف مجان هيج ميتجرأ ويتجاوز بس اليوم تجاوز هواية حدود وشكله مراح يخلي الأمور تمشي بسهوله
نورهان:- كولي لابوج
ياقوت:- مستحيل بابا عصبي وسيف مخبل صاير وعمه زينب خطيه توكع بنص بينهم إذا تعاركوا وبالآخير أصير إني المكروهه الي تخرب العيله وتوكع براسي
نورهان:- شگلج خيه كلامج هم صحيح
دك تليفون نورهان بايعت لياقوت وهي تجاوب:- هلا فارس …. أي .. مممم …أي…افتهمت ترا مو ثوله ……بعدين ….داكلك بعدين ..ممم من ارجع للبيت يلا باي
سدته تباوع لياقوت الي صافنه بتلفونهه كالتلهي :- هذا فارس …..
ياقوت بملل:- اوكي ……
نورهان:- ماعندج فضول تعرفين شيريد …..
ياقوت:- تؤ …. شعليه ……
نورهان :- شكد باردة لخاطر الله. ….. والي البالي بارود ………. وياقوت مغلسه متجاوب ……….
اتفقن يطلعن من وكت لان ماكو محاظرات وكلمن. سايقها ينتظرها …نورهان معلكه. أيدها بيد ياقوت ويتمشن يطلعن من الجامعه ……..
نورهان :- ذاك اخوي ينتظرني وين خطج ….
كشرت ياقوت ماعاجبهه سيره اخو نورهان :- يلا حبي مع السلامه هناك واكف خطي ……. عافتهه ومشت وهي تصيح وراه لجج ياقوت اوگفي احاجيج …..
فارس واكف كدام سيارته يشوفها تمشي من كدامه بدون متباوعله ومبين متعمدة لان ضاجت منه الصبح …..خاف هي عايزة ثگل هسه فوك الثگل طنگورة …….. يهمس ويه روحك يا ويل حالك يافارس
صعدت نورهان السياره تباوعله بطرف عينها صاح بيها :-شبيج لج …….
نورهان بعتاب:- دتشوف تصرفاتك صحيحه ؟
حرك السياره متجاهل سؤالها:- منو هذا الصبح الواكف وياهه ؟
نورهان :- من تجاوب سؤالي أجاوبك ..وكتفت ايديها مبوزه تباوع ليكدام ………..
رمش بنفاذ صبر :- لا مو صح واخوج جاي يخوط ويخربط ومتهرفل ……
اندارت عليه :- لا حشاك بس الجاي تسوي غلط قرر رتب امورك ……..وسكتوا اثنينهم ……. ورا كم دقيقة كالت :- ابن عمتها ومستقتل عليها وصارله سنين يريدها ومن جانو بكربلاء انفتح موضوع خطوبتهم لان كلام أهل من سنين صاير ياقوت لسيف وسيف لياقوت ………
فارس بأنفعال:- يا نعال أنوب …… وهي تريده ؟
هزت راسهه نافيه :-لا وكالت لابوها قبل فتره بس الظاهر أبوها بعده ماحاسم الموضوع ويه الولد ….. والعيله كلهم يردوها تتزوجة وجاي يضغطون عليها ……
سكت مجاوبهه بس ملامح الانزعاج جانت واضحه. وتشرح كلشي ونورهان هنا تأكدت اخوها مشاعره اكبر من الإعجاب ………………
طبت البيت متوقعه تلگه سيف موجود بس تفأجات بعدم وجودة وهي مجابت طاري ….. توجهت لغرفتها سبحت بسرعه وذبت روحها على فراشهه وغاصت بنومه عميقه ……………..حست الدنيا قريب المغرب فتحت تليفونها وشافت اكو رساله عالواتساب من رقم غريب مبي صورة ولا أي معلومه …. مكتوب بيها
من تزعل توحشني الدنيا
واتصور غيرت ضنونك
ومن ترضى يظل شوك البيه
يذوبني بنظرات عيونك ….. عيونك ……..
